تەمكىن:ئۈرۈمچى

ئۈرۈمچى

1
ئەڭ گۈزەل بىر قىز سەن بۇ يەردە يەكتا،
شىۋىرغان چۈشىنى كۆرمىگەن زىنھار.
جىمى ئەل  ۋەسلىڭچۈن تۇرار يېلىنجاپ،
زىمىستان سېنىڭدە ئەيلىگەن باھار.

قىزىلتاغ، يامالىق سېنىڭ جۈپ كۆكسۈڭ،
ئۈستۈڭدە بۇلۇتلار ئەگىيدۇ يۇم-يۇم.
يۇلتۇزسىز كېچىدە توك كەتكەن كۈنى،
بىلىمەن، يۈرىكىڭ ئىزىلدى چوقۇم.

             2

دۆڭكۆۋرۈك بوينىنى سوزار جەنۇپقا،
ئاق رەڭلىك رېۋايەت ئىچىدە مەغرۇر.
ئۇيقۇسى بۇزۇلغان كونسۇل كوچىسى،
چۈمبەللىك كۆزلەرگە تىلەيدۇ غۇرۇر.

ئەڭ ئارقا كوچىدا ئۇچىدۇ پۇر-پۇر
ھەرىپكە ئايلىنىپ ئوتتۇز ئىككى روھ.
ئىزىلگەن ياپراقلار قىلىدۇ نىدا:
-بىر مەرتە كىمەڭنى ئەكەلسەچۇ نوھ؟!

روھ ھەر كۈن مىڭ ئۆلۈپ مىڭ بىر تىرىلەر
يۈرەكلەر لەيلەيدۇ كۆز ياش ئىچىدە.
قىزىغان قانلاردىن ئۆرلەيدۇ سۈكۈت
ئۇلىنىپ خىياللار توكسىز كېچىگە.

          3

ئۈرۈمچى
ئۆتمۈشنى بۈگۈنگە ئۇلاپ ھەرىپتەك
بىر قىزسەن مەرتلىكتىن تىكلەنگەن ئۇدۇم.
يۇلتۇزسىز كېچىدە توك كەتكەن كۈنى
بىلىمەن، چۈشلىرىڭ بۇزۇلدى چوقۇم.


بۇ يازمىنى ئاخىرىدا   تەمكىن تەھرىرلىگەن. ۋاقتى  2015-2-25 17:46  

بەركەت تاپقايلا، ئۆرۈمچىنىڭ كوچىسىنى خىيال ئىلكىدى بىر ئايلاندۇرۇپ چىقتىلغۇ،سالامەتلىك تىلەيمەن .

«جېنىم ئۈرۈمچى» دېگەن شېئىرنىڭ تەمىنى سېغىنىپ قالدىم....

بەلكىم شۇنداقتۇر.لىكىن مەن لايىق كۆردۈم.

بەرىكەتلىك بولغايسىز ، ياقتۇردۇم !

      نېمە دېيىشمەيلى ، مىڭ يۇرتنىڭ بالىسى - بىر يۇرتتا  ‹‹ دىدار ›› لىشىمىز ، ‹‹ ئۇيىنىڭ مۆڭگۈزىگە ئۇرسا ، تۇيىقى سىقىرايدۇ ››.ئامانلا بولساق ، يەنە ‹‹ شىپاخانىدا  ‹‹ دىدارلىشىپ›› قالارمىز ،بەلكىم . [ئۇ كۈنلەر كەلمىسۇ !]

                                                       ئاسىيانىڭ  كىندىكى  سەن - ئۈرۈمچى ،
                                                       ھەم ئوچۇقسەن ھەم يېپىقسەن ھەم تۇتۇق ،
                                                        تۆت پەسىلنىڭ قاينىمىدا - ئۆرۈمچى ،
                                                        مۇساپىرنىڭ  لاگىرىدا  سەن  ئۇتۇق  !

بۇ شېئىرنىڭ چوڭقۇرىغىچە چۆكۈپ بېقىپسىز. شۇنى بىلىپ قالساقلا بولغىنى....

شائىرنىڭ بۇ شېئىرى كىشىنى ئۈرۈمچى توغرىسىدا ئويلاندۇرىدىكەن. بەركەتلىك بولغايسىز.

مەن دۆڭكۆۋرۈكتە...

يۇلتۇزسىز كېچىدە توك كەتكەن كۈنى
بىلىمەن، چۈشلىرىڭ بۇزۇلدى چوقۇم...

مېنىڭچە ،شائىر قىزغا ئوخشىتىش ئارقىلىق ،شېئىرنىڭ مەنا چوڭقۇرلىغىغا چۆكمەكچى بولغان...

چۈشەنسەكلا بولىدىغان، سۆزلىسەك تىل كۆيىدىغان بەزى ئىشلار بولىدۇ ئەمەسمۇ. توغرا باھانىمۇ بەزىدە دىگىلى بولمايدىغانمۇ ئىشلار بولىدۇ، رەھمەت چۈشەنگىنىڭزگە.