ئەلتۇغ: ئېيىق بىلەن مولۇن [ئۇلانما كۆچۈرۈش]

ئابدۇرۇسۇل مۇھەممەد ئەلتۇغ

ئېيىق بىلەن مولۇن
(مەسەل)

بىر توخۇنى تۇتىۋالغان بىر مولۇن،
ئىزدەپ كەچتە قونۇش ئۈچۈن بىر ئورۇن.

ئېيىقچاقنىڭ ئۆڭكۈرىگە كىرىپتۇ،
كۈلۈمسىرەپ ئاڭا سالام بېرىپتۇ:

دەپتۇ: دوستۇم قونۇۋېلاي بىر ئاخشام،
ئىچىڭ پۇشسا ئېيتاي بەكمۇ ئۇز ناخشام.

ماۋۇ توخۇ تۇرۇپ تۇرسۇن، قاراپ قوي،
دوستلۇق ئۈچۈن بىرەر قېتىم ياراپ قوي!

تاڭ ئاتسىلا ئۆز ئۇۋامغا كېتىمەن،
سېنى دائىم دوستۇمدەك ياد ئېتىمەن!››

تۇرۇپ قاپتۇ ئېيىق بىردەم ئويلىنىپ،
ئاچچىقىدا چىچاڭشىپتۇ خۇيلىنىپ.

‹‹ماقۇل!›› دەپتۇ ئىلاجىسىز دەملەپ چاي،
يېتىشىغا كۆرسىتىپتۇ راسلاپ جاي.

تۈن نىسبىدە مولۇن قوپۇپ غىپپىدە،
يەۋېتىپتۇ توخۇسىنى شىپپىدە.

پەي-تۈكلەرنى كۆمۈپتۇ بىر ئورىغا،
سۆڭەكلەرنى ئېپ قويۇپتۇ مورىغا.

چاندۇرماستىن ئۇخلىغان بوپ يېتىپتۇ،
ئۇنىڭغىچە كۈن چىقىپ تاڭ ئېتىپتۇ.

مولۇن قوپۇپ ئىزدىگەن بوپ توخۇنى،
چۆرگىلەپتۇ، ساپتۇ ئاللا-توۋىنى.

ئېيىقجانغا تىكىلىپتۇ بېزىرىپ،
خىجىللىقتىن ئېيىق مىڭبىر قىزىرىپ.

ئويلاپتۇ:‹‹ راست، تۇرسا توخۇ ئامانەت،
يوقاپ كەتسە ماڭا قانچە ئاھانەت؟!

مېھمان ئۈچۈن بېرەي مەيلى جانىمنى،
ئەرزىيدىغۇ يېرىپ بەرسەم قارنىمنى!››

مولۇنغا ئۇ بىر توخۇنى تۆلەپتۇ،
ھېساب-كىتاب شۇنىڭ بىلەن تۈگەپتۇ.

كەچ كىرگەندە كەپتۇ مولۇن سۇس كۈلۈپ،
قولتۇقىغا بىر توخۇنى قىستۇرۇپ.

ئۆتۈنۈپتۇ: قونۇۋالاي بىر قېتىم،
ئۆيۈم يىراق، بىلىسەنغۇ ئەي ئىنىم!

ئېيىق ئاڭا كۆرسەتسىمۇ كۆپ سەۋەب،
بىراق مولۇن ئۇنىماپتۇ ئېسەدەپ.

ئىچى ئاغرىپ ئېيىقجاننىڭ ئۇنىڭغا،
جاي كۆرسىتىپ بېرىپتۇ بىر بۇلۇڭغا.

تۈن نېسبىدە مولۇن تۇرۇپ ئورنىدىن،
توخۇسىنى چىشلەپ ئېغىز-بۇرنىدىن.

پاك پاكىزە يەۋېتىپتۇ ئىزمۇ يوق،
خورەك تارتىپ ئۇخلاپتۇ ئۇ بەخۇدۇك!

تاڭ ئېتىپتۇ، باشلاپتۇ ئۇ يىغىنى،
ئىزدىگەن بوپ ئېيىقنىڭ ئۆي-بېغىنى.

ئويغىنىپتۇ ئېيىقتىمۇ بىر گۇمان،
يۈرىكىنى ئورىۋاپتۇ بىر تۇمان.

بىر توخۇنى تۆلەپ يەنە ئامالسىز،
ھەيدەپتۇ تېز مولۇننىمۇ ھايالسىز.

كەچ كىرگەندە مولۇن يەنە دىككاڭشىپ،
بىر توخۇنى قولتۇقلىغاچ، لىككاڭشىپ.

كىرىپ كەپتۇ: بۈگۈن كېچە قوناي دەپ،
ئاغا سېنى يەنە بىر دەم پۇراي دەپ.

‹‹ماقۇل!›› دەپتۇ ئېيىق كۈلۈپ يالغاندىن،
جاي راسلاپتۇ تۆرگە تاۋار-دۇردۇندىن.

ئېيىق ئاستا ئويغىنىپ تۈن نېسبىدە،
كەپتۇ ئاستا دېرىزىنىڭ تۈۋىگە.

قاراپ تۇرسا مولۇن توخۇ يەۋاتقان،
(ئۇ ھەر كۈنى توخۇ يۈتتى دەۋاتقان؟!)

ئۇۋىسىدىن چىقىپ ئېيىق غىپپىدە،
شۇم مولۇننىڭ بوغۇپ گالدىن غىققىدە!

دەس كۆتۈرۈپ تاش ئۈستىگە ئېتىپتۇ،
بىر چىرقىراپ مولۇن قوپماي يېتىپتۇ.

پۇشمان يەپتۇ قىلغان ئەسكى ئىشىغا،
مەككارلىقى چىقىپتۇ ئۆز بېشىغا!!!

(ئاپتور: يەكەن ناھىيە مىشا يېزىلىق ئوتتۇرا مەكتەپتە)

بۇ يازمىنى ئاخىرىدا   ئەلتۇغ تەھرىرلىگەن. ۋاقتى  2015-2-17 17:38  

شىئېرلار ئوبدان چىقىۋاتىدۇ دېسە

بەك ياخشى چىقىپتۇ، ئەمدى بىرەر كىتاپ تۈپلەيلى!

شېئىرى مەسەلدىن زۇقلاندىم .

ئەلتۇغ بۇرادەرنىڭ ئەجرىگە ئاپىرىن! نېمىشقا ئۆچەككە كىرىپ كەتكەندەك يوقاپ كىتىدىكىن دېسەم، بىر مۇنچە مەسەل «توغىۋىتىپ»تۇ ئەمەسمۇ؟! مەنمۇ چوڭقۇرچاقنىڭ پىكىرىنى قوللايمەن. پات يېقىندا ئوماقلىرىمىز ئۈچۈن ياخشى بىر مەسەللەر توپلىمىنىڭ روياپقا چىقىشىنى تىلەيمەن. ئامان بول!

ئادەتتە شىئىرى ئەسەرنى ئانچە ئوقۇمايتتىم بىراق بۇ ئەسەر مىنى ئۆزگە رام قىلۋالدى. شىئىرى مەسەلمۇ ياخشى ئكەنغۇ