ئۈمىدجان قادىرى: ئىككى غەزەل [ئۇلانما كۆچۈرۈش]

ئۈمىدجان قادىرى

سىماھىڭ جىلۋىسى ئاپتاپ،يىتەكلەپ كەلدى ئارماننى،
كۆرۈشكەن پەيتتە ھېس چاپچىپ،چىچەككە پۈركىدى جاننى.

نىگاھلار چاچرىتىپ ئۇچقۇن،دىلىمغا تولدى لىق ئىزگۈ،
ناۋا ياڭرايدۇ كۆكرەكتە،رەشىك بوغماقتا ھىجراننى.

قىيامى تۇيغۇلار مەۋجى ۋۇجۇد مەيلەندى زەپ خۇشروھ،
چۈچۈك تىل بىرلە سۆزلەتتى يېشىل چۈشلەرمۇ ئورماننى.

باھارنىڭ قۇشلىرى قەھ-قەھ ئۇرۇپ خۇشلۇققا جۆر بولدى.
قۇچار ۋەسلىمنى تەبرىكلەپ ئوقۇپ كۈي نەزمە-داستاننى.

خىيالىم بەرقىدىن تامدى ئانامغا مىڭ قىتىم تەھسىن،
تەۋەللۇت ئەيلىگەچ بەختى چىچەك ئاچقان ئۈمىدجاننى.

غەزەل كۈيلەنمىسى

كۈيلىرى تىمسال بۇلاققا،ئاي ھامان مەپتۇن غەزەل،
چۈشتىكى گۈرۇخ سىياققا ئولتۇرار پەيتۇن غەزەل.

سېھرىدىن ئەيلەپ تەۋەللۇت ئەبەدىيلىك ياز كۈنى،
تىككىنى دىللار بېغىغا ياپ-يېشىل زەيتۇن غەزەل.

پارلىغاي مىسرا بېيتنىڭ بەرقىدە چاشكاھ كۈلۈپ،
باشلىغاچ نۇسرەتكە ئەرنى،بولمىغاي مەھزۇن غەزەل.

ئۇ بۈيۈك ئارماننى يۈدگەن،ئەتىگە سەپراس قەدەم،
چىقمىغاي بىرمۇ غەلەتلىك،قىلسا مىڭ ئەپسۇن،غەزەل.

شۇ ئۇزاق مەنزىل يولىغا ياندۇرۇپ مەشئەل-زىيا،
باشلىغاي كارۋاننى يۈرگەن قىلمايىن ئازغۇن غەزەل.

سۈبھىدەم كاككۇكقا تەققاس،ئۈنلىتىپ تارلارنى ھەم،
يارىغا ئاشىقىنى ئەيلەر روھى شاد-جۇشقۇن غەزەل.

سىنىلار بولسا ئۈمىدجان گەرچە ھىجراندا يەنە،
سەۋرىدىن بەرگەن ئۆمۈرگە رەڭ-جۇلا مەزمۇن غەزەل.