تاجدار: ئىشخانىدىكى ئىشلار

30 قىسىملىق كومېدىيەلىك چاتما تېلىۋىزىيە تىياتىرى

ئىشخانىدىكى ئىشلار


ئاپتور: تۇرادىن ئابدۇرېھىم تاجدار



شىنجاڭ ئوكيان ئېلان چەكلىك شىركىتى.
2014-يىلى 22-دېكابىر.

فىلىمدىكى ئاساسلىق ئوبرازلارنى تونۇشتۇرۇش
1-پولات (پو جىڭلى).تولۇق ئوتتۇرا مەكتەپ مەدەنىيەت سەۋىيەسىگە ئىگە. ئەئەنە بىلەن زامانىۋىلىقنىڭ ئوتتۇرىسىدا تەمتىرەپ يۈرۈيدۇ. خاراكتېرى ئۆزگىرىشچان، ئەخلاقىي پەزىلىتى ئادەتتىكىدەك،بەك ئەقىللىقمۇ ئەمەس، شۇنداقلا بەك دۆتمۇ ئەمەس. شىركەتنى ئۆزىنىڭ ئەقىل-پاراسىتىدىن باشقا، شىركەت خادىملىرىنىڭ تىرىشچانلىقى بىلەن نورمال باشقۇرۇپ كېتىۋاتقان ئادەم. شۇنداقلىقىغا قارىماي چىراي ۋە تەققى-تۇرقى خېلىلا قاملاشقان. لەقىمى : «پورۋاش»
ئەڭ چوڭ يېتەرسىزلىكى : مەيدانى يوق. مۇھەببەت-نەپرىتى ئېنىق ئەمەس. قىز ئاياللارغا ئالاھىدە ھېرىسمەن. شۇڭا تۆتىنچى ئايالى بىلەنمۇ ياخشى ئۆتمەيدۇ. ئۇچرىغانلا قىز-ئاياللارغا گەپ قىلغۇسى بار. ئەمما ھازازۇل ئايالىدىن قورقۇپ گەپ قىلالمايدۇ.
2-ھۆرىقىز (ھۆ كاتىپ) ئالىي مەكتەپ تولۇق كۇرس مەدەنىيەت سەۋىيەسىگە ئىگە.شىركەتنىڭ باش كاتىپى.شىركەتنىڭ بارلىق مەمۇرىي خىزمەتلىرىگە مەسئۇل. چىرايى ئادەتتىكىچە. گەپنىڭ بېشىدا سەل كېكەچلەيدۇ. ئۆزى ناھايىتى بىلىملىك. خەنزۇ، ئېنگلىز تىللىرىنى ۋە كومپىيۇتېر بىلىملىرىنى پىششىق بىلىدۇ. خىزمەتتە قاتتىق ئەستايىدىل. شىركەتنىڭ بارلىق ئىشلىرى ئۇنىڭسىز يۈرۈشمەيدۇ. لېكىن خىزمەت ۋە ئۈگىنىش بىلەن بولۇپ كېتىپ ئۆز تۇرمۇشىغا كۆڭۈل بۆلەلمىگەچكە قاچانلا قارىسا رەتسىز كىيىنىپ يۈرىدۇ. شۇ سەۋەبتىنمۇ باشقىلار ئۇنى «كاللىسىنىڭ سۈيى بار» دىيىشىدۇ.تېخىچە توي قىلمىغان قىز. ئەڭ چوڭ يېتەرسىزلىكى: بەك ھېسسىياتچان. باشقىلارغا ئاسانلا ئالدىنىپ قالىدۇ.بەزى ئايالى بار ئەرلەر، ئۆزىدىن كىچىك بالىلار قالايمىقان، مەقسەتلىك گەپكە سالسىمۇ ئەستايىدىل جاۋاب بېرىدۇ. ھەممە ئىشقا ئۆز خاھىشى بويىچە مۇئامىلە قىلىدۇ. لېكىن ئاياللارغا قارىغاندا ئەرلەرگە ئامراق. لەقىمى «ھۆ قىز».
3-چىمەنگۈل.ئالىي مەكتەپ مەخسۇس كۇرس مەدەنىيەت سەۋىيەسىگە ئىگە.شىركەت بازار بۆلۈمىنىڭ خىزمەتچىسى. يېشى دېگىدەك چوڭ بولمىغىنى بىلەن چىرايى كۆرۈمسىزرەك.غەيۋەت قىلىشتا، ئۆسەك سۆز تارقىتىشتا شىركەت بويىچە بىرىنچى ئورۇندا تۇرىدۇ. شۇنداقلىقىغا قارىماي خىزمەتتە شۇنچىلىك ئاكتىپ. قىلغان ئىشىنىڭ نەتىجىسىنى چىقىرالايدۇ. شۇ تەرەپلىرى بولغاچقا باشقا يېتەرسىزلىكلىرىنىمۇ يېپىپ كېتەلەيدۇ. قىز-ئاياللارغا ئانچە قىزغىن ئەمەس. خىزمىتى ئاساسەن سىرتتا بولغاچقا داۋاملىق تاكسىغا چىقىپلا ماڭىدۇ. شۇ تەرەپلىرىنى كۆزدە تۇتتىمۇ باشقىلار ئۇنى «چىمەن تاكسىي» دەپ ئاتايدۇ.
4-مۇيەسسەر. ئالىي مەكتەپ تولۇق كۇرس مەدەنىيەت سەۋىيەسىگە ئىگە. شىركەت لايىھەلەش بۆلۈمىنىڭ لايىھەلىگۈچىسى. شىركەت بويىچە ئەڭ ئورۇق، ئەڭ ئېگىز قىز. لېكىن چىرايى، چېچى، ھەتتا قاش-كىرپىكلىرىگىچە  ساپ-سېرىق. گويا ئاپتاپپەرەسنىڭ گۈلىدەكلا. ئېلان لايىھەلەش خىزمىتىگە بەك پۇختا. شىركەت ئىشلىگەن ئېلانلارنىڭ كۆپ قىسمىنى ئۇ لايىھەلىگەن. شۇ سەۋەبتىنمۇ شىركەتتە ھېچكىمنى ئۆزىگە تەڭ قىلماي يۈرىدۇ. ھەددىدىن زىيادە ياسانچۇق. لېكىن ئەخلاق-پەزىلىتى بەك ياخشى. شىركەتتىكىلەر ئۇنىڭغا «سېرىق ئاسلان» دېگەن لەقەمنى قويغان.
5-سائادەت. تولۇق ئوتتۇرا مەدەنىيەت سەۋىيەسىگە ئىگە.شىركەت مالىيە بۆلۈمىنىڭ كاسسىرى. شىركەت بويىچە ئەڭ چىرايلىق قىز. لېكىن شىركەتتىكى بويتاق ئوغۇللارنىڭ ھېچقايسىسى ئەيمىنىپ ئۇنىڭغا گەپ قىلالمايدۇ. ئۇنى كۆرگەنلا ئادەم، مەيلى ئەر ۋە ئايال بولسۇن قارىغانسېرى قارىغىسى كېلىدۇ. ئۇنىڭ بىر ئالاھىدىلىكى ھەممە ئادەمگە ئوخشاش مۇئامىيلە قىلغانلىقتىن، كىم بىلەن مۇناسىۋىتى ياخشى، كىم بىلەن ياخشى ئەمەس بىلگىلى بولمايدۇ.ئۆزىنى بەك سىرلىق كۆرسىتىدۇ.ئۇنىڭ چىرايىغا قارىتا باشقىلار «سائادەت سەتەڭ» دېيىشىدۇ.
6- كەرىمە.ئالىي مەكتەپ مەخسۇس كۇرس مەدەنىيەت سەۋىيەسىگە ئىگە. شىركەت مالىيە بۆلۈمىدە بوغالتىر. يېشى قىرىققتا بولغىنى بىلەن شۇنچىلىك سېمىز. شۇنداق بولغاچقىمۇ ئۆزىنى بەك كىچىك دېيىشنى ياخشى كۆرىدۇ. ئىشى بەك ئالدىراش بولمىغاچقا كەچكىچە ئۇنىڭ بۇنىڭ بىلە مۇڭدىشىشقا ئامراق. باشقىلارنىڭ ئۆزىنى ئاچا دېيىشىنى ياقتۇرمايدۇ.(بولۇپمۇ ئاياللارنىڭ) تولىراق شۇ «ئاچا» ۋەقەسى بىلەن جېدەل قىلغىنىنى ھېسابقا ئالمىغاندا باشقا ئەيىبى يوق. باشقىلار ئۇنىڭ يۇپيۇمىلاق، سېمىز بەدىنىگە قاراپ ئۇنى« كەرىمە كاۋا» دەپ ئاتايدۇ.
7-مۇختەر. ئالىي مەكتەپ تولۇق كۇرس مەدەنىيەت سەۋىيەسىگە ئىگە.شىركەت ئارتىسلار بۆلۈمىدە. ئېلان ئارتىسى. چىمەنگۈلدىن قالسىلا گەپ توشۇش، باشقىلارنى جىدەلگە سېلىشقا ماھىر. بۇ قىلىقى پەقەت ئاياللار ئىچىدىلا چەكلىنىدۇ. چۈنكى مۇختەر شىركەتتىكى ئونبىر ئەر خىزمەتچىدىن كۆرە، يىگىرمە ئالتە ئايال خىزمەتچى بىلەن بەكرەك يېقىن ئۆتىدۇ. شۇنچە كۆپ ئايالنىڭ تۇغۇلغان كۈنلىرىنى ھەمدە يېشىنى، كىمنىڭ يېشى كىملىكىدە ئەسلى يېشىدىن چوڭ، كىمنىڭ كىچىك ئېلىنىپ قالغانلىقىدىن تارتىپ ئېنىق بىلىدۇ. مۇناسىۋەتكە شۇنچىلىك ماھىر. ئۇ سەھنىدىمۇ، تۇرمۇشتىمۇ ئوخشاشلا ھەقىقىي «ئارتىس». خاراكتېرى دېگەن گويا تاغنىڭ ھاۋاسىدەك ئۆزگىرىشچان. چىراي، بەدەن شارائىتى جەھەتتە ئەرلەرنىڭ ئىچىدە شىركەت بويىچە ئەڭ ئالدىدا. بىر يەردە بەش مىنۇتتىن ئۇزۇن تۇرالمايدۇ. ئۇ ئىشخانىدىن بۇ ئىشخانىغا قاتراپلا يۈرىدۇ.باشقىلار ئۇنىڭ قىزلاردىمۇ ئاز تېپىلىدىغان ئاپئاق يۇمران چىرايى ۋە چاققان تۇرقىغا قاراپ «مۇختەر مانتا» دېگەن لەقەمنى قويغان.
8-تاھىر. ئالىي مەكتەپ تولۇق كۇرس مەدەنىيەت سەۋىيەسىگە ئىگە. شىركەت رېژىسورلار بۆلۈمىنىڭ باش رېژىسورى.قوشۇمچە شىركەتنىڭ مۇئاۋىن دىرېكتورى. شۇنداقلىغىغا باقماي گەپنى ناھايىتى ئاز قىلىدۇ.يېشى 35 لەرگە كەلگەن بىلەن تېخى توي قىلمىغان بۇ يىگىتنىڭ تۇرقىدىن قارىسىڭىز ئەمدى يىگىرمە بەشلەرگە كىرگەندەك كۆرۈنىدۇ. توينىڭ، قىزلارنىڭ گېپىنى قىلسىلا خۇيى تۇتۇپ قالىدۇ. شۇ مىجەزىگە قاراپ باشقىلار ئۇنى «تاھىر تاڭسېڭ» دەيدۇ.
9-سۇلايمان. ئالىي مەكتەپ مەخسۇس كۇرس مەدەنىيەت سەۋىيەسىگە ئىگە. شىركەت ئېلان بۆلۈمىدە يازغۇچى. ئۇنى يازغۇچى دېگەندىن كۆرە «قوشاقچى» دېگەن تۈزۈك. چۈنكى ئۆزى ئاجايىپ گەپدان. شۇ سەۋەپلىك گەپنى سەل جىقراق قىلىدۇ.لېكىن گەپلىرى ئاجايىپ يۇمۇرلۇق. مۇشۇ قوشاق دېگەنگە شۇنداق ئۇستا. يولدا ماڭسىمۇ، تاماق يېسىمۇ ھەتتا ھاجەتخانىدا ئولتۇرسىمۇ يېڭى قوشاق ئۈستىدە ئويلىنىدۇ. سېنى بىر كۆرسىلا بىردەمدە كەلتۈرۈپ بولىدۇ. لەقىمى:«سۇلايمان قوشاق».
10-شاۋكەت. تولۇق ئوتتۇرا مەدەنىيەت سەۋىيەسىگە ئىگە. شىركەت ئوپېراتورلار بۆلۈمىنىڭ باشلىقى. تونۇلغان ئوپېراتور. داڭلىق ماركىلىق ئاپپاراتىنى دائىملا يېنىدىن ئايرىمايدۇ.ئاچچىقى يامان. چۇس مىجەزلىك. شۇ سەۋەپتىن رېژىسور ۋە ئارتىسلار ئۇنى كۆرسە جىملا بوپ كېتىدۇ. باشقا ئوپېراتورلار بەش-ئالتە قېتىمدا ئېلىپ بولالمىغان كۆرۈنۈشنى ئۇ بولسا بىر ياكى ئىككى قېتىمدىلا ئېلىپ بولىدۇ. ئۇنىڭ مۇشۇنداق چۇس مىجەزىگە يارىشا لەقىمىمۇ سەتلا. «شاۋكەت ساراڭ».
قوشۇمچە شىركەتتىكى باشقا خىزمەتچىلەر، ئېلان ئىشلەتكۈچى كارخانىچىلار، پولاتنىڭ ئايالى( دۆلەتنىسا) قاتارلىقلار.
1-        قىسىم
خىزمەت تەقسىماتى
1
ئېكراندا مەركىزىي شەھەرنىڭ قايناق مەنزىرىسى. مىغىلداپ يۈرگەن ئادەم ۋە ماشىنىلار، ئېگىز-ئېگىز بىنالار كۆرۈنىدۇ. كۆرۈنۈش بارا-بارا يېقىنلىشىپ ئالتە قەۋەتلىك بىر بىنانىڭ ئىككىنچى قەۋەت بىلەن ئۈچىنچى قەۋەت ئوتتۇرىسىدىكى بوش يەرگە بېكىتىلگەن « ....ئېلان-سەنئەت شىركىتى» دېگەن ۋېۋىسكا ئېنىق كۆرۈنىدۇ. كۆرۈنۈش ئالمىشىپ بىنا ئىچىدىكى ئىشخانىلاردا ئالدىراش خىزمەت قىلىۋاتقان ئادەملەر كۆرۈنىدۇ. مۇشۇ كۆرۈنۈش توختاپ فىلىم ئىسمى چىقىدۇ.
2
مەلۇم ئېلان – سەنئەت شىركىتى خىزمەت بىناسىنىڭ پەلەمپېيى. ئەتىگەن.
شىركەت كاتىپى ھۆرىقىز (30 ياش) بىر قولىدا سومكا، بىر قولىدا بىر تەشتەك گۈل كۆتۈرۈپ ھاسىراپ- ھۆمۈدىگىنىچە پەلەمپەيدىن چىقماقتا.
3
شىركەتنىڭ چوڭ زالىدىكى كۈتىۋېلىش ئورنى. ئەتىگەن.كۈتۈۋېلىش پۇكىيىدە شىركەت بازار بۆلۈمدىكى چىمەنگۈل (26 ياش) ئولتۇرىدۇ. شىركەت دىرېكتورى پولات (35 ياش) قولىدا بىر دەپتەر قەلەمنى تۇتقىنىچە تام سائىتىگە قاراپ تۇرىدۇ.سائەت 8:03 دېگەن رەقەمنى كۆرسىتىپ تۇرىدۇ. ھۆرىقىز ھاسىرىغىنىچە زالغا كىرىپ ئاچچىقى بىلەن قاراپ تۇرغان دىرېكتورنى كۆرۈپ چۆچۈپ كېتىپ قولىدىكى تەشتەك يەرگە چۈشۈپ كېتىدۇ.
پولات: مۇشۇ ۋاقىتقىچە نەلەردە يۈردىڭىز خېنىم؟
ھۆرىقىز : (سافادا ئولتۇرغاچ) نە.. نە.. نەلەردە يۈرمىدىم پو جىڭلى، ئۆيدىن كەلدىم مەن. (تۇمشۇقلىرىنى ئۇشلاپ ھۈرپىيىدۇ)
پولات: تۈنۈگۈنكى خىزمەت تەقسىماتىنى ئۇنتۇپ قالدىڭىزمۇ جانابىي كاتىپ خېنىم؟«بارچە گۇناھ ئۆزۈمدە تۇرۇپ قاپ كۆتۈرۈپ نەگە باراي» دېگەندەك تېخى ھۈرپىيىسىزغۇ؟
ھۆرىقىز: ئا..ئاران ئۈ..ئۈچ مىنۇت كېچىكىپتىمەن شۇ.قالغانلارمۇ تېخى ئەمدى كېلىۋاتقاندۇ؟
پولات: ئېشىكىڭىز ھېرىپ قاپتۇ خېنىم، سىزدىن باشقا ھەممەيلەن كەپ بولدى.
ھۆرىقىز: بو..بوپتۇ، كەپ بوغان بولسا. كېچىنىڭ ياقى سىلىنىڭ خوتۇنلىرىنىڭ ماتىريالىنى تەرجىمە قىلىمەن دەپ تاڭ ئاتاي دېگىچە ئىشلىگەنتىم قارىسىلا، ئۇخلاپ قاپتىمەن.
پولات: ماڭا ئۇنداق ئاقماس باھانە-سەۋەپلىرىڭىز كېرەك ئەمەس.
نەق نەتىجە لازىم.
ھۆرىقىز: ئە..ئەتىگەندە نېمە نېرۋامغا تېگىلا؟ بازاردىن 30 كويغا ئالغان گۈلۈممۇ چېقىلىپ كەتتى مانا. جىڭلى بولغاندىكىن بى سۈپەتلىرىنى ساقلاپ چوڭ سۈپەت ئىشخانىلىرىدا ئولتۇرسىلا بولمامدۇ؟ ئو..ئوش. (سومكىسىنى كۆتۈرۈپ ئىشخانىسىغا ماڭىدۇ)
4
ئىشخانىلارنىڭ ئالدىدىكى كارىدور. كۈندۈز.
«كاتىپ ئىشخانىسى» دېگەن خەت چاپلاقلىق ئىشخانىنىڭ ئىشىكىگە بىر دانە كىچىك سېرىق بايراق ئېسىلغان. ھۆرىقىز ئىشىكنى ئاچماقچى بولۇپ بايراقنى كۆرۈپ قاتتىق ئاچچىقى كېلىپ ۋارقىرايدۇ.
ھۆرىقىز: قا..قايسىڭنىڭ قىلغان ئىشى ماۋۇ؟
باشقا ئىشخانىدىكىلەر بۇ چىقىراق ئاۋازدىن چۆچۈپ ئىشىكتىن بېشىنى چىقىرىپ قارىشىدۇ.ئۈستۈنكى قەۋەتتىن سائادەتنىڭ بېشى كۆرۈنىدۇ.
سائادەت: (24 ياش) مەن قىلدىم، ھۆ كاتىپ.
ھۆرىقىز: نې..نېمىدەپ ماڭا سېرىق بايراق بېرىسىز خېنىم؟
سائادەت: تۈنۈگۈنكى خىزمەت تەقسىماتىنى ئۇنتۇپ قالدىڭىزمۇ ئاچا؟ مېنى شىركەتنىڭ خوجىلىق ئىشلىرىغا مەسئۇل بولغاچ تازىلىق ئىشلىرىنى باشقۇرۇڭ دېگەن ئەمەسمۇ. شۇڭا كېچىدىن ئۇخلىماي مۇشۇ چارىنى ئويلاپ تاپتىم.كىمنىڭ ئىشخانىسىنىڭ تازىلىقى   ياخشى بولمىسا ئىشىككە سېرىق بايراق ئېسىلىدۇ.شۇ ئايلىق ئۈنۈم مائاشى تۇتۇلىدۇ. ھەمدە ئۈچ كۈن ھاجەتخانا تازىلايدۇ.    قانداق بوپتىمۇ بۇ ئامالىم؟
ھۆرىقىز: ھە، بو..بوپتۇ. بەك ياخشى بوپتۇ.تازىلىقنى ئەمدى قىلسام بولىدىغاندۇ؟
سائادەت: تۈنۈگۈن ئۆزلىرى چىقارغان قاراردا ھەر ئىشخانىدىن بىردىن ئادەم ئەتىگىنى يېرىم سائەت بۇرۇن كېلىپ تازىلىق قىلىشى كېرەك. سائەت دەل سەككىزدە تازىلىق تەكشۈرلىدۇ دېگەنتىڭىزغۇ؟
ھۆرىقىز: ھە...ئە. شۇنداق دېگەندەك قىلغان. ۋاي تازىلىسام تازىلىدىم ھاجەتخانا دېگەننى. ۋاييەي. لېكىن ئۈنۈم مائاشى...(ئۈنى ئىچىگە چۈشۈپ ئىشخانىسىغا كىرىپ كېتىدۇ)
5
كاتىپ ئىشخانىسى. كۈندۈز. ھۆرىقىز سومكىسىنى قويۇپ ئورۇندۇققا بېرىپ كومپىيۇتېرنى ئاچىدۇ. سېمىزلىكتىن ئاران ماڭىدىغان شىركەت مالىيە خادىمى كەرىمە (40 ياش)كىرىدۇ.
كەرىمە: ئەسسالام، كاتىپ خېنىم.
ھۆرىقىز: ۋەئەلەيكۇم ئەسسالام. كەرىمە ئاچا.
كەرىمە: مەن سىزنى ئاچا دېمىسەڭ رەنجىيمەن دېدىممۇ ھۆرىقىز؟ ئادەمنى قېرىتىپ ئاچا، ئاچا دەۋەرمەي بى كەرىمە دېسىڭىزچۇ؟سىزلا قالدىڭىز مېنى شىركەتتە ئاچا دەيدىغاندىن.
ھۆرىقىز: ھوي، سىز تۇيۇقسىزلا بۇ گەپنى قىپ قاپسىزغۇ؟ نەچچە ۋاقىتتىن بېرى ئاچا دەپ ئەمدى كەرىمە دېسە غەلىتە تۇرىدىكەن.
كەرىمە: ئۇغۇ توغرا، ئادەتلەنسىڭىز بولىدىغۇ. بۈگۈندىن باشلاپ قىزىمنىمۇ ئاپا دېگۈزمەي ئاچا دەپ ئۈگىتىمەن. (شۇ چاغدا تېلىفون جىرىڭلايدۇ. ھۆرىقىز تېلفوننى ئالىدۇ)
ھۆرىقىز: ۋەي، ھە مەن شۇ. ھە ماقۇل. مەن ھازىر چىقاي.
كەرىمە: كىمكەن ئۇ؟
ھۆرىقىز: كى ...كىم بولاتتى، قەدىرلىك پو جىڭلى.
كەرىمە: ۋايجان، ئاران بىر مۇڭدىشىپ چىقاي دەپ كىرسەم، نېمە دەيدىغاندۇ بۇ ئادەم ئەمدى.
ئىككىسى ئورنىدىن تۇرۇپ سىرتقا چىقىدۇ.
6
باش درېكتور پولاتنىڭ ئىشخانىسى. كۈندۈز.
پولات: قاراڭ ھۆرىقىز، تۈنۈگۈن ئاچقان يىغىننى بۈگۈن ئۇنتۇپ قالسىڭىز. ئۇنىڭ ئۈستىگە بۇ قارارنى ئۆزىڭىز بېكىتكەن ئەمەسمۇ.
ھۆرىقىز: مە..مەنغۇ ئۇنتۇپ قالمىغان قاراڭ. شۇ سىلىنىڭ خانىملىرىنىڭ تەرجىمە قىلىدىغان ماتىريالىنى بۈگۈن يوللايدىكەن. ئاخشام يېرىم كېچىگىچە ئىشلىگەنتىم. شۇڭا ئۇخلاپ قاپتىمەن.
پولات: بۇنداق گەپلەرنى باياتىنقىدەك ئادەم بار يەردە دېمەي ھازىرقىدەك ئايرىم قالغاندا دېمەمسىز دەيمە.
ھۆرىقىز: سى..سىلىمۇ نېمىشقا ئادەم بار يەردە ماڭا توڭ تېگىلا؟
پولات: شۇنداقراق تېگىپ قويمىسام ئاۋۇ چىمەن تاكسىينى بىلىسىزغۇ .بىر دەمدە : پو جىڭلى ھۆ كاتىپ بىلەن ... مۇنداق( ئىككى قولىنىڭ بېگىز بارمىقىنى جۈپلەيدۇ) كەن دەپ گەپ تارقىتىدۇ.
ھۆرىقىز: ۋا..ۋايجان، تارقاتسا تارقاتمامدۇ.ئىككىمىزنى يېلىمدا يەملىۋەتسىمۇ چاپلاشمايمىز بىز.
پولات: ئۇنچە ئالدىراپ كېسىۋەتمەڭ ھۆ كاتىپ. مەنمۇ ئۇنچىۋالا ئەسكى ئەمەس جۇمۇ.
ھۆرىقىز: ۋا...ۋاي قويسىلا پو جىڭلى. سىلىنىڭمۇ پولىرى مۇشۇ شىركەتتىلا ئاقىدۇ. ئۆيلىرىگە بارسىلا سىلىدىن يۇۋاش ئادەم يوق. باشقا گەپلىرى بولمىسا مەن چىقاي ئەمىسە.
پولات: چاقچاق قىپ قويدۇم. ئولتۇرىڭا بىردەم.
ھۆرىقىز: قى...قىلىدىغان ئىشنى بىر پاتمان ئورۇنلاشتۇرۇپ قويۇپ مېنى ئولتۇرۇڭ دەيدىلىغۇ؟ يەنە ئادەم بار يەردە تىللاپ تىللىۋېلىپ، ئىشخانىغا كىرگەندە: « شۇنداق دېمىسەم باشقىلارغا گېپىم ئۆتمەيدۇ، رەنجىمەڭ» دەيدىغان مىجەزلىرىنى خېلى ئوبدان بىلىمەن مەن. بولدى مەن چىقاي.( ئورنىدىن تۇرۇپلا ئىشىكنى ئاچىدۇ)
7
دىرېكتور ئىشخانىسىنىڭ ئالدى. كۈندۈز.
ھۆرىقىزنىڭ ئىشخانىدىن چىقىشى ئىشىك تۈۋىدە گەپ تىڭشاپ تۇرغان چىمەنگۈلگە پۇتلىشىپ ئىككىسى سوقۇلۇپ كېتىدۇ.بۇ ۋاراڭ-چۇرۇڭنى ئاڭلاپ ھەممە ئىشخانىدىكىلەر كارىدورغا چىقىدۇ
ھۆرىقىز: نى...نېمە ئىش قىلىسىز بۇ يەردە؟
چىمەنگۈل: پو جىڭلىنىڭ قېشىغا كىرەتتىم. سىزمۇ قاراپراق چىقسىڭىز بولمامدۇ؟ كالىدەك ئۈسسۈپلا ماڭىدىكەنسىز.
ھۆرىقىز:  كى...كىرىدىغان چاغدىغۇ ئىشىكنى چېكىپ كىرەمەن. ئەمدى چىقىدىغان چاغدىمۇ چېكىپ چىقامتىم خېنىم؟ تاكسىنىڭ چىرىقىنى ياندۇرۇپ ماڭسىڭىز سوقۇشمايتتىڭىز. تايىنلىق بۈگۈنكى خەلقئارا خەۋەرگە ئاخبارات توپلاۋاتقانسىز. (ھەممەيلەن كۈلۈشۈپ كېتىدۇ. پولات ھەممىسىنى كىرگۈزىۋېتىدۇ)
چىمەنگۈل بىلەن ھۆرىقىز باشلىرىنى سىيلىغىنىچە بىر-بىرىگە ئالىيىپ ئىشخانىلىرىغا ماڭىدۇ.
8
لايىھەلەش ئىشخانىسى. كۈندۈز.
لايىھەلەش خادىمى مۇيەسسەر (25 ياش) ئۈستەلدە ئولتۇرۇپ ھەدەپ ئەينەككە قاراۋاتقاندا كەرىمە كىرىدۇ.
كەرىمە: ۋاي مۇيەسسەر خېنىم، ئەينەككە قاراۋەمىسىلىمۇ سىلە شۇنداق چىرايلىق تۇرسىلا.
مۇيەسسەر: ۋاي رەھمەت. كەرىمە ھەدە. كېلىڭ ئولتۇرۇڭ.
كەرىمە: قاراڭ مۇيەسسەر، سەنئەت ئۆمەكتە بىزنىڭ يۇرتلۇق بىر قىز بار. يېشى سىزدەك چىقىدۇ. شۇنداق تۇرۇپ مېنى پەقەت ئاچا دېگىلى ئۇنىمايدۇ قاراڭ. ئۆزەمنىڭ ئۇنىڭدىن چوڭ ئىكەنلىكىمنى نەچچە قېتىم ئېيتتىم بولمىسا.( مۇختەر كىرىدۇ)
مۇختەر: ۋاي كەرىمە ئاچ...ھە. كەرىمەقىز، سىزنى ئىزدەپ كېتىپتىمەن تېخى. بۇ يەرگە كىرىۋاپتىكەنسىزدە. مېنىڭ ئاچچىقىم كېلىدۇ جۇمۇ. تولا مۇيەسسەرنىڭ بېقىنىغا كىرىۋالماڭ .
كەرىمە: ۋاي مۇشۇ مۇختەرجاننىڭ ئاغزى نېمانچە تاتلىقتۇ دەيمەن جۇمۇ. ئانىڭىز نېمىدە ئېغىزلاندۇرغان بولغىيتى سىزنى.
مۇيەسسەر: ئەمدى ئۆتەپ-تېشىپ ئاياللاردىنمۇ قىزغىنىۋاتامسىز مېنى؟ بىز يا بى ھېلىقىدەك (مۇختەرنىڭ قۇلىقىغا پىچىرلايدۇ) ئاياللاردىن بولمىساق .
كەرىمە: سىلەر ھېلىتىن پىچىر-پىچىرغا چۈشتۈڭلار. مەن .استا ئۇۋامغا قايتاي جۇمۇ.
مۇختەر: كەرىمە خانىم. باراڭلىرىغا چىقىۋامماي تۇرسىلا. تەستىقلىتىپ بولغان ھۆججەت بارتى. تامغىلىرىنى پوككىدە بىر بېسىۋەتكەن بولسىلا.
كەرىمە: بىكارغا ئىش يوق غوجام. ھازىر مۇيەسسەر بىلەن نېمە دىيىشكەنلىكلىرىنى دەپ بەرسىلە. يەنە كەچتە مۇيەسسەر ئىككىمىزنى مېھمان قىلسىڭىز بېسىپ بېرىمەن. بولمىسا ئىشىم ئالدىراش مېنىڭ. چىقىپ توردا كىنو كۆرىمەن.
مۇختەر: ۋاي شۇنچىلىك ئىشمىتى. پىچىر-پىچىرنىڭ مەنىسىنى ھېلى مۇيەسسەر دەپ بەرسۇن. مېھمان قىلىشقا كەلسەك بۈگۈن ئەمەس ئەتە بولسۇن.
كەرىمە: مېنىڭ نىسىيدىن تەلىيىم يوق ئەمەسما مۇختەرجان؟
مۇختەر: قاراڭ كاۋاقىز، ئەتە شىركىتىمىزنىڭ ئالتۇنگۈلى-مۇيەسسەر خېنىمنىڭ قۇتلۇق تۇغۇلغان كۈنى. شۇڭا ئەتە بىراقلا ئولتۇرايلى قانداق؟
كەرىمە: ۋاي بولىدۇ، غوجام، بولىدۇ. قېنى يۈرسىلە ئەمىسە.
(چىقىپ كېتىدۇ. مۇيەسسەر كۈلگىنىچە ئولتۇرۇپ قالىدۇ)
9


بۇ يازمىنى ئاخىرىدا   چاخچاق تەھرىرلىگەن. ۋاقتى  2015-1-1 05:16  

ئىشخانا دېگەن نامدىنلا مەلۇمكى، ئىشخانا دېگەندە  ھەر خىل ئىش كۆپ بولىدۇ، بۇ ئاي، بۇ كۈنلەردە تېخىمۇ شۇنداق. «ئىشخانىدىكى ئىشلار»نى بىر كۆرەيلى، بىر ئاڭلايلى، قېنى، بىر-بىرلەپ ئوتتۇرىغا قويىڭە، ئىنىم.
  ئىپادىلەشتە سەھنە ئەسىرى شەكلىنى تاللىۋاپسىز، بەلكىم، سەھنە، ئىكرانلاردىمۇ كۆرۈشىمىزگە نېسىپ بولغاي.

ياخشى باشلىنىش ، غەيرەت قىلىڭ .

ئەركزات مۇئەللىم، باشتۇغ ئىنىم، ئەرزىمەس يازمامغا قىممەتلىك ۋاقتىڭلارنى چىقىرىپ نەزەر ئاغدۇرغىنىڭلارغا كۆپ رەھمەت. مەن بۇرۇن بۇ خىل ئەسەرلەرنى يېزىپ باقمىغان. 10 كۈننىڭ ئالدىدا مەن ئىشلەۋاتقان شىركەتنىڭ مەسئۇلى مېنى ئىشخانىسىغا چاقىرىپ: بىزنىڭ شىركەتمۇ 40 ئادىمى بار خېلى چوڭ بىر شىركەت بولۇپ قالدۇق. ھەممە نەرسىمىز تەييار تۇرسا، بىزمۇ بىر ئۆي ئىچى تىياتىرى ئىشلىمەمدۇق؟ سىز بۈگۈندىن باشلاپ «ئىشخانىدىكى ئىشلار» دېگەن چوڭ تېما ئاستىدا 30 قىسىملىق بىر تېلىۋىزىيە چاتما فىلىم سېنارىيەسىگە تەييارلىق قىلىڭ. 10 قىسىم پۈتكەندىن كېيىن تېلىۋىزىيە ئىستانسىسىغا سۇنىمىز. تەستىقلىنىپ قالسا دەرھال سۈرەتكە ئېلىشنى باشلايمىز، دېدى. مەن بۇرۇن بۇ خىلدىكى ئەسەرلەرنى يېزىپ باقمىغاچقا باشتا بىر ئاز تەمتىرەپ قالدىم. ئوبرازلارنى بېكىتىپ ، ھەر قىسىمنىڭ ھېكايىسىنى ئالدىن تەييارلىۋالغاندىن كېيىن ھەر ھالدا مۇۋەپپەقىيەتلىك باشلىۋالدىم. دىرېكتورنىڭ تەلىپى: «كۆرۈمىس قىز لېتسىيە» فىلىمىنى ئۆرنەك قىلىپ تۇرۇپ يېزىڭ. چوقۇم كومېدىيەلىك تۈسى قويۇق بولسۇن، دېگەچكە مەن شۇ تەرەپلەرنى چىڭراق تۇتۇپ يېزىۋاتىمەن. ئۇستازلارنىڭ پىكىر بېرىشىنى ئۈمىد قىلىمەن.

ياخشى ئىشتىن بىرگە تۇتۇش قىپسىز ،ئىزدىنىشىڭىزگە ئاپىرىن !كۆپرەك باش قاتۇرۇڭ ؟ يۈزەكە بوپ قالمىسۇن ؟يېڭىلىقمۇ ،ھەم كۈلكىلىكمۇ ،يۇمۇرىستىكمۇ ئارلىشىپ كەلسۇن !قەلىمىڭىزگە بەركەت تىلەيمەن !سىزنىڭ ياخشى يېزىشىڭىزغا ئىشىنىمەن !

بۇ ئىشنى ياخشى باشلاپسىز. قۇتلۇق بولسۇن. لېكىن بۇنداق ئىشنى روياپقا چىقمىغۇچە داۋراڭ قىلماسلىق لازىم ئىدى. سىز بۇ ئىش ئېغىزدىن چىقىپ 10 كۈن ئىچىدىلا ئەسەرنىڭ بىسمىللاسىنى باشلاپلا داۋراڭغا چۈشۈپسىز. ئەسلى پىلاندا بۇ ئەسەرنى تېلېۋىزىيە تىياتىرى قىلىپ ئىشلەش بولغاندېكىن، ۋاقتىنچە مەخپىي بولغىنى ياخشى ئىدى. بۇ ئىشىڭىز بولماپتۇ. سىنارىيىنى ئاشكارىلىۋەتسىز كىنوسىنى كىم كۆرىدۇ؟

دېگىنىڭىز توغرا ئۇيغۇران ئەپەندى. بۇنى مەنمۇ بىلىمەن. شۇڭا ئاخىرىنى يوللىمايمەن. پەقەت شىركەتنىڭ تەلىپى بويىچە مۇشۇنداق بىر فىلىم ئىشلىنىدىغانلىقىدىن كۆپچىلىكنى خەۋەردار قىلىش. بولمىسا ئوخشاش تېمىدا باشقىلارنىڭ يېزىشىمۇ تۇرغانلا گەپ. ھازىر ئىككى قىسىم پۈتتى. شۇنداق بولغاچقا ‹‹ئاخىرى داۋاملىق يوللىنىدۇ›› دېگەن گەپنى قىممىدىم ئەمەسمۇ. بىر قىسىمنىڭ ئازراقلا بۆلىكىنى يوللىدىم. سەمىمىي تەكلىپ بەرگىنىڭىزگە رەھمەت. قوللىشىڭىڭلارغا مۇھتاجمەن.

باشلىغىڭىزنىڭ تاپشۇرۇغى بويىچە «كۆرۈمسىز قىز لېتسىيە» نى ئۆرنەك قىلىشىڭىز خاتا ئەمەس. ئەمما مېنىڭچە سىز ئۇ فېلىمنى ئۆرنەك قىلىمەن دەپ بەك چىڭ ئېسىلىۋالسىڭىز ئىپادىلەش جەھەتتە سەل چەكلىمىگە ئۇچراپ قېلىشىڭىز مۇمكىن. مېنىڭ تەكلىۋىم، ئۇ فىلىمنىمۇ ئۆرنەك قىلىڭ، لېكىن يېزىش داۋامىدا تەپەككۇرىڭىزنى تېخىمۇ ئەركىن قويۇۋېتىڭ. بەلكى ئويلىمىغان ئۈنۈمگە ئىرىشىپ قېلىشىڭىز مۇمكىن. ئىشلىېىڭىزنىڭ ئۇتۇغلۇق بولىشىغا تىلەكداشمەن.

مىنىڭچە ئاۋال بىر ئككى قىسىمنى  مۇنبەرگەيوللاپ بىقىڭ   قەلەمكەشلەر پىكر قىلسۇن ياخشى چىقسىلا ئىشلەشنى باشلاڭلار

ئاخىرى قېنىدۇ؟

«ئىشخانىدىكى ئىشلار»نىڭ مۇۋەپپىقىيەتلىك روياپقا چىقىشىنى ئۈمۈد قىلىمەن. تىرىشىڭ قېرىندىشىم.

پۇرسۇناژلارنىڭ خاراكتىرىنى ياخشى تاللاپتۇ، خۇددى جەمىيەتنىڭ ئۆزىدىن ئالغاندەك.

     ياخشى قىپسىز، قەلىمىڭىزگە بەرىكەت بەرگەي! قاراپ باقسام ھەممە پىرسۇناژلىرىڭىزنى تۇنۇشتۇرۇپسىز، مىنىڭچە بۇ سەل ئارتۇقچىمۇ قانداق؟ سىز سىناريىڭىزدە پىرسۇناژ خارەكتىرىنى ياخشى ئىپادىلەپ بەرسىڭىزلا ئۇقۇرمەنلەرمۇ ئانچە دۆت ئەمەس، ئەسىرىڭىزدىنلا بىلىۋالالايدۇ. يەنە بىر مەسىلە 1-2مەيدانغا ئوخشاش مەيداننى «چاتما كۈرۈنۈشلەر»دىگەن سەھىپە ئاستىدىلا يېزىۋەتسىڭىز- بۇلۇدۇ. سىز كومىدىيە، لىتسىيە دەپسىز خاس كومىدىيەگىلا ئېسىلىۋالسىڭىز فىلىمىڭىز سۈنئى بۇلۇپ قالىدۇ، ئەمەليەتكە يۈزلۈنۈپ تۇرۇپ، كومىديەنى نۆۋىتى كەلگەندە تەبىئىلا قىستۇرۇپ ئۆتسىڭىز تېخىمۇ ياخشى. يېزىڭ، ياخشى يېزىپسىز، قوللىغىلى شىركەت بولغاندىكىن ياخشى بىر سىناريەنى يېزىپ ئىشلەپ بېقىڭ، ئىشلىرىڭىزنىڭ ئوڭۇشلۇق بۇلىشىغا تىلەكداشمەن!

بۇ فىلىمنى بىزدىن بۇرۇن تەستىقلىتىپ بولغانلار باركەن مانا. باشقىلار سۈرەتكە ئېلىشنى ئاللىبۇرۇن باشلاپ بوپتۇ. ئەمدى بىز ئىسمىنى ئۆزگەرتىپ ئىشلەيدىكەنمىز.

ھىچقىسى يوق تاجدار ئاكا، تۇزىتىپ ئىشلەۋەرسەڭلار بولدىغۇ؟ ھەر بىر ئەسەرنىڭ ئۆزگچە ئارتۇقچىلقى بولىدۇ كۆرۇرمەنلەر ئوخشاشلا ياخشى كۆرىدۇ. بۇ خۇددى بىر كوچىدا بىرقاتار راڭپىزخانا-لەڭپۇڭخانا بولسا خرىدارلار ئۆز ياقتۇرغىنى بويىچە تاللاپ يىگەندەك بىر ئىش، ھەر بىر راڭپىزخاننىڭ خرىدارى يەنىلا ئۆكسۇمەيدۇ!