چىنزات: جەنۇبىي تاغ لىرىكىلىرى [ئۇلانما كۆچۈرۈش]

جەنۇبىي تاغ لىرىكىلىرى

                    (سېكىل)

ئەسقەر ئوسمان چىنزات

      ئېلاۋە : ئاپتۇنۇم رايۇنلۇق ئەدەبىيات-سەنئەتچىلەر بىرلەشمىسىنىڭ كۆڭۈل بۈلۈپ ئۇرۇنلاشتۇرىشى، مەكىت ناھىيەلىك پارتىكوم ۋە خەلق ھۆكىمىتىنىڭ قوللىشى ۋە ئىختىزادى جەھەتتىن مەدەت بېرىشى بىلەن بۇ يىل 7- ئايدا مەكىت دولان قەلەمكەشلەر جەمىيىتىدىن 18 نەپەر يازغۇچى، شائىر ئاپتۇنۇم رايۇنلۇق يازغۇچىلار جەمىئېيتىنىڭ ئۈرۈمچى جەنۇبىي تاغدىكى تەربىيىلەش مەركىزىگە بېرىپ 10 كۈن تەربىيلەندۇق. بۇ سېكىلنى مۇشۇ قىتىملىق تەربىيلىنىش جەريانىدىكى ھىسىياتىم ئاساسىدا يېزىپ چىققتىم.
                                                                                        _ ئاپتۇردىن.

جەنۇبىي تاغنىڭ ئوتى

بىر ئوتنىڭ ئىشقىدا كېتىپ بارىمەن،
خىيالدەك ئالدىراپ جەنۇبىي تاغقا.
پات-پاتلا پىچىرلاپ دادلاپ قۇيىمەن،
ئاپتۇبۇس نېمىشقا ماڭىدۇ ئاستا؟

بۈركۈتتەك پەر قېقىپ ئۇچۇپ ئاخىرى،
ئاھ ، قوندۇق جەلىپكار جەنۇبىي تاغقا.
شۇنچىلىك تارمىدۇ ئىنساننىڭ باغرى،
پاتمىدى يۈرەككە شادلىق شۇ تاپتا.

جەنۇبىي تاغدا  لېكسىيە

باشلاندى لېكسىيە جەنۇبىي تاغدا،
ئازادكام① پەردىنى ئاچتى باش بولۇپ.
سۆزلىگەن ھەر سۆزى گۇيا بىر تامغا،
قەلبلەر شەربەتكە كەتتىغۇ تولۇپ.

ئەتىسى ئىمىنكام② چىقىپ سەھنىگە،
يىڭىدىن بىر ئوتنى ياقتى يۈرەككە.
ھەر ئېغىز سۆزىدە مىڭ كىتاب تەمى،
قەلبلەر چۈمۈلدى مىڭ بىر تېلەككە.

ئادىلجان③،ئۆمەرجان④،بەرقى⑤ۋە ئەيبۇ⑥،
لېكسىيە سۆزلىدى شۇنچىلىك تاتلىق.
ئابلىزكام ⑦سۆزىنى باشلىشى بىلەن،
قەلبتىن  تاشتىغۇ  ئالەمچە  شادلىق.

جەنۇبىي تاغدا ناخشا كېچىلىكى

بىر شائىرنىڭ
يالغۇز كىشىلىك ناخشا كېچىلىكى
ئۆتكۈزۈلدى جەنۇبىي تاغدا.
سەھنىسى يۇق،
قورو تېمى يۇق،
ھەيۋەتلىك دەرۋازىسى يۇق،
ئالا- يىشىل چىراغلىرى يۇق،
پورەك- پورەك ئېچىلغان گۈللەر
يۇلتۇز كەبىي چاقنىغان
كۆڭۈلدەك كەڭ تاشا شۇنداق بىر جايدا.
            
بىر شائىرنىڭ
يالغۇز كىشىلىك ناخشا كېچىلىكى
ئۆتكۈزۈلدى جەنۇبىي تاغدا.
فارابىينىڭ كۈيگە خۇمار قۇشلىرى
تەرەپ- تەرەپتىن
كېلىپ قوندى دۇتتارغا.
تاشۋاي
راۋابىنى ئېلىپلا
قايتىپ كەلدى ئازاب چۆلىدىن
خىيالدەك ئەركىن بۇ دۇنياغا.

بىر شائىرنىڭ
يالغۇز كىشىلىك ناخشا كېچىلىكى
ئۆتكۈزۈلدى جەنۇبىي تاغدا.
چاۋاكلار تۆكۈلدى ۋاگونلاپ،
بۇ دۇنيا كۆمۈلدى ئالقىشقا،
ھەممە چاۋاكنى
بارماق دېسكىغا پېرىسلاپ
تەقدىم قىلدى ئۆمەرجان ئىمىن
شائىر ناخشىچى
راخمانجان ئاۋۇت ئۆزھالغا.
            
ئاتقا مىندى ئەسقەر ئوسمان
   
جەنۇبىي تاغدا
تاقىراق- تاقىراق چاپتۇرۇپ
ئاتقا مىندى ئەسقەر ئوسمان.
ئۇچراپ قالدى
كۆك يايلىلىق بۆرىسىنى
ئەگەشتۈرگەن ئوغۇزخان.

جەنۇبىي تاغدا
تۇياقلاردىن ئوت چاقنىتىپ
ئاتقا مىندى ئەسقەر ئوسمان.
يۇمۇلاق ئۆيىدىن يۈگۈرۈپ چىقىپ
ئۆز كۆزىگە ئىشەنمىگەندەك
ھەيران بولۇپ قالدى چىڭگىزخان.

جەنۇبىي تاغدا
داۋاندىن داۋانغا شۇڭغۇپ
ئاتقا مىندى ئەسقەر ئوسمان.
تاغ بۈركۈتىنى قىينىدى
«مەنمۇ شۇنداق شۇڭغۇسام» دېگەن
ئاچچىق- چۈچۈك بىر ئارمان.

جەنۇبىي تاغدا
ئايرۇپېلان بىلەن بەسلىشىپ
ئاتقا مىندى ئەسقەر ئوسمان.
ئېشەنمىسەڭ ئېچىپ كۆزىڭنى
نەزەر سالغىن كۈتۈرۈپ بېشىڭنى،
بۇ شۇنداق ئاسمىنى كەڭرى بىر ماكان.

          2014-يىلى 7- ئاي، ئۈرۈمچى، مەكىت.

ئىزاھاتلار:
① ئازادكام _ ئاپتونۇم رايونلۇق ئەدەبىيات سەنئەتچىلەر بىرلەشمىسىنىڭ رەئىسى،  يازغۇچىلار جەمىيىتىنىڭ رەئىسى ئازاد سۇلتان.
②ئىمىنكام _ شىنجاڭ سەنئەت ئىنىستىتىۇتىنىڭ سابىق مۇدىرى، مەشھۇر شائىر ۋە ئەدەبىي تەرجىمان ئىمىن ئەھمىدى.
③ئادىلجان _ شىنجاڭ پەن-تېخنىكا نەشىرياتىنىڭ باش مۇھەررىرى ئادىل مۇھەممەد.
④ئۆمەرجان _ «شىنجاڭ سەنئىتى» ژورنىلىنىڭ مۇئاۋىن باش مۇھەررىرى، ئاتاقلىق مەدەنىيەت تەتقىقاتچىسى ئۆمەر ئىمىن.
⑤بەرقى _ شىنجاڭ پىداگوگىكا ئۇنۋېرسىتىتىنىڭ پىروفىسورى، دوكتۇر، يازغۇچى ئابدۇلئەھەد ئابدۇرەشىد بەرقى .
⑥ئەيبۇ _ شىنجاڭ يازغۇچىلار جەمىيىتى ئىجادىيەت-ئالاقە بۆلۈمىنىڭ مۇدىرى ، شائىر ئەيبۇ ياقۇپ.
⑦ئابلىزكام _ شىنجاڭ ياشلار- ئۆسمۈرلەر نەشىرىياتىنىڭ باش مۇھەررىرى ئابلىز قېيۇم.
                                                              
(«دولان مەدەنىيىتى» ژۇرنىلىنىڭ 2014- يىللىق 3- سانىدىن ئېلىندى)

كۇندۈزى ياز كېچىسى قىش بولغان، ئەمما ئاجايىپ ئەھمىيەتلىك ئۆتكەن شۇ كۈنلەرنى دائىم ئەسلەيمەن.

مۇشۇنداق ياخشى ئەسەرلىرىنى داۋاملىق يوللاپ تۇرۇشلىرىغا تىلەكداشمىز.

   ئىزگۈ ئىلھاملىرىڭىزغا يەنىمۇ زور نۇسرەت تىلەيمەن! تېخىمۇ بەرىكەتلىك بولغايسىز !

ئىلھاملىرىڭىزغا  مەدەت  تىلەيمەن.

دوستلارنىڭ ياخشى تېلەكلىرىگە رەھمەت...

دوستلارنىڭ يىڭى يىلىغا يىڭىچە ئۇتۇقلار يار بولغاي...

تەربىيلىنىش جەريانىدىكى خاتىرە رەسىمدىن بىرنى يوللىسام ، ئەپسۇس چىقماپتۇ.