سەۋدالىق تەئەججۈپنامىسى[ئابدۇشۈكۈر مۇھەممەتئىمىن]

ماھىرە · ۋاقتى: 2012-5-16 22:39:27


	ئەسسالامۇ ئەلەيكۇم مۇنبەردىكى ئەزىزلەر،كەچلىگىڭلار خەيىرلىك بولسۇن. يېقىندىن بېرى مۇنبەردە ئالىمنىڭ ئەسەرلىرى كۆپلەپ يوللىنىۋاتىدۇ.مەن ئالىمنىڭ ئەسەرلىرىنى ئوقۇشقا باشلىغان ئون نەچچە يىلدىن بېرى بۇ كىشىگە ھۆرمىتىم ئالاھىدە ،يەنە كېلىپ نەچچە يىلدىن بېرى تورلاردا ئالىمنىڭ ئەسەرلىرىنى يىغىپ ساقلاپ ، پايدىلىنىشنى خالايدىغانلارغا ياخشى بولغان بىر سورۇن ھازىرلاپ بېرىش مەخسىدىدە ،شۇنداقلا ئۆزۈممۇ پايدىلنىشنى كۆزدە تۇتۇپ ئازدۇر-كۆپتۇر يازمىلىرىنى ساقلاپ كەلگەن ئىدىم .غۇرا غۇرىنى كۆرۈپ ئالا بولۇپتۇ. دەپ،مۇنبەردىكى چوڭ-كىچىك ئەزىزلەرنىڭ بۇجەھەتتىكى قىزغىنلىغى مېنىمۇ جىم تۇرغۇزمىدى،شۇڭا ئالىمنىڭ ئۆزۈمدە تەييار باربولغان يازمىلىرىنى مۇنبەرگە يولاپ قويۇشنى مۇۋاپىق كۆردۈم ۋە تۇنجى قادەمدە، ئالىمنىڭ ‹‹سەۋدالىق تەئەججۈپنامىسى››ناملىق نەسىرى كىتاۋىدىكى مەزمۇنلارنى بۇ تېمىغا يىغىپ يوللاشنى ئويلاپ دېققىتىڭلارغا سۇندۇم، يارقتۇرۇپ ئوقۇشۇڭلارنى ئۈمۈت قىلىمەن. سەۋدالىق تەئەججۈپنامىسى ئاپتورى : ئابدۇشۈكۈر مۇھەممەتئىمىن شىنجاڭ خەلق نەشرىياتى 2000-يىل 7-ئاي 1- نەشرى ئاپتوردىن ئەسسالام كىتابخان ! بۇ ، تارىخنىڭ سەۋدالىق يىللىرى يېزىلغان تەئەججۈپنامە . بۇنداق يىللارنى ئاپەت دەپ ئاتىساڭ ئاپەتلىرى تولىمۇ پاجىئەلىك . بۇنداق يىللارنى ئامەتلىك دەپ ئاتىساڭ ئۇنىڭ ئىنسانىيەتنىڭ تەجرىبىلىرىنى توپلاپ ، زۇلمەتنى يېڭىپ ئالغا ئىلگىرلىشىگە قوشقان تۆھپىسى ھېكمەتكە باي قىممەتلىك ئامەت ئىكەنلىكىنى ئىنكار قىلغىلى بولمايدۇ . بۇ ، ھەقىقەتەن سەۋدالىق يىللىرى ئىدى . سەۋدالىقنىڭ پاجىئەسى ئىچىدە ، سەرسانلىق ئىچىدە كۈتۈلمىگەندە كونا يوشۇرۇن خەزىنىگە ئېرىشىپ قېلىش مۇمكىنچىلىكى نۇرغۇن خەلق چۆچەكلىرىدە ئىسپاتلانغانغۇ ؟ مەن دانىشمەنلەردىن سەبىي بالىلارغىچە ئۈركۈگەن ، تېڭىرقىغان ۋە ئەندىشە ۋەھىمىسى ئىچىدە سەۋدالىق روھىيىتىگە ئەسىر بولغان يىللاردا ئۆزۈمنى سەۋدالىقتىن خالىي قىلالمىدىم . بۇ خىل سەۋدالىق ئۇزاق قەرەللىك ئۇيقۇ شارابىدەك مېنىمۇ ئۇزاق يىللارغىچە مەستلىك ئۇيقۇسىغا غەرق قىلغانىدى . قاباھەتلەرنى ھېس قىلىپ ھېكمەتلەرنى چۈشىدىم . بىراق ، چۈشىگەنلىرىم سەگەكلىك تەپەككۇرىدىن كۆرە تولاراق سەۋدالىق شىۋىرلاشلىرىغا ئوخشاپ كەتتى . مەن ھۆرمەتلىك كىتابخاندىن مېنى كەچۈرۈشىنى ۋە ساقىينىڭ ئىچۈرگەن شارابىغا تاقابىل تۇرالماسلىقىمنى چوڭقۇر ھېسداشلىق ئىچىدە نەزەرگە ئېلىشىنى ئۈمىد قىلىمەن . << سەۋدالىق تەئەججۈپنامىسى >> تۈن مونولوگلىرى سۈپىتىدە سەۋدالىق يىللىرىدىكى سەۋدالىق خاتىرىسى بولۇپ مەيدانغا كەلگەن . << سەۋدالىق تەئەججۈپنامىسى >> كاككۇكنامىدىن باشلىنىپ ، مارجاننامە ، سۇمۇرغنامە ، جاھاننەما ئارقىلىق داۋاملىشىپ ، نىجاتنامىدە ئاخىرلىشىدۇ . مەن بۇ بەش نامىنى نەشر قىلىش ئويىدا يازمىغانىدىم ، كىشىلەرگە كۆرستىشكىمۇ ئەندىشە قىلاتتىم . يەنە نېمىشقىدۇر ئەينى يىللارنىڭ تەپەككۇر ھودۇقۇشلىرىنى جامائەتچىلىككە تاپشۇرغۇم كەلدى . بۇنىڭدىن مەقسىتىم ، زامانداشلىرىمنىڭ ھېسداشلىقىغا ئېرىشىش ۋە گۆدەك پەرزەنتلەرگە ھەقىقىي يورۇقلۇق ، گۈزەللىك ۋە ياخشىلىقنىڭ قەدىر - قىممىتىنى ھېس قىلدۇرۇشتىن ئىبارەت . ئۈرۈمچى. بۇ يازمىنى ئاخىرىدا ماھىرە تەھرىرلىگەن. ۋاقتى 2012-5-21 23:35

ماھىرە · ۋاقتى: 2012-5-17 00:08:39


	بىرىنچى باپ كاككۇكنامە 1 ساقاللىرى كامپۇردەك ئاقارغان،ككزلىرى چوڭقۇر دېڭىزدەك ئەقىل بىلەن تولغان ھېكىم:ئىلھامنىڭ ھەقىقى مەبۇدىسى مۇسىي(موزا)[گېرىك ئەپسانىلىرىدە سۆزلەنگەن ھۈنەرسەنئەتنىڭ توققۇز مۇئەككىلى-مۇھەرىردىن]،دېگەندە،ئۇنىڭ بېغىدىكى قەپەستە سايراۋاتقان كاككۇك قاقاقلاپ كۈلۈپ كەتتى. كاككۇك : بەدىنىم پەي زىننەتلىرى بىلەن ياشناپ تۇرسىمۇ، سەرگۈزەشتلىرىم سېنىڭدىن ئارتۇق. ئىلھامنىڭ ھەقىقىي مەبۇدىسى مۇسىي ئەمەس، بەلكى قەپەس، دېدى. كاككۇك ھاياجانلاندى،قەلبىدىكى ھارارەت، كۆزىگە ياش زۇمرەتلىرىنى تاقىغانىدى. ئۇ ئەركىن ئۇچۇپ كېتىۋاتقان بىر توپ تۇرنىغا قاراپ، قەپەس روجەكلىرىنى سىقىمداپ، كۆكسىنى قەپەس شادىسىغا ئۇرۇپ سايراپ كەتتى. ھېكىمنىڭ زوقلانغىنى ئۇنىڭ نالىسى بولغىنىدەك، ئۇنىڭ نالىسى قان قۇسقان كاككۇكنىڭ شېئىرىيەتتەك ھەقىقىي قەلبى ئىدى. 2 مەن كىچىك قۇشمەن ، جەڭ دۇمبىغىدەك نەرە ياڭرىتالمايمەن. مەن كىچىك گىياھ ، ئالەمنى مەھلىيا قىلىدىغان خۇش پۇراقنى تارقىتالمايمەن. مەندە رەشك ۋە ھەسەت ماجىراسىنىڭ ھەشەمەتلىك بۇژغۇنلىرى يوق. 3 مۇھەببەتنىڭ مەڭگۈ يېڭىلىپ ۋە ئەبەدىي تەكرارلىنىپ تۇرىدىغان مەنىۋى جەننىتى نەدىكى،مەن ئۇنىڭدىن شېئىريەت ئىلاھىنى ئىزدەيمەن. 4 بىقارار ئالەمدە خۇشاللىقلىرىمدىن ۋەھىمە قىلىپ غەمكىن بولىمەن. غەمكىنلىكىم ئەۋجىگە يەتكەندە قاقاقلاپ كۈلىمەن. بۇلاق سۈيىگە قاراپ نىدا قىلىمەن: خۇشاللىقلىرىم سېنىڭ ئىلتىپاتىڭ، گۈزەللىكلىرىم سېنىڭ ئىنئامىڭ، ۋەھىمىلىرىم سېنىڭ سالغان قورقۇنچۇڭ، جاراھەتلىرىم مۇشتۇملىرىڭنىڭ ئىزناسى. ئۆز- ئۆزۈمگە قاراپ قاقاقلاپ كۈلىمەن، مەن تارىخنىڭ گۇۋاھچىسى، سېنىڭ ئەلپازىڭنىڭ ئەينىكى.... 5 ئۈمىد تاڭ شەپىقىنىڭ رەڭدار كۆڭلىكىنى كىيىپ قاقاقلاپ كۈلگىنىدە، ئۈمىدسىزلىك گۇگۇم ئوتقېشىنى قارايتىپ، لام - جىم دېمىدى. ئۈمىدنىڭ تەنتەكلىكى بىلەن ئۈمىدسىزلىكنىڭ تەمكىن سىپايىلىكى ئارىسىدا تېڭىرقاپ شىۋىرلايمەن. 6 ھىجران دەشتىدە تۇرغىنىڭدا ساڭا ئىلھام بېغىشلىغان نەرسە ۋىسال ئۈمىدى. ۋىسال بېغىدا سېنى ئالدىراتقان نەرسە ھىجران ۋەھىمىسى. . ۋىسال قەدرىنى كۆتۈرگەن نەرسە ھىجران، ھىجران قەددىنى رۇسلىغان نەرسە ۋىسال. 7 يوقلۇقنىڭ ئۈمىدى موللۇقنىڭ ۋەھىمىسىدىن ئۈستۈن. 8 ئۈمىد خۇشاللىقى بىلەن ئۈمىدسىزلىك ھودۇقۇشى تۆت كوچا ئاغزىدا دوقۇرۇشۇپ قالدى. ئۇلارنىڭ خالىغىنى شاراب ئىدى. چۈنكى ئۇ: ئىختىيار يىلپىزىغا سۇمۇرغ قانىتىنى قوشىدىغان خىيالىي سايە. ھاقارەتلەنگەن روھ شاراب ئىچىدە غالىب. 9 دەريالار سۆيگۈسىنى يادىمغا ئالغىنىمدا كۆزۈمدىن دەريالار ئاقىدۇ. تاغلار پىراقىنى ئەسلىگىنىمدە چوڭقۇر دېڭىز تېگىگە پاتىمەن. 10 مەن ساڭا تەقلىد قىلىمەن. زېمىننى سۆيگەن يامغۇر، چىمەننى ئارىلاپ ئاققان تاغ سۈيى، قىياغا مەڭزىنى ياققان ئۆركەش، ئانا باغرىدىكى بوۋاق، تۆگە ئايىغىدىكى بوتىلاق، دالا قوينىدىكى خۇشبۇي گىياھ، جانان لېۋىدىكى تەبەسسۇم...... ئېھ ئالەمنىڭ غەرەزسىز پاك مۇھەببىتى، مەن ساڭا تەقلىد قىلىمەن. 11 مېنىڭ كۆز ياشلىرىم ئازغان چېچىكى ئۈستىدە تىترەپ تۇرغان ئېغىر شەبنەم. مېنىڭ كۆز ياشلىرىم زېمىنغا تۆكۈلگەن گۈل بەرگىنىڭ مەرسىيىسى. ئۇ زېمىن يۈزىنى غۇنچە گىلەم بىلەن ياساندۇرىدىغان يېشىل باھارنىڭ قەسىدىسى. 12 نۇرانە شولىنىڭ ھەۋىسىدە تۇرغىنىم يوق. ئۇچقان يۇلتۇزدەك قاراڭغۇلۇق ئالىمىگە قاراپ سىيرىلاي،نۇرانە شولا كەينىمدە قالسۇن. 13 گۈزىلىم ! ئەينەك بىلەن ھەپىلىشىش ساڭا ئوشۇقچە.قارامېنىڭ مىسرالىرىمغا.كۈزەت،مەرمەر ھەيكىلىڭنىڭ ياسىلىشىنى..... مۇھەببەت مۇشقىتىم! قەدىر - قىممىتىڭنى ساختا شىۋىرلاشلاردىن ئەمەس، ھەقىقىي شېئىرىيەت بىناسىدىن ئىزدىگىن. بۇ بىنا _ مەڭگۈ توزۇماس چېچەك بىلەن بېزەلگەن گۈلىستان...... 14 ھەسەل _ چېچەك شىرنىلىكىنىڭ جەۋھىرى؛ شېئىر _ گۈزەللىك تۇيغۇسىنىڭ كىرىستالى. 15 قاش يالىرىڭ بىلەن كىرپىك ئوقلىرىڭ ماڭا يۈرۈش باشلىغاندا غالىبسەن. قەلبىم قۇدرەتلىك قوشۇنۇڭغا تۇتقۇن بولغىنىدا مەغلۇپسەن! 16 ئىنسانىيەت ئۆزى ياسىغان ئاجايىپ سۈرەتخانىغا كىرىپ قالدى.ئۇ: رەسىملەرنىڭ تىزىلىپ، ھەيكەللەرنىڭ جانلىنىپ،ئۆز ئىختىراچىسىغا‹‹شاھ!›› دېيىشىدىن مۇداپىئە كۆرۈپ، ۋەھىمىلىك چۈش، شۈبھىلىك مۇھاكىمە ئىچىگە قامىلىپ قالدى.... 17 ساداقەت _ مۇھەببەت دېڭىزىدىكى گۆھەر خەزىنىنىڭ ئومۇمىي ۋەجى. گۈزەللىك _ ساداقەت بېغىدا گۈزەلنىڭ سۇمۇرغتەك قايتا تۇغۇلغان يېڭى قىياپىتى. يۈكسەكلىك _ ساداقەت بىلەن گۈزەللىكنىڭ مېنى مەھلىيا قىلغان كارامىتى. 18 ئەندىشە چەكمىگىن ! چېچەك يەرگە غولىمىدى، بەلكى مېۋە قەلبىدىن ماكان تۇتتى. ئىشەنمىسەڭ قارا: بىپايان باغلار باھار بەزمىسىدە چېچەكتىن شەپەق ياساپ سېنى مەپتۇن قىلىدۇ. بېخىلنىڭ سېخىيلىق قۇياشىنى كۆرەلىشى مۇمكىنمۇ؟..... 19 كاككۇك ! سەن ھاۋا بوشلۇقىنىڭ ئەركىن مەلىكىسى . قەپەس ئىستىقامەتگاھىنىڭ مەردانە غەزەلچىس، زېمىن يايلىقىنىڭ ئەركە ساياھەتچىسى. ئىنسان ئۈچۈن پەلەكنىڭ نىمە ئىكەنلىكىنى بىلمەيمەن..... ئانا باغرىدا ئەركە ، تەسەۋۋۇر كۆكىدە ئەركىن ئۆسكەن ئوماق بالىنىڭ كىشىلەر ئالدىدا خۇشامەتچى بولمىغانلىرىنى ئاز ئۇچراتقىنىم ئۈچۈن ھەسرەتلىنىمەن... 20 گۈزەللىكنىڭ مەڭگۈلۈك كۈلكىسىدە تەبىئەتنىڭ نىسبەتلىك مۇزىكىسى تەكرارلىنىپ تۇرىدۇ. قايغۇ مۇشۇ كۈلكىنىڭ ۋەھىمىسى!

ماھىرە · ۋاقتى: 2012-5-17 00:32:13


	21 نىقابىڭ ئۆتكۈر زۇلپىقارىڭنىڭ تەمكىن غىلاپىغا ئوخشاش ، كۆزۈمنى قاماشتۇرۇپ ئەقلىمنى تەڭپۇڭدىن خالاس قىلىدىغان نۇرانە جامالىڭنىڭ رەھىمدار يېپىنچىسى . يۈزۈڭدىكى نىقابىڭنى ئېلىۋەت ، بۇ ماڭا مۇقەددەس ئىلتىپات ! ئۆتكۈر زۇلپىقارىنى سانجى ، بۇ ماڭا يېڭى ھايات ! 22 ھەسەلچى ھەرە خۇش پۇراق گۈلشەنلەردىن بال نەزمىسى يارىتىدۇ . گۈلچى كېپىنەك باشقىلارنىڭ ھەمدۇساناسىدىن تەمەنناغا تولىدۇ . تارىخنىڭ مەسخىرىسى _ روھىيەت جەھەننىمى . كەلگۈسىنىڭ بارىكاللىسى _ مەنىۋىيەت جەننىتى . 23 بورانلار ھۇۋلايدۇ . مەن چوڭقۇر خىيالغا چۆكىمەن . بورانلار ھۇۋلايدۇ . مەن تارام - تارام ياش تۆكىمەن . بورانلار ھۇۋلايدۇ . مەن قاقاقلاپ كۈلىمەن . بورانلار مەجنۇن تەبىئەتنىڭ مەسخۇي پوپوزىسى . ئۇنىڭ ھۇۋلاشلىرىنىڭ ئەۋجىدىن ئەجدىھا سۈرەتلىك جۇدۇن دىۋىسىنىڭ ئۆلۈم نوپۇزىنى سېزىمەن . مېنىڭ قورقىدىغىنىم گۈلشەننى ناز ۋە سۈلكىتى بىلەن رەڭمۇرەڭ چېچەك بىلەن زىننەتلىگەن ، خۇش پۇرىقى بىلەن مەھلىيالىقنىڭ ھېكمىتىنى تونۇتقان ، ئەتىرگۈلگە بۇلبۇلنى ، مەشۇقىغا ئۆز مەھبۇبىنى ئاشىق قىلغان مۇھەببەت ئىلاھىنىڭ ساخاۋەتلىك نوپۇزى . ئۆلۈم نوپۇزىدىن چۆچۈش ئارسىزلىق ؛ مۇھەببەت شەپقىتىدىن سىرتتا قېلىش شەۋكەتسىزلىك . قاقلاپ كۈلگىنىمدە ئەنبىيالار ھاياجانلىنىدۇ . 24 گۈلگە مەپتۇن بولساڭ ، ئۇنى ئۆز پايىسىدىن جۇدا قىلما . گۈزەللىككە مەپتۇن بولساڭ ، ئۇنىڭ ئىختىراچىلىرىنى ئاسرا . 25 گۈزىلىم ! سۈرمە ئىشلەتمىگىن ، قېشىڭنىڭ قارىلىقىنى تونۇپ يەتمىدىڭمۇ . پەرىشتەم ! گۈل قىسمىغىن ، ھۆسنۈڭدىكى چىمەنلەرنى ئىقرار قىلمىدىڭمۇ . سەن گۈزەللەرنىڭ مالائىكى ، گۈزەللەرنىڭ نەمۇنىسى . بۇ سېنىڭ ئەڭ ئېغىر ، ئەڭ قايغۇلۇق قىسمىتىڭ ! 26 ھەسەلچى ھەرە ئۆز پادىشاھىنى خۇش پۇراق بال جەۋھىرى بىلەن باقىدۇ . ھەسەلچى ھەرە پادىشاھى ئىشچى ھەرىسىنىڭ بېشىنى ئۈزۈش ئالدىدا تەنتەنە بىلەن : ۋاپاغا جاپا قىلغان ، دەپ ۋارقىرايدۇ . _ دەرھەقىقەت ، _ دەيدۇ باشقا ئىشچى ھەرىلىرى ، _ چۈنكى ھەرە پادىشاھىنىڭ ئىككى بېقىنىدا تەرسانىڭ غەزىپىگە قۇدرەت بېرىپ تۇرىدىغان شەمشەر قانىتى ئارتۇق . 27 سەن شېشە قەدەھكە مەي قۇيغاندا，مەن كۆز چانىقىمغا مەرۋايىت تىزدىم . سەن شارابىڭنى لېۋىڭگە تەگكۈزگەندە ، مەن سۆيگۈ كەلكۈنىدە بىھوش ئاقتىم . سېنىڭ ئىشىڭ : ساقىيدەك قەدەھ كەينىگە ، چولپاندەك بۇلۇت ئارىسىغا يوشۇرۇنماق . مېنىڭ ئىشىم : پاتقاقلىق دالادا جۇنۇنلۇق پېرىسىنى ئوينىماق . 28 كۈلكىلىرىڭ چېچەك گۈلزارىدىن ئۇرغۇغان خۇش پۇراق . سېنىڭ يىغاڭ بوستانغا چېچىلغان يامغۇر ئۈنچىسى . 29 گۈزەللىكىڭ تەمەنناسىز تەبىئەتنىڭ تېپىلغۇسىز ئىنئامى . ئۇنىڭ قوزغايدىغىنى مۇھەببەت بىلەن رەشك . مۇھەببىتىم تۈپەيلى سېنى ئۇلۇغلايمەن . ئۇلار رەشكلىرى تۈپەيلى ھەسەت ۋە ئىغۋا توقۇشىدۇ . بۇلبۇللىرىڭنىڭ مەدھىيىسى بىلەن بىھوش بولما . ھۇۋقۇشلىرىڭنىڭ پىتنىسى بىلەن ھالىڭدىن كەتمىگىن . يۈكسەكلىك راۋىقىغا چىقىپ ئالەمنى كۆزەت . ئۇنىڭسىز گۈزەللىكنىڭ ھاقارەتلەنمىگىنى يوق ! 30 قورقۇپ تۇرساڭمۇ يەنىلا ئۈمىدلىنىپ تۇرىدىكەنسەن ، سېنىڭ مايىل بولىدىغىنىڭ خۇشامەتتىن ئىبارەت بولىدۇ . خۇشامەت _ روھىيەت تىلەمچىلىكى . 31 شېئىرىيەت دىۋانى _ توزۇمايدىغان گۈل سېۋىتى . ئېھ ، ئىدراك ۋە تەپەككۇر دۇنياسىنى مەپتۇن قىلغان گۈزەللىك ! مېنىڭ شېئىرلىرىم سېنىڭ مەڭگۈلۈك سەپىرىڭگە پەقەت بىر قونالغۇلۇق ھەدىيە بولالىسا ئىدى... 32 بىلىم ، قابىلىيەت ، ۋىجدان ۋە قىسمەتكە ئوخشاشلا ، مۇھەببەت ، گۈزەللىك ، ساداقەت ۋە ئاقىۋەتلەرمۇ بىر - بىرىدىن ئايرىم نەرسىلەر ئىكەنلىكىنى ئويلىغىنىمدا ، ئۇلارنىڭ رىقابىتىدىن چۆچۈيمەن . ئۇلارنىڭ مۇجەسسەملىكىنى ئىزدەيمەن . 33 ياشلىق سۈبھىسىدە گۈزەللىك بىر مەھەللىك سۆيگۈ نەغمىسى بىلەن تەبەسسۇم قىلغىنىدا ، قېرىلىق گۇگۇمىدا يۈكسەكلىك مەڭگۈلۈك ھېكمىتى بىلەن سېنى چاقىرىپ پىچىرلايدۇ . ئۇنىڭ دېگىنى تولىمۇ ئاددىي ، بىراق قىيىن بىرگىنە سوئال : دۇنيانى تونۇدۇڭمۇ ؟ ... 34 ھادىسىلەر دۇنياسىغا يوشۇرۇنغان ماھىيەتلەر قەسىرىگە كۆزۈم چۈشكەندە ئىختىيارسىز مەپتۇن بولىمەن . بۇ يەردە ماڭا ئۆز جامالىنى كۆرسىتىۋاتقىنى ھەقىقەتلەر پەرىسىدىن ئىبارەت . ئاشىقلار پاجىئەسىدەك ئۇنىڭمۇ پاجىئەلىرى ئېغىر ... 35 سۆيگىن مېنى ، جىگىرىم ، كەچ كىرىپ قالدى ، سۆيگىن . چۈشىگەندە گۈلشەن چۈشەرسەن . ۋىسال خۇشاللىقلىرىمنى تەسەۋۋۇر يالقۇنلىرى بىلەن شولىلاندۇرۇپ ، مەنمۇ بۇلبۇل بىلەن گۈلنىڭ سۆيۈشكىنىنى چۈشەرمەن . 36 نۇر _ ئاسمان جامىدا جۇلا قىلغان ، قارا بۇلۇتنى مەستلىكتىن قىزارتىۋەتكەن سېھىرلىك شاراب . ھايات _ ئۆلۈم دېڭىزىدا نۇر چېچىپ كېتىۋاتقان ماياكلىق كېمە . ئۆلۈم _ ھاياتنىڭ قەرزىنى قىستاپ يۈرگەن سۈتخور ، يۈرەكسىز مۇھەببەتنىڭ ئاشىقى ، مۇزلىغان ۋۇجۇدنىڭ مۇرەببىي . ئۆلۈم ۋەسۋەسىسىنى يېڭىپ ، ھاياتنىڭ نۇرانە تەبەسسۇمىدىن زوقلىنىمەن . 37 ئاي ھۆسنىنى يۈزۈڭگە بەردىڭ ، نېمە ئۈچۈن ؟ تۈن رەڭگىنى چېچىڭغا بەردىڭ ، نېمە ئۈچۈن ؟ مېنى ئىشقىڭ تۈپەيلى ھايات ۋە مامات ئارىسىدا شەرمسار قىلىش ئۈچۈندۇر ! 38 گۈللىرىڭگە زوقلىنىمەن ، يوپۇرماقلىرىغا ئېھتىرام بىلدۈرىمەن . چېچەكلىرىڭ خېرىدارلىق تاپقاندا تەمەننا قىلمىغىن ، سېنىڭ قەدرىڭنى ئاشۇرغىنى ۋاپادار يوپۇرماق. 39 قەدىمىي زېمىندا يارالغان قەدىمىي ئەپسانىدىن خاۋاتىرلىنىمەن : ترۇيالىقلار بىلەن گرېكلار تىغ سوقۇشتۇرغاندىكى چاقماق ، ئېلىنانىڭ ترۇيا سېپىلىدا ئاققۇزغان يامغۇردەك كۆز يېشى ، ھەسەت ۋە جېدەلگە تۈگۈن بولغان گۈزەللىك ئىقتىدارى ، ئېرىدانىڭ ئىلاھلار ئارىسىغا سالغان رەشك ۋەسۋەسىسى ، ئاپۇللۇ بىلەن ئافىنانىڭ پايپېتەكلىكى ، زىۋىسنىڭ بىپەرۋالىقى مېنى چۆچۈتىدۇ . گۇناھسىزلار قۇربانلار توپىغا ئايلانغانسېرى ، ئەيىبلىك ئىلاھلار ئەۋجەرەپ كەتمىگەندۇ ... 40 تەقدىر _ بۇ قىسمەت ۋە ئىرادىنىڭ جېڭى . قايغۇ ياشلىرى _ بۇ تەقدىر جېڭىدە ئىرادىنىڭ ئاققۇزغان پاك قېنى . قىسمەتسىز مۇھەببەت سەپەرگە چىقمىغان كېمە . پاراغەت شەربىتىدىن سىياھ ياساپ بولمىغىنىدەك ، تۇرغۇنلۇق قومۇشىدىن قەلەم ئۆستۈرگىلى بولاتتىمۇ . گۈزەللىك چېچىكى يۈكسەكلىك خۇش پۇرىقىنى چېچىپ تۇرغىنىدا تەقدىر ئەجدىھاسىغا قىلىچ كۆتۈرمەي تۇرالامسەن ! . بۇ يازمىنى ئاخىرىدا ماھىرە تەھرىرلىگەن. ۋاقتى 2012-5-17 00:36

ماھىرە · ۋاقتى: 2012-5-17 00:42:23


	41 تىكەنسىز سېرىق چېچەكنىڭ مەپتۇن قىلارلىق خۇش پۇرىقى يوق . 42 قايغۇ _ خۇشاللىق كۈلكىلىرى قاچىلانغان قاپ . 43 بەخت دەرگاھىدا مۇلايىم تەبەسسۇم قىلىشنى ، بەختسىزلىك ئىلكىدە قاقاقلاپ كۈلۈشنى ئۆگەن . ئازغان شوخىسى ئالدىدا سۇمۇرغ گەۋدەڭنى ئەگمە . 44 كۆز ياشلىرىڭنىڭ ئۈنچىلىرى خۇشاللىق شولىسى بىلەن سۆيۈشكەندە مەڭزىڭدە ھەسەن - ھۈسەن جۇلا قىلغۇسى . 45 شىرىندەك جانان بىلەن ئۈمىد تۇلپىرى ئۈستىدە ئىئۇشال ئۇچرىشىشنى بىلگىن ؛ خىسراۋدەك خاقان بىلەن ئۈمىدسىزلىك غارى ئالدىدا قاقاقلاپ سۆزلىشىشتىن يانما ! 46 خۇش پۇراق تۆكۈپ تۇرغان نەرسە چوغ ئۈستىگە تاشلانغان سەندەل ياغىچىنىڭ ۋىدالىق يىغىسى . مەشۇت بېرىۋاتقان نەرسە ئۆلۈم زىندانىغا بەند بولغان غوزەك قۇرتىنىڭ پىداكار جەسىتى . شام ئۆز ھاياتىنى نۇرانە يىغىسى بىلەن ئاخىرلىتىدۇ ؛ ئىپار كېيىكى بىباھا مۇشكى تۈپەيلى سەييات قولىدا بىگۇناھ جان ئۈزىدۇ . پەزىلەتلىرىڭنىڭ قىممىتىگە تەمەننا قىلماي ، ئۇنىڭ قىسمەتلىرىگە پەخەس بول . 47 ئۇ تېخى سەبىي ئىدى ... ئۇنىڭ ئالدىغا سۈرەتلەر ئالبۇمى بىلەن شېئىرلار دىۋانىنى قويدۇم . ئۇ خىنە ياققان ئىنچىكە قوللىرى بىلەن شېئىرلار دىۋانىنى بىر چەتكە سۈرۈپ قويۇپ ، مەھلىيا ئوتىنى بىئارام تۇتاشتۇرىدىغان گۆھەر كۆزىنى ئالبۇم سەھىپىلىرىگە تاشلىدى . ئۇنىڭ كۈلۈپ تۇرغان كۆزىگە پۈتۈن سۈرەتلەر كۈلۈپ جاۋاب قايتۇرۇشقا مەجبۇر قىلىنغاندەك ئىدى . مەن چۈشەندىم : ئۇ ھېسسىيات كەپتىرىنى سۆيگۈ ئاسمىنىغا ، ھەسەلچى ھەرىسىنى گۈلىستان سەپىرىگە تېخى ئۇزاتمىغانىدى ... ئۇ تېخى گۆدەك ئىدى ... ئۇنىڭ شېئىرلار دىۋانىغا شەيدا بولىدىغان چېغى ، ئۇنىڭ قەلبى تەنھا گۈزەللىكنىڭ شىكايىتىنى ئاڭلاپ ، كۆكسى سۆيگۈ ئوقى بىلەن جاراھەتلىنىپ ، كۆكسى چىمەن تىكەنلىكى بىلەن شىكەستىلەنگەندىن كېيىنلا باشلىنىدىغانلىقىغا شۈبھىلەنمەيتتىم . 48 گۈزەللىك ! سېنى ئىزدەپ ھەشەمەتلىك قەسىرلەرگە تەلپۈنمەيمەن . مۇھەببەت ! سېنى ئىلكىمگە ئېلىش ئۈچۈن يىراق ئەھلىسەلىپ ( ياۋروپا خرىستىئانلىرى بىلەن ئەرەبلەر دۇنياسى ئارىسىدا ئېلىپ بېرىلغان دىنىي ئۇرۇشلارنى كۆرسىتىدۇ )كە قاتناشمايمەن . ئەقىدەم شۇكى : غالىبنىڭ نەيزە - ساداقلىرىغا تۇتقۇن بولغان ۋىسال مۇقەددەس مۇھەببەت ئەمەس ، بەلكى مەنىسىز مۇردىنىڭ قالدۇقى ... مېنىڭ ئىزدەيدىغىنىم تەلۋىلىك بىلەن ئىزدەش ؛ مېنىڭ رەت قىلىدىغىنىم مەغرۇرلۇق بىلەن رەت قىلىش . 49 شېئىر ۋە ناخشىلىرىم بىلەن سېنى كۈيلەيمەن . ئۇنىڭسىز سۆيگۈ خۇپىيانە ھەسرەت چېكىش . تەپەككۇر ۋە تەسەۋۋۇرلىرىم بىلەن سېنى ئۇلۇغلايمەن ، ئۇنىڭسىز قەدىرلەش مەبۇتقا چوقۇنۇش . 50 شېئىرلىرىم _ ھاياتنىڭ رەڭدار شەپىقى . ئالەم بىنا قىلغۇچى براخما ( بۇددا دىنىدىكى بىر ئىلاھ ) دۇنيانى ئىختىرا قىلغىنىدەك ، مەن گۈل ۋە نۇر بىلەن ياقۇتتەك ئاسمان ، رەڭدار بۇلۇت ۋە ھەسەن - ھۈسەن ياسايمەن . مېنىڭ ھۈنىرىم ئىلھام مەبۇدىسىنى جاھاننەما ئەينىكىدە كۆرسىتىپ ئۇنى بەشەرىئەت ( ئىنسانىيەت دېگەن مەنىدە )كە سوۋغا قىلماق . 51 گۈزىلىم ، پەرىشتىدەك گۈزەللىكىڭگە تەمەننا قىلمىغىن . بىقارار گۈزەللىك سېنىڭ ھۆسنۈڭدە جىلۋىلىنىپ مېنى ئالدىغىنىدەك ، مېنىڭ جىسمىمغا شولا سېلىپمۇ سېنى ئالدايدۇ . 52 كۆز يېشىمنىڭ ئۈنچىلىرى مەڭزىڭنى زىننەتلىسە ؛ ئاھۇ پىراقىمنىڭ ئىزغىرىن شامىلى مۇشكىن چاچلىرىڭنى ئەتىۋارلاپ سىلىسا ؛ يېرىلغان يۈرىكىمنىڭ بىگۇناھ قېنى لەۋلىرىڭنى لاكتەك بويىسا ؛ شېئىرلىرىم بىلەن ساڭا غولىمايدىغان ھەيكەل ياسىسام ... بۇلار ، مېنىڭ ئەڭ چوڭ كۆڭۈل ئازادىلىكىم ! 53 دېڭىز ، ئېھ جاھان دەرۋازىسى ، دوستلۇق بوسۇغىسى ، دۇنيانىڭ دەرسخانىسى ، ئالەمنىڭ ئەينىكى ، سەن زېمىن كۆكسىدىكى يۈرەك . سەنسىز ئالەم نادان ۋە تەرسا . 54 سۆيگۈ دېمەك قاناتسىز قۇشنىڭ ئۇچۇش ئىستىكى . سۆيگۈ دېمەك ھاياتلىق ئۈمىدىنىڭ دېرىكى . سۆيگۈ دېمەك ھېسسىيات يۈرىكىنىڭ ئىدراكى . سۆيگۈ دېمەك ئىختىيار مۈلكىنىڭ سۇلتان بېگى . 55 ئاشىقىم ! بىر جۈپ بۇلبۇلدەك سايرىشىپ ، ناخشىلىرىمىزنى ئاڭلىشىپ ، بىر جۈپ چېچەكتەك ئېچىلىپ ، خۇش پۇراق بىلەن بىر - بىرىمىزنى زىياپەت قىلايلى . مەن ناخشا ساتقۇچى ياكى ناخشا بىلەن كۆڭۈل ساتقۇچى ئەمەس . ناخشىنى ئۆگىتىپ بولمايدۇ ، پەقەت ئۇنى تەكرارلاشنىلا ئۆگىتىپ بولىدۇ . شۇنداق . مۇھەببەت تۈگىمەيدىغان ناخشىنىڭ ئۈزۈلمەيدىغان بۇلىقى . 56 بۇلبۇل سايرىغان شاخنىڭ ئۈنچىلىرى چوغدەك قىزىل ، سۆيگىنىڭدە قالدۇرۇپ كەتتىڭ چېكەمدە قان قىزىل . ئەتىرگۈل ئۈنگەن توپا خۇشبۇي گويا سەبدە چېچەك ، بىز سۆيۈشسەك گۈل بەرگىمۇ ئۆزگىرىپ بولغان قىزىل . 57 قارا چېچىڭ خىيالى بىلەن سىنەمدە ئىلھام قوزغايمەن . قەلىمىمنى كۆز يېشىم بىلەن ئۇچلاپ بۈلەيمەن . ئەتىرگۈلدىن سىياھ ياسايمەن . ئۆمرۈم بويى سېنى كۈيلەيمەن . 58 ئەۋەتكەن گۈلدەستەڭنى پۇراپ بىھوش بولىمەن . ئىجازەت قىلساڭمۇ سۆيۈشكە پېتىنالمايمەن . 59 مېنىڭ شېئىرلىرىم مۇھەببەت ئىلاھىنىڭ شىكايەتنامىسى . مېنىڭ شېئىرلىرىم ھاياتلىق سەپىرىدىكى بىر ئەۋلاد ئىنسانىيەتنىڭ ئۆتەڭخانىغا قالدۇرىدىغان قونالغۇلۇق خاتىرىسى . مېنىڭ شېئىرلىرىم بالدۇر يۈرۈپ كەتكەن ئاشىقنىڭ كەينىدىن كېلىدىغان مەشۇقىغا يوللىغان ئامانەتنامىسى . 60 گۈزىلىم ، سەن قېرىمايسەن . قېرىيدىغىنى كۆزۈمنىڭ كۆرۈش قۇۋۋىتى . گۈزىلىم ، سەن ھەسرەتلەنمەيسەن . ھەسرەتلىنىدىغىنى ئۆمۈر چەكلىمىلىرى تۈپەيلى ھايات دۇنياسىدىن يىراقلاپ كېتىۋاتقان مېنىڭ قەلبىم . سەن شېئىرلىرىم بىلەن ياشايسەن . مەن بولسام زېمىن بىلەن مەڭگۈ قۇچاقلىشىمەن . بۇ يازمىنى ئاخىرىدا ماھىرە تەھرىرلىگەن. ۋاقتى 2012-5-17 00:51

ماھىرە · ۋاقتى: 2012-5-17 00:49:47


	61 ھەقىقىي گۈزەللىكنى ھەقىقىي شائىرنىڭ قەلبىدىن ئىزدە . ئۇنىڭ قەبرى دىۋان گۈلزارىدىكى سۆيگۈ ھەيكىلىنىڭ ئاستىدىكى مىسرالار ئارىسىدا . ئۇ يازمايدۇ ، ئىلھام بېغىشلايدۇ . 62 يار چىشلىگەن غورا ، ۋازىغا تىزىلغان ئالمىدىن لەززەتلىك . 63 مەن ھاياتىمنىڭ سەرگەردانى ، ئۇنى ئىزدەيمەن . مەن قەلبىمنىڭ باغۋىنى ، ئۇنى پەرۋىش قىلىمەن . بېغىمنىڭ باراقسان مېۋىلىرى ئالدىدا ئەما مەن ، ئۇنى كۆرەلمەيمەن . ئۇنىڭ شېرىن ھىدىنى سېزىمەن ، ئۇنى تۇتالمايمەن . سەھەر ئويغاندىم ، قۇشلار بىلەن تەڭلا . گۈل ئىبادەتخانىسىغا يول ئالدىم ، تاڭ نەسىمى بىلەن تەڭلا . شەبنەم شارابىنى ئارقا - ئارقىدىن يۇتتۇم ، قىزىللىق ئىچىگە _ چېچەك ۋە خىجىللىق ئىچىگە غەرق بولدۇم ، بۇلبۇل بىلەن تەڭلا . گۈل ئىبادەتخانىسىدا تىلەندىم ، ئېھ گۈل ! مېنىڭ گۇناھلىرىمنى كەچۈرگىن . مېنىڭ گۇناھلىرىم شېئىرىمدا . ئۇ روھىيەت كائىناتىدىكى قەلب يۇلتۇزى . ئۇنىڭدا ھېچقانداق ئېغىرلىق يوق . پۈتۈن ئېغىرلىق مېنىڭ گۇناھلىرىمدا . خىجىللىق ئىچىدە جاكارلىدىم : ئېھ گۈل ! مېنىڭ شېئىرلىرىمنى قوبۇل قىلغىن . مېنىڭ ھاياتىم شېئىرىمدا . ئۇ مېنىڭ ئاشىقلىق ئەرزنامەم ، بۇ ، سېنىڭ گۈزەللىكىڭ ئىقرارىم ، بۇ ، مېنىڭ ساڭا ئاتىغان مەرۋايىت خەزىنەم . 65 زېمىن بولۇشنى خالايمەن ، زىلۋا بويۇڭ ئۇنىڭدىن مەدەت كۈتسە ؛ سۇ بولۇشقا ھەۋەس قىلىمەن ، سۇمبۇل چاچلىرىڭ ئۇنىڭغا چۆمۈلسە ؛ يورۇقلۇق بولۇشنى ئىستەيمەن ، قارا كۆزۈڭ ئۇنى سۈمۈرسە ؛ شامال بولۇشنى ئارزۇ قىلىمەن ، ئىپار گەۋدەڭ ئۇنى خۇشبۇي قىلسا . 66 مۇھەببەت زۇمرەتلىرىنى ئىزدەپ ، شېئىرىيەت گۈزەللىكىنىڭ يۈكسەك مۇنارىنى تىكلە . مۇھەببەت سۇ تېگىدىمۇ ئەمەس ، يالقۇنلۇق ئوت ئىچىدىمۇ ئەمەس . بوران - جۇدۇنلار ئىچىدە ئەمەس ، مامۇق بۇلۇتلار قوينىدىمۇ ئەمەس ... مۇھەببەت بۇلارنىڭ گىرەلەشكەن جايىدا ، تۆت كوچىنىڭ ئاغزىدا . 67 ئارام ئال ، بۇلبۇلۇم ، چارچىدىڭ ، ئارام ئال . ئۇيقۇ بىلەن ئۆتكۈز ئايدىڭ ئاخشامنى . مەن داۋاملىتاي سېنىڭ مۇڭلۇق ناخشاڭنى . ئارام ئال ، گۈزىلىم ، چارچىدىڭ ، ئارام ئال . ئۇخلا چېچىڭ بىلەن يېپىپ كۆكسۈڭنى . مەن سىزاي زوقۇم بىلەن سېنىڭ گۈزەل ھۆسنۈڭنى . 68 مەن مۇھەببىتىمنى ئىزدەيمەن . ئۇنىڭدىن يوقالغان ئۆزۈمنى دېرەكلەيمەن . مەن مۇھەببىتىمنى تۇتۇۋالىمەن ، ئۇنىڭدىن قەقنۇستەك قايتا تۇغۇلىمەن . 69 گۈزەللىك قىچقىرىپ سېتىلىدىغان تاۋار ئەمەس . ئۇ ، ئالەمنىڭ ۋۇجۇدى . مۇھەببەت تەرسانىڭ مەزھىپى ئەمەس . ئۇ ، ھاياتنىڭ نۇرى . 70 مۇھەببەت _ ئوچۇق خۇپىيانىلىك ، ئۇ تارتىنىش قۇتىسىدىكى ئوت مەلىكىسى . مۇھەببەت _ خۇپىيانە ئوچۇقلۇق ، ئۇ چوغ تاجىنى تاقىمىغان چاقماق شاھزادىسى . 71 خۇشاللىقلىرىڭدىن قايغۇ شارابى ئېچىتما . مەستلىك قۇيۇنى مەيخاناڭنى ۋەيران قىلىدۇ . قايغۇلىرىڭدىن شادلىق مەيزىپى ھازىرلا . مەشرەپلىرىڭنىڭ ھەلقىسى بىخۇد ئۆتمىسۇن . 72 سەيياھ ۋە قەقنۇستىن ئىپتىدا بولغان ئاھاڭ ، داۋۇت ۋە سۇلايماندىن ئاپىرىدە بولغان مۇزىكا ، قەلەمدىن قەدىم ، قەغەزدىن پېشقەدەم بولغان بۇ ناۋانى سۇ توپانى ، ئوت قىيامىتى ۋە ئىمامى مەھدىنىڭ ئاخىر زامانى ئاياغلاشتۇرالمايدۇ . ئۇ ئىنسان جەۋھىرىنىڭ ھايات كەۋسىرىدىن ئالغان قۇدرىتى ، يۈرەك قۇشىنىڭ ئەقىل گۈل قاچىسىدىن ئىچكەن شەبنىمى . سەن ئۇنىڭغا يېڭى گۈلىستان بېغىشلا ! ئۇ ساڭا يېڭى تۇيغۇ بېغىشلىغۇسى ... 73 لالە غۇنچىلىرىغا بىتاقەت بۇلبۇل : ئەي گۈلۈم ئېچىلساڭچۇ ، دېدى . لالە غۇنچىسى گۈل بەرگىنى ئاچتى . لالىلەر بۇلبۇلنى ئورىۋېلىشتى . بىراق ، بۇلبۇل خۇشال بولمىدى . بۇلبۇل گۈل لالىرىگە قاراپ نىدا قىلدى : ماڭا كېرىكى گۈزەللىك خەزىنىسى ئەمەس ، ئۇ چىرايلىقلىقنىڭ زىندانى ، بېزەكلەرنىڭ قەپىسى ؛ ماڭا كېرىكى ئىشق - مۇھەببەت بولغان سىنەڭدىن ئۇرغۇپ چىقىپ ، بىئارام كۆڭۈلگە ئارام بېرىدىغان بىباھا يۈكسەك سۆزلىرىڭ ، دېدى . لالىلەر قاقاقلاپ كۈلۈشتى ، ئۇنىڭ خۇش پۇرىقى چېچىلدى . شەبنەم پىيالىلىرىگە مەيلەر قۇيۇلدى . ئىشق بىلەن كۈيلەنگەن يۈكسەكلىك گۈزەللىكنى ھېكمەت دۇرلىرى بىلەن شولىلاندۇرغانىدى . بۇلبۇلنىڭ كۆڭلى ئېچىلدى گۈلزار ئاشىقى ، بۇلبۇلى ئازادىگە ئايلاندى . 74 كۆزۈم گۈزەللىكنىڭ چىنلىقى ئۈچۈن شاھىت . سۆزۈم ئۇنىڭ ئىقرارنامىسى . ھاياتىم ئۇنىڭ ھىمايىچىسى بولمىغان قۇربانى . 75 سەن ھەقىقەتنىڭ خۇش پۇراق بىلەن بېشارەت بېرىدىغان ئىلاھى . سەن ماڭا سىر ، چۈنكى : سېنىڭ بەدىنىڭ ئىپار بىلەن يۇيۇلغانمىدۇ ياكى سېنىڭ ئىچكەن سۈيۈڭ ئىپار بۇلىقىنىڭ شەربىتىمىدۇ ۋە ياكى سېنى گۈزەللىكلەر ئىلاھى خۇش پۇراقلار دەرياسىغا چىلىغانمىدۇ ، بۇ ماڭا يوچۇن . مەن پەقەت سېنىڭ جىگدىلىك مەھەللىدە تۇغۇلۇپ ، جىگدە چېچىكى قىسىپ ئۆسكىنىڭنىلا بىلىمەن . شاپتۇللۇق باغ مەھەللىلىرىدىن سېنىڭچە خۇشئىپار چىقمىغان . 76 تەبىئەت بىر ئۇلۇغ گارمونىيە ، بىر ئۇلۇغ مۇھەببەت ماگنىتى ... تەبىئەت سۆيىدۇ ئۆز مەشۇقىنى ، سۆيگۈدىن راۋاندۇر بىپايان ئالەم ، بىلىمەن يارالغان تۇرۇپ سۆيگۈدىن ، شۇ سۆيگۈ تۈپەيلى گۇناھكار ئادەم . 77 مۇھەببەت يەلكىنىگە چۈشكىن ، پاجىئەلە دېڭىزىغا راۋان بول . يۈكسەكلىك تۇلپىرىغا مىنگىن ، كىشىلىك دالاسىغا چاپ . 78 ئاھ ، مۇھەببەت ، مۇھەببەت ... سەن سېھرىگەرنىڭ نەي ساداسى ئەمەس ، شەيدايىلىقنىڭ مۇناجاتى ؛ سەن ئېزىتقۇلۇق تۇمانلىرى ئەمەس ، ئارزۇلۇق ئۈمىدنىڭ گۈزەل پەرىشتىسى ؛ سەن ئۆتمۈشنىڭ ھەسرىتى ئەمەس ، كەلگۈسىنىڭ شولىسى . 79 ئاي يورۇقى ، يېقىملىق يېرىم قاراڭغۇلۇق . مەي تەسىرى ، نازۇك يېرىم ھاياتلىق . سەن بىلەن سەيلە قىلىپ كۆزلىرىڭگە يېنىپ - يېنىپ قارىماق ، ۋىنوسىزمۇ مەست قىلىدىغان شېرىن ئىچىملىك ... 80 ھايات ئۈمىدى چوڭ گۈلخان ، مۇھەببەت ئۇچقۇنى ئۇنىڭدىن تارار . مۇھەببەت ئۇچقۇندىشى لاۋىدەك يالجىتىدۇ ئىختىيار . بايلىق بىلەن نامراتلىق ئۇنى قىلار ئوخشاشلا بىقارار.

ماھىرە · ۋاقتى: 2012-5-17 00:59:51


	81 مەيلى سەرۋىي قەددىڭدە ياسا پاجىئەلىك دار ، مەيلى ئۇنىڭدا مەن قالارمەن ئەيساغا ئوخشاپ ئۆمۈرۋار . مەيلى چىمەن كۆكسۈڭنىڭ دالاسىغا تاشلانسام ، مەيلى يۈسۈپتەك ماكان بولسۇن ماڭا چاھۇغار . مەيلى بۈدۈر چاچلىرىڭ ئۇپقۇنىغا غەرق ئېتەي ، چور تان بېلىق يۇنۇسقا بولغان كەبى ساھىپكار . مەيلى ئىشقىڭ پىراقى ئوتقا سالسۇن قەقنۇستەك ، بولسام لېۋىڭ ئابىدىن تىرىلمەككە ئۈمىدۋار . 82 مۇھەببەت ، ئىناۋەتلىك سەزگۈ ، شېرىن زوراۋانلىق ... ئۇنىڭ ئالامەتلىرىنى ھېس قىلىمەن ، ئۇنىڭ ماھىيەتلىرىنى چۈشەنمەيمەن . ئۇنى چۈشىنىپ بىلىشكە ئاجىزمەن ، چۈشەنمەي قۇربان بولۇشقا قۇدرەتلىكمەن . بۇنىڭ شاھىتى : ۋاپاسىزلىق ئالدىدا زارلانمىغانلىقىم ... 83 ئۈمىد ، ئۈمىد ، ماڭا كېرىكى ئاشۇ نۇرانە ئۈمىد ... ئۈمىد ئۇ نېمە ئىدى ... ئۈمىد _ قاراڭغۇ كېچىدىكى شولىلىق چىراغ . ئۈمىد _ تەسەۋۋۇر دەرىخىدىكى رومانتىك قۇشى قونىدىغان چاڭگا . ئۈمىد _ رېئاللىقتىن بىزار بولغان مېڭىنىڭ لىرىك ئايۋاندىكى شېرىن چۈشى . ئۈمىد _ روھىيەت شىپاگىرىنىڭ تۇتىيا دورىسى . ئۈمىد _ پىل جىسمىنى پەيدەك ئۇچۇرىدىغان قانات . ئۈمىد _ يۇلتۇزلار چاچقۇلىرىنى سامادا ئارقانسىز كۆتۈرۈپ تۇرىدىغان ماگنىت . ئۈمىدسىزلىك _ قىيامەت ... 84 ئاي يورۇقى مەپتۇن قىلمامدۇ سېنى ، دىل شاۋقۇنى مەجنۇن قىلمامدۇ سېنى . سالقىن شامال قۇندۇز چاچلىرىمنى يۈزۈڭگە ياپقاندا ، ئىللىق سۆيگۈ تەسىر قىلمامدۇ ساڭا . ئىككى سىنە ، زىل - بوم تار بىر چېلىنسا ھايات زوقىن ئەسىر قىلمامدۇ ساڭا . مەن ساڭا ئوقۇغاچ مەدھىيە - ساما ، يۇلتۇزلار ئويناپ ساما . بەلكىم شۇڭا ئېگىلگەندۇ يادەك ساما . 85 ئىككى يۈرەك قىسمەتنىڭ ئۇلى ، ئىككى يۈرەكتىن قىسسە باشلىنىدۇ . 86 بارلىق ياخشى ئارزۇلىرىڭنى ھايات ۋاقتىدا بىجا قىلىپ ، بارلىق ياخشى ھىممەتلىرىڭنى ئۇنىڭ بېشىدىراق تۈگەتكىن . ئۆزۈڭ توغرىلىق دوزاخ قاپقىسى ئالدىدا ئاقلىغۇچىلىق قىلما ، جەننەت ئىشىكى ئالدىدا ھەسرەت چەكمە . 87 سەن ئەجدادىڭدىكى ، ياق - ياق ، پۈتۈن ئىنسانىيەتتىكى ھەممە گۈزەللىكلەرنىڭ مۇنەۋۋەر ۋارىسى . سېنىڭ قەلبىڭ ئۇلارنىڭ سەرگۈزەشتلىرىنىڭ ئەسلىمىسى ، ئۈمىد - ئارزۇلىرىنىڭ شولىسى .سەن ئىككىنچى ئېلىنا ، ياق - ياق گۈزەللىكنىڭ بىغۇبار ئۈلگىسى . 88 ۋاقىت زومىگىرى سېنىڭ ھۆسنۈڭدىكى گۈزەللىك خەزىنىسىگە چاڭ سالىدۇ . ھەسرەت زىمىستانى قۇندۇز چېچىڭغا قىراۋ تاشلايدۇ . ھەۋەس كۆزلىرى خېرىدارلىق زوقىنى بىۋاپالىق بىلەن گۇگۇمدىن تاڭغا يۆتكەيدۇ . 89 بەخت سازىنى تەڭشە . ئىككى تارنى بىر - بىرىگە مۇجەسسەم قىلغىن . ماسلاشمىغان تارلاردىن مەرسىيە ئاھاڭى ئاڭلىنىدۇ . 90 ۋاقىتنىڭ ئەجدىھاسىدىن غالىب چىقىش ئۈچۈن شۇنداق گۈزەللىك چوققىسىغا چىققىنكى ، كەلگۈسىدە جىسمىڭ تەبىئەت قوينىغا ، روھىڭ خەلق قەلبىگە كۆمۈلىدىغان بولسۇن . ئالەمدىن كەتكەن گۈزەللىكنىڭ روھىيەت مەنىسىدىلا كىشىلەرنىڭ ئەقىل كۆزىنى قاماشتۇرىدىغانلىقىغا ئىشەنمەمسەن ؟ 91 مۇھەببەت كۆزۈمگە سېھىرگەرلىك ئەينىكىنى تاقىدى ، ساڭا ئالتۇندىن ھەل يالاتتى . 92 ۋاقىت _ قۇدرەتلىك نوپۇز . ۋاقىت _ رەھىمسىز زوراۋان . ئۇ شىر ۋە يىلپىزنى يىقىتىپ ، يۇلتۇزلارنى كۆچۈرۈپ ، سۇيىقەستلەرنى چىرىتىپ ، سىرلارنى ئاچىدۇ . ئەسىرلەپ ياشىغان تۇتى ، يۈز يىللاپ ياشىغان ھىيلىگەر تۈلكە ، مىڭ يىللاپ كۆكەرگەن ئارچا ۋاقىت سەييادى ئالدىدا ئاجىز ئەسىرگە ئايلىنىدۇ . نۇھنىڭ كېمىسى ، پىرئەۋىن مۇمىياسى ، ساكيامۇنىنىڭ جەسەت ساندۇقى ، ئىبراھىمنىڭ غارى ۋاقىت ئالدىدا زەئىپ . ۋاقىت ھاياتلىق ئورمىسىنى ئورىدىغان ئورغاق ، گۈزەللىك يايلىقىدا جەۋلان قىلىپ يۈرگەن ئۆتكۈر چالغا . ئېھ ، سۆيۈملۈكۈم ، گۈزىلىم . پۈتۈن كائىنات زالىدىكى بىھېساب نەقىشلەر ئارىسىدا ساڭا يېتىدىغان ئۇلۇغۋار ئەسەر يوق . سەن ئەڭ ئالىي گۈزەللىقنىڭ ئەڭ نوپۇزلۇق ئۈلگىسى . قارا ، ئەنە ۋاقىت ، ئۇ يۇلتۇزلار ئارىسىدا پىرقىراپ يۈرمەكتە . ئۇ مېنىڭ تىنىقلىرىم ، سېنىڭ تەبەسسۇملىرىڭ ئارىسىغا يوشۇرۇنغان . كەل سۆيۈملۈكۈم ، گۈزىلىم ، مېنىڭ قاناتلىرىم ئاستىغا كىرگىن . ۋاقىتنى قايغۇ - ھەسرەت ، ئارزۇ - ئارمان بىلەنمۇ ، ھۆسن ئالىپتىلىقى بىلەنمۇ ئەيۋەشكە كەلتۈرەلمەيسەن . ئۇنى مەنىۋى گۈزەللىكنىڭ تىللاردا داستان بولىدىغان ئەسلىمىسى _ مېنىڭ شېئىرلىرىم يېڭىدۇ . ئۇ ئالەم سىرلىرى بىلەن تويۇنغان ، ئالەم ئەقلى بىلەن نۇرلانغان ، ئۆلمەسلىك ئالمىسى بىلەن ئۆزىنى زىننەتلىگەن ، ئۇ ياۋا گىياھ ئۇرۇقىدەك ھەمىشە تۆكۈلۈپ ۋە قايتا كۆكىرىپ تۇرۇشتىن ئىبارەت ئۆلمەسلىك جادۇسى بىلەن سېھىرلەنگەن . ئۇنىڭغا قۇدرەت بېغىشلىغان نەرسە ، جىمىكى زىۋىسلارنىڭ زىۋىسى بولغان ئىنسانىيەت . 93 مېنىڭ يۈرىكىم مۇھەببەت توپىسى بىلەن قاتۇرۇلۇپ ، ئىشق ئوتىدا پىشۇرۇلغان پىرامىدا . ئۇنى نىل ياقىسىدىن ئىزدىمىگىن ، ئۇ مىسرالار دالاسىدىكى جەزىرىگە كۆمۈلگەن . ئۇ يەردە ۋاقىت توزانلىرى بىلەن ئىقلىمنىڭ جۇدۇنلىرى يوق . 94 كۆزۈمنىڭ رەسىم رامكىسىدا سېنىڭ سۈرىتىڭ . قەلبىمنىڭ شېئىرىيەت دىۋانىدا سېنىڭ روھىڭ . 95 سېنى سۆيىمەن ، بىلىپ - بىلمەي سېنى سۆيىمەن . سېنى ياخشى كۆرۈشۈم بەخت ئەمەس ، ئۇ ئازابنىڭ بېشارىتى . بەخت ، مېنىڭ بەختىم مېنىڭ سېنى سۆيۈشۈمدە ئەمەس ، سېنىڭ مېنى سۆيۈشۈڭدىلا . سېنى سۆيىمەن ، بىلىپ - بىلمەي سېنى سۆيىمەن . مەشۇقسىز ئاشىقنىڭ مۇھەببىتى قىسمەتنىڭ ئېزىقتۇرۇشى ياكى شۈبھىلىك ئامانەت . ئۇ تەڭرىسىز ئىستىقامەتنىڭ ئەجىرسىز ئېتىقاد بولغىنىغا ئوخشاش بەختسىز بىچارىلىك . مېنىڭ ئىزدەيدىغىنىم : كۆڭلەكلىرى باغنىڭ چىتلىرىدا يىرتىلغان ، تەنلىرى تىكەندە قانىغان ، قىسمىتى غەزەل بولغان يۈرەكنىڭ بەختى _ ئەجىرلىك مەمنۇنىيىتى ... 96 مەشۇقى قولىدىكى خام چۈچۈك ئالمىنىڭ باققال ئالمىلىرىدىن لەززەتلىك بولغان تەمىدىن مۇھەببەتنىڭ بەختىنى سەزدىڭمۇ . ئالما دۇنياسىغا غەرق بولۇپ ، ئالما يەپ ياشايدىغان قۇرتنى بەختلىك دەپ بىلەمسەن . 97 كاككۇك _ ئەرك سېيماسى ، قونۇپ ئۆتكىن ھەر بىر موھتاج چىمەنگە . ئەركىن پىكىر _ ھەقىقەتنىڭ يالىڭاچ پەرزەنتى . ئۇ ئاپۇللونىڭ ئوت ھارۋىسى ياكى پۇساڭ دەرىخىدىن كۆتۈرۈلگەن قۇياش قۇشى بىلەن بىللە يەر - زېمىن ، دېڭىز - ئوكيانلارنى كېزىدۇ . ئۇنىڭ قايغۇلىرى ئىنسانىيەتنىڭ دەرسلىكى . ئۇنىڭسىز گۈزەللىك ئۆزىنىڭ مېڭىسىنىمۇ ، قەلبىنىمۇ يوقاتقان ھەيكەلگە ئايلىنىدۇ . 98 ئەركىنلىك قۇشى كرېست دارىغا قونۇپ ئۆتىدۇ . ئۇنى ياكى كەمسىتىپ چىرىتىدۇ ، ياكى ئۇنى ئەتىۋارلاپ مەشئەل دەستىسى قىلىدۇ . 99 ئەي گۈلزار ئاشىقى بۇلبۇل ، دېدى كاككۇك . ئۇ يەنە نېمىلەرنى دېگەنلىكى ئېسىمدە يوق . خىيالىمغا ئۇنىڭ يەنە مۇنداق دېگەنلىكى مەلۇم بولدى : سەن گۈللەر گۈزەللىكى ھەققىدە شائىرانە قەسىدە ، سازەندىلەردەك مۇڭلۇق كۈي بىلەن سايرىدىڭ . ئەمما ، مېنى تەئەججۈپ قىلغىنى ، سېنىڭ لالە پىيالىسىدىكى شەبنەم شارابىنى ئىچىپ ، لەرزان مەستخۇشلۇق بىلەن مۇناجات ئوقۇشتىن يىراقلىشالمىغانلىقىڭ بولدى . قارا ، قاناتلىقلارنىڭ ئەڭ كىچىكى ، سېنىڭدىن مىڭ ھەسسە زەئىپ بولغان قەيسەر پەرۋانىنىڭ جاسارىتىگە ! سەن ئۇنىڭ ئۆزىنى ئوتقا تاشلىغانلىقىدىن تەسىرلەنمەمسەن . ئۇ قەقنۇسنىڭ مۇرىتى ، سەمەندەرنىڭ ئوقۇغۇچىسى . ۋاھ ، پەرۋانە . سەن چىراغ مەشئىلىگە مەپتۇنلۇق ھېكايەڭنى پۈتۈن ۋۇجۇدۇڭ بىلەن يېزىپ كېلىۋاتىسەن . سېنىڭ تىلىڭ يوق . شۇنداقتىمۇ سەن نەزمىسىز داستان ، ئاھاڭسىز سېمپونىيە . سېنىڭ قىسقىغىنا ھاياتىڭ تارىخسىز قەھرىماننىڭ شەجەرنامىسى . سەن ھايات تۇترۇقلىرى بىلەن پارلاپ تۇرغان ھاياتلىق مەشئىلى ؛ زەردۇشت راھىبلىرىنىڭ ئاخرۇمازدىغا بولغان شەيدالىقى سېنىڭ ئالدىڭدا تىلغا ئېلىشقا ئەرزىمەيدۇ . 100 كاككۇك داۋاملىق سايرىدى . ئۇنىڭ قۇسقان نەزم قانلىرى ساقاللىرى كامپۇردەك ئاقارغان ، كۆزلىرى چوڭقۇر دېڭىزدەك ئەقىل بىلەن تولغان ھېكىمنى سەۋدايى ھالىتىگە كەلتۈرگەنىدى . سەۋدايى كاككۇك دېگەن تەئەججۈپلۈك سۆزلەرنى تەئەججۈپلىنىپ ئولتۇرماستىنلا تەكرارلاپ ، مېنىڭ قەلبىمدە بارلىق زورلۇقلارنىڭ شاھىنشاھى بولغان ۋاقىت قۇدرىتىنى يېڭىدىغان كىچىككىنە قەھرىماننىڭ مەيخانىسى تۇرۇپتۇ . بۇ ھاپىزنىڭ خانىقاسى ، تەرسانىڭ ئىھرامى ئەمەس . بۇ پەرۋانىدەك قەيسەر ۋە پەرۋانە ئۇۋىسىدەك كىچىككىنە يۈرەك . ئۇنىڭ رىتىمىدا جەننەت ھەۋىسى بىلەن دوزاخ ئەندىشىسى يوق . ئۇنىڭ ھاكىمى مۇھەببەت ۋە شېئىرىيەت ئىلاھىدىن ئىبارەت . سەۋدايى ھېكىم قاقاقلاپ كۈلدى : ئۇنىڭغا قارشى ئېتىلغان ھەر بىر ساداق ئىنسانىيەتنى نادانلىق غارىدىكى پاسىق قاراڭغۇلۇققا ، رەھىمسىزلىك دەشتىدىكى دەھشەتلىك قان توپانىغا گىرىپتار قىلىش ئىستىكىدە ئاسمان قەرىدىكى مۇبارەك ئاي بىلەن قۇياشقا تاش ئاتقاندەك ئېغىر گۇناھ ۋە بىھۇدە ئاۋارىچىلىك ... كاككۇك قاناتلىرىنى رۇسلىدى . سەۋدايى ھېكىم ئۇنى قەپەستىن قويۇۋېتىپ دۇئا قىلدى . كاككۇك قاناتلىقلارنىڭ ئەڭ قەيسىرى بولغان پەرۋانە ئالدىغا زىيارەتكە كەتتى . يۇلتۇزلار چاقنىدى ، گۈللەر تەبەسسۇم قىلدى . ئۇلار مېنى گۇناھسىز دېيىشتى .

ماھىرە · ۋاقتى: 2012-5-17 01:23:07


	ئىككىنچى باپ مارجاننامە 1 ئېھ،پايانى يوق ئاسمان ! سېنىڭ بوينۇڭدا سان- ساناقسىز يۇلتۇز تىزمىلىرى خۇددى جانان بوينىدىكى قىزىل مارجانلاردەك يالتىراپ تاۋلىنىدۇ . ئاھ چېكى كۆرۈنمەيدىغان ئوكيان ! سېنىڭ قوينۇڭ ھەددى ھىساپسىز مارجان بىلەن تولغان .بۇ يۇلتۇزلاردەك سۇ تېگىدە سىرلىق يوشۇرۇنغان . مەن ئاسمان بوينىدىكى يۇلتۇزلار بىلەن دېڭىز-ئوكيانلار قوينىدىكى مارجانلار ئارىسىدا مۇھتاجلىق غېمىنى يەيمەن . 2 مەن ھىجران دېڭىزى بوينىدا ، قىياغا سوققان ئۇپقۇنلارغا قاراپ كۆز يېشىنى تۆكۈپ سېنى سېغىنىمەن . مەن ۋىسال ئاپتىپىدا قۇرىغان كۆز ياشلىرىمدىن ئۈنچە مارجانلار تېرىۋالىمەن .مەن بۇنى شېرىيەتنىڭ قۇلۇلە قېپغا سېلىپ، ئىرپان دېڭىزىغا تاشلايمەن .مېنىڭ ھۈنىرىم ئادەمنىڭ سۆيۈملۈك پەرزەنتلىرىنىڭ قەدىمىگە يورۇق چاچىدىغان قان رەڭلىق سۈپ سۈزۈك مارجان ياساش . 3 يۇلتۇزلار مېنىڭ خىرە ئۇپۇقۇمنى يورۇتالمىدى....... پەقەت ئوكيانلار تېگىدىكى سۇ پەرىسىنىڭ خەزىنىسىگە قامالغان رەڭدار يورۇق مارجانلارنى ئاسمان يۈزىگە چاچقاندىلا ئالەم روشەنلىشىدۇ . مەن زىمىننى گۈزەللىك ۋە خۇش پۇراغلىق بىلەن بېزىگەن باغۋەنگە ماسلىشىپ،ئاسمان يۈزىگە مارجان چاچىدىغان زەر چاچقۇچى بولالىسام ئىدىم...... 4 كىچىگىمدە، جانسىز تەبىئەتكە ھەيران بولۇپ ،ئۆسمۈرلۈك چاغلىرىم جانلىق تەبىئەتكە بېرىلگەنىدىم. ياشلىق سۈبھىسىگە ئېرىشكىنىمدىن كېيىن ئۆزۈمنى يوقاتتىم .مېنى سېنىڭ مىسلىسىز گۈزەللىك ئىچىدە چاقناپ تۇرغان قۇدرەتلىك مۇھەببىتىڭ ئىختىيارىم راۋىقىدىن ئوغۇرلاپ شېرىيەت دېڭىزىغا تاشلىدى مەن ئۆز ئوغرامنى مەدھىيىلەيمەن، ئۇنىڭ بوينىغا مارجان تىزىقلىرىنى تاقايمەن. 5 كۈزۈڭنى سېھىر بىلەن قاماشتۇرۇپ تۇرغان ئېگىز قىيا ئۈستىدىكى گۈزەللىك راۋىقى، گۈزەللىك سېنى سېھىر بىلەن مەپتۇن قىلامدۇ ياكى سەن گۈزەللىكنى سېھىر بىلەن كۈزىتەمسەن ؟ بۇ باغرىڭنىڭ ھەسبى ھالىغا[ھەسبى ھالى- يول قويغانلىرى ،تويغانلىرى،قىممىتى دېگەن مەنىلەردە-مۇھەررىردىن] باغلىق .... مېنىڭ بىلىدىغىنىم :بۇ راۋاقنىڭ ئوڭ بېقىنىدا ياخشىلىقلار پەرىشتىسى دىيانەت شىپاڭىنى سالسا ،ئۇنىڭ سول بېقىنىدا يامانلىقلار دىۋىسى ھىلە مىكىر خەندىكىنى كولايدۇ . دىلىمنى خاتىرجەمسىزلەندۈرۈپ تۇرغان نەرسە گۈزەللىك نىڭ تەغدىرى ! 6 ئادەم ئۆزى خاتىرجەم بولغان نەرسىنىڭ ئۆزىدىن خاۋاتىرلىنىدۇ .چۈنكى:كېچە بىلەن كۈندۈزنىڭ ئۆز تىياتىرنى كۆرسىتىدىغان سەھنىسى بىرلا ئاسمان . 7 دانىشمەن ئۈچۈن كېچىدە چىراغ ھاجەتسىز . 8 شائىرنىڭ شېئىرى بولمىسا ، گۈزەللىكىڭ ئېچىلمىغان ياقۇت خەزىنىسى ۋە ياكى غەرق بولۇپ كەتكەن كېمىنىڭ گەۋدىسى . سېنىڭ گۈزەللىكىڭ بولمىسا ،شائىرمۇ غوزسىز چار كېپىنەك ۋە ياكى سىياھسىز قۇرۇق قەلەم . 9 ئادەملەر ئۈمۈد قالۇنى بىلەن ئۆتكەن ھاياتنىڭ ھەسرەتلىك مەرسىيىسىنى چېلىپ كەلدى . تارىخنىڭ ئۈمۈد بىلەن كۈتىدىغىنى ئىنسانىيەتكە بېغىشلانغان زەپەر قەسىدىسى . 10 قەلبىڭدىن ئاڭلىدىم نازۇك سادانى ، ئۇ بەلكى تۈمەن يىللىق كونا مۇھەببەتنىڭ داۋامى . ھۆسنۈڭدىن كۆردۈم يېشىل گۈلشەننى ، ئۇ بەلكى كەلگۈسى گۈزەللىكنىڭ ئۆلچىمى . 11 ئاسمان يىراقلىقى بولمىسا يۇلتۇزلار تەكتىكى ئۈزۈم ؛ دېڭىز چوڭقۇرلىغى بولمىسا مارجانلار بېغىمدىكى بۆلدۈرگەن ؛ ھىجران مۈشكۈلى بولمىسا سەن ئالدىمدىكى ھەيكەل . 12 زامانداشلىرىڭ سېنى ھەسەت كۆزى بىلەن كۆرۈپ رەشىك قىلىشىدۇ . كېيىنكى كىشىلەر سېنى ئەقىل كۆزى بىلەن كۆرۈپ مەپتۇن بولىشىدۇ . كەلگۈسى سەن ئۈچۈن تاش ئابىدە تىكلەيدۇ . تارىخنىڭ كالېندارى رەھىمسىزلىك چۇقانلىرى بىلەن تولغان . ئۇ يىراقلاشقانچە ھىكايىلەردەك ئۆزىنى لىرىكا بىلەن بېزەيدۇ . كەلگۈسىنىڭ خىياللىرى مەھلىيالىق شولىلىرىنى چاقنىتىپ تۇرغان جاناننىڭ كۆزى.... 13 زىبۇ زىننەت بازىرىنىڭ ئېسىل مۆجىزىلىرىمۇ بىر تال قۇندۇز چېچىڭغا تەڭ ئەمەس . گۈزەللىكتە ۋايىغا يەتكەن گۈزەلنىڭ زىبۇ- زىننەتكە مايىل بولىدىغانلىقىغا ھەيرانىمەن . 14 ۋاقىت ئەجدىھاسىغا قەلەم نەيزىسىنى كۆتۈرۈپ تاقابىل تۇرىمەن . كىشىلىك رەھمىتى بىلەن ئۇنى يېڭىمەن. 15 ئۇ مېنى شېرىن چۈشلىرى ئارىسىدىلا ناگان –ناگەندا ئەسلەيدۇ . مەن ئۇنى شېئىرلىرىم ئىچىدە مەڭگۈ تەكرارلايمەن . ئۇ ئۆز جىسمىنى مەرۋايىت ئۇپىلىرى بىلەن بېزەپ مەرمەر ھەيكەل قاتۇرىدۇ . مەن ئۇنىڭ تەرىپىنى ئاددى قەغەز ئىچىگە ياۋا گىياھ تېرىيمەن . ئاددى قەغەز _ ئۆلمەسلىك دەرياسىدا سۇغىرىلغان ئېسخىل . 16 ھۆسنۈڭگە بېقىپ تىلسىز بۇلبۇل ناخشىچى بولدى . سېنى مەدھىيەلەپ مەندەك نادان ئىلىم دەرياسىغا چۈشتى . قېنى مارجانلىرىڭ،قەدرىمنى چۈشەنگىن،گۈزەل سۇ پەرىسى..... 17 مۇھەببەت ئازاپ چېكىدىغان بېھىش.ئۇنتۇلما،ئالما يەپ لەززەتلەنگەن ھاۋا بېھىشتىن ھەيدەلگەن . 18 ھەممە ئەسەرلەر ئۆز گۈزەللىرىنى كۈيلەشتى .قىيامەت بولغاندا پۈتۈن گۈزەللەر ھايات مەيدانىغا قايتقاندا ،گۈزەللىك تەنتەنىسى قىيامەنت ۋەسۋەسىسى ئۈستىدىن غالىپ كەلمەسمۇ .سېنى زىۋىس ئېلىنانىڭ ئالدىغا قويىدۇ ، ئالتۇن ئالمىنىڭ ھەقىقى ئىگىسى سەن . شۇ چاغدا ترۇيا ئۇرىشىدىن مىڭ ھەسسە ھەيۋەتلىك رەشىك بەيگىسىنىڭ بۇلۇشىنى بىلەمسەن ...... 19 ھەقىقى شېئىرىيەت_ئەركىن ئازادلىقنىڭ مەشۇقى . نوپۇزلۇق پىكىر ئۇنىڭ مۇشتىقى . 20 قۇلۇلە دېڭىزىنىڭ چوڭقۇر تەكتىدە تۇرۇپ قاتتىق قاپچۇقلىرىغا مارجان يىغىدۇ ،ئۇ سازاڭدەك مۇلايىم ئەمەس . ئۇنىڭ شەپقەتسىز پوستى قاندەك قىپقىزىل مارجانلار خەزىنىسى . ئاھ، مارجان ! سەن قۇلۇلىگە ئايلانمايسەن ،سەن ئۇنىڭ باھاسىز تۇتقۇنى .ھەسرەت ئىچىدە نادامەن قىلىمەن :ئالتۇن ئۆز خىسلىتىنىڭ ئەكسى بولغان تاشتەك گۈزەل قىزلار قاراقچىلار غارىغا ،ئىپار كېيىكى ھىيلىگەر سەييات كانارىغا ، بۇلبۇل قەپەس دەرگاھىغا بەنت بولۇشنىڭ سىرىنى ئىزلەيمەن . مارجان بىلەن لىق تولغان قۇلۇلە قېپىنى ئالەم ئۈچۈن كاھىشچىلارنىڭ ياماق چۈشكەن يەلكىلىرىگە چاچىمەن . تەغدىر يارلانغانلاردىن قۇدرەتلىك ئەمەس . بۇ يازمىنى ئاخىرىدا ماھىرە تەھرىرلىگەن. ۋاقتى 2012-5-17 01:26

elxatrahim · ۋاقتى: 2012-5-17 10:21:57

ئەسكەرتىش: يوللىغۇچى چەكلەنگەن. مەزمۇننى كۆرەلمەيسىز .

مۇھەممەت توختى · ۋاقتى: 2012-5-17 10:24:23


	ماھىرە سىڭلىمىز ناھايىتتى ئېسىل ئىشتىن بىرنى قىپتۇ . چۈنكى ئالىمغا ھەممىمىزنىڭ ھۆرمىتى چوڭقۇر . ئالىمنىڭ ياتقان يېرى جەننەتتە بولغاي . مەن بۇ ئەسەرنى ئوقۇپ چىقىپ خوشال بولدۇم . ئەمەلىيەتتە مەن بۇ كىتابنى تاپالماي يۈرگەن ئىدىم . بەك ياخشى بولدى . سىڭلىمىز ھارمىغاي . بۇ ئەسەرنى ھەممەيلەننىڭ بىر قېتىم ئوقۇپ چىقىشىنى تەچسىيە قىلىمەن .

مۇھەممەت توختى · ۋاقتى: 2012-5-17 10:25:12


	ئاخىرىنى داۋاملىق كۆرۈشكە تەشنامەن .

ماھىرە · ۋاقتى: 2012-5-17 12:37:28


	21 مېنىڭ سېنى سۆيۈشۈم ئەركىنلىكنىڭ ئىلتىپاتى . مېنىڭ ئەركىنلىگىم مەۋجۇتلۇقنىڭ غۇرۇرى . مەن سېنى سۆيۈمەن ، سەندىن ھىچنىمە تەلەپ قىلماستىن ،تولىمۇ مەيۈسلۈك بىلەن سېنى سۆيۈمەن . مېنىڭ باغرىم گۈللەر تەكچىسى، شەيدايىلار مەيخانىسى بولغاندىمۇ ياكى كۆز ياشلىرى بۇلىقى، قانلارنىڭ زەرداپ قاينايدىغان قازىنى بولغان چېغىدىمۇ سېنى سۆيۈمەن . ئەگەر سۆيگۈم تۈپەيلى سەن ئۇنى چۈشەپ قويساڭ، ئەتىۋارلىق ئەھمىيىتىڭنى يوقۇتىسەن . 22 جىسمىم روھىڭ بىلەن غەمكىنلەشكەنىدى ، مانا ئەمدى روھىم جىسمىڭ بىلەن ئېغىرلاشتى ..... 23 ئۇ خەلىق چۆچەكلىرىنى ئاڭلىغاندا كۆز يېشى قىلاتتى . ئۇ قىسمەت توپانلىرى قاينىمىدا مەجنۇندەك قاقاھلاپ كۈلەتتى . ساختىپەزلىك بىلەن تولغان ئالەمنىڭ ئادەم ئاتا ۋە ھاۋا ئانا تەبىئىتىنى ئۇنتىغان مالىمانلىرى ئىچىدە سېھىرلەنگەن ھەممە زەئىپ كۆزلەر ئۈچۈن ئۇنىڭ يىغا ۋە كۈلكىسى ئەقىلغا سىغمايدىغان ھاماقەتلىك ھىساپلىناتتى .لېكىن ئۇ ئادىل ئىدى . 24 غالىپ زەپەر چوققىسىغا چىقتى . ئۇ زىمىن يۈزىگە پەرۋاسىزلىق بىلەن نەزەر سالدى ، ئارقىدىنلا ۋارقىراپ يىغلىدى . ئەتراپتىكىلەر بۇنى سەزمىدى . 25 سەن ئىبراھىمدەك ئوت ئىچىدە پەرياد چەكمىدىڭ. سەن يۇنۇس پەيغەمبەردەك، بېلىق قارنىدا ئۆز ئىشقىڭدىن يانمىدىڭ. سېنى ئەتىۋارلاپ ، ساڭا ئاتاپ قىزقل مارجانلار بىلەن پىرامىدا ياساتسام ، روھىڭ غەمكىنلەشتى .بۇ پىرامىدانى بۇزۇپ، ئۇنىڭدىكى مارجانلارنى مۇھتاجلىق دۇنياسىغا چاچسام خۇشاللىق تەبەسسۈمىنى جىلۋىلەندۈردۈڭ . سېنىڭ قەلبىڭنى چۈشەندىم، سەن يۈكسەك پەزىلىتىڭ بىلەن قەد كۆتۈرۈپ تۇرغان پىرامىدا . 26 مەن ئۆز-ئۆزۈمنى تاماشا قىلىۋاتىمەن . مەن مۇھتاجلىقتا،مۇھتاجلار ئارىسىدا ،مەن قىستا-قىستاڭدا،توپا-چاڭدا،مەن ھىچكىمنىڭ يادىدا ئەمەس ،ھەممە مېنىڭ نەزىرىمدە ،ئالەم مارجانلىرى بىر –بىرى بىلەن سۈركىلىشىپ،ئۇششاقلىنىپ كېتىۋاتقان قۇلۇلە قېپىغا ئوخشاپ كۆرۈندى . مەن تەمتىرەپ قالدىم .سۇمرۇغلار تۇخۇمى مارجان ئاتالمىسىمۇ يوقالغان نەرسىنىڭ قالدۇق نامى بولۇپ قالمىغىيتى .بېلىق كۆزلەر مېنى تونۇمايدۇ ، گۆھەر كۆزلەرنى مەن تاپالمايمەن . تىترەپ تەمتىرەيمەن ،ئېچىنىپ مۆلدۈردەك ياش تۆكۈمەن . ئالەم ئەمدى مېنى تاماشا قىلىۋاتىدۇ . 27 باغۋەن ئۈزۈمنىڭ شىرنىلىكلىگىدىن پەخىرلەنمەيدۇ .ئۇنى تېتىغانلارنىڭ ماختاشلىرىدىن روھلىنىدۇ . سېنىڭ سۆزلىرىڭ ماڭا ھەممە مىۋىدىنمۇ تەملىكرەك . 28 مۇھتاجلارنىڭ مورىسىدىن چىققان ئىسنىڭ يېرىمى يېقىلغۇ ، يېرىمى ئاھۇ پەرياد . كامىرانلارنىڭ[كامرانلارنىڭ-بەختىيار كىشىلەر –مۇھەررىردىن] تۇرخۇنىدىن چىققان تۈتەكنىڭ نىسپى يىلتىز، نىسپى يوپۇرماق . 29 ئىسكەندەرنىڭ ھەر- بىر غەلبىسى ئۇنى غەمكىن قىلغانىدى.ئۇنىڭ ياشلىق چېكىسىگە چۈشكەن ھەر بىر ئاق پامىرنىڭ مەسخىرىسى ئىدى. ئىسكەندەر تېخىمۇ كەڭ زىمىنغا قول سوزغۇچە،شۇنچە سىقىلىش ھىس قىلدى . تارىخ ئۇنىڭغا قول سوزغانىدى . 30 سەن ئالتۇن يالادقان مەبۇد ئەمەس .ھەقىقى بەدەخشان ياقۇتى . سەن كۆزنى قاماشتۇرىدىغان ئەينەك پارچىسى ئەمەس ، چوڭقۇر دېڭىز . مەن ساڭا نەزەر سالغىنىمدا ھەسرەتلىك بۇلبۇلدەك ئاۋازسىز پىكىرگە غەرق بولىمەن . مەن سېنى ئويلىغىنىمدا چىراغقا ئېتىلغان پەرۋانىدەك ھەممىنى ئۇنتۇيمەن . 31 ئىنساننى ئاچكۆزلۈك ئەجدىھاسى بىلەن ھەسەتخىورلۇق يالماۋۇزى مارجانلار مەيدانىغا ئىتتىرىپ كەلدى.ساڭا يەنە نىمە يېتىشمەيۋاتىدۇ . مارجانلارنى مۇھتاجلار قولىدىن تارتىۋالماڭلار .تارتىۋالغۇچىلارغا تارتۇق قىلىندىغىنى <<مەغپىرەتنامە >>ئەمەس،بەلكى <<مەسخىرنامە>>! 32 شەبنەم چۈشكەن لالىدىن ئىچسەم گۈلرەڭ شەربەتنى ، تۇپا، سۇ، ئوت ، ھاۋادىن تاۋلىسام ھىس- ئىدراكنى . مەپتۇنلۇقتا ئەرزىمەس بىقارار ئىقلىم ماڭا ، كۈيلىسەم سۈيۈپ قايتا گۈللەيدىغان چېچەكنى ، 33 ھاياتنىڭ سىرلىرىنى بىلىش ئۈچۈن قىسمەت كەپتىرىنى ئۇچۇر ؛ ئۆمۈرنىڭ قامۇسىغا مەنە ئېيتىش ئۈچۈن قېرىلىق راۋىقىغا چىققىن .قارا،سېنىڭ قولۇڭغا يەتكۈزۈش ئۈچۈن، ئەي ئادەم ئەجدادىنىڭ ئەجدادى، شېئىرلىرىم مارجانلىرى تولغان ھېكمەت تاۋىقىنى ئېلىپ كېتىۋاتىمەن . 34 گۈزەل سەنەم ! سۇ ئۈستىدىكى نى؛ۇپەر گۈلىنىڭ تەكچىسىدە ئۇسۇل ئوينىغىن .ئۇنىڭ بەرگە ۋە يوپۇرماقلىرى نىلۇپەر شەكلىگە كىرگەن قۇلۇلە قېپى .ئۇ سېنى سېھىر بىلەن ئۆز تەكچىسىگە قوندۇرۇپ، زەرپۇرۇشلار قولىدا دىنارنى قىسىپ تۇتقاندەك تۇتۇپ، سېنى قۇلۇلە قېپىغا سېلىپ ، دېڭىز تېگىگە غەرق قىلىدۇ . ئۇ سەندىن ئالەمدە تەڭداشسىز مارجان ياساپ ، جاھان بازىرىدا ساتىدۇ . سېنىڭ خۇش پۇراغلىق بېغىڭ ئەڭ ياخشى ئۇسۇل سەھنىسى . 35 مەن سېنىڭ لالە بەرگىڭگە شەبنەم بېشى تۆكىمەن . مەن بۇنى خىجىللىق بىلەن يوشۇرىمەن . سەن ئۇنى پۈتۈن ئۇچار قۇشلارغا ھەدىيە قىلىسەن . ئۇلار سېنى كۈيلىشىدۇ . 36 چەكسىز تەبىئەتكە قاراپ مېنىڭ باغرىمدا ھايات پىچىرلايدۇ. كۆزلىرىم يورۇقلۇق ۋە قاراڭغۇلۇق ئىچىدە ئالەمنى كۆزىتىدۇ . ئۇنىڭدا يورۇق جاھاندىكى سەرخىل ئۈنچە - مارجان خەزىنىسى بار . مەن ھەر كۈنى سېنىڭ تىلسىز ، يۇمران ، نازۇك جىسمىڭنىڭ توپا - چاڭلار ئارىسىدا يالاڭغىداق يۈرۈپ ، ئۇسسۇزلۇقتىن تىترىگىنىنى كۆرگىنىمدە ، كىرپىكىمنى تىغ قىلىپ ئىككى تىزىق ئۈنچە - مارجاننى ئۈزىمەن . ئۇ شورلۇق تەم بىلەن مېنىڭ مەڭزىمدىن ئېقىپ سېنىڭ لېۋىڭگە تامچىلىغاندا ، مۇراببا قاتمىسىغا ئايلىنىدۇ . ساڭا تەئەججۈپلىنىمەن . 37 ئاي ئىلاھى! تاڭ سەھەردە نېمىشقىمۇ شەبنەم ياشلىرىڭنى تۆكىدىغانسەن . كۆز يېشىڭنى شايى رومىلىڭ بىلەن سۈرتكىنىڭدە ، شەپەق شولىسىدا بۇ شەبنەملەرنىڭ بەدەقشان ياقۇتى ئىكەنلىكىنى بايقىدىم. ئاي ئىلاھى ! بۇلۇتلار قەسىرىگە كىرىپ كېتىۋاتقىنىڭدا لام - جىم دېمىدىڭ . بىراق ، ئۇنى ئېغىرلاشتۇرغان سېنىڭ ئاھۇ - پەريادىڭ . شەبنەم ياشلىرىنى قامال قىلغان بۇلۇت توسمىلىرى ئېغىرلىقىنى كۆتۈرەلمىدى . ئۇ كۇكۇم - تالقان بولغىنىدا زېمىننى قاتتىق يامغۇر باستى . مەن ئالىقانلىرىمنى ھاۋاغا ئېچىپ ، لالە يوپۇرماقلىرىنىڭ يېنىدا تۇرۇپ ، تەرسالىقىدىن ۋەيران بولۇۋاتقان سۆرۈن بۇلۇتنىڭ كېيىنكى سەرگۈزەشتلىرىنى كۈتۈپ تۇردۇم . لالە يوپۇرماقلىرى ئاستا پىچىرلىدى : كۆز ياشلىرى ئۇلىمپىك تېغىدىكى ئىلاھلاردىن قۇدرەتلىك . 38 سەن بىر پارچە دالا گۈلخانىنىڭ يالقۇنى . سەن پەرۋانىلەرنى بەس - بەسكە سالىدىغان مەھلىيالىق چىرىغىنىڭ ئوت تاجىسى . جىمجىتلىق ئىچىدە تەپەككۇر قىلغىنىڭدا ، چاچقان شولاڭنىڭ ھەر بىر زەردىسىنى تالىشىپ ئەتراپىڭدا ھايات جېڭىنىڭ قايناملىرى بۇلدۇقلىغانلىقىنى كۆرىسەن . 39 مەن كىچىككىنە ياۋا رەيھاننىڭ سۇسىرىغان چېچىكى . مېنى سۇغۇرۇپ تۇرۇۋاتقان نەرسە نەچچە مىڭ يىللىق مۇھەببەت شەبنىمى . يوپۇرماقلىرىم ئىشق پىيالىسىدەك سۆيگۈ شارابىدىن مەست بولدى . ئالەمنىڭ ئەڭ كونا ، پاك مۇھەببىتىنىڭ شىۋىرلاشلىرى ھەر خىل تىل ۋە ئاھاڭلاردا مېنىڭ قۇلىقىمغا گۈزەللىكنىڭ گارمونىيىسىنى يەتكۈزدى. مەن كىچىككىنە ياۋا رەيھان گۈلىنىڭ ئەمدىلا ئالەمگە كۆز ئاچقان چېچىكى . ھەيۋەتلىك ئىشق تەڭرىسىنى مەپتۇن قىلىدىغان بۇ شەبنەم زۇمرەتلىرىنى كۆتۈرۈپ چايقىلىشقا قۇدرىتىم يېتەرمۇ . مەن ئودىسسانىڭ ئېغىر ئوقياسىنى ، پەرھاتنىڭ ئالماس بازغىنىنى كۆتۈرەلەرمەنمۇ . يېنىمدىن يەنە شىۋىرلاش ئاڭلاندى : جاسارەتلىك بولغىن ، مەن ساڭا مەڭگۈ تەئەللۇق . ھاياجانلاندىم ، ئەلمىساقتىن بېرىقى كونا مۇھەببەت ئۆزىنىڭ پاكلىقى بىلەن مېنى قۇدرەتلىك قىلدى . 40 مەن توي قىلىۋاتىمەن ... ، مۇھەببەت شېخىدا بىخ چىقارغان قىزىلگۈل يۈرىكى بىلەن توي قىلىۋاتىمەن . تۈن كېچىسى . چىراغ شەيدالىرى _ پەرۋانىلەر چوڭ گۈلخان ياسىدى . چىمەنلەر ماڭىمۇ گۈللۈك كىيىم كىيدۈرۈپ بېشىمغا گۈلتاجى تاقىدى . گۈللەر ئارىسىدىن كۆتۈرۈلگەن ئاي كۈلۈپ تۇرغان ئىشق ئىلاھىغا ئوخشايتتى. شاماللار راۋابىنى ئالدى . شەبنەم شارابلىرى بىلەن مەست بولغان مېھمانلارنىڭ ھەممىسى ، جۈملىدىن پەخىرلىكى مەنمۇ باغۋەننىڭ ئىجادىيىتى ئىدۇق . بىزنى يوپۇرماقلار يوپۇتۇپ تۇراتتى. ئېسىمدە مۇشۇ كۆڭۈللۈك توي كېچىسى . مېنىڭ كۆرگەنلىرىم تىلسىز بۇلبۇلنىڭ ، ساداسىز ساتارنىڭ كۈيلەنمىگەن مۇقامى بولۇپ ، تىلىم ئۇچىدا ، يوپۇرماقلار ئارىسىدا قالدى . بۇ يازمىنى ئاخىرىدا ماھىرە تەھرىرلىگەن. ۋاقتى 2012-5-17 12:41

ماھىرە · ۋاقتى: 2012-5-19 22:21:52


	41 مېنى زوق ۋە تەبەسسۇم بىلەن كۈلمىدى دېمىگىن . مەن مۇلايىم تەبەسسۇم بىلەن كۈلۈشنى قانداق ئارزۇ قىلماي ... مەن تەبەسسۇم ۋە مەمنۇنىيەت بىلەن كۈلۈشكە كۆزۈمنى ئاچقىنىمدا تاقەتسىز توپلانغان ياش مۇنچاقلىرىم يۈزۈمنى قاپلايدۇ . مەن خىجىللىق ئىچىدە ئۇيىلىمەن . مەن ۋارقىراپ ، پەرياد كۆتۈرۈپ يىغلىمايمەن . چۈنكى ، مەندە ئالەم قايغۇلىرىغا ھەيرانلىق يوق . ئۇلارنىڭ ھەممىسى ماڭا ناتونۇش ئەمەس . مەن مۇلايىم تەبەسسۇم بىلەن كۈلمەكنىڭ مەستانىسى . ئەمما ، قەلبىم بىلەن كۆز چانىقىم ئاۋازسىز كۆز ياشلىرىنىڭ بۇلىقى . سەن مېنى مەيۈس پىكىرلەرنىڭ مەپتۇنى دەپ ئەيىپلىمىگىن . ئۆزۈممۇ چۈشەنمەيمەن . پەرۋاز قىلىشقا ئىنتىلىپ قانات قاققان قۇشتەك قەلبىمنىڭ كۆز ياشلىرى دەرياسىدا بېلىق بولۇشىغا مۇيەسسەرلىكىنى چۈشەنمەيمەن . ئېھتىمالىم ، بۇ مېنىڭ مۇلايىم راستچىللىقىمدىندۇر . ئالەم ئۆزىنىڭ سېھىرلىرى بىلەن ئۆز سىرلىرىنى مەڭگۈ يوپۇتالارمۇ ... 42 مەن كۆز ياشلىرىمنى سەبىيلىك بىلەن ئاققۇزۇپ تۈگەتتىم . ئۇنىڭ ئېرىتىلگەن ئۈنچە - مارجان ئىكەنلىكىنى نەدىن بىلەي . ئۇنىڭ ساقىندىلىرىدىن پەيدا بولغىنى يوپۇرماقلار تەخسىسىدىكى شەبنەملەر . ئۇنىڭ كۆل ئۈستىگە چۈشكەنلىرىدىن مەرۋايىت ۋە قىزىل مارجانلار تۆرەلدى . سېنىڭ مەڭزىڭگە چاچرىغانلىرىدىن ساڭا ھۆسن قوشۇلدى ، يۈزۈڭ بەدەقشان ياقۇتىدەك ، مەڭزىڭ يۇرتۇمنىڭ گىردە ، توقاچلىرىدەك قىزاردى . ئۇنىڭ ناگان - ناگاندا ئاپئاق سەھىپىلەرگە تامچىغانلىرىدىن نەزمىلەر پەيدا بولغانلىقىنى كېيىنچىرەك بايقىدىم . مەن كۆز ياشلىرىمنى بىخەستەلىك بىلەن ئاققۇزۇپ تۈگەتتىم . ئۇنىڭ ئېرىتىلگەن ئۈنچە - مارجان ئىكەنلىكىنى نەدىن بىلەي . ئۇلار ئافرۇدېت )يۇنان ئەپسانىلىرىدىكى گۈزەللىك ئىلاھى )تىن ئىلگىرى ، قەقنۇستىن مۇقەددەم ، ئادەمنىڭ تۇنجى پەرزەنتىدىن ئىلگىرى يارالغانىكەن . ئۇنىڭدا كۆزنى غىدىقلايدىغان يۇلتۇزلارنىڭ ئايەتلىرى ، ئىزى قالمىغان سۇمۇرغنىڭ ۋەسىيەتلىرى ، زېمىن ئۈستىدە سۇ بىلەن شامالنىڭ ھۆكۈمرانلىق تالىشىش توپان تەزكىرىسى ، مۇزىكىنى ۋايىغا يەتكۈزىدىغان جىمجىتلىق ۋە قىقاس - چۇقانغا تولغان ئۆلۈم دەبدەبىسى ئۆز نەمۇنىلىرىنى مۇمىيا قىلىپ كەتكەنىكەن . چوڭقۇر مەيۈسلۈككە غەرق بولدۇم . دېڭىز ياقىسىغا ئۇرۇلغان بۇژغۇنلاردىن كىمدۇر بىرىنىڭ ئىلاھى نەۋھى ئاڭلاندى : كۆز ياشلار ئالەم يۈزىنى يېڭىلايدۇ ، مارجانلار تاۋلىنىدۇ ، ئۇ قۇياشنىڭ پەرزەنتى ، ئىنسانىيەت غەلىبىسىنىڭ بارىمتايى ( گۆرۈ ئورنىدا ساقلىنىدىغان شاھزادە...) 43 ھەقىقەت ۋە ئىلىم بىلەن بېزەلگەن كىچىككىنە تەپەككۇر يەلكىنىگە چۈشۈپ ، قىيا - چىيالار دېڭىزىدا داۋالغۇپ ئىلگىرىلەۋاتىمەن . كىچىككىنە تەپەككۇر يەلكىنىگە چۇقانلار تۈتەك يېيىپ مېنى ھالسىراتتى . ھالسىزلىقتىن چۈشەكىدىم . مېنىڭ سۆيىدىغىنىم ، مۇھەببەت ۋە ھېسسىياتلار گۈلىستانىنىڭ مۇلايىم ، ئىللىق ، لەرزان مۇزىكىسى . ئۇ ئۈمىد تەڭرىسىنىڭ شىۋىرلىشى . ئۇ قىيا - چۇقانلار بوتقىسىدىن قىزىل شاراب ئىشلەپ چىقىدىغان ئاجايىپ ھامى . قىزىل شاراب لېۋىمگە تەگمەي تۇرۇپ ئەندىكىۋاتىمەن . ھېسسىياتسىز ئەقىل ، مۇھەببەتسىز ھەقىقەت مېنىڭ سۆيگۈلىرىمگە مەنىسىزلىك بىلەن يوپۇرۇلمىغىيتتى ، ئۇ خۇددى ئادەم چۈشىدە كۆرىدىغان جانسىز ئەرۋاھتەك ماڭا يوپۇرۇلمىغىيتتى ... بۇ ئەرۋاھ ئۆز قۇدرىتىدىن قورقۇپ ئۆزىنىڭ زەپەر شارابىدىن پەرىشانلىق پەريادى چەكمەكتە . 44 مۇھەببەتتىن ئىبارەت ئادەم قەلبىدىكى ھېسسىيات يالقۇنى ئۆزىنىڭ نۇرانە غۇنچىسىنى ھەمىشە ئۆزىگە ناتونۇش نەرسە ئۈستىدىلا ئېچىلدۇرىدۇ . ئۇ ئالەمنىڭ ھەمىشە تەكرارلىنىدىغان ۋە پەقەت ناتونۇش مەشۇقىغا ئاتالغان لىرىكىسى . ئۇ ئادەمنىڭ بارلىق ئەركىن ئارزۇلىرىنىڭ بىرىنچى ئەڭ چوڭ نوپۇزلۇق ھوقۇقى . مەن ھاياتقا مۇھەببەت بىلەن ، ياشلىق چېچەكلىرى بىلەن قولۇمنى ئۇزاتتىم . ھايات گۈزەسىدىكى چېچى ئاقارغان غۇربەت سەرگەردانلىرى ماڭا جاھانكەچتىلىك سەۋدالىرى بىلەن پىچىرلىدى : بەختسىز سەرگەردانلىق . 45 ئۆزۈم توغرىلىق كۆز ياش ئاققۇزۇشتىن تارتىنىمەن . مەندە مۇنداق كۆز ياشلار يوق ! سەن ئۈچۈن يىغلايمەن ! مېنىڭ ساڭا ئاتىغان ھەممە غەزەللىرىم ، قەسىدىلىرىم ، رۇبائىيلىرىمنىڭ ھەممىسىلا كۆز يېشىم بىلەن يېزىلغان . مەن ساڭا بەخت مۇئەككىلى ھۇمانىڭ ئەرۋاھىدەك شەپقەت بىلەن نەزەر سالىمەن . سېنىڭ ئالدىڭغا دۇچ كەلگەن ئۇپقۇندىن پەرياد كۆتۈرسەم ، سېنىڭ ھۆسنۈڭگە نۇر چاچىدىغان مەنزىرىدىن ھۇزۇرلىنىمەن . بۇلار ھەر ئىككىسىلا مېنى يىغلىتىدۇ ... مېنىڭ كۆز ياشلىرىم ، ساڭا پۈتۈلگەن ، ساڭا ئاتالغىنى ئۈچۈن ، ئۇ شېئىرىيەتتىكى مەنىۋى مارجان . مەن ئۇنى ساڭا موھتاجلىق بۆشۈكىدە قورقۇنچلۇق چۈشەكەۋاتقىنىڭدا ئاققۇزغانىدىم . سەن يېتىلگىنىڭدە بۇ مارجانلارنىڭ شەرھىسىنى چۈشىنىسەن . ئۇ چاغدا مەن ئۆزۈمنىڭ ئەرۋاھى سۈپىتىدە سېنى يۆلەيمەن. 46 ساما كۆز ياشلىرىدىن ئۈنچە - مارجان چېچىپ چىرايىنى ئاچتى ، سالقىن شامال شەپەق مەستخۇشلۇقىدا يېنىك تىندى ، مېنىڭ خۇشاللىقلىرىم چېكىگە يەتتى . يۈزۈمگە ئېغىر نىقاب تارتىپ ئاۋازسىز يىغلاش مېنىڭ ھازىرقى ئەڭ چوڭ پىغانىم . 47 ئارىمىزدا تام - توساق يوق ، بىر پارچە بۇلۇتتىن تامچىغان يامغۇر ئۆگزىمىزنى تەڭ يۇيىدۇ . ئارىمىزدا قىسمەتنىڭ تاغ - دەريالىرى بىلەن بورانلار ھۇۋلايدۇ ، قېلىن دېرىزىمىزدىن باشقا - باشقا پەسىللەرنىڭ يورۇقى چۈشىدۇ . 48 ئېھ ، نۇر قۇچىقىدا ئەركىلەپ تۇرغان گۈزەل يۇلتۇز _ چولپان ! سەن مېنىڭ كۆز ياشلىرىمدا ئۆزۈڭنىڭ سان - ساناقسىز ئەكس شولاڭنى كۆرگەنسەن . مېنىڭ كۆز ياشلىرىم ھەسرەت شارقىراتمىسى ئەمەس ، ئۇ پەقەت پانىي ئالەم ھەقىقەتلىرىنىڭ خىيالىي ئەينىكى . ئەگەر تەمەننالىق بىلەن ئۆزۈڭنى قۇياش مەلىكىسى دەپ ماختىنىشنى خالىساڭ ، بۇ ئەينەككە يولۇقما . ئەگەر ئۆزۈڭنىڭ چىنلىقى توغرىسىدا ساختىسىز دېرەك ئالاي دېسەڭ بۇ ئەينەككە قارا . سەن گۈزەل يۇلتۇز . سېنى گۈزەللىكىڭنى مەدھىيىلەش بىلەنلا مۇكاپاتلىغىلى ، مەن ساڭا ئۆز لەززىتىگە گۈزەللىكىنى قۇربان قىلىۋېتىدىغان ھۆسن ئاچكۆزلىرىدەك نەزەر تاشلىغىنىم يوق . گۈزەللىكنى ئەقىل كۆزى بىلەن ، ئەقىل كۆزىنى دىيانەت قارچىغىسى ، دىيانەت قارچىغىسىنى نومۇس نۇرى بىلەن بېزەپ ، ئۇنى غۇرۇرنىڭ روھى بىلەن تولدۇرۇپ ساڭا تىكىلىمەن . مېنىڭ كۆزۈم پانىي ئالەم ھەقىقەتلىرىنىڭ خىيالى ئەينىكى ، ئۇنىڭ ئىللىق ياشلىرىغا تاقەت قىل 49 ... شەپقەت ئىلاھى . ئالەمدە ئانىدىنمۇ مۇقەددەس ، پاك ۋە تاقەتلىك ؛ ئانىدىنمۇ يۈكسەك ، ئاق دىل ۋە شەپقەتلىك ئىلاھنى تەسەۋۋۇر قىلالمىدىم . ئۇ ھايات زەنجىرىنىڭ ھالقىسى . شەپقەت ئىلاھلىرى ئىستىقامەت ۋە ئىلتىجا ، ھەمدۇسانا ۋە مۇناجات تەلەپ قىلىدۇ . ئانا _ بالا ئارزۇسىغا ئاشىق بولغان ، ئۆز قارنىدا پەرزەنت تۆرەلمىسىنى قان ۋە ھايات جەۋھىرى بىلەن تەييارلىغان ، ھاياتلىق سەلتەنىتى بولغان بالىنى ئۆز ھاياتىدىن ئەتىۋار بىلىپ بېشىدا كۆتۈرۈپ ئۆستۈرگەن ، پۈتۈن ئەقىل ۋە ئەندىشىسىنى پەرزەنت ئۈچۈن سەرپ قىلغان ، ئۆزىنىڭ نادان ئوغلىنى ياكى تەنتەك قىزىنى تەڭدىشى يوق ئىشتىياق بىلەن ھەمىشە سۆيگەن ، ئۇنىڭ تۈپەيلى ۋاپاسىز مەھبۇبىنىڭ ئازاب ۋە ئېغىرچىلىقلىرىنى كەچۈرۈپ ، ھايات چاڭگىسى بولغان ئائىلىنى جانلاندۇرغان ئەجىرلىك ۋە مىننەتسىز ئىلاھ . مەن ھەيرانمەن : ئاسمان گۈمبىزى بۇلۇت ئىلاھى بىلەن چاقماق تەڭرىسىگە تارلىق قىلىۋاتسا ، ئۇلۇمپىك تېغى يۇنان خۇدالىرىنىڭ رەشكچىلىك مەيدانى بولۇپ تۇرۇۋاتسا ، دېڭىز - ئوكيانلاردا سۇ پەرىلىرى بىلەن دەريا مۇئەككەللىرى چۇقان سېلىپ تىنجىمىسا ، زېمىن ئۈستىدە جەڭ قەلەملىرى بىلەن قان سىياھلىرى نەرە تارتىپ ، سانسىز ئوتلۇق توپانلار پەلەككە ئەرۋاھتەك قول سوزۇپ ، قۇشلارغا ئورمان ، دەرۋىشلەرگە ئېھرام قالدۇرماي كۆيدۈرۈپ تۇرسا ، يەنە ئاسمان ، زېمىن ، دېڭىز - ئوكيانلاردىنمۇ كەڭرەك پاناھلىق جاي قالدىمۇ ... ئانا ! سەن كۆكسى كەڭ ، ئۈمىدى پاك ، قەلبى ئىللىق ، تاقىتى تولۇق ، دىيانىتى ئۇلۇغ شەپقەت ئىلاھى . سەنسىز ئالەم چاقى ئۇچۇپ كەتكەن ھارۋا ، ئەقلى كۆتۈرۈلگەن دانا ، ھاۋا قاپچىسىدىن ئايرىلغان بېلىق ، قانائەتسىز بۈركۈتتەك قىيا - چىيالىق قىيامەتكە بەند بولغان بولاتتى . مەن ئايال جىنسىنى ئىززەتلەيمەن . شەپقەت ئىلاھىنى خاتىرىلە . ئۇنىڭ شەنىگە داغ تەگكۈزمە . ئۇنى ئۇلۇغ قىلغان نەرسە قان ئەمەس ، ئوتلۇق مۇھەببەت ! 50 مەن قاقاقلاپ كۈلىمەن . مەن ياخشىلىقلار ئىلاھىنىڭ ئالەمشۇمۇل كۈلكىسىنى تەكرارلايمەن . ئۇ كائىنات قەلبىنىڭ گەۋدىسى ! ئىنسانىيەتنىڭ شاھىتى ! كەلگۈسىنىڭ ئۈمىدى ! ئۇ ئۆز ئىشىنى ئاخىرلاتقان جەھەننەمنى جەننەتكە ئايلاندۇرىدىغان ھەقىقىي باغۋەن ! ئۇ دېڭىز قارنىدىكى مارجانلارنىڭ جۇلاسى ! مەن موھتاجلىق ۋە قۇلچىلىق دۇنياسى ھېچقانداق ساختا نىقابسىز ئۇلۇغ ئىنسانىيەت باھارىغا ئايلىنىپ تارىخنىڭ تەنتەنىسىنى ئۆتكۈزگىنىدە بۇ كۈلكىنى يەنە تەكرارلايمەن . بۇنىڭغا گۇمانلىنىش ئالەمنى ئۇنتۇغانلىق . 51 ئۇ بىر پارچە ئوت . ئوتنىڭ ۋەزنى بولمايدۇ . ئۇ ئۆز - ئۆزىنى تۇغىدىغان ، پەرىزات شەكلىگە كىرگەن دالا گۈلخىنى . ئۇ ۋەزنى ئېغىر ۋە ئۆز - ئۆزىنى كۆپەيتەلمەيدىغان سۇ ئىلاھىنىڭ ئاتىسى . ئۇ بارلىق گۈزەللىكلەرنىڭ جەۋھىرى ! ئۇ يەنە بارلىق گۈزەللىكلەرنىڭ ئۆلۈم مەبۇدىسى ! ئۇ ئۆز - ئۆزى بىلەن جەڭ قىلىدىغان بەت جۇدۇن ئىككى باشلىق ئەجدىھا ! سەن ئەقىل ۋە دىيانىتىڭ بىلەن ، نومۇس ۋە ئىپتىخارىڭ بىلەن بۇ پاراسەتسىز قەھرىمان ، شەپقەتسىز قوتازنى نوختىلا . ئەقلىڭ ئۇنىڭ پەرىزات ھۆسنى ، سېھىرلىك كۆزى ۋە ئەۋرىشىم چاچلىرى تەرىپىدىن يۈگەنلەنمىسۇن . ھايات - مامات ئېلىشىشىدا ، سېنىڭ ئالدىڭدا ئالەم ئېغىر ھالسىرايدۇ ... 52 ئالەم مۇرەككەپلىكلىكىنى سىغدۇرالمىغانلىقى تۈپەيلى جاراھەتلەنگەن سىنەم ئازابلىنىدۇ . مېنىڭ ھېسسىياتلىرىم مۇھىتنىڭ سىگنالى ! ئەقلىيە سۆزلۈكلىرى ئۆز مەشۇقىنى يوقاتقان كىشىنىڭ ئاچچىق ھەسرەتلىرىنى داۋالالارمۇ ... 53 سەن ھېسابسىز ئۈنچە - مارجان بىلەن قوينى تولۇپ مەغرۇر بۇژغۇنلار چاچرىتىپ ئۇپقۇندىغان دېڭىز سەن . ئىللىق كۆز ياشلىرىم بىلەن نېمىگىدۇر بىردىن پەسىيىپ ھەسرەتكە چۆمدۈڭ . سەن جىمجىت پىكىر سۈرۈشكە باشلىدىڭ . 54 سەن غەزەپ ئچىئىدە يانغىنىڭدا قىزىل ياقۇتتەك چولپانسەن . سەن قاقاقلاپ كۈلگىنىڭدە گۈلشەنگە چاپقان قۇلانسەن . سەن جىمجىت خىيال سۈرگىنىڭدە ھېكمەتكە تولغان ئوكيانسەن . سەن تەبەسسۇم بىلەن سۆزلىگىنىڭدە سېھىرنى يېشىدىغان ئىرپانسەن . 55 ھومېرنىڭ ئىككى داستانىدىن پىتنە ئىلاھى ئىرىدا بېشارەت قىلىپ ماڭا سەگەكلىكنى ھاۋالە قىلدى . ھىندىلارنىڭ << ماخاپخاراتا >> ، << رامايانا >> داستانىدىن ئۆزۈمگە ئاگاھ بولۇشنى ئۆگەندىم . روھىيەتتە مۇشەققەت چەكمەي تۇرۇپ ، مەنىۋى يۈكسەكلىككە ئېرىشكىلى ، مەنىۋى يۈكسەكلىكسىز ئۆزۈڭنى چۈشەنگىلى بولمايدۇ . ساڭا بۇرۇلۇپ قارىغىنىمدا قەلبىمدە ئايان بولغىنى مۇنۇ : ... سەن مۈشكۈللۈكنى يېشىدىغان ۋە قايتا تۇغۇلىدىغان راما ٭دەك ساھىبقىرانسەن ؛ سەن بىشما ٭دەك نازۇ نېمەتتىن ۋاز كەچكەن تەقۋاسەن ؛ سەن قارا مەلىكىدەك مېھىر - ساداقەت نەمۇنىسى ، ياندۇ ٭ پەرزەنتلىرىدەك قەيسەر - قەھرىمانسەن . ( * راما ، بىشما ، ياندۇ _ ھىندى ئەپسانىلىرىدىكى تەڭرىلەرنىڭ نامى (. سېنى چۈشەنمەي ئۆزۈمنى بىلەلمەيمەن . 56 پاھ ! ئاققۇغا مىنىۋالغان تۆت باشلىق ئالەم بىنا قىلغۇچى براخما . ئاھ ! دېڭىزدىكى ئەجدىھاغا مىنىۋالغان ھامىيلىق مۇئەككىلى بىشنۇ ٭ . ۋاھ ! يىلان شارپىنى بوينىغا ئورىغان ، ئاچكۆزلۈك ھالاكەت مەبۇدى سىۋا ٭ . ( ٭ بىشنۇ ، سىۋا _ ھىندى ئەپسانىلىرىدىكى تەڭرىلەرنىڭ نامى ) . مانا بىر تىزىق تەڭرىلەر ... ئۇسسۇل ئىلاھى ، جەڭ خۇداسىنىڭ ئاتىسى ۋە سېغىنىش مەبۇدى ئۆزىنىڭ زىددىيەتلىك ئىقتىدارلىرىنى بىر گەۋدىگە مۇجەسسەم قىلغان . مەن ئەكسەدىيەت بىلەن تولغان قەدىمكى ئالەم ئەپسانىلىرىگە ، تۈنۈگۈنكى چىنلىقتەك تەئەججۈپلىنىمەن . 57 سەن سۇنغان گۈلرەڭ مەيزاپ ئۇنتۇلۇپ كەتتى . سەن كۆيدۈرگەن ياغ كۆيۈكى ساقىيىپ كەتتى . سەن سانجىغان تىغ زىدىسى ئىزسىز تىندى . سېنىڭ شېرىن شىۋىرلاشلىرىڭ ۋە مەنىلىك سۆزلىرىڭ تۇماندەك تارقىلىپ كەتتى . بىراق ، بىۋاپالىقىڭ ۋە ئۇنىڭ بوران - چاپقۇنىدا سالماق - سالماق تۈگۈلگەن ئاچچىق - ئاچچىق تەنىلىرى خۇددى بالىلىق چېغىدا تۇرۇپ قالغان قوغۇشۇن ئوقتەك سانجىپ ئاغرىتىدۇ . ئۇ نېمىنىدۇر پىچىرلايدۇ ، چۈشەندۈرمەكچى بولىدۇ . ئۇنى قايتۇرىدىغان داۋا يوق . مەن ئاق دىللىقىم بىلەن مۇشۇ خىياللىرىمغا خىجىللىق ھېس قىلىمەن ... 58 ئىنسانىيەتنىڭ ھەر بىر تەنتەنىسىگە پۈتۈن قەلبىم بىلەن مەمنۇن بولىمەن . چۈييۈەن << توققۇز نەزىم >>نى يازغاندا خۇش پۇراقلار ئىچىدە ئۈمىد شادلىقىدىن مەستلىك ھېس قىلىمەن . ئاجۇنا ( ھىندى رىۋايەتلىرىدىكى پادىشاھنىڭ كۈيئوغلى ) ئاددىي پۇقراچە ياسىنىپ مۇجۇ ۋاڭ ئۆتكۈزگەن كۈيئوغۇل تاللاش مۇسابىقىسىدە نىشاننى چىنەپ قارا مەلىكىنى ئالغىنىدا ئەتراپتىكى ئاددىي جامائەت بىلەن بىللە تەنتەنە قىلىمەن . ئودىسسا ئون يىللىق دېڭىز سەرسانلىقىدىن ئۆز يۇرتىغا قايتىپ ، ۋاپادار قېرى ئىتىنى سىلىغاندا كۆزۈمگە ياش ئالىمەن ، ئۇنىڭ رەقىبلىرىنى يېڭىپ رەپىقىسى ۋە پەرزەنتىنى باغرىغا باسقاندا يۈرىكىم كۆكسۈمگە سىغمايدۇ . << قۇرۇق شەھەر ھىيلىسى >> ئالدىدا خىيالغا چۆكىمەن ، << مۇملانغان ساراي قەستى >>گە خاۋاتىرلىنىمەن ، << ياغاچ قۇلان ھىيلىسى >>دىن چۆچۈيمەن ، مەنسۇر ئەللاجىنى دارغا ئاسقاندا پەرياد كۆتۈرىمەن . ئەخرەمەن بىلەن جەڭ قىلىمەن ، ئاخرۇمازدا بىلەن يورۇقلۇققا تەلپۈنىمەن . مانا بۇ مېنىڭ ئېتىقادىم ... 59 گۈزىلىم ، شەپەق ئۈستىگە چىقىپ ، ئالەمنىڭ ماھىيىتىگە قارا . بۇلۇت سۇپىسىدا تۇرۇپ زېمىنغا نەزەر سال . دۇنيا زىددىيەت بىلەن ، زىددىيەت بىۋاپالىق بىلەن ، قۇرۇقلۇق سۇ بىلەن ، كۈلكە كۆز ياشلىرى بىلەن چايقىلىپ تۇرىدۇ . ئۇ كۈلكىلىك پاجىئە ، پاجىئەلىك كۈلكە ئويۇنى . ئاچچىق يىغلاپ ئارقىدىنلا قاقاقلاپ كۈلگىن . بۇ ئۇنىڭ زاتىغا مۇناسىپ ھېكمەت ... 60 ھاياتنىڭ ھەر بىر پائالىيىتىدە ، ھەر بىر مەنپەئەتدارلىق بوسۇغىسىدا ، ھەر بىر ياخشىلىق ۋە يامانلىق ئارىسىدىكى جەڭدە بىلىم ئەخلاققا ، ھەقىقەت پەزىلەتكە ئايلىنىپ تۇرىدۇ . چۈنكى ، ئۇ ئۆز غۇرۇرىدا كەمتەر ، ئۆز ئىززىتىدە مەغرۇر . بۇ يازمىنى ئاخىرىدا ماھىرە تەھرىرلىگەن. ۋاقتى 2012-5-19 23:30

مىرئەھمەد مامۇت · ۋاقتى: 2012-5-19 23:06:20


	ئەجرىڭىزگە تەشەككۈر .

ماھىرە · ۋاقتى: 2012-5-19 23:27:39


	مىرئەھمەد مامۇت يوللىغان ۋاقتى 2012-5-19 23:06 ئەجرىڭىزگە تەشەككۈر . رەھمەت.

ماھىرە · ۋاقتى: 2012-5-19 23:28:15


	61 كۆزنىڭ شاھىتلىقىنى پەرۋاسىز تاشلاپ ، قۇلاقنىڭ دەلىللىرىگە ئىشىنىپ كەتمە . كۆزنىڭ نوپۇزىنى بېسىپ چۈشكەن قۇلاق شۈبھىلىك شاھىت . كۆزنىڭ يېڭىلىشىگە ئىشەن . كۆڭۈلنىڭ ئېزىقتۇرۇشىدىن چۆچۈيمەن . ئۇنىڭ يېنىدا ئاتىللانىڭ ھازىسى مېنى ھەسرەت شارابى بىلەن سەگەك قىلىدۇ . 62 مۇھەببەتنىڭ مەھلىيا كۈچىدىن سېھىرلەنگەن چېغىمدا ئۈمىدۋارلىق ھېس قىلىمەن . بۇنداق ماگنىتتىن ئايرىلغىنىمدا ئۈمىدسىزلىك تەرىپىدىن جادۇ قىلىنىمەن . جەزب قىلىنىمەن . 63 بەخت مەبۇدى << قۇتلى >> بىلەن گۈلزار ئاشىقى << بۇلبۇل >> دىئالوگلاشتى . قۇتلى : ساڭا بەخت كېرەكلىكىنى بىلىپ تۇرۇپتىمەن . بۇلبۇل : شۇنداق ، مەن ئۇنىڭغا تەقەززا. قۇتلى : مەن ساڭا شۇنداق سائادەت ئەڭگۈشتىرى ئىنئام قىلايكى ، ئۇنىڭ شاراپىتى سەن خالىغان چېغىڭدا ئەرشكە ۋە بېھىشكە چىقىپ ، ئۆلمەسلىك كەۋسەرلىرىنى ئىچىپ ، ھۆر ۋە رىزۋانلار بىلەن ئىشرەت سۆھبىتى قۇرالايسەن . ئۇنىڭدا ۋاقىتنىڭ تەھلىكىسى يوق. بۇلبۇل : بۇ مەن ئۈچۈن ئۈمىدسىزلىك ياكى ئۆلۈم ئالدىدىكى خىيالىي ئۈمىد . مېنىڭ ئارزۇ قىلغىنىم بۇنىڭ ئەكسى . قۇتلى : بۇ قانداق بەخت ؟ بۇلبۇل : قايغۇ ۋە شادلىقلار ئىقلىمى ، باھار ۋە زىمىستان دۇنياسى ، ئۈمىد ۋە كۈرەش مەيدانىدىكى قىسمەت ۋە جاسارەت بىلەن تولغان مۇشۇ ئىنسانىيەت ئالىمىنىڭ بەختى . قۇتلى : ئەجەبا ... بۇلبۇل : چۈنكى ، ئۇنىڭدا ھادىسىلەردىن خالىي بولمىغان ۋە مېنىڭ سىنەمنى لەرزىگە كەلتۈرىدىغان ئىنسانىيەت تەقدىرى پەلەك بىلەن شاھمات ئوينىماقتا . مەنمۇ ۋاقىت ۋەھىمىسى بىلەن قاتار تۇرۇپ ئوينايمەن . ئۇ مېنى ھالاك قىلىدۇ ، مەن ئۇنى قۇل قىلىمەن . قۇتلى : خالىغىنىڭ بولسۇن . 64 سەن تەڭدىشى يوق گۈزەل . سەن ئۇرۇقى يوق يېگانە تۇغما گۈزەل . گۈزىلىم ، ئەدىپىنى بېرىش ۋە رەھىمسىز غەزەپ ئىنسانىيەتنى بالايىئاپەتكە گىرىپتار قىلىدىغان ھالاكەت مەبۇدىنىڭ خاسىيىتى ئىكەنلىكىنى سېزەمسەن . ئۇ ئاپەتنىڭ ئۇرۇقى ، داۋالىغىلى بولمايدىغان بۇنداق تەبىئەت زىننەتلىگىلى بولمايدىغان يەر يۇتۇش دەزى ئالدىدىكى يارلىق . ئۇ مەغرۇرلۇقنىڭ توپان بالاسى ، ئۇ كائىناتنىڭ ئەڭ تەشۋىشلىك كالا دىۋىسى . ئوتنىڭ كەينىدىن يۈگۈرمە ، ئۇ ئەرۋايىڭنى ئاسمانغا ئېلىپ كېتىدىغان ئەزرائىلنىڭ ئېتى ، ھالاكەت تەڭرىسى قىرغىنغا چۈشىدىغان قان سەھنىسى . 65 ھايات سۈيىنى مەنىسىز ئىسراپ قىلىسەن . ئۇ ئاز قالغاندا ھەسرەتلىنىپ كۆز يېشى قىلىسەن . ۋاقىت ئارقىدا پۇشايمان قىلىش ئورۇنسىز ، ئۆلۈم ئالدىدا ئېچىنىش پايدىسىز . 66 قۇشلار سايرىدى ، سەن تېخى ناخشاڭنى باشلىمىدىڭ . شاماللار ئۇچۇرقىدى ( << چاپتى ، يۈگۈردى ، ئۇچتى >> دېگەن مەنىلەردە ) ، سەن تېخى نىگاھىڭنى ئاچمىدىڭ . گۈللەر ئېچىلىپ سۇلدى ، سەن تېخى تەبەسسۇم بىلەن كۈلمىدىڭ . 67 سېنىڭ ھەسەتخور قەلبىڭگە ئاق كۆڭۈللۈك زەپەر مەشئىلىنى ياققاندا ، سېنىڭ نادان ۋە جاھالەتلىك تەلۋە كۆكسۈڭدە نۇر مالائىكىسى تەبەسسۇم قىلىدۇ . سەن رەشكى تۇزىقىدىن قۇتۇلغاندا ، تۆت ئەتراپ ساڭا سۆيۈملۈك گۈزەل گەۋدىسىنى ئاچىدۇ . شۇ چاغدىلا سەن مۇھەببەتنى ۋە ئىززەتنى نومۇس ئىچىدە ھېس قىلىسەن . بۇنىڭ يولى بىر : مەغلۇبىيەتكە ھازىرلىنىش . 68 شېئىرلىرىم ئالەمنىڭ چوڭقۇر تەكتىدىن شىۋىرلايدۇ . مەن مەشۇقۇم بىلەن ئىككى شەبنەم تامچىسىدەك بىر لالە يوپۇرمىقى ئۈستىدە ياتىمىز . ئۇ ماڭا : ئاڭلا ئەزىزىم ، سېنىڭ يۈكسەكلىكىڭنى شاماللار تەرىپلىمەكتە ، دېدى . مەن ئۇنىڭغا : تىڭشىغىن ئامرىقىم ، سېنىڭ گۈزەللىكىڭنى يوپۇرماقلار قوشاق قىلماقتا ، دېدىم. ئۇ قىزىرىپ كەتتى . ئۇ شۇنداق قىزاردىكى ، بىر پارچە چوغقا ئوخشايتتى . مەن ئۇنىڭدىن تەسىرلىنىپ قىزاردىم . مەن بىر قەدەھ قىزىل ئۈزۈم ھارىقىغا ئوخشاپ قالدىم . 69 قۇربىتىم يەتسە سەن توغرۇلۇق يېڭى << رامايانا >> داستانى ( ھىندىلارنىڭ قەدىمكى خەلق داستانى ) يازسام. سېنىڭ قەلبىڭ يەر ئانامنىڭ چوڭقۇر تەكتىدە تۇغۇلغان مىسلىسىز گۈزەل قىز شىدۇدىنمۇ ساداقەتلىك ۋە مېھىرلىك . سېنىڭ سەرگۈزەشتلىرىڭ ئاسمان ئاتىنىڭ بەلەن يېرىدىكى قۇياش دۆلىتىدىكى نۇرانە ساھىبقىران يىگىت رامانىڭ قىسمەتلىرىدىنمۇ تەسىرلىك . مەن مەپتۇن بولىمەن . مەپتۇنلۇقتىن يىقىلسام ھوشۇمغا كېلىش يولىدا ئىلھام مەبۇدىسى مۇسىي ياكى كۈمۈش تارلىق ۋىنا چالغۇسىنى كۆتۈرۈپ يۈرگەن سامانىۋى مۇزىكانت نارۇت ( ھىندىلارنىڭ << ماخاپخاراتا >> داستاننىدىكى قەھرىماننىڭ نامى ) قاچان لەگلەك قۇشىنىڭ پېيىدىن قەلەم قىلىپ ، مېنىڭ لېۋىم ئۈستىگە سەن توغرىلىق لەرزان شېئىرىيەتنىڭ ئۈنچە مىسرالىرىنى تىزاركى ... پاھ ! ھالاكەت مەبۇدى سىۋا . ئەمدى سەن مېنى پىلە قۇرتىدەك قارىلىقتىن ئاققا ئايلاندۇرۇپ ئاندىن ۋەلى قىلماقچىمۇ ؟ ئېھ ! شېئىرىيەت مەبۇدىسى نارۇت ، سەن مېنى قاراقچىلىقتىن شائىرغا ئايلانغان ئاق چۈمۈل ساھىبى رودناكا ( بارمىچ )دەك توپىدا كۆمۈپ ( رودناكا _ ھىندىلارنىڭ << ماخاپخاراتا >> داستانىدىكى قەھرىماننىڭ نامى ) ، يامغۇردا يۇماقچىمۇ ؟ ئاھ ! گۈزىلىم ، غوزەك ئىچىگە بەند بولۇپ قالمىساملا ياكى چۈمۈلە تېغىدا كۆمۈلۈپ قالمىساملا سېنى كۈيلەيمەن . چۈنكە مەن رامانىڭ ۋارىسى . 70 مەن سېنى سېغىنغاندا كۆز يېشىمنى دەريا قىلىمەن . ئۇ تامچىيدي، تاراملايدۇ ،سۈرەن سېلىپ ئاقىدۇ ، ئۇپقۇن كۆتۈرىدۇ . سەن ئۇپقۇنلار قاينىمىدىن خۇددى بېلىق پەرىسىنى سۇ ئىلاھىدەك مەرۋايىت بۇژغۇنلار چاچرىتىپ قەد كۆتۈرۈپ چىقىسەن . سېنىڭ ئاپئاق قاشتېشىدەك ئوڭ قۇلۇڭدا ئۈستىگە زەر قاپچۇق يېپىلغان مەرمەر قۇتا تۇرىدۇ . ئۇ ماڭا ئاتىغان << سۆيگۇ سۈيى >>قاچىلانغان قۇتا ! ئۇ پىرومىتۇسنى زەنجىر باغلاقتىن خالاس قىلىدىغان، تاشقىزنى ئەسلىگە كەلتۇرىدىغان ،ھەممە تەتۈر ئەفسۇنلارنى ياندۇرىدىغان ئادالەت ھېكمىتىنىڭ كىميالىق زەمزىمى . چاچ، بۇ <<سۆيگۇ سۈيى >> نى ، مۇھتاجلارغا چاچقىن . ئۇنۇتما،مەن سېنى ئۇلار ئۈچۈن سۆيىمەن ۋە سېغىنىمەن! 71 بەخت مەلىكىسى،مەنمۇ رامادەك دېنڭ ئالتۇن قەبرەڭدە شىپۇ[شىپۇ- ھىندىلارنىڭ ‹‹رامايانا››داستانىدىكى قەھرىماننىڭ نامى- مۇھەرىردىن]نىڭ كارامەتلىك ئوقياسىنى قولۇمغا ئالدىم.ئەمدى مېنىڭ مەشۇقۇم بولۇشۇڭ ئىلكىمدىكى ئىش. مېنىڭ كۆتۈرگىنىم جاپا-مۇشەقەتلەرنىڭ كىشىنى چۆچىتىدىغان ئېغىر ئوقياسى. سېنىڭ ماڭا ئۈلپەت بولۇپ مۇشەقەت چېكىشكە رازى بولغانلىقىڭ قەلبىڭدىكى بەخت. سەن مېنىڭ ماھارىتىمدىن خۇشال بولۇپ كۈلگىنىڭدە،مەن سېنىڭ مەن بىلەن چېكىدىغان قىسمەتلىرىڭدىن ئەنسىرەپ تىترەيمەن. ئۇنۇتما:زوقلۇق خوشاللىقلىرى بىلەن پاجىئەلىك مۈشكۈللەر بىر-بىرىنى قۇچاقلىشىدۇ ۋە بىر- بىرىگە باش ئېگىدۇ. 72 ئېھ، ئۇچار قاناتلار. ئورمان سىلەرنىڭ شېئىرىيەت مەدرىسىڭلار. ئاھ،تىزىلىپ ئۇچقان تۇرنىلار. سىلەر يېزىلغان،يېزىلىۋاتقان داستان.سىلەر سانسىز پەي قەلەم بىلەن ئۆچمەس سىياھنى كۆتۈرۈپ ئۇچقان شېئىرىيەت يۈرىكى. مەن سىلەرنى خۇشال ئارزۇلار ئىچىدە ئۇزىتىمەن. 73 ئۇ ئۆزىنىڭ قاچىلاپ تولمايدىغان غەزىنىسى ئۈچۈن مارجان ئوۋلايدىغان تۆمۈر تورلىرىنى دېڭىز ئاستىغا تاشلىدى. ئۇ تورغا چۈشكەنلەر ئۈستىدىن مەسخىرە بىلەن كۈلىدۇ. مارجانلار ئالدانماڭلار. 74 ئالەن ماڭا نىدا قىلىدۇ: مەن ساڭا ھەر خىل نان ھەدىيە قىلىمەن. مەن خۇشاللىق بىلەن قۇلۇمنى سوزىمەن. ئۇ ماڭا:بىراق ھەر قېتىمقىسىنىڭ بۇر پۇچۇغى كەم ، دېدى. مەن بۇنىڭغا ھەيران بولۇپ،قالغان پۇچۇغىنى ئىزدىگىنىمدە،ئۇ ماڭا:مانا ماۋۇنىمۇ ئال،بىراق كەم قالغان پۇچۇغىنى ئىزدىمە، بۇنىڭمىغۇ بىر پۇچۇغى يوق ،دەيدۇ.بۇنىڭغىمۇ ھەيران بولىمەن. ئالەم قاقاقلاپ كۈلىدۇ ۋە بىردىن جىمجىت بولۇپ،يېقىنلاپ شىۋىرلايدۇ:سۈرۈشتۈرمىگىن،مەن ھەمىشە شۇنداق ھەدىيە قىلىمەن.بۇ ئىگىسىنىڭ دائىملىق ئادىتى.مەڭگۈلۈك مەخپىيىتى.... چوڭقۇر ئويلىدىم.ئۇنىڭغا تەقلىد قىلىشنى خالىمايمەن.مېنىڭ ئۆزگىلەرگە ئاتىغان مۇھەببىتىم مۇكەممەل ھەم مۇجەسسەم. 75 ئېھ، مېنىڭ گۈزىلىم،ئالەم گۈزەللىكنىڭ كۆزى. ئاھ، مېنىڭ ئىلاھىم.مېنىڭ سويگۈنۈمنىڭ مۇرەببى. مەن سېنى ئەڭ ئۇلۇغ نەرسە بىلەن ــمۇھەببىتىم بىلەن قەدىرلەيمەن.بىراق مەن سېنىڭ قۇلۇڭ ئەمەس. سەن ئۆزىنى‹‹ سېنىڭ چاكىرىڭ››،‹‹سېنىڭ قۇلۇڭ›› دەيدىغان ھەرقانداق كىشىنى مەھبۇب شەكىلىگە كىرگۈزۋاكغان ئېزىتقۇ مەن دەپ چۈشەن. چۈنكى، ساڭا ئېرىشىش نىيىتىدە ئىنسانى قەدىر- قىممىتىنى ئاياغ ئاستى قىلغان كىشى ، سەندەل ياغىچىدىن ئىسرىق چىقىرىش غەرىزىدە پۈتۈن ئورماننى ھالاك قىلىشقا ھازىرلانغان كىشىدۇر. ئۇ سېنى قۇل قىلىش ئۈچۈن،ئۆزىنى قۇللۇق ئورنىدا كۆرسىتىدۇ. گۈزەللىك چۆرىسىدەھىلە-مىكىر بولۇتلىرى ىۇددى ئاي چۆرىسىدىكى تۈتەك قوتاندەك ئكزىنى كۆرسىتىپ، ئۇنى خىرەلەشتۈرىدۇ. گۈزىلىم،سەن-ئىنسانىيەتنىڭ يۈكسەكلىكى، ئۇنىڭ ھاياتىنىڭ خۇشاللىقى،ئۇنىڭ قەدەملىرىنىڭ ئىلھامى،ئۇنىڭ ئىجادىيىتىنىڭ ئۈلگىسى، ئۇنىڭ ئۈمۈدىنىڭ غايىسى. مېنىڭ ئىلاھىم. مەن سېنى غۇرۇرۇم بىلەن سۈيىمەن. ئۇنىڭ ئالدى گۈل، كەينى قان. 76 ئۇ ۋىجداننى بىلمەيدۇ،ئۇنىڭ بىلىدىغىنى پەقەت پايدا-زىيان . ئۇ ئىنساپنى بىلمەيدۇ،ئۇنىڭ بىلىدىغىنى ھىلە-مىكىر. ئۇ نومۇسنى بىلمەيدۇ،ئۇنىڭ بىلىدىغىنى مەنپەئەت قاپقىنى ئالدىدىكى غەنىمەتنى چۆچۈتۈپ قويىدىغان ‹‹تەسىر››. ئۇ ئىچ ئاغرىتىشنى بىلمەيدۇ،ئۇنىڭچە بۇنداق پەزىلەت مەنپەئەت نۇرىنىڭ بىجىرىملىكىگە ئېۋەن سالىدىغان ھاماقەتلىك . ئۇ ئۆز-ئۆزىدىن خىجىل بولۇشنى بىلمەيدۇ ،شۇڭا ئۇ ھەمىشە غالىپ. ئۇنىڭ ئېرىشكەنلىرى خىيالى قەھرىماننىڭ ھەقىقى ھەسرىتى. 77 مەن سېنىڭ گۈزەللىكىڭنىڭ مۇنازىرسىز شاھىتى. مەن سېنىڭ مۇھەببىتىڭنىڭ ھەسرەتسىز قۇربانى. 78 ئۇ مەغرۇر،شۇڭا ئۇ سېنىڭ مەغرۇرلىقىڭ توغرىسىدا ۋايسايدۇ. ئۇ ئالدامچى،شۇڭا ئۇ سېنىڭ سېخى ئەمەسلىكىڭدىن كايىيدۇ . ئۇ گۇناھكار،شۇڭا ئۇ ئىتىغپار ئوقۇشنى ساڭا يۈكلەيدۇ. ئۇ ئۆزىنىڭ‹‹سىرلىق›› قىياپىتىنى ھەمىشە ئاشكارلايدىغان ھەۋەسكار. ئۇ ئالەمشۇمۇل مەسخىرىگە كۆڭلى تىنماس قەيسەر. 79 ئېھ، شامال تەڭرىسى. سەن تىنىپ تۇرغان شامنى ئۆچۈرىسەن، سەنجىمجىت ئۇچقۇنداپ چەكسىز ئوت دېڭىزىنى ھاسىل قىلىسەن .سەن يوقلۇقنىڭ ئوغلى،موللۇقنىڭ ئاتىسى. 80 ئەكىس سادا چىقارمايدىغان ئاۋاز، يامغۇر بولۇپ قۇيۇلمايدقىغان ھور،ئۆزىگە يانمايدىغان ساۋاق بولمايدۇ، سەن ئەڭ بىزار بولغان نەرسە،سەندىنمۇ ئەڭ بىزار. قاينامدەك مۇرەككەپ ھاياتتا، ئەقىللىقىم،ياخشىلىقلارنىڭ ئۇرۇغىنى چاچ،ۋەھىمە ئايۋىنىدا غال-غال تىترىمە! بۇ يازمىنى ئاخىرىدا ماھىرە تەھرىرلىگەن. ۋاقتى 2012-5-19 23:29*

elxatrahim elxatrahim توردا يوق جۇغلانما 619	ۋاقتى: 2012-5-17 10:21:57 \| ھەممە قەۋەتنى كۆرۈش ئەسكەرتىش: يوللىغۇچى چەكلەنگەن. مەزمۇننى كۆرەلمەيسىز .
elxatrahim elxatrahim توردا يوق جۇغلانما 619
	ئىنكاس ئېسىل ناچار جابدۇق پاش قىلىش