تەمكىن: كۈت مېنى

كۈت مېنى

مەن باراي يەكشەنبىدە، سۆيگەن نېگارىم كۈت مېنى،
قەلبىدە ئاتەش ئايان، كۆزى خۇمارىم كۈت مېنى.

جامىنى سۇنغىن ۋىسالنىڭ لەۋلىرىم كۆيسۇن قاناپ،
بىخلىغاي دۈشەنبىدە تۇنجى باھارىم، كۈت مېنى.

چاقنىدىڭ يۇلتۇز كەبى سۇنغان قاراقىم تەكتىدە،
نۇر بولۇپ سەيشەنبە كەچ ئەي مېھرى جانىم كۈت مېنى.

ۋەسلىدىن چارشەنبىنىڭ كەچمەككە ئىمكان ئەيلىدىم،
جۈپ يۈرەكتىن سايە تاق چۈشسۇن بىدارىم كۈت مېنى.

ئاسمىنىمدىن ئۇچسا گەر پەيشەنبىنىڭ يەكتا قۇشى،
دانلىتىپ  قوي لەۋ بىلەن ئۇ-قۇت دۇئايىم، كۈت مېنى.

يالقۇنىدىن چوغ سوراپ پۈتسەم جۈمەدىن تىلتۇمار،
تاشلىناي باغرىڭغا گۈلخاندەك ناھارىم كۈت مېنى.

ساقلىدىم بىر سەن ئۈچۈن ئوراپ يۈرەكنى سۈبھىگە،
چەيلىدى ھىجراننى تەمكىن شەنبە قارارىم، كۈت مېنى.


2014-يىل 11-دىكابىر خوتەن بۇ يازمىنى ئاخىرىدا   تەمكىن تەھرىرلىگەن. ۋاقتى  2014-12-12 17:03  

تەمكىن ئاكا غەزەلىڭىزگە مۇبارەك بولسۇن،ئارۇز دەرياسىدىن دۇر-گۆھەر سۈزگەيسىز.
«نۇر بولۇپ سەيشەنبە كەچ ئەي مېھرى جانىم كۈت مېنى»بۇ مىسرادا قاپىيە جايىغا چۈشمەپتۇ،ئۆزگەرتىۋەتسىڭىز بولغۇدەك

تەمكىن بۇرادەر، «يەكشەنبە» دېگەن سۆز «تەكشەنبە» بولۇپ قاپتۇ-ھە؟ ئاندىن بىر قىسىم سۆزلەرنىڭ ئىملاسىغا ئەھمىيەت بېرىش بىللە شېئىرىي ئۇدارلىققا سەل قارىمىغايسىز.  يەنە بىر دىققەت قىلىشقا تېگىشلىك ئىش: بەشىنچى كۇبلېتنىڭ ئىككىنچى مىسراسى خېلى بەلەن چىقىپتۇ دېسەم، بوغۇم ئارتۇق بولۇپ، ۋەزىن چاقىدىكەن. قاراپ باقامسىز؟

ئاقساقاللىق قىلغىنىمنى كەچۈرۈڭ، ھېلىقى بىركىملەردەك رەنجىپ يۈرمەڭ يەنە، سەمىمىي پىكىر قىلدىم. چۈشىنەرسىز، دېگەن ئۈمىدتىمەن.

دوستانە پىكرىڭىزنى ئەلبەتتە قوبۇل قىلىمەن. ناۋادا ئۇلاردەك بىر ئىشقا دۇچ كەلسەممۇ ئارتۇقچە ئارازلىشىپ يۈرۈشنى خالىمايمەن. رەھمەت سىزگە.

  مۇبارەك بولسۇن! ئارۇز ۋەزنىدە قەلەم تەۋرەتكەن قولىڭىزغا دەرت كەلمىسۇن! ئىزدىنىشلىرىڭىزگە تېگىمۇ زور بەرىكەت تىلەيمەن!

ئەمدى ئۆزىڭىزگە قايتىۋاتىسىز، 90-يىللارنىڭ ئاخىرلىرىدىكى جۇشقۇنلۇقنىڭ سايىسىنى كۆرۈۋاتىمەن.بەك ئېسىل چىقىپتۇ،ئىزدىنىشلىرىڭىز ۋاقىتلىق بولۇپ قالمىغاي!

مەن شىئىر يىزىشنى بىلمەيمەن،لىكىن شىئىرلادىن ھۇزۇرلىنىمەن،بەك ياقتۇرۇپ ئوقۇدۇم.قولىڭىزغا دەرت بەمىسۇن،قەلەملىرىڭىزنىڭ توختاپ قالماسلىقىنى ئۈمىد قىلىمەن.

ھارمىغايسىز.

مۇبارەك بولسۇن، بۇ شېئىرىڭىز ياخشى چىقىپتۇ.

ھېلىمۇ 10 يىلغا يىقىن ئۇخلاپتىمەن. ئەخمەتجان ۋە سىز قاتارلىق دوستلىرىم تولا نوقۇسىمۇ ئۇيقۇمنى ئاچمىغانىدىم.ئەمدى بولسىمۇ ئۇيقۇمنى ئازراق ئېچىپ باقاي دىدىم. قېنى ئۇرۇنۇپ باقاي، كەينىمدىن ئۆتۈپ مەندىن خېلىلا ئۇزاپ كەتكەنلەرگە يىتىشەلەمدىم يوق بىلمەيمەن. بۇ يازمىنى ئاخىرىدا   تەمكىن تەھرىرلىگەن. ۋاقتى  2014-12-15 13:47  

      ئىلھام ئۈزۈلمىگەي،قەلەم ھارمىغاي!!!

      ئىلھام ئۈزۈلمىگەي،قەلەم ھارمىغاي!!!

تور ئارقىلىق دىدارلاشقانلىقىمدىن خۇرسەن بولدۇم.قەلىمڭىزگە بەرگەت تىلەيمەن ئۇستاز.