تەمكىن: تاقەتسىز كۈتۈش

تاقەتسىز كۈتۈش

كېلەي دەپ كەلمىدىڭ دىلبەر، كۈتۈپ  ۋەسلىڭدە داغلاندىم،
قارا چاچىڭ ئارا تۈندەك ساياق نەسلىڭگە باغلاندىم.

تۆكۈپ پەريادىنى تەمبۇر، سۇنۇق بىر كۈيدە ئۈنلەيدۇ،
قەلىب چوغدانىدا ئىسيان، سۇيۇق بەستىڭگە تارلاندىم.

سەنەم كەزگەن چاھارباغدا غىرىبنىڭ ياشلىرى دەريا،
قەپەستە ئۈنلىگەن تورغاي كەبى قەستىڭدە خارلاندىم.

شىرىن قىسقان گۈلى رەيھان تۆكەر تاغ غارىغا قىسسە،
بولۇپ پەرھادى مەشۇقسىز، قوقاس تەپتىڭدە ياغلاندىم.

ئىشىق دەرياسىدا لەپ-لەپ ئاقار پەرياد چېكىپ ھىجران،
كېتىشكە قالمىدى مەغدۇر، باھار پەسلىڭگە باغلاندىم.

كۆڭۈلنىڭ تەكتىدە گۈلخان ئارام بەرمەي كۆيەر گۈر-گۈر،
ۋېسالنىڭ يۇلتۇزى ئۆچكەن قاقاس ئەسلىڭدە زاغلاندىم.

كۈتۈش قاسراقلىرى چۇل-چۇل بولۇپ تىترەتتى تەمكىننى،
ئۇپۇقتا نە قۇياش كۈلگەي، ھېجىر دەشتىڭگە پالاندىم.

2014-يىل 10-دىكابىر، خوتەن.
بۇ يازمىنى ئاخىرىدا   تەمكىن تەھرىرلىگەن. ۋاقتى  2014-12-11 18:55  

قارا چاچىڭ ئارا تۈندەك ساياق نەسلىڭگە باغلاندىم.


چاچنى قارا دەپ ئىزاھلاشنىڭ ھاجىتى بارمۇ ياكى غەزەلدە شۇنداق ئىشلەتسە بولامدۇ تەمكىن؟ بۇ يازمىنى ئاخىرىدا   تۇغلان تەھرىرلىگەن. ۋاقتى  2014-12-11 22:37  

ھازىر بىر قىسىملارنىڭ چېچى ساغىرىپ ئۆزىنىڭ ئەسلى رەڭگىنى يوقاتتى.بەلكىم شۇنىڭغا نىسپەتەن ئېيتىلدىمىكىن؟ ئەگەر ئۇنىڭغا نىسبەتەن ئېيتىلمىغان بولسا ئاۋۇ يەردىكى «قارا» سۆزى ئارتۇقچە ئىشلىتىلگەن سۆز بولىدۇ.

  غەزىلىڭىز دىلغا يېقىشلىق چىقىپتۇ، مۇبارەك بولسۇن! تېخىمۇ بەرىكەتلىك بولىشىڭىزغا تىلەكداشمەن!

شېئىرىڭىز  بەك ياخشى چىقىپتۇ، مەن ياقتۇردۇم.  بۇلۇپمۇ "ئۇپۇقتا نەقۇياش كۈلگەي،ھىچبىر دەشتىگە پالاندىم " دېگەن مىسىرالارنى بەك ياختۇردۇم. بۇ يازمىنى ئاخىرىدا   ئايشەم1 تەھرىرلىگەن. ۋاقتى  2014-12-16 11:46  

غەزىلىڭىزياخشى چىقىپتۇ ،مېنىڭچە ئۇيغۇر قىزلىرىنىڭ چېچىنى قارا دەپ سۈپەتلەش ئارتۇقچە ئەمەس .

خۇددى،ئادەمنى قورسىقى بار ئادەم دەپ سۈپەتلىگەندەكمۇ؟

قارىغاندا سىز تېخى چۈشەنمىەندەك تۇرىسىز ،مەيلى تارىخى رومانلاردا ۋە ياكى ئۇيغۇر چۆچەكلىرىدە بولسۇن قىزلارنى شۇنداق سۈپەتلەپ  كەلگەن ھەم كېلىۋاتىدۇ ،بۇلۇپمۇ ھازىرقى جەمىيىتىمىزدە چاچلىرىنى سېرىق بىلەن بوياپ قارا  چاچلانى ئاز كۆرۈۋاتىمىز شۇنىڭ ئۈچۈنكى بۇ سۈپەتلەش ئارتۇقچە ئەمەس .

غەزەلخانلىققا باسقان قەدىمىڭىز گۈل- چېچەكلەرگە تولسۇن دوستۇم.
غەزەللىرىڭىزنىڭ كۈندىن- كۈنگە سەرخىللىشىشىغا تېلەكداشمەن!

غەزەلنىڭ مۇۋاپىقىيىتىنى تەبرىكلەيمەن. باشقا غەزەللىرىڭىزگە قارىغاندا تىخىمۇ ياخشى چىقىپتۇ.

مومايلارنىڭ چېچىنىمۇ تەسۋىرلىگەندىمۇ چاچ دەپلا ئالامدۇق تۇغلانباي...

بۇ غەزەلنىڭ مەنىسى شۇنچىلىك ياخشى چىقىپتۇ،مەن بەك ياقتۇردۇم،قەلىمىڭىز تېخىمۇ بەركەتلىك بولغاي.

ئا. ساۋۇتقا ئايتەن جاۋاب بىرىپ بوپتۇ. مىنىڭچە شۇ يىتەرلىك.

ھارمىغايسىز

«قارا چاچ» دىگەنگە ھېچقانداق گەپ كەتمەيدۇ دوستلار. غوجىمۇھەممەت ھەم ئايتەن ئا. ساۋۇت بىلەن تۇغلان ئەپەندىلەرگە جاۋاب بېرىپ بوپتۇ. باشقا يوللۇق تەنقىدى پىكىرلەر بولسا ئەلبەتتە قوبۇل قىلىمەن.