غوجىمۇھەممەد: ئۆلۈم چاقچاق ئەمەس

غوجىمۇھەممەد · ۋاقتى: 2014-11-14 05:02:54


	ئۆلۈم چاقچاق ئەمەس - ئاراقۇمىغا مەرسىيە بالىلىرىڭنىڭ دۇنياسى قاراقسىز قالدى، مېھرىبان ئاللاھنىڭ نەزىرى تەگكىچە. ئاناڭ جەڭدە ياراقسىز قالدى، يۇلتۇزى تۇپراققا باش ئەگكىچە. ئايالىڭنىڭ چېچى تاراقسىز قالدى، سۆيگۈسى ئۇنى بەرباد ئەتكىچە. ئۈرۈمچى ئۈچتاشقىچە كەلدى ھاسىراپ جەسىتىڭ ئاراقۇمغا يەتكىچە. ئاھ، دوستۇم، ئۇخلاشقا يېتىپ، ئويغانغىچە ئۆلۈپ قاپسەن. دۇنيادىن يۈرىكىڭ ئاغرىغانمۇ؟ گەپ قىلمايلا كېتىپ قاپسەن... ئۆلۈمنىڭ راست، ھاياتنىڭ يالغانلىقىغا ئىشەندىم. تىرىكلەرنىڭ ھەر بىر تىنىقىدا قەبرىگە ماڭغانلىقىغا ئىشەندىم. ھايات سازىنى ئۆلۈمنىڭ چالغانلىقىغا ئىشەندىم. تەن مېنىڭ، بىراق ئۇنىڭدىكى جاننىڭ مېنىڭ ئەمەسلىكىنى چۈشەندىم... ئۆلۈم سۆز، بىراق دېگىلى بولمايدۇ. ئۆلۈم- نېسىۋە، بىراق يېگىلى بولمايدۇ. قاراپ تۇرىدۇ بىزگە يۈزمۇ- يۈز كۆرگىلى بولمايدۇ. شىۋىرلايدۇ قۇلىقىمىزغا ئاڭلىغىلى بولمايدۇ... ئۆلۈم چاقچاق ئەمەس! مەن بىلدىم، ئادەملەر ئۆلۈپ كېتىشكە ئاز قالغان. ھەر بىر تىنىقىدىن ئۆلۈمنىڭ تېۋىشى يوقالمىغۇچە ياشايدۇ يالغان. مەن بىلدىم، شېئىردا كۈيلەنگىنى ھايات ئەمەس شائىرنىڭ ئۆلۈش ھېسسسىياتى. ناخشىدا كۈيلەنگىنى ھايات ئەمەس ناخشىچىنىڭ ئۆلۈش قىزغىنلىقى. رەسىمدە تەسۋىرلەنگىنى ھايات ئەمەس، رەسسامنىڭ ئۆلگەن چىرايى. چۈنكى ئۆلۈم- ھاياتتىن چىن. ئۆلۈم- ھاياتتىن قىزغىن. چۈنكى ئۆلۈمدە ھايات بار... سەنئەتكارلارنىڭ جان- جەھلى بىلەن قوغلاشقىنى- ئۆلۈمدۇر چۈنكى سەنئەتنىڭ ئاخىرقى چېكى- ئۆلۈم! مەن بىلدىم، ئىبادەت ئۆلۈمنى ئاسانلاشتۇرىدىكەن. سىياسەت ئۆلۈمنى قانۇنلاشتۇرىدىكەن. مۇھەببەت ئۆلۈمنى شىرىنلەشتۈرىدىكەن. ئۇرۇش ئۆلۈمنى كۆلەملەشتۈرىدىكەن... مەن ئەمەلىيەتتە ھېچنىمىنى بىلمىدىم، بىلگىنىم- بىلمەسلىكىم! دوستۇم، قەددى- قامەتلىك بويۇڭ يىقىلمايدىغاندەك تۇراتتى. مۇھەببەتلىك چىرايىڭ سولمايدىغاندەك تۇراتتى. كۈچلۈك قوللىرىڭ قولۇمدىن ئاجرىمايدىغاندەك تۇراتتى. گۈس- گۈس ماڭىدىغان پۇتلىرىڭ مېڭىشتىن توختىمايدىغاندەك تۇراتتى. ... ئۆلمەيدىغاندەك تۇراتتىڭ. ۋادەرىخا يالغانچى ھايات... 2014- يىلى 13- نويابىر. كۇچا بۇ يازمىنى ئاخىرىدا غوجىمۇھەممەد تەھرىرلىگەن. ۋاقتى 2014-11-14 05:10

تەمكىن · ۋاقتى: 2014-11-14 10:35:17


	بۇ راسما؟

گۇلنىسا ئىمىن · ۋاقتى: 2014-11-14 10:42:45


	مەرھۇمنىڭ ياتقان يىرى جەننەتتە بولغاي،بۇ يازمىدىن يۈرىكى يەنە بىر ئىزىلدى، بەرھەق،ئۈلۈم راست،ھايات يالغان.ھەممىمىز قايتقۇچىلارمىزئاخىرى

ق.ئوسمان غازى · ۋاقتى: 2014-11-14 11:04:25


	ئۆلۈمنىڭ تۈڭلۈكى تۈندىكى ئادەم ئۆلۈم بىر ئۆي ئىشىكىدىن كىرىپ تۈڭلۈكىدىن چىقىپ كېتىمىز بۇ ئۆينىڭ تۈڭلۈكى ئىتىلدى بىردىن كىرگەن چاغدا ئابلىپىز. ئۆلۈمنىڭ ئىسمى نېمە- - پەيشەنبە. كەچ سائەت توققۇز. پۇرىقى قاراڭغۇ ئېچىلىشى يالپۇز. ئۇ ئېچىلدى كېچىدە ئۇزۇن كارىدۇر ئىچىدە. مەن ئۇنى كۆرمىدىم ئاڭلىنىپ ئۆتۈپ كەتتى ئاۋازى. ئۇ بىر تۈڭلۈك، بەلكىم ئۆلۈمنىڭ يازى. 2014- يىلى 13-نويابىر

تۇرسۇنجان ھەسەن · ۋاقتى: 2014-11-14 11:22:11


	ھەي... مەرھۇمنىڭ ياتقھن يېرى جەننەتتە بولغاي!

sahar · ۋاقتى: 2014-11-14 11:37:53


	ئۆلۈمنىڭ راستلىقى يەنە رەت ئويغا سالدى، يەنە بىر رەت سەگىتتى مېنى.

aydanix · ۋاقتى: 2014-11-14 11:54:33


	كۆڭلۈم يىرىم بولدى.ياتقان يىرى جەننەتتە بولسۇن

ئايقۇت · ۋاقتى: 2014-11-14 12:55:45


	مەن ئۇنىڭ كىملىكىنى بىلمەيتىم ‹‹ئوغۇز››كىتاپخانىسىدا بىر ئادەم ئۇنىڭ ئاراقۇمى ئىكەنلىكىنى دېمىگۈچە مەن ئۇنىڭ بىلەن بىر زالدا يىغىن ئاڭلاپ بىر ئاشخانىدا تاماق يەپتىمەن ئۇ ماكاپات ئالغاندا چاۋاك چاپتىمەن چاۋاك چېلىۋاتقىنىمنىڭ كىملىكىنى بىلمەي تۇرۇپ. ئۇ كىتاپ ئالغان ئۇ ئوغۇز كىتاپخانىسا كىتاپ ۋاراقلاپ قالغان بۈگۈن ئۇنى دۇنيانى بىزگە بەردى دېدىڭلار ھاياتتىن كۆڭلى سوۋۇپ كەتتى دېدىڭلار مەن ئويلىسام ئۇ كەتمىدى ئۇ كىتاپ ئالغان شۇ كىتاپخانىدا كىتاپ ۋاراقلاپ قالغان.

رۇزى كېرەم يارى · ۋاقتى: 2014-11-14 13:00:21


	مەرھۇمنىڭ ياتقان يېرى جەننەتتە بولغاي! بۇ يازمىنى ئاخىرىدا رۇزى كېرەم يارى تەھرىرلىگەن. ۋاقتى 2014-11-14 13:00

دىلشات مەتنىياز · ۋاقتى: 2014-11-14 13:24:25


	پەقەت سەبرى قىلماقتىن، ئائىلىسىگە سەبرى تىلىمەكتىن، ھەر ۋاقىت ئۆلۈمنى ياد ئەتمەكتىن باشقا ئامال يوق. مەرھۇمنىڭ ئاخىرەتلىكى خەيرلىك بولغاي.

ئىبنۇرى · ۋاقتى: 2014-11-14 13:51:47


	ئىنسان ئۇ ئەزەلدىن بىر ئۇچۇم تۇپراق، كەتسە گەر كەلمەيدۇ مەڭگۈگە بىراق. شۇ ئۇچۇم تۇپراقتىن ئۈنەر قىزىل گۈل، ۋە ياكى شۇم بويا ۋە ياكىكى يانتاق. - س.ئەزىزى

ئا.ئابدۇرېھىم · ۋاقتى: 2014-11-14 15:40:17


	ئۆلۈم بوشلۇق ئوسمان تۇرسۇننىياز تۇغلان 1 ئۆلۈم يورۇق تۈندە تۈندەك تاڭدا تاڭدەك ئۇنىڭ كېلىشى ئوق كېتىشى يوق. ئۆلۈم بىر قارىسام يىراق يەردەك بىر قارىسام ئابلىپىزدەك. يارغۇم كەلدى سېنى بىردىن تېنىمنى مىڭ ئەزگەن يۈرەك. 2 ئۆلۈم بوشلۇق دوستۇم يېرىمنى تولدۇردى يېرىمى بوش قالدى ئۆلۈمنىڭ مەن يىغلاۋاتىمەن ئاخىرىنى كۆزۈمدىكى ياشنىڭ. 2014-يىلى 13-نويابىر. خوتەن بۇ يازمىنى ئاخىرىدا ئا.ئابدۇرېھىم تەھرىرلىگەن. ۋاقتى 2014-11-14 15:40

ئا.ئابدۇرېھىم · ۋاقتى: 2014-11-14 15:48:14


	پەيشەنبە كەچ، سائەت توققۇز سەرداھى ئۆلۈمنىڭ شەكلى يوق يوقتۇر ئۇنىڭ ئاۋازى يەنە. ئۇ بىر خىيال سۈرگۈچى جىمجىت ئولتورۇپ تالادا قالغان ھايات ھەققىدە. ئۆلۈم يوقلۇقتۇر يوقلۇقى دەل يۈرەككە پاتار. ئۆلۈمنى ئىپادىلەش قېيىن بىر جەريان تۆتىنجى مىسراسىدا يەنە تاڭ ئاتار. پەيشەنبە كەچ، سائەت توققۇز ئۇدۇن كوچىلىرى قالدى چۆلدەرەپ. ئابلىپىز چىقىپ كەتتى ھاياتتىن روزىلەمنىڭ قويىنى ھەيدەپ... 2014-يىل 14-نويابىر بۇ يازمىنى ئاخىرىدا ئا.ئابدۇرېھىم تەھرىرلىگەن. ۋاقتى 2014-11-14 15:48

18139193341 · ۋاقتى: 2014-11-14 17:44:26


	ناھايتى ياخشى يېزىپسىز ھەدە ژانىرى نىمۇ ؟

سائادەت ساتتار · ۋاقتى: 2014-11-14 18:10:47


	كېلەركى نۆۋەت قايسىمىزغا كېلەر ھە؟! ئاللا مەرھۇمنىڭ ئاخىرەتلىكىنى ياخشى قىلغاي.سەبىر قىلايلى،دۇئا قىلايلى. ئايقۇتنىڭ مەرسىيەسىنى تەكرار ئوقۇدۇم.يۈرىكىم ئېغىپلا تۇرىدۇ...

غوجىمۇھەممەد: ئۆلۈم چاقچاق ئەمەس

باھالاش

باھا سۆز