قارامايدا ‹‹دەۋر مىلودىيەسى شىئېرىيەت سەپىرى پائالىيىتى›› ئۆتكۈ

admin · ۋاقتى: 2014-11-9 13:23:38


	قاراماينىڭ يۈرىكى ئىبراھىم نىياز 1 قاراماي سېھىرلىك ماكان مېنىڭ قەلبىمدە ، تىلسىملانغان تەكلىماكاندەك . ئۇنىڭ ئوتى يېنىپ تۇرىدۇ ، يۈرىكىمدە بىر پارچە چوغدەك . شۇقەدەر سۆيۈملۈك ئەزىز بۇ ماكان ، رىشتىسى باغلانغان قەلبىمگە چوڭقۇر . ئۇنىڭدىن بىر مېھىر تېشىپ تۇرىدۇ ، مەڭگۈلۈك چېتىلغان مەندىكى غورۇر . مېنىڭ نەزىرىمدە تىلسىملىق ماكان ، مۆجىزە ، بۇ يەردە يانغان مۇھەببەت ، مۆجىزە ، بۇ يەردە ئىسسىق قوللاردىن ، يېڭىپ تاشلانغىنى تالاي مۇشەققەت . مۆجىزە ئەمەسمۇ پايانسىز چۆلدە ، سېلىم بوۋاينىڭ تەنھا ياشىشى . مۆجىزە ئەمەسمۇ مۇھەببەت بىلەن مايبۇلاقلارنى بۇندا بايقىشى . بىر تارىخ ئەمەسمۇ بۇ يەردە يەنە ، قاردەك ئاقىرىشى چاچ – ساقاللارنىڭ . مۆجىزە بۇ يەردىكى دەريا شاۋقۇنى ، مۆجىزە قايتا ياشىرىشى توغراقلارنىڭ ..... قاراماي ئانامنىڭ باغرىدەك مېھرى ئىسسىق جاي . ئېگىز – ئېگىز بارخانلىرىدىن ، يىلتىزى چوڭقۇر توغراقلىرىدىن ، ئىللىق ، مەيىن شاماللىرىدىن ، سېلىم بوۋام ئېيتقان قوشاقتىن ، ئۇچۇپ كېلەر ئاستا ماي ھىدى . بۇ تۇپراققا سىڭگەن مۇھەببەت ، ئوت يۈرەكلىك نېفىتچىلارنىڭ يېنىپ تۇرغان ئارمانى ئىدى . قاراماي مۇقاملار ئەۋجىگە كۆمۈلگەن يۇرت بۇ ، مۇقامغا ئوخشايدۇ ۋىشكىلار كۈيى . سالام بېرەر كاچالكىلارمۇ ، ئۇچراپ قالسا ساڭا يول بۇيى . . 2 . مېھرى ئىسسىق باياۋان ئارا ھايات شۇنداق داۋاملىشىدۇ ، نېفىتچىلار ياراتقان شەھەر ، تاڭلار بىلەن سالاملىشىدۇ . بىر ئېقىن بار بۇ يەردە پەقەت ، دەيمەن ئۇنى مېھىر دەرياسى . قاراماينى سۆيۈپ ئۆتىدۇ ، شاۋقۇنلىغان لەرزان ناخشىسى . سۇ ... !!! سۇ ... !!! سۇ ... !!! بىر چاغلاردا قۇشلار ، گىياھلار ، پىچىرلايتتى ئۈنسىز ئاشۇنداق . تەلمۈرەتتى كۆككە يۇلغۇنلار ، بىر تەشنالىق ئىچىدە ئۇزاق . بىر قارىساڭ نېفىتچىلارنىڭ تۆكۈلەتتى ئوتلۇق كۆزىدىن ، سۇغا بولغان چوڭقۇر بىر پىراق .... بىر چاغلاردا سۇسىز باياۋان ، سۇغا شۇنداق باغلاپ ئىشتىياق ، بۇ كۈنلەرنى كۈتكەنتى ئۇزاق . ئەنە قارا بۈگۈن بۇ يەردە ! شۇنچە قايناق ھايات ناخشىسى ناۋا قىلغان قۇشلارنىڭمۇ ھەم مۇھەببەتكە تولغاندۇر قەلبى . قاراماينىڭ ئاسمىنىمۇ چىرايلىق ، يۇلتۇزى خۇددى قىزلارنىڭ كۆزى . ئاي تاماشاسى قىلساڭ ئاخشىمى ، دەپ قالىسەن جەننەتنىڭ ئۆزى . قاراماي ، ئەنە شۇنداق سېھىرلىك ماكان ، چەكسىزلىكى تەكلىماكاندەك توغراقلارنى قۇچاغلاپ ياتقان . قاراپ باقساڭ كۆزلىرى نۇرلۇق ، نېفىتچىلار شۇنچە مېھرىبان . . 3 . قاراماينىڭ يۈرىكى گويا يېنىپ تۇرغان بىر پارچە چوغدۇر . يىراق - يىراققا نامى تارالغان ، گۈزەللىكتە يەكتا بىر يۇرتتۇر . چوغ بار يەردە ئوت بار ئەمەسمۇ ، ئاشۇ ئوت ئەمەسمۇ ئەلنى كۆيدۈرگەن . سۆيەلمەيدۇ ئۆزىنىمۇ ھەم ، شۇنداق ئوتتا كۆيمىگەن ئادەم . قاراماينىڭ ئارمانلىرى كۆپ ، توغراق كەبى ياشىرىپ تۇرار. قاراماينىڭ قاپ قارا « قېنى » ئانا يەرنىڭ ئىللىق باغرىدىن مېھىر بىلەن ئېتىلىپ چىقار . قاراماي مۆجىزىگە باي ، سۆيۈملۈك ماكان . سانسىز بارخاندىن تارايدۇ سۈكۈت . سانسىز يۇلغۇنلاردىن تارايدۇ چىدام . سانسىز كۆزلەردىن تۆكۈلەر ئۈمۈت .... قاراماي ئەجەپمۇ مېھرىبان ئۇنىڭ يۈرىكى . ئەجەپمۇ ئۇلۇغ ھەر بىر تىلىكى . ئەجەپمۇ تاتلىق مۇقامدەك كۈيى . ئەجەپ چىرايلىق ئۇنىڭ ھەر تېڭى . قاراماينىڭ يۈرىكى سېلىم بوۋامنىڭ تىلىكى ئىدى ، ئۇچۇپ يۈرگەن شاماللار ئارا پات – پات ئۇرۇلار ئۇنىڭ تىنىقى . ئېھ مېنىڭ رىشتىم باغلانغان ماكان ، سېنىڭ ئەمەسمۇ شائىر يۈرىكى ....... ئېھ ، قاراماينىڭ يۈرىكى ، سەن تارىخ سۆزلەيسەن ، تاڭنى كۈيلەيسەن . مەن بۇلبۇل بولۇپ سېنى كۈيلەيمەن . ھايات بۇ يەردە بىزنى ياراتقان بىزنىڭ تەغدىرىمىز باغلىنىپ كەتكەن ، مەن باھار بولۇپ سېنى كۈيلەيمەن . قىزىل گۈللەرگە سېنى پۈركەيمەن .

admin · ۋاقتى: 2014-11-9 13:24:51


	بۇ مېنىڭ يۈرىكىم ئىدى ئوسمان قاۋۇل چېچەكلەر تۆكۈلۈشكە باشلىغىنىنى چۈشۈمدىكى مەنزىرە ئوخشايدۇ، دەپ قالدىم. ھەممە يەر ئاق، قىزىل، ھال چېچەكلەر بىلەن پۈركەنگەنىدى. ئاسماندىن چېچەك ياغقانمىدۇ بۇ كۈن؟ يەردىن غۇچچىدە گۈل ئۈنۈپ چىققانمىدۇ بۇ كۈن؟ ئۇنىڭ ھەممىسى پەقەت سەن- گۈزەل قارامېيىمنىڭ پاكلىقى، بىغۇبارلىقى ئۈچۈندەكلا ئىدى. شۇ قەدەر چىرايلىق ئىدى بۇ خىل ھېسسىيات. چۈنكى ئۇنى مۇشۇ ئۇلۇغۋار شەھىرىمنىڭ پاك مۇھەببىتى، ئەقىدىسى بەخش ئەتكەنىدى... مەيىن شامال سۈبھىنى باشلاپ كەلدى. كېچىدىن قاراڭغۇلۇققا تولغان يۈرىكىم شۇ ھامان ۋاللىدە يورۇپ كەتكەندەك بىر شېرىن سېزىم بەرقىدە شادلىققا ھامىلدار بولغاندەك بولدى. بۇ قانداق تۇيغۇدۇ؟ دەپ سورىغانلارغا ئۇنىڭ ھېكمىتىنى ھېچقاچان شەرھىلەپ بېرەلمەس ئىدىم ئەمما... كىملەر شۇنداق ھېسلارغا مەھلىيا بولمىغاندۇ، كىملەرنىڭ شۇنداق جاۋاھىراتلىق تۇيغۇلىرى بولمىغانلىقى ئۈچۈن جاھاندىكى ئەڭ بىچارە، كەمبەغەل، ساياق جان ئىگىسىگە ئايلىنىپ قالغاندۇ؟ يۈرەك گۆشتىن پۈتۈلگەن، ئۇنىڭدىن قان چىقىدۇ. ئەمما شۇنداق يۈرەكمۇ بار ئىكىن، ئۇنىڭدىن قانلا ئەمەس يەنە سۈزۈك، شېرىن، ئۇنتۇلماس، رومانتىك تۇيغۇلار، لاۋۇلداپ تۇرغان يالقۇن، جاھاننى كۆيدۈرگۈچى ئاھ-نىدا، ساپ ئەقىدە ئېتىلىپ چىقىدۇ. ئۇ مېنىڭ يۈرىكىم، مۇشۇ ئىستىقباللىق شەھىرىمگە بولغان سۆيگۈلىرىم لەببالەب دولقۇنلاپ تۇرغان يۈرىكىم... «شېرىن ھېسقا تولمىساڭ تىلىكىم بار دېمىگىن، ئوتتەك يېنىپ تۇرمىساڭ يۈرىكىم بار دېمىگىن» دېگەنىكەن كونىلار. مەن راستتىنلا شۇنداق يۈرەكنىڭ ئىگىسى بولغىنىم ئۈچۈن خۇشالمەن. تۇيۇقسىز ئۇنىڭدىن مۇنداق مىسرالار ئېتىلىپ چىقتى. گۈزەل شەھىرىم ئۈچۈن ئوتتەك يېنىپ سەكپارىدۇر كۆڭلۈم، ئاڭا ھەم تەلمۈرۈپ كۈن-تۈن ئەجەپمۇ زارىدۇر كۆڭلۈم. بۇ مىسرالارغا قاراپ تۇرۇپ قالدىم. ئۇنى مەن يازغان ئىدىم، ياق ئەمەلىيەتتە مۇشۇ ئەزىز تۇپراقنىڭ ماڭا بەرگەن پاك مۇھەببىتى، چىن ئېتىقادى يۈرىكىمگە يازغانىدى. كۆكتە كۈمۈش بۇلۇتلار جىمىرلايدۇ، بەزىلىرى خېلى يورۇق، ئەمما بەزىلىرى شۇ قەدەر غېرىپ، مىسكىن، يۈرەكنى بەكمۇ ئېزىدۇ. مەن ئۇنىڭغا قاراپ دېرىزە ئالدىدا مۇڭلىنىپ تۇرىمەن. نەزەرىم تېز تەرەققىي قىلىۋاتقان، ئۇچقاندەك يۈكسىلىۋاتقان چىرايلىق شەھەر تاماندا، قەلبىم ئىزگۈ ئارماندا... يوللار يۈگۈرۈپ ئالدىمغا كەلگەندەك بولدى. بۇ تەسەۋۋۇر ئىدى. گويا شۇنداق بولسا بۇ غايىۋى شەھەر بىلەن بولغان ئارىلىقىمىز توساتتىن تېخىمۇ يېقىنلىشىپ قالىدىغاندەك، ئاشۇ ئېچىلغان گۈللەر تەرەققىيات قەدىمىمىزگە پايانداز بولىدىغاندەك، ۋۇجۇدۇمدىكى قۇۋۋىتىم ئاڭا گۈلخان بولىدىغاندەك... يەنە بۇ مىسرالار قەلبىم توغانىدىن تاشقىنلاپ چىقتى. كېلىپ قالسا يېقىملىق بىر خەۋەر كەيپىم پۇچۇلغاندا، ئېشىپ ئامراقلىقىم نەچچە بولار دىلپارىدۇر كۆڭلۈم. خىيالىم يۈكسىلىپ، ئاھىم ئېشىپ بۇ ۋادىغا بەزەن، قىزىق سەندەلدە يەنجىلگەن قۇيۇچتەك پارىدۇر كۆڭلۈم... ئاھ دېدىم ئالەم ئۆرتەندى، ئاھ دېدىم تاغلار تېز چۆكتى، ئاھ دېدىم ئاسمان ياش تۆكتى، ئاھ دېدىم ھەممە يىغىلىپ قەلبىمگە مۆكتى... تاڭ جىيەكلىرىدىن ئىستىقبالىمنى ئىزدەيتتىم شۇ دېرىزىدىن قاراپ تۇرغان ھالىتىمدە. ئۇنىڭدا گۈزەل كەلگۈسىنىڭ يوچۇقلىرىدىن تارىغان نۇر پارلاۋاتقاندەك قىلاتتى. قۇشلارنىڭ ئۇيقۇلۇق ھالەتتىكى بوش چىرىلدىشى ئاڭلىنىپ تۇراتتى. ھە، ئۇلارمۇ شۇ قەدەر مەستخۇش ئىكەن-دە مەندەك، دەپ ئويلايتتىم. دەرەخلەر بوشقىنە شىۋىرلاپ كەلگۈسىمىزنىڭ ئىپتىخارلىق ناخشىسىنى ئېيتاتتى. ئىختىيارسىز سۆيۈنۈپ كېتەر ئىدىم بەختىمدىن... مېنى شۇنداق سۆيۈندۈرگىنى سەن- توختاۋسىز ئىلگىرىلەۋاتقان مەرۋايىت شەھىرىم ئىدىڭ. ساڭا تەلپۈنۈپ، سېنىڭدىن پەخىرلىنىپ ناتىۋان قۇشتەك كېچە بويى بىدار بولغىنى، ۋاراقشىپ قاينىغىنى مېنىڭ مۇڭلۇق، ئوتلۇق يۈرىكىم ئىدى. ھەئە، ئۇ مېنىڭ يۈرىكىم ئىدى...

admin · ۋاقتى: 2014-11-9 13:25:51


	سۇ ئادىل تۇنىياز ئاشىقمەن ساڭا، ئەسىرلەر ئېچىرقىغان تەكلىماكان بويىدا. تەكلىماكا بويىدا ئۆزۈڭدىن شۇنچە يىراق ئاقىسەن، ئۆزۈڭگە شۇنچە مەخپى ياتىسەن. مەن بىلمەيمەن تەنھالىق نىمە؟ تۆت پەسىلدە ئاۋازىڭ تۆت خىل، گاھىدا چوڭقۇر ئۇھ تارتىسەن گاھىدا مۇز بولۇپ قاتىسەن. گۈل-گىياھ،دەل-دەرەخلەر ساقلىغان چىڭ زۇمرەت رەڭلىك مەخپىيەتلىكىڭ، ئوخشار مېنىڭ ئۈمىتلىرىمگە. سۇ غەمسىز،رەڭسىز ماددىسەن، ئىككى كەپتەر بىلەن كۆك ئاسماندەك، ئىككى شامال بىلەن مەجنۇنتالدەك، ئىككى غالجىر قول بىلەن بىر ئاچ تەندەك. ئىككى ھىدروگىن، بىر ئوكسىگىن ۋە ئېلمىنىتلار دەۋىر جەدۋىلىدە ئىرمىشىپ-چىرمىشىپ ئويناۋاتقان. سېنىڭ ئىشقىڭدا ئۇرىدۇ پەرياد سانسىز قولىنى سۇنۇپ بۇ ماكان. سۇ دەپ مىۋىلەر يىغلايدۇ شىرىن، كېۋەزلەر ۋاقىرار ئاۋازى ئاپئاق، سۇ دەپ نالە قىلار ئورنى بوش قالغان نېفىت، كۆمۈر،ئالتۇن، مىس، ئۇران. ۋالىلدايدۇ بېشىمدا سۇ تاج، بۇ زىمىننىڭ شاھزادىسىمەن. تەمتىرەيسەن سۈزۈك قارغۇدەك، خۇش بولىسەن بالىغا ئوخشاش. ھۆكىرەيسەن ياۋايى پات-پات، بەزىدە جىم ئاقىسەن ياۋاش. تار، قاراڭغۇ تۇربا ئىچىدە. شىلدىرلىشىڭ قوزغار ھاياجان، ئۇيقۇم قاچقان ئۇزۇن كېچىدە. قۇچاقلىسام ئىشتىياق بىلەن ھۆل قىلىدۇ تېرەمنى تېرەڭ، ئاندىن ئېقىپ كېتىسەن يىراق، ماڭا يەنە قالار ئىشىق ۋە پىراق. سۇ مۇڭلۇق سۇ، ئوقۇپ بېرەي كىمگە سېنى مەن؟

شوخ · ۋاقتى: 2014-11-9 14:12:56


	ئەسسالام !قارامايدىكى رىزۋانگۈل ،گۈزەلنۇر،دىلنۇر ،مەريەم،ئارزىگۈل قاتارلىق ئايال ئەدىپلەر !! گۈلگۈن چېھرىڭلاردىن ئۆزگىچە مېھىرنى ھېس قىلدىم،بۇندىن كېيىنكى ئىجادىيىتىڭلارغا ئۇتۇق تىلەيمەن، شەھرىڭلارنىڭ ئەدەبىيات-سەنئەت ئىشلىرى گۈللەپ ياشنىغاي !!

رابىيگۈل ئىبراھ · ۋاقتى: 2014-11-9 19:15:40


	ئەھمىيەتلىك پائالىيەتلەردىن سۆيۈندۇق. پائالىيەتتە ئوقۇلغان نادىر ئەسەرلەر بىلەن ئۇچراشتۇرغىنىڭىزغا تەشەككۈر.

تۇردى0998 · ۋاقتى: 2014-11-9 23:06:40


	قارمايدىكى بۇ پائالىيەتكە خېلى كۆپ شائىر ،ئەدىپلىرىمىز قاتنىشىپتۇ.پائالىيەت تۇلىمۇ ئەھمىيەتلىك بۇپتۇ.ئەدىپ ،شائىرلىرىمىزنىڭ ئالتۇن بۇيى ئامان بولغاي!

kroran · ۋاقتى: 2014-11-10 10:25:02


	شېئىرىيەت كارۋىنىنىڭ كەچكۈزدىكى بۇ قۇتلۇق سەپىرىگە مۇبارەك بولسۇن

تۇرسۇنجان ھەسەن · ۋاقتى: 2014-11-10 10:51:39


	شېئىرىيەت كارۋىنىنىڭ قۇتلۇق سەپىرى داۋام قىلغاي!

ي.ت.توغراق · ۋاقتى: 2014-11-10 10:56:13


	بەك ئەھمىيەتلىك پائالىيەت بولۇپتۇ. مۇشۇنداق پائالىيەتنىڭ داۋاملىق ئېلىپ بېرىلىشىنى ئۈمۈد قىلىمەن. مۇمكىن بولسا ھەرقايسى ۋىلايەت، ئوبلاستلار ناھىيىنى بىرلىك قىلىپ ئېلىپ بارغان بولسا بولاتتى.

مۇرتىزا · ۋاقتى: 2014-11-10 12:12:17


	ھەقىقەتەن ئەھمىيەتلىك يېغىلىش بوپتۇ!

altigin · ۋاقتى: 2014-11-10 13:27:17


	تولىمۇ ئەھمىيەتلىك پائالىيەت بوپتۇ.

shaidayi · ۋاقتى: 2014-11-10 23:00:51


	تولىمۇ ئەھمىيەتلىك پائالىيەت بوپتۇ. ئىزگۈ ئشىلار ئۈچۈن بېسىلغان قەدەملەر ئۈزۈلۈپ قالمىغاي! ئەزىزلەرنىڭ ئەزىز تېنىگە سالامەتلىك يار بولسۇن!

18139193341 · ۋاقتى: 2014-11-10 23:05:45

ئايشەم1 · ۋاقتى: 2014-11-10 23:05:54


	مۇشۇنداق ياخشى پائالڭيەتلەرنىڭ داۋاملىشىشىنى ئۈمۈد قىلىمەن، كورلىدىمۇ ئىنتايىن ياخشى ئېچىلغان ئىدى.

ئارزۇگۈل · ۋاقتى: 2014-11-11 10:01:21


	سۆيۈندۈم.