ئەلقىزى نەسىرلىرىدىن

      ئانام يىراقتا قالغان ئىدى.
   مەن تەنھا ھالدا ئانچە سۈزۈك بولمىغان تۈمانلىق ئاسمانغا تىكىلگىنىمچە خىياللارغا پېتىپ، باھار شامىلى يېڭىلا جانلانغان ھاياتلىقنى ئويغىتىۋاتقان،قۇرۇشقا باشلىغان دەرەخ پوتلىلىرى يوللاردا ئۇچۇپ يۈرگەن،بولۇق ئېچىلغان چېچەكلەر يېشىل سۆگەتلەر ئارىسىدا مەھەللىگە ئۆزگىچە ھۆسۈن قوشۇپ دىللارنى مەپتۇن قىلىۋاتقان گۈزەل چېچەك پەسلىنىڭ سوغۇق ئاخشىمى، يېڭى كۆتىرىلگەن ئاينىڭ بۇلۇتلار ئارىسىدن ئاران كۆرۈنۈپ تۇرىدىغان غۇۋا يورۇقلىرى بىخلىنىۋاتقان تېرەك شاخلىرىغا سۇس چۈشكەن جىمجىت مەھەللىدىكى ھويلامدا تۇرۇپ ، ئۈزۈم تاللىرىنىڭ بوغۇنلىرىدن ئاندا-ساندا تامچىلاپ چۈشىۋاتقان  سۇيۇقلۇققا – تالنىڭ يېشىغا قارىغىنىمچە ئانامنى سېغىنماقتىمەن.
   ئانام يىراقتا قالغان ئىدى.
  ئەينى چاغدا ئاناملا ئەمەس،مېنىڭ دىلكۆيەر قېرىنداشلىرىمنىڭ ھەممىسى كۆزلىرىدىن ياشلىرىنى ئاققۇزغان ھالدا ماڭا ئاق يول تىلىشىپ، قوللىرىنى پۇلاڭلاتقانلىرىچە قېلىشقان ئىدى.قۇياش نۇرى مەن چوڭ بولغان مەھەللەمدىكىگە ئوخشاش پارلاپ تۇرسىمۇ،ئەمما بۇ يەردە مەھەللەمدىكىدەك سۈزۈك ئاسماننى كۆرەلمىدىم،قۇياش نۇرىمۇ  ئۇنداق ئىللىق تۇيغۇ بېرىپ باقمىدى. مەن بەزىدە بالىلىق چاغلىرىمدا قەلبىمدە چوڭقۇر تەسىر قالدۇرغان بارلىق ئاقكۆڭۈل، ساپدىل كىشىلەرنى پات-پات  ئەسلەپ قالاتتىم.
   ئانام يىراقتا قالغان ئىدى. مەن ھەر قېتىم ئانام بىلەن خوشلىشىپ يانغىنىمدا،ئۇنىڭ ئانىلىق مېھرى بىلەن قىيالماي تۆككەن كۆز ياشلىرىغا چۆمۈلۈپ كېتەتتىم، ئانامنىڭ كۆزىدىن تۆكۈلگەن ھەر تامچە ياش قەلبىمنى چايقاپ، ۋۇجۇد-ۋۇجۇدلىرىمنى ئېرىتىپ تاشلايتتى، يولبويى يۈرىكىم بىر چەكسىز داۋالغۇش ئىچىدە پۇچۇلىناتتى.
   ئانام يىراقتا قالغان ئىدى.
ئۇنىڭ ماڭا ئېيتىدىغان ھەم مەڭگۈ ئېيتىپ تۈگىتەلمەيدىغان يۈرەك سۆزلىرى قەلبىنىڭ چوڭقۇر قاتلىمىدا چالا پېتى قالغان ئىدى...ھەر قېتىم مەن بىلەن خوشلاشقاندا كۆزلىرىدن تاراملاپ تۆكىلىدىغان كۆزياشلىرىنىڭ ئىچىگە قانچىلىك تۈگىمەس سۆزلىرى ۋە قىيالماسلىق سىڭگەن بولغىيدى!؟... ئۇنىڭ ئەشۇ ياشقا تولغان، ۋاقىتسىز ئولتۇرۇشقان بولسىمۇ مەغرۇر ۋە ئىشەنچ بىلەن يېقىملىق  چاقناپ تۇرىدىغان ئۆتكۈر كۆزلىرى ھەم ئورۇقلاپ كەتكەن بولسىمۇ،ھېچقاچان يىقىلىپ باقمىغان قەيسەر گەۋدىىسى، قېتىپ كەتكەن بولسىمۇ ئىللىق مېھىر ۋە كۈچ بېرىدىغان قوللىرى بىلەن يۈز-كۆزلىرىمنى قايتا-قايتا سىلاپ-سىپاشلىرى كۆڭلۈمدە تەسۋىرلىگۈسىز خىجالەتلەرنى قالدۇراتتى.چۈنكى،لازىمەتلىكلىرىم تەل بولسىمۇ،ئەمما ئانام ئېھتىياجلىق بولغاندا يۈگۈرۈپ چىقىپ بىر چېلەك سۇنى ئەكىرىپ بېرەلمەيتتىم،كىچىكىمدىكىدەك ئوتۇنلىرىنى يېرىپ نەچچە كۈن يەتكىدەك دۆۋىلەپ بېرەلمەيتتىم، كۆمۈرلىرىنى چوقۇپ ئوت قالاپ ئانام ئولتۇرىدىغان ئۆينى ئىسسىتىپ  بېرەلمەيتتىم.توخۇ-كەپتەرلىرىگە دان تاشلاپ،قويلىرىغا يەم بېرەلمەيتتىم.بېغىمىزدىكى خوخا-تىكەنلەرنى يۇلۇپ-چاناپ ئۇرۇق سېلىپ كوكاتلارنى تېرىپ بېرەلمەيتتىم. مەن بۇ ئىشلارنى پەقەت ئانامنى يوقلاپ بارغان ۋاقىتلىرىمدىلا قىلىشىپ بېرەلەيتتىم.بالىلىرىم بىلەن ئولتۇرۇپ ئىسسىق تاماق يېگەندە، گېلىم غىققىدە بولۇپ قالاتتى-يۇ،ئەمما يەۋاتقان ئېشىمدىن بىر چىنە سۇنالمايتتىم، ئازادە ئۆيۈمدە ئولتۇرغۇزۇپ كۈتەلمەيتتىم.گەرچە ئانام مەندىن (قىزبالا دېگەن بىقۇۋۇل دەپ) ھېچنەرسە تاما قىلىپ باقمىغان بولسىمۇ،بۇنداق چاغلاردا يۈرىكىم ئۆرتىنىپ كېتەتتى.
   ئانام يىراقتا قالغان ئىدى.
  مەن ئۇنىڭ ھەر بېقىشىدىن مېھىر تۆكۈلۈپ تۇرىدىغان كۆزلىرىنى دائىم كۆرۈپ تۇرالمايتتىم.ئۇنىڭ بىلەن يانمۇ-يان ئولتۇرۇپ قانغىچە سىردىشالمايتتىم، مۇڭلىرىمنى تۆكەلمەيتتىم. ئۇنىڭ دەرتلىرىگە، كۆڭلى تەسەللىي تاپقىدەك مېھىر بېرەلمەيمەيتتىم،ئارىلىق بىزنى ئايرىپ تۇراتتى.
ئانام يىراقتا قالغان ئىدى.
مەن نۇرغۇن ئىشلارنى ئانامغا دېيەلمەيتتىم، مەنسىزمۇ ئانامنىڭ دەرتلىرى  ئۆزىگە يېتىپ ئاشاتتى.مېنى چۈشىنىدىغان، ماڭا ھەمدەرت بولىدىغان قېرىنداشلىرىمنىڭ ھەممىسى يىراقتا-يۇرتۇمدا قالغان ئىدى.مەن خىياللىرىمنى، بېشىمغا كەلگەن كۈلپەتلەرنى، مۇڭلىرىمنى شىلدىرلاپ تۇرغان دەرەخ يوپۇرماقلىرىغا، جىمىرلاپ تۇرغان يۇلتۇزلارغا،ھېچقاچان دىلئازارى قىلمايدىغان ئۆيۈمنىڭ جىمجىت تاملىرىغا  پىچىرلاپ تۇرۇپ ئېيتاتتىم،ئۇلار مېنى ئانامدەك قۇچاقلاپ سۆيۈپ تەسەللىي بېرەلمىسىمۇ،بىرەر يول كۆرسىتەلمىىسمۇ،لېكىن ئۈنسىز تۆكىلىدىغان ئۇۋالچىلىق ياشلىرىمنى ۋە پىچىرلاپ تۆككەن دەرتلىرىمنى ساداسىز يۇتۇشلىرى بىلەن غەملىرىمگە ئورتاقلىشاتتى ۋە دەرتلىىرمنى يېنىكلىتەتتى.
  ئانام يىراقتا قالغان ئىدى.
  ئۇنىڭ ھەر تەبەسسۇمى ۋۇجۇدۇمغا كۈچ قوشاتتى، غەيرىتىمنى ئاشۇراتتى.ئۇ ھېچقاچان تارتقان ئەلەملىرىنى بىزگە بىلدۈرمەسلىككە تىرىشاتتى. ئۇنىڭ ھەر قەدىمىدىن تۆكۈلۈپ تۇرىدىغان گۈزەللىك گويا مەيىن شامالدەك قەلبىمنى ئىلھاملارغا پۈركەيتتى.تەبەسسۇم بىلەن كۈلۈمسىرەپ قاراشلىرى گويا  گۈلشەننى ئەسلىتەتتىكى،ئانامنىڭ گۈزەللىكى ئالدىدا نە جاھاننىڭ رەنالىرى، نە شاھلارنىڭ سەنەملىرى قولىغا سۇ قۇيۇپ بېرەلمەيتتى.سۆزلۈك پايانىغا چۆككىنىدە،مەنالار باياۋىنىدا چەكسىزلىككە يېيىلغان قەلبىنى ھېكمەتلەرگە لىق تولغان ئوكيانمىكىن دەپ قالاتتىم.ئۇنىڭ سۆزلىرى گۈزەل،يېقىملىق، رېتىملىق، دانە-دانە بولۇپ،مۇھەببەت-نەپرىتى ئېنىق ئىدى.
ئۇ بىزگە ھەردائىم تەبەسسۇم بىلەن باقاتتى، جاپادىن قاچمايتتى، ھەرقاچان ھالال، پاك،مېھنەتلىك ياشاشنى ھەم ھاياتقا تەبەسسۇم بىلەن بېقىشنى ئۆز ئەمىلىيىتى بىلەن ئۈگەتكەن ئىدى.
  ئانام يىراقتا قالغان ئىدى.
  ئانام ھەردائىم بىزنى كۆرگەندە:«مەن ناھايىتى بەختلىك!» دەپ بىزنى تېنچلاندۇرۇپ تۇراتتى،ئەمما ئۇ تۇرمۇشتا بەختسىز بولۇپ قالغان ئىدى.ئۇ بىزنى دەپ، بىزنىڭ خاتىرجەم ئۆتىىشىمىز، ئاللىكىملەرنىڭ ئالدىدا سارغىيىپ-تاتىرىپ قالماسلىقىمىز ئۈچۈن ، ئۆزى سۆيگەن كىشىسى-دادىمىزنىڭ ئەقىدىسىنى   قەلبىنىڭ ئەڭ مەۋھۇم يېرىگە يوشۇرۇپ،ئاشۇ سكيگۈسى ئۈچۈن  ئوتتۇز يىلدىن بۇيان تەنھا ياشاپ كەلگەن ئىدى. ئوتتۇز يىلدىن بۇيان ئۇ زىمىستان قىشتىن قانچىنى ئۇزاتتى؟جۇت-شىۋىرغانلىق كۈنلەردىن قانچىنى ئۇزاتتى؟ۋە يەنە ھازىرقىدەك باھار پەسلىدىن قانچىنى ئۇزاتتى؟ئۇ بىزنى، دادىمىزنى-ئەڭ سۆيۈملۈك كىشىلىرىنىڭ بەختى ئۈچۈن   ئوتتۇز قىش، ئوتتۇز يازنى تەنھا ئۇزاتتى.بۇ ئوتتۇز يىل جەريانىدا ئڭ ھەم ئانا بولدى ھەم دادا بولدى.ھەممىمىزنىڭ دەردىنى ئۇ يۇتتىيۇ، ئەمما ئۆزىنىڭ قىلدەك دەرتلىرىنى بىزنىڭ يۇتىشىمىزغا يول قويمىدى.بۇ ئوتتۇز يىللىق تەنھا گەۋدىگە قانچىلىك ئازاپلار يوشۇرۇنغان بولغىيدى؟!...
ئەلۋەتتە، ھەر بىر ئانا پەرزەنت ئۈچۈن ئوخشىمىغان بەدەللەرنى تۆلەيدۇ،بىراق پەرزەنتلىك بولغان ھەممىلا ئانىنىڭ ئۇلۇغلۇق تۆرىگە چىقالىشى مۇمكىن ئەمەس.لېكىن ئانام شۇنداق قىلالىغان ئىدى.ئۇ ئالەمنىڭ مۇشەققەتلىرىنىبىر  يالغۇز ئۆزى تارتقان، تۇرمۇشنىڭ ئۆزىگە بەرگەن بارلىق ئادالەتسىزلىكلىرىگە ئەڭ ئىللىق، ئەڭ پاك، ئەڭ تاقەتلىك ھالەتتىكى تاماسىز، مىننەتسىز مۇھەبىتى  ۋە چەكسىز بېغىشلاشلىرى  بىلەن قەيسەر ۋە مەغرۇر تۇرۇپ جاۋاپ قايتۇرغان ئىدى.ئۇ پاكىز  دىيانىتى،يىمىرىلمەس ئەقىدە-ئىخلاسى ۋە كۆرسەتكەن توختاۋسىز ھىممىتى  بىلەن پەرزەنتلىرى ئالدىدا يۈكسەك ۋە ئۇلۇغلۇق ئورنىغا،   يۇرت خەلقى ئالدىدا ئىشەنچ ۋە ھۆرمەتكە ئېرىشكەنىدى، نومۇس ۋە ئىپتىخارنىڭ ئۈلگىسى ئىدى.
  شۇنداق، ئانام يىراقتا قالغان ئىدى.
  ئانام  ئەمدى تېخىمۇ يىراققا-مەڭگۈ كەلمەس جايغا كەتتى. ئانام ئەشۇ ئىچى-تېشى ئوخشاش پاكىز دىيانىتى،ئىنساپ-ئىمانى بىلەن بىرلەشكەن ئەڭ مەپتۇنكار گۈزەللىكى  بىلەن جەننەتتىكى  ھۆرى-غىلمانلار  ئارىسىدا يەنىلا تەلقىن ئوقىۋاتامدىكىن، ۋە ياكى جەننەت گۈلزارلىقلىرى ئىچىدە سەيلە قىلىۋاتامدىكىن، ۋە ياكى ئالتۇن قۇببىلىق ئۆيلەردە خىرامان ئۇخلاۋاتامدىكىن، ۋە ياكى يەنىلا بىزنىڭ غېمىمىز بىلەن تەشۋىشلىنىۋاتامدىكىن؟!
   شۇنداق، ئانام يىراقتا قالغان ئىدى.
  ئانام  ئەمدى تېخىمۇ يىراققا-مەڭگۈ كەلمەس جايغا كەتتى.
  ئانا، قىزىڭ يالغۇز قالدى .ئېيتقىنە ئانا، ھارغانلىرىمدا كىمگە يۆلىنەرمەن،كىممۇ سەندەك بەرداشلىقتۇ، ئانا؟!بېشىم  غەملەردىن ئېغىرلاشقاندا  كىمنىڭمۇ مۈرىسىگە بېشىمنى قويارمەن، كىمنىڭمۇ مۈرىسى سېنىڭكىدەك مۇستەھكەم ھەم يېقىملىقتۇ، ئانا!؟دەرتلەر دەۋرەپ كۆزياشلىرىم تۆكۈلگەندە كىممۇ سېنىڭكىدەك مېھرىلىك ئالقانلىرى بىلەن يېشىمنى سۈرتىدۇ، ئانا!؟ھەسرەتلەردىن يۈرىكىم پارىلانغاندا كىمنىڭمۇ باغرىغا ئۆزۈمنى ئېتىپ پاناھلىنىمەن، ئانا!؟ ئېيتىپ بەرچۇ، جېنىم ئانا؟! يىراقتا يالغۇز  قالغان قىزىڭ پەقەتلا دۇئالىرى بىلەن ساڭا مەغپىرەت تىلەيدۇ، ئانا!
ياتقان يېرىڭ جەننەت بولسۇن، قىزىڭنىڭ دۇئاسى روھىڭغا يەتسۇن، ئانا!





بۇ يازمىنى ئاخىرىدا   ئەلقىزى تەھرىرلىگەن. ۋاقتى  2014-7-12 22:25  

                                                                     قىستۇرما سۈرەت
                                             (نەسىر)

                                          تۇنساگۈل بارات ئەلقىزى

   ھاياتلىق ئالىمىدە قايغۇ بىلەن شاتلىق، بەخت بىلەن مۈشكۈللۈك بىر-بىرىگە ئەگىشىپ كېلىدۇ. مانا، بۇ يىل  باش باھارمۇ كەلدى.چوڭلارنىڭ كۆڭۈل قويۇپ قىلغان مەسلىھەتلىرى بىلەن بۈگۈنكى كۈننى خاسىيەتلىك كۈن ھېساپلاپ، توي ۋاقتىمىزنى بۈگۈنگە توغرىلاپ باغاقلار تارقىتىلدى.
    بۈگۈن كاتتا توي مەرىكىمىز بولدى.مەن يەڭلىرى ھىم ۋە ئۇزۇن قىلىپ  تىكىلگەن خان ئەتلەستىن تويلۇق كۆينىكىمنى كىيىپ، شاقىراتمىدەك يېيىلىپ تۇرىدىغان  ئۇششاق ئۆرۈلگەن چاچلىرىمنى باسۇرۇپ ئالتۇن جىيەكلىك دوپپىنى كىيىپ،ئېتىكىمگىچە چۈشكەن ئۇزۇن يىپەك رومالنى بېشىمغا سېلىپ،تويلۇق زىننەتلىرىمنى تاقاپ قولدىشىم ۋە قىز دوستلىرىمنىڭ ھەمرالىقىدا زالغا كىرگىنىمدە،سورۇن ئەھلىنىڭ ئەقلى لال بولدى.شۇ مەھەل چۈمپەردە ئىچىدە  كۆزۈم ساڭا  چۈشتىكى، سەنمۇ ھەقىقىي يىگىتلەرگە خاس سالاپەت بىلەن يەڭ-ياقىلىرىغا كەشتە ئويۇلغان ئەنئەنىۋى كىيىملىرىمىزنى كىيىۋالغان ئىكەنسەن.ياپىرىم! نەدىن كەلگەن سالاپەت بۇ؟ يۈرىكىمدە بىر ئوت ياندى.ئوخشاش ئېتىقاد ئىچىدىكى ئوخشاشلا ئۆز ئۆرپ-ئادىتىمىزگىلا، مىللىي مەدەنىيىتىمىزگە خاس بولغان يارىشىملىق تويلۇق كىيىم ،نومۇس ۋە ھايا پەردىسىگە ئورالغان بىر جۈپ بەدەندىكى قىزنىڭ قىزچە تارتىنىش ئىچىدىكى بەختىيار نازاكىتى ۋە ھايالىق لاتاپىتى بىلەن، يىگىتنىڭ يىگىتلەرچە جەسۇرلىقى ۋە سالاپىتىنى ئەينەن نامايەن قىلغان بەدەننى تولۇق يۆگىگەن تويلۇق كىيىملەر بىلەن سالاپەت-سۈلكىتى تېخىمۇ ئاشقان قىز بىلەن يىگىتنى كۆرگەن سورۇن ئەھلى ھاڭ-تاڭ قالدى.
     يۈرەكلەردە ھاياجان،كۆزلەردە سۆيۈنۈش، ئېغىزلاردا  ئوتلۇق تىلەكلەر، مېھمانلارنىڭ يۈرەكلەرنى چۆچۈتمەيدىغان پەس، لەرزان مۇزىكىغا قېتىلىپ كەتكەن خۇشئاۋاز كۈلكە-چاخچاقلىرى ۋە بىر توپ كەپسىز بالىلارنىڭ«توي قىزچاق، توي قىزچاق» دېيىشىپ بىر-بىرلىرىنى تارتىشىپ ماڭا قىزىقسىنىپ قاراشلىرى،...بىرلىشىپ قەلبىمدە تەسۋىرلىگۈسىز بىر ھاياجان ھەم بەخت تۇيغۇسى پەيدا قىلدى، لېكىن بۇ ھاياجانلىق بەختلىك تۇيغۇلىرىم ئاستا-ئاستا  قورقۇنچ   تۇيغۇسىغا ئايلىنىپ كەتتى.بىردىنلا ئۆزۈمنى ئايىقى چىقماس پايانسىز بىر دەشتى-باياۋانغا قاراپ يالغۇز كېتىۋاتقاندەك ئۆزۈمنى يىگانە ھىس قىلدىم، قاتتىق يىغا تۇتۇپ كەتتى.غال-غال تىترىدىم، قىز قولدىشىم بىلىكىمدىن قاماللاپ چىڭ تۇتىۋالدى.چۈمپەردە ئىچىدىكى كۆزلىرىم قاراڭغۇلاشتى. ياقۇت مارجانلىرى يالىلداپ تۇرىدىغان چىرايلىق ئىگىز پاشنىلىق ئاپپاق ئايىقىم بولسا خۇددى بىر كىشەن پۇتۇمنى قىسقاندەك بىلىندى. ھەئە، ئۇ چىرايلىق بەتىنكەم تويلۇق ئاياق ئەمەس، بەلكى كىشەن بولۇپ پۇتۇمنى، پۇتۇمدىن باشلاپ ھەممە يېرىمنى ، گېلىمنى، نەپىسىمنى، يۈرىكىمنى قىسىشقا باشلىدى.پۇتلىرىم كالامپايلاشتى، مۆدۈرۈپ كەتكىلى تاسلا قالدىم. قولداشلىرىم مۇزلاپ كەتكەن قولۇمنى توختىماي ئۇۋىلايتتى، كۆزياشلىرىم  چىرايلىق كۆينىكىم ئۈستىدىن دومىلاپ ئېتەكلىرىم ئاستىدا دەسسىلەتتى.«ئاھ ئانا، مېنى نىمىشقىمۇ قىز تۇغقان بولغىيدىڭ، جېنىم ئانا!؟ بۇ داغدۇغىلىق تەبرىكلەشلەر ئىچىدىكى بۇ گۈزەل مىنۇتلار ھاياتىمدىكى ئۇنتۇلماس، يۇيۇلماس ۋە ئۆڭمەس كىچىككىنە بىر قىستۇرما سۈرەت بولۇپ،باشلىنىش ئالدىدا تۇرغان يېڭى ھايات ئالبومۇمنىڭ بىرىنچى بېتىدە مەڭگۈ ساقلىنىپ قالىدۇ، ئانا. ھاياجانلىق دەقىقىلەر ئېزگۈ دۇئالىرىڭلارغا قېتىلىپ ،ماڭا مەڭگۈلۈك مەھكۇملۇققا مۆھۈرلەنگەن  ئەڭ مۇقەددەس مەجبۇرىيەتنى ماڭا يۈكلەۋاتىدۇ، ئانا! مەن قورقۇۋاتىمەن، ئايال بولۇشتىن، ئانا بولۇشتىن، بۇ قەدەر مۇقەددەس ۋە ئەڭ مۇشەققەتلىك ئۆمۈرلۈك ۋەزىپەمنى مۇكەممەل  ئادا قىلىشقا ئاجىز كېلىشىمدىن قورقىۋاتىمەن.ئۇچامدىكى بۇ گۈزەل تويلۇق كىيىم ماڭا لىباس ئەمەس، بەلكى ھەممىگە تەييار تۇرىشىم كېرەكلىكىنى بىلدۈرىدىغان، مەجبۇرىيەت ۋە مەسئۇلىيەتكە ئۈندەيدىغان، ئىمان، ھايا،قەسەم ۋە ئۆمۈرلۈك  ساداقەتكە پۈركەنگەن ئىلاھىي بۇيرۇقنىڭ جەننەتكە تۇتىشىدىغان ئاچقۇچى ئىكەن، ئانا!جېنىم ئانا، قېنىسەن، كەل، قىزىڭنى يۆلىۋال!يىقىلسام ساڭا يىقىلاي، ئانا. ئانا، ماڭا  ئېيتىپ بەر،بۇ مۈشكۈل ۋەزىپىنى قانداق ئورۇنلايمەن، ئۇ مۇشەققەتلەرگە قانداق بەرداشلىق بېرىمەن؟!...
    كۆز ياشلىرىم توختىمايتتى،قانلىرىم قۇرۇپ كەتكەندەك پۈتۈن بەدىنىم مۇزلاپ، قېتىپ قالغان ھەيكەلدەكلا بوپ قالغان ئىدىم...
    بىر چاغلاردا ئانام قولۇمنى تۇتتى، باغرىغا باستى، چۈمپەردەمنى قايرىپ ياشلىرىمنى سۈرتتى، ئانام مېنىڭ ياشلىرىمنى سۈرتمەك بولدى-يۇ، جۈپ كۆزى كەلكۈن بولدى ، ياشلىرىمىز قېتىلىپ كەتتى.ئانام پىشانەمگە سۆيدى:  قىزىم، بېرىڭ، بارلىقىڭىزنى ئۆزىڭىز سۆيگەن ھەم سىزنى سۆيگەن ئادىمىڭىز ئۈچۈن بېغىشلاڭ، ئۇنىڭ بۇيرۇقلىرىنى ۋاقتىدا ئىجرا قىلىڭ.ئۇنىڭغا ھۆرمەت بىلەن سىلىق مۇئامىلە قىلىڭ، ھاياتىڭلار بەختكە تولسۇن، قىزىم.- دېدى ۋە ئوڭ قولۇمنى يېنىدا ساقلاپ تۇرغان يېڭى ئانامغا-قېين ئانامنىڭ قولىغا تۇتقۇزدى...
    قېيىنئانامنىڭ يېتىلىشى بىلەن مەرىكە زالىدىن چىقماقتىمەن، ئارقىمغا بۇرۇلۇپ ھاياتىمنىڭ ئەڭ ھالقىلىق پەيتلىرىدىكى   قىستۇرما سۈرەتلەرنى دىل ئاپاراتىمغا تېخىمۇ چىڭ ئېلىۋېلىشقا تىرىشماقتىمەن.لېكىن بوسۇقتىن ئاتلاش ئالدىدا تۇرىمەن، شۇنچە كىشىلەرنىڭ قىقاسلىق قورشاۋى ئىچىدە ئارقىمغا يەنە بىر بۇرۇلۇش مۇمكىنمۇ؟!



بۇ يازمىنى ئاخىرىدا   ئەلقىزى تەھرىرلىگەن. ۋاقتى  2014-7-12 22:01  

بۇ يازمىنى ئاخىرىدا   ئەلقىزى تەھرىرلىگەن. ۋاقتى  2014-7-13 02:56  

ئەل قىزىنىڭ تاتلىق تىللىرىدىن چاچرىغان چەشمىلەردىن يۈرەك قانىدۇ.

پاھ!  نەسرلىرىڭىزنى ئېلان قىلىپ ياخشى قىپسىز.
ئەلقىزىنىڭ خېلى يىللار ئىلگىرى بىر تۈركۈم ياخشى نەسرلىرى ھەرقايسى مەتبۇئاتلاردا ئېلان قىلىنىپ، ئوقۇرمەنلەرنىڭ ئېتىراپ قىلىشىغا ئېرىشكەن ئىدى. مانا بۈگۈن ئۆچەكتىن چىقىپتۇ.
مۇبارەك بولسۇن تۇنساگۈل!
بۇ يازمىنى ئاخىرىدا   Erchin تەھرىرلىگەن. ۋاقتى  2014-7-12 21:16  

نەسىر  دىگەن  مۇشۇنداق  تىلى  تاتلىق  بولسا  ئوقۇغۇسى  كېلىدۇ. قانداقتۇر:ئاھ،پاھ،جېنىم! دىگەندەك  شۇئارۋازلىق  ھېسسىياتى  بىلەن يېزىلغان نەسىرنى  ئوقۇغاندىن ، كۆزنى چىڭ يۇمۇپ  ئارام ئالغان ياخشى.مۇشۇنداق ئېسىل نەسىرلىرىڭىزنى  پات-پات كۆرۈپ تۇرساق  بولامۇ،تۇنساخانىم؟ بۇ يازمىنى ئاخىرىدا   چاخچاق تەھرىرلىگەن. ۋاقتى  2014-7-12 21:25  

بىرىنجى نەسىرىڭىز يۈرەكنى ئىزىپ چاناقلارغا ياش كەلتۇرسە ئىككىنجىسى ھاياتتىكى ئۇنتۇلماس ئاشۇ چاغلارنى ئەسكە سالىدىكەن.تۇنساگۇل دىل تىۋىشلىرىڭىزغا ئىغىز تاۋۇشلىرىڭىزنىمۇ قۇشۇپ قۇيۇڭ.

نەسىرچىلىكىمىزدىكى بوشلۇقنى تولدۇرىشىڭىزنى ئۈمۈت قىلىمەن،مونۇنەسىرلىرىڭىز ئارقىلىق سىزگە رەھمەت ئىتىمەن！

تاتلىق پىچىرلاشلىرىڭىزنى لىرىك مۇزىكىنىڭ رېتىمىغا ئەگىشىپ، سىزنىڭ ئاۋازىڭىزدا تىڭشاپ چىقتىم ئوماق دوستۇم!

«گۈزەللىك ئاددىيلىقتا ...»دىگەننىڭ مىسالى بوپتۇ...

«كۆزلىرىمدە كۈلكە،يۈرىكىمدە ياش»
ئانا-باشقىلارنىڭ ئورنىنى ئالالايدىغان،لېكىن ئانىنىڭ ئورنىنى مەڭگۈ باشقىلار ئالالمايدىغان ئانا.
«ئۆلگەندە ئانا دېگەندىن،ھايات چاغدا مانا دېگىن.»دەپتىكەن دانالىرىمىز.قەلب تىۋىشلىرىڭىزنى كۆزياشلىرىم بىلەن سۈيۈنۈش ئىلكىدە ئوقۇپ چىقتىم.ئانا تىلىمنىڭ سېھرى كۈچى جۈملىلىرىڭىزدە چاقناپتۇ.

مۇنىرەنىڭ ئاددىي تۇرمۇش كارتىنىلىرىنى، ئاچچىق-تاتلىق تۇيغۇلىرىنى شۇنداق يېنىك،لېرىك تىللار بىلەن تۈزۈپ چىقىدىغان ئوماق نەسىرلىرىنى بەك ياقتۇراتتىم.
بۈگۈن ئەلقىزىنىڭ قىزلارنىڭ تويى بولىدىغان، قىزلىق دوقمۇشتىن ئاياللىق مەجبۇرىيەت دۇنياسىغا يولغا سېلىنىدىغان ئالتۇن دەقىقىلەرنى نەسىرىي تىلنىڭ گۈزەللىكىدە جۇلالاندۇرۇش بىلەن بىرگە بىزنىڭ مىللىي ئىپتىخارىمىز،كىملىكىمىز بولغان كىيىم-كېچەك مەدىنىيەتنىڭ يارقىن جۇلاسىغا قوشۇپ، قىز كۆڭلىدىكى ھاياجان -قورقۇنىچنىڭ گىرەلىشىدىن تۇغۇلغان ھىسلارنى بىرلەشتۈرۈپ، ئۇلۇغ ئانىلىرىمىزنىڭ ئېسىل تەربىيە-ئۈگۈتلىرىنى مۇجەسسەم قىلغان چىرايلىق بىر كۆرۈنۈشنى ئالدىمىزدا زاھىر قىلغانلىقىدىن قەلبىم ئۆزگىچە ھاياجانغا تولدى.
ئانىغا بېغىشلانغان قۇرلاردىن مەندىن نەچچە كوچىلا نېرىدا ئولتۇرۇشلۇق بولغان ئانامنى شۇ قەدەر سېغىندىم.
بارلىق ئانىلار،ئاتىلار ئامان بولسۇن، روھى ئەرىشتىكى ئاتا-ئانىلارغا جەننىتى ئاتا بولغاي!
بۇ يازمىنى ئاخىرىدا   بەرگىيە تەھرىرلىگەن. ۋاقتى  2014-7-13 00:49  

《جەننەت ئانىلارنىڭ ئايىغى ئاستىدا 》  دىگەن گەپ نېمدىگەن ئورونلۇق ئيتىلغان ھە ！ئانامنى ئەسلەتتى  رەھمەت ！

[size=5][size=6][fسىز چەشلىگەن بۇغدايلار قېنى؟
(نەسىر)
                تۇنساگۇل بارات ئەلقىزى

قەدىرلىك دوستۇم، نەزەر تاشلاۋاتامسىز؟ ئېتىزلىقلاردا  پىشقان  ساپ – سېرىق بۇغدايلار ئاللىقاچان ئورۇلۇپ، خامانلىقتا سامىنى – سامان، بۇغدىيى – بۇغداي بولۇپ چەشلىنىپ تاغار – تاغارلارغا قاچىلىنىۋاتىدۇ. جاپاكەش دېھقان تاغىلارنىڭ پۈرۈلگەن كۆزلىرىدىكى شاتلىق ئۇڭچقۇنلىرىنى، ھەتتا بەزىلىرىنىڭ كۆز قارچۇقلىرىدا ئويناپ تۇرغان ياش دانىچىلىرىنى، ئاپتاپتا كۆيۈپ قارامتۇل تۈسكە كىرگەن يۈزلىرىدىكى چاڭ – توزانلارنى يېڭى بىلەن سۈرتكەنلىكلىرىنى، پىشانىسىدە كۆمۈشتەك يالتىراۋاتقان تەرلەرنى، قۇرۇپ كەتكەن لەۋلىرىدىكى تەبەسسۇمنى كۆرۈپ تۇرىۋاتىمىز.
قاراڭ، ئۇلار شۇنداق دەيدۇ: خۇداغا مىڭ قەتلى شۈكرى! ھەرنېمە بولسا قىلغان ئەمگەككە چۇشلۇق ئىش بوپتۇ. ئۇلار شۇنچە خوشال، شۇنچە روھلۇق، شۇنچە تېمەن! ئۇلار ئۇزۇندىن بۇيان تارتقان ئەجىر – جاپالىرىنىڭ ئەمگەك مېۋىسىدىن ھۇزۇرلىنىۋاتىدۇ. چۈنكى، بۇ – ئۇلارنىڭ ئېيتىپ تۈگەتكۈسىز مۇشەققەتلەردىن كېيىن قولغا كەلتۈرگەن مول ھوسۇلى ئەمەسمۇ؟
   ئاڭلاڭ، ئۇلارنىڭ ناخشىسى شۇقەدەر جاراڭلىق، شۇقەدەر يېقىملىق! سىزمۇ خامان ناخشىسى ئاڭلاپ  باققانمۇ؟ يۈرەكلەرنى تىترەتكۈچى بۇ ناخشا  بۇلۇتلار قاتلىمىدىن ئۆتۈپ قۇلىقىمىزغا كىرىۋاتىدۇ. ياق، يۈرىكىمىزگە ئېقىۋاتىدۇ! يۈرىكىمىزگە ئاققىنى - ئۇلارنىڭ  ئايلاپ – ئايلاپ، ھەتتا يىللاپ تارتقان ئازاپ – غۇربەتچىلىكلىرىنىڭ مۇڭ – زارى! قۇلىقىمىزغا كىرگىنى – ئۇلارنىڭ مول ھوسۇلدىن كېيىنكى شاتلىق ناۋاسى! راست، دېھقان توقىغان ھاياتلىق قوشاقلىرى قۇلاق تۈۋىمىزدە مەڭگۈ ياڭرايدۇ.
   شۇڭا دوستۇم، سىزدىنمۇ مۇنداق بىر سوئال سورىغۇم كېلىۋاتىدۇ: سىز يىللاردىن بۇيان ياشىدىڭىز، ئادىمىيلىك يوللىرىنى ئۈگەندىم دەپ ئويلىدىڭىز. ئۆيلۈك – ئوچاقلىقمۇ بولدىڭىز ياكى بولۇش ئالدىدا تۇرىۋاتقانسىز، سىزدە شۇنداق بىر نەرسە بارمۇ: ئائىلىڭىزدە دېھقانلارغا ئوخشاش، قاتتىق سوغۇقتىن، پىژقىرىم ئىسسىقتىن، ئاچلىقتىن، ئۇسسۇزلىقتىن قورقمايدىغان، جاپادىن قاچمايدىغان تەۋرەنمەس ئىرادە؟  چوقۇم مول ھوسۇل ئالىمەن دەيدىغان نىشان ھەم ئىشەنچ؟  مېنىڭچە بار. سىز مۇشۇ كۈچنىڭ تۈرتكىسى بىلەن يولدىشىڭىز ياكى ئايالىڭىز بىلەن بىرلىكتە ھايا ئۇرۇقىنى ۋاپا ئېتىزىغا  تېرىپ، مۇھەببەت مايسىلىرىنى بىخلاندۇرۇپ، غەزەپ ئوتلىرىنى يۇلۇپ تاشلاپ، سەۋر – تاقەت ئوغۇتى بىلەن ئوغۇتلاپ، مېھىر سۇلىرىڭلار بىلەن سۇغۇرۇپ، ھەمكارلىق ئاپتىپىدا پۇشۇرۇپ، كەسكىنلىك ئوغىقىدا ئورۇپ، تەر تانىسىدا باغلاپ، شاتلىق ھارۋىسىغا بېسىپ، ئىتتىپاقلىق خامىنىغا تاشلانغان ئەنجىلەرنى مېھنەت تېشىدا ئېزىپ، ئىشچانلىق ئارىسى بىلەن سورۇپ، پاكىزلىق شامىلىدا ئايرىپ، يۈرەك قېنىڭىز بىلەن چەشلەنگەن شات – خوراملىق ۋە بەخت – سائادەت بۇغدايلىرىنى قەلب تاغىرىڭىزغا قاچىلىيالىدىڭىزمۇ؟ سىزنىڭمۇ چېھرىڭىزدە خوشال كۈلكە ئوينىدىمۇ؟ سىزنىڭ شاتلىق ناخشىڭىز دېھقانلارنىڭ خامان ناخشىسىغا جۆر بولالىدىمۇ؟ سىزنىڭ شاتلىق ناخشىڭىزغا جۆرىڭىز كۈلكە سازىنى تەڭكەش قىلىۋاتامدۇ؟
   دوستم، ئەگەر شۇنداق بولسا گۈل ئۈستىگە گۈل كەلتۈرگەندەك سىز قوشلاپ مول ھوسۇل ئاپسىز . ئەكسىچە بولسا قەتئىي نىيەتكە كېلىپ، مېھنەت تەرىڭىزنى ئاققۇزۇپ، ئەجىر – جاپايىڭىز ۋە ھالال ئەمگىكىڭىز، سەمىمىي ساداقىتىڭىز ھەم دۇرۇستلىقىڭىز بىلەن سىز ئۈچۈن ئەڭ مۇھىم بولغان ئائىلە خامانلىقىڭىزدا چەشلەنگەن بەخت بۇغدايلىرىدىن مول ھوسۇل ئېلىشقا تىرىشىڭ. خۇددى ئىشچان ھەسەل  ھەرىلىرىدىن ئۈلگە ئالغان دېھقانلارنىڭ ئەجىر – مېھنىتىدەك ئائىلىدىكى مۇھەببەتمۇ كۆپ تەرەپلىمە پەرۋىشكە مۇھتاج. شۇڭا ئويلىنىپ كۆرۈڭ، مەن سىزدىن يەنە بىر قېتىم سوراپ باقاي: سىز چەشلىگەن بۇغدايلار قېنى؟![/size][/size]




[ بۇ يازمىنى ئەلقىزى تەھرىرلىگەن ۋاقتى 2014-7-13 06:25 ]

6.رومكا
(نەسىر)

تۇنساگۈل بارات ئەلقىزى

رومكا!
سەن بىر چاغلاردا ئەرلەرنىڭ قولىدىمۇ ئېھتىيات ۋە ھايا بىلەن ئايلىنىپ يۈرەتتىڭ، قاچانلاردىن باشلاپ سورۇننىڭ ‹‹ ئەتىۋارلىقى›› بولدۇڭ ۋە قانداق بولۇپ ئەرلەرنىڭ قولىدىن ئاياللارنىڭ قولىغا كۆچكەنسەن، رومكا؟
تۈرلۈك سورۇنلاردا ئۆز ئورنىنى بىلەلمەي، ھەرخىل قىسمەت، ھەرخىل مۇددىئالار بىلەن ‹‹ مەدەنىيلەشكەن›› باشباشتاق رومكا!
قىقاس – چۇقانلار ساداسى ئىچىدە سوقۇشتۇرۇلۇپ، تالىشىپ، زورلىشىپ ئىچىلىۋاتقان رومكىدىكى ئىچىملىكتە پۈچەكلەشكەن يىگىتلىكنىڭ، سۇنغان روھنىڭ، كۆتىرىلگەن شەرم – ھايانىڭ، بۇلغانغان پاكلىقنىڭ، يوقالغان نومۇسنىڭ داد – پەرياتلىرى بار...
رومكا!
سەن شۇنچە نەپىس، شۇنچە سۈزۈك، شۇنچە چىرايلىقسەن.
ئەپسۇس، ئەڭ بېزەپ، ئەڭ تېتىقسىز سۆزلەرنى قىلىشقا  سەن ئىمكان ھازىرلايسەن.
بارلىق يامان، ئەدەپسىز قىلىقلارغا سەن يول باشلايسەن.
ئۆزۈڭ كىچىك بولغان بىلەن ‹‹ كارامەت››لىرىڭ ئاجايىپ سېنىڭ. ھەر پاراسەتلىك ئادەملەرنى ئەقلى – ھۇشىدىن ئايرىپ تاشلاپ، ئادىمىيلىك تەبىئىتىدىن يىراقلاشتۇرىسەن.
ھەر سالاپەتلىك ئەزىمەتلەرنى ھۆرمەت تەختىدىن چۈشۈرگەن رومكا!
نى-نى بايلارنى گاداي قىلغان رومكا!
ھەر مەغرۇر يىگىتلەرنى مالاي قىلغان رومكا!
كىم سەن بىلەن ئۈلپەت بولسا شۇنى ئەسلى – ۋەسلىدىن ئايرىپ، يېڭى – يېڭى ‹‹تەرەققىيات››لارنى ئۇنىڭغا بىلدۈرىسەن.
ئەي رومكا!
«مەدەنىي» رومكا!
         نومۇسسىز  رومكا...
باشباشتاق رومكا!
كۈلپەتلىك چاغدا ئۈلپەتسىز رومكا!