قەلەمخان ياسىن: قەرز ھۆججىتى ( ھېكايە)

قەرز ھۆججىتى
( ھېكايە)
نۇر ئىسلام قۇربان
تۇرۇپلا ئاپامغا ئۆچ بولۇپ قالدىم . بۇ ئۆچلۈكۈم قاچاندىن باشلانغىنىنى ئېنىق بىلمەيمەن ،
لېكىن تۈنۈگۈن چۈشتە ئاپامغا چاقلىق سومكا ئېلىپ بېرىشىنى ئېيتىقىنىمدا، ئۇ ماڭا قەرز ھۆججىتى يازدۇرغان چېغىدىلا ئاپامغا ئۆچ بولۇپ قالغىنىمنى ھېس قىلدىم . مەن دېگەن ئۇنىڭ ئوغلى بولغانكىن ،ئەلىۋەتتە  مېنىڭ تەلىپىمنى شەرتىسىز ئورۇنلاپ بېرىشى ، بولۇپمۇ سومكا دېگەندەك ئوقۇش قوراللىرىنى مەن دېمىسەممۇ تەقلەپ بېرىشى كىرەكتە ! ئاپامنىڭ ئاشۇ 200 يۇەنلىك سومكا ئۈچۈن ھۆججەت يازغۇزغىنى نېمىسى ؟
             تۈنۈگۈن مەكتەپتىن قايتىىش يولىدا بالىلار بىلەن ئوينىشىپ ، مۆرەمگە ئېسىقلىق سومكامنىڭ بېغىنى قايسىبىر ساۋاقدىشىم بىرلا تارتىۋىدى ، سومكامنىڭ بېغى ئۈزۈلۈپ  كەتكەن ئىدى .ئەسىلدىمۇ ئېغىرلىقىدىن كۆتۈرۈش تەس كېلىپ تۇرغان سومكىنىڭ بېغى ئۈزۈلۈپ كەتكەنگە نارازى بولۇش ئۇ ياقتا تۇرسۇن ، ئەكسىچە چاقلىق سومكا ئالىدىغان پۇرسەت كەلدى دەپ خوش بولدۇم . ۋە شۇ ھامان ئۆيگە كىرىپ ئاپامغا :
__ ئاپا ، ماڭا چاقلىق سومكا ئېلىپ بەرگىنە ،ــ دېدىم .
__ سومكاڭ تېخى يېڭى تۇرسا ، بىر يىلمۇ بولمىدىغۇ ئالغىلى ،__ دېدى ئاپام پەرۋاسىز ھالدا .
__ قارا ، بېغى ئۈزۈلۈپ كەتتى ، كۆتۈرگىلى بولمايدۇ .
__ بېغىنى جايىغا كەلتۈرۈپ تىككۈزۋەتسەكلا بولىدىكەن ،__ ئاپامنىڭ بۇ گېپى ئەرۋايىم ئۇچقان بولسىمۇ ، سومكا ئېلىۋىلىش مەقسىدىدە ، ئۇنىڭغا ئەركىلدىم .
__مېنىڭ تاتلىق   ئاپام بولغانكىن ئېلىپ بەرگىنە ئاپا  ،ئېغىر سومكىنى  كۆتۈرەلمەي ، مۆرەم ئاغىرىيدىغان بولۇپ قالدى مېنىڭ .
__ ماقۇل ،__ ئاپام مۆرەمنى سىلاپ قويۇپ ، قەغەز –قەلەم ئەكىلىپ ئالدىمغا قويدى ،__ ئەمسە ماڭا قەرز ھۆججىتى يېزىپ بەر .
__ قەرز ھۆججىتى ؟
__ شۇنداق قەرز ھۆججىتى . بۇ مەۋسۇم ئاخىرلاشقىچە  تاپشۇرۇقنى تولۇق ئىشلەيمەن ، مەۋسۈملۈك ئىمتىھاندا چوقۇم ھەممە پەندىن 90 دىن يۇقىرى نومۇر ئالىمەن . بۇ بىر يىلدا مۇئەللىم بەرگەن تاپشۇرۇقتىن باشقا يەنە بەش پارچە ماقالە يېزىپ ئاپامغا تاپشۇرىمەن دەپ ياز .
  ئاپامنىڭ قوشۇملىرى تۈرۈلگەن ھالدا ، قەلەمنى ماڭا تەڭلەپ تۇرغان ھالىتىگە قاراپ تېخىمۇ  ئۆچلۈكۈم قوزغالدى . مەنغۇ دەرستە ياخشى . تاپشۇرۇقنى تولۇق ئىشلەش ، 90 دىن يۇقىرى نومۇر ئېلىش …دېگەنلەر ئانچە تەس ئىش ئەمەس .بىراق  ماقالە يېزىش بىلەن پەقەتلا خوشام يوق ،مۇئەللىم تاپشۇرغان چاغدىغۇ ئامال يوق يازىمەن ، لېكىن مۇئەللىم تاپشۇرۇمىسىمۇ بىكارلا ماقالە يازىمەن دەپ  نېمە قىلىمەن ئوينايدىغان ۋاقىتنى ئىسىراپ قىلىپ .مۇشۇ ئاپاممۇ ئەجەب رەھىمسىزكەن ، ئادەتتە تولا كوتۇلداپ ، مېنى ئىشقا سالغىنى يەتمىگەندەك  ، بۇ يۈكنى يۈكلەپ قويغىننى كۆرمەمدىغان . بەزىدە « مەن ئاپامنىڭ ئۆگەي بالىسىمۇ يە » دەپ ئويلاپ قالىمەن .
   ئۇنى دېسە ساۋاقدىشىم ئادىلنىڭ ئاپىسى ئۆگەي ، لېكىن ئادىلغا ھەر مەۋسۇمدە بىر قېتىم يېڭى سومكا ئېلىپ بەرگەندىن باشقا  ، كۈندە خەجلەيدىغانغا 20 -30 يۈەن پۇلنى يېنىدىن ئايرىمايدۇ . كېيگەن كىيىملىرى ساپلا داڭلىق ماركىلىق . شۇنداق بولغاچقا  سىنىپتىكىلەر ئۇنى ناھايتى  چوڭ بىلىدۇ .لېكىن  مەنچۇ ؟ ئايدا يىلدا كېيگەن بىرەر ئىككى قۇر كېيىمىممۇ ئادەتتىكى كىيىم .يا بىر خەجلەيدىغان پۇلۇمنىڭ تاينى يوق . ئاپام « كىچىك بالىلار دېگەن راھەت ، ئازادە تۇيغۇ بېرىدىغان ،ئاددى  كىيىملەرنى كېيىش كېرەك . بولۇپمۇ ئوغۇل بالىلار تېخىمۇ ئاددى ساددا بولغىنى ياخشى » دەپ نەدىكى بىر ماركىسىنىڭ تاينى يوق كىيىملەرنى ئېلىپ بېرىۋاتقان . تېخى ئالدىنقى ئايدا باللار بايرىمى كېلىش ئالدىدا ،ئاران ياساتقان مودا چېچىمنى كۆرۈپ ئاچچىقلاپ ، ساتىراچخانىغا قولۇمدىن يېتىلەپ ئەكىرىپ چېچىمنى قىسقارتىۋەتتى . ئادەتتە ئاچچىقى يامان سۈرلۈك كۆرۈنىدىغان داداممۇ ، ئاپامغا ماسلىشىپ« ئوغۇل بالا دېگەن ئوغۇل بالىدەك بولۇشى كېرەك ،چېچىڭنى بۇنداق غەلىتە ياسىتىۋالساڭ بولمايدۇ » دەپ ئاپامغا يان بېسىپ كەتتى . مېنىڭ چاچ پاسۇنىمنىڭ ، كىيىملىرىمنىڭ ئوغۇل بالا بولۇشۇمغا نېمە تەسىرى بار ؟؟؟ ئويلىسام ، ئويلىسام ئىچىم سىقىلىدۇ . مەكتەپتىن قايتىپ ، تۈگىمەس تاپشۇرۇقلارنى ئاران ئىشلەپ ،ئەمدى «ئوھ» دېيىشىمگە ، ئاپام كېلىپ : « پايپىقىڭنى يۇيىۋەت ، گالاستۇكۇڭنى قاتلاپ ئېلىپ قوي ، سومكاڭنى جايىغا ئاس » دەپ يوليورۇق بەرگىنى ئاز كەلگەندەك ، بەزىدە تېخى ئۇكامغا رەسىملىك كىتابلارنى ئوقۇپ بېرىشكە  بويرۇيدۇ .مېنىڭ  بۇنداق كىتابلاردىن نەچچىنى ئوقۇپ يىرتىپ بولۇپ يەسلىدىن چىققىنىمنى ئۇنتۇپ قالغاندەك . ئۇنىڭغىمۇ مەيلى دەي ، بىراق ئۆي ئىشلىرىغا ياردەملىشىپ بېرىشىم پەقەتلا كاللامدىن ئۆتمەيدۇ  . مەن يا قىز بالا بولمىسام  ئۆي ئىشلىرىنى ئۆگۈنىدىغانغا  . تېخى ، « داداڭ بىلەن ئىككىمىز سېنىڭدەك ۋاقتىمىزدا ئۇنى قىلاتتۇق ، بۇنى قىلالايتتۇق » دەپ مېنى ئۆزلىرىدىن ئۆگىنىشكە دەۋەت قىلىدۇ . كىم ئۇلارنى شۇ كونا زاماندا تۇغۇلۇپ قالسۇن دەپتىكەن ، ئۇلارنىڭ جاپا تارتىشىغا مەن سەۋەبچى بولمىسام يا !!ھەيرانمەن ، سۈرلۈك سالاپىتى بىلەن ئاپامنى ئەيمەندۈرەلەيدىغان دادامنىڭمۇ بۇنداق چاغدا ئاپامنى قوللاپ ، يان بېسىپ كېتىشى قىزىق . ئۇلار ئىككىسى بىرلىشىۋالمىسا ماڭا تاقابىل تۇرالمامدىكىنە ؟!
      مەيلى قانداقلا بولمىسۇن ، ئاپامغا ھۆججەت يېزىپ بەرگەن ئىكەنمەن ، چوقۇم ھۆددىسىدىن چىقىشىم كېرەك . دادامنىڭ «ئوغۇل بالا ،ئەركەك » دېگەن سۆزى بويىچە ، ئاپامنىڭ ئالدىدا «ئوغۇل بالىقىمنى »نامايەن قىلىپ ، ئۇنى ئېغىز ئاچالماس قىلىۋەتسەم ياخشى ئەمەسمۇ .
      بىرىنچى پارچە ماقالەمنى يېزىپ ئاپامغا تاپشۇرغىنىمدا ، ئۇ ماڭا سۆز جۈمىللەرنىڭ باغلىنىشى ، ماقالە مەزمۇننىڭ باش ئاخىرى ماسلاشقان بولۇشى …دېگەندەك موئەللىمدىن تولا ئاڭلاپ  يادا بولۇپ كەتكەن سۆزلەرنى قىلىپ  ، يازغان ماقالەمنىڭ ئۇ يەر بۇ يەرلىرىنىڭ ئاستىنى  قىزىل قەلەمدە سىزىپ  قايتۇرۇپ بەردى . ئىككىنچى ،ئۈچىنچى قېتىملىق ماقالەمنى يازغاندا  بىرىنچى قېتىمدىكى قايتا –قايتا ئۆزگەرتىشتەك سەۋەنلىكنى قايتا سادىر قىلماسلىق ئۈچۈن ، خېلى ئەستايىدىللىق بىلەن يېزىپ ، ئۆزەم قايتا قايتا ئوقۇپ تۈزەتكەن بولغاچقا  ، ئاپامنىڭ چىرايىدىن رازىمەنلىك تۇيغۇسى ئەكس ئېتىپ ،قىزىل قەلەمنى ئانچە كۆپ ئىشىلتىپمۇ كەتمىدى .  
     قاپىقى يامان   ئەدەبىيات ئوقۇتقۇچىمىزنىڭ « نۇر ئىسلام ماقالە يېزىشتا تىز ئىلگىرلىدى » دەپ ماختىغىننى ئاڭلاپ ، « ئاپامغا ھۆججەت يېزىپ بەرگىنىممۇ ياخشى بوپتىكەن » دەپ ئويلاپ ، تۇنجى قېتىم ئاپامدىن خۇشال بولدۇم .
شۇ كۈنلەردە ئۆزەممۇ يېزىقچىلىققا ئانچە –مۇنچە قىزىقىپ قالغاچقا ، تۆتىنچى قېتىمدا نەچچە بەتلىك ھىكايىدىن بىرنى يېزىپ ئاپامغا تۇتقۇزدۇم  .جىممدە ئولتۇرۇپ ئوقۇشقا كىرىشىپ كەتكەن ئاپامدىن « يەنە نېمە گەپلەر چىقىدىكىن »دەپ  كۈتۈپ ئولتۇرغىنىمدا ئاپا تۇيۇقسىزلا ئورنىدىن تۇرۇپ ، مېنى باغىرىغا باستى :
__ يارايسەن ئوغلۇم ، راستىنلا يارايسەن ! سېنىڭ ئەدىبىياتتا تالانتىڭ بارلىقىنى مەن بۇرۇنلا بايقىغاچقا ، سىاڭا مۇشۇ ۋەزىپىنى تاپشۇرغان ئىدىم . ئاخىرى تالانتىڭنى جارى قىلدۇرالىدىڭ .
   ئەزەلدىن تەمكىن ھالەتتە تۇرىدىغان ئاپامنىڭ بۇنچىلىك ھاياجانلىنىپ كەتكىننى كۆرۈپ ، خوشلۇقتىن ئاغزىم يۇمۇلمايلا قالدى . ئاپامنىڭ « ئەدىبىياتتا تالانتىڭ بار »دېگەن سۆزىنىڭ تەسىرىدىنمۇ ياكى يېزىقچىلىق ھۆجەيرەم تېشىپ چىقتىمۇ ، بىر ھەپتىدىن كېيىن مەكتەپ بويىچە ئۆتكۈزۈلگەن ئەدىبى ئىجادىيەت پائالىيىتىدە ، مەن يازغان ھېكايە ئىككىنچى بولۇپ باھالاندى .بۇخوش خەۋەرنى دادام بىلەن ئاپامغا تېزرەك يەتكۈزۈش ئۈچۈن ئۆيگە كەلگىنىمدە ، ئاپام يوق ، دادام ئاشخانىدا تاماق ئېتىۋاتقان  ئىدى .
__ ئاپام  قېنى ؟__ ئاشخانىغا ئاسانلىقچە ئاياق بېسىپ قالمايدىغان دادامنىڭ پەشتاما تاقاپ تاماق ئېتىۋاتقانلىقىنى كۆرۈپ ھەيرانلىق بىلەن سورىدىم .
__ ئاپاڭ دوختۇرخانىدا .سەل تۇرۇپ ئۇنىڭغا تااماق ئېلىپ بارىمەن ، بىللە بارامسەن ؟
__ ئاپامغا نېمە بوپتۇ ؟
__ ئاغىرىپ قاپتۇ . دوختۇرلار بالنىسقا ئالدى .
بايىقى قىزغىنلىقىم بىردىنلا يوقاپ ، يېلى چىقىپ كەتكەن توپتەك بوشاپلا كەتتىم .
دادام بىلەن بالنىسقا كىرگىنىمىزدە ئاپام كىسەللەر كارۋىتىدا ياتاتتى ، ئۇنىڭ ئۈستىدىكى ئاپئاق يۇتقاندىن چىقىپ تۇرغان يۈزلىرى تاتارغان ، كالپۇكلىرى ئاقىرىپ قالغاندەك كۆرۈنەتتى .
__ نېمە بولدۇڭ ئاپا ،__كارۋات يېنىغا كېلىپ  ئاپامنىڭ يۇتقان ئىچىدە تۇرۇپمۇ مۇزلاپ كەتكەن قوللىرىنى تۇتتۇم ،__ مىجەزىڭ يوقما ؟
__ چوڭ ئىش يوق . ئاشقازىنىم ئازراق ئاغىرىپ قېلىۋىدى ، دوختۇرلار بىر قانچە كۈن ئوكۇل سالىمىز دەيدۇ .
  ئاپامنىڭ سارغىيىپ كەتكەن يۈزى ۋە ئولتۇرۇشقان كۆزلىرىگە قاراپ ، نەچچە ۋاقىتتىن بېرى ئۇنىڭغا ئۆچلۈك قىلىپ يۈرگىنىمدىن خىجىللىق ھېس قىلىپ ،كۆزلىرىمگە ياش كەلدى .
__ ئەدىبى ئىجادىيەت پائالىيىتىدە ئىككىنچى بولدۇم ئاپا ،__ دېدىم كۆزۈمدىن ئەگىپ تۇرغان يېشىمنى ئاپامغا كۆرسەتمەسلىككە تىرىشىپ .
__ شۇنداقمۇ ؟ ــ ئاپام تىتىرەپ تۇرغان قوللىرى بىلەن بېشىمنى سىلىدى ،__ مەن كۆرگەن ھىكايەڭنى قاتناشتۇرغانمىدىڭ ؟
__ ياق ، باشقىنى يازغان .
__ يارايسەن بالام ، ئاپاڭنىڭ سېنى تالانتى بار دېگىنى بىكار ئەمەسكەندە ،__ دېدى داداممۇ بېشىمنى سىلاپ ،__ كىلەر قېتىم چوقۇم بىرىنچى بولالايدىغىنىڭغا ئىشىنىمەن ،
  دادام بىلەن ئۆيگە قايتىپ كېلىپ ، ئاپامنىڭ كوتۇلداشلىرى ئاڭلانماس بولۇپ قالغان ئۆيدە غېرىپسىنغاندەك بولۇپ قالدىم . ئۇكامنى ئۇخلىتىپ قويۇپ چىققان دادام تاپشۇرۇقۇمنى ئىشلەپ بولغاندىن كېيىن ، بالدۇرراق ئۇخلىشىمنى تاپىلاپ ، بىر دۆۋە  ماتېرىيال ئىچىگە چۆكتى . ئۆينىڭ ئىچى چىۋىن ئۇچسا ئاڭلانغىدەك جىمجىت . «پايپىقىڭنى يۇيىۋەت ، نەرسە –كىرەكلىرىڭنى رەتلەپ قوي »دېگەن ئاۋاز ئاڭلانمىغاچقا ، ئۆزەمنى ئازاتقا چىققاندەك ھېس قىلىپ ، ھەممە نەرسىلىرىمنى جايىدىلا تاشلاپ ئۇيقۇغا چۈشۈپ كەتتىم . بىراق
   ئەتىسى ئەتىگەندە گالاستۇكۇمنى ، مەكتەپ كارتىسىنى تاپالماي نەچچە پېقىراپ يۈرۈپ تاس قالدىم مەكتەپكە كېچىكىپ قالغىلى  .ئۇنىڭ ئەتىسى مېنى تېخىمۇ نەس بېسىپ ،  شۇنچىدىن تەكشۈرمىگەن ئوقۇغۇچىلار شەخسى تازلىقىنى تەكشۈرۈپ ،ئىككى كۈندىن ئالماشتۇرمىغان پايپىقىمنى كۆرگەن سىنىپ مەسئولۇمدىن يەتكۈچە تەنقىد ئاڭلىدىم .دادام خىزمەت ئورنى ، ئۆي ، دوختۇرخانا ئارلىقىدا قاتىراپ يۈرگەندىن سىرت ، ئۇكامنى يەسلىگە ئاپىرىپ ئەكىلىش زىممىسىدە تۇرسا مىنىڭ كېيىملىرىمگە باش قاتۇرۇشقا نەدىمۇ چولىسى بولسۇن ؟ ئاپامنىڭ دېگىنىدەك مەن دېگەن ئون ياشتىن ئاشقان ئوغۇل بالا تۇرۇپ ئۆزەمنىڭ كېيىمنىڭ پاكىزلىقىغا ئۆزەم كاپالەتلىك قىلالمىسام قانداق بولىدۇ ؟
__ ئاپام قاچان قايتىپ كېلىدۇ دادا ؟
__ ئاپاڭ پات قايتىپ كىلەلمەيدۇ . ئاز دىگەندىمۇ يەنە ئون بەش كۈن ياتىدۇ .
__ ئاپامنىڭ كېسىلى شۇنچە ئېغىرما ؟
__ ئۇ ئاشقازان يارىسى بولۇپ قاپتۇ . شۇڭا ئۇزاقراق داۋالانمىسا بولمايدۇ .
__ ئاشقازان يارىسى ؟ــ  يارا دىگەننىغۇ بىلىمەن ، لېكىن ئاشقازاننىڭمۇ يارا بولۇپ قالىدىغانلىقىنى ئەمدى ئاڭلاۋاتىمەن . ئۆتكەندە پۇتۇمغا يارا چىقىپ قېلىۋىدى ، ئاغىرىقنىڭ دەستدىن ماڭالماي قالمىدىممۇ ؟ ئاشقازان يارىسى بولسا قانچە ئاغىرىيدىغاندۇ ھە ،__ نېمىشقا ئۇنداق كىسەل بولۇپ قالىدۇ دادا ؟
__ تاماقنى ۋاقتىدا يىمەسلىك ،سوۋۇپ قالغان ، ئېشىپ قالغان تاماقنى تولا يىگەنلىكتىن ۋە باشقا سەۋەبلىرىمۇ بار .
  شۇندىلا ئاپامنىڭ دائىم ئۇكام ئىككىمىزنىڭ ئاشۇرۇپ قويغان تامىقىنى ئىسىتىپ يەيدىغانلىقى  ئېسىمگە كەلدى .
__ ئاپاڭنى ئېشىپ قالغان تاماقنى يىمەڭ دىسەم ، تاماقنى تۆكىۋەتسەم يامان بولىدۇ دەپ تۇرۇۋالاتتى . مانا ئەمدى...ئاغىرىپ قالدى .  
__ مەن چۈشەندىم دادا ،ئەمدى تاماقنى ھەرگىزمۇ ئاشۇرۇپ قويمايمەن . ئۆزەمنىڭ ئىشلىرىنى ئۆزەم قىلىمەن . __ كۆزلىرىمدىن تۆكۈلگەن ياشنى تۇتۇۋالالماي ، دادامنىڭ باغىرىغا تاشلاندىم ،__ ئاپامنىڭ قەدىرىگە ئەمدى يەتتىم . ئۇنىڭغا ئەمدى ئۆچلۈك قىلمايمەن .
  ئۇخلاش ئۈچۈن خېلى ئۇزۇن يېتىپمۇ ئۇيقۇم كەلمىدى . ئاپامنىڭ چىرايى كۆز ئالدىمغا كېلىۋىلىپ ، ئۇنى سېغىنىشىم كۈچىيىپ ئاستا ئورنۇمدىن تۇرۇپ چىراقنى ياقتىم . سومكامدىن قەغەز قەلەمنى ئېلىپ ماقالە يېزىشقا تۇتۇندۇم .بۇ  ئاپامغا يېزىپ بەرگەن قەرز ھۆججىتىمدىكى بەش پارچە ماقالىنىڭ ئاخىرقى پارچىسى ئىدى . ئاپامنى سېغىنىپ ئولتۇرۇپ يازغان بۇ ماقالىنى كۆرسەتسەم  ئاپام چوقۇم خۇشال بولىدۇ .ئۇنىڭغا ماقالەمنىڭ بۇنىڭ بىلەنلا توختاپ قالمايدىغانلىقى ، ئىمتىھان نەتىجەمنىڭ بۇ مەۋسۇمدىلا ئەمەس ، بۇنىڭدىن كېيىنمۇ مەڭگۈ توقساندىن چۈشمەيدىغانلىقىنى،  ئاپامنىڭ دېگىنىدەك ئۇكامغا ئۈلگە بولالايدىغانلىقىمنى ،  شۇنداقلا  ئۆز ئىشىمنى ئۆزەم قىلالايدىغان «يىگىت » بولغىنىمنى ئېيتسام ئاپام چوقۇم ساقىيىپ كېتىدۇ .

تۈگىدى .

بۇ يازمىنى ئاخىرىدا   شېرىن1 تەھرىرلىگەن. ۋاقتى  2015-8-10 18:27  

بۇ ھىكايىڭىزنى ئوقۇپ يېڭىچە پىكىرنىڭ بارلىقى مىنى سۆيۈندۈردى ،قەلىمىڭىز بەرىكەتلىك بولسۇن !

ئۇتۇقلۇق چىققان ھىكايە بوپتۇ.

ھىكايىڭىز راسلا ياخشى چىقىپتۇ،بۇ ھىكايىدىن مەنمۇ ئەقىل تاپقاندەك بولدۇم،پەرزەنىتلەرگە «قەرىز ھۆججىتى»يازدۇرۇش بۇلۇپ قالىدىغان ئامالمۇ نىمە؟!

ھېكايەمنى ياقتۇرغان ئەزىزلەرگە رەھمەت .

مەن شۇنداق قىلغان . ئۈنۈمى ياخشى بولىدىكەن .

مېنىڭ تاتلىق   ئاپام بولغانكىن ئېلىپ بەرگىنە ئاپا  ،ئېغىر سومكىنى  كۆتۈرەلمەي ، مۆرەم ئاغىرىيدىغان بولۇپ قالدى مېنىڭ .
__ ماقۇل ،__ ئاپام مۆرەمنى سىلاپ قويۇپ ، قەغەز –قەلەم ئەكىلىپ ئالدىمغا قويدى ،__ ئەمسە ماڭا قەرز ھۆججىتى يېزىپ بەر .
__ قەرز ھۆججىتى ؟
__ شۇنداق قەرز ھۆججىتى . بۇ مەۋسۇم ئاخىرلاشقىچە  تاپشۇرۇقنى تولۇق ئىشلەيمەن ، مەۋسۈملۈك ئىمتىھاندا چوقۇم ھەممە پەندىن 90 دىن يۇقىرى نومۇر ئالىمەن . بۇ بىر يىلدا مۇئەللىم بەرگەن تاپشۇرۇقتىن باشقا يەنە بەش پارچە ماقالە يېزىپ ئاپامغا تاپشۇرىمەن دەپ ياز .

بۇ ھېكاينىڭ مۇۋاپپىقىيىتى بىلەن سىزنى مۇبارەكلەيمەن!

ھەقىقەتەن تەسىرلىك يېزىلىپتۇ، ناھايىتى تەسىرلەندىم !

تەسىرلىك ئىكەن، ياقتۇردۇم.

ھېكايىنىڭ مەيلى مەزمۇنى بولسۇن، مەيلى قۇرۇلمىسى بولسۇن ھەر جەھەتتىن بەك ياخشى چىقىپتۇ. بولۇپمۇ تەربىيىۋى ئەھمىيىتى خېلىلا يۇقۇرى ھېكايە بوپتۇ.

      سىڭلىم شىرىن ؛ مەن ھىكايىڭىزدىن سويۇندۇم، مېنىڭچە، ھىكايىنىڭ ماۋزۇسىنى يەنە بىر ئويلۇشۇپ باقسىڭىز قانداق ؟ ''  قەرز  ھوججىتى '' دىيلسە سەلبى تەسىر بېرىپ قويىدىكەن ،ئەگەر مۇۋاپىق كورسىڭىز ''  قەرىز  '' دىيلسە ياكى '' توختام ''،  '' مۇكاپاتلىق توختام '' دىگەندەك بولسا ، ياخشىراق بولارمىكىن. يەنە بىر گەپ، بالىلارنى مۇشۇنداق تەربىلەش ئۇسۇلىنى تەكىتلەشنىڭ زورۇريىتى بارمۇ -يوق ؟  ئاخىردا،سەمىڭىزگە سېلىپ قويىدىغىنىم، ھىكايىدىكى پىرسۇناژ '' مەن '' تېخى كىچىك بالا، شۇڭا ئۇنىڭ تىلىدا بېرىگەن دىئالوگلار چوڭلار تىلىدا ئەمەس بەلكى كىچىك بالىلار تىلىدا بېرىلىش كېرەك ! بۇنى سىزمۇ چۇشىنىسىز ئەلۋەتتە ! بۇ تەكلىبىم  ئورۇنسىز بولسا ،قۇبۇل قىلمىسىڭىزمۇ بولىدۇ !

تورداشلارنىڭ پىكىر بەرگىنىدىن ناھايتى خۇرسەن بولدۇم .

پىكىرىڭىزنى قۇبۇل قىلىمەن ئاتەش ئاكا ، نېمىشقىكىن مۇشۇ ماۋزۇ قويۇشقا تازا ئېپىم يوق ، مەكتەپتە ئوقۇۋاتقان چاغدىمۇ يازغان ئەدىبىيات ئوقۇتقۇچۇم :«ھېكايىنى ياخشى يازغىنىڭ بىلەن ماۋزۇنى ياخشى قويالمايسەن »دەيتتى .
تەنقىد پىكىرلىرىڭىزنى ئايىماسلىقىڭىزنى ئۈمۈد قىلىمەن .

    قەلىمىڭىز  ئىسىم- شەرىپىڭىزدەكلا يېقىملىق ، تېتىملىقكەن ، بىر ئوقۇپلا تۈگىگىنىنى بىلمەيلا قاپتىمەن . ماۋزۇسىمۇ  ‹‹ ئوبرازلىق ›› ، قاراتمىلىق قويۇلۇپتۇ . تەگسىز ئويلارغا سېلىپ قويدى ئادەمنى ............. بۇ يازمىنى ئاخىرىدا   ئا.جۇدۇن تەھرىرلىگەن. ۋاقتى  2015-4-8 13:02