«تەھرىرلىكتە تىل سەنئىتى» دېگەن تېمىدا لېكسىيە سۆزلەندى

           2014-يىلى 5-ئاينىڭ 28-كۈنى  چۈشتىن بۇرۇن ، شىنجاڭ مائارىپ نەشرىياتىنىڭ تەكلىپىگە بىنائەن پېشقەدەم ژۇرنالىست، ئۇستاز مۇھەررىر، تالانتلىق شائىر، ئەدىب مۇھەممەت شاۋۇدۇن ئاكا شىنجاڭ مائارىپ نەشرىياتىغا كېلىپ «تەھرىرلىكتە تىل سەنئىتى» دېگەن تېمىدا لېكسىيە سۆزلىدى. شىنجاڭ مائارىپ نەشرىياتى ئۇيغۇرچە دەرسلىك بۆلۈمى، «شىنجاڭ مائارىپى»ژۇرنىلى ئۇيغۇر تەھرىر بۆلۈمى، «شىنجاڭ مائارىپ گېزىتى» ئۇيغۇر تەھرىر بۆلۈمى، «پەرۋاز» ژۇرنىلى ئۇيغۇر تەھرىر بۆلۈمىدىكى مۇھەررىرلەر ۋە مۇناسىۋەتلىك رەھبەرلەر لېكسىيەنى كۆڭۈل قويۇپ ئاڭلىدى ۋە مۇھەممەت شاۋۇدۇن ئاكىنىڭ 40 نەچچە يىللىق مۇھەررىرلىك ھايىتىدا يەكۈنلىگەن قىممەتلىك تەجرىبىلىرىدىن بەھىرلەندى. مۇھەممەت شاۋۇدۇن ئاكا ئۆز لېكىسىيەسىدە،  ئۆزىنىڭ ئۇزۇن يىللىق تەھرىرىلىك ھاياتىغا بىرلەشتۈرۈپ تەھرىرلىك ئىلمى، تەھرىلىك ۋە ئەسەر تەھىرىرلەش ماھارىتى، تەھرىرلەرنىڭ نۆۋەتتىكى بۇرچى ھەققىدە ئەتراپلىق توختىلىش بىلەن بىرگە، نۆۋەتتە ھەرقايسى مەتبۇئاتلاردا ئېلان قىلىنىۋاتقان ھەم تەھرىرلىنىپ چىقىۋاتقان خەۋەر، ماقالە، ئەدەبىي ئەسەرلەردە كۆرىلىۋاتقان كېسەل جۈملىلەر، مەجرۇھ ئاتالغۇ ۋە تېرمىنلار، قەدەمدە بىر ئۇچراۋاتقان ئىملا خاتالىقىلىرى، ئانا تىلىمىزنى قەدىرلەشنىڭ مۇھىملىقى ، تەھرىرلەرنىڭ ئانا تىلنىڭ ساپلىقىنى قوغداشتىكى يۈكسەك مەسئۇلىيىتى ھەققىدە پاكىتلىق ھەم قايىل قىلارلىق سۆزلەپ ،  يىغىن ئىشتراكچىىلىرىنىڭ قىزغىن ئالقىشىغا مۇيەسسەر بولدى ھەم ئۇلارنى تەھرىرلىك ھەققىدە ئەمەلىي بىلىمگە ئىگە قىلدى. لېكسىيەدىن كېيىن، شىنجاڭ مائارىپ نەشرىياتىنىڭ مۇئاۋىن باش مۇھەررىرى تۇنىياز ئىلياس ، ئۇيغۇرچە دەرسلىك بۆلۈمىنىڭ مۇئاۋىن مۇدىرى ۋاھىتجان ئوسمان قاتارلىقلار ئۆز قاراشلىرىنى بايان قىلدى ھەم كۆپچىلىك نامىدىن ئۇنىڭغا چوڭقۇر تەشەككۈر بىلدۈردى. ئاخىرىدا «شىنجاڭ مائارىپى» ژۇرنىلىنىڭ مۇھەررىرى تاھىرخالىق مۇھەممەت شاۋۇدۇن ئاكىغا : پېشقەدەم تەھرىر (مۇھەررىر) لەرنىڭ بىر-بىرلەپ دەم ئېلىشقا چىقىشى ۋە بىز بىلەن ۋاقىتسىز ئايرىلىشى سەۋەبلىك ، ھازىرقى  تەھرىرلەر قوشۇنىدا ياش تەھرىرلەرنىڭ كۆپىيىۋاتقانلىقى، ئەمما ئۇلارنىڭ تەھرىرلىك ئېستىداتى ۋە تەھرىرلىك ماھارىتىدە ئاز بولمىغان مەسىلىلەرنىڭ ساقلىنىۋاتقانلىقىنى كۆزدە تۇتقاندا، تەھرىرلىك ئىلمى ھەققىدىكى قورال كىتابلارنى كۆپلەپ تۈزۈش-نەشر قىلىشنىڭ مۇھىملىقى، مۇمكىن بولسا، مۇھەممەت شاۋۇدۇن ئاكىنىڭ پېشىۋا تەرجىمان توختى باقى ئارتىشىنىڭ ئۇسلوبى بويىچە، ئۆزىنىڭ 40 نەچچە يىللىق تەھرىرلىك ھاياتىنىڭ خۇلاسىسى سۈپىتىدە « قانداق تەھرىرلەش كېرەك » دېگەن ماۋزۇ ئاستىدا بىر كىتاب يېزىپ چىقىش ھەققىدە سەمىمىي تەكلىپ بەردى. تاھىرخالىقنىڭ بۇ تەكلىپىنى مۇھەممەت شاۋۇدۇن ئاكا خۇشاللىق بىلەن قوبۇل قىلدى ھەم ئۇنى تىرىشىپ ۋۇجۇتقا چىقىرىدىغانلىقىنى بىلدۈردى.

ئۇستاز مۇھەممەد شاۋۇدۇنغا ئالى ئېھتىرام...خەۋەرلەندۈرگۈچى جاپاكەش مۇھەرىر ،دوستۇم تاھىر خالىققا تەشەككۈر!

ئۇستاز مۇھەممەد شاۋۇدۇنغا ئۇزۇن ئۆمۈر تىلەيمەن....تاھىر خالىق   ئەپەندىنىڭ  مېھنىتىگىمۇ تەشەككۇر بولسۇن!

بەكمۇ ياخشى ئۇيۇشتۇرلۇپتۇ ،ھەممىڭلارغا  سالام بولسۇن ……

تاھىرجاننىڭ يۇقارقى تەكلىپى ئىنتايىن ئورۇنلۇق بوپتۇ...

ئۇستازلارنىڭ تېنىگە سالامەتلىك ،ۋە ئۇزۇن ئۆمۈر تىلەيمەن.

ئۇستاز مۇھەممەد شاۋۇدۇنغا،قەلەم تۇلپارىنى مەغرۇر چاپتۇرۇپ،مەنزىلى ئۈچۈن ھېرىش-چارچاشلارنى ئۇتۇغان«مائارىپ نەشىرياتىدىكى تۆھپىكارلارغا ئالىي ئېھتىرام...تىنىڭلار سالامەت،خىزمىتىڭلار نەتىجىلىك،تۇرمۇشىڭلار كۆڭۈللۈك ھەم خاتىرجەم ئۆتسۈن...!