سېرگىي يېسىنىن شېئىرلىرىدىن
تەرجىمە قىلغۇچى : باتۇر روزى
كېچە
دەريا تىپ-تىنچ ئۇيقۇغا كەتكەن،
شاۋقۇنلىماس پىنھان ئارچىزار.
توختاپ قالدى كۈيلەشتىن بۇلبۇل،
چىلىمايدۇ خورازمۇ زىنھار.
كېچە ئەتراپ تىپ-تىنچ،ئەتراپ،
ئېرىق ئۇسۇل ئوينايدۇ لەرزان.
ئاي سەپكەندە نۇرىنى بىردىن،
گۈزەللەشتى كۆمۈشتەك جاھان.
كۆمۈش نۇرلار چاچماقتا ئېرىق،
كۆمۈش نۇرلار چاچماقتا دەريا.
كۆمۈش نۇرلار چاچماقتا يەنە،
يىشىل چۆپلەر تاقىر دالىدا.
كېچە ئەتراپ تىپ-تىنچ،ھەممە،
ئۇخلىماقتا-چۈشەكەر ھەريان.
ئاي نۇرىنى چاچقاندا بىردىن،
گۈزەللەشتى كۆمۈشتەك جاھان.
ئالۇچا
نەۋقىران ۋە يۇمران ئالۇچا،
باھار كەلسە ئاچىدۇ چىچەك.
ئالتۇنرەڭلىك شاخلىرى ئۇنىڭ،
يېيىلىدۇ ماڭلاي چېچىدەك.
تېمىپ تۇرار شىرنىلىك شەبنەم،
ئالۇچىنىڭ قوۋزىقى بويلاپ.
ساقىندىسى كۆمۈشرەڭ ئىچرە،
خۇش ھىدلىنىپ تۇرار يالتىراپ.
تاۋار كەبى چىچەك بەرگىدە،
يالتىرايدۇ مەرۋايىت شەبنەم.
چاقنىغاندەك ھالقىلار،ئۇنى،
سەتەڭ قىزلار ئاسقىنىدەك ھەم.
ئاخىرقى قار يۈتكەن يەرلەردە،
يىلتىزلارغا تۇتاش چۆپلەردە.
باردۇر بىر يول-كۆمۈشرەڭ ئېقىن،
ئاقار چۈشۈپ خۇشال سەپەرگە.
چىقىرىدۇ ئالۇچا ياپراق،
خۇش ھىدلىنىپ قىلار مەپتۇن مەس.
ئالتۇنرەڭلىك شەبنەم يۇقىدا،
ئەكس ئىتەر كۈن نۇرى بىر پەس.
ئېرىقلاردا چىچەكلەپ بۇژغۇن،
سۆيۈپ ئۆتەر شاخلارغا چاچراپ.
يار يېنىدا ساز چالسا ئېرىق،
كۈيلەپ كىتەر ئالۇچا ياڭراپ.
كۆكنىڭ زەڭگەر تاۋىقى ئۆزرە
كۆكنىڭ زەڭگەر تاۋىقى ئۆزرە،
يېيىلماقتا تۇمانلار قويۇق.
كېچە تىمتاس،ئۇيقۇدا ھەممە،
پەقەت مېنى باستى دەرت-خورلۇق.
تەۋرىگەندە كېرىلىپ بولۇت،
قاندى ئورمان خۇشپۇراق ھىدلاپ.
بارمىقىنى سۇنغاندا قاپتال،
كەتتى كۆكتە نۇر جامى يامراپ.
كۆكقۇتاننىڭ پىسىلداشلىرى،
سۇ يۈزىنى كىزەر سازلىقتا.
بۇلۇتلارنىڭ كەينىدىن چىقتى،
تامغان سۇدەك بىر يۇلتۇز تەنھا.
بۇلۇت ئۆزرە قويۇۋەتسەم ئوت،
يولتۇز بىلەن قېلىن ئورمانغا.
كۆيۈپ كەتسەم بىللىلا كىيىن،
چاقماق كەبى مەنمۇ ئاسماندا.
ۋاقىت قاناتلىق شامال ھارۋىسى،
يامغۇر ئوقتەك چېچىلار تەكشى.
لەيلەر ھوجرام بۇلۇتلار ئۆزرە،
ئۇ توزۇتتى يۇمران چىچەكنى.
ئۇ ئاسماننى يەنچىدى يەنە،
يامغۇر ئوقتەك چېچىلار تەكشى.
گۈلدار جىيەك تۇتار بۇلۇت ئاسمانغا،
تۇمانلاردىن تارىماقتا خۇشپۇراق.
ھارۋا ئىچرە تۇرماقتىمەن چايقىلىپ،
يۇرت سازلىقى قالدى مەندىن كۆپ يېراق.
ئورمان تىمتاس،چەكمەس پىغان،يوق شاۋقۇن،
سايىلىرى يەلپۈنىدۇ رومالدەك.
ئاچچىق خىيال دائىم مېنى قىينايدۇ،
ئەزىز يۇرتۇم ياقماي قالدى دىتقا بەك.
ئاق ئارچا قىز پېتىپ قالدى ھەسرەتكە،
ھارۋام مېنىڭ كۈيلىمەكتە پەرۋاسىز.
مەن ئۆلگەندە دەپنە قىلسۇن زىندانغا،
كارۋاتقىلا ياتقۇزىلاي غەۋغاسىز.
ئاق ئاي، ئاپئاق قار
ئاق ئاي، ئاپئاق قار
ئاق لىباسقا پۈركەندى دىيار،
ئورمانلاردا ئاق چىچەك
ئاق چىچەكتەك ئاق قىيىن يىغلار؛
ئاھ، بۇيەردە ئۆلگەندۇ كىملەر؟
ياكى مېنى يۇتماقچىمۇ يەر؟
خەير يۇرتۇمنىڭ سىرلىق ئورمىنى
خەير يۇرتۇمنىڭ سىرلىق ئورمىنى،
خەير-خوش ئەي ئالتۇنرەڭ بۇلاق
مەغلۇپ بولار شەپشەك بۇلۇتلار،
ئۇچرىغاندا قوياشقا پارلاق
ئىھ، ساپ ھاۋا قانغۇچە نۇرلان،
مەن ھەم خۇشال ھەم دەرتلىك ئەمما
ئۆتۈگۈمنىڭ قونچىغا ئەمدى،
پىچاق تىقىپ قويمايمەن ئەسلا
ياتماقتىمەن يانپاشلاپ تايغا،
يارقىن كېچە ئۆتمەكتە ئاستا
كىشنىسىمۇ تايچاق زىل ۋە شات،
تولماس تېخى ئورمانغا سادا
كۆك ئىشىكنىڭ غايىپ ھالقىسى،
سىلكىندۇ تىنماي تاراقلاپ
بوران-چاپقۇن ئۆرلەر ھايالسىز،
يەر سۈرتىلىپ كىتەر يالتىراپ.
كۈيلىمىدى بىكارغا شامال
كۈيلىمىدى بىكارغا شامال،
يامغۇرمۇ ھەم ياغمىدى قۇرۇق
بىر سىھرى زات يارقىن نۇر بىلەن،
كۆزلىرىمنى نەملىدى قويۇق
كەلسىدى دەپ كەرەملىك كۆكلەم،
زۇلمەت ئىچرە ئەتمەكتىمەن يات
پايانى يوق گۈزەل قىرغاقلار،
ئەمدى ماڭا بولۇپ قالدى يات
ئۈنسىز ئېقىن ئېزەلمەس دىلنى،
قورقىتالماس يۇلتۇزلۇق ئاسمان
سۆيگەن كەبى ئۆيۈمدە مەشنى،
سۆيۈپ كەلدىم تىنچلىقنى ھامان
بۇندا ھەممە مىھرىبان بۈيۈك،
بار تەشۋىشكە ئۇرالغان بىر ئاي
كۆكنار گۈلدەك كەچكى ھال شەپەق،
يالتىرىغان سۈزۈك ئەينەكتەك،
سۇ يۈزىگە نۇر چاچار تىنماي
قارا، ئاشلىق پايانسىز دېڭىز،
كۆز ئالدىڭدا لەيلەر بىر سىماھ
ئاشلىق ئىمەر پەسەيگەن كۆكنى،
ئوت يالىغان موزايدەك گويا
قەيەردە سەن ئەي كىچىك ھوجرام
قەيەردە سەن ئەي كىچىك ھوجرام،
يارلىقتكى مىھرىبان يۆلەك؟
ئاھ، ئادەملەر ئىز باسماس ئاسمان
ئاھ،قەيەردە زومرەترەڭ چىچەك؟
قەيەردە سەن ئەي كىچىك ھوجرام؟
كۈيلىمەكتە ئۇياقتا خوراز،
مالچى بالا باقماقتا پادا
بىراق كۆكتە يۇلتۇزلار چاقناپ،
سۈزۈك سۇغا چاچماقتا شولا
كۈيلىمەكتە ئۇ ياقتا خوراز
ۋاقىت قاناتلىق شامال ھارۋىسى،
سائەت كەبى سىلجىماقتا ئاي
سىم-سىم يامغۇر ئۇچقۇر دەملەردەك،
ئارچىزارغا تۆكۈلەر تىنماي
ۋاقىت قاناتلىق شامال چارۋىسى
يامغۇر ئوقتەك چېچىلار تەكشى،
لەيلەر ھوجرام بۇلۇتلار ئىچرە
ئۇ توزۇتتى زۇمرەت چىچەكنى،
ئۇ ئاسماننى يەنچىدى يەنە،
يامغۇر ئوقتەك چېچىلار تەكشى.
ئىشىنىمەن،بەخىت بار جەزمەن
ئىشىنىمەن،بەخىت بار جەزمەن،
تېخى ئۆچۈپ كەتمىدى قوياش
پوپ بەرمەكتە شەپەقتىن خەۋەر،
تاڭ شەپىقى قىزارتقاندا قاش،
ئىشىنىمەن بەخىت بار جەزمەن
زەر مىسال؛روس جاراڭلا،ياڭرا،
دولقۇن ياسار تىنىمسىز شامال
كىم كۈلدۈرسە مىسكىن مالچاڭنى،
ئۇ راھەتكە يەتكەي بىمالال،
زەر مىسال روس جاراڭلا،ياڭرا
سادا بىرەر ھەسرەتلىك ئېقىن،
دولقۇنىدا يۇلتۇز شولىسى
ئەل بەختىچۈن قايغۇرماقتىمەن
قەدىرلقكتۇر ماڭا ھەممىسى،
سادا بىرەر ھەسرەتلىك ئېقىن
.
مەن يۇرتۇمنىڭ كەنجى شائىرى
مارنىكوفقا ئاتاپ
مەن يۇرتۇمنىڭ كەنجى شائىرى،
شېئىېىمنى خاتىرلەر كۆۋرۈك.
كۆيدۈرىمەن-قىيىن دەرىخى
خوشلاشقاندا ئىسرىق سەپ تۈزۈك.
تەندىن پۈتكەن ،ياندۇرۇلغان شام،
تۈگەپ كىتەر يالقۇنلار ئىچرە.
ئاسما سائەت دۈگلەكتۇر ئايدەك،
چىك-چىك ئاۋاز بىرىدۇ كىچە.
يېشىل دالا، چىغىر يوللاردا،
تۆمۈر مىھمان كۆرۈندى ئۇچقۇر.
تاڭ شەپىقى دەممۇ-دەم بەردى،
مايسىلارغا زەررە-زەررە نۇر.
يوچۇن، جانسىز خارابە يەرلەر،
كىرگۈزەلمەس كۈيسىزلەرگە جان.
شۇڭا پەقەت مايسىلار،ئاتلار
چال ھەسرىتى كۈيلىنەر ھامان.
ئات كىشنىسە ئوت ئىمەر شامال،
ۋە سالىدۇ ماتەملىك ساما.
ئاسما سائەت ئايلىنار تىز-تىز،
بىرەر تۈنگە چىكىلداپ سادا.
ئۆچۈپ قالدى زەڭگەر رەڭ يالقۇن
ئۆچۈپ قالدى زەڭگەر رەڭ يالقۇن،
ئۇنتۇلدى ھەم شۇ يېراق ۋەتەن.
پاك سۆيگۈنى كۈيلەپ تۇنجى رەت،
ياۋۇزلۇقتىن بەزگەنمەن شۇ دەم.
چۆلسىرىگەن گۈلزارمەن گويا،
مەس قىلغانتى مېنى كۆپ مەي،يار
ئۇسۇل ئويناپ كۈيلەپ ھەۋەستە،
ئۆتكەن ئۆمرۈم مەنىسىز-بىكار.
ئەجەل ئىزدەپ تىكىلدىم ساڭا،
سېرىق كۆزۈڭ گويا چوڭقۇر ھاڭ.
ئۆتكەن ئىدىڭ سەن مېنى سۆيمەي،
بولماي ھەمدە ئۆزگىگە جانان.
يېقىن ئەكەل زىلۋا قەددىڭنى،
جاھىل كۆڭلۈم تونۇشقۇ ساڭا
ئۇ بوپ قالدى مۇلايىم ئەمدى،
مۈتھەملىك يار ئىدى ئاڭا.
ئەمدى مەڭگۈ ئۇنتۇلار قاۋاق،
شېئىرنىمۇ يازمايمەن ئۇنداق.
ئۇنتالمايمەن مامۇق بىلەكنى،
كۆز رەڭگىدەك چېچىڭنى بىراق.
مەن مەڭگۈگە سەن بىلەن بىللە،
مەيلى يۇرۇتتا،مەيلى يات يەردە.
پاك سۆيگۈنى كۈيلەپ تۇنجى رەت،
ياۋۇزلۇققا قايتۇردۇم زەربە.
كەل سۆيۈپ قوي،سۆيۈپ قوي مېنى
كەل سۆيۈپ قوي،سۆيۈپ قوي مېنى،
سۆي ئاغرىتىپ،لەۋدىن چىقسۇن قان
كېرەك قىلماس قايناق دىل-چەشمەم،
تەمكىنلىك ۋە ئەقىل ھېچقاچان
نىسىۋىمىز بولسۇن-بولمىسۇن،
مەي ئىچەيلى قۇرىغىچە جام
بىز ياشايمىز دۇنيادا بىر رەت،
بىردەملىكتۇر بىزگە بۇ جاھان
نىگاھ تاشلا ئەتراپقا تىمتاس،
ئورار ئاينى نەملەشكەن تۈتەك
ئاي ئايلىنار زېمىننى تىنماي،
بۇلۇت ئىچرە سېرىق ئۆردەكتەك
كۈي تاراتقان سېنىڭ پاك روھىڭ،
كەل،سۆيۈپ قوي،قانسۇن بۇ يۈرەك
چۇقىلاردا يۈرگەن شۇ ئەرۋاھ،
ئەجىلىمدىن بەرمەكتە دىرەك.
ئاھ،كۈن ساناپ يۈتمەكتە دەرمان،
ئۆلسەم ئەگەر ئاشۇنداق ئۆلەي
ئارمىنىم شۇ-يۈتكىچە نەپەس،
لەۋلىرىڭگە لەۋ سۈرۈپ ئۆتەي
زەڭگەر رەڭلىك ئۇيقۇدا ھەردەم،
ئىرىپ كەتمەي،ھېس قىلماي ھەم ئار
ياپراقلارنىڭ شىلدىرى ئىچرە،
مەن سېنىڭ دەپ ئۈن كىلەر تەكرار
چاقنار مەيدە لىپمۇ-لىق كۈپۈك،
يالتىرايدۇ، يوقىماس پەقەت
ئىچكىن-ئىچكىن سۆيۈملۈك دىبەر،
بىز ياشايمىز دۇنيادا بىر رەت
ئولتۇرايلى ئامرىقىم بىللە
ئولتۇرايلى ئامرىقىم بىللە،
تويۇۋالسۇن كۆز-كۆزگە تەكرار
ئاڭلىۋالاي نىگاھلار ئىچرە،
بوران كەبى ھوۋلايدۇ ھېسلار
كۆز ئالدىمدا ئۆرۈلگەن بوز چاچ،
كۆز ئالدىمدا كۈز--زەررەڭ سىماھ
بىر چاتاقچى بىكار تەلەپنى،
قۇتقۇزىدۇ ئاشۇلار گويا
قويغان ئىدىم يۇرتۇمنى تاشلاپ،
ئۇندا ئورمان، يايلاقتا چېچەك
دەرتلىك شەھەر ئىشرىتى ئىچرە،
بەتتام تۇرمۇش ئۆتتى باشتىن بەك
يۈرگىمدە يادلىنار زورغا،
يۇرتۇمدىكى چىمەنزار ۋە ياز
ئۇندا پاقا كۈيلىرى ئىچرە،
بوغان ئىدىم شائىر-قۇشاقۋاز
ئاھ، ئۇ يەردە رەڭ تۈزمەكتە كۈز،
رۈجەك ياپقان بۇتى ۋە ئىرەن
خاتىرەمدىن بالىلىق ئىزلار،
شاخلار كۆككە بوي سوزۇپ تىرەن
ئۆلۈپ كەتكەن بالىلىق شۇنداق،
قەبرىگەئاي نۇر سىپەر تال-تال
ئاي يورۇتقان كېرسىتلار ئەمدى،
بولار بىزگە سەيلىگاھ دەرھال
ئىسسىق-سۇغۇق كۆپ ئۆتتى باشتىن،
يەنە گۆرگە ماڭىمىز ھەي-ھەي
يول-يوللاردا ياسىسۇن دولقۇن،
تىرىكلەرگە خۇشاللىق ۋە مەي
ئولتۇرايلى ئامرىقىم بىللە،
تويۇۋالسۇن كۆزگە-كۆز تەكرار
ئاڭلىۋالاي نىگاھلار ئىچرە،
بوران كەبى ھوۋلايدۇ ھېسلار
ئىسىمدە
ئىسىمدە بار، ئىسىمدە جانان،
يالتىرايتى چاچلىرىڭ-بوران
تەقدىر بىزگە بەخىش ئەتتى ھىجران،
يۈرىگىمدە ئاچچىق دەرت-پىغان
ئىسىمدە بار، ئىسىمدە جانان،
ئاق قىيىنلار شىلدىرلاپ تۇرغان
يۈتسە دەيتىم كۈندۈزنى چاپسان،
چاچسۇن دەيتىم ئاينى نۇر ھامان
ئىسىمدە بار، دىگەنتىڭ شۇ دەم؛
«ئۆتمۈش بولۇپ قالار بۇ دەملەر
يارىم مېنى ئۇنتۇيسەن ھامان،
يات بىر قىزغا بولۇپ جانجىگەر»
چېچەكلىرى پۇتۇلار يەنە،
قىينار مېنى پۇشايمان دەردى
ئىدىم ئۇ چاغ نەقەدەر نازۇك،
باشلىرىڭغا چاچقان نۇر كەبى
يات دىللاردا روھى يۈك سۆيگۈ،
ئۇ قەلبىمدە سۇۋۇماس پەقەت
سۆيەلىسە يات دىللار سەندەك،
ئاڭلىغاندەك يارقىن بىر چۆچەك
كىتەر ئىدىم شاتلىنىپ قەۋەت
بۇ يازمىنى ئاخىرىدا Erchin تەھرىرلىگەن. ۋاقتى 2014-5-25 22:55
|