1
جەمالىڭ ۋەسفىدىن ئالەم ھامان ھەيرەتتە قالمىشتۇر،
پەرىلەر سالپىيىپ چېھرىڭ پايانىدا ئۇيالمىشتۇر.
سۇلايمان دەۋلەتى دەۋرەپ كېلەر بولسا نىگاھىڭدىن،
يىتىرقاپ بارچە ھەيۋەتتىن چۈشۈپ باشىنى سالمىشتۇر.
نېچە قات تون لىباسلاردىن نىھال قەددىڭنى كىم كۆرگەي،
لېكىن ھۇش ئەھلى ھېسلاردىن ئېشق ھېدىڭنى ئالمىشتۇر.
شامالدا يەلپۈنىپ زۇلفىڭ كۆڭۈللەر مۈلكىنى ئالسا،
ساڭا خىزمەتكە قول باغلاپ كېتەرلەردىن ھايالمىشتۇر.
كوھىقاف باغرىدا ھۆرلەر ھەسەتتىن ھەم ئوقۇر ئەفسۇن،
بىراق تەسىر قىلىپ بولماس پەقەت زارلاشتا تالمىشتۇر.
ۋۇجۇدى بۇلغىنىپ قەلبى خىرەلىكتە يۈرۈپ كۆنگەن،
ساڭا غەپلەتتە قول سۇنسا يۈزى يەرگە سۇۋالمىشتۇر.
تامامى ئەھلى ئاشىقنىڭ پىراقىنى يېغىپ كەلسە،
مېنىڭ ئىچكەن ئېشىم ئوغا ئۇلارنىڭ دەردى بالمىشتۇر.
ماجالىم يوق قاچارغا ھېچ ساياقلار قوغلىسا ھەر ئان،
قەلەندەرگە قىلۇر ھىممەت ئىشىكلەر ھەم تاقالمىشتۇر.
ئايا ساقىي بۈگۈن بەگزات بوسۇغاڭدا بولۇر مەستخۇش،
جۇدالىق غەمزىدە بىرجام شارابىڭغا ئۇۋالمىشتۇر.
2
ئىلاھا رەھمىتىڭ چەكسىز كېلىپ كەتمەككە نەۋبەت بەر،
قولۇمدا ئېشقى مەيزاب بار ئانى ئىچمەككە رىغبەت بەر.
پىغانىم ئۆرلىگەن دەمدە ۋۇجۇدۇم لەرزىگە كەلمىش،
ئەگەر ئاشىق قىلار بولساڭ ماڭا كۆيمەككە رۇخسەت بەر.
دىۋەيلەپ دىۋىلەر گۈرزە سالار باشىمغا ھەر ياندىن.
گەدالىق يولىدا مىڭلاپ ئازاب چەكمەككە پۇرسەت بەر.
پەقەت جەننەت تاماسىدا ساڭا سەجدە قىلۇر زاھىد،
ئېشىق سەۋداسىغا جانان يۈزىن كۆرمەككە ھىممەت بەر.
تەسەررۇپ مۈلكىدە مەن قۇل تىلىم زىكرىسىدا ئىسمىڭ،
ۋىسال جامىغا قول سۇنماي بىغەم يۈرمەككە كۈلپەت بەر.
سىياقىمنى كۆرۈپ ئىتلار قاچار مەغرىبۇ مەشرىققە،
كۆڭۈل مۈلكىدە ئول سۇلتان ھۆكۈم سۈرمەككە شەۋكەت بەر.
ياناي تۈنلەر ئاراشامدەك غارايىپ كەچمىشىم ئولدۇر،
ۋاپا لەۋزىدە مىڭ جانغا ۋىسال سەپمەككە خىسلەت بەر.
غېرىپ چۆللەردە سەرگەردان بولۇرغا شاھ قىلۇر پەرمان،
ماڭا ھىجران ئازابىدا يۈرۈپ ئۆلمەككە رېھلەت بەر.
زامانەڭ ئەھلى بىلمەستىن قىلۇر بەگزاتقا كۆپ دەشنام،
تۇتۇپ مەنسۇر كەبى دارغا ئېسىپ بەرمەككە ئۈلپەت بەر.
3
ئەي كۆڭۈل جانان بۈگۈن كەتمەكتەدۇر،
ئۆزگىلەر كەتمەكنى ئۆرگەتمەكتەدۇر.
چۇن ماڭا زەخمەت بېرۇر بۇ قىلمىشى،
شۇندا ھەم ھېجراننى كۆرسەتمەكتەدۇر.
كۆپ زامان يۈردۈم ئاڭاباغلاپ ئۈمىد،
ۋاھ ئەجەب ئول كىم تامان يەتمەكتەدۇر.
تۈن ئارا چۈشلەرگە قىلدىم ئىلتىجا.
باغرىما قاقشالنى كۆكلەتمەكتەدۇر.
ياشلارىم يامغۇر كەبى چۈشكەن مەھەل،
نەچچەلەپ دەريانى ئۆلچەتمەكتەدۇر.
مەيخانا ئىچرە ھۇشۇمنى يوق قىلىپ،
شۇنچە يالۋۇرسام قۇلاق ئەتمەكتەدۇر.
ئاھ دېسەم بەگزاتنى كۈلگە قاتقىلى،
ئوتلارى ئاھىمنى ئۆرلەتمەكتەدۇر.
4
ئەي سابا يار ھالىنى بىلسەڭ خەبەر بەرگىل ماڭا،
تىڭلابان خەستە دىلىم تاپقاي ئارام كىم مەرھابا.
ئول پەرى مىژگانلەرىن باغرىمغا ئاتقان ئوقلارى،
قويمىدى ھالىمنى ھېچ ئىزدەپ تاپالماسمەن داۋا.
كۆزلەرى جادۇ بولۇپ قىلغان مېنى ھەم تىلسىمات،
نە قىلاي بىر سۆز بىلەن ئاشىقلىقىم بولدى بالا.
كۈلكىسى مەستخۇش قىلۇر ئىچكەن كەبى مىڭ جام شاراب،
چېھرىدىن ساقىپ چۈشەر تاكى قۇياشقا ئول زىيا.
زۇلفىدىن كۆردۈم كېچە ھەر ئان ئاڭا باش ئەگمىشىن،
قاشلارى خەنجەر گۇيا تىلغاپ يۈرەكنى چۇن يارا.
گەر لىباسى تەگسە ھەم ئۈنگەي ھېسابسىز لالەلەر،
قامەتى سايەسىدىن زىبالىقى بولغاي ئادا.
ئىزلارى چۈشكەن جەزىرە شۇل مەھەل بوستان بولۇر،
نەپسىدىن بارچە ئۆلۈك گۆردىن قوپۇپ قىلغاي نىدا.
ئاھ يۈرەك بەرداش بېرۇرغا قالمىدى ھېچ تاقىتىم،
بىر ھالاۋ چىقسا شۇئان بولغاي جىسىم ھەم ئىنتىھا.
ئەي سابا يەتكۈز كۈلۈم ھېدلارىنى ئول يار تامان،
قىلدىلەر بەگزات پەقەت كۆيمەك بىلەن جاننى فىدا.
بۇ يازمىنى ئاخىرىدا بەگزات تەھرىرلىگەن. ۋاقتى 2014-5-16 20:58