ماياك ئىزلەش
دېڭىزنىڭ
ئەڭ ئاخىرقى ئەركىن چاقنىشىدا
ئازابلىق چىرايى ئەكىس ئەتتى،
جۇدالىكتىكى شەپەقتە
تەنھا كېمە ماڭغاندا.
زاۋالنىڭ كۆزى لىققىدە ياش،
تەشۋىش گۇمان ئىچىدە.
ئەتمەكتە تەقدىم كېمىگە
سايىسىنى ،قەدىمىي ئۇدۇمىنى.
كىم ئۇ خوشلاشقاندا
قاقاقلاپ كۈلگەن چېقىپ ئەينەكنى؟
چىقىۋېلىش ئۈچۈن ئەركىنلىكنىڭ سىرتىغا
كىم ئۇ سۈكۈتتە ماڭغان؟
ئەرۋاھلارنىڭ كەينىدە ئەنسىزلىككە
قامالغان رىۋايەتكە ئايلىنىپ.
قاراڭغۇلۇق يېمەكتە
يورۇقلۇقنىڭ ئىزىنى
خۇددى تەكلىماكاننىڭ قوينىدا
سۇ ئوينىسا،كۈلسە ،يىغلىسا
ئاۋازىنى ھېچكىم ئاڭلىمىغاندەك.
كېمە ئۈزۈپ ئوينايدۇ
دولقۇنلار ئارا،
سايىسىنى تۆكۈلۈپ گۈل بەرگىدەك
يوقالماقتا بارا-بارا.
ئۇندا بىر توپ كىشى
تۇرماقتا كەينىگە قارا-قارا،
ئۇنتۇپ كۆپ نەرسىنى
ئۇلارنىڭ نېمىلىگىنى بىلمەي يانا.
2
دولقۇنلار يۆگىشىپ ئوينايدۇ ئۇسۇل
كېمىنىڭ تېنىگە،خىيالىغا.
سەپەرگە ماڭغانلار قىلار تەنتەنە،
يېتىمىز دەپ دۇنيانىڭ پايانىغا.
ئۇلار مەست بولدى
چۈشىدە ئىچكەن شاراپتىن.
رېئاللىق ئىچىدە ئەمەس
قېتىپ قالغان سىرتىدا.
كېمە
كېمە، كېمە
ئالدىغا ماڭغان كېمە،
كەينىگە يانغان كېمە.
ياكى بىر ئىزىدا توختىغان كېمەن.
كېمە
بىر ۋەتەندۇر دېڭىزدا
ئۆز قۇرۇقلىقىدىن ئايرىلغانلار ئۈچۈن.
قاراڭغۇ تارىخ ،
شەكىلسىز كەلگۈسى
ئارلىشىپ كەتكەن ئېسىدە.
ئۇلار ئۇخلىشى كېرەك،
لېكىن زادى ،زادىلا
چۈش كۆرمىسۇن،
ئۇلار ئويلىشى كېرەك،
ئەمما ئەسلا خىيال سۈرمىسۇن.
ئۇلار ياشىشى كېرەك،
ئەمما ئۆلۈشتىن بۇرۇن
كېمىنى يەتكۈززسۇن مەنزىل –نىشانغا.
3
قاراڭغۇلۇق ئۇزۇندىن ئۇزۇن
سوزۇلغاندۇر كېمىنىڭ
جابىلقاسىدىن جابىلساسىغىچە.
بۇ قەدىمىي ئەرۋاھنىڭ
ئويغىنىش پەيتىدۇر يەۋەتقان
تىرىلىش ئۈچۈن ئاسمان-زېمىننى
دەججالغا ئوخشاش.
ئۇ ئۇنتۇپ كەتكەن
ياكى يوقىتىپ قويغان
ئەڭ گۈزەل ھەمدە قۇدرەتلىك
ئۆزىنىڭ ئۇلۇغۋار سايىسىنى.
ئۇ ئىشەنمىگەن يوقلۇقنىڭ
سايىسى بولمايدىغانلىقىغا،
ھەمدە ھەممىنىڭ بىردىن ئۆزگىرىپ
ئەسلىگە ئوخشىماي قالغانلىقىغا.
ئاھ،بۇ ئالغا ئىلگىرلەش
ياكى چېكىنگەنگە ئوخشاش.
سۇنىڭ تىلىنى
چۈشەنمىدى ھېچكىم .
قاراڭغۇلۇقنىڭ ئاۋازىنى
سەزمىدى ھېچكىم.
كېمىدىكىلەر ھاياجانغا چۆمگەن.
پۇت-قوللىرى بەئەينى
توساتتىن قىزغىن ئىستەك كەبىي
پەيدا بولغان بەلگىدەك
كۆكلەپ كەتكەن ئورمانلارغا ئوخشىغان.
ئاھ،يۇمشاق دولقۇننىڭ
يېنىككىنە سوقۇلىشى...
4
ئالغا،ئالغا
زۇلمەتلىك كېچە،قاراڭغۇ كېچە،
كۈچۈكتەك يۇمشاق تېنىنى
سۈركەپ ئەركىلەۋاتقان كېچە.
ۋەھىمىگە تولغان دەھشەتلىك شادلىقىنى
سىلىقلىغۇچى مايدەك
كېمىنىڭ تېنىگە سۈركىگەن كېچە.
كۆزىنى يۇمۇپ تاشلانغانغا ئوخشاش
كۆرمەي،بىلمەي ئېرىشىپ
ئېرىشكەندىن كېيىن ئۈمىدسىزلەندۈرگەن
....كېچە.
قۇملۇقتەك ئۇزۇن سوزۇلغان
نام-نىشانسىز ئۆلۈكتەك قاتقان
كېچىدىكى دېڭىزدا
دېڭىزدىكى كېچىدە
كۆزىنى ئاچتى بىر توپ سەرگەردان.
-قايان كەلدۇق؟...
-قايان ماڭىمىز؟...
ھەممە سۈكۈتكە تولغان.
-ماياك؟ ...
ۋارقىرىدى بىرەيلەن.
قېنى؟...قېنى؟...
«ماياك بولۇشى كېرەكتى»
-قېنى ئۇ ماياك؟
ھەممە ياق يورۇق .
ھەممە ياق قاراڭغۇ.
ماياكنى كۆرگىلى بولمايدۇ.
نىشانسىز ماڭغىلى بولمايدۇ.
ئۇزۇندىن ئۇزۇن تالاش-تارتىش.
-ئوڭغا ماڭايلى،
ماياك دادامدا قالغان.
-سول تەرەپكە ماڭايلى،
ماياك بالامدا قالغان.
-ئالدىمىزغا ماڭايلى،
ماياك يولۇمدا قالغان.
-كەينىمىزگە يانايلى،
ماياكنىڭ بارلىغى يالغان.
ھەممە تەرەپكە مېڭىشنىڭ باردۇر ئاساسى،
ھېچ تەرەپكە ماڭماسلىقنىڭمۇ
باردۇر سەۋەبى.
كېمىنىڭ تاختايلىرىنى چۇۋۇپ،
بىرىمىز بىردىن تاختايغا ئولتۇرۇپ،
ھەركىم ماڭسۇن خالىغان تەرەپكە،
كېمىنى ،دېڭىزنى ھەم ماياكنى ئۇنتۇپ.
ياق ...
سەن ساراڭ،
كېمىنى بۇزۇشقا بولمايدۇ ھېچ.
دېڭىز خەتەرلىك تۇرمايدۇ تىچ.
ئىلاج يوق
نۇر چاچمىسا نۇرلۇق ماياك،
بەسى مۈشكۈل
باشقا چۈشسىمۇ قىلىچ.
قېنى سەن ماياك؟
نۇر چاچقىن ئىتتىك.
روھىم ئۈمىدۋار
جۇشقۇن ھەم تىتىك.
كېچە توختىماي
ئېيتىدۇ غەزەل.
ئامال يوقمىدۇ
تۆلىمەي بەدەل؟
|
ۋاقتى: 2014-4-5 13:21:55
