يۈسۈپجان قىيىمغا ھەسپىھال: ئابدۇخېلىل مىرخېلىل

ئابدۇخېلىل · ۋاقتى: 2014-3-20 18:26:06


	يۈسۈپجان قىيىمغا ھەسپىھال يازغۇچىلار تورىدا يېقىندىن بېرى كۆپ قىرلىق ماھارەت يېتىلدۈرگەن شۆھرەتلىك قەلەم ساھىبى يۈسۈپجان قىيىم شاۋكەت رۇستەم بىلەن يېزىشقان شېئىرى چاقچاقلىرىدا مېنىمۇ يېقىن كۆرۈپ بەزىبىر كۆڭۈل سىرلىرىنى بايان ئەيلىگەن ئىدى. مەن بۇ بىرگە ماھىر، كۆپكە قادىر قەلەم ساھىبى ئىنىمىزنىڭ ياخشى تىلەك، خالىس نىيەتلىرىگە جاۋابەن ئۇشبۇ نامىنى يوللاشنى لايىق كۆردۈم. شۇڭا باشقۇرغۇچىلارنىڭ ئىدىيىسىددىن ئۆتسە تەستىقلاپ قويۇشىنى ئۈمۈد قىلىمەن. سىزگە زادى نېمە بولدى بىر ئېيتسىڭىز يۈسۈپ ئۇكام، ئۇچرىغاننى بۇقىدەكلا يۈرىسىزغۇ ئۈسسۇپ ئۇكام، ھەسپىھالنىڭ ئېرىقىدا كەلمەكتەسىز ئۈزۈپ ئۇكام، يەنە سوراي ئالدىڭىزكىن نېمىلەرنى سۈزۈپ ئۇكام، تۈك ئۈندۈرۈپ تۇخۇملاردىن سورۇنلارنى تۈزۈپ ئۇكام. تۇرغىنىمنى تۇيمىدىڭىز خېلىدىن كى زەنجىر يىغىپ#، يۈرىكىڭىز كەتمىدىمۇ كەلمىش قازادىن دىر-دىر ئېغىپ، كۆرگۈلۈكتىن كەتسە ئەمدى كۈلكىڭىزگە قارلار يېغىپ، سىزگە كىملەر كۈلكىلەرنى بېرەر ئەمدى كىمدىن سېغىپ، ئاغىڭىزمۇ چىقماقچىدۇر زەنجىرنى بىر ئۈزۈپ ئۇكام. چېھرىڭىزدىن رەڭلەنگەچكە لەۋلىرىڭىز قىزىرىپتۇ، سۈرمە تارتىپ قاپاقلارغا قاشقا قەلەم سىزىلىپتۇ، جالا- جالا كىرپىكلەرمۇ رەت- رەت بولۇپ تىزىلىپتۇ، سىز كەبىيلەر ھۇزۇرىدا زادى كىملەر تىزلىنىپتۇ، ئاغىڭىزمۇ ئويناپ قويار شۇنداق رەڭنى سۈزۈپ ئۇكام. بارچە خەككە كۆپتىن ئايان ئاشۇ يوغان كالپۇكىڭىز، كار قىلامتى ئاغىڭىزغا بۇ قەسلىبان چاپۇتىڭىز، شۇمۇ توردا ھەسپىھالدىن ئەيلەپ كەتكەن ئاخۇتىڭىز، ئۈگۈتىدىن كۆپكەن يەنە كۆرۈڭ ئەنە پاخۇتىڭىز، قاپىيەنى قوغلىشىڭدە ھەم جايىدا تۈزۈپ ئۇكام. ئىلگىرىمۇ يۈرگەنتىڭىز، كۆيمەي ئۆرگە ئوتىلىرىڭىز، كى مىنسىڭىز ماشىنىنى، چۈشمەي دائىم خوتلىرىڭىز، بىسلىرىنى داتلار باسقان، كەسمەس ياغاچ چوتلىرىڭىز، نەچچە ئوراپ باغلىسا چىڭ، بەلدە تۇرماي ھەم پوتىڭىز، سۇيى لەشلىك كونا كۆلدە، كى يۈردىڭىز ئۈزۈپ ئۇكام. كى ئوڭۇشلۇق ئېچىلغانتى، بىر چاغلاردا سوتىڭىزمۇ، ھەممە ياقنى قاپلىغانتى، شەپشەك ئاتتەك مودىڭىزمۇ، ئۆرۈكىڭىز مىڭ قاق بولۇپ، ئاققان ئىدى سودىڭىزمۇ، ھەممىمىزنى قالدۇرۇپ تاڭ، ناقناقلاپ بەل- يوتىڭىزمۇ، شۇ نېسىۋە بولمايىن ساپ، كى كەتتىغۇ توزۇپ ئۇكام. نىرۋا، يۈرەك ئاغرىقىدىن، يوقالغانتى خۇدىڭىزمۇ، تازا كۈچەپ كەتكەن ئىدى شىۋىرغانلىق جۇتىڭىزمۇ، نىجاسەتتە بۇلغانغانتى، سىز قېتىلغان سوتىڭىزمۇ، سىزگە زادى ئارام بەرمەس، ئوڭشالدىمۇ خوتنىڭىزمۇ، ئۇزىراتقان شۇ كالپۇكنى، ھەر بىر كېچە سوزۇپ ئۇكام. قايسى يىلى قىپ قالدىڭىز، ۋاھ پۇلنى دەپ قەلەيچىلىك، قەھرىتانلا كۈچەپ كەتسە، سىز قىلىسىز پەلەيچىلىك، تېلىفۇندا دېگەنتىڭىز، قىلساق ئاكا بىر ئەمچىلىىك، قىلىڭ ئۇكام، سىز قىلمىغان، قالغان پەقەت بىر رەمچىلىك، نېمە قىلماڭ كويچەن پۇلنى، ئالدىڭىزغۇ سۈزۈپ ئۇكام. تىلنى تىركەپ كى قويۇپسىز، كۈيۈ بالام زەپەرىگە، بۇ قىلىقلار قاپتۇ ئوخشاپ ، ئۆچكەن ئۆڭى دەرپەردىگە، نەكىن ئەيلەش تەۋەككۈللۈك، مۇنچە ئۆلۈم خەتەرىگە، ھايتلا دىسەم ئىشلار چاتاق، مەخمۇت بىلەن جەپەرىگە، كى چىقسىڭىز ئەمدى چىقىڭ يەڭنى چىڭراق تۈرۈپ ئۇكام. زورلىغانتىم كوپتتىن بېرى مەن ئۆزۈمنى سەۋرىلەرگە، قويدىڭىزغۇ تۆھمەت بىلەن، پىقىرنىمۇ جەۋرىلەرگە، كۆمگىلىمۇ تاس قالدىڭىز ، ئۆسەك قوشۇپ قەۋرىلەرگە، بوۋا بولۇپ كەتسەممۇ مەن، ئەلگىياردەك نەۋرىلەرگە، نېمە قىلغان سىزگە مەن ھەم، قەدەمدە بىر ئۈسسۇپ ئۇكام. قان تۆكمىلىك سوقۇشلاردا، مەن ۋاك دېگەن خوراز ئەمەس، پەمى پەسرەك دېھقان تۇرۇپ، سالغان خاتا پوراز ئەمەس، گۇندىسىغا باچكا قويغان، كى قايچىسىز جۇۋاز ئەمەس، سىزگە ئوخشاش ئاچىسىنىڭ، ئېرى قازاق ئوراز ئەمەس، ھە گەپ قىلىڭ بولسا ئاڭلاي، سىنارىست يۈسۈپ ئۇكام. يازغىنىڭىز بولمىدىغۇ توردىن مېنى قوغلاندى دەپ، مەن دېدىمغۇ ئۇشبۇ تىلدىن تەستەكلىرىم چوغلاندى دەپ، بۇ ھەزىلدە مەن غېرىپقا تۆھمەت- قارا جۇغلاندى دەپ، ئەل دىمەسمۇ بۇ ئاداشنىڭ ھەم سۈلكىتى دۇغلاندى دەپ، شۇڭا دەيمەن ھەرقاچانكى گەپنى قىلىڭ سۈزۈپ ئۇكام. بۇ قىساسنى نەۋرىلەرگە تاشلاش ماڭا خاسمۇ ئەمەس، چالغانلىرىم جەڭ دۇمبىقى داراڭلىغان داسمۇ ئەمەس، كى نەۋرىلىك بولغان بىلەن قۇلاقلىرىم گاسمۇ ئەمەس، راۋاندۇركى توك يوللىرىم سىز دېگەندەك ماسمۇ ئەمەس، شۇنچە شىلتىڭ ئاتقان بارمۇ، ئات دېسىلا ئوزۇپ ئۇكام. ھەم قوغلىدى دەپسىز مېنى، قوغلانغىنىم راسمۇ ئەمەس، بۇ ھەزىلىم چاتما فىلىم، ھەرگىز كالتە چاسمۇ ئەمەس، مەقسەتلىرىم يۈسۈپجاننى ، كالپۇكىدىن ئاسمۇ ئەمەس، ياكى چىشى چىۋىش بىلىپ، تېقىملارغا باسمۇ ئەمەس، يۈرمىگەيسىز ئاغىڭىزغا، ئوغرى بىلىپ ھۈرۈپ ئۇكام. گەپنى يۇمشاق قىلغانلىرىم ئېھتىراملىق چاسمۇ ئەمەس، سىزنى توپكا چاغلىۋىلىپ، چىقارغىنىم پاسمۇ ئەمەس، چەككەلىرىم تاماكۇدۇر كالپۇكتىكى ناسمۇ ئەمەس، بېلىڭىزنى ئۇشتىغاندا چىققان ئاۋاز قاسمۇ ئەمەس، ئاھ! ئاغىڭىز قويغۇسىدۇر تېخى نەچچە ئۇشتۇپ ئۇكام پەيزىڭىزنى مەن پەملىسەم ، ئامراقكەنسىز دورىلارغا، بەكمۇ ئىجىل بولغىنىدەك، ئاچچىق تۈتۈن مورىلارغا، شۇڭا كالپۇك ئوخشىغاندە، مايماق- مىجىق كورىلارغا، ئاغىڭىزچۇ ھەزىللەردە ، ئورار سىزنى بورىلارغا، يۈرمىگەيسىز ئەمدى بەس ھە، كى ھەزىللەر يېزىپ ئۇكام. شۇڭا مېنى ئوخشىتىپمۇ، قالماڭ ياغاچ پورلىرىىغا، دەڭسىسىڭىز چۈشىنىسىز، سۆزلىرىمنىڭ تورلىرىغا، قەدەملىرى تەڭكەشمىكىن، ھەزىلچىك خورلىرىغا، ئاغىڭىزلا سادىق پەقەت، ئەھلى ئايال- جورلىرىغا، بۇ گېپىمدىن قالدىڭىزغۇ بىر نېمىنى سېزىپ ئۇكام. ئۇن چىقىدۇ سۇ قۇيسىڭىز تۈگمەنلەرنىڭ نورلىرىغا، خامنى پىششىق قىلغۇلۇققۇ چاپلاپ تونۇر شورلىرىغا، ئۆزىڭىزنى قاقلاپ كەتمەڭ شەرەپ- شاننىڭ ھورلىرىغا، چۈشەندۈرۈش تەسكەن گەپنى بۇ زاماننىڭ كورلىرىغا، كورلار قاچان ئۆتتى دەڭە، قانچە دەۋران سۈرۈپ ئۇكام. ھەسپىھالدا ئا. ھەسەننى ۋاي ئاكا دەپ ۋاقىراتقان، شەۋكىتىنى لەگلەك قىلىپ ئاسمانلاردا غاقىراتقان، ئا. سادىرنى پايپاسلىتىپ موكويلىدا داقىراتقان، ھەسپىھالنىڭ تۈگمىنىدە سۇلىرىنى شاقىراتقان، بۇ زادى كىم تېز تېپىڭە قالمايىن ھەم ئېزىپ ئۇكام... ئىزاھات #- تۇرسۇنجان ئەمەتنىڭ شۇ ناملىق يۇمۇرىغا ئىشائىرە قىلىندى. يۈسۈپجان قىيىم بۇلتۇر مەن ھەممىمىزنىڭ يېقىن دوستتى پەرھات ئىلياسنىڭ كىتاۋىنى سېتىپ يۈرگەندە قايسى بىر ساغلاملىق شىركىتىنىڭ دورىسىنى شېرىك ساتساق دېگەن ئىدى. مەن ئۇنىمىغان ئىدىم. كىتاپقا دورا ئارىلاشتۇرۇپ ساتساق، بىز خەلىقنىڭ ھەم جىسمانى كېسىلىنى ھەم روھى كېسىلىنى داۋالايدىغان لوقمانى كىتاب بولۇپ قالمايمىزمۇ؟- دىسەم يۈسۈپجان مۇنداق بىر شېئىرىي نەقىلنى ئېيتقان ئىدى. شۇنىمۇ سىلەرگە دەۋىتەي... ئوغرى ئامراق شورىغا، پاقا ئامراق ئورىغا. بىلىۋىلىڭ جان ئاكا، ئىسمۇ ئامراق مورىغا. نەقرات- كىگىز ئامراق بورىغا، ئەتكەنچايمۇ كورىغا، يەنە بىلىڭ جان ئاكا كېسەل ئامراق دورىغا ئۇنىڭغا ئۇلاپلا مەنمۇ ئامراقتىن بىرنى دېگەنتىم： دېھقان ئامراق ئارىغا، مەدرىس ئامراق قارىغا، بىلىپ قېلىڭ يۈسۈپجان دۇتتار ئامراق تارىغا. بى نەقرات- مەرگەن ئامراق قارىغا، ئاشىقلارمۇ يارىغا، يەنە بىلىڭ يۈسۈپجان باشلىق ئامراق پارىغا. شۇنىڭ بىلەن مەن يۈسۈپجانغا ئاقىل ئالار كىتاپ،- دىۋىدىم. – يۈسۈپجان.- دورا ئالار بىتاپ.- دەپ گەپنى خۇلاسىلىغان ئىدى. ئەلقىسسە! بۇ ئىش شۇنىڭدىن كېيىن مۇشۇنداق كېلىشەلمەيدىغان داۋانى كەلتۈرۈپ چىقارغان بولىشى مۈمكىن........................

sandal · ۋاقتى: 2014-3-20 20:23:13


	يۇسۇپجاننىڭ ئەشۇ يوغان كالپۇكى بولمىغان بولسا چاچچاقتا كەلتۈرۈشمۇ تەستى.قېنى يۇسۇپجان سەنمۇ ئابدۇخېلىلنىڭ«خىڭ...خىڭ» ئاۋازى ئارقىلىق «زۇۋانىنى داغا تاتمامسەن»؟

sakarauli · ۋاقتى: 2014-3-20 22:00:11


	ئېسىل يېزىلغان ھەسپىھال ئىكەن.مۇنبەرنىڭ يەنە بىر نۆۋەت قىزىپ كېتىشىنى ئۈمىد قىلىمەن.

ekremabdumijit · ۋاقتى: 2014-3-21 10:38:33


	بۇ شېئرى چاقچاقلارنىڭ باش قىسمى نەگە كەتتى؟ چۈشۈنۈكسىز بىر نېمىگە ئايلىنىپ قاپتىغۇ. ئەسلى يۈسۈپجان قېيۈم بىلەن شاۋكەت روستەمنىڭ شېئىرى چاقچىقى باش تەرىپىگە بېرىلىپ ئاندىن ئابدۇخېلىلنىڭ كەينىگە ئۇلانغان بولسا بۇ بىر باش ئاخىرى ماسلاشقان شېئىرى چاقچاقلار تۈركۈمى بۇلار ئىدى. باشقۇرغۇچىلار مۇمكىن بولسا ئەسلىدىكى شېئىرى چاقچاق باشلانغان قىسمىنى قىستۇرۇپ قويسا بوپتىكەن.

qaynami · ۋاقتى: 2014-3-21 13:33:05


	ئابدۇخېلىل ئاكام پىچىقىنى قالتىس بىلەپ چىقىپتۇ جۇما... ‹‹شارت-شارت››كېسىپتۇ...نورۇزلۇق يىغىلىشتا چاچلىرىمنى بىر چۈشەتكۈزۋالسام بولغۇدەك

دىلمۇھەممەت · ۋاقتى: 2014-3-21 14:00:53


	ۋاھ... كىمنىڭ بۇرغىسى بۇ ! ، ... كوچا - كويدا قاچ- قاچ!!!

ي.قېيۇم · ۋاقتى: 2014-3-21 15:17:31


	ھۆرمەتلىك ئۇستاز نورۇز پائالىيەتلىرىنىڭ ئالدىراشچىلىغىدا ماڭا سۇنغان تىكەنلىك گۈل دەستىڭىزگە ۋاقتىدا جاۋاپ قايتۇرالماي قالدىم كەچۈرۈڭ! كېچىكىپ بولسۇمۇ يازغان بۇ يازمامنى قوبۇل قىلارسىز. مەنچە ئۈشبۇ يازمىنى،ئا،خېلىل يازغان ئەمەس، ئا،خېلىل يازما يىزىپ،بۇنچە كۆپ ئازغان ئەمەس، يېشى ئەللىكتىن ئېشىپ،شائىرلىغى چانغان ئەمەس، سۆزلىرى بۇنچە پۇچەك،مىسرانىمۇ تىزغان ئەمەس، خوتۇن كىشىنىڭ غەيۋىتى،ئەركەك ئۇرار بازغان ئەمەس. ئا،خېلىل تىل سالمىغان،ھەتتا خوتۇن قالماپتۇغۇ، خۇددى يالماۋۇز كەبىي،ھەممىنى يالماپتۇغۇ، بىر چىماق بىرلە مېنى، جايلاشنى ئۇ ئويلاپتۇغۇ، جىنغا تەڭكەش باخشىدەك،پېرىنى ئويناپتۇغۇ، مەن گۇماندا ھېلىمۇ،بۇ گۈلنى ئۇ تىزغان ئەمەس. جا،خېلىلمۇ،جىڭ خېلىل،كىم بولسا مەيلى يازغىنى، قىلغىنى چاقچاق ئەمەس،ئېنىققۇ يولدۇن ئازغىنى، غەيۋەت بىلەن تۆھمەت ئىرۇر،پىكىر تېغىدىن قازغىنى، تىل ئاھانەت بايقىسام،ئۇندىن ئېشىپ بايقالغىنى، جىڭ خېلىل دۇتتارىنى،بۇ پەدىگە چالغان ئەمەس. كالپۇكۇمنى تىلغا ئاپتۇ،ئۆزى بىر خىر-خىر تۇرۇپ، يىقىلغىنى بەلدىن كېتىپ،ئەلگە تېخى بىر سىر تۇرۇپ، شۇ سەۋەپ ئەللىككە بارماي،ئىلىكى كەتتى قۇرۇپ، ئۆيگە ياندى ئاقىبەت،كىملەرگىدۇر كۆپ يال ئۇرۇپ، رەڭ قاتارى باشقا چىقتى،بۇ سۆزۈم يالغان ئەمەس. ماڭا رەڭ بەرگەن ئاكا،كالپۇكۇمنىڭ سۈلىتى، چۈنكى شۇلدۇر تەڭرىنىڭ،ماڭا بەرگەن دۆلىتى، شۈكرى دەيمەن شۇل سەۋەپ،يارالدى كالپۇك قىممىتى، خىر-خىرى پەگادىدۇر،ھەر يەردە كالپۇك ھۆرمىتى، كالپۇكۇم پەخرىم مېنىڭ،مەن ھېچقاچان چانغان ئەمەس. ئوتلۇرۇم يالقۇنجىسا،سىزمۇ قاقلانغانتىڭىز، تۇتۇپ پېقىرنىڭ قولىنى،سىزمۇ ئاتلانغانتىڭىز، نەپ چىقىپ قالسا يەنە،سىزمۇ شاتلانغانتىڭىز، مېنى ماختاپ ئۆزرىدە،سىزمۇ قاناتلانغانتىڭىز، ئەمدى پىقىرنى يەر كۆرۈپ،سىز ئاكا ئاسمان ئەمەس. گاھى ئوڭكەن گاھى سول،قىلسا ئەگەر سودا دىگەن، بىردە بېرىپ بىردە ئالار،بىلسىڭىز خۇدا دىگەن، ياخشىلارنى ئەنە شۇنداق،سىنار ئىكەن دۇنيا دىگەن، گاھى لەغمەن گاھى سۇ،سۈزەر ئىكەن چويلا دىگەن، ھېچ كىشى تەغدىرگە تۇغ،ۋە يەنە قالقان ئەمەس. سودىدا جېنىم ئاكا،مەن ھېچقاچان توزغان ئەمەس، سىز كەبىي ئۆتىۋىلىپ،كۆرۈكنىمۇ بۇزغان ئەمەس، باشقىلار ئالداپ يىسە،مەن توزاق قۇرغان ئەمەس، ھىلىمۇ ياخشى سودام،بۇ يولدا مەن قۇربان ئەمەس، ياخشىلار كۈتسە ئۈمۈت،يەرگە مەن قويغان ئەمەس. بايقىسام قىپلا ھۇجۇم،مىسرانى يۆتكەپ دورىغا، يېنىمغا ‹‹شىركەتلەر››چىقىپ،قالغان ئىدىم مەن زورىغا، بەش تۈمەن بەرمەك بولۇپ،قىلغانتى ۋەدە يىلىغا، ئويلۇنۇپ كەچتىم شۇنىڭدىن،چۈشمىدىم شۇ ئورىغا، ئورنۇمدا گەر سىز بولسىڭىز،سەكرەپ چۈشەرسىز كورىغا، پەيلىڭىزنى بىلىمەن،بۇ مەندىكى ئارمان ئەمەس. ئەلدە ياخشى نامى بولسا،ئىزدەپ چىقاركەن بىرلىرى، سەھنىدە ئالقىش ئېتىپ،گۈللەر تۇتاركەن بىرلىرى، چاقىرىپ ئەھۋال سوراپ،قوشقار سوياركەن بىرلىرى، سىز كەبىي غەيۋەت بىلەن،ئارقان توقاركەن بىرلىرى، باشقا كۈن چۈشسە ئەگەر،بەزمە قۇراركەن بىرلىرى، بولسا خەلقىم يار يۆلەك،تاغ مەن ئاكا تالقان ئەمەس. سىزمۇ بىر چاغ ئەي ئاكا،قىلغانتىڭىز ھەسەلچىلىك، ياندىشىپ يۈرگەنتىڭىز،قىلغان چېغىم قەلەيچىلىك، يۈرىسىز يىپ ئىگىرىپ،قىلسام ئەگەر پەلەيچىلىك، سىز بولارسىز ھەرنىمە،ئاقمىغاش غەزەلچىلىك، تەييارغا ھەييار بەندىسىز،بۇ كەسىپ ئوبدان ئەمەس. دەسمى سالماي قىلدىغان،سودىغا سىز ماھىر ئاكا، گەپ بىلەن شەيتاننىمۇ،ئالدارغا سىز قادىر ئاكا، ئەمدى ‹‹كىتاپ››چى بولدىڭىز،مەن دىدىم ياپىر ئاكا، يەنە قانداق سودىلار بار،ئىزدىنىڭ دادىل ئاكا، مەن قەلەندەر ھەسپىھالدا،سىز تېخى سۇلتان ئەمەس. كۆتۈرۈپ تۆت تال كىتاپ،ھەريانغا يۈگرەپ چاپتىڭىز، پايدىسى ئەللىككە يەتسە،ئاندىن كىتاپنى ساتتىڭىز، ‹‹مەن ئىلىم پەرۋانىسى››،دەپ،گەپنى كۆپ ئويناتتىڭىز، توپلام چىقارماق مەقسىدى،سىز شۇنى ئويلاتتىڭىز، دەسسىدى ‹‹پ،ئىلىياس››،قاپقاننى خوپ قۇرغانتىڭىز، ھەر قەدەم مەقسەت بىلەن،بۇ سىزدىكى ئېھسان ئەمەس. ھېلىگەرلىك بابىدا،ھەيران قويارسىز تۈلكىنى، گاھى تۆگە كۆرسىتىپ،ئەپلەپ ساتارسىز تۈگمىنى، چىڭغا چىقسا ھەممە ئىش،يالغان كۈلەرسىز كۈلكىنى، سىزدە سۇسىز پېقىرار،يەنە غەيۋەت تۈگمىنى، بەرسە يالغان پەتىۋا،مەنچە بۇ ئۇتقان ئەمەس. ئايىنىپ قاپسىز ئاكا،ئەللىككە بارماي بايقىسام، قېتىقى قالماپتۇ ھېچ،مېڭېڭىزنى چايقىسام، يىقىلىپ زار يىغلىغان،چېغىڭىزنى ئۇنتىسام، ئەلنىڭ كۆزى ئەللىك ئىرۇر،بولمايدىغۇ ھەق ئېتمىسام، ھەسپىھالدا ۋاي ئاكا،سىز ھېچقاچان ئۇتقان ئەمەس. ئا،ھەسەن ھوشسىز قىغان،ئۆزلەنى دىسلاپ مەيدىگە، بۇ كەمگە يوقتى ئېسىڭىز،قويغان بوساق گەر پەيلىگە، كىم يىقىلغان شۇ چىلىشتا،ئايانغۇ بۇ تور ئەھلىگە، زادى قانداق جەڭ كېرەك،سىزدەك قەغەز سەركەردىگە، سىز ئاكا غەلبە بىلەن،ھەرگىز ۋىسال تاپقان ئەمەس. شەۋكىتى سۈر كۆرسۈتۈپ،ئۆزلەنى دۆڭگە قوغلىغان، سىزنى ھەم ۋايجانلىتىپ،نەزمىدە ئۇسسۇل ئوينىغان، ئۈنىڭىز كۆككە يىتىپ،دادۇ پەرياد توۋلىغان، ھە،شۇ چاغ ئەيبۇ ئاكا،سىزنى تاياقتىن ئايرىغان، زادى قانداق ئادىمى سىز،بۇنداق چىلىشقا تويمۇغان، سىز پۇتى سۇنغان قۇلان،بەيگىدە چاپقان ئەمەس، مەنغۇ ئېتقان گەپ ئەمەس،تور ئارا قوغلاندى دەپ، ئۆزىنى بىلمەي ئا،خېلىل،نامى كۆپ بۇلغاندى دەپ، باشقىلار دەپ يۈرىدۇ،ئەمدى ئۇ تويغاندۇ دەپ، تورنى ئەيلەپ مالىمان،پۇتلىرى سۇنغاندۇ دەپ، پىقىرنى قارلاپ كەتتىلە،ماڭا جېمى گەپنى يۆلەپ، بۇ گەپنى ھەرگىز جان ئاكا،باشتا مەن ئېتقان ئەمەس. بۇ ئەمەستۇر ھەممىسى،يازغانلىرىم ئوننىڭ بىرى، يەنە قايتا چۈشسىڭىز،ئېچىلار ئىشنىڭ سىرى، دەم يىتىشمەي دۈملا چۈشمەڭ،ئەدەپ كانەينىڭ خىر-خىرى، ئېچىلارمەن مەنمۇ ھەم،سىز ئاكا يازغانسىرى، تېچقىنا نەۋرە بىقىڭ،شېئىردا سىز فۇنتان ئەمەس. قىلماققا ئىشىم بەكلا كۆپ،مەن لېكىن بوزەك ئەمەس، يىگىنىم ئاق نان مېنىڭ،ھەرگېز كېرەك تېزەك ئەمەس، ھەسپىھالنىڭ كانىدا،سىز ئۇنچىلىك زېرەك ئەمەس، ۋاقتى يەتسە سىزگە مەخمۇت،جەپەرىلەر تىرەك ئەمەس، مېنى ئۇتماق ئەي ئاكا،ئۇنچە بەك ئاسان ئەمەس، ئۆزلىرى ئۇستاز ماڭا،سىزنى يېڭىش مەقسەت ئەمەس، سىز ئوتى ئۆچكەن ئوچاق،توزىماس گۈلخان ئەمەس. بۇ يازمىنى ئاخىرىدا ي.قېيۇم تەھرىرلىگەن. ۋاقتى 2014-3-21 15:22

ئەدىھەم · ۋاقتى: 2014-3-21 17:35:08


	تۇرغان تامغا ئۈسۈپ يۈسۈپ بۇرۇن قاناتتى، ئاتتىن چۈشمەي ئا.خېلىلكام كۆتىنى پاتتى.... ئەمدى بولدى قىلىڭلارچۇ چۇجە خۇرازلار، ھەر ئىككىڭنىڭ ھەپسىھالى تاناپتىن قاچتى...

مېھرى · ۋاقتى: 2014-3-21 17:48:18


	ئەدىھەم يوللىغان ۋاقتى 2014-3-21 17:35 تۇرغان تامغا ئۈسۈپ يۈسۈپ بۇرۇن قاناتتى، ئاتتىن چۈشمەي ... ئەگەشتىم ...

sandal · ۋاقتى: 2014-3-22 10:56:09


	ماۋۇ يۈسۈپجان يوغان ئېغىزىدا ئابدۇخېلىلنى يالماپلا يۇتىپتىغۇ؟قېنى ئابدۇخېلىل ئۇتكۇر چاقچاقلىرىڭ بىلەن يۈسۈپنىڭ ئېغىزىنى تۇۋاقلا. بۇ يازمىنى ئاخىرىدا sandal تەھرىرلىگەن. ۋاقتى 2014-3-22 14:44

ئابدۇخېلىل · ۋاقتى: 2014-3-22 10:56:50


	چىن پۈتىڭكى بۇ ھەزىلنى، مەن ئۆزۈم يازغاندىمەن، ئىچىڭىزنى ئۆڭتۈرۈپكى ، كانچى بوپ قازغاندىمەن. مىق مىسال مىسرالىرىمدا ، نېمىنى قازغاندىمەن، ئېيتىڭە يۈسۈپ ئۇكام، مەن نېمىدىن ئازغاندىمەن، سىز يەنە سەندەلنى ئويناڭ، مەن تېخى بازغاندىمەن. يازغىنىم غەيۋەت مېنىڭ، سىزنىڭ كالامول ئايىتى، مەن پەقەت چۈپرەندىلا، سىزلا ئادەمنىڭ غايىتى، مىنگىنىم مۈشكۈل مېنىڭ، سىزدە خاھاننىڭ راھىتى، سىزگىلا بىر گەپنى دەي، كېپ قالدى ۋاقتى- سائىتى، سىز كەبىي ھەزىلچىنى، باقساممۇ ئاز تالقاندىمەن. ئېيتىڭە قەيەردە مەن، خوتۇنلىغا تىل ساپتىمەن، ۋاي بولۇپ جىنكەش يەنە، باخشىغا داپلار چاپتىمەن، سىز ساراڭ بوپ قالسىڭىز، پىقىر چالارغا داپتىمەن، سىز كەبىي كەپتەرنى ئاھ، لاچىن بولۇپلا ئاپتىمەن، قالىسىز گۇماندا شۇنداق، يەڭ تۈرۈپ سالغاندىمەن. مەن قاچان يۈرۈپتىمەن، سىزدىن ئۇكام تۆر تالىشىپ، يۈرمىدىمغۇ سىز كەبىي، ئۆلگەنلىدىن گۆر تالىشىپ، نەچچە رەت يەپسىز تېپىك، ئىدارىدا مۆر تالىشىپ، ئۆلگىلى تاس قالدىڭىز، ئاتۇشتا بىر ھۆر تالىشىپ، قالىسىز ھەيران تېخى، دۇتتار ئېلىپ چالغاندىمەن. ئەر تۇرۇپ كالپۇكىدىن، دۆلەت تېپىپلا سىز ياشاڭ، ۋە يەنە قىزىلىدىن ، سۆلەت تېپىپلا سىز ياشاڭ، توپا دەسمىنى تىكىپ، ھۆرمەت تېپىپلا سىز ياشاڭ، بارچىمىزنىڭ ئۈستىدىن، تۆھمەت تېپىپلا سىز ياشاڭ، ھىلىدىن ھالۋا ياساپ، شۆھرەت تېپىپلا سىز ياشاڭ، ھەر نېمە دەپ باقىسىز، ھە سالمىلاپ ئالغاندىمەن. چالا كۆيۈپ كۆيمىگەن، بىزگە ياققان ئوتلىرىڭىز، يالاتسىڭىز يالغاننى، يا كېسەمدۇ چوتلىرىڭىز، ئېيتىشتۇرار دىماقنى، قويۇپ كەتكەن دۇتلىرىڭىز، ھازىرغىچە ئالدىمدا، تىكلەپ بەرگەن بۇتلىرىڭىز، قول كەسكەندە سۈركىگەن، تۇرار ئەنە يۇتلىرىڭىز، پارچا- پۇرات قاڭىلتىر، ماڭا قالغان مۇتلىرىڭىز، بىزنى خوشال قىلغانتى، ئاۋال سوققان چوتلىرىڭىز، بارماق چىشلەپ قېلىشتۇق، يۆتكەلگەندە خوتلىرىڭىز، ھەممە خەققە ماقۇل دەپ، ئاغزىڭىزدا خوپلىرىڭىز، داۋا ئەدەپ تۇرىدۇ، قاچان بولار سوتلىرىڭىز، شۇ ھالدىمۇ تۇرامدۇ، قاڭقىپ يەنە توپلىرىڭىز، قۇتقۇزارمۇ دىشۋاردىن، ئىلاھ ئەمەس پوپلىرىڭىز، بۇ قۇرلانى ئېيتىڭە، ئەمدى راست يازغاندىمەن. ساتقىنىم يالغان ئەمەس، پ. ئىلياسنىڭ كىتاۋىنى، چاپقىنىم ھەريانمۇ راست، بېرىش ئۈچۈن ھېساۋىنى، بەرمىسە بىكار ئىكەن، ئالغۇچىنىڭ ئىنساۋىنى، نەگە تۆكۈپ يۈردىكىن، بىزنىڭ يۈسۈپ ئېھسانىنى، تۈگۈتۈش ئۈچۈن يۈسۈپ، قەلبىدىكى گۇمانىنى، تەكشۈرۈپ باقسۇنمىكىن، دىلىدىكى ئىمانىنى، تېخى پەرق قىلالماي ، يەرنىڭ شەرق- شىمالىنى، ۋاي كىيىپ چىقىپتىغۇ، يەنە قىزىل ئىشتانىنى، توختىتاي ئالدىرىماڭ، بۇ قۇرلارنى ھارغاندىمەن. تۈلكە كىمكىن ئۈلگە كىم، ئايرىمىقىڭىز ئۆزگۈدۇر، ھەقنى باتىل كۆرسۈتۈپ، قايرىمىقىڭىز ئۆزگۈدۇر، تىلىدىن تىللا تۆكۈپ، سايرىمىقىڭىز ئۆزگۈدۇر، ئۆز تىلىدىن سەمىرىپ، ئاينىمىقىڭىز ئۆزگۈدۇر، بوينىغا تېشىپ تازا، قاينىمىقىڭىز ئۆزگۈدۇر، بىر بېلىقنىڭ بېشىنى، چاينىمىقىڭىز ئۆزگۈدۇر، ئەلنى تاشلاپ لاۋىغا، يايرىمىقىڭىز ئۆزگۈدۇر، كۆزىگە توپا چېچىپ، جايلىمىقىڭىز ئۆزگۈدۇر، شۇبۇ ھالدا مەن نىچۈك، كۆۋرۈك بۇزۇپ قالغاندىمەن. بېرەي دەپ ئەللىك تۈمەن، چىققان ئورۇن ئەنۋەي ئىكەن، بارسا ھەرقانداق كىشى، كوكاكۇلا دەملەيدىكەن، نېنىنى يىگەن بوۋاق، ئانىسىنى ئەممەيدىكەن، راستتىدىن يالغىنى كۆپ، شۇنداق بىمار ئەملەيدىكەن، تېپىپ سىزدەك ۋاستىچى، ۋاي كەشىنى چەملەيدىكەن، ھېلىدە سىز سەمىرىپ، خەقنىڭ پۇلى كەملەيدىكەن، ئويلاپ بېقىڭ كىمنى- كىم، ھۈنەر بىلەن يەملەيدىكىن، بۇ ئورۇنىڭ مېلىغا، زەمزەم سۈيى يەتمەيدىكەن، بىرلا رەت يىگەن كىشى، كى پىقىراپ كەتمەيدىكەن، ئىشلەپ قالغان خوتۇنلار، ئۆيدە تاماق ئەتمەيدىكەن، خادىملىرى يىل بويى، بىر تال ئۇرۇق تەرمەيدىكەن، ئۆلسىمۇ بىمار كىشى ، مىسقال دورا بەرمەيدىكەن، ئاي ئاتلىماي شىركەتمۇ ، شۇنداق قوشقار سويىدىكەن، قوشقار يىگەن يۈسۈپجان، خېرىدارنى قويۇدىكەن، مالنى زورلاپ ساتقىچە، ئۆزىمۇ جاق تويىدىكەن، مال بولمىسا ئابۇرۇت، لوبەن كۆزنى ئويىدىكەن، ئىششەك قەرز تېخىچە، ۋاستىچىنىڭ بويىدىكەن، سېتىپ بارى- يوقىنى، شۇ قەرىزنى تۇغىدىكەن، قوشقار سويغان ئورۇننى، نەق جايىدا تاپقاندىمەن. سىز شۇنىڭغا مەس بولۇپ، يۈرگەنمىدىڭىز ۋاي ئۇكام، شۇ خەلق دەپ پەيزىنى، سۈرگەنمىدىڭىز ۋاي ئۇكام، قوغلىغاننى شەۋكىتى، كۆرگەنمىدىڭىز ۋاي ئۇكام، ياكى يۇمۇپ كۆزنى چىڭ، ھۈرگەنمىدىڭىز ۋاي ئۇكام، تۇتىۋالماي قوغلىسا، ئۆلگەنمىدىڭىز ۋاي ئۇكام، ئەرشى چاغلاپ ئۆزىڭىزنى، كۆنگەنمىدىڭىز ۋاي ئۇكام، چىن كۆڭۈل رىشتىسىنى، كۆمگەنمىدىڭىز ۋاي ئۇكام، ئادىمىلىك رەڭگىدىن، ئۆڭگەنمىدىڭىز ۋاي ئۇكام، ئەللىك ياش ئەرلىك يېشىم، ئازدى دەڭ ئازغاندىمەن. ۋاي تېخى دەپسىز يەنە، ئا. ھەسەنمۇ دىسلىغان، ئا، ھەسەنمۇ سىزچىلىك، يانتاق- تىكەنلەر تىزمىغان، ماي بويىقى قولىدا، تۆھمەتتە رەسىم سىزمىغان، ھاي ئۇكام دەپ تۇرسىمۇ، مۇنداقمۇ بارمۇ قىسمىغان، ھۆل ئوتۇننى بىخسىتىپ، كوللى جاھاننى ئىسلىغان، كۆيدۈرۈپ كۈل قىلىمەن، گۈلخان بولۇپ يانغاندىمەن. پەش قىلىپ چاڭۋىيلىنى، ھەسرەتنى قوقاتقان ئۇكام، پەرت قىلىپ قۇيرۇق تىكىپ، ئۆملۈكنى يوقاتقان ئۇكام، بېشىنى مەن سىلىسام، ئاخىرى ئوق ئاتقان ئۇكام، تەپمۇ تارتماي پىرىدىن، پوتلا- پوق ئاتقان ئۇكام، بەلكى سىزگە مەن كىچىك، ئاھ! كۆرۈنۈپ قالغاندىمەن. كىم يېڭىش كىم يېڭىلىش، ئاخىرىقى چەكتە بەلگۈلۈك، يېڭىلىشمۇ ئەر ئۈچۈن، ئەمەسقۇ ئېغىر كەلگۈلۈك، گېپىدە يەڭسە بىرى، بارمۇ ئۇنىڭغا ئۆلگۈلۈك، دوست يارانلار سۆزىدىن، ئىمكانلا بولسا كۈلگۈلۈك، داۋامىنى يازىمەن، كالپۇك يۈسۈپ يازغاندىمەن... بۇ يازمىنى ئاخىرىدا ئابدۇخېلىل تەھرىرلىگەن. ۋاقتى 2014-3-22 10:58

ئابدۇرەشىد · ۋاقتى: 2014-3-23 12:07:24


	تالاشسىمۇ ،تارتىپ تۇرار دوستلىقى، قالاپ تۇرسا بۇزۇلمايدۇ ئوتلىقى، يۈسۈپ كامنىڭ ئېچىلىپتۇ كالپۇكى، خېلىل كامنىڭ تۈزۈلمەس خىر-خىرلىقى، قەدىناسلار دوستىدىن كەچكەن ئەمەس. .................... (قاملاشمىسىمۇ قېتىپ قويدۇم بۇ قۇرنى) -ئەسسىلامۇئەلەيكۇم، قىززىغان سورۇننىڭ قايناقلىرىغا ئۇشبۇ سۈرەتنى قېتىپ قوياي..... بۇ يازمىنى ئاخىرىدا ئابدۇرەشىد تەھرىرلىگەن. ۋاقتى 2014-3-23 12:19

ekremabdumijit · ۋاقتى: 2014-3-23 12:11:29


	چاقچاق ئارا ئەخلاق كېرەك. ئەكرەم ئابدۇمىجىت ھەسپىھالدا بىر بىرىگە ئەڭ ئاۋال چاقچاق كېرەك، ھەمدە دۇستلار قول بېرىپ،ئىللىق چىراي باقماق كېرەك، يېغىرىنى ئاچمايىن كەڭرى قۇچاق ئاچماق كېرەك، تىل بىلەن دىلنى دېمەك چاقچاق بىلەن چاتماق كېرەك، قانچە چاقچاق بولسىمۇ چاقچاق ئارا ئەخلاق كېرەك. بايقىسام بۇ تور ئارا چاقچاققا يول ئاپتۇ مانا، بىر جىرادا ئىككى قوشقار ئۇسسۇشۇپ قاپتۇ مانا، ھەم بىلەپ مۇڭگۈزلىرىن خەنجەر مىسال ساپتۇ مانا، نە ئۈچۈندۇر بىزگە پىنھان ئومىچىن چاپتۇ مانا، بولسا شۇنداق بو قازاننىڭ تۇۋىقىن ياپماق كېرەك. كالپۇكى بار ي، قېيۈمنىڭ ماختىسا ماختانغۇدەك، ئاپتۇنۇم رايۇن ئارا ئارخىپ قىلىپ ساقلانغۇدەك، ئاسىتىغا گۈلخان يېقىپ، ئەتراپىدا قاقلانغۇدەك، قىلسا «ھاببۇ» خانىمىن مىڭ يىلچە ھىم چاپلانغۇدەك، ئۇشبۇ كالپۇكنى يەنە قانداقچە ئۇر –چاپماق كېرەك؟ ساتقىنى راس ئا. خېلىلنىڭ بىر زامان ھەسەلنىمۇ، ساتقىنى راس ھەسپىھال، چاقچاق، يۇمۇر،مەسەلنىمۇ، ساتقىنى راس ئۇ كىتاب ناملىق ئېسىل گەۋھەرنىمۇ، سالغىنى راس ئىشقا ھەم زەپەرنىمۇ، جەپەرنىمۇ، بۇ تىجارەتكە كىشى قانداق بۇيۇن تارتماق كېرەك. شەۋكىتىنى ھەسپىھالدا يولدا قويماقلىق قىيىن، ئۇ قىزىل چاچ پەنجىسىگە پەنجە ئۇرماقلىق قىيىن، بۇ بېشىنى سىلكىمەستىن قازى بولماقلىق قىيىن، ئا خېلىلمۇ، ي. قىيېممۇ ئۆكتە قوپماقلىق قىيىن، چىقسا سوقرات ئوڭكۈرىدىن ئۇنى بىر باقماق كېرەك. ئا. ھەسەننى تىلغا ئالماڭ بۇ ھەزىل مەيدان ئارا، قارغىسا داموللىكام ئۆتكەي كۈنۈڭ شەيتان ئارا، توزىغاي توپلاملىرىڭنىڭ توپسى تۇرپان ئارا، شۇڭا كەلسە ھەر قېتىم باغلار ئارا، گۈلخان ئارا بىرلىشىپ ئىككى ھەزىلكەش كۆڭلىنى ئالماق كېرەك. بۇ ئويۇنغا ئالدىراپ ئەيبۇ تېخى قاتناشمىدى، بولمىغاچ ئەيبۇ شۇڭا «بىر بىركىشى»مۇ قاچمىدى، دونكىخوت ئەسئەت بېگىم ئەپسۇسكى بىر گەپ ئاچمىدى بىلمىدۇق كىملەر يەنە ھەزىل بىلەن مۇڭداشمىدى، مەنچە بۇ سورۇنغا ھەممە كۈي-غەزەل قاتماق كېرەك. بۇ يازمىنى ئاخىرىدا ekremabdumijit تەھرىرلىگەن. ۋاقتى 2014-3-23 12:16

دىلمۇھەممەت · ۋاقتى: 2014-3-23 13:18:18


	ھە ، قېىنى ، مەيداننى كەڭرەك ئاچايلى خالايىق !!! ... ئەمدى ھەملە باشلاندى .

abletablikim · ۋاقتى: 2014-3-23 15:26:15


	ئا.مىرخېلىل،يۈسۈپجان قىيۇملارغا چاقچاق ئابلەت ئابلېكىم (ئىككى دوستنىڭ چاقچاقلىرىدىن سۆيۈنۈپ ....) نىچۈن توردىن قېقىلىپ كەتتىڭىز ئا،مىرخېلىل، پىيالىدەك چېقىلىپ كەتتىڭىز ئا.مىرخېلىل، ئۇزاق بولدى سىقىلىپ كەتتىڭىز ئا،مىرخېلىل، كىتاب سېتىپ تىقىلىپ كەتتىڭىز ئا.مىرخېلىل، پۈرسەت كەلدى پېتىنىپ كەتتىڭىز ئا.مىرخېلىل. يۈسۈپجان بىر بالىغۇ چېچىلىسىز نېمانچە، قورسىقى ئاچ بۆرىدەك ئېتىلىسىز نېمانچە، پەشۋا يىمەي تۇرۇپلا يىقىلىسىز نېمانچـــە، يـازغۇچىلار تـورىغا ئىنتىلىسىز نېمانچــە، ئۆزىڭىزگە ئىشىنىپ كەتتىڭىز ئا.مىرخېلىل. يۈسۈپ قەلەي قاققاندا تېپىپ بەرگەن ئۆزىڭىز، زەپەرىنى ياردەمگە قېتىپ بــەرگەن ئــۆزىڭىز، تاماق يېسە ئالدىدا تېتىپ بەرگەن ئۆزىڭىز، مۇساپىر دەپ ھەر كۈنى يېتىپ بەرگەن ئۆزىڭىز، مانا ئەمدى قىرچىلىپ كەتتىڭىز ئا.مىرخېلىل. كىتاب سېتىپ يۈردىڭىز كۆزلەپ يىراق نىشاننى، تاۋاپ قىلىپ يۈردىڭىز پەرھات ئىلياس ئېشاننى، سەكرىدىڭىز دېڭىزغا،تاشلاپ قويۇپ ئىجاتنى، چوتنى خاتا سوقتىڭىز،بىلمىگەچكە ھېساپنى، زايە كەتتى ئەجرىڭىز ئۇنتۇغاچقا ئىنساپنى، دەردىڭىزنى يۈسۈپتىن ئالامسىز ئا.مىرخېلىل. يۈسۈپ بارسا ھەر قېتىم بەك تالىشىپ كەتتىڭىز، «ئاغا»دېسە،«ئىنىم»دەپ لەۋ يالىشىپ كەتتىڭىز، تاڭ ئاتقىچە ئۇخلىماي ئەسرارلىشىپ كەتتىڭىز، «ھەسپىھالچى ئىنىم»دەپ ئىچەكىشىپ كەتتىڭىز، مانا ئەمدى ئېچىنىپ كەتتىڭىز ئا.مىرخېلىل. ئادەمنىڭكى ئالىسى ئىچىدىدۇر بىلسىڭىز، ئەقىل ياشتا ئەمەستۇر،بېشىدىدۇر بىلسىڭىز، دۈشمەن گاھى ئادەمنىڭ پىشىدىدۇر بىلسىڭىز، زەھەر دېگەن دۈشمەننىڭ ئېشىدىدۇر بىلسىڭىز، «دوست»قولىدا يىرتىلىپ كەتتىڭىز ئا.مىرخېلىل. ئۆزىڭىزنى يۇمۇرچى،ھەسپىھالچى سانايسىز، ھىدايەتكە مېڭىپمۇ سورۇنلاردىن قالمايسىز، ئاۋازىڭىز خىر-خىردۇر،ئەمما سۆزلەپ ھارمايسىز، نەپلا تەگسە شەيتاننى قەسەم ئىچىپ ئالدايسىز، شۇڭا توردىن «ئېتىلىپ»كەتتىڭىز ئا.مىرخېلىل. يــۈسۈپ قېيىم ئىككىڭلار تۆر تالىشىپ يـۈردۈڭلار، خىرىس قىلىپ،مۇشت تەڭلەپ گۆر تالىشىپ يۈردىڭلار، خېلى بولدى بىلىمىز زەنجىر يىغىپ يۈردىڭلار، خەلقى ئالەم ئالدىدا بەك مازلىشىپ يۈردىڭلار، مۇشۇ ئىشتا «چېكىلىپ»كەتتىڭىز ئا.مىرخېلىل. يۈسۈپ قېيىم قىلمىغان ئىش جاھاندا ئاز قالدى، ئۇ ساتمىغان نەرسىدىن توخو بىلەن غاز قالدى، دورا ساتتى،توڭلاتقۇ،نېشە بىلەن ناس قالدى، شۇ تۈپەيلى ئۆيىدىن ئايرىلغىلى تاس قالدى، سىزمۇ شۇنداق بولۇشنى تىلەمسىز ئا.مىرخېلىل. پۇلنى ھەممە ئىشلارنىڭ قويۇۋالدى ئالدىغا، قىلىپ شېرىك تىجارەت،ئۆتىۋالدى دالدىغا، قىلچە قۇلاق سالمىدى خېرىدارنىڭ زارىغا، پـۇل تېپىشتا يامىنى تاياندى ئۇ پــارىغا، ياخشى-يامان دېمىدى پۇللا كىرسە كارىغا، سىزمۇ ئۈشبۇ ئىشلارنى بىلەمسىز ئا.مىرخېلىل. پۇل كويىدا تېپىرلاپ چاتاق چىقتى يۈرەكتىن، دېمى چۈشتى ئىچىگە كېتىپ قېلىپ بۆرەكتىن، بەخت-ئامەت ئەمەسمۇ ھايات يۈرۈش ئۆلمەستىن، باردۇر قانداق ئاساسى بۇنى سىزدىن كۆرمەكتىن، قول ياندۇرۇش ئۇنىڭغا ھاجەتمۇ ئا.مىرخېلىل. چاقچاق بىزگە ئۇدۇمدۇر،چاقچاق بىزگە ئەنئەنە، چاقچاق بىلەن بۇ تۇرمۇش رەڭلىنىدۇ ھەم يەنە، ياراشمايدۇ چاقچاققا ھەسەت،تۆھمەت،سەپسەتە، ئەمەس تېخى ئىككىڭلار ئەڭ يۇقۇرى پەللىدە، بۇ سۆزلەرنىڭ ۋەزنىگە يەتسىڭىز ئا.مىرخېلىل.