توختىما تارىم
‹‹ ت›› ھەرىپى بىلەن باشلانغان
ئارزۇگۈل ھۈسەن خالەم
تەبىئەتنىڭ تالاي-تالاي توپا -تاشلىرى تىندۇرالمىغان تەنھا تارىم ! تېنىمسىز تەۋرەپ ، تولغىنىۋاتقان تۆھپىكار تارىم ! تەڭرىقۇتتەك ،تۇنيۇقۇقتەك ،تەۋپىقتەك تۇلپارلارغا تىل-تۇمار تارىم ! تارىخنىڭ تاسقاشلىرىدا توختىمىغان تىلسىم تارىم ! تەڭرى تەكلىماكانغا تاشلىغان تەۋەرۈكسەن ، تۇرقى تىك تەڭرى تېغىدىن تارقىلىپ ،تەكلىماكاننىڭ تومۇر-تومۇرلىرىغا تاشلىندىغان تۇتىياسەن ، تاشلىغانغا، تاتلىغانغا تىزلانمايدىغان توغراقلارنىڭ تەختىسەن .
تىلىم تەسۋىرگە تىلەمچىدۇر، تايىنى تىللاغا توختىمايدىغان ،تەمسىز تىلىمدا تەرىپىڭنى تۆكۈۋاتىمەن .تۇيغۇمدا تاراملىرىڭغا تاشلاندىم ،تامچىلىرىڭنى تامشىپ -تامشىپ تېتىدىم . تاتلىق ، تاتلىق تونۇش تەم ! تىتىردىم ، تولغاندىم ، تۆت تەرىپىڭگە تەلمۈرۈپ توۋلىۋەتتىم !
تارىم ، تارىم !!!
تۈنۈگۈنلا توغراقلار تۆت تەرىپىڭنى توپ-توپ توراپ تۇرغان ، تالماس تۆگىلەر تۇمشۇقىنى تامچىلىرىڭغا تېنىمسىز تىقىپ تۇرىدىغان ، تومۇچۇق ، تۆمۈرتۇمشۇق ، تورغايلار توختىماي توۋلايدىغان ،تىلسىماتلار تېگىڭدە تېنىپ تۇرغان ،تاراملىرىڭ ،تامچىلىرىڭ توسۇن تايدەك ،تۇلپاردەك تاقلاپ تۇرغان تەبئەتتىكى تەنھا تارىمتىڭ .
توۋا ، توۋا ! تىلىم توختىدى ،تولغانماقتىمەن ، تېرىكىمەن ، تىللاۋاتىمەن !
تاراملىرىڭ تارىيىپ ،توغراقلار تۈگەشكە تايىن تېپىپتۇ ، تورغايلار تەمتىرەپتۇ ، تۈركۈم -تۈركۈم توسمىلار تىنىقىڭنى توسۇپتۇ .
تىللا- تەڭگىنىڭ تەمىنى تېتىپ قالغان تەخسىكەش ،تويمىغۇر، تاماخۇر ، تەييارتاپ ،تادان تۈلكىلەر تۇمشۇقىڭدىن تارتىپتۇ . تەھلىلى تار، تەپەككۈرى تار ، تەدبىرى تالاي تىجىمەللەر تەستىقسىز تاغارلىرىنى تۇلۇمدەك توشقۇزغاندا توختاپتۇ ، تەقدىرىڭنى تاۋۇتقا تىققىلى تەييارلىنىپتۇ ...
تۈگىمەس تىڭىرقاش ، تەمتىرەشكە تولۇپسەن .
تەڭتۇشلىرىمغا تەشەببۇسۇم ؛ تارىم تاقىرلاشمىسۇن ، تارىم توغۇرسىدا تور، تېلفۇن ، تېلۋۇزۇر تەشۋىقاتقا تولسۇن ،تارىم توغۇرسىدىكى تەتقىقاتىمىز توختىمىسۇن ، تاكامۇللاشسۇن ،تارىمغا تەماسىز تەر تۆكەيلى ! تال -تال توغراقلارنى تىكەيلى ! تارىم توختىمىسۇن ، تارىمنىڭ تىۋىشى تەكلىماكانغا تارقالسۇن !
|
ۋاقتى: 2014-3-16 15:48:15
