يارى: كۆز ياش ئۇرۇقلىرى

رۇزى كېرەم يارى · ۋاقتى: 2014-1-28 00:28:07


	«ئىزگۈ تور ئەدەبىيات مۇكاپاتى» پائالىيتىگە ... كۆز ياش ئۇرۇقلىرى نەسىرلەر روزى كېرەم يارى كۆز ياش ئۇرۇقلىرى مۇھتاجلىقتا ئۈمچەيگەن لەۋلىرىم ۋاقىتنىڭ كۆزىگە تەلمۈرۈپ قارىدى . ۋاقىتنىڭ لەۋلىرىگە سانسىز ئادەملەر يېپىشىۋالغان ئىدى . ئۇنىڭ لەۋلىرى قۇم دەرياسىدەك ئاقاتتى . ئۇنىڭدىن قۇيۇق توپا – چاڭنىڭ ھىدى كېلەتتى . ئىچى – ئىچىدىن قۇرغاق ، شۇ قەدەر قۇرغاق ... كۆزلىرىم بىر نوقتىدا قېتىپ قالدى . لەۋلىرىم ئاستا – ئاستا تۇزىۋاتاتتى . ئۇنىڭ تۇزىغان تۇزۇنداقلىرى بۇرنۇمنى ئېچىشتۇردى . كۆزلىرىمدىن دومىلاپ چىققان بىر تامچە چاڭ – توزانلارنى ئۆزىگە تارتىپ ، قۇم ئۈستىگە چۈشتى . قۇملار لەرزىگە كەلدى . قۇياش كۆتۈرۈلۈپ يىراق – يىراقلاردىن باھار شامىلى كېلىشكە باشلىدى . ئۇنىڭ ئىللىق ھىدى ، نەمخۇش مۇھەببىتى تۇپراقنى تىرىلدۈردى . ئادەملارنىڭ كۆز يېشى نەقەدەر ساپ ھە ! ئۇنىڭدا زادى نېمىلەر بار ؟! مۇھتاجلىق ، ئەلەم – دەرت ، ھەسرەت ، سېغىنىش ، ئازاپنىڭ ئورۇقلىرىمۇ ؟ غەمخورلۇق ، ئىچ ئاغرىتىش ، ھەمدەرتلىك ، ھېسداشلىق ئورۇقلىرىمۇ ؟ خوشاللىق ، ھاياجان ، بەخت ، ۋىسال شادلىقنىڭ ئورۇقلىرىمۇ ؟ نادامەت پۇشايمان ئورۇقلىرىمۇ ؟ تۇزلۇققىنە بىر تامچە ! مەن ئۇنىڭ سىڭىپ كېتىۋاتقانلىقىنى كۆردۈم . مەن ئۇنىڭ قول ياغلىقنى ، ياغلىق ئۇچىنى ، ئېتەكلەرنى ھۆللىگىنىنى كۆردۈم . مەن ئۇنىڭ ئادەملەرنىڭ كۆزىدە چاقنىغىنىنى ، ئاندىن مەڭىزلەرنى يالاپ ئۆتۈپ ئېڭىكلەردە توختىغىنىنى كۆردۈم . ئۇنى ئالقىنىمغا ئالغىنىمدا ئۇ ئالقىنىمدىكى ئۇششاق ئېرىقلارغا تارقاپ كەتتى . ياشاڭغۇراپ تۇرغان كۆزلەر ! جىمجىت كېچىدە مۇھتاجلىقتا ئۈمچەيگەن لەۋلىرىم ۋاقىتنىڭ كۆزىگە تەلمۈرۈپ قارىدى . ۋاقىت كۆزىنى يېرىم يۇمۇپ ، پەرۋاسىزلىق بىلەن كېتىپ باراتتى ... ئادەملەرنىڭ كۆز يېشى نەقەدەر ساپ ھە ! ئۇنىڭدىكى قىرتاقلىق ھاياتنىڭ تەمىنى تەڭشەشكە تامامەن يېتىشىدۇ . ئۇ زادى قانداق ئورۇق ؟! نۇر كېچىلەرنى تەنھالىققا باشلاپ بارغۇچى ئەي قۇش ! جىمجىتلىق بوستانىدىن سۆرەن – شاۋقۇنلۇق باياۋانغا پەسىل ئۆتكۈزۈشكە كەلدىڭمۇ ؟ كىشىلەر ھەقىقەت ئىزدەپ ئۇنىڭ ئېشىكىنى ئاران تېپىپ كېلىشتى . ئۇلار مۇشتلىرى بىلەن دەرۋازىنى بۇلۇشىچە ئۇرۇپ قوللىرىدىن تارام – تارام قانلار ئاققۇزۇشتى . ئۇلار شۇ تەرىقىدە ھالسىزلىنىپ ھوشىدىن كەتكىنىدە ، ئۈمىدسىزلىنىپ ئارقىغا قايىتقىنىدا ياكى دەرۋازا يېنىدىن ۋاقىتلىق ئايرىلىشقانلىرىدا دەرۋازا ئېچىلدى . ئۇ ھۇشسىزلىنىپ يىقىلغانلارغا سەپ سالدى .كۆپ قىسمى ئاللىبۇرۇن جان ئۈزگەن بولسا ، بىر قىسمى تىزگىنسىز قالغىنىدا ئىختىيارسىز ئۆزلىرىنىڭ ماڭغان يوللىرىغا پۇشايمان قىلغانلىقى ئۈستىدە نالە – زار قىلىشماقتا ئىدى . ئۆلۈم – بىر قارا ئۆڭكۈر ! نىجادىيەت ئۇنىڭدىن تارىلىۋاتقان نۇر . پاراسەت ئىللىق نۇر چېچىپ تۇرماقتا ! ئۈمىد شامال ، بەخت – رەڭگارەڭ گۈل ، ئېتىقاد چىغىر يول ، ئادەم مەۋجۇدىيەت ئۆڭكۈرىدىن چىقىپ ، نىجادىيەت نۇرى تارقاۋاتقان تەگسىز قارا ئۆڭكۈرگە ماڭغان سەپەرچى . قارا ئۆڭكۈر نېمىشقا نىجادىيەت نۇرى تارقىتىدۇ ؟ تۈن دەرىخى باراقسان ئۆسۈپ چېچەكلەر ئاچقىنىدا ئۇنىڭ پۇرىقىدىن مەست بولغۇچى خەيرىلىك چۈشلەر قوينىدا ئۆزىنى يەنە بىر قېتىم بايقىدى . ئۇ رىئاللىقتىكى ئاجايىباتلارنى تاماشا قىلىۋاتقىنىدا تەپەككۇر قۇشلىرى پەرۋاز قىلىپ كىلىپ شاخلاردىن ئورۇن ئالدى . ئۆلۈم راستتىنلا نىجادىيەتمۇ ؟ نېتزى : «يوقالسۇن ئاجىزلار !» دەپ توۋلىغىنىدا ئۆلۈم – نىجادىيەت دەپ ئويلىغانمۇ ؟ ئەگەر مۇشۇنداق بولسا ئۆلۈم راستتىنلا نىجادىيەت بۇنىڭدا شەك يوق . ئۇنداقتا نىجادىيەت نۇرى نېمىشقا قارا ئۆڭكۈر ئاغزىدا چاقنايدۇ ؟ بەخت – رەڭگارەڭ گۈل ! ئاشق مەشۇقىغا شۇڭا گۈل تەغدىم قىلىدۇ . پاراسەت – ئۇ قۇياش . ئۇ ئىنسانىيەت دۇنياسىنى يۇرىتىدۇ . ئۇلارغا ئۈن – تىنسىز ھەم ناھايىتىمۇ سىرلىق ھالدا ئاجايىباتلارنى سوۋغا قىلىدۇ . چىغىر يول سەن ماڭمايدىغان يول ئەمەس. بىراق ، ماڭغاندا ئازمايدىغان يول تېخىمۇ ئەمەس . ئازغاندا سېنىڭ بارىدىغىنىڭ سەن كۈتكەن مەنزىل ئەمەس . بىراق ، بۇ يەردە ئېزىشنىڭ زادى قانچىلىق ئىكەنلىكى ئاخىرقى ھۆكۈمگە ئاساس بولىدىغان ئەڭ مۇھىم نوقتا ! زىمىستاندا سەن شامالغا مۇھتاج ئەمەس . بۇ خاتا ! بۇنداق دىگىنىم سېنىڭ ئۇنى شىۋىرغان دەپ ئويلاپ قالغىنىڭ ! سەن زېمىستاندا تۇرۇپ باھار شامىلىغا تەلپۈنەمسەن ؟ تۇمۇزدا شامالنى سېغىنامسەن ؟ بىراق ، ئۇ بوران بۇلۇپ كەتمىسۇن ! ئاھ ، سەپەرچى ! غايىۋى خىياللىرىم ئارىسىدا تېڭىرقاپ قالما ! مەن سېنىڭ ئادەتتىكى تۇرمۇشۇڭنى ئەڭ چۈچۈك ئەدەبىي تىلدا سۆزلەۋاتىمەن . سەن ئاددىي تۇرمۇشۇڭنى كۆز ئالدىڭغا كەلتۈر ! سەن ساپ ئۇيغۇر تىلىنىڭ ساماسىغا قۇلاق سال . مەن بۇ ئۇزۇن يولدا ساڭا مۇڭداش ، سەپەرداش . ئەگەر مەن سېنىڭ يېنىڭدا تۇرۇپ قۇلۇقىڭغا پىچىرلىسام ، سەن ئۇنى مەنىسىز قۇرۇق پاراڭ دېمە ؟ ئۇنىڭدىن يىرگەنمە ! پاراسەت نۇرى ئۇنى ياشارتىپ ، نىجادىيەت نۇرىغا قاتقۇسى ! قىسمەت ئەقىلنىڭ ئاۋۇشى ئادەمنى گۇمانخور باشقىلارغا ئىشەنمەس قىلىپ قويىدۇ . يەنە قانائەتسىز قىلىپ قويىدۇ . ئۇ ئادەمنىڭ قانمىغان ئاللىقانداق ئېھتىياجلىرى ئۈچۈن تىپىرلايدۇ . ئىچى ئېتىشىدۇ . ئىچى پۇشىدۇ . ئۇ خۇددى توغاندا تۇسۇلغان سۇدەك دەۋرەيدۇ . ئۇنىڭ دەۋرىشى گاھى جىمجىتتەك بولسا ، گاھى دولقۇنلۇق . ئۇنىڭ بېشى قاتىدۇ . ئۇ ئۆز ئالدىغا يول ئاچماقچى بولىدۇ . ئىزدەيدۇ ئەمما ، يىنىكلىك بىلەن ھەركەت قىلشتىن ساقلىنىدۇ . چۈنكى بۇ يىنىكلىك ئۇنى مەڭگۈلۈك نادامەتكە باشلاپ قويامدۇ ؟ ياق دەيدۇ ئۇ ئۆزىگە . تەۋەككۇل قىلىپ بېقىش كېرەك . تەۋەككۇل دەرياسىغا كېمە سالماي تۇرۇپ ، يەنە نېمىدىن ئۈمىد كۈتۈش مۇمكىن ؟ سەۋىر – تاقەت ۋاقتى ئۆتكەن نەرسە ئەمەس . ئۇ زامانىۋى جەمئىيەتتە ئادەملەر ئېرىشىشنى ئىزدەيدىغان ماھارەت ، تېخنىكا بۇلۇپ قالدى . ئىشەنچ – ئۇ تېز سۈرئەتلىك تاشيول ، ئەقىل – ئېدراك نىشانغا دەل تېگىدىغان قورال بۇلۇپ قالدى . ئۈمىد ، ئىرادە بولسا نىشانغا ۋاقتىدا تېز يەتكۈزەلەيدىغان ئاۋازدىن تېز قاتناش قورالى . شۇنداق ! پۇرسەتلەر كۆپ ، ئىمكانىيەت كەڭ . ئەمما كۈچ – قۇدرەتچۇ ؟ بۇرۇنلاردىكى ئىككىلىنىش ھازىرقى ھەمكارلىق دىگەن گەپكە ئالماشتى . چۈنكى كۈچتۈڭگۈر ، قارام ، لۈكچەك ئادەملەر قالمىدى . بولسىمۇ ئۇلاردىكى ئەشۇ خۇسۇسىيەتلەر ئاجىزلاشتى . ئادەملەردىن ئادەملەر كۈچلۈك ، ئەقىللىق ! ئۇلار ئۆزى باش بولماقچى بۇلۇشىدۇ . شۇنداق ئىكەن ئۇلار بىلەن ھەمكارلىشىش كېرەك . شۇنداق قىلمىسا قېنى كۈچ – قۇۋۋەت ! مەڭگۈلۈك نادامەتكە قېلىشنىڭ يەنە بىر شەكلى ھېچ ئىش قىلماسلىق ، جاھاننىڭ رەپتارىغا كىرىۋېلىپ كۈن ئۆتكەنگە شۈكرى قىلىش . بۇ ئادەمنى تۈگەشتۈرىدۇ . جىسمانىي ، ئەقلى ، روھى جەھەتتىن ئاستا – ئاستا ۋەيران بولىدۇ . تەپەككۇر ، ئەقىل – ئىدراك ، پاراسەت ، ئىجادكارلىق ئىلمىنىتلىرى باشتا ۋەيران بولىدۇ . ئاندىن ئەخلاق ، ئېتىقاد ئاجىزلايدۇ . ئاندىن روھىي جەھەتتىن مەغلۇپ بولغان تېنىنى ئازاپلاشقا باشلايدۇ . ئادەملەردىن قاچىدۇ . ئۆز خىيالىغا بېرىلىدۇ . قىلغان ئىشى تۇتامسىز . باشقىلارنى ئەيىپلەپ ، ئۇلاردىن يىراقلىشىدۇ . ھەممە گۇناھ ئەيىپنى باشقىلارغا ئارتىدۇ ئۆزى بولسا گۇناھسىز ، ئۇۋالچىلىققا ئۇچرىغۇچى ، زىيان تارتقۇچى دەپ ئويلايدۇ . بۇلار نادامەتتە قالغانلار بولسىمۇ ، ھەتتا نادامەتنى چۈشىنىش ئىقتىدارىنى يوقاتقان بولغاچقا ، بۇلار يۇلۇققان تەغدىر ئېچىنىشلىق قىسمەتتۇر . گۈزەللىك ھەركىتى نۇرانە ئىستەكلەر ئىلكىدە چاراقلايمەن . ئۆزەمنىڭ مەغلۇپ بولغان روھىمنى بەخت گۈلشىنىگە باشلايمەن . ئۇنى ئەڭ گۈزەل گۈللەرگە مەپتۇن قىلىپ قويىمەن . ئۇنىڭ ئۈمىدۋار تۇرقى مېنى ئەڭ يىراق كەلگۈسى توغرىسىدا گۈزەل ، تېخىمۇ ئەلۋەك خىياللار ئىلكىگە باشلايدۇ . رېئاللىق ئىلكىدە توڭلىغىنىمدا گۈلشەنلەرنىڭ سارغايغانلىقىنى ، گۈللەرنىڭ توزۇپ ، ئۆزەمنىڭ سۇلغۇنلۇققا پاتقان چىرايىمنىڭ خۇرسىنىش ئىچىدە داۋالغۇپ تۇرغانلىقى ئايان بولدى . ئەمما ، مەن ئەشۇ دىلنى پارە قىلىدىغان گۈزەللىك ھەركىتى ئىچىدىن ئەڭ قۇدرەتلىك بىر مەنبەنى تاپتىم . قەلب ئاھاڭى قەلبىمنىڭ ئاھاڭى ئۆز مەرغۇلىغا يورغىلايدۇ . كىشىلىك ھايات بىلەن ئۇنىڭ ئوتتۇرىسىغا ھاڭ ئويۇلغاندەك ، كىشىلىك ھايات تەرەپتىن ئاڭلانغان ئەكىس سادا قەلبىمنى ئۆزلىكسىز تىترىتىدۇ . قەلبىم تەرەپتە تۇرغاندا كىشىلىك ھايات تەرەپتىن كەلگەن سادا مېنى ئۈمىد بىلەن ئۈمىدسىزلىك ئارىسىدا ھالسىرىتىدۇ . مەن بىر يول تېپىشنى ئويلايمەن . ئەمما ، جۈرئەت قىلالمايمەن . ۋاز كېچىش دىگەن بۇ گەپ مېنىڭ ئالدىمدا گويا ئىپپىتى بۇزۇلمىغان قىزدەك نازلىندۇ . مەن يىگىتلىك قاراملىقىمغا تەلمۈرىمەن . ئەمما ئەقىل قەلبىمگە تەنبىھ بېرىدۇ . كىشىلىك ھاياتنىڭ يوللىرىدا بوران ئۇشقىرىتىپ ھازىرلا قار ياغىدىغاندەك ئىزغىرىن يۈرەككە سانجىلىشقا باشلايدۇ . مەن مۇھتاجلىقنىڭ ھېلىقى كونا كەپىسىگە قاراپ ماڭىمەن . نازىنىن كۆزلىرىنى سۈزگىنىچە ئەشۇ جايىدىلا قالىدۇ . يىگىتلىك خۇددى ھوردەك قاياقلارغىدۇر غايىپ بولىدۇ . بىچارە تۇرقۇم كونا كەپىگە ماسلىشىپ قالىدۇ . ئەينەك ئالدىدا ئۆزەمنى تۈزەشتۈرۈپ ، باشقىلاردىن كام يېرىم يوقلۇقىغا ئىشىنىپ قالىمەن . قەلبىم ئۇيقۇغا چۆكىدۇ . كىشىلىك ھايات قاينام – تاشقىنلىققا تولغان قۇشۇنى بىلەن ئۆزلىكسىز ئالغا سىلجىيدۇ . يىگىتلىك قاراملىقىم ئوزۇن يىل ئىشلىتىلمىگەن ئەسكەردەك ، ئوۋغا چىقىپ باقمىغان ئوۋچىدەك ، قارىغا بەتلىنىپ باقمىغان مىلتىقتەك ، كېرىچكە چۈشۇپ قۇيۇپ بېرىلىپ باقمىغان ئوقتەك ، باغلاقتا تۇرغان يۇۋاش ئاۋاق ئىتتەك ... شۈمشىيىپ قالىدۇ . مەرغۇل ئۇزۇن يىللار ئالمىشىپ باقمىغاچقا ، قۇلاقلار كۈنۈك ، يۈرەك شادلىق تاماسىدا ئىنتىزار ، جىملىق گويا ئۇنىڭ مەڭگۈلۈك چۈشۈرگىسىدەك ... ئازما ، ئىنسان ! ھاياتلىقتىكى رىسقىم زېمىن ئۈستىگە چېچىلغان . ئۇنىڭ ئۆزى بىخلاپ ماڭا ئۇچرىشى تەلەي – ئامىتىم ، ئۇنى تالاي رىسىقلار ئىچىدىن ئۆز ئەجرىم بىلەن بايقاپ تېپىشىم بەختىمدۇر . ئەمما ، مېنىڭ ئېرىشكىنىم ھەم ئېرىشمەكچى بولغانلىرىم تەلەي – ئامىتىم بولدى . بەختىمنى تېپىش ئەجىر – ئەزىمدىن بولسىمۇ ، مېنىڭ ئەجرىم قاياقلارغىدۇ توزۇپ ئۇچقان توزاندەك بەخت ئۈچۈن زەرىچە بەرىكەت بولمىدى . ئادەم تەنھا بولغاچقا ، كېلىپ كېتىشى تەنھالىققا مەھكۇم ! دېمەك قايسى ، قانداق يولدا مېڭىش ھەر كىمنىڭ ئەقىل – دېتى ، ئىمكانىيەت ۋە قەلب تارازىسىغا باغلىق . مەن ئىككى يۆلىنىش ئالدىدا تېڭىرقىدىم . تەلەي – ئامەتنى كۈتۈش مېنى پايانسىز چۆلنىڭ چاڭقاقلىق تولغان باغرىدىكى ئالۋۇنغا باشلارمۇ ؟ ئەجرىم مېنى تىنىمسىز دېڭىزنىڭ چاڭقاقلىققا تولغان باغرىدىكى ئالۋۇنغا باشلارمۇ ؟ مانا بۇ ئىككى يولدىكى بىر ئادەمنىڭ بىرخىل تەغدىرى ئىدى . ئەمما ، مېنىڭ مايىللىقىم ئالدىنىقى يولغا ، خىيالىم بولسا كىيىنكى يولدا ئىدى . بۇ مېنىڭ تۇتامسىزلىقىم ئىدى . لېكىن ئۆزەمنى ئاقلىسام ھېچنېمىنى ئويلىماي ئۈن – تىنسىز ياشاشتىن ، ياشاش غېمى ئۈستىدە ئويلىنىشىم تېخىمۇ زۆرۈر ئىدى ھەم بۇ مەندىكى ئۈمىدنىڭ شەپىسى ئىدى . يەنە بىر تەرەپتىن ئۇزۇنغا سۇزۇلغان تېڭىرقاش بەجايىكى ماڭا ھېچنەرسىدىن دېرەك بەرمەيتتى ھەم ئەقىل – دېتىمنى ئاجىزلاشتۇرۇپ ، مېڭە ، يۈرەك ، ئاشقازان ، جىگەرلىرىمگە بېسىم بولاتتى . بىر توغرا يول كۆرسەتكۈچىگە مۇھتاجلىقىم ھەم مېنى قوللاش ۋە يۆلەشكە ئۆزىنى قۇربان قىلالايدىغان ئەزىزلىرىم ئەتراپىمدا پەرۋانە بولسىمۇ ، بۇ يۆلىنىشنى تاللاش ئۆتكىلىنى ئۇلارغا ھاۋالە قىلغاندىن ئۆزەمنىڭ بۆسۈپ ئۆتكىنىم يېرىم غەلبىدىن دېرەك بېرەتتى . ئەي ، ئىنسان ! ئازما ... بەخت بىر خىل تۇيغۇ بەخت بېشىمغا سايە تاشلىغىنىدا مەن چاڭقاشقا كۈنۈككەن روھىمدىن بۇ سايىنىڭ ماڭا جان ئاراملىقى بەخش ئېتىش بىلەن بىرگە يەنە بىرخىل تىترەش توغرىسى سىلكىنىش ئېلىپ كەلگەنلىكىنى ھېس قىلدىم . بەخت بېشىڭغا قونغاندا ئۇنىڭ كەيپىدىن مەسخۇش بۇلۇپ ئۆزەڭنى يوقىتىپ تۇرامسەن ؟ ئەمما مەسخۇشتلۇقتىن كىيىن كەلگەن رېئاللىق سېنى ئاچچىق كەچۈرمىشلەر قوينىغا باشلايدۇ . ئىزتىراپ سېنى ئاجىز ئورۇنغا چۈشۈرۈپ قويغىنىدا ، بەخت دىگەن بۇ نەرسىنىڭ سەن ئۈچۈن تولىمۇ بىر ئۆتكۈنچى ھېس تۇيغۇ ئىكەنلىكىنى ، داۋاملىق ياشاش ، تىرىشىش ، يوقىتىش ۋە ئېرىشىشلەرنىڭ مەڭگۈلۈك قانۇنىيەتلەر ئىچىدىكى سىلكىنىشلەر ئىكەنلىكىنى بىلىشىڭ كېرەك . بۇ ئەقەلىي ساۋاتلار سېنى بىلىملىك قىلالمىسىمۇ ، تەسەللىي بولسىلا بولىدۇ . سەن ئۇنى ئۆگىنىۋېلىشقا زور كۈچ سەرپ قىلىسەن ئۇقۇشقا بولسا بىردەملىك . ئۈمىدۋار روھىڭ ئۈچۈن بەخت دىگەن دان چېچىلدى . تەييارنى يەمسەن ياكى بىپايان دالىدا ئۆزەڭ دانلامسەن بۇ ئۆزەڭنىڭ ھايات يولى . بەخت ئادەمە بېرىلگەن تەسەللىي ، مۇكاپات ۋە ئىلھاملاندۇرۇش . ئۇ ھەرگىز نام – نىشان ، ئەمەل – مەنسەپ ياكى مەڭگۈلۈك مىراس ئەمەس ! ئۇ گاھىدا كىچىككىنە ! ئۇ مەڭگۈ مۇقىملىققا ئىگە ئەمەس . بۇ توغرىدا بىر دوستۇم ماڭا مۇنداق دىگەن . بۇ گەپنى ساڭىمۇ دەپ بېرەي : - بىر ئىشنى قىلىپ ئوخشاش نەتىجىگە ئېرىشكەن ئىككى ئادەمنىڭ شۇ ئىشتىن ھېس قىلغان بەخت تۇيغۇسى مەڭگۈ ئوخشاش بولمايدۇ . قانائەت – غەلبىدىن كىيىن بولىدۇ قانائەت قىلىشنى ئۆگەن ! قانائەت ئادەمنىڭ روھىنى يۈكسەلدۈرىدىغان ، چىدامغا غەيرەت ئاتا قىلىدىغان ، ھالسىرىغاندا ئارامبەخىش راھەت ئاتا قىلىدىغان تۇيغۇ . قانائەت غەلبە تەنتەنىسىدىن كىيىن بۇلۇشى كېرەك . چۈنكى ، سەن غەلبە خوشاللىقىدىن كىيىن ئۆزەڭنى دەڭسەپ بېقىشقا ، ئۆز ھەركىتىڭدىن خۇلاسە چىقىرىپ ، كەمچىللىك ۋە ئارتۇقچىلىقلارنى ھېس قىلىپ بېقىشقا مۇھتاج . سېنىڭدە شۇنداق بىر ئىدىيە تەييارلىقى بولغىنىدا غەلبىدىن غەلبىگە ئاتلىنىش سېنىڭ مەڭگۈلۈك ھەركەت نىشانىڭ ۋە ئۆزلىكسىز ئېرىشىدىغان نەتىجەڭ بولغۇسى ! ئەمما ، ھەركەتسىز ، نىشانسىز ، غەلبىسىز بىر ئادەمنىڭ قانائىتى نېمىدىن دېرەك بېرىدۇ ؟ بۇ قانائەتنىڭ ئەسلى مەنىسى ۋە ئىشلىتىش ئورنى ئەمەس . ئەجەبا ، روھى ماددىي جەھەتتىكى چاڭقاقلىقى سەۋەبىدىن يەنە قانائەتكە مۇھتاجمۇ ؟ مەن باشتا دىگەن : «قانائەت – غەلبىدىن كىيىن بولىدۇ » . شۇنداق بولغاندا ئۇنىڭغا ھەقىقىي مەنە يۈكلىنىدۇ. غەلبە – ھەممىسىلا سېنىڭ نەتىجەڭ ئەمەس ، بەلكى ھەر بىر تەپەككۇرۇڭ ، تەپەككۇردىن كىيىنكى ھەركىتىڭ ، باسقان قەدىمىڭ ، ئېرىشكەن نەتىجەڭ ياكى مەغلۇبىيىتىڭ ... «ئىزگۈ تور ئەدەبىيات مۇكاپاتى» پائالىيتىگە ... بۇ يازمىنى ئاخىرىدا رۇزى كېرەم يارى تەھرىرلىگەن. ۋاقتى 2014-2-6 18:50

ئايشەم1 · ۋاقتى: 2014-1-28 15:59:29


	مەن پەقەت ئىككى تېمىڭىزنى ئوقۇدۇم نەسىر ياخشىكەن ، مەنزىرلەرنى تەسۋىرلىشىڭىزمۇ ، جەلىپ قىلارلىق بۇپتۇ . ئاخىرىنى داۋاملىق ئوقۇيمەن.

رۇزى كېرەم يارى · ۋاقتى: 2014-1-30 16:30:36


	رەخمەت سىلىگە ! ئۇستازلارنىڭ پىكرى بىز ياشلار ئۈچۈن ئەلۋەتتە ئەڭ ياخشى پەرۋىش !

رۇزى كېرەم يارى · ۋاقتى: 2014-2-3 19:13:16


	مەن نېمە بۇلۇشىدىن قەتئىينەزەر داۋاملاشتۇرماقچىمەن ، كەچۈرۈڭلار ! «ئىزگۈ تور ئەدەبىيات مۇكاپاتى» پائالىيتىگە ... رۇزى كېرەم يارى يۇلۇچى تەنھالىقنىڭ بۇلۇتلىرى سۈرۈلۈپ كېلىپ ، يامغۇر تۈكۈشكە تەييارلانغىنىدا ئۆزەمنىڭ بۇ تىنىچسىز ماكاندا تولىمۇ يالغۇز ئىكەنلىكىمنى ھېس قىلىپ قالىمەن . بۇ ئوزۇن كېچىلەرنىڭ قاندانداقتۇر بىر جايلىرىمغا سۈركىلىپ ئارام بەرمەيۋاتقان دەۋىتى مېنى قاتتىق ئازاپلايدۇ . بەلكىم ، بۇ ئوزۇن كېچىلەرنى ئۇنتۇش - ئۇنىڭ ئەشۇ پايانسىزدەك بىلىنگەن غەلىتە قوينىدىن ، ئەركىن ھالەتتە غۇلاچ تاشلاپ ئۈزۈپ چىقىپ كېتىشىم تامامەن مۇمكىندۇ ؟ ئەجەبا ، مۇشۇ چىنىدىكى چايچىلىك كۆڭلۈمگە تەسەللىي بولغىدەك ... ئۇنتۇلغان ئادەم تەنھالىقىدىن ئازاپلىنىپ كېچىنى ئۇنتۇشقا تىرىشىپتۇ . ئۇ ئويلاپتۇ ، ئويلاپتۇ ، مېڭىپتۇ – مېڭىپتۇ ، ئۆزىنىڭ قانچىلىك ئويلىغانلىقىنى ، قانچىلىك ماڭغانلىقىنى بىلەلمەيدىغان ھالەتكە يەتكىنىدىلا ئۈچ ئاچا يولنىڭ ئاغزىغا كىلىپ توختاپتۇ . بىر يولغا «بارسا كەلمەس» ، يەنە بىر يولغا «بارسا كېلەر» ، يەنە بىر يولغا ھېچقانداق نام يېزىلمىغانىكەن . يۇلۇچى قايسى يولنى تاللىسا بولار ؟ ساڭا ئاق يول تىلەيمەن ئەي يۇلۇچى ! قەلبىم ساڭا نۇرغۇن ۋەدىلەرنى بېرىدۇ . شېرىن سۆزلىرىم لەۋلىرىڭگە سۆيىدۇ . ساڭا بولغان ئىشەنچىم چاڭقىغان قەلبىڭنى قاندۇرىدۇ . ساڭا بولغان ساداقىتىم ھەم خالىس نىيتىم ساڭا ئىشەنىچ ئاتا قىلىدۇ . مەن بۇ تەنھالىقنى ئۆزەم تاللىغان . مەن ھامان بىر كۈنى كېچە قوينىدىن سەن ئۈچۈن تۇلۇن ئايدەك ، ئۇلار ئۈچۈن تاڭ قۇياشىدەك پارلاپ چىقىمەن ! سېنىڭ كۆز يېشىڭ تەنھا ياشاشنى تەرىك قىلاي بۇ تۈكۈلىۋاتقىنى راستىنلا سېنىڭ كۆز يېشىڭ بولسا ... يامغۇردىن كىيىنكى شامالدا تىترىگەن ياپراقتەك ... مۇزلىغان گۈل بەرگىدەك ... بىز ئاخىرقى كۈچىمىزنى يىغىپ بۇ تاغنى نۇرۇتايلى ! سەن مېنى مەڭگۈ بىرگە ياشاشقا تاللىغان بولساڭ ، مەن سېنى مەڭگۈلۈك ھەمراھلىققا تاللىدىم .تاڭنا كۈنلەردە بىز بىرگە ئاي سەيلىسى قىلىمىز . سۈبھىنى كۈتىۋالىمىز . بىخلارنىڭ چوڭىيىۋاتقانلىقىنى ، مۇزلارنىڭ ئاستا – ئاستا ئېرىپ ئەگىز بولغانلىقىنى ، يەرلەرنىڭ بوشاۋاتقانلىقىنى كۆرىمىز . قارلىغاچلار كېلىدۇ .مەن ئۈرۈك چېچىكىنى سۇندۇرۇۋېلىپ قۇلۇقىڭغا قىستۇرۇپ قويىمەن . سەن ھەر سەھەر ئويغانغىنىڭدا ھۇجرىمىزدىكى ھېلىقى لوڭقىدا بىر دەستە قىزىل گۈلنىڭ خۇشپۇراق چېچىپ تۇرغانلىقىنى كۆرىسەن ... پەسىللەر بىر - بىرىگە ئۇلۇشۇپ كېلىدۇ ، كېتىدۇ ... بىر كۈنلەردە مەن سېنى يەنە شۇنداق قۇچاقلىغىنىمدا بۇرنۇمغا ئاپئاق ئېچىلغان ئەتىرگۈلنىڭ ھىدە ئۇرۇلىدۇ . سېنىڭ باغرىڭدا تالاي يىللار ۋە قىسمەتلەرنى بېشىدىن ئۆتكۈزگەن بوۋاي گويا توغراقتەك بەردەم قامىتى بىلەن ساڭا سايە تاشلايدۇ ... بىز ئىشىكىمىزدىكى سېرىق سۆگەتنىڭ ئاستىدىكى ئورۇندۇقتا ياندىشىپ ئولتۇرغاندا ئالدىمىزدىن جۈپ – جۈپ يىگىت – قىزلار بىر – بىرىگە نازلىق بېقىشىپ ، بىزنى ئىما قىلىشىپ ، ئىشتىياق بىلەن قاراشقىنىچە ۋىلىقلاپ كۈلۈشۈپ ئۆتۈپ كېتىشىدۇ . بىز ئاللىقانداق ئەسلىمىلەر قوينىدا قاناتلىنىپ ، بىر – بىرىمىزگە قاراشقىنىمىزدا ئارىمىزنىڭ تېخىمۇ يىراقلىشىۋاتقانلىقىنى بايقايمىز . مەن نىدا قىلىمەن : - تەنھا ياشاشنى تەرىك قىلاي بۇ تۈكۈلىۋاتقىنى راستىنلا سېنىڭ كۆز يېشىڭ بولسا ... سەن ، يامغۇردىن كىيىنكى شامالدا تىترىگەن ياپراقتەك ... مۇزلىغان گۈل بەرگىدەك ... كەلگىن ، بىز تاڭ سەھەردە قۇچاقلاشقىنىمىزچە ئۇپۇقتىن قىزىرىپ يالقۇنجىغىنىچە كۆتىرىلىۋاتقان قۇياشنى بىرلىكتە كۈتىۋالايلى ! «ئىزگۈ تور ئەدەبىيات مۇكاپاتى» پائالىيتىگە ... بۇ يازمىنى ئاخىرىدا رۇزى كېرەم يارى تەھرىرلىگەن. ۋاقتى 2014-2-6 18:48

رۇزى كېرەم يارى · ۋاقتى: 2014-2-5 18:44:34


	«ئىزگۈ تور ئەدەبىيات مۇكاپاتى» پائالىيتىگە ... گۈزەللىك رۇزى كېرەم يارى ئىنتىلگىنىڭ زادى نېمە سېنىڭ ئىنسان !؟ گۈزەللىك ... كىلاسسىك شائىرلار جىسمانىي گۈزەللىكنى تەسۋىرلەپ يۈرۈيدۇ . پەيلاسوپلار روھىي گۈزەللىكنى سۆزلەپ يۈرۈيدۇ . يۈكسەك گۈزەللىك ئۇ زادى قەيەردە ؟! مۇتلەق گۈزەللىكنىڭ يوقلۇقىغا ئىشەن . يۈكسەك گۈزەللىككە ئىنتىل ، ئۇنى ئىزدە ! يۈكسەك گۈزەللىك روھ ۋە تەننىڭ ئورتاق گۈزەللىكى ئەمەسمۇ ؟! سىرىتقى گۈزەللىك ئادەمنى قايىل قىلسىمۇ ، لېكىن ئەسىر قىلالمايدۇ . روھىي گۈزەللىك ئادەمنى ئەسىر قىلسىمۇ ، لېكىن پۈتۈنلەي رازى قىلالمايدۇ . سىرىتقى گۈزەللىك روھنى قايىل قىلالمايدۇ . روھىي گۈزەللىك جىسمانىي تەلىۋىڭنى رازى قىلالمايدۇ . نېمە دېمەكچى بولغانلىقىمنى بىلىۋاتىدىغانسەن . ؟! ئادەم گۈزەل بولسۇن ! ئۇنىڭ ئىچىمۇ ، تېشىمۇ گۈزەل بولسۇن . سەن مۇشۇنداق گۈزەللىك ئۈچۈن جاندىن كەچسەڭ بولىدۇ . سەن تاغ تىشىۋاتقاندا شېرىننىڭ گۈزەل رۇخسارىنى ئويلىساڭ جىسمىڭ كۈچكە تولىدۇ . ئۇنىڭ قەلبىنى ، مۇھەببىتىنى ئويلىغىنىڭدا چۇقۇم غەلبە قىلىش ئىشەنچەڭ ئاشىدۇ . چۆلدە سەرگەردان بولغىنىڭدا لەيلى ئۈچۈن ھەممىدىن كەچكەنىدىڭ . ئالدىڭدىكى داۋان – بەللەر لەيلىنىڭ يوتىسىدەك ، يىراقتىكى زۇمچەك – زۇمچەك قۇم دۆڭلىرى ئۇنىڭ كۆكسىدەك كۈرۈنگىنىدە سېنىڭ تىنىڭ يىنىك تىترەپ ، چۇقۇم ئۇنىڭدىن ھالقىپ ئۆتۈشنى ئويلىغانسەن . ئۇنىڭ سادىقلىقى سېنىڭ قەلبىڭگە ئۇسسۇزلۇق بۇلۇپ ، تۇنۇردەك قۇملۇقتا ، ئوتتەك ئاپتاپنى يېڭىشىڭغا مەدەت بولغاندۇ !؟ زالىم شاھنىڭ بۇيرۇقى بىلەن سەن ساندۇققا سولانغاندا ، تاغدىن دومىلاۋاتقاندا ، سۇدا ئېقىۋاتقىنىڭدا زۆھرەنىڭ مۇھەببىتى سېنىڭ بۇ زۇلۇملاردىن قۇتۇلۇشقا بولغان ئىشەنچىڭنى ئاشۇرغاندۇ ؟! مەلىكىلەر چاچلىرى بىلەن سېنى دەريادىن سۈزۈپ قىرغاققا ئەچىقىپ ساندۇقنىڭ ئاغزىنى ئاچقاندا كۆزلىرىڭگە كۆرۈنگىنى زۆھرەنىڭ گۈزەل جامالى شۇنداققۇ ؟! ئېتىراپ قىل ... ساڭا ئۇلارنىڭ ھېچقايسىسىنىڭ زۆھرە ئەمەسلىكىنى ئىلغا قىلدۇرغان شۇ مۇھەببەت ئەمەسمۇ !؟ گۈزەللىك ئۇلۇغ ، جىسمانىي گۈزەللىك بىلەن روھى گۈزەللىك بىرلەشكەن گۈزەللىك دەل ئۇلۇغ گۈزەللىك ، يۈكسەك گۈزەللىك ...ئادەملەر ئىزدىگەن ، ئىنتىلگەن گۈزەللىك دەل بەدەن ۋە روھ بىرلەشكەن گۈزەللىكتۇر . ئۇيغۇر ئەۋلادى بۇنى بىلگەي ! «ئىزگۈ تور ئەدەبىيات مۇكاپاتى» پائالىيتىگە ... بۇ يازمىنى ئاخىرىدا رۇزى كېرەم يارى تەھرىرلىگەن. ۋاقتى 2014-2-6 18:47

رۇزى كېرەم يارى · ۋاقتى: 2014-2-6 18:45:36


	«ئىزگۈ تور ئەدەبىيات مۇكاپاتى» پائالىيتىگە ... قۇشلار ناخشا ئېيتىۋاتىدۇ رۇزى كېرەم يارى قۇشلار ناخشا ئېيتىۋاتقىنىدا مەن سېنى ئويلاپ پەرىشانلىققا چۈمدۈم ... قۇشلار جىمجىت بۇلۇپ ، تۇن قوينىغا سىڭىپ كەتكەندە مەن ساڭا ئاتاپ شېئىر يازدىم ... قۇشلار بەرىبىر قۇشلاردە ! مەن شۇڭا كىتاپنى ئېچىپ ، كەلگەن يېرىمدىن باشلاپ ئوقۇدۇم . مەن ئۆزەمنى ئاستا – ئاستا نابۇت قىلىۋاتقانلىقىمنى بىلىپ تۇرساممۇ ۋە يەنە قانداق قىلسام ئۆزەمنى قۇتقۇزۇپ قالالايدىغانلىقىمنى ئۇقساممۇ ، ئۆزەمنى يەنە مەيلىگە قۇيۇپ بەردىم . بەلكىم ، ئاقىۋىتىنى ئويلاپ كۆرمىگەندۇرمەن ياكى ئاخىرىنى كۈرۈپ باقماقچىدۇرمەن . تەۋەككۇلچى بولغان بولسام ئەلۋەتتە بۇ كۈنلەرگە قالمىغان بولاتتىم ياكى بۇ كۈنلەرگە ئېرىشەلمىگەن بولاتتىم . مەن زادى قانداق ئادەم ؟ ھامان ئۆزەمدىن سورىغۇم كېلىدۇ . مەن ئۆزەم بۇ سۇئالغا بىر ئۆمۈر قانائەتلەنگۈدەك جاۋاب بىرەلمەسلىكىم مۇمكىن . ھەممىمىز ئۆزىمىزنى ئۆزىمىز باھالىغان نەتىجىدىن كۆرە باشقىلارنىڭ باھالىغان سۆزىنى ئەلا بىلىمىز ... كېچە قۇشلار مېنى باھالاپ باقسۇن ! ئاسمان مېنى باھالاپ باقسۇن ، زېمىن مېنى باھالاپ باقسۇن . سەن مېنى باھالاپ باق ! بىراق ، مەن بۇنىڭغا ئەرزىگۈچە چاچلىرىم ئاقىرىپ ، قۇلۇمدا ھاسسا تايىقىمنى تۇتقىنىمچە ساڭا تىكىلىپ قاراپ تۇرغان ھالەتكە يېتەرمەن ...قۇشلار بەرىبىر قۇشلاردە ! ئۇلار مېنى تۇنىماس بۇپقالار . چۈنكى ئۇلار قۇشلاردە ! ئانا تۇپراق ، كۆك ئاسمان ، مەن يەنە چوڭقۇر تىنىمەن . بىر يەرلەردىن سېنىڭ ئاۋازىڭ كېلىۋاتىدۇ . مەن كۈلكۈڭنى ئاڭلاپ شۇ بىغۇبار كۈلكىنىڭ مەڭگۈلۈك ساھىبىنى چەكسىز ۋە چەكسىز سېغىندىم ! «ئىزگۈ تور ئەدەبىيات مۇكاپاتى» پائالىيتىگە ... بۇ يازمىنى ئاخىرىدا رۇزى كېرەم يارى تەھرىرلىگەن. ۋاقتى 2014-2-6 18:46

رۇزى كېرەم يارى · ۋاقتى: 2014-2-7 21:16:22


	«ئىزگۈ تور ئەدەبىيات مۇكاپاتى» پائالىيتىگە ... كارۋان رۇزى كېرەم يارى ئاستا بېسىپ كىلىۋاتقان ئۇيقۇ پەرىشتىسىنىڭ نازى ئەس – ھۇشۇمنى ئىگىللەپ ، كېچىدىكى چەكسىز پىنھانلىققا ئاستا تارتقىنىدا ، مېڭەمدە تۇيۇقسىز پەيدا بولغان بىر خىيال كۆزلىرىمگە كىرىك سالدى . بۈگۈن دەل كونا يىلنى ئۇزىتىپ يېڭى يىلنى كۈتىۋالىدىغان كېچە ! بەلكىم يۇپيۇرۇق چىراغ يۇرۇقى ئاستىدا ئولتۇرۇپ ، مۇشۇ مىنۇتلاردىكى ھېس – تۇيغۇلاردىن خاتىرە قالدۇرۇش گويا مۇشۇ كونا يىلدەك ، گويا ياشلىقتەك ، گويا ئىنسان ھاياتىدەك ئادەمگە پەقەت بىر قېتىملا نېسىپ بولىدىغان ئاجايىپ بىر پەيت . بۈگۈن بۇ بەتلەرگە مەيلى نېمىلەرنى يازماي ، تاڭنا كۈنلەردە بۇلار مېنىڭ ئەشۇ تىنىچ ، دەب – دەبىسىز ئۆتكەن ئاددىي ھاياتىمنىڭ ئەڭ يالقۇنلۇق خاتىرىسى بۇلۇپ قالىدۇ . چەكسىز مۇھتاجلىق قاپلىغان تېنىمنى گۈللۈك ئەدىيال بىلەن ئوراپ ، قەلىمىمنى قاماللىغىنىمچە ، ئالدىمغا سېلىق دەستىخاندىكى پەتنۇسقا ، پەتنۇس ئىچىدىكى نان ، پىيالىغا ؛ پىيالە ئىچىدىكى لازا قىيامى ۋە قۇشۇققا ... قارىغىنىمچە ناندىن بىر بۇردا – بىر بۇردىدىن ئۇشتۇپ ئاغزىمغا سېلىپ ، ئالدىرىماي چاينىغاچ بۇ قۇرلارنى پۈتىۋاتىمەن ! ئادەم ھاياتى ماددا بىلەن روھنىڭ كۆرىكى . مەن ياشىغان بۇ جەمئىيەتتە ماددا ئۆز رولىنى تۇلۇق جارى قىلدۇرۇپ ، روھنى ئاجىز ئورۇنغا چۈشۈرۈپ قويدى . جەمئىيەتتە بۇ خىل ھادىسە (بۇنى پەقەت ھادىسە دەپ ئاتاش مۇۋاپىق) ئومۇمىي ئەھۋالغا ئايلاندى . بىراق تارىخ چاقلىرىنىڭ ئىزلىرىدىن ئايانكى ئادەم ھاياتى ياكى بىر جەمئىيەت ئۈچۈن ماددىي بايلىق چۇقۇمكى ئەڭ ئاساسلىق ئامىل . لېكىن ، بىر مىللەت ، بىر خەلق ، بىر دۆلەت ياكى بىر دەۋىر ئۈچۈن ماددىي بايلىق ھەرگىز روھىي بايلىقلارنىڭ ئورنىنى باسالمايدۇ . قەدىمى يىپەك يۇلى تۆگە يېتىلىگەن ئەجداتلىرىمنىڭ چارچىماس قەدەم ئىزلىرىدىن ؛ چەكسىز قىزغىنلىق ، تىرىشچانلىق ئۇرغۇپ تۇرغان قەيسەر ، قورقماس روھىدىن تەدرىجى شەكىللىنىپ ئىنسانىيەت مەدەنىيەت بۆشۈكلىرىنىڭ گۈللىنىشىنى ، تەرەققىي قىلىشىنى ئۈزۈلمەس ئېقىن بىلەن تەمىنلەپ ، جاھان سەھنىسىدە ئۆز شۆھرىتىنى نامايەن قىلغىنىدا ئۇلارنىڭ ساقال – بۇرۇت باسقان يۈزلىرىدىن ئۆز غورورىنى نامايەن قىلغان سىماسى تارىخ بەتلىرىدە قېتىپ قالدى ... بىراق ، بۇ بەتلەردىن شۇ ۋاقىتتا بۇ يوللاردا تۇشۇلغان قىممەت باھالىق ماللار ، جاۋاھىرات ، ئالتۇن ، كۈمۈش ، ئۈنچە – مەرۋايىت ۋە باشقا مال - دۇنيالارنىڭ قايسىسىنى تېپىش مۇمكىن ؟! ئاڭلا ! يىراقتىن بىر كارۋان يول تارتىپ ئۇدۇل بۇياققا قاراپ كىلىۋاتىدۇ . تۆگىنىڭ بوينىدىكى تۇش قوڭغىراق بىر خىل رېتىمدا جاراڭلاپ ، چەكسىز كەتكەن قۇملۇقلاردىن بېسىپ ئۆتۈپ قۇلاقلىرىمىزغا ئۇرۇلماقتا ...سەن ئۇنىڭ نەگە كېتىۋاتقانلىقىنى ھېس قىلالىدىڭمۇ ؟ بۇ قايسى كارۋان بىلدىڭمۇ ؟ قايسى جايدىن ئۆتەر ، ھالى نېچۈك بىلگىڭ بارمۇ ؟ ئۇلار چۈشكۈن قىلمايدۇ . ئۇلار ئۆتۈپ كېتىدىغان كارۋان ... ...مەن ئۇلارنىڭ ئۈتۈپ كېتىشىنى ئازۇ قىلىپ قالدىم . چۈنكى بۇ شەھەردىكى مەي – مەيزاپلار ئۇلارنىڭ ئىمان – ئېتىقادىنى بۇلغىمىسۇن ؛ زەھەرلىك چېكىملىك ، بۇلغانغان ھاۋا ئۇلارنىڭ تېنىنى زەئىپلەشتۈرمىسۇن ؛بۇ شەھەرنىڭ ھاياسىز سەتەڭلىرى ئۇلارنىڭ قىممەتلىك بۇيۇملىرىنى تالان – تاراج قىلمىسۇن ؛ بۇ شەھەردىكى روھىي چۈشكۈنلۈك ھەم روھىي نامراتلىق ، ئېتىقادسىز ، ئۈلۈمتۈك روھ ئۇلارنىڭ روھىنى زەئىپلەشتۈرمىسۇن ... ... شۇنداق ، بۈگۈن كونا يىلنى ئۇزىتىپ يېڭى يىلنى كۈتىۋالىدىغان كۈن ! بەلىكم ، بۈگۈن روھىي ئىزتىراپ ھەم خوشاللىق ئادەمنىڭ ئىككى كۈزىدە ئۆز كارامىتىنى كۆرسىتىدىغان كۈن . ئۇلار دەل ئوتتۇرىدىكى مەڭگۈ ئۆتەلمەيدىغان قاڭشاردىن بىر – بىرىگە قارىشىدۇ . سەن قايسى تەرەپتە تۇرىسەن ؟ بەلكىم ، ئۆتكەن يىل ئۈچۈن ئۆكۈنۈشۈڭ مۇمكىن . شۇنداق ، ئۆتكەن كۈنلەر نېمىشقا كۆڭلۈكگە چوڭقۇر تىغلارنى سېلىپ قىينىمىسۇن ؟ سېنىڭدا ئۆز قۇلۇڭ بىلەن ئۆزەڭگە تىغ ئۇرۇپ ، ئۆز جاراھەتلىرىڭنى ئۆزۈڭ ئەملىگىدەك جاسارەت بولمىسا .... سەن يېڭى يىل ئۈچۈن خوشال بۇلۇشۇڭ كېرەك . سەن بىر ياش چوڭايدىڭ . سېنىڭ يەنە قىلىشنى ئويلىغان نۇرغۇن ئىشلىرىڭ بار . ئارزۇلىرىڭ بار . يېڭى يىلدا سېنى نۇرغۇنلىغان نەتىجە – خوشاللىقلار كۈتۈپ تۇرۇپتۇ . گويا سەن چىن قەلبىڭدىن سۆيگەن يارىڭدەك ئۇلارمۇ سېنى باغرىغا چاقىرىشىدۇ . قېنى بارغىن ! بىراق ، بىر ياش چوڭىيىشىڭ بۇ ساڭا يەنە نېمىدىن دېرەك بېرىدۇ ؟ توغرا ، بۇ سېنىڭ ئۆمرۈڭنىڭ بىر يىل قىسقارغىنىغا ، يەنى ، سەندىكى ياشاش پۇرسىتىنىڭ بىر قىسمى – نۇرغۇن پۇرسەتلەرنىڭ تامامەن قولدىن كەتكىنىدىن باشقا نەرسە ئەمەس ! «بىر دۆلەتنىڭ يەر – زېمىنى قولدىن كەتسە ، ئۇنى قايتۇرىۋېلىش تامامەن مۇمكىن» . بىراق ، بىر ئادەمنىڭ ۋاقتى قولدىن كەتسە ، ئۇنى نەچچە جان بېرىپمۇ قايتۇرىۋالغىلى بولمايدۇ . سېنى روھى ۋەسۋەسىلەرگە سېلىپ قىينىغۇم يوق . بىراق ، سەن چۇقۇم قىيىن – قىستاققا چۈشۈشۈڭ كېرەك . سەن چۇقۇم ئازاپلىنىشنى ئۆگىنىشىڭ ، ئازاپنى تېتىشىڭ ، ئاخىرىدا ئازاپنى يېڭىشىڭ كېرەك ! سەن بۇ باسقۇچنى تاماملىماي تۇرۇپ كونا ياكى يېڭىدىن بىرىنى تاللىشىڭ ئەسلا مۇمكىن ئەمەس . مېنىڭ كارۋانلارغا قېتىلغۇم بار . مەنمۇ ئەجدادىمدەك يېڭى يىپەك يۇلىدا ئەشۇ كارۋاننىڭ تۆگىسىنى يېتىلىسەم دەيمەن ! «ئىزگۈ تور ئەدەبىيات مۇكاپاتى» پائالىيتىگە ...

رۇزى كېرەم يارى · ۋاقتى: 2014-2-17 21:56:36


	ئاجىزلارنىڭ مۇھەببىتى رۇزى كېرەم يارى (نەسىر) باش كۈزنىڭ مەلۇم بىر كۈنلىرى يەكشەنبە . چەكسىز بوشلۇقتا لەيلەپ يۈرگەن جىسمىمدىن يەنە ئۆزەمنى ئىزدىدىم . بىپايان ئاسمانغا قارىدىم . كۆزلىرىمدە لىغىرلىغان ياش تامچىللىرىدا ئاندا – ساندا يۇلتۇزلار جىمىرلايتى . كۈمۈشرەڭ نۇر چېچىپ قەلبىمگە ھوزۇر بېغىشلايدىغان ئاجايىپ بىر خىل ، پەقەت ئىنسانلارغىلا خاس بولغان ھېسىيات ئىلكىدە مېڭەمدىكى شېرىن خىياللارنى قاينار بۇلاقتەك ئوخچىتىدىغان ئاي كائىنات يۈزىدە كۈرۈنمەيتتى . ئۆز – ئۆزەمدىن سورىدىم . ئاي تۈنۈگۈن بارمىدى ؟ بۈگۈن بولمىسا ئەتە يەنە چىقىپ قالارمۇ ؟ ئۇ قەلبىمگە تۇنجى بۇلۇپ مۇھەببەتتىن ئۇرۇق سالغاندا مەن بۇنى ھېس قىلغان بولساممۇ بىپەرۋالىق قىلغانىدىم . بۇ ئورۇق بىخ يېرىپ جانلىنىشقا باشلىغىنىدا بولسا ، مەن ئۇنىڭدىن خېلىلا يىراقلاپ قالغانىدىم . «كۆزدىن يىراق ، كۆڭۈلدىن يىراق» دەپتىكەن كونىلار . ئۇنى ئەشۇ خىياللار ئىلكىگە غەرىق بولغاندىلا ئەڭ چوڭقۇر سېغىنىش بىلەن ئەسلەيتتىم . باشقا ۋاقىتلاردا ئۇ كۆڭلۈمدىن يىراق ئىدى . ئۇنىڭ بىلەن ئۇچىرىشىپ قالغانلاردا ئۇنىڭغا ئېغىز ئېچىشقا ئالدىرىمايتتىم . تېخى پۇرسەت پىشىپ يىتىلمىدى دەپ قارايتتىم . ئۇنىڭدىن ئايرىلغاندا ئۇ مەندىن ئايرىلىشنىڭ بىرىنچى قەدىمىنى باسقاندىن باشلاپلا چەكسىز ئازاپ ئىچىگە توغرىسى سېغىنىش ئىچىگە غەرىق بولاتتىم . قايسىدۇر بىر كىتاپتا ئوقۇغۇنۇمدەك مېنىڭ ئۇنىڭغا بولغان مۇھەببىتىم «ئاجىزلارنىڭ مۇھەببىتى» ئىدى . شۇنداق ئاجىزلارنىڭ مۇھەببىتى ئىدى ... بىلىپ تۇراتتىم – يۇ ، لېكىن ھەقىقىي ئەركەكلەرگە خاس يول تۇتۇشقا ئالدىرىمايتتىم . توغرىسى سەل قورقۇپ قالاتتىم . يىللار شۇ تەرىقىدە داۋام قىلدى . مەن ھېلىھەم شۇ پوزىتسىيىدىمەن . ئالتە يىللىق يۇشۇرۇن كۈيۈك – ئاشىقلىق دەردى مېنى دادىللىق بىلەن «مەن سىزنى ياخشى كۆرىمەن» دىگەن بىر جۈملە پارلاق سۆزنى قىلىشىمغا مەدەت بولالمىدى . مەن يەنە پۇرسەت كۈتىۋاتىمەنمۇ ؟ ياق ، پۇرسەت پىشىپ يىتىلدى . مەن ئەمدى ئىككىلىنىۋاتىمەن . مەن قورقىۋاتىمەن . بۇ «ئاجىزلارنىڭ مۇھەببىتى» ! ئاھ ، «يۇشۇرۇن سۈيۈش ، ھەقىقىي ئاشىقلارنىڭ ئىشى» دىگەن جۈملىنى كۆپ ئوقۇغانىدىم . مەن ھەقىقىي ئاشىقمۇ ؟ لېكىن بۇ ئۆزەمگە بەرگەن تەسەللى . پەقەتلا مەندەك بىچارە بىر يىگىتنىڭ بىچارە كۆڭلىگە بەرگەن تەسەللىيسى خالاس ! مەن ئۇنىڭ دوستىدىن ئۇنىڭ سۆيگىنى بارلىقىنى ، يەنە كىلىپ ئۇلارنىڭ ئارلىشىۋاتقانلىقىغا ئالتە يىل بولغانلىقىنى تۇيۇقسىز پۇرسەتتە تاساددىپىي ئېيىتتقان گەپ – سۆزلىرىدىن بىلگەنىدىم . مەن ئەركەكلەرگە خاس جۈرئىتىم بىلەن ئۆزەمنى تۇتىۋالدىم . ئىلگىرىمۇ ئۆزەمنى تۇتىۋالغانىدىم . ئەمدى نېمىشقا ئۆزەمنى تۇتىۋالالمىغۇدەكمەن !؟ مەن ھېچ پەرۋاسىزدەك ئىپادىسىز چىراي بىلەن ئۇنىڭ دوستىدىن بىر قىسىم ئەھۋاللارنى قىزىقمىساممۇ سورىدىم . بۇلارنى پەقەت بىلىۋالغۇم بولمىسىمۇ سورىدىم . چۈنكى مېنىڭ ئۇنىڭغا ئاشىق ئىكەنلىكىمنى باشقىلار بىلمەسلىكى كېرەك . ئىلگىرىمۇ ئۇقمىغان . بۇندىن كىيىنمۇ ئۇقمىسۇن ظ ئۇ يۈرۈكىمنىڭ چوڭقۇر يېرىدە ساقلىنىدۇ . مەڭگۈ ساقايماس جاراھەتتەك تىگىپ كەتسەملە مېنى بىر ئۆمۈر ئازاپلاپ ئۆتىدۇ . شۇنداق ! مېنىڭ قەلبىمگە ئۈنگەن مۇھەببەت گۈلى ئېچىلىپ ، قەلبىمنى ئاجايىپ بىر خىل تەسۋىرلەپ بەرگۈسىز خۇشپۇراققا تولدۇرغۇچىلا باشقىلار تەرىپىدىن ئۈزۈلۈپ كېتىپتۇ . ياق ، ئۇرۇق ۋاقتىدىلا ئوغۇرلاپ بۇپتىكەن ئەمەسمۇ ، ئاھ ، توغرىسى ئۇ باشقىلارنىڭ قەلبىدە ئالتە يىل بۇرۇنلا پۇراق چېچىشقا باشلاپتىكەن ئەمەسمۇ . كۆزلىرىم ، دىمىقىم قاتتىق ئاچچىقتىن ئاغرىپ كەتتى . ئۆزەمنى يەنە ھېلىقى ۋاقىتتىكى جۈرئىتىم بىلەن تۇتىۋېلىشقا بۇ يەردە قادىر بولالمىدىم . شۇ ۋاقىتتا تېشىمدا تۇتىۋالغاندەك تۇرساممۇ ، يۈرىكىم ئۆكسۈپ ئۆكسۈپ يىغلىغانىدى . ئەمدى مەن ئۇنى قەلبىمدە ئۆسۈۋاتقان بىر تۈپ گۈلدەك ئەمەس ، بەلكى بىر پارچە ئېچىلىش ئالدىدا تۇرغان گۈلنىڭ فوتو سۆرىتىدەك ھالەتتە مەڭگۈ مەڭگۈ ساقلايمەن . مەن ئاسمانغا قارىدىم . شۇ ھالەتتە قانچە ئۇزاق تۇرغانلىقىمنى پەقەتلا ھېس قىلالمىدىم . ئالتە يىل ! ياق ، ياق ... مەن ھازىرقى ھالىتىمدە بۇندىن كىيىنكى مۇھەببەت يۇلىدىكى قەدەملىرىمنى قانداق بېسىشنى ئويلىيالمايمەن . ئىچ – ئىچىمدىن بىر ئاۋاز قايتا – قايتا ئەكىس سادا قايتۇرىدۇ : - بىرسىنى ياخشى كۈرۈپ تۈرۇپ ، شۇ ئادەمگە «مەن سىزنى ياخشى كۆرىمەن» دىگەن سۆزنى قىلالماسلىق ، لېكىن ئۇنىڭ دەردىدە يۇشۇرۇن ئازاپتا قىيلىنىپ ئۆتۈش – بۇ ئاجىزلارنىڭ مۇھەببىتى ... مەن كۆزلىرىمنى چىڭ يۇمىۋالدىم . كۆزلىرىمگە ھېچ نەرسە كۈرۈنمىدى . ئۆزەم خۇددى ئاستا – ئاستا بوشلۇققا قاراپ لەيلەپ كېتىۋاتقاندەك بولدۇم ... «ئىزگۈ تور ئەدەبىيات مۇكاپاتى» پائالىيتىگە ...

رۇزى كېرەم يارى · ۋاقتى: 2014-2-24 00:25:06


	باھار تىنىقلىرى رۇزى كېرەم يارى ئوسمىنى يېڭىلا قۇيۇپ يۇيىۋەتكەن ئۇيغۇر قىزىنىڭ قېشىدەك سۇسقىنە كۆكەرگەن قىر مېنى باھارنىڭ كەلگەنلىكىگە ئىشەندۈردى . جاھان ئىسسىپ ، توڭلار ئېرىدى ، ھاشارەتلەر بىر – بىرلەپ تىرىلدى ... مانا باھار ! ھەممىمىز زارىقىپ كۈتكەن باھار ! ئىللىق باھار شامىلى دەمدىن – دەمگە سوقۇپ ، ئۆتكەن باھارنىڭ گۈزەللىكلىرىنى ئەسلىتىپ ، يېڭى باھارغا بولغان تەلپۈنۈشنى ھەسسىلەپ ئاشۇردى . ھەي باھار ! مەن سەن ئالدىنقى قېتىمدا كۆرگۈنۈڭگە ئوخشامدىكەنمەن ، قارىغىنا ... توغرا ئۇيىگىت مەن ئەمەسمەن . ئۇ باھارمۇ سەن ئەمەسسەن ! يىراقلاردىن بوشقىنا ئاڭلىنىۋاتقان ئەمگەك ناخشىسى ؛ دېھقاننىڭ چىرايىدىكى خوشاللىق ۋە جىددىيلىك ؛ قوي قىغىنىڭ ئېچىغان ھىدى ، باغلاردىن ، ئېتىزلاردىن كىلىۋاتقان نەمخۇش ھاۋا ؛ تۇرۇمچۇقنىڭ ، تورغاينىڭ مۇڭلۇق ۋە ئاجايىپ يېقىملىق خۇش ئاۋازدا مەست بۇلۇپ سايراشلىرى !ا مانا بۇلار پەقەت يېزىلارغا خاس ، ئاجايىپ بىر خىل پۇراققا ئىگە نەۋباھار ! مەن ئۆزۈم ئىنتىلگەن ھەممە نەرسىدىن – سۈنئىيلىك ، ياسالمىلىق چىقىپ تۇرىدىغان ، ئادەمنىڭ ئىچىنى سىقىدىغان ئېسىل شەھەر تۇرمۇشىدىن يەنە مۇشۇ ئاددىي سەھرا تۇرمۇشىغا – مۇھەببەت – نەپرەت ، سېغىنىش ئازاب ، جاپا – ھالاۋەت ، بۇزۇش ۋە يارىتىش ...بىلەن تولغان ، قەلبىگە ھەممە خوشاللىق ۋە خاپىلىقلارنى سىغدۇرالايدىغان ، جاپا – مۇشەققەتتىن باش تارتمايدىغان ، ئىنسانىيەتكە ھەممىنى بېرىش ھەم ھەممىنى تارتىۋېلىش قۇدرىتىگە ئىگە ئاددىي كىشىلەر ئارىسىغا قايىتىپ ئۇلار بىلەن بىللە ياشاشنى تاللىدىم . كۆزلىرىمدە لىغىرلاپ تۇرغان ئىككى تامچە ياش باھاردا ئېرىگەن ئەگىزدەك مۇزلىغان يۈرىكىمدىن سىرغىدى . ئەزەلدىنلا ھەممىگە زارىققان بۇ يۈرىكىم توڭ تۇتمىغان بولسا ئەسلى ئابى - زەمزەم بۇلىقى ئىكەن ئەمەسمۇ ؟! باھار ، بۇ توڭنىمۇ ئېرىتتى . دېھقان ئاكا ماڭىمۇ بىر كەتمەن بەرگىنە ! قىغلىرىڭنى تارىتاي ، قىرلارنى بۇزاي ، ھايدىغان يەرلىرىڭنى تۈزەي ... بىر ھەسەل ھەرىسى بۇرنۇمنىڭ ئۈستىگە قوندى – دە ، ئۇچۇپ كەتتى . مەن ئەندىكىپ بىر سىلكىندىم ۋە ھەسەل ھەرىسى ئۇچۇپ كەتكەن تەرەپكە كۆزلىرىمنى يوغان ئېچىپ قارىدىم . «ئىزگۈ تور ئەدەبىيات مۇكاپاتى» پائالىيتىگە ...

رۇزى كېرەم يارى · ۋاقتى: 2014-2-25 22:48:25


	گۇناھ گۈللىرى رۇزى كېرەم يارى كەل ئەي ، ماڭا ھەۋەس قىلغۇچى ! دېڭىز سۈيىدەك كۈۋۋەجەپ تۇرغان بۇ روھىمنى قۇچاغلا ! ئۇنىڭ بەقۇۋۋەتلىكى سېنى داغدام يولغا باشلايدۇ ، توپان سۈيىدەك دەۋرەپ كەلگەن بۇ ئېقىن سېنى سىنايدۇ ، مەھكۇم تەنلەرنى ئېزىتقۇ غارىدىن باشلاپ چىقىپ پايانسىز زېمىننىڭ قۇچىغىدا قۇياش نۇرىغا قاقلايدۇ . مەن سېنىڭ كۈلۈشلىرىڭدىن ئۆزەمنى نۇمۇسلۇق ئىش قىلىپ قويغاندەك ھېس قىلمايمەن . پەقەت ۋە پەقەتلا سېنىڭ ھېچ ئىپادىسىز تاش ھەيكەلدەك قاراپلا تۇرۇشلىرىڭنى كۆرگۈم يوق . ئەي ، مەن ئۈچۈن دۇئا – تىلاۋەت قىلغۇچى ، سەن مۇئەككەل بولماقچىمۇ ؟ سەن ئۇنىڭغا يۈرۈكىڭدىن بەخت تىلىگەن بولساڭ ، كەلگىن ئەينەككە قارا ، قايسىمىزنىڭ لەۋلىرىدىن قان تامچىلاۋاتىدىكىن ؟! قان ! قاننىڭ قانداق تۇكۈلىدىغانلىقىنى ساڭا دەي ، بىر قۇتا قارا سىياھنى ئالغىن – دە ، يېڭىدىن سېلىنغان ھەشەمەتلىك بىر بىنانىڭ ئاپئاق تاملىرىغا چاچ ! مانا گۇناھ ، سەن گۇناھكارسەن . تاملارغا چېچىلغان قارا رەڭگە قارا ، ئۇ سېنىڭ گۇناھىڭدىن ئۇيىلىپ ئۆزىنىڭ چەك – چىگىرىسىنى ئايرىدى . سەن سىنچىلاپ قارا قېرىندىشىم شۇنداقمۇ ؟! ئۇلار چەك – چىگىرىنى ئايرىدى . بىر پارچە يېشىل ، بىر پارچە قىزىل ! بەلكى يېشىلىدىن قىزىلى ئاز ! سەن نېمىنى كۆردۈڭ ، زادى نېمىنى كۆردۈڭ ؟! شۇنداق ، ئۇ - بىر دەستە قىزىل گۈل ! «ئىزگۈ تور ئەدەبىيات مۇكاپاتى» پائالىيتىگە ... بۇ يازمىنى ئاخىرىدا رۇزى كېرەم يارى تەھرىرلىگەن. ۋاقتى 2014-2-25 22:49

رۇزى كېرەم يارى · ۋاقتى: 2014-2-26 17:53:26


	پۈۋلەش رۇزى كېرەم يارى بۇ ئۇزۇن كېچىلەردە تەنھالىقنىڭ لېۋىنى چىشلەپ ئولتۇرۇش نەقەدەر ئازاب ! مۇشۇ قاپقاراڭغۇ كېچىگە ئوخشاش ئاجايىباتلار يۇشۇرۇنغان خىياللىرىم ... كەچكۈزنىڭ ياداڭغۇ چىرايى قەلبىمگە بىر خىل سۈرلۈك ۋەھىمىلەرنى تاشلاپ ئۆتىدۇ . چىراقلىرى يېنىپ تۇرغان دېرىزەڭگە تەلمۈرۈپ قارايمەن . «يارنىڭ ئۆگزىسىگە تاش ئېتىش» تەك ئوي – خىياللىرىمدىن بۇ گۈزەل چاقىرىقنى ئۇنتۇپ كەتكەن كىشىلەرگە ئوخشاشلا قانچە تېز كەلگەن بولسام شۇنچە تېزلا قايىتىمەن ! دېرىزەڭ ئېچىلىپ باھارنىڭ ھېدىدەك ناھايىتىمۇ ئۆزگىچە بىر پۇراق دېمىقىمغا ئۇرۇلۇپ ، يۈزلىرىمنى سۈيۈپ ئۆتتى . بۇ سەن دائىم ئىشلىتىدىغان ئەتىرنىڭ پۇرۇقىمىكىنە ؟! ... ياق ، ياق ، ئۇ جىسمىڭدىن تارىلىۋاتقان يىگانە ھىد ! سەن بىلەن تۇنجى قېتىم ئۇچراشقىنىمدا بۇرنۇمغا ئۇرۇلغاندەكلا ... ئاھ ، پۈۋلە جېنىم ، مۇزلىغان جىسمىمغا باھاردەك نەپەسلىرىڭ ئۇرۇلسۇن ! قاياقلاردىندۇ ئۇچۇپ كەلگەن چىڭگىلىك مىۋىسىنىڭ توزغىقىدەك بۇ تۈن قوينىدا لەيلەي ! ئېسىڭدىدۇر ، كىچىكىمىزدە بۇنداق توزغاقلارنى ئۇچراتساق «مېنىڭ كەپتىرىم ، مېنىڭ كەپتىرىم» دىيىشىپ ئۇنىڭ ئېگىز ئۇچىشىنى ، تېخىمۇ ئېگىز ئۇچۇشىنى ئارزۇلاپ پۈۋلەيتۇق ، پۈۋلەيتۇق . پۈۋلە ، مەن شۇنى ئارزۇلايمەن . بىز ئۇلارنى پۈۋلەپ نە نەلەرگە كېتەتتۇق – ھە ! سەنمۇ مېنى كەپتىرىم دىگىن ! مەن شۇنداق ئاتىلىشقا رازى ، ئاستا لەيلەپ كىلىپ مۈرەڭگە قونسام ، كۆزلىرىڭگە تەلمۈرۈپ قارىسام ... لەۋلىرىڭدە سۇ بەرسەڭ جېنىم ! مېنى ئاق كەپتەر دېدىڭمۇ ؟ بۇپتۇ ، بىراق مەن ياۋا كەپتەر بۇلۇشنى ئارزۇ قىلىمەن . - پۈۋلە ، ھەر پۈۋلىشىڭ مېنى چاقىرغاندەك بىلىنىۋاتىدۇ . سەن نەپەسلىرىڭ بىلەن دەۋرەتكەن ھاۋا جىسمىمغا ئورۇلغىنىدا ، سېنىڭ سۈيۈشلىرىڭدە ئۆزەمنى يوقاتقاندەك بولىمەن ، مامۇق پەيدەك لەيلەيمەن . شۇنداق مامۇق پەي ، نەدىن كەلدىكىنە ؟ بەلكىم بۈركۈت ياكى شۇڭقارنىڭ ، يا لاچىن ياكى ئەنقانىڭ قانىتىدىن ئايرىلىپ چىققان پەيدۇ !؟ يەنە قانداق ئادەملەرگە نېسىپ بولار ھە مۇشۇنداق بەخت ! - پۈۋلە جېنىم ، مېنى مامكاپنىڭ توزغىقىغا ئوخشاتتىڭمۇ ، بۇپتۇ . ئاجىز جىسمىم بىلەن يېشىللىقنىڭ ئۇرۇقىنى ئېلىپ يىراق – يىراقلارغا ئۇچاي . مەيلى ، نەگە چۈشەي ، زەمزەملىرىڭنى ئەۋەت ! يامغۇرلۇق بۇلۇتلىرىڭنى ئەۋەت ! ئانا تۇپراققا كۈمۈلگەن تىنىم سېنىڭ نەمخۇش ئارزۇلىرىڭ ئىچىدە ئەللەيلىنىپ بىر ۋاقىتلارغا كەلگەندە بىخلايدۇ . باھاردا تېزلا ئاينىپ ھەسرەت ۋە سېغىنىشقا ئوخشايدىغان ساپسېرىق گۈلۈمنى ئېچىلدۇرۇپ يەنىلا ساڭا تەلمۈرۈپ قارايمەن ... پۈۋلە جېنىم ، پۈۋلەشلىرىڭ جىسمىمنى شېخىدىن ئايرىلغان يۇپۇرماقتەك قاياقلارغىدۇر ئۇچۇرسۇن ! ھەر نەرسىنىڭ قىسمىتى شۇ ئىكەن ، ھەرقانداق ئۇچقان نەرسە ئاخىرىدا يەنىلا تۇپراققا قۇشۇلۇپ بەرقارار تاپىدىكەن . نە ئارمىنىم ، تۇپراق ئۈستىدە بىر مەزگىل شىلدىرلاپ ئۇياق – بۇياقلارغا ئۇچۇپ يۈرىۋالسام ، شۇدەم كىلىپ بىر تايچاق ياكى قوزا مېنى يېۋەتسىمىغۇ ؟ مۇشۇنداق ئۇچۇپ يۈرۈپ نامەلۇم ئورەك ، زەيلىكلەرگە تىقىلىپ قېلىپ ۋاقىتنىڭ ئۆتىشىگە ئەگىشىپ چىرىپ كېتىشنى خالىمايمەن ... پۈۋلە ، پۈۋلىگىن جېنىم ! بىلدىم دېرىزەڭ ئالدىغا كىلىپ قاپتىمەن . يەنە ساڭا تەلمۈرۈپ قارىدىم . سەن شۇنچە كۆپ يۇپۇرماقلار ئارىسىدىن شۇ يۇپۇرماقنى تاللىۋېلىپ لەۋلىرىڭگە باستىڭ . نەمخۇش ، ئىسسىق لېۋىڭ يۈرۈكىمنى ئىللىتتى . سەن يۇپۇرماقنى ئاۋايلاپقىنا ئەشۇ مۇققەددەس كىتابنىڭ ئارىسىغا قىستىڭ – دە ، دۈپۈلدەپ سۇقىۋاتقان يۈرىكىڭگە چىڭڭىدە باستىڭ ! پۈۋلە جېنىم ، پۈۋلە ... «ئىزگۈ تور ئەدەبىيات مۇكاپاتى» پائالىيتىگە ...