ئاينۇرى:گۈزەل قاراماي

تۇرنىسا رەھىم ئاينۇرى


سېلىمنىڭ سۆيگۈسى بىخلىغان ماكان،
سېلىمنىڭ ئىزىدىن كۆكلىگەن ئورمان،
باغرىڭ بىر مۆجىزە، قۇرىماس زەر كان،
سېھىرلىك جاھان سەن، گۈزەل قاراماي.

ئەزمەتنىڭ ئەجرىدىن قۇرۇلغان شەھەر،
ئىشچاننىڭ تەرىدە گۈللىگەن شەھەر.
ئاھ بۈگۈن قوينىدا گۈل-چىمەن شەھەر.
مېھىرلىك ئانام سەن، گۈزەل قاراماي.

ئاسمانغا تاقاشقان ھەيۋەت بىنالار،
شاۋقۇنلاپ ئاقماقتا كۈمۈش دەريالار،
قوينىڭغا يىغىلغان ئاقىل، دانالار،
سۆيۈملۈك ماكان سەن، گۈزەل قاراماي.

بۇلدۇقلاپ تۇرىدۇ نېفىتلىك بۇلاق،
گۈلزارغا ئايلاندى چىلانرەڭ تۇپراق،
ياشايمىز شادىمان، بەختىيار، ئىناق،
مېھرىبان ئانام سەن، گۈزەل قاراماي.

تورلاشقان باغرىڭدا ئاسفالېت يوللار،
مېھرىڭدە چىگىلگەن ناتونۇش دىللار.
شەنىڭگە مەدھىيە ئوقۇيدۇ يىللار،
يېتىلگەن قىران سەن، گۈزەل قاراماي.

باغچىدەك گۈزەلدۇر مەھەللەڭ سېنىڭ،
ئىپتىخار، غورۇردىن ئۇرغۇيدۇ قېنىڭ،
داۋانلار ئاشقاندا ئىگىلمەس بىلىڭ،
ئەزىمەت ئوغلان سەن گۈزەل قاراماي.

تاۋلانغان ئۇزۇن يىل يۇلغۇن روھىدا،
چۆللەرنى بوستان قىپ ئىشچان قولىدا،
كۈرەشكە ئاتلاندىڭ بېيىش يولىدا،
تۈگۈمەس ئارمان سەن، گۈزەل قاراماي.

چۆللەرنىڭ كۆكسىدە ئېچىلغان گۈلسەن،
ئىناقلىق ئۆملۈكتىن ياڭرىغان كۈيسەن.
تۆت پەسىل باھاردەك ئىللىق سەن ۋەتەن،
باغرى كەڭ، ئەزىزان گۈزەل قاراماي.