ئەركزات ئاكىغا بارىكاللا

مىرئەھمەد مامۇت · ۋاقتى: 2012-4-23 20:53:21


	ئەركزات ئاكىغا بارىكاللا راسىت گەپنى قىلغاندا ، مەن « شىنجاڭ يازغۇچىلار تورى » غا كىرىشتىن سەل ئەنسىرەيدىغان بولۇپ قالدىم . نېمە ئۈچۈن دېگەندە ، بۇ يەردە ئەركزات ئاكام بار . بەلكىم بەزىلەر ئەركزاتنىڭ نەرىدىن قورقىسىز؟ دەپ سورىشى مۇمكىن . راسىت، ئەركزات ئاكام قورقۇنۇشلىق ئەمەس . بىراق ، ئۇ مۇنبىرىمىزدە ناھايتى ئۇلۇغ بىر ئىشنى __ ئانا تىلىمىزنىڭ ساپلىقىنى قوغداش خىزمىتىنى قىلىۋاتىدۇ . ئەمما ، مەندىن باشلانغان نۇرغۇن ئاپتورلىرىمىز ئۇيغۇر تىلى ئىملا قائىدىسىگە خىلاپ ھالدا ئىملاسىدا خاتالىق بار ئەسەرلەرنى ھە دەپ يوللاۋاتىمىز . ئەركزات ئاكىمىز ئېرىنمەي تۈزىتىپ ، ساپلاشتۇرۇپ كېلىۋاتىدۇ . ئۇ مۇنبىرىمىز ئۈچۈن ، ئانا تىلىمىز ئۈچۈن ئاز بولمىغان جاپالارنى چېكىۋاتىدۇ . مۇنبەردە ئۇنىڭ بولغىنى بىزنىڭ بەختىمىز . مەن ئەركزات ئاكىدىن ئەمەس ، ئۇنىڭ قىلىۋاتقان ئىشىدىن، يوللىغان تىمىلىرىمدىن ۋە ئىنكاسلىرىمدىن ئىملا خاتالىقى تېپىۋىلىشىدىن بەكلا قۇرقىدىغان بولۇپ قالدىم . چۈنكى مەن بىر ئۇيغۇر . يەنە كېلىپ ئۈچ يىل مەخسۇس ئۇيغۇر تىل-ئەدەبىياتى كەسپىدە ئوقۇپ ، مەكتەپ پۈتتۈرگەندىن كېيىن دەرس مۇنبىرىگە چىقتىم .مەن شۇنداق خاتالىق سادىر قىلىپ يۈرسەم، مەن تەربىيەلىگەن ئوقۇغۇچىلىرىم نېمە ئىشلارنى قىلار ؟ دەل شۇ ۋەجىدىن مەن بۇ مۇنبەرگە كىرىشتىن ، ئىنكاس ۋە تىما يوللاشتىن ئەنسىرەيدىغان ، ئىملاسى خاتا تېما يوللاپ سالسام خىجىل بولىدىغان بولۇپ قالدىم . ئەركزات ئاكا ۋە باشقا ئۇستازلارنىڭ بىزنى ئىملا جەھەتتە تەربىيەلەپ كېتەلەيدىغانلىقىغا تولۇق ئىشىنىمەن ھەم مەن ۋە ئەتراپىمدىكى بارلىق كىشىلەرنىڭ ، تورداشلارنىڭ ئىملا قائىدىسىگە تولۇق ئەمەل قىلىشىنى چىن دىلىمدىن ئۆتۈنىمەن . ئاخىردا ، ئەركزات ئاكىغا چىن قەلبىمدىن رەھمىتىمنى بىلدۈرىمەن . بۇ يازمىنى ئاخىرىدا ARKZAT تەھرىرلىگەن. ۋاقتى 2012-4-24 14:27

بۈركۈت · ۋاقتى: 2012-4-23 22:23:03


	ماۋزۇنىڭمۇ ئىملاسى خاتا بولۇپ قاپتۇ...

huxhuy · ۋاقتى: 2012-4-23 22:50:47


	ئانا تىل بىلگەن كىشىنىڭ ئىززىتىن قىلغۇم كېلۇر، ئانا تىلنى ئاغزىدىن ئالتۇن بېرىپ ئالغۇم كېلۇر. _____________ قۇتلۇق ھاجى شەۋقىي شۇ تاپتا يەنە شائىر مۇھەممەد رەھىمنىڭ مۇنۇ بىر كۇبلىت شېئىرى ئېسىمگە كەلدى: مەيلى دەيتتىم،گەپمۇ قىلمايتتىم، قارچۇغىنى «قۇرغۇي»دېسىڭىز. سالغۇم كەلدى قاتتىق بىر كاچات، ئۇيغۇر تۇرۇپ«ئۇرغۇي»دېسىڭىز. ئانا تىلنى قەدىرلەش،ئۇنىڭ يېزىلىش،تەلەپپۇز قائىدىسىگە ئەمەل قىلىش ھەممىمىزنىڭ بۇرچى. بۇ يازمىنى ئاخىرىدا huxhuy تەھرىرلىگەن. ۋاقتى 2012-4-23 22:52

ARKZAT · ۋاقتى: 2012-4-24 00:39:42


	تىلى كەمتۈك ئادەم سۆزنى راۋان قىلالمىغانغا ئوخشاش ئىملانى توغرا ئىپادىلىيەلمەيدىغان كىشى يازغان سۆز-ئىبارىمۇ بەزىدە خاتا مەنە ياكى كۈلكىلىك تۇيغۇ بېرىپ قويۇشى مۇمكىن. مۇكەممەللىك- ھەممىمىز ئىنتىلىدىغان نىشان، ئەمما ئىش-ھەرىكەت، گەپ-سۆز، تىل-يېزىقلىرىمىزنى ئىپادىلەش قاتارلىق جەھەتلەردىكى يېتىشسىزلىكلىرىمىز ھەممىمىزدە ھەقىقەتەن مەۋجۇت. جۈملىدىن، گېزىت-ژۇرنال قاتارلىق مەتبۇئاتلىرىمىزدىمۇ ئىملا خاتالىقى دائىم دېگۈدەك كۆرۈلۈپ تۇرغاچقا، كېيىنكى سانىدا تۈزىتىش بېرىلىدۇ. ھەتتا خېلى نوپۇزلۇق بەزى كىتابلىرىمىزدىمۇ ئىملا خاتالىقى كۆرۈلۈپ، بەت ئىچىگە تۈزىتىش ۋەرەقىسى قىستۇرۇلىدىغانلىقىنى تولا ئۇچرىتىپ تۇرىمىز. تىلىمىزنىڭ ئىملاسىغا كۈچەشتە «تىل ۋە تەرجىمە» ژۇرنىلى ھەقىقەتەن ئەھمىيەتلىك ئىشنى قىلىپ كېلىۋاتىدۇ: ژۇرنال چىقىپ، بەلگىلىك مۆھلەت ئىچىدە بايقالغان ھەر بىر ئىملا خاتالىقىنى مەلۇم قىلغۇچىغا مەلۇم مىقداردا ماددىي مۇكاپات بېرىشنى ( گەرچە سومما كۆپ بولمىسىمۇ ) دائىمىيلاشتۇرۇپ، بۇ جەھەتتە ياخشى ئۈنۈم يارىتىپ بىزگە باشلامچى بولدى. مۇنبىرىمىزدىكى ئوتتۇرا ياشلىقلار ئاساسەن ئىلگىرى ئۇيغۇر يېڭى يېزىقىدا ساۋاد چىقىرىپ، ھازىرقى زامان ئۇيغۇر يېزىقىمىزنى ئۆزلىرى ئۆگىنىۋالغانلار بولغاچقا، بۇ ياشتىكىلەرنىڭ ئىملاسىدا ياكى ئۇنداق ياكى مۇنداق مەسىلىلەرنىڭ كۆرۈلۈشى تەبىئىي. ئەمما ياشلارچۇ؟ بۇلار ساۋادىنى ئۇيغۇر تىلى «ئېلىپبە»سىدىن چىقارغان( بەلكىم، بەزىلەرنىڭ ساۋادى باشقا تىللاردىمۇ چىققان ). شۇڭا گەرچە قەلەم بىلەن يازغاندىكى خەت سۈپىتىمىز ئانچە چىرايلىق بولمىسىمۇ، ئەمما ھېچ بولمىغاندا، كومپىيۇتېردا ئۇرغان خەتلىرىمىز ئىملا جەھەتتىن توغرا بولۇپ كەتسە، نەقەدەر ياخشى بولىدۇ-ھە؟! مەن ئىنىمىز مىرئەھمەتنىڭ بۇ تېمىسىغا ماس ھالدا بۇرۇنمۇ كۆپ تەكىتلىگەن تۆۋەندىكى سۆزۈم بىلەن قېرىنداشلىرىمىزدىن يەنىلا ئىملايىمىزنى توغرا ئىپادىلەشتە دائىم ئەستايىدىل بولۇشنى، ھەر بىر سۆزگە ئىشلىتىلىدىغان تاۋۇش( ھەرپ) لارنى باسىدىغان پەيتتە چوقۇم يەنە بىر قېتىم ئەستايىدىل ، مەسئۇلىيەتچان بولۇشىمىزنى تەۋسىيە قىلىمەن. چۈنكى يېزىۋاتقىنىمىز-ئۆزىمىزنىڭ ئانا تىلى. تىلىمىزدا بار-يوقى 32 لا ھەرپ بار. ھەر كۈنى پەقەت بىردىن ئۆگەنگەندىمۇ بىر ئايدا ساۋادلىق بولۇپ بولۇش تامامەن مۇمكىن. پاكىت شۇ تۇرسا، ئىملايىمىزنى يەنە خاتا يېزىۋېرىشكە يۈزىمىز چىداۋېرەرمۇ؟ يازغان سۆز-ئىبارىلىرىمىز خاتا تۇرسا، شۇ خاتا ئىملا بىلەن نازۇك تۇيغۇلىرىمىزنى تەكرار-تەكرار ئىپادىلەۋېرىشكە يەنە خىجىل بولماسمىزمۇ؟! خاتا ئىملايىمىز يەنە قاچانغىچە داۋاملىشار؟! ئەگەر بىزنى بىۋاستە ياكى نام-شەرىپىمىز، ئەسىرىمىز ئارقىلىق تونۇيدىغانلار شۇ ئىملادىكى خېتىمىزنى كۆرسە، بىزگە قانداق قاراشتا بولار؟! شۇڭا ئېسىل ئەسەرلىرىمىزنى توغرا ئىملادا مۇنبەرداشلىرىمىزغا تەقدىم ئېتەيلى. شۇندىلا، ئوخشىغان تائاملىرىمىزنى پاكىزە يۇيۇلغان قاچىلارغا ئۇسسۇپ ئىشتىھا بىلەن يېسەك ھوزۇر ھېس قىلغىنىمىزدەك، توغرا ئىملادا ئىپادىلەنگەن ئەھمىيەتلىك ئەسەرلىرىمىز ھەممىمىزگە ھەقىقىي مەنىدىكى بەدئىي زوق ئاتا قىلالايدۇ. ئىملايىمىزنى توغرىلىۋېلىش، ھېچ بولمىغاندا، ئانا تىلىمىزغا بولغان ھۆرمىتىمىزنىڭ يالدامىسى سۈپىتىدە بولسىمۇ، باھاسى شۇنچە ئەرزان، ئەمما قىممىتى زور بولغان «ئېلىپبە» كىتابتىن بىرنى چىداپ تۇرۇپ سېتىۋېلىپ، پات-پات كۆرۈپ تۇرايلى، ئىشكابىمىزدا ئەتىۋالاپ ساقلاپ قويايلى. چۈنكى ئۇ-بىزنىڭ بىباھا بايلىقىمىز!

مىرئەھمەد مامۇت · ۋاقتى: 2012-4-24 13:50:48


	ماۋزۇنىڭمۇ ئىملاسى خاتا بولۇپ قاپتۇ... مۇمكىن بولسا تۈزىتىپ قويالارسىزمۇ

ي.ت.توغراق · ۋاقتى: 2012-4-27 07:04:10


	ياسىنجان ئوسماننىڭ مۇنبەردە ئىملا نازارەتچىلىك ۋەزىپىسىنى ئادا قىلىشى ئىنتايىن ياخشى بولىۋاتىدۇ.

parhatjamxit · ۋاقتى: 2012-4-30 23:09:57


	بولسا ئېلان قىلىنىدىغان ئەسەرلەرگە سەل قاتتىراق تەلەپ قويۇش بىلەن بىرگە،تەھرىرلەر ئازدۇر-كۆپتۇر ئىملا خاتالىقى بار ئەسەرلەردىكى خاتالىقلارنى تۈزىتىپ قويغان بولسا ياخشى بولاتتى دىگەن قاراشتا مەن.دىگەنلىرىم خاتا بولسا تەھرىر يولداشلارنىڭ ئەپىبكە بۇيرۇماسلىقىنى ئۈمىد قىلىمەن.

تام · ۋاقتى: 2012-4-30 23:45:18


	مەن ئەركزات ئاكامغا ئامراق:) بۇ يازمىنى ئاخىرىدا mamat omar تەھرىرلىگەن. ۋاقتى 2012-4-30 23:45

ئۆركەش ئابلىز · ۋاقتى: 2012-5-3 23:40:26


	ARKZAT يوللىغان ۋاقتى 2012-4-24 00:39 تىلى كەمتۈك ئادەم سۆزنى راۋان قىلالمىغانغا ئوخشاش ئ ... مەن سىزنىڭ ئىملا خاتالىقىڭىزنى تېپىۋالدىم. ئەسلى:ئۇسۇپ سىزنىڭ يازغىنىڭىز:ئۇسسۇپ ئەسلى:بەدىئىي سىزنىڭ يازغىنىڭىز:بەدئىي ئەسلى:ئىشكاپ سىزنىڭ يازغىنىڭىز:ئىشكاب يەنىلا سىزنىڭ ئىملا جەھەتتىكى تۆھپىڭىزگە رەھمەت ئېيتىمەن. بۇ يازمىنى ئاخىرىدا بۆرە تەھرىرلىگەن. ۋاقتى 2012-5-3 23:42