بۈزوھرە تۇراپ: قەلب تىۋىشلىرى (نەسرلەر) [ئۇلانما كۆچۈرۈش]

قەلب تىۋىشلىرى (1)

بۈزوھرە تۇراپ

يۈرىكىم، سېنى ناھايتىى كۆپ ھەسرەتلىرىمنىڭ ھەمراھ ۋە گۇۋاھچىسى قىلغانلىقىمدىن  كەچۇرۈم سورايمەن. ئازاپلىرىم كۆز ياشلىرىمغا ئايلانغاندا،  ئۇ ياشلارنىڭ سېنىمۇ تىترىتىپ خۇددى ئەگىز سۈيىگە ئوخشاش ئەگىم – ئەگىم تالالىرىڭدىن سىرغىۋاتقانلىقىنى،  قاناتسىز قۇشقا، گاچا بۇلبۇلغا ئايلانغىنىمدا، غۇرۇر ۋە ئادىمىيلىكىم، قەدىر – قىممىتىم ئىتىبارسىز قالدۇرۇلغاندا، مەن ھەممە پىغانلىرىمنى، ئازاپلىرىمنى، ئۈمدلىرىمنى، ئىستەكلىرىمنى  پەقەت ساڭىلا ھاپاش قىلدۇرۇپ كەپتىمەن.
سېنىڭ بىر مىھرىبان ئانىغا ئوخشاش چىدامچانلىقىڭ، ئەپۇچانلىقىڭ، تەبىئەتكە ئوخشاش نۇرغۇن گۈزەللىك ۋە سىخىيلىق بىلەن تولغان ئىللىق باغرىڭ، ساداقەتمەن، ئىتىقاتلىق، ئاق كۆڭۈل ئىنسانغا ئوخشاش سەمىمىيلىكىڭ، بوۋاقلارغا خاس  پاكلىقىڭ،  سەھەردېكى يورۇقلۇق، قۇياش چىقىۋاتقاندېكى زەر رەڭلىك نۇر تالالىرىغا ئوخشاش نۇرانە  تۇرقۇڭ مېنىڭ كۆڭۈلسىز ھەسرەتلىرىمنىڭ ئاستىدا تىندۇرما بولۇپ قاپتۇ. مېنى كەچۇر...نۇرغۇن كەچمىشلىرىمنىڭ ئازابىغا مەن  بىللە ئاچچىق تولغىنىپ، ئازاپلىق  تىۋىشلىرىمنىڭ  بىر پارچىسى بولغان سۆيۈملۈك يۈرەك...

راستىنلا ئۇنتارمۇ داغى - ئازاپنى،
تولدۇرۇپ چوڭ جامدا ئىچسە مەي-شاراپ.
يۈرىكىم بېغىدىن ئۈزۈلۈپ كەتتى،
سۆڭىكىم ھەسرەتتىن سۇنغاچ قاراسلاپ.



سەن بىرىنىڭ سۆيگۈسىگە قۇل بولۇپ قالدىڭ. مەن سېنىڭ سۆيگۈڭگە قۇل بولۇپ قالدىم. سەن سۆيگۈڭدىن كېچەممىدىڭ، مەن ھەم سەندىن كىچەممىدىم. بەلكىم بىزنىڭ قۇللىقىمىز مۇشۇ يەردىن باشلانغاندۇ. بىز بىر - بىرىمىزنىڭ سۆيگۈ ۋە ئادىمىيلىكىمىزنى، غۇرۇرىمىزنى پايخان قىلىش بەدىلىگە بىر-بىرىمىزنىڭ قۇللۇق چەمبىرىكى ئىچىدە پىقىراشقا باشلىدۇق.

ئەي پەلەك مېنىڭدە نېمە ئۆچۈڭ بار،
سۆيگۈسىز ئاشىققا ئەيلەپ مېنى يار.
سەۋرەمنىڭ قاچىسى بەكمۇ چوڭ بولغاچ،
بىمەھەل ياغدىغۇ چاچلىرىمغا قار.



سەن ئۆزۈڭنىڭ ئىسسىمايۋاتقىنىڭنى ئېيتقاندا مەن قىزىشقا باشلىدىم. سەن تىترەشكە باشلىغاندا  مەن گۈرۈلدەپ كۆيۈشكە باشلىدىم، سەن توڭلاپ قالدىڭ، مەن ئىچىمدىكى گۈلخاننى ئۆچۈرۈش ئۈچۈن پۇرۇخلاپ قايناۋاتقان قىزىق سۈيۈقلۇقنى ئۈستى بېشىمغا تۆكتۈم. مەقسىدىم، كۆيۈۋاتقان روھىمنى جىسمىمنىڭ كۆيۈشلىرى بىلەن تەسەللى تاپقۇزۇش ئىدى ئەپسۇس، ئاقىبەتتە ئىچ ۋە تېشىمدىكى كۆيۈكلەر بىرلىشىپ ھۇررا سادالىرىنى ياڭرىتىپ ئاتاكىغا ئۆتتى.

ھەسرەتلىك گۈرۈلدەپ يېنىشلاردىن مەن،
يالىلداپ ئىچىلغان گۈلگە ئايلاندىم.
قالسىمۇ كۆيۈكنىڭ تارتۇقى دىلدا،
پارىلداپ تۇرغان بىر نۇرغا ئايلاندىم.

قەلب تىۋىشلىرى (2)



كېتىمەن يىنىڭدىن مەڭگۈگە يىراق،
سۆيۈپسەن باشقىنى، يېقىپسەن چىراق.
سېغىنماي ئۆتسەڭمۇ ئەسلەپ قويارسەن،
دېسەممۇ «خوش» سىنى، قىينىدى پىراق.

يىغلىماي ماڭساممۇ ئېچىشتى قاراق،
مەنزىلىم خىرەدۇر يوق مەندە ياراق.
سېغىنماي ئۆتسەڭمۇ ئەسلەپ قويارسەن،
سۆيگۈ دەپ خەت يازساڭ، ئۆرىسەڭ ۋاراق.

كەچۈر ئەزىزىم، ئەمدى ساڭا دەستە- دەستە باھار ھەدىيە قىلالمايمان چۈنكى، سەن مېنى يۈتتۈرىۋەتتىڭ. بەلكىم بىر كۈنلەردە سېغىنمىساڭمۇ ئەسلەپ قالارسەن. شۇنداق چوقۇم ئەسلەپ قالىسەن. ھەر كۈنى كۆزۈڭنى ئىچىپلا ئېرىشىدىغان دەستە- دەستە باھارلىرىڭنى ئەسلەپ قالىسەن.
ئەگەر شۇ ۋاقىتلىرىڭدا مېنى يەنىلا ئەسلەپ قالساڭ يامغۇردىن كىيىنكى ھەسەن-ھۈسەننىڭ جۇلاسىغا قارا، بەلكىم جىسمىمنى كۆرەلەرسەن، ئەگەر يۈرۈكۈمنىڭ تىۋىشلىرىنى تىڭشىماقچى بولساڭ يامغۇرلۇق ئورماندىكى بۇلاقلارنىڭ شىۋىرلاشلىرىغا قۇلىغىڭنى ياق، مېنىڭ مەغرۇرلۇقۇم ۋە ئىشەنچىمنى ئىزدىسەڭ قارلىق تاغ ۋە تىك قىيالاردىكى ياشىرىپ تۇرغان قارغايلارغا نەزەر سال، سېنى مەپتۇن قىلغان گۈزەللىكىمنى ئىزدىسەڭ باھارىڭ سىڭىپ كەتكەن تەبىئەتنى سۆي ۋە ئۇنىڭدىن زوق ئال، يېقىشلىق ۋە ئىزگۈ ئاۋازىمنى ئاڭلىماقچى بولساڭ ئاپپاق چېچەكلەرگە پۈركەنگەن ئالمىلىق باققا بار ۋە چىچەكلەرنىڭ ئارىسىدا ھەسرەتلىك  ئۈنلەۋاتقان كاككۇكنىڭ  ئاۋازىغا جۆر بول، ئەگەر ئازاپ ۋە ھەسرەتكە تولغان كۆزلىرىمنى كۆرۈشنى خالىساڭ  ئۆز قەلب دەريالىرىڭغا شۇڭغۇ.

ھەسرەتلىك بولسىمۇ سەندىن ئايرىلىش،
يەنىلا كەتمەككە قەدەملەر ئالدىم.
ياشلارغا ئايلاندى دەردىم - ئازابىم،
كۆرمىدىڭ سەن ئۇنى قوينۇمغا سالدىم.

ئاياللىق قەلب



ئاياللىق قەلب چېكىپ قويسىڭىز جاراڭلاپ يېقىملىق ئاۋاز چىقىرىدىغان جانان چىنىگە ئوخشايدۇ، ئەگەر سىز ئۇنى سۇندۇرۇپ قويۇشتىن ياكى قولىڭىزدىن چۈشۈرۈپ دەز كەتكۈزۈۋىتىشتىن ئەنسىرىسىڭىز بۇ جانان چىنىنى قەلب تۆرىڭىزنىڭ گۈل تەكچىلىرىگە تىزىپ ساقلاڭ. چۈنكى ئۇ ئىنتايىن نازۇك.
ئاياللىق قەلب ساپ ئالتۇندىن نەقىشلەر بىلەن بېزىلىپ كۆزنى قاماشتۇرىدىغان ناھايىتى ئېسىل ۋە باھاسى تەڭداشسىز بولغان قاشتېشى زۇننارغا ئوخشايدۇ. دوستۇم،  سىز ئۇنى يوقۇتۇپ قويۇشتىن ئەنسىرىسىڭىز ئۇنى تۇمار قىلىپ بوينىڭىزغا ئېسىۋىلىڭ، ھەم ئۇنىڭ ناھايىتى گۈزەل، دەڭداشسىز  ئىكەنلىكىنى  ھەرگىز ئىسىڭىزدىن چىقىرىپ  قويماڭ.
ئاياللىق قەلب ساناقسىز  گۈل ئىچىپ تۇرىدىغان چېچەكلەرگە، ئادەمگە لەززەت ۋە قۇۋۋەت بېغىشلايدىغان مىۋىلەرگە ئوخشايدۇ. ئەگەر سىز ئۇ مىۋىلەرنىڭ ۋايىغا يېتىپ پىشىشى ۋە سىزگە زوق ئاتا قىلىشىنى ئۈمىت قىلسىڭىز ئۇ چىچەكلەرنى قارا بوران، ھۆل يېغىن ۋە مۆلدۈرلەرنىڭ ۋەيران قىلىۋىتىشىدىن پەخەس بولۇڭ، قوغداڭ، ئاسراڭ، كۆڭۈل بۆلۈڭ.  
ئاياللىق قەلب باراخسان ئۆسكەن ۋە ئەتىيازدىن تاكى قىشنىڭ سوغىقىدا ئۇششۈپ كەتكىچىلىك بولغان ۋاقتىنىڭ ھەممىسىدە بىرى توزۇسا بىرى ئېچىلىپ تۇرىدىغان گۈلگە ئوخشايدۇ. ئەگەر سىز بۇ گۈللەرنىڭ پۇرىقى، گۈزەللىكى ۋە ئۇنىڭ  سىزگە ئاتا قىلىدىغان زوىلىرىدىن بەھرىمان بولۇشنى  ئويلىسىڭىز ئۇنى ھەر ۋاقت ئىسىڭىزدىن چىقارماي ئۇ گۈللەرىنىڭ تېخىمۇ چوڭ ۋە جىق ئېچىلىشى ئۈچۈن پەرۋىش قىلىشنى ئۇنۇتماڭ.چۈنكى ئەڭ جىق ئېچىلىدىغان شۇ گۈللەر يەنە شۈنچىلىك پەرۋىشكە ۋە كۆيۈنۈشكە مۇھتاج بولىدۇ.
ئاياللىق قەلب خەستە دىللارنى خۇشال قىلغۇچى، نىمجان يۈرەكلەرگە كۈچ - قۇۋۋەت بېغىشلىغۇچى شۇنداقلا ئۇنىڭ گۈزەللىكىگە ۋە خۇش پۇرىقىغا مەپتۇن بولمىغان بىرمۇ ئادەم بولمىغان قىزىل گۈلگە ئوخشايدۇ. ئەگەر سىز ئۇنىڭدىن ئۈنۈملۈك پايدىلىنىشنى، خۇش پۇرىقىغا قىنىۋىلىشنى ۋە ئۇنىڭ گۈزەللىكىدىن زوق ئېلىشنى ئويلىسىڭىز ئۇنىڭ قۇياش نۇرىدىن تولۇق بەھرىمان بولىشى ئۈچۈن ئەتراپتىكى ياۋا ئوت چۆپ ئۇنىڭغا سايە بولىۋالىدىغان دەل دەرەخلەردىن ئۇنى قوغداڭ ۋە ئۇنىڭغا مىھرى – مۇھەببىتىڭىزنى بېغىشلاڭ، شۇندىلا ئۇنىڭ ھەقىقى پورەكلەپ، قىپ-قىزىل رەڭدە جۇلا قىلغىنىدىن زوق ۋە بەھىر ئالالايسىز.
ئاياللىق قەلب سەھەردە ئىچىلغان گۈل بەرگىدىكى شەبنەمگە ئوخشايدۇ.  گۈل ۋە ئۇنىڭغا قونغان شەبنەمنىڭ گۈزەللىكىدىن زوقلانماقچى بولسىڭىز ئۇ شەبنەمنىڭ  نەچچە تامچە سۇ ئىكەنلىكىنى ئويلىماڭ، چۈنكى شۇ نەچچە تامچە شەبنەم  تامچىسى ئىچىگە ئاياللىق قەلبنىڭ ئوكيان كەبى كۆز يېشى، ھەسرىتى  قونغان بولىدۇ.
ئاياللىق قەلب مەيىن شامالدا يەلپۈنۈپ تۇرغان ياپ – يېشىل بۇغدايزارلىققا ئوخشايدۇ. ئۇنىڭ يېشىل رەڭدە دېڭىزدەك يەلپۈنۈپ  ۋە يەڭگىل تەۋرىنىپ تۇرىشى سىزنىڭ كۈزدىكى كاتتا بىر بۇغداي چەشلىرىنىڭ ئېگىسى بولىدىغانلىقىڭىزنىڭ دېرىكىدۇر. ئۇنتۇماڭكى بۇ مايسىلار يەنىلا سىزنىڭ پەرۋىش ۋە كۆيىنىشىڭىز بىلەن بىللە ئۆزىڭىزنىڭ بىر دېھقان ئىكەنلىكىنى ئۇنتۇماسلىقىڭىزغا باغلىق...
ئاياللىق قەلب ناھايىتى يېقىملىق، قانچە ئاڭلىسىڭىز قانمايدىغان بىر لېرىك مۇزىكا. سىز بۇ مۇزىكا لېنتىسىدىن زىرىكسىڭىزمۇ ئۇنى توپا – چاڭ ئاستىدىكى كورۇپكىغا سېلىپ قويماڭ.
ئاياللىق قەلب ئاق بۇلۇتلارنىڭ ئۈزۈپ يۈرگەن گۈزەل ھالىتىنى، ئالتۇن تاۋاقتەك پارقىراپ تۇرىدىغان تولغان ئاينىڭ سۈتتەك ئايدىڭ ئاخشاملىرىنى، ئوماق قىزىڭىزنىڭ كۆزىدەك نۇرلۇق چولپان يۇلتۇزنى، سەبىيلەرنىڭ قاراقلىرىدەك جىمىرلاپ تۇرغان سانسىز يۇلتۇزلارنى سىزگە ئاكىس ئەتتۈرۈپ بېرىدىغان كۆك ئاسمانغا ئوخشايدۇ. سىز پەقەت بۇ كۆك ئاسماننىڭ يامغۇر يېشىنلىق مەزگىللىرىنىلا كۆرمىسىڭىز.
ئاياللىق قەلبكە تەبىئەتتىكى بارچە گۈزەللىك، سىر، ھىكمەت مۈجەسسەم بولغان. تەبىئەتنى سۆيگەن، ئۇنى ئاسرىغان، كۆڭۈل بۆلگەن، ئۇنىڭغا نىسبەتەن مەجبۇرىيەت، مەسئۇلىيەت تۇيغۇسى بولغان ھەر قانداق كىشى ئۇنىڭ پۈتمەس – تۈگۈمەس، تەمەننا ۋە مىىننەتسىز  لەززىتىدىن بەھىر ئالالايدۇ.
ئاياللىق قەلب نۇرغۇن كىشى قىزىقىپ سېتىۋالسىمۇ پەقەت ئوقۇشقا خۇش ياقمايدىغان بىر بەدىئي كىتابقا ئوخشايدۇ، سىز ئۇ كىتابنى كىتاب جاھازىسىدىن ئېلىپ مۇنداقچە ۋاراقلاپ قويماستىن تەپسىلى كورۈڭ، شۇنىڭدا ئۆزىڭىز ھىس قىلمىغان نۇرغۇن ئېسىل دۇدانىلەردىن ۋاقىپ بولىسىز.
ئاياللىق قەلب تېخى سىز يازمىغان بىر شىئېرغا ئوخشايدۇ، شىئېر يېزىش ئۈچۈن بەدىئي دىت ۋە ساپا كىتىدۇ. سىز بۇنىڭ ئۈچۈن كۆپرەك ۋاقت چىقىرىپ ئۈگۈنۈڭ، تېرىشىڭ. ئىشىنىمەنكى سىز چوقۇم ياخشى بىر شائېر بولالايسىز ۋە قەلب تارىنى چەككىدەك ئېسىل لېرىكىلارنى يازالايسىز. پەقەت ۋاقت چىقارسىڭىزلا.

سېغىنىشنىڭ رەڭگى


سېغىنىشنىڭ قانداق بولىدىغانلىقىنى بىلسەممۇ رەڭگىنىڭ قانداق بولىدىغانلىقىنى بىلمەيتتىم.
ئانام، تۆت قېرىندىشىم ۋە ئۇرۇق – تۇققانلار بىلەن ئايرىلىش ياشلىرىمىزنى، توسمىسى ئىچىۋىتىلگەن كەلكۈن سۈيىدەك قويىۋەتكىنىمىزچە دادامنىڭ تاۋۇتى بىلەن خوشلاشماقتا ئىدۇق. تاۋۇت كۆتۈرۈلۈپ دەرۋازىمىزدىن لەڭ ئۇرۇپ چىقىپ كىتىۋاتقان ئاشۇ پەيتتە، مەن دادامنىڭ تاۋۇتىنى يەنە بىر كۆرۈۋالماقچى بولۇپ كىشىلەر توپىدىن بويۇندىدىم.  بۇ ۋاقىتتا كۆزۈمگە كۆرۈنگىنى ۋە قارچۇقۇمدا قېتىپ قالغىنى يېشىل رەڭلىك تاۋۇت يوپۇقى بولدى.
شۇنىڭدىن باشلاپ سېغىنچلىرىم، چېكىگە كۆز يەتمەيدىغان، توختاۋسىز يەلپۈنۈپ كىشىگە ئارام بىغىشلايدىغان بولۇق ئۆسكەن مايسا ھالىتىدە زاھىر بولىدىغان بولدى. تومۇز ئايلىرىدىكى چەكسىز كەتكەن چۆللۈكتىن ھۇۋۇلداپ كىلىپ تۇرىدىغان ئاتەشكە ئوخشاش سىغىنىشلىرىمنى تاۋۇت يوپۇقى رەڭلىك يېشىل سىغىنىشلىرىم بىلەن نەمدەيدىغان بولدۇم.
تېرەكلەر پوتلا چىقارغان، ئۈرۈكلەر چىچەكلەشكە تەييار بولۇپ، قوماچلىرى ساپال رەڭگىگە كىرگەن ۋە كېچىدىن بىرى ساپسېرىق توپا يېغىپ پۈتۈن جاھان سېرىقلىق ئىلكىدە قالغان بىر سەھەردە دادامنىڭ تۇپراق بېشىغا چىقتىم. نەچچە قەدەم ئالدىدىكى نەرسىنى ئىلغا قىلغىلى بولمايدىغان توپا قوينىدا تۇپراقنىڭ سېرىق رەڭ ئالغان توپىسىغا چۆكۈپ ئولتۇردۈم. كۆز ياشلىرىم مەڭزىم، يۈزۈم ۋە بوينۇم بويلاپ ئىچىمگە قۇيۇلماقتا ئىدى.
دادامنىڭ نۇرلۇق كۆزى، شىرىن سۆزى، قەددى-قامىتى شۇنداقلا ساغلام ۋاقىتلىرىدىكى ھەر بىر ئىش ھەركىتى كۆز ئالدىمغا قايتا پەيدا بولۇش بىلەن بىللە ئالدىمدىكى سېرىق رەڭلىك توپا ۋە سېرىق رەڭ ئالغان تۇپراق ھەممىنى يالماپ كەتتى. كۆز ياشلىرىم مەڭزىم، يۈزۈم ۋە بوينۇپ بويلاپ ئىچىمگە قۇيۇلۇشقا باشلىدى ۋە مېنى ئېقىتىپ كەتتى.
شۇنىڭدىن باشلاپ سېغىنىشنىڭ رەڭگىنى توپا رەڭدە ھىس قىلىدىغان بولدۇم. توپا رەڭلىك سېغىنىش قەلبىمگە لەپ-لەپ يىغىپ تۇراتتى.
مانا بۈگۈن يۇرتۇمدا توپا يېغىۋاتقىلى ئۈچ كۈن بولدى، بۈگۈن سەھەردىن باشلاپ ئۇلغۇيۇپ يىغىۋاتقان سېرىق توپا نەچچە قەدەم ئالدىدىكى نەرسىنىمۇ ئىلغا قىلغىلى قويمايتتى.
سەھەردە ئۇلغىيىپ يېغىۋاتقان سېرىق رەڭلىك توپا بىلەن قوشۇلۇپلا توپا رەڭلىك سېغىنىشلىرىممۇ لەپ-لەپ يېغىشقا باشلىدى. شىمالدىن جەنۇپقا قاراپ ياسالغان دادام تۇپرىقىنى ئىلغا قىلىشقا ئۇرۇنغان كۆزلىرىمدىن يىغلاڭغۇ بۇلۇتلاردىن تۆكۈلگەن يامغۇرغا ئوخشاش ياش كەلكۈنى يامراپ مەڭزىم، يۇزۇم ۋە بوينۇم بويلاپ سىرغىغان ياشلار ئىچىمگە قاراپ ئېقىشقا باشلىدى ۋە مېنى ئېقىتىپ كەتتى. توپا رەڭلىك سېغىنىشلار لەپ-لەپ يېغىۋاتاتتى.

ئوغلۇمغا يېزىلغان خاتىرە


نەچچە كۈن بۇرۇن بىر كىتاب ئوقۇدۇم، ئۇ كىتابتىكى مۇنداق بىر جۈملە سۆز مېنىڭ ھايات كەچمىشىمنى قايتا ۋاراقلاپ ئوغلۇمغا بۇ خاتىرىنى يېزىشىمغا تۈرىتكە بولدى.
بىر ئاتا ئۇزۇن ۋاقت كۆرمىگەن ئوغلىنى قايتا كۆرگەندىن كىيىن «ئوغلۇم، سېنىڭ چوڭ بولۇپ، بويۇڭنىڭ مىنىڭ بويۇم بىلەن تەڭ بولغىنىدىن، ئەقىل - پاراسەت ۋە كۈچ –قۇۋەتكە تولغىنىڭدىن  غۇرۇر ھىس قىلدىم» دېدى.
بۇ سۆزنى ئاڭلىغان ۋاقتىمدا ھاياتىمدا، تۇرمۇشۇمدا يۈز بەرگەن بەزى ئىشلار، ۋەقەلەر كۆز ئالدىمدىن قايتا كەچتى.  مەن بۇ ئۇنتۇلماس دەقىقىلەردىن ئوغلۇمنى خەۋاردار  قىلماقچى ۋە ئۇنىڭمۇ مېنىڭدەك غۇرۇر ھىس قىلىشى ئۈچۈن ئۇنىڭغا ئاتاپ  بۇ خاتىرىنى يازدىم.
شۇنداق،  ئۇ ئاتىنىڭ سۆزى  مېنىڭمۇ غۇرۇر ھىس قىلغان ۋاقتلىرىمنى كۆز ئالدىمغا كەلتۈردى.، مەنمۇ بىر تاتلىق ئەسلىمە قوينىدا قايتىدىن غۇرۇر ھىس قىلدىم.
ئوغلۇم- سېنى ئۈچ كېچە-كۈندۈز قاتتىق تولغاق ئازابى تارتىپمۇ يەڭگىپ بولاممىدىم ۋە ئاغرىققا بەرداشلىق بىرەممەي، «ماڭا پىچاق بېرىڭلار، قوسۇغۇمنى يېرىپ بۇ شۇمنى ئېلىۋىتىمەن» دەپ توۋلاپتىمەن. بۇ ۋاقىتتا موماڭ « ئۇنداق دېمە قىزىم، بۇ ئازاپلىرىڭ بەدىلىگە ئاللاھ ساڭا ئەجىر بېرىدۇ، سەن ئانا بولغانلىقىڭ ئۈچۈن پەرزەنتىڭنىڭ بۈيۈك ھۆرمەت ۋە مۇھەببىتىگە ئېرىشىسەن، پەرزەنتىڭ ئىڭڭەلەپ ئالدىڭغا چۈشكەندە بۇ ئاغرىقلارنى تامام ئۇنتۇيسەن» دېدى.
ئوغلۇم – موماڭ ناھايىتى توغرا ئېيتىپتۇ. سەن دۈگىلەك قارا كۆزلىرىڭنى ئېچىشىڭ بىلەن تارتقان ھەممە ئاغرىقلىرىم، ۋايساشلىرىم ئۇنتۇلۇپ  كەتتى. قەلبىم ئانىلىقنىڭ پايانسىز كۆكىدە قانات قېقىپ بەخت تۇيغۇسىغا چۆمۈلدى.
ئوغلۇم – داداڭ سېنىڭ مۇشتۇم چوڭلىقىدىكى بېشىڭنى سىلاپ تۇرۇپ:« پاھ، نېمە دېگەن چىرايلىق بالا بۇ، تېرىسى سۈتتەك ئاق، كۆزلىرى مايەقتەك قارا، چاچلىرىچۇ تېخى، يىپەكتەك يۇمشاق ۋە بولۇق. قارىسام دۇنيادىكى ئەڭ چىرايلىق بوۋاقنى ئاناڭ تۇققاندەك قېلىدۇ، ئاللاھ ساڭا ئۇزۇن ئۆمۈر ۋە بەخت بەرگەي ئوغلۇم » دېدى.
بۇ سۆزلەردىن شۇنداق خۇشال بولدۇم ۋە  غۇرۇر ھىس قىلدىم.
بۇ خۇشاللىق ۋە بەخت تۇيغۇسىدا يەنە شۇنداق بىر خىيال كۆڭلۈمدىن كەچتى. «ئايال بولۇش، ئانا بولۇش ئادەمگە مۇشۇنداق ئىپتىخار، بەخت ۋە غۇرۇر ھىس قىلدۇرسا، ئون ئوغۇل تۇغسام، ئون ئوغلۇمنى قاتارى بېقىپ، تەربىيلەپ ياراملىق ئادەم قىلسام، ئەگەر ئۇلارنى چاقىرسام ئوغۇللىرىم ئالدىمدا ئونتال نەيزىدەك تىك تۇرىدىغان ئوغۇل بولۇپ چىقسا، مەن بىر قەھرىمان ئانا بولسام» دەپ خىيال قىلىپ كېتىپتىمەن. كىيىن خىياللار قوينىدىن سۇغۇرۇلۇپ چىقىپ بۇ خىياللىرىمدىن ئۆزۈمچە خۇشال بولدۇم ۋە بىر خىل غۇرۇر ھىس قىلدىم.
ئوغلۇم- سەن تۇغۇلۇپ 15-كۈنى قىزىپ قاتتىق ئاغرىپ قالدىڭ. ئۆيدىكى چوڭلاردىن تارتىپ كىچىكلەرگىچە ھەممىمىز پاراكەندى بولۇپ، قويغان تۇتقىنىمىزنى بىلەلمەي قالدۇق. مەن بولسام سېنى باغرىمغا باسقىنىمچە يېغلاشقا باشلىدىم.  سېنىڭ كېسىلىڭ بىلەن تەڭ مېنىڭمۇ روھىم چىقىپ كەتكەندەك پۈتۈن بەدىنىم بوشىشىپ ئۆرە بولالماس ھالغا كېلىپ قالغان ئىدىم. سېنى بالنىستقا ئالدۇردۇق. دوختۇرلار تۈرلۈك ئاماللارنى قىلىپ سېنىڭ قىزىتماڭنى ياندۇرۇشقا تېرىشىۋاتاتتى. لەۋلىرىڭ چاك – چاك يېرىلغان، كۆكرىكىڭ شىددەت بىلەن بىر ئۆرلەپ، بىر پەسىيىپ تۇراتتى. بەدىنىڭگە ئالماشتۇرۇپ قويۇلۇپ ئېرىپ كېتىۋاتقان  مۇز خالتىرىلىرىدىكى سۇلاردەك  مېنىڭ كۆز ياشلىرىممۇ ھېچ تۈگۈمەيتتى. كۆڭلۈمدە بولسا ئەندىشە، قورقۇنۇچ بىلەن نىرۋىلىرىم قالايمىقانلىشىپ كېتىۋاتاتتى.
پىشانەڭدىن چىقىۋاتقان قوقاس كەبى كۆيدۇرگۈچ ئىسسىقلىققا يۈزۈمنى يېقىپ تۇردۇم ۋە «ئەگەر بۇ قىزىقلىقلار مېنىڭ بەدىنىمگە ئۆتۈپ، بالام كۆزىنى ئاچسا، مەن بۇ ئوتتا كۆيۈپ چۈچۈلە بولساممۇ رازى ئىدىم» دېگەنلەرنى خىيال قىلغاچ سېنى قۇچىقىمغا ئالدىم. سىرتقا گىرىمسەن قاراڭغۇلۇق تاراۋاتقان، يېراقتىكى بىنالار، دەرەخلەر غۇۋا ھالەتتە بولۇپ، سىرتنىڭ بۇ ۋاقىتتىكى كۆرىنىشىمۇ ماڭا ئوخشاش بېچارە، ئۈمىتسىز ۋە مىسكىن  كۆرۈنۈپ تۇراتتى.  بۇ ۋاقىتتا مەزىننىڭ شام نامىزىغا توۋلىغان ئۈزۈك،  مۇڭلۇق ئەزان ئاۋازى  ياتاق ئىچىگە سىڭىپ كىردى.  ئوغلۇمنى قۇچىقىمغا ئالدىم ۋە ئۇنىڭ تىنىقلىرىدىن كىلىۋاتقان ھارارەتنى ئىچىمگە شۈمۈردۈم.
ئى ئاللاھ، مەن بىر ئاجىز قۇلۇڭمەن، بۇ نارەسىدىنى ماڭا ئۆزۈڭ بەرگەن، ھېلىمۇ قايتىدىن بەرگىن، باشتا بەرگەنكەنسەن ئاخىرىغىچە بەر، ئۆزۈڭنىڭ ھەققى ھۆرمىتى، ئانىلارنىڭ ھۆرمىتى، چىقىۋاتقان بۇ ئەزاننىڭ ھۆرمىتى، ئوقۇلىۋاتقان بۇ شام نامىزىنىڭ ھۆرمىتى ئۈچۈن بۇ پەرزەنتىمنى سەندىن يەنە بىر قېتىم تىلەيمەن....
ئىچىمگە پاتمىغان يېغا ۋە بىئىلاجلىق نالەم تېشىمغا پارتلاپ چىقتى. مەن ئۈن سېلىپ قاتتىق يېغلىدىم. ئارقامدىن ئاناممۇ ئۈن سېلىپ ماڭا قوشۇلدى ۋە ئوغلۇمنى قۇچىقىمدىن ئالدى.
ئەتىسى ئەتىگەندىن باشلاپ سەن  كۆزۈڭنى ئېچىشقا، قەغىش قىلىپ يېغلاشقا باشلىدىڭ. يۇقىرى ئۆرلەپ كەتكەن ھارارىتىڭ پەسىيىشكە باشلىغان ئىدى. مەنلا ئەمەس، دوختۇر، سستېرالارمۇ خۇشال بولدى ۋە بۇنداق كىچىك بوۋاقنىڭ بۇنداق يۇقىرى قىزىتمىغا بەرداشلىق بەرگىنىگە ھەيران قالغانلىقىنى ئېيتىشتى. مەن يەنە بىېر قىتىم غۇرۇر ھېس قىلدىم. چۈنكى ئانىلىق ئىلتىجالىرىم ئىتىبارسىز قالدۇرۇلمىغان ئىدى.
ئوغلۇم-  سېنى 6يېشىڭدا مەكتەپكە ئېلىپ باردۇق. ئوقۇتقۇچى ساڭا قاراپ «بالا تېخى 6 گە كىرىپتۇ، قارىماققا 6 ياشقا كىرگەندەكمۇ ئەمەس، جۇغى بەك كىچىككەن، تېخى چىشىمۇ چۈشمەپتۇ، ئوقۇيالارمۇ، دەرسلەردە يېتىشىپ كىتەممەسمىكى، كىلەر يېلى بەرسەڭلار  قانداق؟» دېدى. بىز ساڭا قارىدۇق، سېنىڭ بەكلا ئوقۇغۇڭ بار ئىدى. سەن «مەن ئوقۇيالايمان، ئوقۇيمەن» دېدىڭ. بۇ سۆزۈڭدىن ئوقۇتقۇچى ۋە بىز سۆيۈنۈپ كەتتۇق. ئوقۇتقۇچۇڭ« بولدى، مەن ئىپ قالاي، بىرەر ئاي ئوقۇپ باقسۇن، قاراپ باقايلى، ھازىر ياندۇرىۋەتسەم بۇ يېگىتكە ئىغىر كەلگىدەك» دېدى.
سەن ئوقۇپ كەتتىڭ. ھەم ناھايىتى ياخشى ئوقۇدۇڭ. يېرىم مەۋسۇم ئاخىرلاشقاندىن  كىيىن ئاتا – ئانىلار يېغىنىدا ئوقۇتقۇچۇڭ سېنى ئالاھىدە تىلغا ئېلىپ ماختىدى ۋە مۇكاپاتلىدى. مەن يەنە بىر قېتىم غۇرۇر ھىس قىلدىم.
ئوقۇش ئۈچۈن بىزدىن نەچچە مىڭ كىلومېتىر يىراق بولغان بىر شەھەرگە كىتىش ئالدىدا تۇرغان ۋاقتىڭدا « ئۆزۈڭنىڭ ئادەم ئىكەنلىكىڭنى ئۇنتۇپ قالما، ئادەملەر قىلىشقا بولىدىغان ۋە بولمايدىغان ئىشلارنى، دېيىشكە بولىدىغان ۋە بولمايدىغان سۆزلەرنى، ئۆزۈڭنىڭ نېمىلەرنى قىلىدىغان، نىمىلەرنى قىلمايدىغانلىقىڭنى، سېنىڭ تېخى بىر مايسا ئىكەنلىكىڭنى، نۇرغۇن نەرسىلەرگە ئىھتىياجىڭ بارلىقىنى، پەقەت ئۆز كۈچۈڭگە ۋە تىرىشچانلىقىڭغا تايىنىپ بۇ قىيىنچىلىقلارنى يېڭىشىڭنى،  ھەر قانداق قىيىن شارائىت ۋە قىيىنچىلىقلاردىمۇ ئادىمىيلىكىڭنى،  ئۆزلىكىڭنى ، كىملىكىڭنى ئۇنتۇماسلىقىڭنى، ئانا تىلىڭنى قەدىرلەشنى  ئۇنى جان جەھلىڭ بىلەن قوغداشنى ، ۋەتىنىڭنى سۆيۈشنى،  تۇرمۇش مىزانىڭغا ئەخلاقنى ئۆلچەم قىلىشىڭنى ، چىدامچانلىقنى يىتۈلدۈرىشىڭنى ، نەپسىڭنىڭ قۇلى بولماسلىقىڭنى،  ۋە بىر مېۋىلىك دەرەخ بولۇپ ئەتراپىدىڭدىكىلەرنى مىۋەڭدىن بەھىرلەندۈرىشىڭنى، زىمىستاندا ئىللىق قۇياش ، چۆللۈكلەرگە شىپالىق يامغۇر بولۇشىڭنى ئىيتتىم ۋە   مېنى خاتىرجەم تۇرسۇن دېسەڭ  سۆزلىرىمنى ھەرگىز ئۇنتۇپ قالما» دېدىم.
  سەن «ئېيتقانلىرىڭنى ھەرگىز ئۇنتۇپ قالمايمەن، دېگىنىڭدەك چوقۇم ياخشى ئوقۇيمەن، بەلكىم ئوقۇشۇم ئۇزۇن داۋاملىشىشى مۇمكىن، دۆلەت ئىچى ۋە چەتئەللەردە ئوقۇش ئۈچۈن خىلى يىللار كىتىدۇ، بۇ يىللاردا سېنىڭ مېنىڭدىن ئەنسىرەپ  ۋە سېغىنىپ ئولتۇرغىنىڭنى بىلسەم  ياخشى ئوقۇيامماسلىقىم، چەتئەللەرگە چىقىپ ئوقۇش ئارزۇيۇمغىمۇ يىتەممەسلىكىم مۇمكىن، شۇڭا مېنى ئازراق ئويلاپ ئۆزۈڭنى كۆپرەك ئويلىساڭ، ئىشەنگىنكى چوقۇم ياخشى ئوقۇيمەن» دېدىڭ ۋە  بارماقلىرىمنى  قولۇڭ ئارىسىغا ئىلىپ يىنىك سىقتىڭ. بۇ سۆزۇڭدىن چىھرىمگە كۈلكە، كۆزۈمگە يېغا ياماشتى ۋە تاتلىق بىر غۇرۇر ھىس قىلدىم.
ئوغلۇم، ئانىلىق قەلبنىڭ بۇ غۇرۇر ۋە ئىپتىخارلىق تۇيغۇلىرىنى ئۈزۈپ قويماسلىقىڭنى ئۈمىد قىلىپ بەختىيار ئاناڭ:
سەھەر

قانىغان گۈل


سەن «كېتىمەن» دېدىڭ، مەن  «ئۇزۇتۇپ قوياي» دېدىم.
ئىشىككە چىقىۋىتىپ بېغىمىزدىكى سەھەردە ئىچىلغان بىر تال قىزىل گۈلگە كۆزۈم چۈشتى ۋە ئۇنى ساڭا يوللۇق تۇتماقچى بولدۇم.
گۈلنى ئۈزۈپ چېكەڭگە قىسىپ قويدۈم، بەلكىم بىر نەچچە قەدەم ماڭغاندىن كىيىن تاشلىۋىتەرسەن ياكى بىر ئۆمۈر ئۇنىڭ پۇرىقىغا مۇشتاق بولۇپ قۇرىغان بەرگىلىرىنى ساقلاپ ئۆتەرسەن...
كەينىمگە ئۆرۈلۈپ كىرىپ كەتمەكچى بولغىنىمدا، ئاپئاق شايى كۆڭلىكىمنىڭ ئىتەكلىرىدىكى قىزىلگۈل رەڭلىك قان داغلىرىغا كۆزۈم چۈشتى. گۈلنى ئۈزگىچە بارمىقىمدىن ئاققان قانلارمىدۇ ياكى سېنى ئۇزاتقىچە يۈرىكىمدىن سىرغىغان قانلارمىدۇ...

تەبىئەتنىڭ يۈرىكى

ئەسسالام!
  جىمى مەۋجۇداتلارنىڭ ھاياتلىق يىلتىزى بولغان تەبىئەت ئانا، قەلبىمدىكى ئەڭ يۈكسەك تۇيغۇ بولغان سالامىم ئارقىلىق سېنىڭ پۈتمەس-تۈگۈمەس مېھرى شەپقىتىڭگە رەھمەت ئىيتماقچىمەن.
كۇرمىڭلىغان ئاجىز ۋە ناتىۋانلارنىڭ، غېرىپ ۋە يىگانىلەرنىڭ سېنىڭ پەپىلەشلىرىڭ، ئۈمىد-ئارزۇلارغا، ياشاش نىشانلىرىغا يېتەكلەشلىرىڭ بىلەن قايتىدىن ئىشەنچىسىنىڭ ئاشقانلىقىغا رەھمەت ئېيتماقچىمەن. جۈملىدىن ئۆزۈمنىڭمۇ سېنىڭ مىھىر- مۇھەببىتىڭ ۋە كۆيۈمىڭ بىلەن ھاياتقا بولغان ئىشەنچىمنىڭ ئاشقانلىقىغا رەھمەت ئىيتماقچىمەن.
      شۇنداق، سەن مېنىڭ يۈرىكىمسەن، يارىلىشىمنى، يوقۇلىشىمنى، مەڭگۈلۈك يورۇقلۇقنىڭ قەيەردە ئىكەنلىكىنى ئۆز رۇخسارىڭ ئارقىلىق ئىپادە قىلىپ كۆرسىتىپ بېرىۋاتقان ئانامسەن. سەن تومۇرلىرىمدىكى قانلىرىمنىڭ شاۋقۇنلاپ ئىقىشىغا ھەمنەپەس بولۇۋاتقان، ئارزۇ ئىستەكلىرىم يولىدىكى ئۈمىدلىرىمگە يول كۆرسىتىپ بىرىۋاتقان، ئازاب ۋە ھەسرەتكە تولغان قەلبىمنى ئىللىتىپ گۈزەللىكنى كۆرسىتىپ كېلىۋاتقان، مۇھەببەتنىڭ، مىھرى شەپقەتنىڭ، ساداقەتنىڭ، ۋىجدان – غۇرۇرنىڭ شۇنداقلا ئادەملەردە بولۇشقا تېگىشلىك ھېس تۇيغۇلارغا يول ئېچىپ بېرىۋاتقان مېنىڭ ۋە كۇرمىڭلارنىڭ يۈرىكىسەن.
      پۈتۈن جىسمىم ھاياجانغا تولغان، روھىم سېنىڭ يۈرىكىڭنىڭ تىۋىشلىرىغا قۇلاق يىقىۋاتقان شۇ مىنۇتلاردا يۈرىكىڭنىڭ ناھايىتى جۇشقۇن، رىتىملىق ۋە ئاجايىپ سىھرى كۈچكە تولغان ھالدا يىقىملىق مۇزىكىغا ئوخشاش كىشىنىڭ قەلبىنى لەرزىگە سالىدىغان بۇنداق سوقۇشلىرىغا نېمە سەۋەبچى بولۇۋاتقاندۇ، ئېيتقىنچۇ؟
     بىلىپ قال قىزىم- مېنىڭ يۈرىكىم، يۈرىكى كىم تەرىپىدىن يارىتىلىپ، كىم تەرىپىدىن يوقۇلىدىغانلىقىنى بىلگۈچىلەرنىڭ، ئەۋلاتلىرى ۋە كەلگۈسى ئۈچۈن ھالال ياشىغۇچىلارنىڭ يۈرىكىدۇر. يەنە ئىغىر ۋە قاراڭغۇ كىچىلەردە ياراتقۇچىسىنى ياد ئېتىپ ئۇيۇشۇپ قالغان بەدەنلىرىنىڭ سەزگۈسىنى يوقاتقۇچىلار ۋە كۆز ياشلىرى كىرپىگىدە توڭلاپ قالغۇچىلارنىڭ يۈرىكىدۇر.
قىزىم- مېنىڭ يۈرىكىم ئىنسانىيەتنىڭ تېنچلىقى ۋە ئەركىنلىگى ئۈچۈن كۈرەش قىلغۇچىلارنىڭ، زىمىستاندىكى سوغۇقنىڭ ھۇۋلىشىغا پەرۋا قىلماي خوشنىسى ئۈچۈن سەپەرگە چىققۇچىنىڭ، ئاتەشكە ئوخشاش قۇياش نۇرىنىڭ كۆيدۈرىشىدىن قورۇقماي باشقىلار ئۈچۈن ئۆستەڭ قىزىپ سۇ باشلىغۇچىلارنىڭ، ياياقلار ۋە ئاجىزلار ئۈچۈن كۆۋرۈك سىلىپ يول ياسىغۇچىلارنىڭ، ئۇچار قۇش، ھايۋاناتلار ئۈچۈن بوستانلىقلارنى ياراتقۇچىلارنىڭ يۈرىكىدۇر.
قىزىم- مېنىڭ يۈرىكىم ـ ئاشۇ خلۋەت سەھرادىكى قۇم بارىخانلىرى ئارىسىغا جايلاشقان يىگانە قەبرىدىكى يىگىتكە كۈن ۋە تۈن ھەمرا بولۇپ، ئۇنىڭ تۇپرىقىنى رەڭگارەڭ مىھىر گۈللىرى بىلەن بىزەپ ياشلىقى، گۈزەللىكىنى شۇ گۈللىرىدىن كۆرۈۋاتقان، يۈرىكى ۋە مىھرى بۇ قۇملۇققا باغلىنىپ قەددى مەزگىلسىز مۈكچەيگەن، ۋاقىتسىز ئاقچاچلىق مومايغا ئايلىنىپ كەتكەن ۋاپا ۋە ساداقەت پەرىشتىسىنىڭ يۈرىكىدۇر.
مېنىڭ يۈرىكىم ـ چاچ ساقاللىرى ئۇچتەك ئاقىرىپ ئورنىدىن تۇرالمايدىغان بولۇپ قالغان ئاتىنىڭ ھاجىتىدىن كىچە-كۈندۈز چىقىۋاتقان، بىرەر قىتىممۇ «ئۇھ» دەپ ھاردۇق ئىلىشنى خىيال قىلمىغان ۋە ئەما بولۇپ ماڭالمايدىغان ئانىنىڭ ئىككى كۆزىگە ئايلانغان يالغۇز ئوغۇلنىڭ يۈرىكىدۇر.
قىزىم، مېنىڭ يۈرىكىم ـ جۇپتىدىن ئايرىلىپ تۆت قىزىنى يالغۇز قاتارغا قوشقان، ئەتىيازدا ساپاننى ئۆزى ھەيدەپ يەرگە يالغۇز ئۇرۇق چاچقان، يازدا سەلكىن شامالغا ئارا ئىتىپ داننى ساماندىن ئۆزى ئايرىغان، كۈزدە قىلغان مىھنىتىدىن ۋە ئالغان ھوسۇلىدىن سۆيۈنۈپ راھەتلىنىپ ئۇخلىغان، تەمەننا، كىبىردىن يىراق تۇرۇپ  بېرىلگەن رىسقى - نىسىۋىسىگە شۈكرى-سانالار ئىيتقان، قىشتا بالىلىرىغا ئۆينى ئىللىتىپ بىرىش ئۈچۈن بېلىگە پالتا قىستۇرۇپ جاڭگالغا ئوتۇنغا كېتىۋاتقان ئەركەك سۈپەت ئانىنىڭ يۈرىكىدۇر.
مېنىڭ يۈرىكىم ـ غۇنچە ۋاقىتلىرىدىن تارتىپ ئۆمرىنىڭ ئاخىرقى دەملىرىگىچە ھايات پۈتۈكلىرىگە گۈزەل مىسرالارنى نەقىش قىلىپ، ئاتمىش يىلنى نەچچە ئايدەك ئۆتكۈزۈپ بېرىشكەن قەسەم ۋە يېيېشكەن تۇزغا خىيانەت قىلماي تەڭ قېرىپ تەڭ چۈرىگەن قەدىردان ھەمراھلارنىڭ يۈرىكىدۇر.
قىزىم، مېنىڭ يۈرىكىم ـ پەرزەنتلىرى ئۈچۈن ھاياتىنى شامدەك ئېقىتىپ تۈگەتكەن، پەرزەنتىنىڭ، باشقىلارغا ياخشىلىق قىلالمىسىمۇ يامانلىق قىلمايدىغان دۇرۇس ئادەم بولۇشىنى ئارزۇ قىلىپ، شۇ ئارزۇسى ئۈچۈن ھاياتىنى داۋام ئېتىۋاتقان ئاتا-ئانىلارنىڭ يۈرىكىدۇر. يۇرت – ماكانلىرى، ياشاۋاتقان تۇپرىقى، مەۋجۇتلىقىنىڭ  ەۇۋاھچىسى بولغان ۋەتىنى ئۈچۈن نىمىلەرنى قىلىشى، نىمىلەرنى قىلماسلىقىنى ھارماي سۆزلەيدىغان، ئالىم بولمىسىمۇ ئادەم بولۇش ئۈچۈن نېمىلەرنى بىلىشى كېرەكلىكى توغرىلىق ئوقۇغۇچىلىرىغا يۈرەك قېنىنى سەرپ ئېتىۋاتقان ھارماس، تۆھپىكار  ئۇستازلارنىڭ، تەماسىز مىھنەتكەشلەرنىڭ يۈرىكىدۇر.
قىزىم - مېنىڭ يۈرىكىم ـ زالىم ۋە ئاچكۆز لەر تەرىپىدىن قاقتى-سوقتى قىلىنغان ساددا كىشىلەرنىڭ، ئاق كۆڭۈللۈكى تۈپەيلىدىن شاياتۇنلار تەرىپىدىن ئالدىنىپ خورلۇق تارتىۋاتقان ناتىۋانلارنىڭ يۈرىكىدۇر.
    قىزىم - مېنىڭ يۈرىكىم ـ سەككىز بالىسى ئۈچۈن ھەم ئاتا، ھەم ئانا بولۇپ ئاتەشلىك تونۇرغا باش تىقىپ نان يېقىۋاتقان، ساقاللىرىنىڭ كۆيۈكىدىن چىققان ئاچچىق ئىستا كۆزىدىن ياش قۇيۇلۇۋاتقان مېھرىبان دادىنىڭ يۈرىكىدۇر...
مەن شۇنداق نىدا قىلدىم،- ئاھ تەبىئەت ئانا، ئەمدى شىۋىرلاشلىرىڭنى توختات، مەندە ئەمدى سېنىڭ سۆزلىرىڭنى تىڭشىغۇدەك تاقەت قالمىدى، ئەرزىمەس بىر تىلىكىمگە قوشۇلغىن – دە مېنى ئۆز يۈرىكىڭنىڭ بىر پارچىسى قىلىشقا ۋەدە بەر.
زىمىندىكى ھەر بىر جان ئېگىسىنىڭ، ھەر بىر ئەقىل ئېگىسىنىڭ سېنىڭ بۇ پىچىرلىشىڭغا قۇلاق يىقىشىغا ھەمدەمدە بولىشىمغا يول قوي.

سۆيگۈ تىۋىشلىرى

ئەزىزىم، ئۆزۈڭنىڭ ئىنتايىن بەختلىك قىز ئىكەنلىكىڭنى بىلەمسەن، سېنى چىن مېھرىم ۋە پۈتۈن سەمىمىيىتىم بىلەن سۆيگىنىمنى بەلكىم بىلمەسسەن.
ئەزىزىم، ساڭا بېغىشلانغان سۆيگۈم  تاڭ شەپەقلىرىنمۇ جۇلالىق، يېڭى ئىچىلغان  رەڭگارەڭ گۈل بەرگىلىرىدىنمۇ  مېھىرلىك، بوۋاقلارنىڭ كۈلكىسىدىنمۇ شېرىن ۋە لەززەت، سۈبھى نۇرلىرىدىنمۇ سۈزۈك ۋە پاك...
ئەزىزىم، ساڭا رەھمەت ئىيتىمەن، سېنى ماڭا ئۇچراشتۇرغان ئاللاھقا رەھمەت ئىيتىمەن، چۈنكى ساڭا ئۇچرىغاندىن كىيىنلا ئاندىن گۈزەللىكنىڭ، مۇھەببەتنىڭ، سۆيۈشنىڭ، سۆيۈلۈشنىڭ، ھاياتنىڭ چىن مەنىسىنى تاپقانلىقىمنى بىلىمەن.
ئەزىزىم، سەن بىلگىن ياكى مەڭگۈ بىلمەي ياشا سەن بىر سۆيۈلگۈچىسەن، مەن سېنى مېنى بەختلىك قىلسۇن، مېنى سۆيسۈن دەپ سۆيمىدىم، پەقەت بەختلىك بولسۇن دەپ سۆيدۈم.
سەن مۇشۇ دەقىقىلەردىن كىيىن يەنە سۆيگۈگە ئېرىش ياكى مەھرۇم بول ئاللىقاچان بىر ھەقىقى سۆيۈلگۈچىسەن.

سۆيگۈ تىۋىشلىرى

سۆيگۈ مەڭگۈلۈك قەدىرلىگۈچىلەرگە مەنسۇپ  بولغىنى ئۈچۈن، سېنىڭ مىسلسىز كۈتۈشلىرىڭدىن مەن يامغۇرغا ئايلىنىپ يېغىشقا باشلىدىم. يامغۇر سۇلىرىدىن  بىخلانغان بەخت گۈللىرىنىڭ ئۇرۇقلىرىنى ساڭا ئەبەدىيلىككە بەخش ئەتكەم بار. چۈنكى بەخت مەڭگۈ مېھىر باغلىغۇچىلارغىلا مەنسۇپتۇر! سېنىڭ پەسىلسىز كۈتۈش، ھەسرەت، ھىجرانلارغا ھەمراھ بولۇپ ئۆتكۈزگەن  ھەر بىر كۈنىڭ ئۈچۈن كۈتكەنلەر ئېرىشىدىغان ئارزۇ – ئۈمىد ۋە پەسىللەرنىڭ ھەممە گۈزەللىكى ساڭا سوۋغام بولسۇن.

سۆيگۈ تىۋىشلىرى

ئۇنىڭدىن مېنى سۆيەمسەن،- دەپ سورۇدۇم،- شۇنداق،- دەپ جاۋاپ بەردى ئۇ. ئۇنىڭ بۇ «شۇنداق» دېگەن جاۋابىدىن جىسمىم سىماپتەك ئىرىپ كۆزلىرىمدېكى ياشلارغا قوشۇلدى. مەن بۇ ياشلىرىمنى يۈرىكىمگە باشلاپ بىر بوستاننى ياشناتتىم.   
چۈنكى ئۇ، يۈرىكىدىكى سۆيگۈسىنى مەسئۇلىيىتى بىلەن داۋاملاشتۇرۇپ بىر بوستانلىقنى ياشارتىۋاتقان ئىنسان ئىدى. شۇنداقلا   مەجبۇرىيەت، مەسئۇلىيەتنى سۆيگۈسىدىن يۇقىرى ئورۇنغا يەنى بېشى ئۈستىگە قويالىغان بىر ئىنسان ئىدى.

سۆيگۈ تىۋىشلىرى

گۈزەل نەرسىلەرنى ئادەم كۆزى بىلەن ئەمەس، قەلبى بىلەن ھىس قىلغىنى ئەڭ گۈزەل بولغانغا ئوخشاش،  تەننىڭ ئاغرىشى، كۆيىشىدىن دىلنىڭ ئاغرىشى، كۆيىشى بەك قاتتىق بولىدۇ.
بەزىلەر كۆزى بىلەن نۇرغۇن گۈزەل نەرسىلەرنى كۆرەممەيدۇكى، بەزىلەرنىڭ كۆزى ئەما بولسىمۇ قەلب كۆزلىرى نۇرغۇن گۈزەللىكنى كۆرىدۇ، قەلبلىرى نۇرغۇن گۈزەللىكنى ھىس قىلىدۇ.
شۇنىڭ ئۈچۈن سېنى كۆزۈم بىلەن ئەمەس قەلبىم بىلەن سۆيدۈم، سۆزلەرگە سىغمايدىغان بىر قەلب گۈزەللىكى بىلەن، قاراقلار يەتمەيدىغان بىر چەكسىزلىك بىلەن سۆيدۈم...

ھېجران تىۋىشلىرى

ئايلىرىش ناخشىسىنى سېنىڭ نېمانداق بېرىلىپ ئاڭلايدىغىنىڭنىڭ سىرىنى ئەمدى بىلدىم. چۈنكى مەنمۇ سېنىڭدىن ئايرىلىپ قالدىم، ئايرىلىش ناخشىسىنىڭ مېنىڭ قەلبىمنى، يۈرىكىمىنى بۇنچىلىك قاتتىق كۆيدۈرىشىنى بىلمەيلا ھوزۇرلىنىپ ئاڭلىغان ئىكەنمەن. ئايرىلىشقا بولسا كۆزۈم بىلەن ئەمەس دىلىم بىلەن قارىغىنىمدا  تىنىمدېكى ئاغرىقلار يۈرىكىمدىن پۈتۈن مۇسكۇللىرىمغا ئۆتتى. مىڭەم، گۆش ھەم سۆڭەكلىرىم ۋىژىلداپ ئاغرىۋاتقان بولسىمۇ بۇ ئاغرىققا بەرداشلىق بېرەلىدىمكى قەلبىم بىلەن تىڭشاۋاتقان ئايرىلىش ناخشىسىنىڭ يېرىمىغا كەلگەندە  ئىزىمدا ئولتۇرۇپ ئولتۇرۇپ قالدىم.
ئەگەر ھېجراننى بىلگەن بولسام  ھاياتىمنى يولۇڭغا بوستان قىلمىغان بولاتتىم، ھېجراننى بىلگەن بولسام كۆزلىرىمنى كېچىگە يۇلتۇز قىلمىغان بولاتتىم، ھېجراننى بىلگەن بولسام سېنى بۇنچىلىك سۆيمىگەن بولاتتىم.
ئەگەر ھېجراننى بىلگەن بولسام گۈللىرىمنى بۇنچىلىك چىرايلىق ئىچىلدۇرمىغان بولاتتىم، ھېجراننى بىلگەن بولسام نىگاھلىرىمنى بۇنچىلىك سۆيۈملۈك قىلمىغان بولاتتىم، ئەگەر سېنىڭ ئايرىلىش ناخشىسىنى بۇنچىلىك ياختۇرىدىغانالىقىڭنى بىلگەن بولسام پۈتۈن ھاياتىمغا سېنى شىئېر قىلىپ يازمىغان بولاتتىم.

ھېجران تىۋىشلىرى

ئەزىزىم – بىلەمسەن، سېنى قەلب ئىتىزىمنىڭ ياشىرىپ، يەلپۈنۈپ تۇرىدىغان بولۇق مايسىسى، ھايات باغلىرىمنىڭ كۆيۈمچان پەرۋىشكارى، مەسئۇلىيەتچان قوغدىغۇچىسى ۋە بۇ باغلارنىڭ ئەبەدىيلىك  ئاشىقى دەپ ئويلايتتىم.
بىلەمسەن، سەن بولغاچقىلا مەن شۇنداق خۇش پۇراق تارىتالايدىغان گۈل بولدۇم، بۇ گۈزەللىك سېنىڭ مېھىر ۋە  ساداقىتىڭنىڭ جەۋھىرى دەپ قارايتتىم. سەن بولغاچقىلا مەن قەدىر – قىممەتنىڭ ئەڭ يۈكسەك پەللىسىدىن ئورۇن ئالالىدىم، قىيالاردا ئىچىلغان قار لەيلىسىدەك خىسلەتلىك گۈزەللىككە تولدۇم  دەپ قارايتتىم. سەن بولغاچقىلا مەن ئەڭ قىممەتلىك بەخت ۋە يىتۇك ھېس – تۇيغۇلارغا ئېرىشتىم،- دەپ ئويلايتتىم.
ئەزىزىم، سەن باغرىمغا بىر خەنجەر ئۇردۇڭ،  يۈرىكىمدىن قان سىرغىپ ئىقىشقا باشلىدى،  پۈتۈن ئۈمىدلىرىم ھېجران قوينىغا چۈشۈپ كەتتى.