ئەڭ گۈزەل شېئىرلاردىن تاللانما

ئەڭ گۈزەل شېئىرلاردىن تاللانما



يوللىغۇچىنىڭ ئىلاۋىسى:بەزى ياخشى شېئىرلار خۇددى ئادەمنى قايرىلدۇرۇپ ئۆزىگە تەكرار-تەكرار قاراتقۇزغان ساھىپجاماللاردەك ئادەمنىڭ قايتا-قايتا ئوقۇغۇسىنى كەلتۈرىدۇ.مۇشۇ مۇبىرىمىزدىمۇ نۇرغۇن ئېسىل شېئىرلار ۋاقىتنىڭ ئۆتۈشى بىلەن كەينى سەھنىلەرگە ئۆتۈپ قېلىپ تېپىپ قايتىدىن ئوقۇشمۇ قېيىن بولۇپ قالدى.مەن شۇ مۇناسىۋەت بىلەن دوستلارغا مۇنداق بىر تەكلىپ بەرمەكچى: مۇشۇ ئىشقا قىزىققۇچىلار ئۆزىمىزنىڭ بولسۇن ياكى باشقىلارنىڭ بولسۇن ئەڭ ياخشى گۈزەل شېئىرلاردىن مۇشۇ تېما بولسىمۇ ياكى باشقا بىر تېما تەسىس قىلىپ بولسىمۇ بىر يەرگە ،خالىغان ۋاقىتتا كۆرۈشكە نۇرغۇن گۈزەل شېئىرلارنى توپلىساق دېگەن ئۈمىدتەمەن.بۇنىڭدا خالىغان ئادەمنىڭ ،خالىغان ئەسىرىنى ھەم ھەرقانداق بىر يوللىغۇچى ئەڭ ياخشى دەپ قارىغان ھەرقانداق بىر شېئىرنى يوللىسا .بۇنىڭغا ھەرقانداق ئېقىم ياكى ئۇسلۇبنى ئۆلچەم قىلىۋالمىساق ،بۇ شېئىرلارغا كېيىنچە توپلام قىلىپ ئىلان قىلدۇرۇش نېسىپ بولماي قالسىمۇ ،مۇشۇ ۋاقىتنىڭ ،ھازىرقى كۈنلەرنىڭ خاتىرسى بولۇپ قالسا ئەجەپ ئەمەس دېگەن ئويدامەن.قېنى دوستۇم سىز ئەڭ ياقتۇرغان گۈزەل شېئىر قايسى؟بىزنىمۇ ئاشۇ شېئىردىن ھوزۇرلاندۇرۇشنى خالامسىز؟...

مەن ئۆزۈمنىڭ ئۆزۈم ياقتۇرىدىغان بىر شېئىرىنى يوللىدىم ئەمىسە:


كۈز يامغۇرى        
  

ئاقۇشرەڭ تۇمانلار يىغلىدى ئۆكسۈپ ،
بۇلاقلار بۇلدۇقلاپ تىتىرگەن سىياق .
شۇ موڭلۇق مۇزىكا ئۇردى ئۆزىنى ،  
ياپراقلار كۆكسىگە ئۇزاقتىن ئۇزاق .  

سىمىلداپ ياغماقتا كۈزنىڭ يامغۇرى ،
شۇ نەمخوش ھاۋادەك غەمكىن بىر چىراي .
بەك گۈزەل تۈنلەرگە بولدى مۇيەسسەر
قانلارغا غەرق بولۇپ ئۈزگەن تولۇن ئاي .  

يىراقلاپ بىر سايە كەلمەكتە ئاستا ،  
تىنماستىن ياغماقتا كۈزنىڭ يامغۇرى .
چاقنايدۇ ئەتراپتا گۈلبەرگى ئۆزرە ،   
ئۇرۇلۇپ تۆكۈلگەن يامغۇر ئاھلىرى .

يىراقلاپ بىر سايە كەلمەكتە ئاستا ،
تىنماستىن تۆكۈلەر كۈزنىڭ يامغۇرى .
قانلىرىم دولقۇنى تارتىدۇ نەرە ،     
كىرىشنى ئويلامەن يامغۇر سىرى .

ياخشى لىرىكىغا مۇبارەك بولسۇن! بىراق،ئەڭ ئاخىرقى مىسرانى ئۆزگەرتىشنى ئويلىشىپ كۆرۈڭ دوستۇم.

ئۇرسا خەندان توختىماي بۇلبۇل سەھەر گۈل ئىشقىدا،
گۈل بويۇڭنى كۆرگىنى ئارماندا كۈتتۈم ئامرىقىم.

رەنجىشىم يوق كەلمىسەڭ بۇلبۇلغا تەڭكەش ئەيلىدىم،
كۈي تۆكۈپ ۋەسلىڭ ئۈچۈن خەنداندا كۈتتۈم ئامرىقىم.

ساقلىدىم شامۇ-سەھەرلەر ، گۈل بويۇڭ مەندىن يىراق،
چوغ بولۇپ ياندى يۈرەك گۇلخاندا كۈتتۈم ئامرىقىم.

ئۇچرىتارمەن دەپ سىياقىڭ ئەل ئارا سالدىم نەزەر،
كەلمىدىڭ بىر نازغىتىپ ھەر ياندا كۈتتۈم ئامرىقىم.

نالىلەر قىلدى يۈرەك ھېجرىڭدە قان-ياش سىرغىتىپ،
داغى-ھېجران قىينىدى ئەفغاندا كۈتتۈم ئامرىقىم.

گۈل يۈزۈڭنى ئىزدىدىم سانسىز كېچە ئاي چېھرىدىن،
چۆل-ئارا چۆللەر ئارا نىمجاندا كۈتتۈم ئامرىقىم.

ئۈزمىدىم سەندىن ئۈمۈد ۋەسلىڭگە زار بولدۇم ئۇزاق،
ياشنىتىپ سۆيگۈڭ مېنى دەرماندا كۈتتۈم ئامرىقىم.

بۇ يازمىنى ئاخىرىدا   قۇربانجان تەھرىرلىگەن. ۋاقتى  2013-11-14 16:53  

              بىر بۈيۈك ئىستەكتە چوغ بوپ يانىمەن                                 
                                                 ئەنۋەرجان خوجا ئەرتېكىن

                                     شاماللار ئەللەيلەپ بىرەر تەسەللىي،
                                مۇڭ-مۇڭ كۈي روھىمغا سىڭىپ شۇ قەدەر.
                                سېزىمەن ئۆزۈمنى بىر ئاققۇ كەبىي،
                                لەپىلدەپ ئېچىلسا ھەر بەت، ھەر دەپتەر.

                                ئۈمىدنىڭ شولىسى چاچماقتا جۇلا،
                                لەپ-لەپ قار چۈمكىدى تۇيغۇلىرىمنى.
                                ھەر تاڭنى سۆيگۈدە ئالىمەن كۈتۈپ،
                                يارىمەن ئىلھامنىڭ دولقۇنلىرىنى.

                                ئىچ-ئىچىم پۈتۈلگەن تۇپراقتن، ئوتتىن،
                                بىر تامچە شەبنەمگە قانداق قانىمەن؟
                                ئۆچمىگەن قوقاسمەن كۆيگەن چاراسلاپ،
                                بىر بۈيۈك ئىستەكتە چوغ بوپ يانىمەن.

        («ئاقسۇ گېزىتى»نىڭ 2013-يىل 13-نويابىردىكى «جەنۇب شامىلى» بېتىدە ئېلان قىلىنغان)
بۇ يازمىنى ئاخىرىدا   ئە.خ.ئەرتېكىن تەھرىرلىگەن. ۋاقتى  2013-12-9 16:53  

گۈزەل شېئىر ؟- سىز شېئىرغا قويغان قايسى ئۆلچەمنى  چىقىش قىلىپ بۇ ئاتالغۇنى ئىشلەتتىڭىز؟

بۇ تېما تولىمۇ ورۇنلۇق ئوتترىغا قويۇلۇپتۇ.

بىراق، بىچارە شائىرلار ئۆزمەپتۇنلۇقىغا چۆمگەنچە ئۆزىنىڭكىنى يوللاپ بۇ تېمىنى باشتىنلا پاخال قىلىۋېتىپسىلەر.

   باشقىلارنىڭ شېئىرلىرىدىن يارىغانلىرىنى قىسقا سەۋەبىڭلار بىلەن تەۋسىيە قىلساڭلار، مېنىڭچە بۇ بىر نادىر پائالىيەت بولۇپ قالىدۇ.

شېئىر_ ھايات، ئانا، مۇھەببەت، ۋەتەن

ئوسمانجان ساۋۇت

شېئىر دېگەن ھاياتتۇر، شېئىر دېگەن مۇھەببەت،
ئوت بېرىدۇ باغرىدىن ئوتسىرىغان ئالەمگە.
شېئىر دېگەن خۇدادۇر، شېئىر دېگەن مۇھەممەد ،
شەيتىنىنى بوغۇزلاپ، ئازاد بولغان ئادەمگە!

شېئىر دېگەن ۋەتەندۇر تىلسىم ھېسلار كۆمۈلگەن،
شېئىر دېگەن ۋىجداندۇر ئادەمىيلىك بەلگىسى.
شېئىر دېگەن قەسەمدۇر ئار- نومۇسقا چۆمۈلگەن،
شېئىر دېگەن گۈلتاجدۇر نەرگىسلەرنىڭ نەرگىسى.

شېئىر دېگەن ئانىدۇر ئاق چاچلىرى توزغىغان،
شېئىر دېگەن قېرىنداش، ئۈنمەيدىغان تېرىسا.
شېئىر دېگەن جاناندۇر ئاتەش ھېسلار قوزغىغان،
(تەبىئەتمۇ قېرىيدۇ، ئەشۇ ھېسلار قېرىسا.)

شېئىر دېگەن دوست- يارەن_ ئېتىبارى مۇقەددەس،
شېئىر دېگەن ئشەنچتۇر، سۆيگۈلەرنىڭ يىلتىزى.
شېئىر دېگەن مەرتلىكتۇر، ھەر كېچىكتە زەبەردەس،
شېئىر دېگەن مەملىكەت يۇلتۇزلارنىڭ يۇلتۇزى.

ھەر بىر مىسرا سورايدۇ باھاسىنى ھەمىشە،
چوقۇنمىدىم موزاغا، بۇ دەرتلەرنى تارتمايمەن.
گەر چوقۇندى دېسەڭلار شۇ تەرىپلەر ئېسىمدە،
چاپىنىمنى ساتساممۇ ئەمما شېئىر ساتمايمان.

ۋەتەن
ساداقەتجان ھاجى

بىر پارچە كۆك تاشقا ئوخشايدۇ ۋەتەن،
بىر باغلام كۆكباشقا ئوخشايدۇ ۋەتەن.
بىر تامچە كۆز ياشقا ئوخشايدۇ ۋەتەن،
باغراشقا، بالقاشقا ئوخشايدۇ ۋەتەن.

قۇرىماس بۇلاقتۇر تەشنالىقىڭغا،
غولىماس بىر تاغدۇر تەنھالىقىڭغا.
بىپايان ئاسماندۇر ئەنقالىقىڭغا،
بۇغداغا، باغداشقا ئوخشايدۇ ۋەتەن.

بىر دەستە گۈلدۇر ئۇ، پۇرىماق بولساڭ،
چوغدۇر ئۇ، گۈلخاندەك يورۇماق بولساڭ،
دانادۇر! سەن ئەقىل سورىماق بولساڭ،
قېرىنداش، قانداشقا ئوخشايدۇ ۋەتەن.

قەسىدە ئەمەس ئۇ، بىز ئوقۇيدىغان،
رىۋايەت ئەمەس ئۇ، بىز توقۇيدىغان.
قەبرىستان ئەمەس ئۇ، بىز ئۇخلايدىغان،
ئۇخلىماي ياشاشقا ئوخشايدۇ ۋەتەن... بۇ يازمىنى ئاخىرىدا   خالىس تەھرىرلىگەن. ۋاقتى  2013-11-14 18:27  

مەن ئۆلگەندە...

تاھىر ھامۇت

مەن ئۆلگەندە ئېسىڭدە بولسۇن،
بايرىقىڭنى چۈشۈرمە يېرىم.
جەسىدىمنى تاپساڭ كۆمۈپ قوي،
تاپالمىساڭ ئۆكۈنمە جېنىم.

مەن بىلىمەن، دېمەيدۇ ھېچكىم،
ئۆلۈمىمنى ئېغىر يوقىتىش.
مەن ئەمەسمۇ ئارتۇقچە ئادەم،
مەن ئەمەسمۇ ماتەمگە ماتەم،
ماڭىلا خاس ئۈنسىز يوقىلىش.

مەن ئۆلگەندە ئېسىڭدە بولسۇن،
دە جاھانغا: كۈلۈپ ئۆلدى ئۇ.
ئىشەنگەندە سۆزۈڭگە ھەممە،
ئاندىن ئېيتقىن: يالغان كۈلدى ئۇ!

«ئەڭ گۈزەل شېئىر» دېگەن بۇ سۆزنى ئەكسىچە چۈشەنسەڭلارمۇ ئوبدان مەنە بېرىدۇ ئەمەسمۇ! ياخشى ئىسىم قويۇپتۇ... ئەكسىنى ئويلىساڭلار بولىدۇ - دە!

سىز مېنىڭ قانداق ئۆلچەم قوللانغانلىقىمغا پەرۋا قىلماي ئۆزىڭىزنىڭ ئۆلچىمى بويىچە يوللىسىڭىز بولىۋىرىدۇ.

سىز تەۋسىيە قىلىپ يوللىسىڭىزمۇ بولىۋىرىدۇ.ئارتۇق گەپنى قويۇپ ئۆزىڭىزنىڭ بولسىمۇ ياكى باشقىلارنىڭ بولسىمۇ ئەڭ ياقتۇرغان شېئىرىڭىزنى يوللىسىڭىز .

مەن يەنە شۇنى ئەسكەرتەي،مەن بۇ تېمىدا بىرەر مۇنازىرە قوزغاي دېگەن خىيالىم قىلچە يوق.
قانداق ئۆلچەم قوللانسىڭىز ئۆزىڭىزنىڭ ئىختىيارى ،پەقەت ئەڭ گۈزەل دەپ قارىغان شېئىرلارنى بۇ تېمىغا يوللاپ ، شېئىرخۇمارلارنى خۇشال قىلسىڭىز  كۆپ ياخشى ئىش قىلغان بولىسىز.دوستلار ئارتۇق گەپ بىلەن ئىنكاس بولشۇقىنى ئىسراپ قىلمىغاي! بۇ يازمىنى ئاخىرىدا   ن.ھاشىم تەھرىرلىگەن. ۋاقتى  2013-11-14 20:07  

بۇ يازمىنى ئاخىرىدا   gulbeden تەھرىرلىگەن. ۋاقتى  2013-11-14 21:04  

دۇنيادا پەقەت پاخال پاخالنىڭ قانداق بولىدىغانلىقىنى بىلەلمەيدۇ....