| پاكىستاندا 1400 ئادەم كەلكۈن ئاپىتىدە قازا قىلدى |
مەنبە:تەڭرىتاغ ئويغۇر تورى 2010-يىلى4-ئاۋغۇست
جۇڭگو ئاخبارات تورى 3–ئاۋغۇست تېلېگراممىسى : ب د ت بالىلار فوندى جەمئىيىتىنىڭ مۆلچەرلىشىچە ، 80 يىلدىن بۇيانقى ئەڭ ئېغىر كەلكۈن ئاپىتىنىڭ ھۇجۇمىغا ئۇچرىغان پاكىستاندا ، نۆۋەتتە ، قازا قىلغانلار 1000 دىن ئاشقان بولۇپ ، 3 مىليون ئادەم ئاپەتنىڭ زىيىنىغا ئۇچرىغان .
رېيتېر ئاگېنتلىقىنىڭ خەۋەر قىلىشىچە ، ھازىرغىچە پاكىستان ھۆكۈمەت تەرەپنىڭ سانلىق مەلۇماتىدا كۆرسىتىلىشىچە ، كەلكۈن ئاپىتىدە قازا قىلغانلار 1400 گە يېتىپ ، 3 مىليون ئادەم ئاپەتكە ئۇچرىغان .
پاكىستان غەربىي شىمال رايونىدىكى مۇناسىۋەتلىك ئەمەلدارلارنىڭ ئېيتىشىچە ، پاكىستاننىڭ غەربىي شىمالىدىكى رايونلار كەلكۈندە ئەڭ ئېغىر تالاپەتكە ئۇچرىغان بولۇپ ، بۇ رايوندىكى 1 مىليون 300 مىڭ ئادەم ئاپەتكە ئۇچرىغان . يەرلىك ھۆكۈمەتلەر گەرچە ئاپەتكە ئۇچرىغان ئاممىنى قۇتقۇزۇش خىزمىتىنى جىددىي قانات يايدۇرغان بولسىمۇ ، بىراق ، كەلكۈندە ھەممە نەرسىدىن ئايرىلىپ قالغان خەلق ، مۇناسىۋەتلىك تارماقلار كەلكۈن ئەھۋالىدىن ئالدىن مەلۇمات بەرمىگەن ، دەپ نارازى بولغان .
ب د ت دۇنيا ئاشلىق پىلان مەھكىمىسى(WFP) پاكىستاننىڭ نەۋشەرە ، چارساددا ، ماردان ھەمدە پېشاۋۇر قاتارلىق بۇ تۆت رايونىنى ئىستاتىستىكا قىلىش ئارقىلىق ، 80 مىڭ ئاھالىنىڭ ئولتۇراق ئۆيلىرىنىڭ پۈتۈنلەي ۋەيران بولغانلىقىنى ، 50 مىڭ ئاھالىنىڭ كەلكۈننىڭ زىيىنىغا ئۇچرىغانلىقىنى بايقىغان . ب د ت ئىنسانپەرۋەرلىك ئىشلىرىنى ماسلاشتۇرۇش ئىشخانىسىنىڭ بىلدۈرۈشىچە ، يۇقىرقى بۇ تۆت رايوندىكى جەمئىي 980 مىڭدىن 1 مىليونغىچە ئادەم ئۆي–ماكانسىز قالغان بولۇپ ، ئۇزۇنغا بارماي ، ئۆي–ماكانسىز قالغانلار سانىنىڭ 1 مىليوندىن ئېشىپ كېتىشى مۆلچەرلەنگەن .
پاكىستان قۇتقۇزۇش تارماقلىرى ئەمەلدارىنىڭ ئېيتىشىچە ، ئاپەتكە ئۇچرىغان ئاممىنى ئورۇنلاشتۇرۇش نۇقتىسدا ئادەم ناھايتى كۆپ بولۇپ، ئەگەر ئۇلارغا يېتەرلىك پاكىزە ئىچىملىك سۇ تارقىتىپ بېرىلمەي ، دەل ۋاقتىدا داۋالاش ئېلىپ بېرىلماي ، كېسەللەرنى ئايرىۋەتمىگەندە ، خولېرا قاتارلىق جىددىي تارقىلىشچان يۇقۇملۇق كېسەللىكلەر تېز يامراپ كېتىشى مۇمكىنكەن .
كىبېرپۇشت ئۆلكىسىنىڭ سەھىيە ئەمەلدارى سەئىد چاسار ئەلى شاھنىڭ 2–ئاۋغۇست بىلدۈرۈشىچە ، تەخمىنەن 100 مىڭ ئادەم ئاشقازان-ئۈچەي ياللۇغى قاتارلىق كېسەللىكلەرگە گىرىپتار بولغان بولۇپ ، بۇلارنىڭ كۆپىنچىسى بالىلار ئىكەن .
| [ئاپتورى: مەنبەسى: ۋاقتى: 2010-8-4 12:53:09 ئۇقۇلۇشى: 14 قېتىم] |
|
