9–ماي، ئامېرىكىنىڭ مېكسىكا قولتۇقىدىكى ‹‹چوڭقۇر سۇ ئۇپۇق سىزىقى›› چۆكۈپ كەتكەن جايدا، پۈتۈن بەدىنى خام نېفىت بىلەن بۇلغانغان دېڭىز قۇشى پاراخوت يېنىدا تۇرماقتا

   6–ماي ، خادىملار پولات چىۋىقلىق سېمونت تور ئارقىلىق، سۇ ئاستىغا چۆكۈپ، نېفىت ئېقىۋاتقان نۇقتىنى پېچەتلەشكە ئۇرۇنماقتا. ئېغىرلىقى 100 توننا، ئېگىزلىكى 12 مېتىر كېلىدىغان بۇ غايەت زور پولات چىۋىقلىق سېمونت تورنى ئەنگلىيە نېفىت شىركىتىنىڭ خادىملىرى ئىككى ھەپتىدە ياسىغان بولۇپ، چوڭقۇر دېڭىزنىڭ تۆۋەن تېمپېراتۇرىسىنىڭ تەسىرىدە نېفىت تىزگىنلەش تورى نورمال خىزمەت قىلالماي، تىزگىنلەش ھەرىكىتى ئاخىرى مەغلۇب بولغان.

   9 – ماي، ئامېرىكىنىڭ مېكسىكا قولتۇقىدىكى ‹‹چوڭقۇر سۇ ئۇپۇق سىزىقى›› چۆكۈپ كەتكەن جايدا، زور مىقداردىكى لەيلىمە نېفىتنى ئېنىق كۆرگىلى بولىدۇ. ئىگىلىنىشىچە، پولات چىۋىقلىق سېمونت تور پەقەت ئېقىپ كەتكەن نېفىتنى تىزگىنلەش پىلانىنىڭ بىر قىسمى بولۇپ، ئەنگلىيە نېفىت شىركىتى بىر بېسىم تۆۋەنلىتىش قۇدۇقىنى بۇرغىلاشنى باشلىغان بولۇپ، نېفىت قېچىۋاتقان قۇدۇقنى ئۆز قەرەلىدە تەلتۆكۈس پېچەتلىمەكچى بولۇۋېتىپتۇ، بىراق بۇ ئىشنى تاماملاشقا تەخمىنەن ئۈچ ئاي ۋاقىت كېتىدىكەن. نۆۋەتتە، ‹‹چوڭقۇر سۇ ئۇپۇق سىزىقى›› نېفىت قۇدۇقىدىن ھەر كۈنى 210 مىڭ گاللون خام نېفىت قېچىۋېتىپتۇ.

   9 – ماي، ئامېرىكا مېكسىكا قولتۇقى دېڭىزىدىكى دېڭىز قۇشلىرى ماكانلاشقان بىر جاي لەيلىمە نېفىتنىڭ ھۇجۇمىغا ئۇچراپ، ئارال ئېكولوگىيەسى ئېغىر تەھدىتكە ئۇچرىدى. ئامېرىكا ھۆكۈمىتى مېكسىكا قولتۇقىنى ‹‹ئوتتا كۆيدۈرۈش›› قەبىھ چارىسىنى قوللانغان بولسىمۇ، بىراق ئالاقىدار ئوبزورلاردا مۇنداق ئانالىز قىلىنغان: نېفىتنى كۆيدۈرگەندە گەرچە بۇلغىنىشتىن ساقلانغىلى بولسىمۇ، بىراق زور مىقداردىكى زەھەرلىك قارا تۈتەك ۋە داشقاللار پەيدا بولۇپ، مۇھىتقا ئوخشاشلا زىيان يەتكۈزىدۇ.

   9 – ماي، مېكسىكا قولتۇقى دېڭىز يۈزىدىكى خام نېفىت. نېفىتتىن بۇلغىنىشنىڭ مېكسىكا قولتۇقى قىرغاقلىرىدىكى كۆپلىگەن ئامېرىكا ئىشتاتلىرىغا بولغان تەھدىتى رېئاللىققا ئايلاندى. لەيلىمە نېفىت لۇئىسىئانا ئىشتاتىنىڭ قىرغاق سازلىقىغا تارقاق ھالدا يېتىپ باردى.

   8 – ماي، ئامېرىكا ئالاباما ئىشتاتىنىڭ دېڭىز قىرغىقىدىن ئۈچ مىل يىراقلىقتىكى داۋفېن ئارىلىغا خام نېفىتنى ئايرىش بەلبېغى ئورنىتىلدى. شۇ كۈنى، كىشىلەر ئارالدا گولف توپ چوڭلۇقىدىكى كوكس مېيى شارى ۋە نۇرغۇنلىغان نامەلۇم ماددىلارنى بايقىدى

   7 – ماي، مېكسىكا قولتۇقى دېڭىز رايونىدا، دېڭىز يۈزىدىكى خام نېفىت توختاۋسىز لەيلەپ سىلجىپ كېڭەيمەكتە. سۈنئىي ھەمراھتىن تارتىلغان سۈرەتتىن قارىغاندا، 29 – ئاپرېل، لەيلىمە نېفىت كۆلىمى 3000 كىۋادرات كىلومېتىرغا يەتكەن، 30 – ئاپرېل كەچكىچە، لەيلىمە نېفىت كۆلىمى تەخمىنەن 9900 كىۋادرات كىلومېتىرغا يەتكەن. 5 – ماي، لەيلىمە نېفىت كۆلىمى تېز سۈرئەتتە كېڭىيىپ 20 مىڭ كىۋادرات كىلومېتىرغا يەتكەن. ئەنگلىيە نېفىت شىركىتى باياناتچىسىنىڭ ئامېرىكا پارلامېنتىدا جاكارلىشىچە، نېفىت قۇدۇقىنى يەنىلا توسۇپ قالالمىسا، خام نېفىتنىڭ قېچىش مىقدارى ھازىرقىنىڭ 10 ھەسسىسىگە يېتىشى مۇمكىنكەن.