مۇخبىرنىڭ 1 – ئاپرېل ج خ مىنىستىرلىقىدىن ئۇقۇشىچە، 2010 – يىلى ج خ مىنىستىرلىقى مۇشتۇمزورلارغا زەربە بېرىش مەخسۇس كۈرىشىنى داۋاملىق كۈچەيتىدىكەن، بۇنىڭ ئىچىدە كۆڭۈل ئېچىش سورۇنلىرىنى تىزگىنلەش، شەھۋانىي، قىمار، زەھەر ھەرىكەتلىرى بىلەن شوغۇللىنىش ھەم يېزا سايلىمىنى كونترول قىلىش، ئاساسىي قاتلام ھاكىمىيىتىنى ئىگىلىۋېلىش، پۇقرالارغا زۇلۇم سېلىشتەك مۇشتۇمزورلۇققا، شۇنداقلا ‹‹يەر ئاستى ساقچىلىرى››، كەسپىي قەرز سۈيلەش شىركىتى قاتارلىق يېڭى تىپتىكى مۇشتۇمزورلارغا نۇقتىلىق زەربە بېرىدىكەن.

   مەملىكەتلىك مۇشتۇمزورلۇققا زەربە بېرىش ئىشخانىسىنىڭ مۇدىرى، ج خ مىنىستىرلىقىنىڭ مۇئاۋىن مىنىستىرى جاڭ شىنفېڭ يېقىندا ئېچىلغان مۇناسىۋەتلىك يىغىندا مۇنداق دېدى: مەملىكەت بويىچە مۇشتۇمزورلۇققا زەربە بېرىش مەخسۇس كۈرىشىدە، ‹‹بالدۇر زەربە بېرىش، باش كۆتۈرگەن ھامان زەربە بېرىش، مۇشتۇمزورلارنى تەلتۆكۈس تۈگىتىش›› تەلىپىدە چىڭ تۇرۇلۇپ، نۇقتىلىق زەربە بېرىش يەنىمۇ گەۋدىلەندۈرۈلىدۇ، تەدبىرلەر كۈچەيتىلىدۇ، مېخانىزم مۇكەممەللەشتۈرۈلۈپ، مۇشتۇمزورلارغا زەربە بېرىش مەخسۇس كۈرىشى يەنىمۇ چوڭقۇرلاشتۇرۇلىدۇ، 2010 – يىلى تۆۋەندىكى بەش تۈرلۈك خىزمەت نۇقتىلىق ئىشلىنىدۇ:

   بىرىنچى، بۇ قېتىمقى مەخسۇس كۈرەش داۋاملىق كۈچلۈك ئورۇنلاشتۇرۇلىدۇ. دۇنيا سودا يەرمەنكىسى، ئاسىيا تەنھەرىكەت مۇسابىقىسى مەزگىلىدىكى نۇقتىلىق خىزمەتلەرنى زىچ چۆرىدىگەن ھالدا، تەشەببۇسكارلىق بىلەن زەربە بېرىش ۋەزىيىتى داۋاملىق ساقلىنىپ، مۇشتۇمزورلۇققا زەربە بېرىش سالمىقى ئۈزلۈكسىز ئاشۇرۇلىدۇ.

   ئىككىنچى، نۇقتىلىق زەربە بېرىش گەۋدىلەندۈرۈلىدۇ. باشقۇرۇش ئاجىز، پايدىسى يۇقىرى كەسىپ ۋە ساھەلەرگە كىرىۋېلىپ، دۆلەت بايلىقىنى خورىتىۋاتقان، مونوپول كەسىپلەرنى باشقۇرۇۋاتقان مۇشتۇمزورلارغا نۇقتىلىق زەربە بېرىش بىلەن بىللە، كۆڭۈل ئېچىش سورۇنلىرىنى تىزگىنلىۋالغان، شەھۋانىي، قىمار، زەھەر ھەرىكىتى بىلەن شۇغۇللىنىۋاتقان ۋە يېزا سايلىمىنى باشقۇرىدىغان، ئاساسىي قاتلام ھاكىمىيىتىنى ئىگىلىۋالغان، پۇقرالارغا زۇلۇم سالىدىغان مۇشتۇمزورلۇققا، شۇنداقلا ‹‹يەر ئاستى ساقچىلىرى››، كەسپىي قەرز سۈيلەش شىركەتلىرى قاتارلىق يېڭى تىپتىكى مۇشتۇمزورلارغا زەربە بېرىش گەۋدىلەندۈرۈلىدۇ.

   ئۈچىنچى، مۇشتۇمزورلۇق جىنايىتى يۈز بەرگەن نۇقتىلىق رايونلار بىرمۇ بىر تەكشۈرۈلۈپ، نۇقتىلىق تەرتىپكە سېلىنىدۇ. دېلو كۆپلەپ پاش قىلىنغان، مەسىلە مەركەزلەشكەن رايونلار يوشۇرۇن تەكشۈرۈلۈپ، تەكشۈرۈش كۈچلۈك بولمىغان جايلارغا ھەيدەكچىلىك قىلىش خىزمەت گۇرۇپپىسى ئەۋەتىلىدۇ.

   تۆتىنچى، دەرىجىمۇ دەرىجە زەربە بېرىش، جايلار ئارا ساقچى يۆتكەپ ئىشلىتىش، خىزمەتلەرگە يېتەكچىلىك قىلىش تۈزۈمى داۋاملىق يولغا قويۇلىدۇ. مۇشتۇمزورلۇققا چېتىلىدىغان پەۋقۇلئاددە زور دېلولاردا ئالىي خەلق تەپتىش مەھكىمىسى، ج خ مىنىستىرلىقى خىزمەتلەرگە بىرلىكتە ھەيدەكچىلىك قىلىدۇ، نەق مەيداندا خىزمەت بېجىرىشكە ھەيدەكچىلىك قىلىش خىزمەت گۇرۇپپىسى ئەۋەتىلىدۇ.

   بەشىنچى، مۇشتۇمزورلۇققا زەربە بېرىش ئۈنۈملۈك مېخانىزمى ئورنىتىلىدۇ. مۇشتۇمزورلۇققا زەربە بېرىش بويىچە پارتكوم، ھۆكۈمەت بىر تۇتاش رەھبەرلىكىدىكى ھەر دەرىجىلىك رەھبەرلەر ھەمكارلىشىش ئورگىنىنىڭ خىزمىتى نورماللاشتۇرۇلىدۇ. مۇشتۇمزورلۇققا زەربە بېرىش خىزمەت مەسئۇلىيەت تۈزۈمى ئورنىتىلىپ، سىياسى – قانۇن تارماقلىرى، ئىنتىزام تەكشۈرۈش، ئىقتىسادىي تەپتىش تارماقلىرىنىڭ ھەمكارلىشىپ دېلو بېجىرىش مېخانىزمى مۇكەممەللەشتۈرۈلىدۇ. مەركەزنىڭ ئەدلىيە تۈزۈلمىسى ۋە مېخانىزمىنى ئىسلاھ قىلىش جەريانىدا، مۇشتۇمزورلۇققا زەربە بېرىشتىكى مۇناسىۋەتلىك قانۇنلار مۇكەممەللەشتۈرۈلىدۇ.

   جاڭ شىنفېڭ مۇنداق دېدى: 2009 – يىلى مۇشتۇمزورلۇققا زەربە بېرىش كۈرىشىدە كۆرۈنەرلىك ئۈنۈم ھاسىل قىلىندى، مەملىكەت بويىچە ج خ ئورگانلىرى مۇشتۇمزورلۇققا چېتىلىدىغان دېلودىن 453 نى پاش قىلىپ، مۇشتۇمزورلار شايكىسىدىن 4005 نى يوقىتىپ، مۇشتۇمزورلۇقنىڭ يامراپ كېتىشىنىڭ ئۈنۈملۈك ئالدىنى ئېلىپ، جەمئىيەت ئامانلىقىنى تەرتىپكە سېلىش خىزمەتلىرىگە يېتەكچىلىك قىلىپ، جەمئىيەت ئامانلىقىنىڭ سىجىل مۇقىملىقىغا تۈرتكە بولدى. ئەمما شۇنىمۇ سەگەكلىك بىلەن كۆرۈش كېرەككى، ئېلىمىز ئىقتىساد تىپى، جەمئىيەت تىپىنى ئۆزگەرتىش باسقۇچىدا تۇرۇۋاتىدۇ، مۇشتۇمزورلار ئەۋج ئالىدىغان شارائىت يەنىلا مەۋجۇت، بەزى مۇشتۇمزورلۇق جىنايىتى يەنىلا ئەۋج ئالماقتا، ئۇنىڭ يامراش، كېڭىيىش، قايتا بارلىققا كېلىش ئىقتىدارىنىڭ تېزلىكى جەمئىيەت ئامانلىقى، مۇقىملىققا ئېغىر تەسىر كۆرسىتىپ، خەلقنىڭ بىخەتەرلىك تۇيغۇسىغا تەھدىت سېلىشى مۇمكىن.

شىنخۇا ئاگېنتلىقى





مەنبە:تەڭرىتاغ ئويغۇر تورى
2010-يىلى14-ئاپرېل

گۈزەل چولپانلار

«شادىمان يىگىت ئ..

كۈلكىلىك سۆرەتلە..

ئوكسفورد ئۇنىۋېر..

56 دۆلەت گۈزىلى دۆ..