قۇلاق غۇڭۇلداشمۇ بىر خىل كېسەللىكنىڭ ئالامىتى

sanjar

قۇلاق غۇڭۇلداشمۇ بىر خىل كېسەللىكنىڭ ئالامىتى

قۇلاق غۇڭۇلداش بەزى كىشىلەردە دائىم ئۇچراپ تۇرىدۇ. جىددىي ئەقلىي ئەمگەك قىلىپ چارچىغاندا قۇلاق غۇڭۇلدايدۇ. ھاۋا قاتناش ۋە ئادەتتىكى قاتناش كەسپىدىكى كىشىلەردە قۇلاق غۇڭۇلداش تېخىمۇ روشەن ئىپادىلىنىدۇ. بۇ پۈتۈنلەي فىزىئولوگىيىلىك قۇلاق غۇڭۇلداش بولۇپ ھېسابلىنىدۇ. بۇنداق ۋاقىتلاردا جىددىيلىشىشنىڭ ھاجىتى يوق، ئادەتتە ئۆزلىكىدىن ئەسلىگە كېلىدۇ.
كېسەللىك خاراكتېرىدىكى قۇلاق غۇڭۇلداشقا سەل قاراشقا بولمايدۇ. مەسىلەن، قۇلاقنىڭ غۇڭۇلدىشىغا باش ئاغرىش، باش قىيىش، ئۇيقۇسىزلىق قاتارلىق كېسەللىك ئالامەتلىرى قوشۇلۇپ كەلسە، بۇ نېرۋا ئاجىزلىقتىن كېلىپ چىققان قۇلاق غۇڭۇلداش ھېسابلىنىدۇ، قۇلاق كىرى توسۇۋالغاندا، قۇلاقتىن يىرىڭ ئاققاندىمۇ قۇلاق غۇڭۇلدايدۇ. بۇرۇن ياللۇغى، يۇتقۇنچاق ئاغرىش، ئاۋاز پەردىسى ياللۇغىغا گىرىپتار بولغاندىمۇ قۇلاق غۇڭۇلدايدۇ. بۇنىڭدىن سىرت، خىنىن سالىتسىلىك كىسلاتا، سترېپتومۋتسىن قاتارلىق دورىلارنى ئىشلەتكەندە كۆپرەك كۆرۈلىدۇ. شۇڭا، بۇ خىلدىكى دورىلارنى ئىشلەتكەندە، ئەگەر قۇلاقنىڭ غۇڭۇلدىشى بايقالسا، دورىنى دەرھال توختىتىپ، باشقا دورىلارنى ئالماشتۇرۇپ ئىشلىتىش كېرەك. بويۇن قىسمىدا ئۆسمە پەيدا بولۇپ قېلىپ ئارتېرىيىنى بېسىۋالسىمۇ قۇلاق غۇڭۇلدايدۇ. بۇنداق ئەھۋالدا ئۆسمە بار تەرەپتىكى قۇلاق بەكرەك غۇڭۇلدايدۇ. يىغىپ ئېيتقاندا، قۇلاق غۇڭۇلداش بىر خىل كېسەللىك ئالامىتى، شۇنىڭدەك كېسەللىك كەلتۈرۈپ چىقارغان بىر خىل سىگنال بولۇپ ھېسابلىنىدۇ. شۇڭا، ئەگەر سەۋەبى ئېنىق بولمىغان قۇلاق غۇڭۇلداش كۆرۈلسە، دەرھال دوختۇرخانىلارغا بېرىپ، دىئاگنوزىنى ئېنىقلىتىپ ۋاقتىدا ئۈنۈملۈك داۋالىنىش ئۇسۇللىرىنى قوللىنىش كېرەك.

مەرىپەت

دېققەت قىلساق بولغىدەك...

ئابلەت

مەن دائىم غەلىتە چىرقىراق ئاۋازلارنى ئاڭلايتىم   قارىغاندا مەنمۇ ئېھتىيات قىلسام بولغۇدەك!!

xarbat

مەلۇم كېسەللىكنىڭ بىشارىتى، شۇڭىلاشقا موشۇنداق ئەھۋال كۆرۈلگەننى بايقىغان ھامان دەرھال دوختۇرخانىغا بېرىپ تەكشۈرتۈش ياخشى چارە.