(مەزكۇر ئەسەر ئاقسۇ گېزىتى 2005-يىللىق 8-ئاپرىل سانىدا ئېلان قىلىنغان .)
بايان ئەيلەي <<ئادىمىي>>لىك نىشانىدىن ،
سىزگە مەلۇم <<سىر ، ھېكمەت>> تىن ۋاراق ئېچىپ .
بولغاچقا مەن <<پاراسەت >> لىك ، <<كارامەت>>لىك ،
ياشاپ كەلدىم ئۇيان قېچىپ ، بۇيان قېچىپ ...
قەددىمنى تىك تۇتۇپ ياشاش بەك تەس بولدى ،
ئىنسان نىمە ، ھايات نىمە چېچىم چۈشتى .
جامالىنى كۆرسەتمىدى بەخت قىزى ،
تەقدىرىمنى ھەر ئويلىسام بېشىم چۈشتى .
كۈن ئۆتكۈزمەك رىسالىسىن تۈزۈپ چىقتىم ،
كېچە –كۈندۈز باش قاتتۇرۇپ مىڭ تەسلىكتە .
ياشاپ كەلدىم شۇندىن بۇيان << ئەقىل >> بىلەن ،
گاھى خۇشال قەھ –قەھ كۈلۈپ ، گاھ مەستلىكتە .
ھەر بىر ئىشتا <<پىلان >>قۇردۇم (زېرەك ) بولغاچ ،
خۇشامەتتە باراقسانلاپ كۆكلەپ كەتتىم .
جاپا تارتىش ئەخمەقلەرگە خاس ئەمەستۇر ،
شۇ خاسلىقتىن <<پەم >>ئىشلىتىپ ئۇزاپ كەتتىم .
دەپىن –دۇنيا ئېشىپ تۇرسا –تېشىپ تۇرسا ،
ئېھتىياجىم چۈشمىسىكەن باشقىلارغا .
تۇغۇلدۇممۇ ئويناپ –كۈلۈپ ئۆتەر كۈنۈم ،
مىڭلاپ ئاپەت كەلسىمۇ گەر ياخشىلارغا .
باشقىلارنىڭ يېغىرىنى تاتىلىماي ،
قارا سۈرتمەي ، ئورا قازماي كۈنۈم ئۆتمەس .
پەيتى كەلسە ئۆزگىلەرنى باپلىماستىن ،
خۇشال ئۆتمەس بىر مىنۇتمۇ ئىشىم پۈتمەس .
ئاستىرىتتىن توزاق قۇرۇپ ئەدەبلەيمەن ،
مىللەت ، خەلق دىگەنلەرنى پايلاپ يۈرۈپ .
تەخت ياساپ <<قۇربانلىقلار >>يىغىسىدىن ،
<<نوچىلارچە>> ياشاپ كەلدىم دەۋران سۈرۈپ .
شانۇ –شەۋكەت ، راھەت ئۈچۈن ئۇنتۇپ بەزەن ،
تېنىۋالىمەن ئىككىلەنمەي ئۆز ئەسلىمدىن .
سېتىشقىمۇ رازى ئاتام ھەم ئانامنى ،
ۋاز كەچمەيمەن بىراق يىققان بۇ ۋەسلىمدىن .
ھاقارەتلەپ ئادەملەرنىڭ قاتارىدىن ،
لەنەت بىلەن مېنى ھەيدەپ چىقارسىمۇ .
كىرىپ چىقماس خىيالىمغا مىللەت دىگەن ،
كۆڭلۈم تېڭى ئاتماس خوراز قىچقارسىمۇ .
كۆرۈنىدۇ كۆزۈمگە سەت دېھقان دىگەن ،
بولساممۇ گەر يىلتىزىمدىن دېھقان پۇشتى .
قېچىپ كەلدىم توپا –تۇمان ، ئىش –ئەمگەكتىن ،
كەلسە ئىزلەپ بىرەر دېھقان ئىچىم پۇشتى .
ئىنسان ئۆمرى تۈگىمەسنىڭ قۇمى ئەمەس ،
خالىسانە يەم قىلمايمەن ياشلىقىمنى .
ئۆچ كۆرسىمۇ مەيلى دەيمەن ئەل –جامائەت ،
رازى قىلسام بەس –كۇپايە باشلىقىمنى .
ھاراق دېسە ئۆزگىچىلا يايرار تېنىم ،
بۇتۇلكىدۇر جان –جىگەرىم ئۈلپەتدىشىم .
جەننەت نېمە ، دوزاق نېمە پەرۋايىم يوق .
تەييارتاپمەن ھۇرۇنلۇقۇم جان سەپدىشىم .
بىر ئىنسانمەن بۇ جاھاندا تەڭدىشىم يوق ،
ھىيلەم كۆپتۈر تۈگىمەيدۇ ئىشلەتكەنگە .
ئىتى بۇلۇپ تاپىسىدىن داجىمايمەن ،
ئايىماستىن پارچە سۆڭەك چىشلەتكەنگە .
ئارتۇق ئىشقا كۆڭۈل بۆلگەن <<ئەخمەق>> ئادەم ،
(قەبرىسىنى قۇم باسىدۇ ئۇنداقلارنىڭ )
شۈكرى قىلماي چاقچاقلاشسا ھايات بىلەن ،
مەن بېرىمەن دەككىسىنى ئۇنداقلارنىڭ .
<<تەجرىبەم مول >> بىر ئىنسانمەن ، تۇتىيامەن ،
خىيالىمدا ،چۈشلىرىمدە ئەڭ ئېگىزدۇرمەن .
رىئاللىقتا ئەتىۋارىم يوق بىر تاشلاندۇقمەن ،
غالىپلارچە مانا شۇنداق ياشاپ كەلدىم .