قۇتۇلدۇرۇش ئىلتىجاسى
ئايدەك كۈلۈپ چىقىپ قالار نىگار دەپ،
تېكىلىدۇ رۇجىكىڭگە كۆزلىرىم.
خانەڭ تامان ئۇچقان لەرزان شامالدا،
ئۇچۇر بولۇپ كېتەر يۈرەك سۆزلىرىم.
شاراپ ئىچتى چولپان بىلەن زىبائاي،
مەنلا تەشنا ئولتۇرىمەن مۇڭلىنىپ.
ئاتا-ئاناڭ توستىمۇ جان يولۇڭنى،
قالدىڭمىكىن قوشناڭدىن يا ئويۇلۇپ.
ھىجرانلىرىڭ يۈرىكىمنى مۇجۇدى،
كىرپىكلىرىم ئاچچىق ياشتا بولدى نەم.
ئالمىشارمۇ ئوتلۇق دەملەر بىئارمان،
كۆرۈشسەك بىز شاد ۋىسالدا بولۇپ جەم.
قۇتۇلدۇرغىن جېنىم ئاچچىق پىراقتىن،
پاك ۋۇجۇدلار مۇراد تېپىپ يايرىسۇن.
چاڭ كەلتۈرۈپ ئالىمىنى سۆيگۈنىڭ،
ۋىسال قۇشى خەندان ئۇرۇپ سايرىسۇن.
(دەۋران نەزمىلىرى)