يەكپاي ئاياغ
                                                       (ھېكايە)


     ئالارمەن _  ساتارمەنلەرنىڭ  شاۋقۇن _ سۈرەنلىرى  بىلەن  تولغان  قايناق  بازار . قولىدا
سومكا   كۆتۈرگەن  ،  ئەللىك  ياشلار   چامىسىدىكى  دېھقان  سۈپەت  بىر   كىشى  باشقىلارغا
ئۇرۇلۇپ  ئاستا  قەدەم  بىلەن  بازار  ئايلىنىپ  يۈرەتتى  .  ئۇنىڭ  بۈركۈتنىڭكىگە  ئوخشاش
بىر  جۈپ  كۆزى  ھەممىگە  تەكشى  زەن  سالاتتى . ئۇ  بىر  ئاياغ دۇكىنىنىڭ  ئالدىغا  كېلىپ
توختىدى .
     _ ئاياغ  ئالامسىز ؟  يېڭى  كەلگەن  مال  ،  مانا  سىلىگە  لايىقلىرىمۇ  بار  ، _ ياشانغان
دۇكاندار  خېرىدارلارنى  جەلپ  قىلىش  ئۈچۈن  ئاياغلىرىنى ماختاشقا  باشلىدى .
     _ مەن  سەھرادىن ، ئۇستام ، ئوغلۇم  تۈنۈگۈن  دوختۇرخانىدىن  چىققان . ئۇنىڭغا  بىرەر
قۇر  كىيىم _  كېچەك  ئېلىپ  بېرەي  دېگەنىدىم  .  دوختۇر  ئۇنى  كۆپ  ماڭمىسۇن  ،  دەپ
تاپىلىغان . شۇڭا  ئۇ  ئاۋۇ  ياتاقتا  قالدى ، _  دېدى  ھېلىقى  دېھقان سۈپەت كىشى  قارشى
تەرەپتىكى  مېھمانخانىنى  ئىما  قىلىپ  .  
     _ قانچىنچى  رەزمىر   ئاياغ   كىيىدۇ  ؟  
     _ بۇنى  مەن  تازا  ئېنىق  بىلمەيدىكەنمەن ، _ خېرىدار  بىر  خىل  ئۈمىدسىزلىك  ئىچىدە
دۇكاندارغا  تىكىلدى . تىكىلدىيۇ ، قانداقتۇر  بىر  ئەقىل  تاپقاندەك سۇسقىنە ھاياجانلاندى،
_ ئۇستام ، مۇنداق  قىلسام  قانداق  بولار ،ماۋۇ ئايىغىڭىزنىڭ  قىرىقىنچى  رەزمىرىدىن  بىرنى
بېرىڭ  .  مەن  يۈگۈرۈپ  كىرىپ  ئوغلۇمغا  كىيدۈرۈپ  كۆرەي ،  قانداق  دەيسىز  ؟
     دۇكاندار  بۇ  تەلەپنى  توغرا  كۆرگەن  بولسىمۇ  سەكسەن  سومغا  سېتىشنى  پىلانلىغان  بۇ
ئاياغنى ئالدىدا  تۇرغان مۇنۇ  ئاۋارە  سەھرالىقنىڭ  ئالالىشىغا  گۇمان قىلىپ قالدى . شۇڭا :
     _ ئۇكا  ،  بۇ   ئاياغنىڭ  بولار   يېرى  توقسان   سوم  جۇمۇ  ،  ھېلى  مىجىپ  ئولتۇرسىڭىز
قاملاشمايدۇ ، _ دەپ  قوشۇپ  قويدى  .
     _ ئەگەر  بالامغىلا   يارىسا  يۈز  سوم  دېسىلىمۇ  مەيلى ،  _ خېرىدار  شۇنداق  دېدىدە  ،
ئاياغنىڭ  سول  پېيىنى  سومكىسىغا  سېلىپ  يۈرۈپ  كەتتى . ئۇ  ئازراق  ماڭغاندىن  كېيىن ،
غىپلا  قىلىپ  يانغا  بۇرۇلۇپ  يەنە  بىر  ئاياغ  دۇكىنىنىڭ  يېنىغا  كېلىپ  توختىدى .  سۆز _
ھەرىكىتى  چاقماقتەك  تېز  بىر  يىگىت  ئۇنىڭ  ئالدىغا  كەلدى .  ئۇمۇ  بايىقى  دۇكانداردەك
ماللىرىنى  ماختاشقا  باشلىدى  .  ئۇلار  ئۇزۇن  پاراڭلاشقاندىن  كېيىن  كېلىشىشتى   بولغاي ،
خېرىدار   ياش  دۇكانداردىن   ھېلىقى   ئاياغقا   ئوخشاش   ئاياغنىڭ   ئوڭ  پېيىنى  ئېلىپ
<< ئوغلىغا  كۆرسىتىش >>  ئۈچۈن  يۈرۈپ  كەتتى  .  
     ئىككى   كۈندىن   كېيىن   قىلتاققا   دەسسىگەن   ئىككى  دۇكاندار   يەكپاي ئاياغلىرىنى
جۈپلەپ   سېتىشقا   مەجبۇر   بولدى  .

                                                                    
                                                  
                                                                
                                                                        ___ ئەسئەت ئابدۇرېشىت

ما  دىھقاننىڭ يامانلىقىنى بۇ ئاتۇشلۇق دىھقان ئوخشمامدۇ ھاھااھھاا

ما  دىھقاننىڭ يامانلىقىنى بۇ ئاتۇشلۇق دىھقان ئوخشمامدۇ ھاھااھھاا

نەدە ئۇنداق ئاسان ئىش بار؟

كاللىسى ياخشى ئىشلەيدىغان ئالدامچىكەن ئاۋۇ؟

ئاياق ئالالماي يۈرگەنلەرگە  تازا ياخشى ساۋات بولدىغان بولدى  

توۋۋا ، مۇنداق ئادەملەرنىمۇ يوق دەپ كەتكىلى بولمايدۇ . سودىگەرلەر دىققەت قىلسا بولغۇدەك جۇمۇ ؟

مانا خەۋەر دېگەن....ھىې..ھىې....ھەي  ئادەملەر.......

ئالدامچىلار كوپىيىپ كەتتى ھەممىمىز  ئېھتىيات قىلايلى

ئاتۇشلۇق ئەمەس،ئاتۇشلۇق بولسا 90يۇەن دىگەننى 9يۇەنگە ئىلىپ كىتەتتى.

ئىبرەت  قىلسا  بۇلدىكەن .

ھازىر بوش ئادەم يوق جۇمۇ !  مەنمۇ ئاڭلىغىنىمنى دەپ باقاي:

بىر كۇنى بىر بالا  شورپىخانىغا كىرىپتۇ. شورپىكەش:
_ نىمە يەيسىز  بالام ؟_ دەپ سوراپتۇ. ئۇ دەرھال :
- ئىككى پارچە گۆش، _ دەپتۇ.
ئۇ بالا ئىككى پارچە گۆشنى يەپ بولۇپ، يەنە بىر قاچا ئۈگرە بۇيرۇپ، كەينىدىنلا :
_ ئۇستام، ئۈگرە پىشقىچە ،  مەن تاماكا ئېلىپ كىرەي، - دەپ شۇ چىكەتكەن پىتى قايتا ئەشخانىغا كىرمەپتۇ.
ئۇستام ئۈگرىنى پۇشۇرۇپ، ساقلا-ساقلا كىرمەپتۇ. ئاخىرى :
_ ۋاي بالام ، گۆش يىگىلى كىرىپتىكەنسىز-دە ! -دەپ ئويلاپ قاپتۇ.