بۇرۇنقى زاماندا ، خالىق ئىسىملىك بىر ئادەم بولغانىكەن . ئۇ بىر ئۆمۈر جاپالىق ئىشلەپ بىر خالتا كېپەك ئالتۇن يىغىپتۇ . بىر كۈنى ئۇ سەپەرگە
   چىقماقچى بوپتۇ - دە ،ئالتۇنلىرىنى دوستى قاسىمغا ھاۋالە قىلىپ :
        __ ماڭا ياردەم قىلىپ ئالتۇنلىرىمنى ساقلاپ بەرگەن بولسىڭىز ، قايتىپ كەلگەندىن كېيىن ئېلىۋالسام ، __ دەپتۇ .
           بىر مەزگىلدىن كېيىن خالىق قايتىپ كېلىپ قاسىمنىڭ ئۆيىگە بېرىپ :
        __ ئالتۇنلىرىمنى ئالغىلى كەلدىم . __ دەپتۇ .
       __  سىزگە بىر شۇم خەۋەرنى ئېيتاي ، __ دەپتۇ قاسىم ، __ سىز كەتكەندىن كېيىن ،ئالتۇنلىرىڭىز قۇمغا ئايلىنىپ كەتتى . . .
            خالىق خالتىغا قارىسا خالتىدا  ھەقىقەتەن لىققىدە قۇم تۇرغىدەك . خالىق كۆڭلىدە بەك خاپا بوپتۇ : << ھامان بىر كۈنى ئالتۇنلىرىمنى قايتۇرۇۋالىمەن >>
      دەپ ئويلاپ قۇرۇق قول ئۆيىگە قايتىپتۇ .
           ئۇزاق ئۆتمەي قاسىم  خالىقنى ئىزدەپ كېلىپ :
           __ مەن سەپەرگە چىقماقچىدىم . ئوغلۇمغا قاراپ تۇرالاسىزمۇ ؟ __ دەپتۇ .
          __  بولىدۇ . ئوغلىڭىز يېنىمدا تۇرسا ناھايىتى بىخەتەر بولىدۇ ، __ دەپتۇ .
       قاسىم كەتكەندىن كېيىن خالىق بىر شاتۇتى سېتىۋاپتۇ _ دە ، شاتۇتىغا :
          __ دادا ، قارا مەن نېمىگە ئۆزگىرىپ قالدىم ، __ دېيىشنى مەشىق قىلدۇرۇپتۇ . خېلى كۈنلەر ئۆتكەندىن كېيىن قاسىم سەپەردىن قايتىپ كەپتۇ - دە ،
       خالىقنىڭ ئۆيىگە ئوغلىنى ئالغىلى كېلىپ قارىسا ئۆيدە شاتۇتى بىلەن دوستى تۇرغىدەك ، ئوغلى ھېچيەردە كۆرۈنمەپتۇ .
          __ ئوغلۇم قېنى ؟ __ دەپ سوراپتۇ قاسىم .
         __ ئۇ بۇ يەردە ،__ خالىق بىر تەرەپتىن سۆزلىگەچ بىر تەرەپتىن شاتۇتىنى قاسىمنىڭ ئالدىغا ئەكەپتۇ .  شاتۇتى :
         __ دادا ، قارا مەن نېمىگە ئايلىنىپ قالدىم ، __ دېيىشكە باشلاپتۇ .
         قاسىم نېمە قىلىشىنى بىلەلمەي تۇرۇپلا قاپتۇ .ئۇ شاتۇتىنى ئىتىرۋېتىپ ۋارقىراشقا باشلاپتۇ .
          __ ئادەمنى ئالدىما ، بىر بالا قانداقمۇ شاتۇتىغا ئايلىنىپ قالسۇن ، ئوغلۇمنى زادى قەيەرگە يوشۇرۇپ قويدۇڭ ؟
          __ دۇنيادا ئالتۇن قۇمغا ئايلىنىپ قالىدىغان ئىشلار بولىدىكەنۇ ، بالا شاتۇتىغا ئايلىنىپ قالسا بولمامدىكەن ؟ ئالتۇنلىرىمنى قايتۇرۇپ بەرسەڭ ،
        ئاندىن  مەن ئوغلۇڭنى قايتۇرۇپ بېرىمەن ! _ دەپتۇ خالىق سالماقلىق  بىلەن .
              قاسىم ئامالسىز ئالتۇننى قايتۇرۇپ بېرىپتۇ . خالىقمۇ خاتىرجەم ئويناپ يۈرگەن بالىنى دادىسىغا قايتۇرۇپ بېرىپتۇ .

                           مەنبەسى : << تارىم غۇنچىلىرى >> دىن ئېلىندى .

            

ھەقىقەتەنمۇ ياخشىكەن  .ياخشى بولمىغان بولمىسا ئىنكاس يازمايتىم               

ئەگەر شاتۇتى بولمىغان بولسا قۇشقاچقا گەپ ئۆگىتەمدىكىن؟

ياخشى قىپتۇ.ئۇنداق قازانغا- مۇنداق چۇمۇچ

     ،،،،،،،،،،،،،،،،،،،،،،،،،،،،،،،،

ئۇنداق قازانغا مۇنداق چۆمۈچ  دېگەن گەپ بىكار چىقمىغان دە...