ئەسەبىيلىك كېسەللىك دەۋرى 40 ياش، بەختلىك دەۋرى 70 ياش
ئىنسانلاردا ئەسەبىيلىك كېسەللىكى 40 ياشقا كىرگەندە كۆرۈلىدىكەن
تۈركىيە ئاۋازى رادىئوسى خەۋىرى: ئەسەبىيلىك كېسەللىك دەۋرى 40 ياش، بەختلىك دەۋرى 70 ياش.
ئىگىلىنىشىچە، ئەسەبىيلىك كېسەللىكى ئادەتتە 40 ياشقا كىرگەن كىشىلەردە ناھايىتى كۆپ بولىدىكەن. 70 ياشقا كىرگەندە بولسا ئادەم ئۆزىنى خۇددى 20 ياشلىق يىگىتتەكلا ھېس قىلىدىكەن.
ئىنسانلاردا ئەسەبىيلىك كېسەللىكى 40 ياشقا كىرگەندە كۆرۈلىدىكەن.
ئامېرىكىلىق ۋە ئەنگىلىيىلىك مۇتەخەسسىسلەرنىڭ 80 دۆلەتنى ئۆز ئىچىگە ئالغان تەتقىقاتى، ئىنسانلارنىڭ ئەسەبىيلىك كېسەللىكىگە گىرىپتار بولۇش ئېھتىماللىقىنىڭ ئوتتۇرا ياشلىق مەزگىلىدە يەنى 40 ياشلارغا كىرگەن چاغدا ئەڭ يۇقىرى پەللىگە يېتىدىغانلىقىنى ئوتتۇرىغا قويدى.
ئامېرىكىلىق ۋە ئەنگىلىيىلىك مۇتەخەسسىسلەر 2 مىليۇنغا يېقىن كىشىنىڭ ئەسەبىيلىك كېسەللىكى، ئەندىشە سەۋىيىسى ۋە ئومۇمىيۈزلۈك روھىي كېسەللىك ئەھۋالى ھەققىدە تەكشۈرۈش ئېلىپ باردى.
ئافرىقا قىتئەسىدىكى زىمبابوۋېيدىن ياۋروپا قىتئەسىدىكى ئالبانىيىگىچە 80 دۆلەتنى ئۆز ئىچىگە ئالغان تەتقىقات نەتىجىسىگە كۆرە، ئادەتتە ئىنسانلارنىڭ پۈتكۈل ھاياتىدىكى بەختلىك بولۇش ئەھۋالى بىلەن روھىي جەھەتتىكى ساغلاملىقى بەزىدە ياخشى بولسا يەنە بەزىدە ناچار بولىدىكەن. يەنى ئادەتتە ئىنسانلارنىڭ ھاياتى بەختلىك باشلانغان بولسىمۇ، ئەمما ئوتتۇرا ياش قۇرامىغا يەتكەندە بەختسىزلىك ھۆكۈم سۈرۈشكە باشلايدىكەن.
مۇتەخەسسىسلەرگە كۆرە، ئەسەبىيلىك كېسەللىكىگە گىرىپتار بولۇش ئېھتىماللىقى 40 ياشلىق كىشىلەردە ئەڭ يۇقىرى پەللىگە يېتىدىكەن. ئۇنىڭ ئۈستىگە، بۇ خىل ئەھۋال، مەيلى ئەر بولسۇن ياكى ئايال بولسۇن، مەيلى باي بولسۇن ياكى كەمبەغەل بولسۇن، تۇرمۇش قۇرغان بولسۇن ياكى تۇرمۇش قۇرمىغان بولسۇن، بالىسى بار بولسۇن ياكى بالىسى يوق بولسۇن ئوخشاش ئىكەن.
تەتقىقات نەتىجىسىدە يەنە 70ياشلىق كىشىلەرنىڭ ئادەتتە ئۆزلىرىنى خۇددى 20 ياشلىق يىگىتتەكلا ھېس قىلىدىغانلىقىغا دائىر خۇش خەۋەرمۇ بار.
ئەگەر بىر كىشى 70 ياشقا كىرگەن بولۇپ، تەن – سالامەتلىكى ياخشى بولسا ئۆزىنى گويا 20 ياشلىق بىر يىگىتتەكلا بەختلىك ھېس قىلىدىكەن.