ئۈرۈمچى كەچلىك گېزىتى خەۋىرى:
كۆز كېسەللىكلىرى مۇتەخەسسىسى يېقىندا قار تېيىلىشقا ئامراق كىشىلەرنى ئاگاھلاندۇرۇپ مۇنداق دېدى: دائىم قار تېيىلسا ياكى قارلىق دالىدا ھەرىكەت قىلىشقا توغرا كەلسە، ئەڭ ياخشىسى قار كۆزەينىكى تاقىغان تۈزۈك، بولمىسا ئادەم قار«ئەمالىقى»غا گىرىپتار بولۇپ قالىدۇ.
مۇتەخەسسىس يەنە مۇنداق دېدى: ناۋادا ئادەم قار «ئەمالىقى»غا گىرىپتار بولسىمۇ، بەك قورقۇپ كېتىشنىڭ ئورنى يوق، كۆزنىڭ ئۆزلۈكىدىن ئەسلىگە كېلىشىنى كۈتۈش بىلەن بىللە، كۆزگە چىرىشتىن ساقلىنىش ماددىسى قوشۇلغان ياش سۇيۇقلۇقىنى تېمىتىپ بەرسە، كۆزنىڭ ساقىيىشىغا پايدىسى بولىدۇ. بۇ خىل كېسەلگە گىرىپتار بولغاندىن كېيىن كۆز قىزىرىدىغان ئەھۋال كۆرۈلىدۇ، بۇ چاغدا كۆزگە تەركىبىدە ئانتىبىئوتىك يوق ياللۇغقا قارشى كۆز دورىسى تېمىتىپ بەرسە، كۆزدىكى قىزىللىق تېزلا يوقايدۇ، ئەگەر كۆز چىدىغۇسىز ئاغرىپ كەتسە ئازراق ئاغرىق توختىتىش دورىسى ئىچىشنى ئويلىشىپ بېقىشنىڭ زىيىنى يوق.
