شىنخۇا ئاگېنتلىقى، بېيجىڭ، 11 – ماي تېلېگراممىسى. ۋېن جياباۋنىڭ رىياسەتچىلىكىدە 11 – ماي گوۋۇيۈەننىڭ دائىمىي يىغىنى ئېچىلىپ، ‹‹جۇڭگو مېيىپلەر ئىشلىرىنىڭ <12 – بەش يىل>;لىق تەرەققىيات پىروگراممىسى›› مۇزاكىرە قىلىنىپ ماقۇللاندى.

    يىغىندا مۇنۇلار تەكىتلەندى: مەملىكىتىمىز مېيىپلەر ئىشلىرىنىڭ ئاساسى ھازىر يەنىلا بىر قەدەر ئاجىز، 2015 – يىلغىچە، ئېلىمىزدىكى مېيىپلەرنىڭ تۇرمۇشىنى ئومۇمىي جەھەتتىن ھاللىق سەۋىيەگە يەتكۈزۈپ، ئۇلارنىڭ ئىجتىمائىي كاپالەت سىستېمىسىغا قاتنىشىش ۋە تەرەققىيات ئەھۋالىنى كۆرۈنەرلىك ياخشىلايمىز. بۇنىڭ ئۈچۈن، بىرىنچى، مېيىپلەر ئىجتىمائىي كاپالەت سىستېمسى قۇرۇلۇشىنى كۈچەيتىپ، مېيىپلەرنىڭ ئاساسىي تۇرمۇشىنى كاپالەتكە ئىگە قىلىمىز. ئىككىنچى، مېيىپلەرنى ئاساسىي جامائەت مۇلازىمىتى بىلەن تەمىنلەش سالمىقىنى زورايتىپ، مېيىپلەرنىڭ ئەتراپلىق تەرەققىي قىلىشىنى ئىلگىرى سۈرىمىز. مېيىپلەرنى ھاۋالىلىك بېقىش مۇلازىمىتى سىستېمىسىنى ئورنىتىپ، ئەقلىي توسالغۇغا ئۇچرىغان، روھىي كېسەلگە گىرىپتار بولغان ۋە ئېغىر دەرىجىلىك مېيىپلەرنى ھاۋالىلىك بېقىش مۇلازىمىتى بويىچە 2 مىليون ئادەم (قېتىم) ياردەم بېرىمىز. شەھەر – بازارلاردىكى 1 مىليون مېيىپنى يېڭىدىن ئىشقا ئورۇنلاشتۇرۇپ، يېزىلاردىكى 10 مىليون نامرات مېيىپنىڭ تۇرمۇشىنى ياخشىلىشىغا يۆلەك بولىمىز. ئۈچىنچى، مېيىپلەرنىڭ سالامەتلىكىنى ئەسلىگە كەلتۈرۈش ۋە مېيىپلىكنىڭ ئالدىنى ئېلىش خىزمىتىنى كۈچەيتىپ، مېيىپ بولۇپ قېلىش ۋە ئېغىرلىشىپ كېتىشىنىڭ ئۈنۈملۈك ئالدىنى ئالىمىز. تۆتىنچى، ئىجتىمائىي مۇھىتنى ياخشىلاپ، مېيىپلەر ئىشلىرىنى ئىمكانىيەتلىك سىجىل تەرەققىي قىلدۇرىمىز.