گېرمانىيە ‹‹يورۇق ئەينەك›› ھەپتىلىك ژۇرنىلى ماقالىسى ، ئەسلى تېمىسى : ئەرزان باھالىق زاۋۇتلار جۇڭگو ئىقتىسادىنىڭ تۈپ ئۆزگىرىش ئېلىپ بېرىشىنىڭ زۆرۈرلۈك دەرىجىسىنى يۇقىرى كۆتۈرمەكتە.

    جۇڭگو ئۆزىنىڭ ئەرزان باھالىق زاۋۇتلىرىنىڭ ئالىي سۈپەتلىك تاۋار ئىشلەپچىقىرىدىغان ئورۇنغا ئايلىنىشىنى ئارزۇ قىلىدۇ. ئەمما بۇ ، ئەمەلدارلارنىڭ ئويلىغىنىدەك ئۇنداق ئاسان ئىش ئەمەس . ئېغىر بيۇروكراتلىق ئىستىلى پەن تەتقىقاتىغا توسالغۇ بولۇۋاتقان بولۇپ ، پەقەت ئاز ساندىكى شىركەتلەرلا ئىجادچانلىققا ئىگە.

    جۇڭگو ئەسلىدە كەشپىياتچىلارنىڭ ماكانى ئىدى. ئەمما بۇندىن 500 يىل ئىلگىرى ، بۇ دۆلەت يېڭىلىق يارىتىش كۈچىنى يوقاتتى. چۈنكى، پادىشاھلار يېڭى شەيئىلەرگە ئانچە قىزىقىپ كەتمەيتتى.

    ھازىر ، جۇڭگو يەنە ئەسلىگە قايتىپ كەلدى: ئالەم ئۇچقۇچىلىرى ئالەم بوشلۇقىدا ئۇچۇشقا باشلىدى ، جۇڭگو زاۋۇتلىرى بوشلۇق ماشىنىلىرى ، iphone، ipad لارنى ئىشلەپچىقاردى ، جۇڭگو ئىشچىلىرى يۇقىرى سۈرئەتلىك تۆمۈريول ، شامال كۈچى ئېلېكتىر ئىستانسىسى ، يادرو رېئاكتورىنى قۇرۇپ چىقتى . جۇڭگودا، يانفون ئارقىلىق ھەرقانداق ئىشنى دېگىدەك بېجىرگىلى بولىدىغان بولدى ، ھەتتا ئەڭ چەت ئۆلكىلەرمۇ كەڭ بەلباغلىق ئالاقە تورى ئۇلاندى.

    يېڭىلىق يارىتىش ، يېڭىلىق يارىتىش ، يېڭىلىق يارىتىش . ‹‹ئۆز زېمىنىدا يېڭىلىق يارىتىش›› ، بۇ جۇڭگو كارخانا سىياسىتىنىڭ ھۆكۈمەت تەرەپ تەسۋىرىگە ئايلاندى ، بۇ خىل پوزىتسىيەنىڭ ئارقىسىدا ، جۇڭگو ئۆزىنى گۈللەندۈرۈشتە مەڭگۈ ئەرزان باھالىق مەھسۇلاتلارنى ئىشلەپچىقىرىشقىلا تايانسا بولمايدىغانلىقىنى تونۇپ يەتتى . جۇڭگولۇق بىر ئەمەلدار ئاغرىنىپ: ‹‹ بىز ئۆزىمىزنىڭ داڭلىق مەھسۇلاتلىرىمىزغا ، بولۇپمۇ ئۇلارنى تېزلىكتە ئوتتۇرىغا چىقىرىشقا موھتاج›› دېدى. بىراق، تا بۈگۈنگە قەدەر ، خەلقئارادا پۇت تىرەپ تۇرالايدىغان تاۋار ماركىلىرىمىز ، مەسىلەن: خەيئېر، ليەنشياڭ، خۇاۋىيدەكلەر يەنىلا بەك ئاز.

    جۇڭگونىڭ ئالىي مەكتەپلىرى ھەر يىلى نۇرغۇنلىغان ئوقۇغۇچىلارنى يېتىشتۈرۈپ چىقىدۇ، ئۇلارنىڭ خەلقئارا پەن–تېخنىكا مەتبۇئاتلىرىدا ئېلان قىلغان ئىلمىي ماقالىلىرىنىڭ سانى ئامېرىكىدىن كېيىنلا تۇرىدۇ . جۇڭگونىڭ پاتېنىت ئىلتىماسى 2008– يىلى 80 تۈمەندىن ئېشىپ ، تەستىقلانغىنى 20 تۈمەنگە يەتتى . بۇ ئادەمدە چوڭقۇر تەسىرات قالدۇرىدىغان سان ، بىراق چەت ئەل مۇتەخەسسىسلىرى ۋە سودىگەرلىرى مۇنداق دەيدۇ : ئىجادىي خاراكتېرلىك يېڭىلاش ئىنتايىن كەمچىل ، دائىم دېگۈدەك پەقەت ھازىر بار بولغان تېخنىكىلارنى ئىنچىكىلەش ۋە ياخشىلاشلا بولۇۋاتىدۇ.

    ياۋروپا ئىتتىپاقى سودىگەرلەر ئۇيۇشمىسىنىڭ سابىق رەئىسى جۇئېرگ ۋۇتكې مۇنداق دېدى: جۇڭگونىڭ ئالىي مەكتەپلىرىدە، غايەت زور سېلىنما بىلەن ئاز مىقداردىكى ھاسىلات ئوتتۇرىسىدا يەنە ‹‹زور ماس كەلمەسلىك بار، جۇڭگو سەر خىل مەھسۇلاتلارنى ئىشلەپچىقىرالايدىغان بولۇش ئۈچۈن ، يەنە كۆپلىگەن مەسىلىلەرنى ھەل قىلىشى كېرەك . مەسىلەن: پەقەت ئاز ساندىكى خۇسۇسىي ئىگىلىكتىكى كارخانىلارلا تەتقىق قىلىش–ئېچىش تارماقلىرىنى قوللاۋاتىدۇ . دىرېكتورلار تېزلىكتە نەپ ئېلىش ياكى يېڭىچە سانائەتلەرگە مەبلەغ سېلىشقا بەكرەك قىزىقىدۇ . ئۇنىڭدىن باشقا ، بانكىلارمۇ خۇسۇسىي ئىگىلىكتىكى كارخانىلارغا قەرز بېرىشتە يەنىلا ئىككىلىنىپ تۇرىدۇ.

    مەكتەپلەر بىلەن ئالىي مەكتەپلەرنىڭ ئوقۇغۇچىلارنى يېڭىلىق يارىتىشقا رىغبەتلەندۈرۈشى يېتەرسىز ، دۆلەتنىڭ پەن– تەتقىقات ئورگانلىرى بەكمۇ بيۇروكرات بولۇپ ، چېرىكلىك ئېغىر ، خەلقئارادىكى ئەقىل ئامبىرى بىلەن سېلىشتۇرغىلى بولمايدۇ.

    ھۆكۈمەت تەرەپ تەتقىقاتنى ئىلگىرى سۈرمەستىن ، بەلكى چەت ئەل كارخانىلىرىنىڭ ئاشكارىلانغان مەخسۇس تېخنىكىلىرىنى ئاددىيلا تەلەپ قىلىدۇ ، چەت ئەل زاۋۇت باشلىقلىرى ۋە سودىگەرلەر بىلىم–مۈلۈك ھوقۇقىنىڭ دەخلى –تەرۇزگە ئۇچرىغانلىقىدىن نارازى بولسىمۇ ، ئەمما يەنىلا يامانلىشىپ قېلىشنى خالىمايدۇ.