جاۋاپ بەر ھايات

uyghur

جاۋاپ بەر ھايات

گۈل سۇنۇپ كەلدىڭ ھايات، خۇش بولۇپ ئالدىم پۇراپ.
ئۇچ دېدىڭ، بەردىڭ قانات، ئۆزگىلەر قالدى قاراپ.
كۈل دېدىڭ كۈلكە بەردىڭ، كۈلكەم ياندى چوغ بولۇپ،
مەن بىلەن كۈلدى جاھان، تۇمانمۇ كەتتى تاراپ.
كۆي دېدىڭ، كۆيدۈم ئەجەپ گۈلخان ئۇندا نە قىلسۇن؟
ئوتلىرىم مەشرىقتە ياندى، مەغرىپمۇ كۆيدى لاۋۇلداپ.
تۇر دېدىڭ، يۈگۈر دېدىڭ، ھالىمنى ھېچ قويمىدىڭ،
ئاھ بۈگۈن يەتتى ھاردۇق، مەشۇق قالدى ھالسىراپ.
تەنگە يەتكەن مالامەت، ئەسلى ئۇ ھېچگەپ ئەمەس،
ئەي ھايات ئەزدىڭ كۆڭۈلنى دىل پەرىشان يىغلامسىراپ.
ئارتۇقۇم يوقتۇر ھايات، يەنە سەن بارىم مېنىڭ،
ماڭا بىر تەۋپىق بەرگىن، چەكمىسۇن قەلبىم ئازاپ.
ياشاشنىڭ مەناسى نېمە؟ قەلىبنىڭ غەمخانى نېمە ؟
ئەي ھايات سوراي سەندىن، چىن ھەقىقىي بەرگىن جاۋاپ…!