ئۇيغۇر ياشلار شېئىرىيتى

روھىمدىكى مۇھەممەتجانغا

قولۇڭنى بەر، ماڭايلى ئەمدى،
سۇ ئاستىدا قالغىچە قىرلار.
توپان كېلىپ باسقان دۇنيادا،
ئىشەن، نوھنىڭ كېمىسى ھەم بار.

ئۇزاق بولدى، بەك ئۇزاق بولدى،
مەن بۇ ھالدا كۆرگىلى سېنى.
ئاچچىق كىشنەر سەن مىنگەن تۇلپار،
سەن كۆتۈرگەن بايراقلار قېنى؟

سەن يىقىلساڭ تۈگەيمەن مەنمۇ،
تۈگەر تالاي روھ ۋە تالاي تەن.
تۈگەر شېئىرىڭ يورۇتقان تۈنلەر،
تۈگەر شېئىرىڭ ياراتقان ۋەتەن.