* ------------------ قـىـرتاق پاراڭـــلار ------------------------*

                                                ھـايـات 


    تۇنجى كۈنى تەڭرى سېغىن كالىنى  يارىتىپتۇ . تەڭرى كالىغا : 
ــ  سەن ھەر كۈنى ئېتىزلىقتا ئىشلەيسەن .  ئاندىن يەنە سۈتۈڭ بىلەن موزايلىرىڭ بىلەن خوجايىنىڭنىڭ ئائىلىسىدىكىلەرنى باقىسەن .  ساڭا 60 يىل ئۆمۈر بەردىم ،  ــ دەپتۇ .
ــ  بۇ دوزاختەك كۈنلەردە 60 يىل ئىشلەپ نېمە قىلىمەن !  ــ  دەپتۇ كالا دەرغەزەپ بىلەن ، ــ ماڭا 20 يىل يېتەرلىك ، 40 يىلنى ئۆزىڭىز ئېپقېلىڭ .  
    تەڭرى كالىنىڭ تەلىپىگە قوشۇلۇپتۇ .
    ئەتىسى تەڭرى ئىتنى يارىتىپتۇ ، تەڭرى ئىتقا :
ــ  سەن سەن ھەر كۈنى كىشىلەرنىڭ ئىشىك ئالدىدا تۇرۇپ ، بىرەرسى كەلسە ۋاڭشىپ قاۋايسەن ، ساڭا 20 يىل ئۆمۈر بەردىم ، ــ دەپتۇ .
ــ  20 يىل ۋاڭشىپ قاۋىسام ، بۇ ۋاقىت بەك ئۇزۇنكەن ، ــ  دەپتۇ ئىت ئۈمىدسىزلەنگەن ھالدا ، ـــ ماڭا ئون يىل يېتەرلىك ، قالغان ئون يىلنى قايتۇرىۋېلىڭ .
    تەڭرى ئىتنىڭ تەلىپىگىمۇ قوشۇلۇپتۇ .  
    ئۆگۈنى تەڭرى ئادىمىزاتنى يارىتىپتۇ ۋە ئۇنىڭغا : ئويۇن ـ تاماشا قىلىش ، تۇرمۇشتىن لەززەتلىنىش ئۈچۈن  ساڭا 20 تىل ئۆمۈر بەردىم ، ــ  دەپتۇ . 
    بۇنى ئاڭلاپ ئادەم نارازى بولغان ھالدا : 
ــ  نېمە دېدىڭىز ؟ ماڭا ئاران 20 يىل ئۆمۈر بېرەمسىز ، تەڭرىم ؟ مەن ئۆزۈمنىڭ 20 يىلىنى ، كالىنىڭ سىزگە قايتۇرىۋەتكەن 40 يىلىنى ، يەنە ئىت ياراتمىغان ئون يىلنى ئالاي ، 70 يىل خېلى بولىدۇ ، سىزنىڭچە قانداق ؟ 
ــ  بوپتۇ ، دېگىنىڭدەك بولسۇن ، ــ  دەپتۇ تەڭرى خۇرسىنىپ . 
    نەتىجىدە ، ئالدىنقى 20 يىلدا بىز تاماق يەپ ، ئۇخلاپ ، لەززەتلىنىمىز ، كېيىنكى 40 يىلدا ئۆيدىكىلەرنى بېقىش ئۈچۈن ( كالىدەك ) جان تىكىپ جاپالىق ئىشلەيمىز ، ئەڭ ئاخېرىقى ئون يىلدا ھەر كۈنى ئىشىك تۈۋىدە ئولتۇرۇپ ئۆتكەن ــ كەچكەنلەر بىلەن سالام ــ سەھەت قىلىشىمىز .

ـــــــــــــــــــــــــــــــــــــــــــــــــــــــــــــــــــــــــــــــــــــــــ
 
                                      كەينىمدىكـى غـەيـۋەتـلــەر 
ھۆججەت سومكىسىنى قولتۇقۇمغا قىستۇرۇپ « BENZ » دىن چۈشسەم : چوقۇم پارىخور ئەمەلدار . 
*سوت فورمىسىنى كىيسەم : ئۇ نەچچە جاۋابكار ۋە دەۋاگەرنى شىلىۋالغانلىقىنى ئۆزىمۇ بىلمەيدۇ . 
* كاستۇم ــ بۇرۇلكا كىيىپ سىڭلىم بىلەن كاتتا پىكاپتا « تاللا بازار » لارنى ئايلانسام : بۇ ئۇنىڭ نەچچىنچى ئاشنىسى ئىكەنلىكىنى خۇدا ئۆزى بىلىدۇ .
* كۆزەينەك تاقاپ ئاكا ــ ئۇكا بۇرادەرلەر بىلەن مەيخانىدا تۇغۇلغان كۈنۈمنى تەبرىكلىسەم :  قارا كۆزەينەك تاقىۋالغېنى چوقۇم قارا جەمئىيەتنىڭ كاتتىۋېشى .
* قىڭراقتىن بىرنى سېتىۋېلىپ ، تاماق ئېتىپ مېھمان كۈتكىلى پالاقلاپ ئۆيگە چاپسام :  قاتىل !  دەرھال 110 غا تېلىفون قىلايلى ! . 
* قارا تەرگە چۆمۈلۈپ ئۈچ چاقلىق رىكشا ھەيدىسەم : بۇقىدەك قاۋۇل تۇرۇپ كۆپىرەك پۇل تاپالمىغىنىنى ، ھۇ ، يارىماس ! 

ـــــــــــــــــــــــــــــــــــــــــــــــــــــــــــــــــــــــــــــــــــــــــ

                                                ئىكـكـى مەســەل 

                                         
                                                تەجىربىلىك قۇرت 

    ياش قۇرتلار كىتابلارنىڭ مۇقاۋىسىنى يېيىشلىككەن ، دەپ ئاڭلاپ ، قېرى قۇرتتىن باشلاپ بېرىشكە ئۆتۈنۈپتۇ . 
ــ  ھەرگىز بولمايدۇ  ،  ــ دەپتۇ قېرى قۇرت ،  ــ  كىشىلەر يۈزەكى زىيانلارغا بەكراق سەزگۈر كېلىدۇ ، شۇڭا بىز كىتابلارنىڭ ئىچىنى يەپ قۇرۇقداپ قويساقمۇ ، ئۇلار ئاسانلىقچە بىلەلمەيدۇ . 
  ـــــــــــــــــــــــــــــــــــــــــــــــــــــــــــــــــــــــــــــــــــــــــ
                                  توشقاننىڭ يېتەكچى ئوقۇتقۇچىسى 
 
    توشقان ئۆڭكۈرنىڭ ئالدىدا ئولتۇرۇپ كومپىيوتېردا خەت بېسىۋاتسا ، تۈلكە ئۇنىڭ ئالدىدا پەيدا بوپتۇ ــ دە ،  توشقانغا :  ــ  سېنى يەيمەن ! ــ  دەپتۇ . .
 
ــ  ئالدىرىما ، مەن باكلاۋرلىق ئىلمىي ماقالەمنى پۈتتۈرىۋالاي ، ـــ دەپتۇ توشقان جاۋابەن . ــ  قانداق باكلاۋرلىق ئىلمىي ماقالىسى ئۇ ؟ ـــ دەپ سوراپتۇ تۈلكە ئەجەبلىنىپ .
ــ  ماقالەمنىڭ تېمىسى : « توشقان نېمە ئۈچۈن تۈلكىدىن كۈچلۈك ؟ » ــ  دەپ جاۋاب بېرىپتۇ توشقان سىپايە قىياپەتتە . 
تۈلكە قاقاھلاپ كۈلۈپ كېتىپتۇ : ــ بەك كۈلكىلىك گەپكەن بۇ ، سەن قانداقسىگە مەندىن كۈچلۈك بولىسەن ؟! 
    توشقان ئاۋالقىدەكلا تەمكىن قىياپەتتە :  ــ  ئىشەنمىسەڭ ئارقامدىن ماڭ ، ساڭا بۇنى ئىسپاتلاپ بېرىمەن ،  ــ  دەپتۇ ــ دە ،  تۈلكىنى ئۆڭكۈرگە باشلاپ كىرىپتۇ ، تۈلكە ئۆڭكۈردىن قايتىپ چىقماپتۇ .  
    توشقان يەنە ئۆڭكۈر ئالدىدا خەت بېسىشنى داۋاملاشتۇرۇپتۇ .  
    بىر چاغدا بۆرە توشقاننىڭ ئالدىدا پەيدا بولۇپ ، ئوخشاشلا توشقانغا :
ــ  سېنى يەيمەن ،  ــ دەپتۇ .
ــ  ئالدىرىما ، مەن باكلاۋرلىق ئىلمىي ماقالەمنى پۈتتۈرىۋالاي ، ماقالەمنىڭ تېمىسى : « توشقان نېمە ئۈچۈن بۆرىدىن كۈچلۈك ؟ »  ــ دەپتۇ ، توشقان يەنە سىپايە قىياپەتتە . 
    بۆرە قاقاھلاپ كۈلۈپ كېتىپتۇ : ــ  سەن قانداقسىگە ئۆزۈڭنى مەندىن كۈچلۈك دېيىشكە پېتىندىڭ ؟!
ــ  بۇ راست ، ساڭا ئىسپاتلاپ بېرەلەيمەن . 
    توشقان شۇنداق دەپ بۆرىنىمۇ ئۆڭكۈرگە باشلاپ ئەكىرىپتۇ ، بۆرە ئۆڭكۈردىن چىقماپتۇ .
    توشقان ئۆڭكۈر ئالدىدا ماقالىسىنى يېزىپ پۈتتۈرگەندىن كىيىن ، ئۆڭكۈرگە كىرىپ ، ماقالىسىنى سېسىق كېكىرىپ ياتقان شىرغا تاپشۇرۇپتۇ . 

    ( بۇ يەردە ) ئىلمىي ماقالىنىڭ تېمىسى ھېچقانچە مۇھىم ئەمەس ، مەزمۇنىمۇ مۇھىم ئەمەس ، مۇھىمى ــــ ئىلمىي ماقالىنىڭ يېتەكچى ئوقۇتقۇچىسىنىڭ كىم ئىكەنلىكىدە . 

  ـــــــــــــــــــــــــــــــــــــــــــــــــــــــــــــــــــــــــــــــــــــــــ                                    بارغانسېرى ئوخشاپ قېلىش 

  * بۇ يىللاردا بەزى پروفېسورلار مەدداھلىق قىلىپ تەرەپ ــ تەرەپتىن پۇل تېپىپ ، بارغانسېرى سودىگەرگە ئوخشاپ قېلىۋاتىدۇ ؛
    بەزى سودىگەرلەر ئۆزىنى مۇنبەرگە بېغىشلاپ ، ئەسەرلەرنى يېزىپ ، نەشىر قىلدۇرۇپ ، بارغانسېرى پروفېسورغا ئوخشاپ قېلىۋاتىدۇ . 
 
  * بەزى دوختۇرلار ئۆلۈۋاتقانلارنى كۆرۈپ تۇرۇپ قۇتقۇزماي ، جان بىلەن ئوينۇشۇپ بارغانسېرى قاتىلغا ئوخشاپ قېلىۋاتىدۇ ؛ 
      بەزى قاتىللار چاققانلىق بىلەن قول سېلىپ كېيىنكى ئاپەت ( يامان ئاقىۋەت ) نى قالدۇرماي ، بارغانسېرى دوختۇرغا ئوخشاپ قېلىۋاتىدۇ . 
 
  * بەزى ساقچىلار زورلۇق ــ زومبۇلۇق  ( ئۆكتەملىك ) قىلىپ  ، بوزەكنى بوزەك ئېتىپ ، ياكى ياماندىن قورقۇپ ، بارغانسېرى لۈكچەككە ئوخشاپ قېلىۋاتىدۇ ؛ 
      بەزى لۈكچەكلەر ھەممىسىگە ھۆكۈمرانلىق قىلىپ ،جۈرئەتلىك بولۇپ بارغانسېرى ساقچىغا ئوخشاپ قېلىۋاتىدۇ .






شاھدىيار تەرىپىدىن 10- ئاينىڭ 14- كۈنى 21:39 دا تەھرىرلەندى


[ بۇ يازما ئۇيغۇر -ئاي تەرپىدىن 2007-10-15 07:53 دە ]