سەھەردە يۈز بەرگەن ھادىسە

                           
2 – ئاينىڭ 27 – كۈنى سەھەر سائەت ئىككىدىن ئاشقان چاغ . شوپۇر تۇرسۇن كىرا پىكىپىنى ھەيدەپ غۇلجا شەھىرى ستالىن كوچىسىدا شىمال يۆنىلىشىگە قاراپ كېتىۋاتاتتى. تۇيۇقسىز ئۇنىڭ بىلەن بىر يۆنىلىشتە كېتىۋاتقان بىر پىكاپ تېز سۈرئەتتە ئۇنىڭ پىكىپىنى يانداپ ئۆتۈپ كەتتى. «قانداق قارام شوپۇر بۇ؟» دېدى تۇرسۇن ۋە دەرھال پىكاپ نومۇرىغا قارىدى.«新F-67030»ئۇ بۇ نومۇرنى ئوقۇپ تۇرۇشىغا پىكاپ غۇلجا شەھەرلىك توك بىلەن تەمىنلەش شىركىتى ئالدىدا بىر ئادەمنى سوقۇۋەتتى – دە، ئوڭغا ئايلىنىپ قېچىپ كەتتى.

مۇئاۋىن ئەترەت باشلىقىغا كەلگەن ئۇچۇر

سەھەر سائەت ئۈچ بولغان چاغ. غۇلجا شەھەرلىك ج خ ئىدارىسى قاتناش ساقچى چوڭ ئەترىتىنىڭ مۇئاۋىن باشلىقىنىڭ يانفونى سايراپ كەتتى.ئىشخانىدا نۆۋەتچىلىك قىلىۋاتقان مۇئاۋىن ئەترەت باشلىقى يانفوننى ئالغاندا، قارشى تەرەپ «新F-67030»نومۇرلۇق بىر پىكاپ شوپۇرىنىڭ ھادىسە سادىر قىلىپ قېچىپ كەتكەنلىكىنى مەلۇم قىلدى.

قولدىن – قولغا ئۆتكەن پىكاپ

غۇلجا شەھەرلىك ج خ ئىدارىسى قاتناش ساقچى چوڭ ئەترىتى ۋەقە بۆلۈمىدىكى خادىملار دەرھال نەق مەيدانغا كېلىپ تەكشۈرۈپ ھېچقانداق يىپ ئۇچىغا ئېرىشەلمىدى. زىيانلانغۇچىدىن ئەھۋال ئىگىلەش ئۈچۈن دوختۇرخانىغا بارغاندا ئۇ ھۇشسىز بولۇپ، دېلوغا مۇناسىۋەتلىك يىپ ئۇچى بىلەن تەمىنلەپ بېرەلمىدى.

مۇئاۋىن ئەترەت باشلىقى بۇ دېلونى تەكشۈرۈشكە مەسئۇل قاتناش ساقچىلىرىغا دەرھال «新F-67030» نومۇرلۇق پىكاپنىڭ نوپۇسىنى تەكشۈرۈشنى ئورۇنلاشتۇردى. كومپيۇتېردا تەكشۈرۈلگەندە پىكاپنىڭ قورغاس ناھىيىسىدىكى بىرەيلەننىڭ نامىدا ئىكەنلىكى مەلۇم بولدى.قاتناش ساقچىلىرى دەرھال قورغاس ناھىيىسىگە بېرىپ كومپيۇتېردا تىزىملانغان ئادرېس بويىچە پىكاپنىڭ ئىگىسىنى تاپتى.ئۇ كىشى بۇ پىكاپنى چىڭسىخوزىدىكى بىرەيلەنگە سېتىۋەتكىنىگە خېلى بولغانلىقىنى ئېيتتى. قاتناش ساقچىلىرى ئۇ ئېيتىپ بەرگەن ئادرېس بويىچە چىڭسىخوزىدىكى كىشىنى تاپقاندا، ئۇ پىكاپنى 65 – تۇەندىكى بىرەيلەنگە سېتىۋەتكەنلىكىنى ئېيتتى. تەكشۈرۈشتە بۇ پىكاپنىڭ قولدىن – قولغا ئۆتۈپ ئىلگىرى – كېيىن بولۇپ 10 ئادەمگە سېتىلغانلىقى مەلۇم بولدى.

دەل بۇ چاغدا بىرەيلەن ھادىسىگە مۇناسىۋەتلىك پىكاپنى غۇلجا شەھىرىدە تانسىخانا ئاچىدىغان بىرەيلەننىڭ ھەيدەپ يۈرگەنلىكىنى كۆرگەنلىكىنى مەلۇم قىلدى. مۇئاۋىن ئەترەت باشلىقى بۇ يىپ ئۇچىغا ئاساسەن 2 – ئاينىڭ 28 – كۈنى چۈشتىن كېيىن بۇ تانسىخانىغا كەلدى.  بۇ تانسىخانا كېچىدە تىجارەت قىلىدىغان بولغاچقا، تاقاقلىق ئىدى. ئۇ دەرھال بۇ تانسىخانىنى باشقۇرۇش تەۋەلىكىدىكى دۆڭمەھەللە ساقچىخانىسىغا كىرىپ ئەھۋال ئىگىلەپ، تانسىخانا خوجايىنىنىڭ يانفون نومۇرىنى تاپتى.

«ھادىسە سادىر قىلمىدىم»

ماتېماتىكا 11:07 دە تەستىقلىدى

مۇئاۋىن ئەترەت باشلىقى تانسىخانا خوجايىنىغا تېلېفون قىلىپ ئۇنىڭ ھازىر قەيەردە ئىكەنلىكىنى سورىغاندا، ئۇ ئاغىنىسىنىڭ ئۆيىدە ئىكەنىكىنى ئېيتتى. مۇئاۋىن ئەترەت باشلىقى ئۇنىڭغا مۇھىم ئىش بارلىقىنى ئېيتىپ ئۇنى سىرتقا چاقىرىپ كۆرۈشتى.

- سېنىڭ سانتانا پىكىپىڭ بارمۇ؟

- بار، نېمە بولدى؟ - سورىدى خوجايىن ھەيرانلىق بىلەن.

- نومۇرى قانچە ؟

- «新F-67030»

- ھازىر پىكىپىڭ قەيەردە؟

- رېمونتخانىدا ...

- بۇ پىكاپ بىر قاتناش ھادىسىسىگە چېتىشلىق بولۇپ قالدى .

- مەن ھادىسە سادىر قىلمىدىم.

مۇئاۋىن ئەترەت باشلىقى ئۇنىڭدىن ئىچكىرىلەپ ئەھۋال ئىگىلىگەندە، ئۇ:

- پىكاپنى ئىنىم ھەيدەپ تۇرۇۋاتقان، ئۇنىڭ ئېيتىشچە، بۇزۇلۇپ قېلىپ رېمونتخانىغا ئاپىرىپ قويۇپتۇ ، - دېدى.

- ئىنىڭ ھازىر قەيەردە ؟ - ئەترەت باشلىقىنىڭ بۇ سوئالىدىن كېيىن خوجايىن ئۇنى ئىنىسىنىڭ يېنىغا باشلاپ باردى. خوجايىننىڭ ئىنىسى پاكىت ئالدىدا قاتناش ھادىسىسى سادىر قىلىپ قېچىپ كەتكەنلىك قىلمىشىنى ۋە پىكاپنى غۇلجا ناھىيىسىدىكى بىر تۇغقىنىنىڭ قورۇسىغا يوشۇرۇپ قويغانلىقىنى ئىقرار قىلدى. قاتناش ساقچىلىرى شۇ كۈنىلا پىكاپنى جىنايەت گۇماندارى يوشۇرۇپ قويغان جايدىن تاپتى .

تەكشۈرۈش ئارقىلىق شوپۇرنىڭ ھاراق ئىچىپ، سۈرئەتنى نورمىدىن ئاشۇرۇپ ھەيدەپ بۇ ھادىسىنى سادىر قىلغانلىقى ئېنىقلاندى.بۇ ھادىسىدە زەخىملەنگۈچىنىڭ بەل قازان ئومۇرتقىسى سۇنغان، باش قىسمى زەخىملەنگەن بولۇپ زەخمىسى ئېغىر زەخمە، دەپ بېكىتىلدى.

3 – ئاينىڭ 1 – كۈنى جىنايەت گۇماندارى غۇلجا شەھەرلىك ج خ ئىدارىسى قاتناش ساقچى چوڭ ئەترىتى تەرىپىدىن توختىتىپ قويۇلدى.

ھازىر بۇ دېلو تېخىمۇ ئىچكىرىلەپ تەكشۈرۈلمەكتە.









شىنجاڭ قانۇنچىلىق گېزىتىدىن ئېلىندى


[ بۇ يازما matimatika تەرپىدىن 2007-10-10 23:42 دە ق ]