ھېسسىيات ئوغرىسى


قىلدى پۇشايمان ھېسسىيات ئوغرىسى، ئىنساپ، دىيانەت ئىدى توغرىسى!



م X X 24 ياشقا كىرپ قالغان، چىرايى تۈزۈك، گەپ – سۆزى جايىدا چوكان ئىدى. ئۇ خەنزۇ تىلىدا ئوقۇغانلىقتىن، خەنزۇ تىلى سەۋىيىسى ئالاھىدە ياخشى، مۇناسىۋەت، مۇلازىمەتكە ماھىر ئىدى. 2005 – يىلى 8 – ئايدا، تەقدىر ئۇنى كورلا شەھىرىدىن قەشقەر شەھىرىگە سۆرەپ كەلدى. ئۇ تەلىيى ئوڭدىن كېلىپ، قەشقەر شەھەر «جاڭجاگاڭ» كىچىك كۆڭۈل ئېچىش تانسىخانىسىغا مۇلازىمەتچى بولۇپ تاللاندى. ئىش ھەققى يامان ئەمەس بولغاچقا، ئۇ تېزلا كۆنۈپ قالدى. لېكىن كۆپرەك پۇل تېپىشنىڭ كويىدىلا يۈردى. ئۇ شۇ  يىلى 9 – ئاينىڭ مەلۇم بىر كېچىسى تانسىخانىغا كۆڭۈل ئاچقىلى كىرگەن ۋاڭ X X ئوچۇق – يورۇق، قىزغىن ئادەم بولۇپ، مەلۇم چېگرا مۇداپىئە گازارمىسىدا ھەربىي ئىدى. م X X ئۇنىڭ بىلەن بىردەمدىلا يېقىن بولۇپ كەتتى. شۇنىڭ بىلەن ئۇ، بۇ ئادەمنىڭ بىللە ئېلىپ كىرگەن دوستىغىمۇ يەنە بىر قىزنى تونۇشتۇرۇپ قويدى. بۇ  تۆت كىشى تولىمۇ قىزغىن پاراڭلاشتى. شۇ چاغدا ۋاڭ X X م X X تىن ئىلگىرىكى ئىشلىرىنى سورىدى.

-ئىقتىسادىي قىيىنچىلىق تۈپەيلىدىن ئوقۇيالماي، ئىستىقبالىم نابۇت بولغان بىر بىچارىمەن ! – دېدى م X X ھەسرەت بىلەن، - ئەسلىدە مەن بەك ياخشى ئوقۇغان ئىدىم. يۇقىرى نومۇر بىلەن جېجياڭ ئۇنىۋېرسىتېتىغا ئۆتكەن ئىدىم، ئۇ يەرگە بېرىپ بىر مەزگىل ئوقۇدۇم، كېيىن ئوقۇش پۇلىنى تۆلىيەلمەي ئوقۇشتىن توختاپ قايتىپ كەلدىم.

- سىزنىڭ قايتا ئوقۇش ئارزۇيىڭىز بارمۇ ؟ - دەپ سورىۋىدى ۋاڭ X X ھېسداشلىق قىلىپ.

- بار، لېكىن مەندە نەدىمۇ ئوقۇغىدەك پۇل بولسۇن؟

- راست ئوقۇغىڭىز بولسا، مەن ياردەم قىلاي.

-سىز نېمە دېگەن ياخشى، ئەجەپ كۆڭلىڭىز ياخشى ئادەمكەنسىز، سىزنى ئاكا قىلىۋالسام بولغىدەك؟

- بولىدۇ.

- پۈتۈشتۇق ئەمىسە!

- پۈتۈشتۇق !

ئۇلار قول بېرىشتى ۋە تېلېفون نومۇرلىرىنى يېزىۋېلىشتى. م X X ۋاڭ X X نىڭ دەۋىتى بىلەن تانسىخانىدا ئىشلىمەيدىغان بولدى. ئۇلار كۆڭلى بىر – بىرىگە مايىل بولۇپ، بىر – بىرىگە يېقىپ قالغاندەك قىلاتتى.

ئەتىسى ۋاڭ X X م X X كە تېلېفون بېرىپ كىنو كۆرۈش تەكلىپىنى بەردى، ئۇ قىزغىنلىق بىلەن ماقۇل بولدى. ئۇلار مەلۇم جايدا كىنو كۆرگەندىن كېيىن، ۋاڭ X X م X X كە مەلۇم مېھمانسارايغا بېرىپ بىللە يېتىش تەكلىپىنى قويدى. بۇ چاغدا م X X مىجەزىم يوق، دەپ رەت قىلدى. ۋاڭ X X ئۇنىڭ قولىغا 500 يۈەن تۇتقۇزۇپ قويدى. ئەتىسى يەنە ۋاڭ X X تېلېفون بېرىپ، م X X بىلەن كۆرۈشۈپ، مەلۇم مېھمانسارايغا كىردى. شۇ يەردە ۋاڭ X X م X X نىڭ مەكتەپ بىلەن قايتا ئالاقىلىشىپ بېقىشىنى، مەكتەپ قوبۇل قىلسا، قايتىپ بېرىپ ئوقۇشىنى، ئۇنىڭ ئوقۇش پۇلىنى بېرىدىغانلىقىنى ئېيتتى. م X X ۋاڭ X X كە ئۇچۇر يوللاپ مەكتەپنىڭ خەۋىرىنى بېرىدىغان بولدى، لېكىن ئەتىسى ئۇ ئۇنداق قىلمىدى. ۋاڭ X X ئۆزى ئۇچۇر يوللاپ :«مەكتەپ بىلەن ئالاقىلەشتىڭمۇ؟ » دەپ سورىدى. م X X :«ئۇقۇشتۇم، ئوقۇش پۇلى ئۈچۈن 3800 يۈەن تاپشۇرىدىغان بولدۇم» دەپ جاۋاب قايتۇردى. ۋاڭ X X ئەتىسى ئۇ تەلەپ قىلغان پۇلغا 3000 يۈەن قوشۇپ، 6800 يۈەن ئاپىرىپ بەردى ۋە :«ھەر ئايدا 300 يۈەندىن تۇرمۇش پۇلى بېرىمەن » دېدى.

شۇنىڭدىن كېيىن، م X X قەشقەردىن غايىپ بولۇپ، ئاتالمىش «جېجياڭ ئۇنىۋېرسىتېتى» گە يۈرۈپ كەتكەن ئوقۇغۇچى بولدى. ۋاڭ X X ئۇنىڭ يىراقتا تۇرۇپ سېغىپ ئىچىدىغان «سېغىن » كالىسىغا ئايلاندى. م X X پات – پات ئۇنىڭغا ئۇچۇر يوللاپ، بانكا كارتا نومۇرىنى دەپ بېرىپ، پۇل سېلىشنى جېكىلەپ تۇردى. بىر قېتىم ئۇ مۇكاپاتلىق چەك تارتسا، 1 – دەرىجىلىك مۇكاپاتقا 130 مىڭ يۈەنلىك «POLO» ماركىلىق ئالىي دەرىجىلىك ئاپتوموبىل چىققانلىقى، ئاپتوموبىلنىڭ رەسمىيەت ھەققى ئۈچۈن ئۆزى تۆلىگەن پۇلنى باشقا بىرسىنىڭ ئېلىپ قاچقانلىقى، شۇڭا بۇنىڭ ئورنىغا شىركەت 238 مىڭ يۈەنلىك «passat» ماركىلىق ئاپتوموبىل بېرىدىغانلىقىنى، بۇنىڭ رەسمىيىتىگە پۇل ئەۋەتىپ بېرىشنى تەلەپ قىلدى. يەنە بىر قېتىم مەكتەپ ئۇيۇشتۇرغان ئىمتىھاندا 1 –دەرىجىلىك بولغانلىقىنى، ئەمدى باشقا جايدىكى ئىمتىھانغا قاتنىشىدىغانلىقىنى، شۇڭا پۇل تاپشۇرۇشى زۆرۈرلۈكىنى، ئانىسى ئۆلۈپ كەتكەچكە، پۇلدىن بەك قىسىلىپ قالغانلىقىنى، دەرھال پۇل ئەۋەتىشىنى تەلەپ قىلدى.يەنە بىر قېتىم ئۇ :«ئاتا –ئانامدىن قالغان ئۆينى ئاكام ئىگىلىۋالغانىدى، ھازىر ھۆكۈمەت ئۆينى چېقىۋەتتى، ئورنىغا ئۆي بەرمەكچى ئىدى، سىز كىملىكىڭىز بىلەن ھەربىيلىك كىنىشكىڭىزنىڭ ئەسلى نۇسخىسىنى ئەۋەتىپ بەرسىڭىز، ئۆينى سىزنىڭ نامىڭىزدا بېجىرىپ قويىمەن، ئۆينى ئاز بولغاندىمۇ 100 مىڭ يۈەنگە ئالاتتى» دەپ ئۇچۇر يوللىدى ...

شۇنداق قىلىپ، م X X 2005 – يىلى 9 – ئايدىن 2006 – يىلى 2 – نويابىرغىچە 26 قېتىم ۋاڭ X X دىن ئالداپ پۇل ئالدى. ۋاڭ X X م X X نىڭ مەكتەپتە ئوقۇماي، ئۆزىدىن پۇل ئېلىپ ئالداپ يۈرگەنلىكىنى ئېنىقلاپ، قەشقەر شەھەرلىك ج خ ئىدارىسىگە م X X نىڭ ئالدامچىلىقى ئۈستىدىن ئەرز سۇندى. م X X 2006 – يىلى 10 – نويابىر كورلا شەھىرىدە قولغا چۈشتى. بىراق ئۇ ۋاڭ X X دىن ئالداپ ئېلىۋالغان پۇللارنى خەجلەپ تۈگەتكەچكە، پەقەت 26 مىڭ يۈەنلىك بىر ئاپتوموبىل قايتۇرۇۋېلىندى.

م X X بۇ يىل يانۋاردا قەشقەر شەھەرلىك خەلق تەپتىش مەھكىمىسى تەرىپىدىن قانۇن بويىچە قولغا ئېلىندى، ئۇ سوراق جەريانىدا ۋاڭ X X دىن جەمئىي 182 مىڭ 900 يۈەن نەق پۇلنى ئالداپ ئېلىۋالغانلىقىنى ئىقرار قىلدى.





ئۈرۈمچى كەچلىك گېزىتىدىن ئېلىندى.


خۇشخۇي تەستىقلىدى