سۇئال:
ئەسسالامۇ ئەلايكۇم؛ :«قۇرىئان كەرىمنى، ھەدىسنى چۇشەنمەيدىغان كىشى بىر نەرسىنىڭ ئۇستىدىن كىشلەرگە پەتىۋا بىرىشكە قەتىئى رۇخسەت قىلىنمايدۇ. ئەگەر پەتىۋا بەرسە بارلىق جىنايەتنىڭ ھەممىسى شۇپەتىۋا بەرگۇچىگە بولىدۇ».دىگەننى ئاڭلىدىم. لېكىن دىىنى ئىلىمدا كامالەتكە يەتكەن، قۇرئان كەرىمنى تۇلۇق (يېشەلەيدىغان كىشلەرنىڭ) ئېغىزىدىن ئاڭلىغان ياكى شۇلار چىقارغان پىلاستىنكىلاردىن ئاڭلىغان سۆزلەرنى ياخشى نىيەت بىلەن كىشلەرگە دېسەكمۇ گۇناھ بولامدۇ؟ بۇمۇ پەتىۋا بەرگەنلىك بولامدۇ؟ نېمە ئۇچۇن؟ نېمە ئۇچۇن گۇناھ بولىدۇ؟
جاۋابى:
ۋە ئەلەيكۇم ئەسسالام ۋە رەھمەتۇللاھى ۋە بەرەكاتۇھۇ: پەتىۋا دېگەن ئاللاھ تائالاغا ۋەكىللىك قىلشتۇر، شۇڭا پەتىۋا بېرىدىغان كىشىدە دىنىي ئەھكامنى تولۇق بىلىشتىن سىرت، ۋەزىيەت ۋە جەمئىيەتنى ياخشى چۈشىنىش شەرت قىلىنىدۇ، ئالىملارنىڭ پەتىۋالىرىنى ئاڭلىغىنىنى ھىكايە قىلىش تەرىقىسىدە سۆزلەپ بەرسە بولىدۇ، لېكىن بىرسىگە پەتىۋا بەرسە بولمايدۇ، چۈنكى پەتىۋا بەرگەندە دىققەت قىلىدىغان نۇرغۇن ئامىللار بار، پەتىۋا بەرگەن ئالىم ئۇنىڭغا دىققەت قىلىپ ئاندىن پەتىۋا بېرىدۇ، جاھىل كىشى سۇئال بىلەن جاۋابىنىلا ئاڭلاپ پەتىۋا بەرگەن كىشى دىققەت قىلغان بىرەر ئامىل ياكى بىرەر ئېغىز سۆزنى چالا ئاڭلىسا مەسىلە ئوڭتەي-توڭتەي بولۇپ كېتىدۇ، شۇڭا تەبلىغ ياكى ۋەز ئاڭلىغانلار مەن تەبلىغدە پالانى ئالىمنىڭ مۇنداق دېگەنلىكىنى ئاڭلىدىم، دېگەن تەرىقىدە ئالىمنىڭ سۆزىنى تولۇق ھىكايە قىلىپ بەرسە بولىدۇ، لېكىن پەتىۋا بېرىشىگە قەتئىي بولمايدۇ، بۇ ئېنىق ھارام. بىلىمسىز پەتىۋا بەرگەن كىشى پەيغەمبەر سەللاللاھۇ ئەلەيھى ۋە سەللەمنىڭ سەھىھەينىكى ھەدىسىدىكى : ((ئىلىمسىز پەتىۋا بېرىپ ئۆزىمۇ ئازغان باشقىلارنىمۇ ئازدۇرغان) جاھىل يېتەكچىلەر قاتارىغا كىرىدۇ.
بۇنىڭ يەنە تىپىك بىر مىسالى شۇكى ھەزرىتى جابىر رەزىيەللاھۇ ئەنھۇ مۇنداق رىۋايەت قىلىدۇ: بىز سەپەرگە چىققان ئىدۇق، بىرىمىزنىڭ بېشىغا تاش تېگىپ يېرىلىپ كەتكەن ئىدى، ئۇ ئۇخلاپ جۇنۇب بولۇپ قېلىپ ھەمراھلىرىدىن: ماڭا تەيەممۇم قىلىشقا رۇخسەت بارمۇ؟ دەپ سورىغاندا ئۇلار: سەن سۇنى ئىشلىتەلەيدىغان تۇرساڭ بىز ساڭا رۇخسەت بار دەپ قارىمايمىز، دەپ جاۋاب بەرگەن، شۇنىڭ بىلەن ئۇ غۇسلى قىلىپ ئۆلۈپ كەتكەن، بىز پەيغەمبەر سەللاللاھۇ ئەلەيھى ۋە سەللەمنىڭ قېشىغا كەلگەندە ئۇنىڭغا بۇ ۋەقەلىك خەۋەر قىلىنغاندا ئۇ مۇنداق دېدى: ((ئۇلار ئۇنى ئۆلتۈرىۋېتىپتۇ، ئاللاھ ئۇلارنىڭ جاجىسىنى بەرسۇن! ئۇلار بىلمىسە سورىسا بولمامتى؟ بىلمىگەننىڭ دورىسى سوراشتۇر، ئۇ جاراھىتىنى تېڭىۋېلىپ تېڭىق ئۈستىگە مەسھى قىلسا، باشقا بەدىنىنى يۇيسا كۇپايە قىلاتتى ئەمەسمۇ؟)( ئەبۇ داۋۇد رىۋايەت قىلغان)
ئەمما ھەدىس ۋە ئايەتنى ئاڭلىغان پېتى يەتكۈزسە مەنىسىنى بەك چۈشەنمىسىمۇ ئەينەن يەتكۈزسىلا ساۋابلىق ئىشتۇر.
ۋەللاھۇ ئەئلەم.

ئىسلام ئاۋازى تور بېتى
2007-1- 11 مىلادىيە


[ بۇ يازما ئابدۇقادىر تەرپىدىن 2007-09-15 15:11 دە ق ]