كەچۈر ساڭا بەخت تىلىيەلمەيمەن

سەن كەتتىڭ . يۈرۈكۈمنى يەنە بىر قېتېم ئاچچىق ئازاپ ، ئۈكۈنۈش ، ھەسرەت - پۇشايمان بىلەن ئۆرتەپ ، ماڭا ئۆمۈرلۈك ھىجراننى ئارتىپ ، مەغرۇرلارچە قەدىملىرىڭ بىلەن  خوشمۇ دىمەي كەتتىڭ . قېنى ماڭا بەرگەن ۋەدە - قەسەملىرىڭ ؟ قېنى مەن كۈتكەن شىرىن كۈنلەر ؟   كىتىۋاتىمەن . ھارغىن ھالسىز قەدەملىرىم بىلەن  ئۈنسىز - ئۈمۈتسىز كىتىۋاتىمەن . چانىقىمغا سىغمىغان ئاچچىق ياش مەڭزىمنى يۇيۇپ ئاستا - ئاستا سىرغىماقتا !!!   سىنى بارلىقىم بىلىپ پۈتۈن ۋۇجۇدۇم بىلەن سۆيگەن ئىدىم . سىنى ياخشى كۈرەتتىم . سىنىڭسىز ھاياتىمنى تەسەۋۋۇر قىلالمايتىم . سەن مىنىڭ ، بەخىتم ، شاتلىقىم ، ئارمىنىم  ئىدىڭ .   ئايلىنىپ كونا جايغا كەلدىم . بىز تالاي كېچە ئايلانغان چىغىر يول ئاچچىق تولغانماقتا .  بىز سۇ چېچىشىپ ئوينىغان ئۆستەڭ سۈيى ئەلەم بىلەن ئۈكسىمەكتە . بىز سايىدىغان ، كەلگۈسىمىز توغرىسىدا تاتلىق خىياللارنى سۈرگەن مەجنۇنتال خۇرسىنماقتا . بىزنىڭ سۆيگۈمىزگە گۇۋا بولغان تۇلۇنئاي ، لەۋلىرى تاتارغان ھالدا باش چايقىماقتا . چاچلىرىڭنى لەرزان ئۇچۇرغان ، بىزنى شىرىن تۇيغۇلار قوينىدا ئەللەيلەتكەن ئەركە شامال ئاچچىق تىترىمەكتە . دوسلىرىمنىڭ ئۈنى چۈشۈپ ، دۈشمەنلىرىم مەغرۇر چۇقان سېلېشماقتا . ئويلىماپتىمەن . سەندىن ئايرىلىپ قېلىشنى ، مىنى بۇنچىلا ئازاپ بىلەن تاشلاپ كىتىشىڭنى پەقەت ئويلىماپتىمەن . مىنىڭ غەمسىز كۈنلىرىمنى بەربات قىلىپ ، ئۈمۈت گۈللىرىمنى چەيلەپ  ، مەغرۇر قەددىمنى سۇلدۇرۇپ ، يۈرۈكۈمنى چۇل - چۇل قىلىپ كىتىپ قېلىشىڭنى  . سىنىڭ بۇنچىلا باغرى تاش ۋاپاسىزلىقىڭنى ئويلىماپتىمەن .    ئاشۇ كۈن  سەن كۆز ئالدىمغا باشقا بىراۋنىڭ قوللىرىنى چىڭ تۇتقان ،  بېشىڭنى مۈرىسىگە قۇيۇپ ئالدىمدىن ئۆتكەن چېغىڭدا ، مەن بارلىقىمنى يوقاتتىم . يەر شارى گۇيا ئۆز ئۇقىدا توختاپ قالدى . كۆزلىرىم بۇلارنىڭ بىر قاباھەتلىك چۈش بۇلۇپ قېلىشىنى شۇنچىلىك ئۈمۈت قىلدىم . ئەمما بۇ بىر رىئاللىق ، مەن ئەڭ قورقىدىغان پەقەت ئۈمۈت قىلمايدىغان رىئاللىق ئىدى . چىدىمىدىم . كۆزلىرىمدىن  ئازاپ - ھەسرەت كەلكۈنى كۆز ياش بۇلۇپ تۈكۈلدى . پۈتۈن بەدىنىم ھالسىزلىنىپ تۇرغان ئورنۇمدا ئولتۇرۇپ قالدىم . شۇندىن بۇيان  ھايات مەن ئۈچۈن مەنىسىنى يوقاتتى . ئۆزەمنى تاشلىۋەتتىم . نۇرىنى يوقاتقان كۆزلىرىم ، چۈشكۈنلۈككە تولغان چىرايىم ، ئۈسۈپ كەتكەن ، ئېلېنمىغىلى خېلى بولغان چاچ - ساقاللىرىم . كىر پۇرلاشقان  كىيىملىلىرىم ... ئاھ ... خۇدا !!! مەن ساڭا نىمە قىلغان بولغىيتىم ؟ نىمىشقا ماڭا بۇنداق قىلىسەن ؟ ئۇنىڭسىزمۇ يۈرۈكۈم  قان - قان ئىدىغۇ ؟    سەن ئامراق ناخشىلارنى ئاڭلىدىم . سەن ياقتۇرىدىغان كىتاپلارنى ۋاراقلىدىم . سەن بىلەن چۈشكەن سۆرەتلەرنى ئۈكسۈپ - ئۈكسۈپ تۇرۇپ باغرىمغا باستىم . ھەسرەتلىرىم يەنە دۇلقۇنلىدى .    ئاڭلىسام توي قىلماقچى بۇپسەن . بۇنى بىلگەن چېغىمدا ئارقامغا يىقىپ چۈشۈشىمدىن  ئۆزەمنى ئاران تۇتىۋالدىم . ئەمدى سەن ماڭا تەئەللۇق ئەمەسسەن . مەن تۇتقان قوللىرىڭنى ئەمدى باشقا بىراۋلار تۇتىدۇ . مەن پۇراپ قانمىغان چاچلىرىڭنى ئەمدى باشقا بىراۋلار سىلايدۇ . مىنى مۇھەببەت ئالىمىگە باشلاپ كىرگەن شەھلا كۆزلىرىڭ ئەمدى باشقا بىراۋلارنىڭ ئالىمدە ...مەن قۇچاغلىغان تەنلىرىڭ ئەمدى باشقا بىرىگە مەنسۇپ . يەنە چىدىمىدىم . باشقىلارنىڭ نەزىرىدە بىر يېغلاڭغۇ يىگىتكە ئايلاندىم . تاشلىۋەتكىلى ئۈچ يىل بولغان تاماكا ئۇزۇن تۈنلەردىكى بىردىنبىر ھەمرايىمغا ئايلاندى . ئاچچىق ئىسنى ھەر - بىر پۈۋلىگىنىمدە ، ۋۇجۇدۇم ئاشۇ ئىسقا ئوخشاش تولغاندى . دوسلىرىمنىڭ تەسەللىلىرى  ماڭا كار قىلمىدى . ئۆيگە يالغۇز بىكىنىۋېلىپ خىياللارغا غەرىق بولغىنىم بولغان ... بۈگۈن ماڭا ئۇچۇر قىلىپ « بەخىتلىك بۇلۇڭ . تۇرمۇشىڭىزنى قايتىدىن باشلاڭ » دەپسەن . ئېيتقىنا قانداق باشلايمەن ؟ قانداق بەخىتلىك بۇلىمەن ؟ مىنىڭ بەخىتىم سەن ئەمەسمىدىڭ ...    ئۇزاق ناھايىتى ئۇزاق ئويلاندىم . تاماكىنى ئەلەم بىلەن چىكىپ ئولتۇرۇپ ، دۈم يېتېۋېلىپ ، كومپىيوتىرىمنى ئېچىپ ، ياڭراتقۇنىڭ بار ئاۋازىنى ئېچېۋېتىپ ناخشا قۇيۇپ تۇرۇپ ئويلاندىم . سەن ئەسلى مىنى ئەزەلدىن ياخشى كۈرۈپ باقماپسەن . مىنى بۇرۇنتىنلا ئالداپ كەپتىكەنسەن . سەندە ۋاپا  - ساداقەت مەۋجۇت ئەمەسكەن . سەن مىنىڭ سۈيۈشۈمگە ، قەدىرلىشىمگە ، ياش تۈكۈشىمگە ئەرزىمەيدىكەنسەن .    قاياقتىندۇر بىر سادا ئاڭلاندى : بولدى بەس بىپەرۋا! ئۈكسۈشلىرىڭنى قوي . ئاچچىق ياشلىرىنىڭنى سۈرتىۋەت . ھايات يەنىلا گۈزەل . دۇنياغا ئۈمۈت بىلەن قارا . ۋاپاسىزلار  ئازاپ چىكىشكە ئەرزىمەيدۇ .    ئورنۇمدىن تۇردۇم . كومپىيوتىرىمدىكى بارلىق سۆرەتلەرىڭنى ،  تېلىفۇنۇمدىكى ئۇچۇرلىرىڭنى  پاك - پاكىز ئۈچۈرىۋەتتىم . ئەمدى سىنى ئويلاپ ئاۋارە بولمايمەن . سەن ئۈچۈن ئازاپ چەكمەيمەن . تەڭرىگە  ، سەندىن - سەندەك بىر ۋاپاسىزدىن بالدۇرراق قۇتۇلغانلىقىم ئۈچۈن ، ھەمدۇ - سانا ئېتىمەن . لىكىن كەچۈر ! ساڭا بەخىت تىلىيەلمەيمەن ...

كۆرۈلۈشى:604

قوشۇلغان ۋاقتى:2012/1/18 16:48:09

يوللىغۇچى ئەزا: