« ياق » دېيىشنىمۇ ئۆگىنىۋېلىڭ

گۈلجەننەت جاپپار تەرجىمىسى ياش بۇغالتىر شياۋۋاڭ  خىزمەتكە قاتنىشىپ ئۇزاق ئۆتمەي بېشىنىڭ قاتتىق ئاغرىيدىغان بولۇپ قېلىۋاتقانلىقىنى ھېس قىلدى ، چۈنكى باشلىقى ھە دېسە ئۇنىڭغا ئورۇنسىز تەلەپلەرنى قويۇپ تۇرىۋالاتتى ، بولۇپمۇ ئۇنى شىركەتنىڭ قەرەللىك باج ئوغۇرلاش ۋە باجدىن قېچىش ئىشلىرىغا بويرۇيتتى ، بۇنىڭدىن قانداق قىلارىنى بىلمەي قالغان شياۋۋاڭ ھاممىسىغا خەت يېزىپ قانداق قىلىشى كېرەكلىكىنى ئېيتتى ، غەلىتە يېرى خەت ئۇنىڭغا يەنە قايتىپ كەلدى ۋە بىر ھەپتىدىن كېيىن ھاممىسى ئۇنى ئىزدەپ كەلدى . - بۇمۇ بولغىنى ، يۈز تۇرانە تۇرۇپ سۆزلەشسەك تېخىمۇ ياخشى ئەمەسمۇ ؟دەپ ئويلىدى شياۋۋاڭ ھەمدە ھاممىسىنى سىرتقا تاماققا تەكلىپ قىلدى . بازارنى بىردەم ئايلانغاندىن كېيىن ھاممىسى ئۇنى بىر ھەشەمەتلىك تاماقخانىغا باشلاپ كىردى . ئۇ يەرگە كىرىش بىلەن تەڭ شياۋۋاڭنىڭ كۆڭلى دەككە – دۈككىگە چۈشتى ، چۈنكى ئۇنىڭ يانچۇقىدا پەقەت 50 يۈەنلا باربولۇپ بۇ پۇلغا بۇ يەردىن بىر چىنە چاي ئىچكىلىمۇ بولمايتتى ، قانداق قىلىش كېرەك ؟ -سېنىڭ نېمە يېگۈڭ بار ؟ دەپ سورىدى ھاممىسى . - ئىختىيارىڭ ، نېمە بولسا بولىۋېرىدۇ ،شياۋۋاڭ دۇدۇقلاپ تۇرۇپ شۇنىلا دىيەلىدى . ئويلىمغان يەردىن ھاممىسى بۇ ھەشەمەتلىك تاماقخانىدىكى ئەڭ قىممەت سەيدىن ئۈچنى بۇيرۇتتى ،سەيلەر تارتىلغاندا شياۋۋاڭغا بۇ سەيلەر ئازراقمۇ تېتىمىدى ، ئەكسىچە كۆڭلىدە ھېساباتنى قانداق قىلىشنىلا ئويلايتتى . ھېسابات قىلىدىغان ۋاقىت ئاخىرى يېتىپ كەلدى ، مۇلازىمەتچى ئېلىپ كەلگەن ھېسابات تالونىنى كۆرۈپ شياۋۋاڭنىڭ يۈزى قىزىرىپ كەتتى ، ھاممىسى جىمجىت ھالدا ئۇنىڭغا بىردەم قاراپ تۇرغاندىن كېيىن پۇل چىقىرىپ ھېسابات قىلىۋەتتى ۋە شياۋۋاڭغا : « بالام ، نېمىشقا تاماق بۇيرۇتقان ۋاقىتتا ياق ! دىمەيسەن ؟ مەن سېنىڭ ياق دېيىشىڭنى كۈتەتتىم ، شۇنى بىلىشىڭ كېرەك ، ئەگەر قارشى تەرەپنىڭ تەلىپى سېنىڭ كۆتۈرۈش كۈچىڭدىن ئېشىپ كەتكەن ۋاقىتتا قەيسەرلىك بىلەن « ياق » دېيىش ئاقىلانە تاللاش ھېسابلىنىدۇ ، مېنىڭ ساڭا جاۋاپ خەت يازماي ئۆزۈم سېنى ئىزدەپ كېلىشىمنىڭ سەۋەبىمۇ ساڭا بۇ ھەقىقەتنى ھېس قىلدۇرۇش » دېدى .  بۇ ۋاقىتتا شياۋۋاڭ نۇرغۇن ئىشلارنى چۈشەنگەندەك بولدى . ئەگەر بەزى ئىشلار ۋە تەلەپلەر بىزنىڭ كۆتۈرۈش كۈچىمىزدىن ئېشىپ كەتكەن ۋاقىتتا قەيسەرلىك بىلەن ئۆز ۋاقتىدا « ياق » دىيەلەيدىغان بولىشىمىز كېرەك ، بولمىسا بىز يىغىشتۇرۇشقا بولمايدىغان ئاقىۋەتكە قېلىشىمىزمۇ مۇمكىن .

كۆرۈلۈشى:3452

قوشۇلغان ۋاقتى:2012/2/28 20:30:41

يوللىغۇچى ئەزا: