گىرمانىيە پۇتبولچىلىقى ۋە تۈرك كۆچمەنلەر !!~( تەھرىرلەندى )

nayil

     ئەسسالامۇ-ئەلەيكۇم !!!~


  
    ھەممىزگە مەلۇم ، يېقىنقى 10 نەچچە يىل مابەينىدە گىرمانىيە پۇتبولچىلىقىدا تۈرك پۇتبولچىلىرىنىڭ ئورنى بارغانسىرى يۇقىرى كۆتۈرۈلۈشكە باشلىدى ۋە گىرمانىيە پۇتبولچىلىقىدىكى يېڭى بىر كۈچلۈك قوشۇنغا ئايلاندى . گىرمانىيەدىكى بۇ تۈرك قەۋمىنىڭ گىرمانىيەدىكى ئورنى ۋە گىرمانىيە پۇتبولچىلىقىغا كۆرسەتكەن تەسىرى توغرۇلۇق قىسقىچە تونۇشۇپ چىقايلى !!~ دېققىتىڭلار تۆۋەندىكى مەزمۇنلاردا بولسۇن !!~


   


    بۇ تېمىنى باشلاشتىن بۇرۇن ‹‹ مارشال پىلانى ›› بىلەن تونۇشۇپ چىقىشنى لايىق تاپتىم .

   مارشال پىلانى  ( The Marshall Plan ) يەنى ياۋروپا گۈللىنىش پىلانى ( European Recovery Program ) دەپمۇ ئاتىلىدۇ . مارشال پىلانى ئىككىنچى دۇنيا ئۇرۇشى ئاخىرلاشقاندىن كېيىن ، ئامرىكىنىڭ ئۇرۇش بۇزغۇنچىلىقىغا ئۇچرىغان غەربى ياۋروپا دۆلەتلىرىگە قارىتا يولغا قويغان ئىقتىسادى ياردەم بېرىش ۋە قايتا قۇرۇلۇشقا قارىتا ھەمدەم بولۇش پىلانىنى كۆرسىتىدۇ . بۇ پىلان ياۋروپا دۆلەتلىرىنىڭ تەرەققىياتىغا چوڭقۇر تەسىر قالدۇرغان گۈللىنىش پىلانى ھېسابلىنىدۇ .
   قايتا گۈللىنىش پىلانى 1947-يىلى 7-ئايدا ھەر قايسى ياۋروپا دۆلەتلىرى ۋەكىللەر يىغىنىدا ئوتتۇرىغا قويۇلغان بولۇپ ، غەربى ياۋرپادىكى ھەر قايسى دۆلەتلەر ‹‹ ئىقتىسادى تەرەققىيات گۇرۇپپىسى ›› غا ئەزا بولۇپ ، پۇل -موئامىلە ، تېخىنىكا ۋە ئەسلىھەلەر بولۇپ 13 مىليارد دوللارلىق ئامرىكا ياردەم مەبلىغىنى قوبۇل قىلغان . بۇ 2006-يىلدىكى 130 مىليارد دوللار بىلەن تەڭ قىممەتتە ئىدى . لېكىن بۇ قاتاردا نەزىرىيە جەھەتتە گىرمانىيە باردەك قىلغان بىلەن ئەمەلىيەتتە گىرمانىيە ئىزچىل ئۇرۇش چىقىمى تۆلەپ ماڭغان . ‹‹ مارشال پىلانى ›› نى مۇشۇنچىلىك توشۇشتۇرۇپ تۇرايلى !!~


   


    ئىقتىسادى ئاستا-ئاستا ئەسلىگە كېلىۋاتقان گىرمانىيە ئالدىنقى ئەسىرنىڭ 60-يىللىرىغا كەلگەندە بىردىنلا ئويغىنىش باسقۇچىغا كىردى . شۇنداقلا زور بىر تۈركۈم ئىشلەمچىلەر قوشۇنىغا مۇھتاج بولدى . دەسلەپكى قەدەمدە ئىتالىيە ، تۈركىيە ، ئىسپانىيە ۋە گىرىتسىيە قاتارلىق دۆلەتلەردىن ئەمگەك كۈچلىرىنى قوبۇل قىلىشنى پىلانغا كىرگۈزدى . 1961-يىلى 10-ئاينىڭ 30-كۈنى گىرمانىيە ۋە تۈركىيە ھۆكۈمىتى ‹‹ ئەمگەك كۈچلىرىنى قوبۇل قىلىش كېلىشىمى ›› تۈزدى ۋە بىرىنچى قەدەمدە 7000 نەپەر تۈركىيىلىك ئەمگەكچى مىيۇنخېنغا يېتىپ كەلدى . لېكىن كېلىشىم شەرتىدە تۈركىيىلىك ئەمگەكچىلەر ( ئىشلەمچىلەر ) 2 يىلدىن كېيىن تۈركىيىگە قايتىشى كېرەك ئىدى . دەسلەپتە بۇ ئەمگەكچىلەر گىرمانىيىدە كۆپ پۇل تېپىپ تۈركىيىگە قايتىپ تۇرالغۇ ۋە ماشىنا سېتىۋېلىش ئارزۇلىرى بىلەن كەلگەنىدى . لېكىن ھەر سائىتىگە 2.28 مارك بولغان مائاشى بۇلارنىڭ بۇ ئارزۇ-ئارمانلىرىنى كۆپۈككە ئايلاندۇردى . بۇ ئەمگەكچىلەر 2 يىللىق كېلىشىم توشقاندا داۋاملىق ئىشلەپ پۇل تېپىش ئويى بىلەن قايتىشقا قوشۇلمىدى . گىرمانىيە ھۆكۈمىتىمۇ بۇ تۈرك ئەمگەكچىلرىنىڭ چىدامچان ۋە ئىشچانلىقىنى ، ئۈگىنىش روھىنىڭ ۋە ئىگەللەش قابىلىيىتىنىڭ يۇقىرىلىقىنى ۋە نۇرغۇن تۈرك ئىشچىلارنىڭ ئاساسلىق تېخىنىكلارغا ئايلانغانلىقىنى كۆزدە تۇتۇپ ، شۇنداقلا تېخىمۇ كۆپ قىممەت يارىتالايدىغانلىقىغا كۆزى يېتىپ ، بۇ بىر تۈركۈم تۈرك ئەمگەكچىلىرىنى قايتۇرىۋېتىشكە كۆزى قىيمىدى . شۇنىڭ بىلەن بۇ تۈرك ئەمگەكچىلىرىنىڭ ‹‹ ئەمگەكچىلەر ئىجازەتنامىسى ›› قەرەلسىز قىلىپ ئۆزگەرتىلدى . 1968-يىلىدىن كېيىن ئىستانبولدىن گىرمانىيەگە قاتنايدىغان پويىز ھەر ئىككى ھەپتىدە بىر قېتىم قاتنايدىغان ھالەتتىن ، كۈندە بىر قېتىم قاتنايدىغان ھالەتكە يەتتى . گىرمانىيىدە ئولتۇراقلاشقان 2 مىليۇن 500 مىڭدىن ئارتۇق تۈرك كۆچمەنلىرىنىڭ ئىچىدە 600 مىڭدىن كۆپرەكى گىرمانىيە گىراژدانىغا ئايلاندى .


   


   1973-يىلىغا كەلگەندە نېفىت كاساتچىلىقى ۋە ئىقتىسادنىڭ چېكىنىشى سەۋەبلىك فىدراتىپ گىرمانىيە ‹‹ سىرىتتىن ئىشلەمچى قوبۇل قىلىش تۈزۈلمىسى ›› نى بېكار قىلدى ۋە سىرىتتىن كەلگەن ئىشلەمچىلەرنىڭ چەككە يەتكەنلىكىنى ئېلان قىلدى . 1982-يىلىغا كەلگەندە گىرمانىيە ۋاقىتلىق زوڭلىسى كىئېر ‹‹ كۆچمەنلەر سانىنى كۆنتىرول قىلىش تۈزۈلمىسى ›› نى ئېلان قىلدى .
   بىرىنچى ئەۋلاد تۈرك ئەمگەكچىلرىدىن ھېسابلىساق ھازىرغىچە 4 ئەۋلات تۈرك كۆچمەنلىرى گىرمانىيەنىڭ ھەر قايسى رايۇنلىرىدا ياشاپ كېلىۋاتىدۇ . لېكىن ئۇلارنىڭ گىرمانىيەگە سىڭىشىش مەسىلىسى تېخى ھەل بولغىنى يوق . شۇ سەۋەبتىن گىرمانىيە تۈركلىرى توپلىشىپ ئولتۇراقلىشىش ھالىتىدە ياشاۋاتىدۇ . كۆپىنچىسىنىڭ تۇرمۇشى بېكىنمە ھالەتتە بولۇپ ، گىرمانىيەدە ياشىغىلى 40 يىلدىن ئاشقان بەزى تۈركلەر ھەتتا نېمىس تىلىدىن بىر ئېغىزمۇ سۆزلىيەلمەيدىغان ھالەت تېخى مەۋجۈت . گىرمانىيەگە نىسبەتەن تۈرك ئەمگەكچىلىرىنىڭ مەدەنىيەت سەۋىيىسى بىر قەدەر تۆۋەن بولۇپ ، گىرمانىيە ئىقتىسادىدا داۋالغۇش بولسا ئەڭ چوڭ زىيانلانغۇچىلار دەل بۇ تۈرك ئەمگەكچىلرى بولۇپ كېلىۋاتىدۇ .  


   


    گىرمانىيەنىڭ ھازىرقى ئىشسىزلىق نىسبىتى %6 گە يېتىدۇ . لېكىن گىرمانىيەدىكى تۈركلەرنىڭ ئىشسىزلىق نىسبىتى %19 تىن  ئاشىدۇ . پايتەخت بېرلىندا ياشاۋاتقان تۈركلەرنىڭ ئىشسىزلىق نىسبىتى بولسا %38 گە يېتىدۇ . تارىخى ۋە مىللەت ئالاھىدىلىكى سەۋەبىدىن گىرمانىيەلىكلەر يەنى نېمىسلارنىڭ باشقا ئەل كۆچمەنلىرىنى ئارىغا ئېلىشى ئاساسەن يوق دىيەرلىك . تۈرك كۆچمەنلىرى بۇنىڭ تىپىك مىسالى بولالايدۇ . ھەتتا 90-يىللانىڭ باشلىرىدا ‹‹ تۈركلەر يوقالسۇن ! ›› شۇئارىدا ئۆز-ئارا توقۇنۇش يۈز بەرگەن ۋە نۇرغۇن تۈركلەر يارىلانغان ۋە ئۆلگەن .


   


     لېكىن ، ھېچكىم شۇنى ئىنكار قىلالمايدۇكى ، گىرمانيەدىكى تۈركلەرنىڭ گىرمانىيە ئىتىسادى تەرەققىياتىنىڭ ئېشىشى ، گىرمانىيە مەدەنىيىتىنىڭ كۆپ خىللىققا يۈزلىنىشىگە كۆرسەتكەن تەسىرى ئىنتايىن زور . گىرمانىيەدىكى ئەڭ ئېغىر ، ئەڭ مەينەت ۋە ئەڭ ھارغىن خىزمەتلەرنى ئاساسەن تۈركلەر ئىشلەپ كەلدى . مەلۇم بىر ئورگاننىڭ سىتاتېسكىسىغا ئاساسلانغاندا ، ئەگەر گىرمانىيەدىكى بارلىق تۈركلەر يۇرتىغا قايىتسا ، گىرمانىيە شەھەرلىرىنىڭ تازىلىق ۋە موھىت ئاسراش ، قاتناش-تىرانسپورت ، قۇرۇلۇش قاتارلىق تۈرلىرى ئاساسەن پالەچ ھالەتكە چۈشۈپ قالىدىكەن . گىرمانىيەدە تۈركلەر ئاچقان كىچىك ۋە ئوتتۇرا تىپتىكى كارخانىلار 50 مىڭدىن ئاشىدىكەن . ھەر يىلى گىرمانىيە ھۆكۈمىتى مانا بۇ تۈرك كارخانىلىرىدىن 4 مىليارد ياۋرو باج كىرىم قىلىدىكەن . پۈتكۈل گىرمانىيەگە قوشقان تۆھپە قىممىتى 40 مىليارد ياۋرودىن ئاشىدىكەن .
   گىرمانىيە زوڭلىسى مېركىل ‹‹ گىرمانىيە-تۈركىيە ئەمگەكچىلەر كېلىشىمى ›› ئىمزالانغانلىقىنىڭ 50 يىللىقىنى خاتىرىلەش يىغىنىدا ، تۈرك ئەمگەكچىلىرىنىڭ گىرمانىيە تەرەققىياتىغا قوشقان ئۆچمەس تۆھپىلىرىنى مۇئەييەنلەشتۈردى ۋە ئۇلارنىڭ گىرمانىيەنىڭ بىر قىسىمى ئىكەنلىكىنى تەكىتلىدى .


   


     خوش ، بىز يۇقىرىدا گىرمانىيەدىكى تۈركلەر بىلەن تونۇشۇپ چىقتۇق . گىرمانىيەدىكى تۈرك ئەمگەكچىلىرى گىرمانىيە ئىقتىسادى تەرەققىياتىغىلا تۆھپە قوشۇپ قالماستىن ، تەنتەربىيە ساھەسىگىمۇ ئۆزگىچە ھۆسۈن قوشۇپ كەلدى . بۇنىڭ ئىچىدە پۇتبول تۈرى ئاساسى سالماقنى ئىگىلەيدۇ .
   بۇ نېمە ئۈچۈن ؟؟ مەن تۆۋەندە بۇ توغرۇلۇق قىسقىچە توختۇلۇپ ئۆتەي !!~

   گىرمانىيدىكى تۈركلەر گىرمانىيەدە ئانچە قارشى ئېلىنمايدىغان قەۋىمنىڭ بىرى . چۈنكى مەن يۇقىرىدا دەپ ئۆتكەندەك گىرمانىيەنىڭ تارىخى مەدەنىيىتى ۋە مىللەت ئالاھىدىلىكى سەۋەبى ، يەنى نېمىسلارنىڭ باشقا ئەل قەۋمىنى ئۆز ئىچىگە ئالماسلىقىدىكى ئەڭ موھىم سەۋەبنىڭ بىرسى .
   يەنە بىر سەۋەبتىن ، گىرمانىيەدىكى تۈركلەر توپلىشىپ ئولتۇراقلاشقان رايۇنلاردىكى مەكتەپلەرنىڭ يەنى مائارىپ تۈزۈلمىسى ۋە ئوقۇتۇش سۈپىتىنىڭ ياخشى بولماسلىقى ، گىرمانىيە تۈرك قەۋمىنىڭ مەدەنىيەت سەۋىيىسىنىڭ تۆۋەن بولۇشىنى كەلتۈرۈپ چىقاردى . شۇ سەۋەبتىن تۈرك ئەمگەكچىلىرى گىرمانىيەدىكى ئاتالمىش ‹‹ ساپاسى تۆۋەن ›› قارشى ئېلىنمايدىغان توپ بولۇپ قالدى . شۇ سەۋەبتىن ، گىرمانىيەدىكى تۈرك قەۋمىدىكى ياش -ئۆسمۈرلەرنىڭ كۆپىنچىسى يەنە شۇ ئاتا ئىزىنى بېسىپ ، گىرمانىيەدىكى ئەڭ ئېغىر ، ئەڭ مەينەت ۋە ئەڭ ھارغىن خىزمەتلەرنىڭ ئىز باسارلىرى بولۇپ قالدى .
   يەنە بىر جەھەتتىن ، گىرمانىيە تۈركلىرىنىڭ يۇقىرىدا دەپ ئۆتۈلگىنىدەك ئىشسىزلىق نىسبىتى بىر قەدەر يۇقىرى . نېمە ئۈچۈن ؟؟ بۇ پەقەت گىرمانىيە نېمىسلىرىنىڭ كۆچمەنلەرگە بولغان قارىشىنىڭ ياخشى بولماسلىقىدىن خالاس . قانچە ئىختىساسلىق بولۇپ كېتىشدىن قەتئىينەزەر تۈرك ياشلىرىنىڭ يۇقىرى دەرىجىلىك ئورۇنلاردا خىزمەت قىلىشى بىر قەدەر قىيىن بولغان بىر مەسىلە بولۇپ قالدى .
   دەل مۇشۇ شارائىتتا ، مەخمەت سىكول قاتارلىقلارنىڭ پۇتبولچىلىقتا نەتىجە قازىنىپ ، گىرمانىيەدىكى تۈركلەر ئارىسىدا ھۆرمەتكە سازاۋەر بولۇپلا قالماي ، بەلكى پۈتكۈل گىرمانىيەدە ئالقىشقا ئېرىشىشى ، ئەزەلدىن نېمىسلارنىڭ قارشى ئېلىشىغا نائىل بولالمىغان تۈرك قەۋمىدە يېڭى بىر دولقۇن پەيدا قىلدى . ئۇ بولسىمۇ دەل پۇتبول دولقۇنى !!~
   گىرمانىيە تۈركلىرى پۇتبول ئارقىلىق ئۆز قەدىر قىممىتىنىڭ گىرمانىيە چەمبىرىكىدە چاقنىيالايدىغانلىقىغا ئىشىنىشكە باشلىدى ۋە ئەزەلدىن پۇتبولغا ھېرىسمەن تۈرك ياش-ئۆسمۈرلىرى ئارسىدا پۇتبول قىزغىنلىقى ۋە پۇتبول روھى يەنىمۇ بىر بالداق ئۆستى . ۋاقىتنىڭ ئۆتۈشى بىلەن گىرمانىيەنىڭ ھەر قايسى شەھەر رايۇنلىرىدىكى تۈرك مەھەللىلىرىدە پۇتبول قىزغىنلىقى ۋە پۇتبول بىلەن تەرەققى قىلىپ ئۆزىنى ۋە ئەزەلدىن قارشى ئېلىنمايۋاتقان تۈرك قەۋمىنى تونۇتۇش روھى قايتا تىرىلىشكە قاراپ يۈزلەندى .
   دەل مۇشۇنداق قىزغىن كەيپىياتتا ، ھەر قايسى پۇتبول كۇلۇبلىرى بۇ جەڭگىۋار ، تىرىشچان ، چىداملىق ۋە ئەقىللىق تۈرك ياش -ئۆسمۈرلەرگە كۈز تىكىشكە باشلىدى . بۇ شاكىچىكلەر ئۆز تىرىشچانلىقى بىلەن كۇلۇبتا تېزلا كۆزگە كۆرۈنۈشكە باشلىدى ۋە بۇرۇنقى ئۇلارنى كۆزگە ئىلمىغانلارنىڭ ھەۋەس قىلىدىغان ، قىزىقىدىغان ۋە ئۈلگە ئالىدىغان نىشانىغا ئايلاندى . بۇرۇندىن ئوتتۇرا ۋە تۆۋەن قاتلامدا خىزمەت قىلىپ ۋە ياشاپ كەلگەن گىرمانىيە تۈركلىرى ئەۋلادلىرى گىرمانىيە ئۆسمۈرلەر كوماندىسى ، ھەر قايسى ياشلىقلار كوماندىسى ھەتتا دۆلەت كوماندىسىدا ئۆز ئورۇنلىرىنى تېپىپ ، گىرمانىيەدىكى تۈرك قەۋمىنىڭ ئوتتۇرا، تۆۋەن قاتلامدىلا خىزمەت قىلالايدىغان ۋە ياشايدىغان ھالىتىگە خاتىمە بېرىشكە باشلىدى . مانا بۇ گىرمانىيەدىكى تۈرك قەۋمىنىڭ پەخرلىك پەرزەنتلىرى ! مانا بۇ گىرمانىيە ئىقتىسادىغا ئۈن -تۈنسىز تۆھپە قوشۇپ كەلگەن تۈرك ئەمگەكچىلىرىنىڭ ئەۋلادلىرى ! مانا بۇ گىرمانىيە پۇتبول سەھنىسىدە چاقنىغان تۈرك يۇلتۇزلىرى !!!!~


   


   شۇنداق ، گىرمانىيە تۈرك توپچىلرىنىڭ بەزىلىرى گىرمانىيەنى تاللىسا ، يەنە بەزىلىرى يەنىلا ئۆز ۋەتىنى تۈركىيەنى تاللاپ كەلدى . بۇنىڭ مىسالى ئىنتايىن كۆپ ئەلۋەتتە !
   يېقىنقى يىللاردىن بۇيان گىرمانىيە پۇتبولچىلىقىدا ياشلارنى تەربىيىلەش خىزمىتى نوقتىلىق ئىشلىنىۋاتىدۇ . بۇنىڭ قاتارىدا گىرمانىيە تۈرك قەۋمىدىكى پۇتبولچىلار بىر قەدەر كۆپ بولۇپ كېلىۋاتىدۇ . تۈركىيە پۇتبولچىلار جەمئىيىتى داۋاملىق گىرمانىيەدىكى تۈرك توپچىلارغا ‹‹ تاجاۋۇز ›› قىلىۋاتىدۇ ۋە تۈركىيە دۆلەت كوماندىسىغا قوشۇۋېلىش ئۈچۈن داۋاملىق خىزمەت ئىشلەپ كېلىۋاتىدۇ . بۇ توغرۇلۇق قىستۇرۇپ قويىدىغىنىم ، بېرلىندىكى ‹‹ تۈركىيە پۇتبولچىلار جەمئىيىتى ئىش بىجىرىش ئورنى ›› بولۇپ ، بۇ دەل گىرمانىيەدىكى تۈرك توپچىلارنى تۈركىيىگە قايتۇرۇپ كېلىش ئۈچۈن تەسىس قىلىنغان ئورۇن ھېسابلىنىدۇ .


   


   يۇقىرىدىكى ئورۇندا خىزمەت قىلىدىغان كېسارنىڭ ئېيتىشىچە ، ھازىر تۈركىيەدە كەم بولۇۋاتقىنى مۇداپىيىچى ئىكەن . كېسارنىڭ 25 خىزمەتدېشى بولۇپ ، بۇلار ئاساسەن گىرمانىيە ھەر قايسى ياشلىقلار دۆلەت كوماندىسىدىكى تۈرك توپچىلارنى كۈزىتىش خىزمىتى بىلەن شۇغۇللىنىدىكەن . سېسارنىڭ ئېيتىشىچە ، گىرمانىيە كوماندىسى ئانچە دېققەت قىلمىغان 20 نەپەر گىرمانىيەدىكى تۈرك توپچى ئۇلارنىڭ تاللاش نىشانىغا كىرگۈزۈلۈپتۇ .


   


   بەزىلەر بۇ تېمىنى ئوقۇغاندىن كېيىن ، گىرمانىيەدە ئىزچىل يەكلىنىشكە ئۇچراپ كەلگەن تۈرك قەۋمىدىكى توپچىلارنىڭ بەزىلىرى نېمە ئۈچۈن گىرمانىيە كوماندىسىنى تاللايدۇ ؟ دىگەن سوئالنى قويۇشى مۆمكىن . بۇنىڭغا مەن قىسقىچە چۈشەنچەمنى دەپ ئۆتەي  :
   نۇرى ساھىن ، ئۇ تۈركىيە كوماندىسىنى تاللىدى ، چۈنكى ئۇ دۆلەت كوماندىسى U ياشلىقلارنىڭ ھەر قايسى تۈرىدە تۈركىيە كوماندىسىغا ۋاكالىتەن توپ تېپىپ كەلدى . بۇ ئۇنىڭ دۆلىتى تۈركىيەگە بولغان مۇھەببىتى سەۋەبى بىلەنمۇ مۇناسىۋەتلىك . چۈنكى ، نۇرى ساھىن ئەنئەنىۋىيلىكى كۈچلۈك تۈرك ئائىلىسىدە چوڭ بولغان . ئۇ تۈرك ئادىتى بويىچە باشقىلارغا قارىغاندا بالدۇر توي قىلغان . بۇنىڭدىكى يەنە بىر قىززىق نوقتا ئۇ توي قىلغان قىز دەل ئۇنىڭ نەۋرە سىڭلىسى .
   ئۆزىلگە كەلسەك ، ئۇ گىرمانىيە پاسپورتىغا ئېرىشىشتىن بۇرۇنلا گىرمانىيە دۆلەت كوماندىسىغا كىرىش ئارزۇسىدا ئىدى . لېكىن شۇ ۋاقىتتا ئۇ تۈركىيەگە ۋاكالىتەن توپ تېپىشنىمۇ نەزىرىدىن ساقىت قىلمىغان . ئۇ گىرمانىيە U18 ياشلىقلار دۆلەت كوماندىسىغا چاقىرتىلغاندىن كېيىن ، چوقۇم گىرمانىيە دۆلەت كوماندىسىغا قوشۇلۇش نىيىتىگە كەلگەن . گىرمانىيە دۆلەت كوماندىسى ئۆزىلنى دۆلەت كوماندىسىغا ئېلىشنى ئويلاشقاندا ، ساھىننىڭ گىرمانىيەنى تاللىماي تۈركىيەنى تاللىغىنىنى ئېسىگە ئېلىپ ، ئۆزىلنىڭمۇ شۇنداق قىلىشىدىن ئەنسىرىگەن . ئۇ 21 ياشقا كىرگەندە ئاندىن دۆلەت كوماندىسىغا چاقىرتىلغان . ئۆزىل بولسا ئۆزىنىڭ تۈركىيە چاقىرىقىنى گىرمانىيەگە تاپشۇرۇپ ، ئۆزىنىڭ گىرمانىيە كوماندىسىغا سادىقلىغىنى ئىپادىلىگەن . چۈنكى گىرمانىيە كوماندىسى تۈركىيە كوماندىسىغا قارىغاندا تېخىنىكىسى بىر قەدەر ئۈستۈن كوماندا ، يەنە بىر جەھەتتىن گىرمانىيىدىكى تۈركلەر ئۈچۈن ، گىرمانىيەدە ياشىغان ، ئارىغا ئېلىشقا ئېرىشەلمىگەن تۈركلەر ئۈچۈن گىرمانىيە دۆلەت كوماندىسىغا كىرىش ئۇلارنىڭ گىرمانىيەدىكى كۆچمەنلەر قاتارىدا بىر قەدەر ئاكتىپ ئورۇنغا ئېرىشىشىگە ، بۇنىڭدىن كېيىنكى گىرمانىيە ھۆكۈمىتىنىڭ تېخىمۇ كۆڭۈل بۆلۈش دائىرىسى ئىچىگە كىرىش ئېھتىماللىقىدىن دېرەك بېرىشى مۆمكىن .

   


   مەن تۆۋەندە گىرمانىيەدە تۇغۇلغان مۇنەۋۋەر تۈرك پۇتبولچىلارنى تونۇشتۇرۇپ ئۆتىمەن !!~


  
   1 . مەھمەت سىكول  


   


   مەھمەت سىكول ، گىرمانىيىدە تۇغۇلغان تۈرك پۇتبولچى . ئۇ گىرمانىيە زەردارى بايرېن مىيۇنخېن كۇلۇبىدا توپ تەپكەن . ئۇ تېخنىكىسىنىڭ يۇقىرى بولۇشى ، چەبدەسلىكى بىلەن ھەممىگە تونۇلغان پۇتبول چولپىنى . 1992-يىلى ئەتىيازدا ئۇ 3 مىليۇن 300 مىڭ دوللارلىق باھا بىلەن بايرېن مىيۇنخېن كۇلۇبىغا قوشۇلغان . ئۇ بايرېنغا قوشۇلغاندىن كېيىن تېخىمۇ ئېچىلىپ كەتكەن ، شۇنداقلا كوماندا بىلەن بىرلىكتە بىرلەشمە چىمپىيۇنلىقىنى قولغا كەلتۈرگەن . ئۇ ئېسىل ئىپادىسى بىلەن 1995-يىلى گىرمانىيە دۆلەت كوماندىسىغا چاقىرىلغان ۋە گىرمانىيە دۆلەت كومانىدىسىدا 7 يىللىق پۇتبولچىلىق ھاياتىنى باشتىن كەچۈرگەن ، دۆلەت كوماندىسدىكى 38 مەيدان مۇسابىقىدە 8 توپ ئۇرۇپ كىرگۈزگەن . ئۇ ھەم بايرېن مىيۇنخېن كۇلۇبىنىڭ ساداقەتمەن توپچىسى . ئۇ 1992-يىلىدىن 2007-يىلىغىچە بايرېن مىيۇنخېن ئۈچۈن توپ تەپكەن بايرېن تۆھپىكار توپچىسىنىڭ بىرى ھېسابلىنىدۇ . 2007-يىلى 5-ئاينىڭ 20-كۈنى مېينىز بىلەن بولغان بىرلەشمە مۇسابىقىدە ئۇ كاپىتان سالاھىتى بىلەن بايرېن مىيۇنخېندىكى شۇنداقلا پۇتبولچىلىق ھاياتىدىكى ئەڭ ئاخىرقى مەيدان مۇسابىقىنى ئوينىغان . ئۇ گىرمانىيەدىكى تۈرك پۇتبولچىلارنىڭ ھەقىقى ئۈلگىسى .



   2 . خەمىت ئالتۇنتوپ   


   


   خەمىت ئالتۇنتوپ بولسا گىرمانىيەدە تۇغۇلغان يەنە بىر پەخىرلىك تۈرك پۇتبولچى . 1985-يىلى 3 ياشقا كىرگەن ئالتۇنتوپنىڭ دادىسى ئالەمدىن ئۆتىدۇ . يالغۇز ئانا بىر ئائىلە كىشىلىرى ئۈچۈن تىنىمسىز تىپىرلاپ جان بېقىش كويىغا چۈشىدۇ . دەل مۇشۇنداق جاپاكەش ئانىنىڭ تەربىيىسى ئاستىدا ئاكا-ئۇكا ئالتۇنتوپلار گىرمانىيىدە نوپۇزلۇق پۇتبول چولپانلىرى بولۇپ يېتىشىپ چىقىدۇ . ئۇ 2003-يىلى شارېك 04 كوماندىسىغا تاللىنىدۇ . شارېك04 كوماندىسىدىكى ئېسىل ئىپادىسى 2007-يىلىغا كەلگەندە ئۇنى گىرمانىيە زەردارى بايرېن مىيۇنخېن كوماندىسىغا ئەزا قىلىدۇ . 2011-يىلى خانلىق مادرىدقا قوشۇلىدۇ ۋە بىر يىلدىن كېيىن تۈركىيە بىرلەشمىسىگە قايتىدۇ . ئۇ 2 قېتىم گىرمانىيە بىرلەشمە چىمپىيۇنى ، 2 قېتىم گىرمانىيە لوڭقىسى چىمپىيۇنى ، 1 قېتىم گىرمانىيە بىرلەشمە لوڭقىسى چىمپىيۇنى قاتارلىق نەتىجىلەرگە ئېرىشىدۇ . ئۇ يەنە 2010 \ 2009-يىللىق مۇسابىقە پەسلى ‹‹ پۇسكاش مۇكاپاتى ›› غا ( يەنى يىللىق ئەڭ نادىر توپ مۇكاپاتى ) غا نائىل بولىدۇ . ئۇ ھەم تۈركىيە دۆلەت كوماندىسىنىڭ غوللۇق ئەزاسى .



   3 . يىلدىراي باستۈرىك


   


   يىلدىراي باستۈرك 1978-يىلى گىرمانىيەدە تۇغۇلغان . باستۈرك بىز بىلەن تەڭداش پۇتبول مەستانىلىرى قاتارىدا چوڭقۇر تەسىر قالدۇرغان تۈرك پۇتبولچىنىڭ بىرى . ئۇ ئالدى كەينى بولۇپ ، گىرمانىيە بىرلەشمىسىدىكى بوچۇم رىقابەت كوماندىسى ، لىۋېرلوسېن كوماندىسى ، بېرلىن ھېرات كوماندىسى ۋە سىتۇگارت كوماندىسى قاتارلىق كوماندىلاردا توپ تەپكەن . ئۇ لىۋېركوسېندا توپ تەپكەندە باللاك ، زېروبېرتو قاتارلىقلار بىلەن كۈچلۈك بولغان ئوتتۇرا مەيداننى شەكىللەندۈرگەنىدى . باستۈركنىڭ بويى 1.68 مېتىر بولسىمۇ ، ئىنتايىن كۈچلۈك توپچى ئىدى . ئۇنىڭ پۇت تېخنىكىسى ئالاھىدە بولۇپلا قالماي ، تېزلىكىمۇ يۇقىرى ئىدى . شۇ ۋاقىتتىكى ئوتتۇرا مەيداندا باستۈركنىڭ بولۇشى لىۋېرپوسېننى ئەڭ خاتىرجەم قىلاتتى . باستۈرك تىپىدىكى ئوتتۇرا مەيدان توپچىسى ئىنتايىن ئاز ئۇچرايدۇ . 2002-يىلىدىكى باستۈرك ھەممىمىزنىڭ ئېسىدىن تېخى كۆتۈرۈلگىنى يوق !~



   4 .مەسئۇت ئۆزىل


   


   مەسئۇت ئۆزىل ، 1988-يىلى گىرمانىيىدە تۇغۇلغان . 2005-يىلى ئۆزىل شارېك 04 كۇلۇبىنىڭ دېققىتىنى تارتقان ۋە شارېك 04 ياشلار كوماندىسىغا قوشۇلغان . 2007-يىلىدىن 2010-يىلىغىچە بېرمىن كۇلۇبىدا توپ تەپكەن . 2010-يىلقى خانلىق مادرىدقا قوشۇلۇپ 3 يىل توپ تەپكەن ۋە ئۆزىنىڭ ئەڭ شانلىق دەۋرىنى ياراتقان . ئۇ ھازىر ئارسىنال كۇلۇبىدا توپ تېپىدۇ . ئۇ ھەم گىرمانىيە كوماندىسىنىڭ غوللۇق ئەزاسى . ( ئۆزىل توغرۇلۇق كۆپ سۆزلىمىدىم ئەمسە ! )



   5 . نۇرى ساھىن  


   


   نۇرى ساھىن گىرمانىيە بىرلەشمە تارىخىدىكى ئەڭ ياش مەيدانغا چىققان پۇتبولچى ۋە ئەڭ ياش توپ كىرگۈزگۈچى . 2011-يىلى ئۇ دورتموند كۇلۇبىدىن خانلىق مادرىد كۇلۇبىغا يۆتكەلگەن . بىر يىلدىن كېيىن لىۋېرپولغا ئىجارە شەكلىدە قوشۇلغان . لىۋېرپولدىكى يېرىم پەسىل تۇرغاندىن كېيىن يەنە ئىجارە شەكلىدە دوتموندقا قوشۇلغان . كېيىن دورتموند كۇلۇبى ساھىننى قايتا رەسمىي قوشۇۋالغانلىقىنى ئېلان قىلغان . ئۇ دورتموندتا بىرلەشمە چىمپىيۇنلىقى ۋە ياۋروپا ئۇزغۇنلۇق 2-لىكىنى قولغا كەلتۈرگەن . 2005-يىلىدىكى ياۋروپا ياشلار لەۋھە تالىشىش مۇسابىقسىدا چىمپىيۇن بولۇپ ‹‹ كۈمۈش ئاياق ›› ساھىبى بولغان تالانتلىق توپچى . 2011 \ 2010 مۇسابىقە پەسلىدە ئۇ گىرمانىيە بىرلەشمىسى ئەڭ مۇنەۋۋەر سەپ شەكلىگە تاللانغان .



   6 . ئېلخان مانسىز  


   


   بۇ ئىسىم مۇنبەرداشلارغا ناتونۇش ئەمەس ئەلۋەتتە . ئېلخان گىرمانىيەدە تۇغۇلۇپ چوڭ بولغان . 2002-يىلىدىكى دۇنيا لوڭقىسى مۇسابىقىسدە تۈركىيە كوماندىسىنىڭ يېرىم ھەل قىلغۇچ باسقۇچقىچە كېلىشىدىكى ئەڭ چوڭ تۆھپىكارنىڭ بىرى . ئۇنىڭ بىرازىلىيە بىلەن بولغان مۇسابىقىدە كارلوسنىڭ بېشىدىن ئاتلاندۇرۇپ ئالداپ ئۆتكەن كۆرۈنۈشى دۇنيا لوڭقىسىدىكى نادىر كۆرۈنۈشلەرنىڭ بىرى بولۇپ ساقلىنىۋاتىدۇ .



   2013-يىلى 8-ئاينىڭ 13-كۈنى سوچى قىشلىق تەنھەرىكەت يىغىنى مۇز ئۈستى ماھارىتى ماھىرلار تىزىملىكىنى ئېلان قىلدى . كىشىنى ئەڭ قىزىقتۇرىدىغىنى شۇكى ، 2002-يىلىدىكى دۇنيا لوڭقىسىدا كىشىلەرنى تاڭ قالدۇرغان تۈرك پۇتبول چولپىنى ئېلخان مانسىزنىڭ بۇ تىزىملىكتىن ئورۇن ئېلىشى بولدى . 2006-يىلى ئۇ ئەنقەرە تەنتەربىيىسى كۇلۇبىدا پۇتبولچىلىق ھاياتىدىن چكىنگەندىن كېيىن ، بېستاندگېۋا بىلەن تونۇشۇپ قېلىپ ، ئۇنىڭ تەسىرىدە مۇز تېيىلىش تۈرىگە قىزىققان ۋە بىر قانچە قېتىملىق چوڭ مۇسابىقىلەرگە قاتناشقان .
   


   7 . ئۈمىد داۋالا


   


   ئۈمىد داۋالا گىرمانىيەدە تۇغۇلغان تۈرك پۇتبول چولپىنى . ئۇ ئالدى كەينى بولۇپ گالاتا ساراي كۇلۇبى ، مىلان كۇلۇبى ، ئېنتىر كۇلۇبى ، بېرمىن كۇلۇبى قاتارلىق داڭلىق كۇلۇبلاردا توپ تەپكەن . ئۇ گالاتا سارايدا خاقان شۈكۈر بىلەن ئاساسلىق ھۇجۇمچىلىق ۋەزىپىسىنى ئۆتىگەن . مىلانغا قوشۇلغاندىن كېيىن ئىقتىدارىنىڭ ئالاھىدە بولۇشى بىلەن ئوتتۇرا مەيدان ۋە مۇداپىيەچى بولۇپ ئوينىغان . 2002-يىللىق دۇنيا لوڭقسىدىن كېيىن ئېنتىرغا قوشۇلغان . پۇتبولچىلىق ھاياتىنىڭ ئاخىرقى باسقۇچلىرىنى بېرمىن كۇلۇبىدا ئۆتكۈزگەن . ئۇ تۈركىيە دۆلەت كوماندىسىدىكى ھەقىقى كۆپ قىرلىق پولات جەڭچى !!~



   8 . ئېلكاي گوندوغان


   


   ئېلكاي گوندۇغان يەنە بىر تالانتلىق گىرمانىيەلىك تۈرك پۇتبولچى . ئۇنىڭ توپ تېپىش ئۇسلۇبى نۇرى ساھېنغا ئوخشىشىپ كېتىدۇ . ئۇ دورتموند كۇلۇبىغا قوشۇلغاندىن باشلاپ ئۆزىنىڭ ئەڭ ياخشى ھالىتىنى ساقلاپ دورتموندنىڭ شانلىق نەتىجىلىرىگە شاھىت بولۇپ قالدى . ئۇ مەھمەت سىكول ، ئۆزىلدىن كېيىنكى گىرمانىيە دۆلەت كوماندىسىدىكى يەنە بىر تۈرك پۇتبولچى ھېسابلىنىدۇ . ئۇ ھازىرقى ھەر قايسى زەردارلارنىڭ تالىشىش نېشانى ھېسابلىنىدۇ .  




   9 . خاقان چالخانئوغلۇ


   


   خاقان چالخانئوغلۇ 1994-يىلى گىرمانىيەدە تۇغۇلغان ئەڭ ئۈمىدلىك تۈرك پۇتبولچىنىڭ بىرى . ئۇنىڭ يېشىغا نىسبەتەن ئىختىيارى توپ ئۈنۈمدارلىقىنىڭ يۇقىرى بولۇشى ، جۇنېنھو ، بېكھام ۋە پېرلولارنى ئەسلىتىدۇ . ئۇ ھازىر گىرمانىيە زەردارى لېۋىركوسىن كوماندىسىنىڭ ئوتتۇرا مەيدان يادروسى . ئۇنىڭ ئىنكاسىنىڭ چاققانلىقى ، پاس ئۈنۈمدارلىقىنىڭ يۇقىرى بولۇشى ، مەيدان كۈزىتىش دائىرىسىنىڭ كەڭ بولۇشى ، ئۇنى تېزلا لىۋېركوسېن كوماندىسىدا كەم بولسا بولمايدىغان يادرولۇق توپىچىغا ئايلاندۇردى .  



   10 . سەردار تاچدىل


   


   سەردار تاچدىل گىرمانىيەدە تۇغۇلغان تۈرك پۇتبولچى بولۇپ ، مەيداندىكى ئورنى ئوتتۇرا مۇداپىيىچى . ئۇ قاۋۇل ، مۇداپىيە ئېڭى يۇقىرى بولغان مۇداپىيىچى بولۇپ ، ئۇ باشقا گىرمانىيە ئوتتۇرا مۇداپىيىچىلىرىگە سېلىشتۇرغاندا ، پۇت ئاستى ماھارىتى ئالاھىدە ، تېزلىكى يۇقىرىلىقى بىلەن كۆزگە كۆرۈنگەن . سەردار تاچدىلغا ياۋروپا زەردارلىرى كۆز تىكىپ كەلگەنىدى . لېكىن داۋاملىق يارىلىنىش بۇ پولات قورغاننى ھالسىرىتىپ قويدى . ئۇ 2010-يىلى لېف تېرىنېرلىقىدىكى گىرمانىيە كوماندىسى بىلەن جەنۇبى ئافرىقا دۇنيا لوڭقىسى مۇسابىقىسغا قاتناشتى . ئۇ سىتۇگارت كۇلۇبى ياشلار مەشىق بازىسىدىن يېتىلىپ چىققان تالانتلىق مۇداپىيىچى . ئۇ ئىزچىل سىتۇگارت كوماندىسى ئۈچۈن كۈچ چىقىرىپ كەلدى .

   


                                                                                                                                    تامام ! نايىل !!!!!!!~

تەلھە

نادىر تېمىدىن بىرنى پۈتكۈزىۋىتىپلا قوللىرىغا دەرىت كەلمىسۇن ، ئازراق ئوقۇدۇم قالغىنىى كەچتە ئوقۇي

تارانچى1

تۈرىكلەردىن تۇنمايدىغان  پۇتبۇلچىلار  جىقكەن  جۇمۇ ....
ما  تىمىنى نادىرلاشقا   بىر  بىلەت  كەتتى...........
ئاخىرىنى    ساقلايمەن....

ronalido777

مۇشۇلارنىڭ ھەممسي تۈركىيەني تاللىغان بولسا تۈركىيە پۇتبولچىلقي تىخىمۇ تەرەققي قىلاتتي .

كۆسەنى

نادىر تىمىغا بىر بېلەت كەتتى .

كۆسەنى

ronalido777 يوللىغان ۋاقتى  2015-7-25 19:22
مۇشۇلارنىڭ ھەممسي تۈركىيەني تاللىغان بولسا تۈركىيە پۇ ...

تىمىدا تىلغا ئېلىنغاندەك بىر ھىساپتا بۇلارنىڭ تۈركىيەنى تاللىماي گىرمانىيەنى تاللىشى گىرمانىيەدىكى تۈركىيە كۆچمەنلىرنىڭ ئىستىقپالىغا ھىچ بولمىغاندا پۇتپول تەرەققىياتىغا بولسىمۇ پايدىسى بار .

كارۋان10

نادىر تىمىغا مەندىن بىر بېلەت كەتتى؟

تېۋىلغا

ronalido777 يوللىغان ۋاقتى  2015-7-25 20:22
مۇشۇلارنىڭ ھەممسي تۈركىيەني تاللىغان بولسا تۈركىيە پۇ ...

مەنمۇ شۇنداق ئويلايتتىم ،لېكىن بۇنداق قىلىش تۈرك كۆچمەنلىرنىڭ گىرمانىيىدىكى نوپۇزىغا زىيانلىق ،شۇڭا قارىساق ئۇلار ئاساسەن قايسى تەرەپ ئۆزىگە بالدۇر چاقىرىق ئەۋەتىپ ھەر قايسى ياشتىكى دۆلەت كوماندىسىغا چاقىرتقان بولسا شۇنى تاللىغان ئوخشايدۇ ،

رىپىر

2002-يىلىدىكى باستۈرك،خاقان شۈكۈر، ئۈمىد داۋالا، ئىلخان،رۇستۇ … شىنجاڭدىمۇ پۇتبول ئوتىنى باشقىچە يالقۇنجاتقان ئىدى…

nur816

تېما ئىگىسى گېرمانىيە زۇڭلىسىنىڭ ئىسمى  تاراتقۇلاردا مېركىل دېيىلىدۇ  ،موكىر ئەمەس……داۋامىنى  ساقلايمىز  ناھايىتى ئوبدان تېما بوپتۇ  …

ozugh

ھەسەن شاشمۇ بار تېخى… كوزىباش، بوينىدا زەنجىر…

erkinqush

2002دىكى تۈركىيەنى سېغىنىمەن