تۇرپاندىكى مۇسابىقە غەلبىلىق ئاخىرلاشتى

ئاتەش

ئەسسالامۇئەلەيكۇم مۇنبەرداشلار، ھەممىڭلارغا تۇرپان ۋىلايەتلىك پۇتبولچىلار جەمئىيىتىدىكى قېرىنداشلاردىن ئوتلۇق سالام!
تۇرپان شەھىرىدە 1 – ئۆكتەبىر باشلانغان دۆلەت بايرىمىنى كۈتىۋېلىش «مىللەتلەر ئىتتىپاقلىقى» لۇڭقىسى پۇتبول مۇسابىقىسى 6 - ئۆكتەبىر غەلبىلىك ئاياغلاشتى. مۇسابىقىگە تۇرپان ئاتەش ج خ كوماندىسى، ئۈرۈمچى ئاۋانگارت كوماندىسى، تۇرپان ئەلقىيا كوماندىسى، ئۈرۈمچى ھۇررا كوماندىسى، قۇمۇل قۇتار كوماندىسى، قۇمۇل ئېۋىرغول كوماندىسى، تۇرپان قاڭقىل كوماندىسى، تۇرپان ئىتتىپاق كوماندىسى، تۇرپان كومسۇمۇل كوماندىسى قاتارلىق توققۇز كوماندا قاتناشتى.
ھەممىمىزگە مەلۇم بولغىنىدەك ۋىلايىتىمىزدە ئويلىمىغان يەردىن يۈز بەرگەن بەزى كۈتمىگەن ئىشلار سەۋەبىدىن كېلىپ چىققان جەمئىيەت ئامانلىقى ۋە ئىجتىمائىي مۇقىملىقنى قوغداشتىن ئىبارەت جىددىي ۋەزىيىتى ئاستىدا تۈرلۈك كوللېكتىپ پائالىيەتلەرنى ئورۇنلاشتۇرۇش ئاسانغا توختىمىدى، بۇقېتىمقى مۇسابىقىنى ئورۇنلاشتۇرۇشمۇ مەيلى ئىقتىسادىي جەھەتتىن بولسۇن ۋە ياكى مۇسابىقە ئورۇنلاشتۇرۇش جەھەتتىن بولسۇن نۇرغۇن قېينچىقىلىقلارغا دۈچ كەلدى. شۇنداقتىمۇ ۋىلايەتلىك پۇتبولچىلار جەمئىيىتىدىكى باشلامچىلار مۈرىنى – مۈرىگە تىرەپ، ھەرخىل قىيىنچىلىقلارنى يېڭىپ مۇناسىۋەتلىك تارماقلارنىڭ تەستىقلىشىنى قولغا كەلتۈردى. بىر قاتار تەييارلىق خىزمەتلەرنى جىددىي ئىشلەش ئارقىلىق 1 – ئۆكتەبىر، تۇرپان يەتتە كىشىلىك پۇتبول مۇسابىقىسى مۇۋەپپەقىيەتلىك باشلاندى.



ۋىلايىتىمىزدىكى مۇناسىۋەتلىك تارماقلارنىڭ مەسئۇللىرى توپ باشلاپ مۇسابىقىنىڭ باشلانغانلىقىنى جاكارلىدى

مۇسابىقىگە قاتناشقان كوماندىلارنىڭ ئەمەلىي كۈچىدىن قارىغاندا كوماندىلار بۇ قېتىمقى مۇسابىقىگە يۈكسەك دەرىجىدە ئەھمىيەت بەرگەن بولۇپ، ھازىرقى شىنجاڭ كوماندىسىدىكى نۇرمۇھەممەت تۇرسۇن (مۇستافا، كاپىتان)، نىزامىدىن، سابىت، ماخمۇت قاتارلىق ياش چولپانلىرىمىز، ئەلقەمجان قاتارلىق پىشقەدەم چولپانلىرىمىزنى كوماندىلار تەكلىپ بىلەن قاتناشتۇردى. ئۈرۈمچى ھۇررا كوماندىسىمۇ ۋىلايەتلىك پۇتبولچىلار جەمئىيىتى قۇرۇلغاندىن بۇيانقى تۇرپاندىكى پۇتبول مۇسابىقىلىرىگە ئىزچىل قاتنىشىش ئادىتىنى ساقلاپ، ياش ئەزىمەتلىرىنى باشلاپ، جەڭگىۋار روھىنى داۋاملاشتۇردى.
مۇسابىقە تەرتىپ قوللانمىسىنىڭ قائىدىسى بويىچە مۇسابىقىگە قاتناشقان توققۇز كوماندا ئالدى بىلەن ئىككى گۇرۇپپىغا ئايرىلىپ، ئايلانما مۇسابىقە ئويناپ، كەسكىن رىقابەتلىشىش ئارقىلىق نەتىجىسى ئالدىنقى ئىككىنچى ئورۇندىكى تۆت كوماندا يېرىم ھەلقىلغۇچ مۇسابىقە باسقۇچىغا كىردى.
گۇرۇپپا مۇسابىقىسىدە A گۇرۇپپىدىكى ئاتەش ج خ كوماندىسى بىر مەيدانمۇ ئۇتتۇرماسلىق نەتىجىسى بىلەن 1- ئورۇننى ئىگىلىدى، قالغان ئۈچ كوماندىنىڭ نەتىجىسى مۇرەككەپ بولۇپ، قۇتار، ئاۋانگارت، ئىتتىپاق قاتارلىق ئۈچ كوماندا بىر – بىرىنى يېڭىپ ھەممىسلا ئۈچ نومۇرغا ئېرىشىپ، مۇرەككەپ ھالەت شەكىللىنىپ قالدى، ئاخىرىدا ئاۋانگارت ساپ توپ جەھەتتىكى ئارتۇقچىلىقى بىلەن گۇرۇپپىدىن ئىككىنچى بولۇپ چىقتى.
كەينىدىكى B گۇرۇپپىدا، ئۈرۈمچى ھۇررا كوماندىسى 10 نومۇر بىلەن بىرىنچى بولۇپ گۇرۇپپىدىن چىقتى، ئەلقىيا كوماندىسى بىلەن قاڭقىل كوماندىسى ئىككىنچىلىكنى كۈچەپ تالاشتى، بۇ ئىككى كوماندا ئۇچراشقاندا قاڭقىل كوماندىسى 2 :1 نەتىجسى بىلەن پايدىلىق ئەھۋالدا، ئاخىرقى ئۈچ مىنۇت قالغاندا قارشى تەرەپكە بىر نۇقتا توپ سوۋغا قىلىپ، تەڭلىشىپ قالدى. ناۋادا مۇشۇ نەتىجىنى ساقلاپ قالالىغان بولسا گۇرۇپپىدىن چىقىشىدا گەپ يوق ئىدى. شۇنداقتىمۇ گۇرۇپپىنىڭ ئاخىرقى ئايلانمىسىغا قەدەر ئىككىلا كوماندىنىڭ گۇرۇپپىدىن چىقىشىدىن ئۈمىد بار ئىدى، بىراق، ئەلقىيا كوماندىسى ھۇرراغا ئۇتتۇرۇپ قويسا، قاڭقىل كوماندىسى كومسۇمۇل كوماندىسىنى يەتتە ساپ توپ نەتىجە بىلەن ئۇتسا قاڭقىل كوماندىسى ئاندىن گۇرۇپپىدىن چىقالايتتى. گەرچە قاڭقىل كوماندىسى ساپ توپ جەھەتتە كۆزلىگەن مەقسەتكە يەتكەن بولسىمۇ، ئەلقىيا كوماندىسىمۇ بوش كەلمەي ھۇررا كوماندىسى بىلەن تەڭلەشتى. نەتىجىدە ئەلقىيا كوماندىسى بىر نومۇر پەرق بىلەن گۇرۇپپىدىن ئىككىنچى بولۇپ چىقتى.
يېرىم ھەل قىلغۇچ مۇسابىقە باسقۇچىدا، ئاتەش ج خ كوماندىسى بىلەن ئەلقىيا كوماندىسى، ھۇررا كوماندىسى بىلەن ئاۋانگارت كوماندىسى ئۇچۇرۇشۇپ، تۇرپان ماكانداشلار جېڭى (دېربا) بىلەن ئۈرۈمچى ماكانداشلار جېڭى ئېلىپ بېرىلدى. نەتىجىدە ئاتەش ج خ كوماندىسى 6 : 1 نەتىجە بىلەن ئەلقىيا كوماندىسىنى يېڭىپ، ھەل قىلغۇچ مۇسابىقىگە كىردى. كۆپلىگەن مەستانىلەرنىڭ نەزىرىدىكى جەلىپ قىلارلىق بۇ مۇسابىقە نەتىجە جەھەتتىن كىشىنى ھەيران قالدۇردى. چۈنكى كۆپلىگەن مەستانىلەر قايسى كوماندىنىڭ غەلىبە قىلىشىنى پەرەز قىلالمىسىمۇ، لېكىن بۇنداق چوڭ نومۇر پەرقى كېلىپ چىقىشىنى ئويلىمىغان ئىدى. ئۈرۈمچى ماكانداشلار جېڭىدە بولسا ھۇررا كوماندىسىنىڭ كىچىك گۇرۇپپىدىكى جەڭگىۋارلىقى سۇسلىشىپ قالغاندەك تۇراتتى، ھۇررا كوماندىسىنى ئانچە كۈچىمەيلا غەلىبە قىلىدۇ دەپ قارىغان مەستانىلەر بۇ قېتىمقى مۇسابىقىدىكى قارا ئات دەپ قارالغان ئاۋانگارت كوماندىسىنىڭ 2:1 نەتىجە بىلەن غەلىبە قىلغانلقىنى ئاڭلاپ سەل ھەيراندا  قېلىشتى.
ھەل قىلغۇچ مۇسابىقىدىكى ھۇررا كوماندىسى بىلەن ئەلقىيا كوماندىسىنىڭ 3 – لىكنى تالىشىش جېڭىدە 50 مىنۇتلۇق مۇسابىقىدە نەتىجە 2 : 2 تەڭلىشپ، قوشۇپ بېرىلگەن 20 مىنۇتتا 3 : 3 بولدى. ئاخىرىدا رەھىمسىز نۇقتا توپ جېڭى باشلاندى. نۇقتا توپ جېڭى ئۇدا 12 ئايلانما داۋاملىشىپ، ئاخىرىدا ئەلقىيا كوماندىسى 3 – لىكنى قولغا كەلتۈردى.
ھەل قىلغۇچ مۇسابىقىدىكى ئاتەش ج خ كوماندىسى بىلەن ئاۋانگارت كوماندىسىنىڭ چىمپىيۇنلۇقىنى تالىشىش جېڭىدە نىزامىدىن، پەرھاتجان، ئەلقەمجانلارنىڭ بىردىن توپ ئۇرۇشى بىلەن 3 : 0 نەتىجە ئاخىرلىشىپ تۇرپان ئاتەش ج خ كوماندىسى بۇ قېتىمقى «مىللەتلەر ئىتتىپاقلىقى» لۇڭقىسىنى قولغا كەلتۈردى.
بۇ قېتىمقى مۇسابىقە ئاتەش دىيار تۇرپاندىكى پۇتبول سۆيەر مەستانىلەرگە يەنە بىر قېتىم پۇخادىن چىققۇدەك مۇسابىقە كۆرۈش پۇرسىتى يارىتىپ بەردى. مەستانىلەر ئەڭ يېقىن ئارىلىقتىن ئەزىمەتلىرىمىزگە مەدەت بەردى. ئۇلارنىڭ كەسپىي ساپاسى، تېخنىكىسى، مەيداندىكى جاسارىتىگە ئاپىرىن ئېيتماي تۇرالمىدى. مۇسابىقە سىرتىدىكى سورۇنلاردىمۇ بۇ قېتىمقى مۇسابىقىنىڭ ئەھۋالى، كوماندىلارنىڭ نەتىجىسى قىزغىن مۇنازىرە تېمىسى بولدى. مۇسابىقە خەلقىمىزنىڭ بايراملىق دەم ئېلىش كۈنلىرىدىكى تۇرمۇشىنى رەڭدارلىققا ئىگە قىلدى - دېسەك ھەرگىز ئارتۇق كەتمەيدۇ.
بۇ قېتىمقى مۇسابىقىگە ئارىلىقنى يىراق كۆرمەي، ئارام كۈنلىرىنى قۇربان قىلىپ قاتناشقان كۇلۇب - كوماندا، يېتەكچى، مەشقاۋۇل، ئەزىمەتلەرگە چىن كۆڭلىمىزدىن رەھمەت ئېيتىمىز. سىلەرنىڭ قاتنىشىشىڭلار مۇسابىقە سەۋىيەسىنى يۇقىرى بالداققا كۆتۈرۈپ، تەجرىبە ئالماشتۇرۇش، كۈچ سىنىشىش سەھنىسىنى تېخىمۇ قىزىتىپ،  پۇتبول سۈيەر خەلقىمىزنىڭ چاڭقىغان يۈرەكلىرىگە زەمزەم كەبى ئارام بەردى. تۇرپاندا بۇنىڭدىن كېيىن ئۆتكۈزىلىدىغان پۇتبول مۇسابىقىلىرىگە داۋاملىق قاتنىشىشىڭلارنى قىزغىن قارشى ئالىمىز، سىلەرگە ئىشىكىمىز ھەرقاچان ئۇچۇق.
ئاخىرىدا ئالتە كۈنلۈك مۇسابىقە جەريانىدىكى يەرلىك ۋە سىرتتىن كەلگەن رىپىرلارنىڭ جان – پىدالىق بەدەلسىز تەر تۆكۈپ، مۇسابىقىمىزنىڭ ئوڭۇشلۇق ئۆتكۈزىلىشىگە كۈچ چىقارغانلىقىغا كۆپتىن – كۆپ تەشەككۇر ئېيتىمىز.

تۇرپان ۋىلايەتلىك پۇتبولچىلار جەمئىيىتى
2013 – يىلى 11 - ئۆكتەبىر



مۇسابىقە جەريانىدىكى بىر قىسىم كۆرۈنۈشلەر

كۇلۇب

مۇبارەك بولسۇن ئەزىمەتلار ئالغا ئۇيغۇر پۇتبولچىلىقى......!

WiRoS

12ئادەم  تەپتىما       ئوججججججون

MadridFC

ئاۋانگىرات ياخشى ئوينىغان ،    لىكىن

سەنجەر

نىمانداق يۇغان قۇرساقلار بۇ !     ھەي ... مەن قايتىپ بارساممۇ مۇشۇنداق مۇسابىقىلەرگە قاتنىشىپ تۇرالىسام بەك ياخشى بولاتتى ...

روھلۇق

سەنجەر يوللىغان ۋاقتى  2013-10-12 00:16
نىمانداق يۇغان قۇرساقلار بۇ !     ھەي ... مەن قايتىپ با ...

اللا حالىسا چوقۇم قاتنىشىش پۇرسىتىڭلا چىقىدۇ ئاداش

جۈمە

مۇبارەك بولسۇن!

تايگىر

تۇرپاننىڭ قەيەرىدە ئوينايدۇ مۇشۇنداق مۇسابىقىلەرنى ، بىزمۇ خېلى شاش ئويناپ قۇياتتۇق  بېرىپ ئوينىيالمىساق كۆرسەكمۇ مەيلىتى

تايگىر

تۇرپان ۋىلايەت ئىچى بولسا دەم ئېلىش ۋاقتى بولسىلا چوقۇم بارالايتتىم

ئاتەش

مۇسابىقە شەھەرلىك 7 - باشلانغۇچ مەكتەپكە ئېلىپ بېرىلدى.

1509796356

بىزنىڭ كۇچادىمۇ ئۆتكۈزسە بۇلاتتى !  - بۇنداق مۇسابىقىنى.....

ۋارتا

ئالغا