بۇندىن بۇرۇن مىلان ۋە بارسىلونادا توپ تەپكەن داڭلىق چولپانلار ...

nayil

   ئەسسلامۇ-ئەلەيكۇم مۇنبەرداشلار !! يەنە بىر تېما كەتتى ئەمسە ...

   مىلان ئىتالىيەدىكى زەردار بولۇش سۈپىتى بىلەن نۇرغۇن شان-شۆھرەتلەرنى قازانغان . ئەلۋەتتە بۇ نام-شۆھرەتلەرنىڭ شاھىدى مىلان ئۈچۈن قان كېچىپ جەڭ قىلغان قەيسەر جەڭچىلەردىن ئايرىپ قارىغىلى بولمايدۇ . بارسىلونا بولسا ئۆزىنىڭ ئويناش ئۇسۇلىنىڭ ئۆزگىچىلىكى ، ياشلار مەشىق بازىسىنىڭ تەربىيلەش ئۈنۈمىنىڭ يۇقىرىلىقى ، كوماندا بىر پۇتۇن گەۋدىسىنىڭ مۇستەھكەملىكى بىلەن ھەممىگە تونۇشلۇق زەردار كوماندا . بارسىلونادا چولپانلار ئەزەلدىن كەم بولۇپ باققان ئەمەس . بارسىلونا باتۇرلىرى ھەر قاچان رەقىبلىرىنى يەر چىشلەتكەن ، شۇنداقلا ھەر قانداق بىر كوماندىنىڭ قارا چۈشى ھېسابلىنىدۇ . تۆۋەندە مەن مىلان ۋە بارسىلونادا توپ تەپكەن داڭلىق چولپانلارنى تونۇشتۇرۇپ ئۆتمەكچى !! ( ئارقىدىن ئالدىغا قارىتا تونۇشتۇرۇلدى !!! )

   13 . ۋېنىستون . بوگاردى         (  گوللاندىيە  )

   ۋېنىستون . بوگاردى 1970-يىلى 10-ئاينىڭ 22-كۈنى گوللاندىيىنىڭ ئامېستېردامدا دۇنياغا كەلگەن . بوگاردى ئىشتىن سىرىتقى كۇلۇبتا ئوڭ قانات ھۇجۇمچى سالاھىتى بىلەن پۇتبول ھاياتىنى باشلىغان . 1990-يىلى يۇرتىدىكى سىپارتاك كۇلۇبىغا قوشۇلۇپ ، كەسپى پۇتبولچىلىق ھاياتىنى باشلىغان . 1994-يىلى گوللاندىيە زەردارى ئاياكېسقا قوشۇلغاندىن كېيىن بويىنىڭ ئېگىزلىكى ۋە ئىنكاسىنىڭ تېز ۋە چاققانلىقىدىن ئوتتۇرا بېك ۋەزىپىسىنى ئۆتىگەن ۋە بۇ ئورۇندا كۆزگە كۆرۈنگەن . 98 \ 97 مۇسابىقە پەسلىدە مىلانغا قوشۇلغان ، لېكىن 3 ئايدىن كېيىنلا بارسىلوناغا قوشۇلغان . ئۇ پەقەت مىلانغا ۋەكالىتەن 3 مەيدانلا مۇسابىقە ئوينىغان . 97-يىلىدىن 2000-يىلغىچە بوگاردى ، بارسىلونا ئۈچۈن 41 مەيدان مۇسابىقىغە قاتنىشىپ 4 توپ ئۇرغان . كوماندا بىلەن بىرلىكتە ئۇدا ئىككى قېتىم ئىسپانىيە بىرلەشمە چىمپىيونلىقىنى قولغا كەلتۈرگەن ( 98 \ 97 يىللىق ۋە 99 \ 98 يىللىق بىرلەشمە ) . 1998-يىلى يەنە ئىسپانىيە شاھلىق لوڭقىسى چىمپىيونى ۋە ياۋروپا دەرىجىدىن تاشقىرى لوڭقىسى چىمپىيونلىقىنى قولغا كەلتۈرگەن .

   12 . كىرېستوفى . دۇگاررې      (  فىرانسىيە  )

   كىرېستوفى . دۇگاررې 1972-يىلى 3-ئاينىڭ 24-كۈنى تۇغۇلغان . ئۇنىڭ كەسپى پۇتبولچىلىق ھاياتى بوردو كوماندىسىدىن باشلانغان . 1988 -يىلىدىن 1996-يىلىغىچە بوردو كوماندىسىغا ۋەكالىتەن 187 مەيدان مۇسابىقىغە قاتنىشىپ 34 توپ ئۇرغان . ئۇ 1994-يىلدىن 2002-يىلغىچە فىرانسىيە كوماندىسىنىڭ ئەزاسى بولغان . شۇنداقلا ،  1998-يىلىدىكى دۇنيا لوڭقىسى چىمپىيونى ۋە 2000-يىلى ياۋروپا لوڭقىسى چىمپىيونى بولغان فىرانسىيە كوماندىسىنىڭ ئەزاسى . ئۇ دۆلەت كوماندىسىغا ۋەكالىتەن 55 مەيدان مۇسابىقىغە قاتنىشىپ 8 توپ ئۇرغان . 1996-يىلى مىلانغا قوشۇلغان ۋە مىلانغا ۋەكالىتەن 21 مەيدان مۇسابىقىغە قاتنىشىپ 5 توپ ئۇرغان . 98 \ 97 مۇسابىقە پەسلىدە بارسىلوناغا قوشۇلغان ۋە 7 مەيدان مۇسابىقىغە قاتناشقان .

   11 . مايكېل . جون . رېزگېر      (  گوللاندىيە  )

   مايكېل . جون . رېزگېر 1973-يىلى 5-ئاينىڭ 3-كۈنى تۇغۇلغان . مەيداندىكى ئورنى ئوڭ قانات مۇداپىيىچى ( ئوڭ بېك ) . ئۇ كەسپى پۇتبولچىلىق ھاياتىنى گوللاندىيە زەردارى ئاياكېس كۇلۇبىدىن باشلىغان . 1996-يىلى ئىتالىيە سەركىسى مىلانغا قوشۇلغان ، بىراق بىر پەسىلدىن كېيىنلا بارسىلونا كوماندىسىغا قوشۇلغان .
   ئۇ بارسىلونادىكى 7 يىل ھاياتىدا ، 2 قېتىم بىرلەشمە چىمپىيونى ۋە 1 قېتىم شاھلىق لوڭقىسى چىمپىيونلىقىنى قولغا كەلتۈرگەن . 2000-يىلىدىن كېيىن ئۇنىڭ ئىپادىسىى ئاستا-ئاستا تۆۋەنلەشكە باشلىغان . 2004-يىلىغا كەلگەندە ، ئەركىن توپچى سالاھىتى بىلەن ئېنگىلاند بىرلەشمىسىدىكى مېدلىسبورىگ كوماندىسىغا قوشۇلغان . ئۇ 98-يىلىدىكى دۇنيا لوڭقىسى تالىشىش مۇسابىقىسىدىكى گوللاندىيە كوماندىسىنىڭ بىر ئەزاسى .

   10 .  ئىبرايىموۋېچ     (  شىۋىتسىيە  )

   ئىبرايىموۋېچ 1981-يىلى 10-ئاينىڭ 3-كۈنى شىۋېتسىيەدە تۇغۇلغان . ‹‹ تۆگە ›› نى كۆپ تونۇشتۇرۇشنىڭ ئورنى يوق ، ھەممىگە تونۇشلۇق چولپان .
   2009-يىلى 7-ئاينىڭ 28-كۈنى سەھەردە بارسىلونا كۇلۇبى ، شىۋېتسىيەلىك ھۇجۇمچى ئىبرايىموۋېچنى قوشۇۋالغانلىقىنى ئېلان قىلدى ۋە ئۇنىڭ بىلەن 2014-يىلى 6-ئاينىڭ 30-كۈنىگىچە بولغان 5 يىللىق توختام ئىمزالىغانلىقىنى ئاشكارلىدى . يۆتكىلىش باھاسى 66 مىليون ياۋرو بولدى . 2010-يىلى 8-ئاينىڭ 29-كۈنى ئىبرايىموۋېچ بارسىلونادىن مىلانغا قوشۇلدى ، يۆتكىلىش باھاسى 24 مىليون ياۋرو بولدى .

   9 . مارك . ۋان . بوممېل       ( گوللاندىيە  )

   مارك . ۋان . بوممېل 1977-يىلى 4-ئاينىڭ 22-كۈنى تۇغۇلغان . بۇ ‹‹ كېچىكىپ ئېچىلغان گۈل ›› كەسپى پۇتبول ھاياتىنى گوللاندىيە زەردارى ئېتىنخوۋېن كۇلۇبىدىن باشلىغان . ئۇ ئېيىنخوۋېندىكى پۇتبولچىلىق ھاياتىدا 169 مەيدان مۇسابىقىغە قاتنىشىپ 46 توپ ئۇرغان .
   2005-يىلى يازدا ، ۋان . بوممېل ئەركىن توپچى سالاھىتى بىلەن بارسىلوناغا قوشۇلدى . گەرچە كوماندا بىلەن بىرلىكتە بىرلەشمە چىمپىيونلىقى ۋە ئۇزغۇنلۇق چىمپىيونلىقىنى قولغا كەلتۈرگەن بولسىمۇ ، ئۇ ئىسپانىيەدە قاتتىق ئورۇندۇقتا ئولتۇرۇۋېرىشنى خالىمىدى .
   2006-يىلى يازدا بايرېن مىيونخېنغا قوشۇلۇپ ، كاپىتان سالاھىتى بىلەن 2 قېتىم بىرلەشمە چىمپىيونلىقىنى قولغا كەلتۈردى . 2011-يىلى 1-ئاينىڭ 25-كۈنى ۋان بوممېل بايرېن مىيونخېن كۇلۇبى بىلەن يېرىم يىل بۇرۇن توختامنى بېكار قىلىپ مىلانغا قوشۇلدى . ئۇ مىلاندا پەقەت بىرلا پەسىل توپ تەپكەن بولسىمۇ ، مىلاندا ئۆزىنى نامايان قىلدى ۋە بىرلەشمە چىمپىيونلىقىنى قولغا كەلتۈردى . 2012-يىلى ئېيىنخوۋېنغا قايتىپ 2013-يىلى گوللاندىيە بىرلەشمىسى ئەڭ ئاخىرقى ئايلانمىدا قىزىل كارتا بىلەن مەيداندىن ئايرىلدى ، مۇسابىقىدىن كېيىن ئۇ پۇتبول ساھەسىدىن چېكىنگەنلىكىنى ئېلان قىلدى . بۇ قىزىل كارتا ئۇنىڭ پۇتبول ھاياتىغا ئاخىرقى گۇۋاھچى بولۇپ قالدى .

   8 . فىرانسېسكو . كوكو        (  ئىتالىيە  )

   فىرانسېسكو . كوكو 1977-يىلى 1-ئاينىڭ 8-كۈنى تۇغۇلغان . مەيداندىكى ئورنى سول قانات مۇداپىيىچى . 1995-يىلى 8-ئاينىڭ 27-كۈنى مىلانغا ۋەكالىتەن مىلاندىكى تۇنجى مەيدان مۇسابىقىسىنى ئوينىغان . ئۇ مىلاننىڭ بىر ئەزاسى بولۇش سۈپىتى بىلەن 1996-يىلى ۋە 1999-يىلى ئىتالىيە بىرلەشمە چىمپىيونلىقىنى قولغا كەلتۈرگەن . مىلاندا سول قانات مۇداپىيىچى ئورنىدا رىقابەت كۈچلۈك بولغانلىقتىن ، كوكونىڭ مەيدانغا چىقىش پۇرسىتى كۆپ بولمىغانىدى . 2002 \ 2001 يىللىق مۇسابىقە پەسلىدە بارسىلوناغا ئىجارە شەكلىدە قوشۇلغان ۋە 23 مەيدان مۇسابىقىغە قاتناشقان .

   7 . دېمتېرو . ئالبېرتېنى       (  ئىتالىيە  )

   دېمتېرو . ئابېرتېنى 1971-يىلى 8-ئاينىڭ 23-كۈنى تۇغۇلغان . مەيداندىكى ئورنى ئارقا بەل . ئۇ مىلان ياشلار مەشىق بازىسىدىن چىققان ئىقتىدارلىق توپچى ، شۇنداقلا كاپېرو دەۋرىدىكى مىلاننىڭ موھىم ئەزاسى . ئۇ 17 يېشىدىلى بىرلەشمىدىكى قەدىمىنى باشلىغان . ئۇنىڭ مەيدان كۈزىتىش دائىرىسىنىڭ كەڭلىكى ، ئوتتۇرا مەيداندىكى توپ كونتىرول قىلىشىتىكى تەمكىنلىكى ھەممىنى جۇملىدىن كاپېرونى قايىل قىلدى . ئۇ مىلان بىلەن بىرلىكتە ئاز بولمىغان شانلىق نەتىجىلەرنى ياراتتى . ئۇ مىلان ئۈچۈن 14 يىل كۈرەش قىلدى . بۇ 14 يىل جەريانىدا ئۇ مىلان ئۈچۈن 293 مەيدان مۇسابىقە ئويناپ 21 توپ ئۇرغان .
   ئۇ 2005 \ 2004 مۇسابىقە پەسلىدە بارسىلوناغا قوشۇلغان . ئۇ بارسىلونادا پەقەت بىر پەسىل توپ ئوينىغان بولسىمۇ ، بارسىلونا پۇتبول مەستانىلىرى قەلبىدىن چوڭقۇر ئورۇن ئالغان . 2005-يىلى يازدا ، ئۇ بارسىلونادا پۇتبول ساھەسىدىن چېكىنىدىغانلىقىنى ئېلان قىلدى . ئۇنىڭ خوشلىشىش مۇسابىقىسى شۇنچىلىك ھەيۋەتلىك بولدىكى مىلان ۋە بارسىلونانىڭ چولپانلىرى مەيداننى لەرزىزگە كەلتۈرىۋەتتى .

   6 . زامبىروتتا         (  ئىتالىيە  )

   زامبىروتتا 1977-يىلى 2-ئاينىڭ 19-كۈنى تۇغۇلغان . مەيداندىكى ئورنى ئوڭ قانات مۇداپىيىچى . ئۇ كۆپ قىرلىق توپچى بولۇپ ، ئوڭ قانات مۇداپىيىچى بولۇشتىن سىرت ، ئارقا بەل ، سول قانات مۇداپىيىچى ۋە ئوڭ قانات ئالدى بەلنىڭ ھۆددىسىدىنمۇ تامامەن چىقىپ كېتەلەيدۇ . 1994-يىلى 17 ياشلىق زامبىروتتا كومو كوماندىسىدا كەسپى پۇتبولچىلىق قەدىمىنى باسقان .
   2007 \ 2006 يىللىق مۇسابىقە پەسلىدە ئۇ يۇۋېنتوس كۇلۇبىدىن 14 مىليونلۇق باھا بىلەن بارسىلوناغا قوشۇلغان . ئۇ بۇندىن بۇرۇن ‹‹ دۇنيادىكى بىرىنچى يان يول مۇداپىيىچى ›› شەرىپىگە ئېرىشكەن . زامبىروتتانىڭ بارسىلونادىكى توپچىلىق ھاياتى يۇۋېنتۇستىكىدەك ئۇنداق شانلىق بولمىدى ھەم يۇۋېنتۇستىكىدەك رولىنى جارى قىلدۇرالمىدى . ئۇ 2  يىلدىن كۆپرەك ۋاقىتتا رېجىكارد يېتەكچىلىكىدىكى بارسىلوناغا تامامەن سىڭىپ كېتەلمىدى ۋە يۇۋېنتۇستىكى قاتتىق مۇداپىيىسى بارسىلونادا قانداقتۇر ئاجىزلاپ قالغاندەك ئىدى . ئۇ رېجىكاردنىڭ جەڭ پىلانىدىكى موھىم ئەزا بولسىمۇ ، لېكىن كۆپىنچى ۋاقلاردا ۋەزىپىسىنىڭ ھۆددىسىدىن تامامەن چىقىپ كېتەلمىدى ، بۇنىڭغا قارىتا ئۇ ھەم رېجىكاردمۇ ھەيران ئىدى . لېكىن ئۇنىڭ بارسىلونادىكى رولىغىمۇ سەل قاراشقا بولمايدۇ . ئۇنىڭ ئىقىتىدارىغا نىسبەتەن بۇ ئىپادە راستىنلا كۆڭۈلدىكىدەك ئەمەس ئىدى .
   2009 \ 2008 يىللىق مۇسابىقە پەسلىگە كەلگەندە ئۇ يەنە ئىتالىيە تۇپرىقىغا قايتىپ كەلدى ، لېكىن قايتىپ كەلگەندىكى كوماندىسى يۇۋېنتۇس بولماي بەلكى مىلان بولدى . يۆتكىلىش باھاسى 13 مىليون ياۋرو بولدى . زامبىروتتا مىلانغا قوشۇلغاندىن كېيىنمۇ ئىپادىسى ئادەتتىكىچە بولدى ، چۈنكى ئۇنىڭ يېشىمۇ چوڭىيىپ قالغان ئىدى . بىراق ئۇنىڭ مۇسابىقە تەجرىبىسى مىلان ئۈچۈن ئەڭ موھىم ئامىل ئىدى . ئۇ مىلاندا ھېچقانداق بىر نەتىجە يارىتالمىغان بولسىمۇ ، لېكىن مىلان پۇتبول مەستانىلىرىنىڭ قوللىشىغا ئېرىشتى .

   5 . دەيۋېس           (  گوللاندىيە  )

   ئېدگار . سىتېۋېن . دەيۋېس 1973-يىلى 3-ئاينىڭ 13-كۈنى تۇغۇلغان . ئۇنىڭ بويى پاكار بولسىمۇ ، بەدەن قۇۋۋىتىنىڭ كۈچلىكلىكى ، مەيداندىكى ھەرىكەت دائىرىسىنىڭ كەڭلىكى ، ئارقا بەلدىكى مۇداپىيىسىنىڭ قاتتىقلىقى بىلەن ھەممىگە تونۇشلۇق . ئۇ گوللاندىيە زەردارى ئاياكىس ياشلار مەشىق بازىسىنىڭ ئۈلگىلىك ئوقۇغۇچىلىرىنىڭ بىرى . ئۇنىڭ كەسپى پۇتبولچىلىق ھاياتى ئانا كوماندىسى ئاياكىس كۇلۇبىدىن باشلانغان . ئۇ توپ تالىشىشنىڭ ئىزچىل ۋە ئۈنۈملۈكلىكى ، يىراقتىن توپ ئۇرۇشنىڭ ئالاھىدە بولۇشى بىلەن 18 يېشىدىلا ئاياكېس كوماندىسىنىڭ ئاساسلىق ئارقا بەل توپچىسى بولۇپ قالغان . ئۇ ئاياكېس كوماندىسىنىڭ ‹‹ ئالتۇن دەۋرى ›› دىكى ۋە شۇ ‹‹ ئالتۇن دەۋرى ›› نى ياراتقان توپچىلارنىڭ بىرى .
   ئاياكېستىكى ئېسىل ئىپادىسى 1996-يىلى ئۇنى ئىتالىيە زەردارى مىلانغا ئېلىپ كەلدى . مىلان مەستانىلىرى ئۇنىڭدىن زور ئۈمىدلەرنى كۈتكەن ئىدى . لېكىن ئاياكېستا چاقنىغان بۇ يولتۇز مىلانغا كېلىپ كوماندىغا سىڭىشىپ كېتەلمىدى . شۇ سەۋەبتىن ئۇ يەنىلا شۇ سوغۇق ئورۇندۇققا بەنىد قىلىندى . ئۇ بىر يىللىق بىرلەشمىدە پەقەت 15 مەيدانلا مۇسابىقىغە چىقتى . 98 \ 97 مۇسابىقە پەسلىگە كەلگەندە ، ئەمدىلا كوماندىغا ئۆزلىشىۋاتقان دەيۋېس مۇسابىقىدە ئېغىر يارىلىنىپ ، يېرىم يىللىق كېسەل كارۋىتىغا ھەمراھ بولۇپ قالىدۇ . ئاخىرىدا مىلاننىڭ تاقىتى توشۇپ ، قىشلىق يۆتكىلىشتە ئەرزانلا باھا بىلەن يۇۋېنتۇسقا سېتىۋېتىدۇ .
   يۇۋېنتۇسقا قوشۇلغان دەيۋېس يەنە قايتا ئويغىنىدۇ . ئۇنىڭ يۇۋېنتۇستىكى ئىپادىسى ‹‹ ياۋا توڭگۇز ›› نىڭ قايتا تىرىلگەنلىكىنى نامايان قىلىدۇ . ئۇ يۇۋېنتۇستا ئەڭ يۇقىرى پەللىسىنى يەنە بىر قېتىم يارىتىدۇ . 2004- يىلىغا كەلگەندە ، ‹‹ ياۋا توڭگۇز ›› نىڭ يۇۋېنتۇستىكى ئورنى تەۋرەپ قالىدۇ ھەم كۇلۇب بىلەن مۇئاش مەسىلىسى توغرىسىدا كۆپ تالاش-تارتىشلار بولىدۇ . شۇندىن كېيىن قىشلىق يۆتكىلىشتە بارسىلوناغا ئىجارە شەكلىدە قوشۇلىدۇ . ئۇ بارسىلوناغا قوشۇلۇپ ‹‹ ئالدىنقى يېرىم يىلدىكى نەتىجىسى ئەڭ ياخشى ئىسپانىيە كۇلۇبى ›› نىڭ شاھىدى بولىدۇ . 2004-يىلى يازدا ، دەيۋېس يۇۋېنتۇسقا قايتىدۇ ، بىراق مۇئاش مەسىلىسىدە يەنە بىرلىككە كېلەلمەي ئاخىرىدا يۇۋېنتۇس بىلەن خوشلىشىدۇ .

   4 . كىلويۋېرت         (  گوللاندىيە  )

   پاترېك . كىلويۋېرت 1976-يىلى 7-ئاينىڭ 1-كۈنى ئامېستېردامدا تۇغۇلغان . ئۇ گوللاندىيە دۆلەت كوماندىسىدىكى توپ ئۇرۇش رېكورتىنى ساقلاپ تۇرغۇچى ( 40 توپ ) . ئۇ 7 يېشىدا ئاياكېس كوماندىسى مەشىق بازىسىغا قوشۇلغان . 1994-يىلى 8-ئاينىڭ 21-كۈنى ئاياكېس بىرىنچى كوماندىسىدىكى بىرىنچى مەيدان مۇسابىقىسىنى ئوينايدۇ ۋە بىر توپ ئۇرىدۇ .
   كىلويۋېرت بويى ئېگىز ، كۈچلۈك ، تېخنىكىسى ئۈستۈن ھۇجۇمچى . ئۇ 98 \ 97 مۇسابىقە پەسلىگە كەلگەندە مىلانغا قوشۇلدى . ئۇ مىلانغا كەلگەن بىرىنچى پەسىلدىلا ئۆز رولىنى ياخشى جارى قىلدۇرۇپ ، 24 مەيدان مۇسابىقىدە 6 توپ ئۇردى . بىراق مىلاندىكى ھۇجۇم سېپىدىكى رىقابەتنىڭ كۈچلۈكلىكى ۋە بېرخوفنىڭ مىلانغا قوشۇلۇشى سەۋەبىدىن ، 99 \ 98 مۇسابىقە پەسلىگە كەلگەندە بارسىلوناغا قوشۇلدى .  ئۇ بارسىلوناغا كەلگەندىن كېيىن ئۆزىنى ھەقىقى تۈردە ئىسپاتلىدى . كېلىپ بىرىنچى پەسلىلا بىرلەشمە چىمپىيونلىقىنى قولغا كەلتۈردى . 2000 \99 مۇسابىقە پەسلىگە كەلگەندە ، بارسىلونانىڭ 9-نومۇرىغا ئېرىشتى . ئۇ بارسىلونادىكى 6 يىللىق پۇتبول ھاياتىدا،  ئۆزىنىڭ ئالتۇن دەۋرىنى ياراتتى . بىراق ئالدى-كەينى بولۇپ رېۋالدو ۋە ساۋىئولالارنىڭ قوشۇلۇشى ئۇنىڭ مەيداندىكى ئورنىغا خەۋپ ئېلىپ كەلدى . 2003-يىلى رونالدىنھونىڭ قوشۇلۇشى ئۇنىڭ بارسىلونادىكى ھاياتىغا تېخىمۇ چوڭ بىر بېسىم ئېلىپ كەلدى . 04 \ 03 مۇسابىقە پەسلىدە ئۇ بىرلەشمىدە ئاران 8 توپ ئۇرۇپ ئەڭ ناچار نەتىجىسىنى ياراتتى ، مۇشۇ سەۋەب تۈپەيلىدىن ۋە مەيدان سىرتىدىكى تۇرمۇشىنىڭ قالايمىقانلىق سەۋەبىدىن ، بارسىلونا كۇلۇبى بۇ چولپان بىلەن خوشلاشتى .

   3 . رېۋالدو              (  بىرازىلىيە  )

   رېۋالدو 1972-يىلى 4-ئاينىڭ 19-كۈنى تۇغۇلغان . ئۇنىڭ يۇرتى بىرازىلىيەنىڭ شەرقى شىمالىدا بولۇپ ، پۇتبول چولپانلىرى چىقىدىغان رايون ئەمەس ئىدى . شۇ سەۋەبتىنمۇ بىرازىلىيە ئاخبارات ۋاستىلىرى ئۇنىڭدىن چوڭ ئۈمىدلەرنى كۈتمىگەن ئىدى . كىچىكىدىن نامراتلىقتا چوڭ بولغان رېۋالدو ئىچ مىجەز يېتىلدۈرگەن ئىدى . ئۇ 13 يېشىدا سان كېروس ئۆسمۈرلەر كوماندىسىنىڭ بىر ئەزاسى بولغان ھەمدە سېستىمىلىق مەشىق قىلىش شەرىپىگە ئېرىشكەن . 16 يېشىدا سان پاۋلو ياشلار كوماندىسىغا قوشۇلغان . شۇ يىلى ئۇنىڭ دادىسى قاتناش ۋەقەسىدە ئالەمدىن ئۆتكەندىن كېيىن ئۈينىڭ بارلىق يۈكى بۇ ئۆسمۈرنىڭ زىممىسىگە ئارتىلىدۇ ، ئۇ شۇ سەۋەبلىك ئۆزى ئەڭ قىزىقىدىغان پۇتبولدىن ۋاز كېچىپ باشقا خىزمەت تېپىپ ئائىلىنى بېقىشقا يۈزلىنىدۇ . لېكىن ئۇنىڭ ئاپىسى ئۇنىڭ ئارزۇسىنىڭ كۆزدە تۇتۇپ ، ئۇنىڭ داۋاملىق توپ تېپىشىنى پۈتۈن كۈچى بىلەن قوللايدۇ ۋە مەدەت بېرىدۇ .
   ئاتلانتا ئولىمپىك يىغىنىدىن كېيىن رېۋالدو ئىسپانىيە لاكلونىيە كوماندىسىغا قوشۇلىدۇ ۋە كوماندىنىڭ رېكورتلىرىنى ئارقا-ئارقىدىن يېڭىلايدۇ . بۇ ياشنىڭ ئېسىل ئىپادىسى بارسىلونا كۇلۇبىنى ئۆزىگە تارتىدۇ . 1997-يىلى بارسىلونا كۇلۇبى رىۋالدونى 16 مىليون ياۋرولۇق باھا بىلەن سېتىۋالىدۇ ۋە 6 يىللىق توختام تۈزىدۇ . ئۇنىڭ توختام بۇزۇش ھەققىنى 92 مىليون ياۋرو دەپ بېكىتىدۇ . ئۇ بارسىلوناغا قوشۇلۇپ بىرىنچى پەسىلدىلا 19 توپ ئۇرىدۇ ، شۇنداقلا ‹‹ ئىسپانىيە بىرلەشمىسىدىكى ئەڭ مۇنەۋۋەر چەت ئەللىك توپچى ›› شەرىپىگە ئېرىشىدۇ . رىۋالدو بارسىلونادا ئەڭ يۇقىرى پەللىسىنى يارىتىدۇ ،ھەم ئەڭ يۇقىرى شەرەپلەرگە ئېرىشىدۇ . 1999-يىلى دۇنيا پۇتبول ئەپەندىسى ۋە ياۋروپا ئالتۇن توپ مۇكاپاتىغا ئېرىشىپ ، پۇتبول ھاياتىغا ئۆچمەس بىر ئىز قالدۇرىدۇ .
   2002-يىلىغا كەلگەندە ، رىۋالدو بىلەن كۇلۇب تەرەپتە ئارازچىلىق ئەۋجىگە چىقىدۇ . 6-ئايغا كەلگەندە بارسىلونا تەرەپ رىۋالدو بىلەن 1 يىل بۇرۇن توختام بېكارلايدۇ . شۇنىڭ بىلەن رىۋالدو ئەركىن توپچى سالاھىتىدە مىلانغا قوشۇلىدۇ . لېكىن ئۇنىڭ مىلاندىكى كۈنلىرى تازا كۆڭۈلدىكىدەك بولمايدۇ ۋە ئاساسلىق ئورۇنغا ئېرىشەلمەيدۇ . شۇنىڭ بىلەن ئۇ مىلاندىنمۇ ئايرىلىپ بىرازىلىيەگە يول ئالىدۇ . 2004-يىلى گىرىتسىيە زەردارى ئولىمپىكىياس كۇلۇبىغا قوشۇلىدۇ . ئۇ گىرىتسىيە ، ئۆزبىكىستان ۋە ئافرىقىدىكى ئانگولا قاتارلىق دۆلەتلەردىكى كۇلۇبلاردا توپ تېپىدۇ . 2012-يىلى 11-ئاينىڭ 7-كۈنى 40 ياشلىق رىۋالدو ئانگولا كابىسكوپ كۇلۇبىدىن ئايرىلىدۇ .

   2 . رونالدىنھو          (  بىرازىلىيە  )

   رونالدىنھو 1980-يىلى 3-ئاينىڭ 21-كۈنى تۇغۇلغان . ئۇ دۇنيا پۇتبولچىلىقىدا 21 ئەسىردىكى تېخنىكىسى ئەڭ ئۈستۈن پۇتبولچى نامى بىلەن مەشھور . ئۇ 2004-يىلى ۋە 2005-يىلى كەينى-كەينىدىن 2 قېتىم دۇنيا پۇتبول ئەپەندىسى بولۇپ باھالانغان . 2005-يىلى ياۋروپا پۇتبول ئەپەندىسى شۇنداقلا تۇنجى نۆۋەتلىك خەلىقئارا كەسپى پۇتبولچىلار جەمئىيىتى ‹‹ ئەڭ مۇنەۋۋەر پۇتبولچى ›› شەرىپىگە ئېرىشكەن .
   رونالدىنھو ھەقىقى تۈردە تونۇلغان ۋاقتى 2002-يىللىق دۇنيا لوڭقىسى تالىشىش مۇسابىقىسى بولۇپ ، پۇتۇن دۇنيا پۇتبول مەستانىلىرىنى ھەيران قالدۇرغان . ئۇنىڭ كۆرۈش دائىرىسىنىڭ كەڭلىكى ، پاس بېرىشىنىڭ ئۈنۈملۈكلىكى ۋە ئالداپ بۆسۈپ كىرىشنىڭ ئالاھىدە بولۇشى ، تېخنىكىسىنىڭ ئۈستۈن ھەم ھەر خىل ئۇسۇلدا توپ ئۇرۇشنىڭ كۆرۈنەرلىكلىگى بىلەن زەردارلارنىڭ ئالاھىدە دېققىتىنى تارتقان .
   1998-يىلى رونالدىنھو شۇ يەردىكى گىرىمىئو كۇلۇبى بىلەن بىرىنچى قېتىملىق توختامىنى ئىمزالىغان . 2001-يىلى 3-ئايدا ، فىرانسىيە زەردارى پارىژ سېنت-گېرمان كۇلۇبى 4 مىليون 500 مىڭ ياۋرولۇق باھا بىلەن ئۇنى قوشۇۋالغان ۋە 5 يىللىق توختام ئىمزالىغان .
   2003-يىلى 7-ئاينىڭ 19-كۈنى بارسىلونا كۇلۇبى 28 مىليون ياۋرولۇق باھا بىلەن بىرازىلىيىلىك تالانت ئىگىسى رونالدىنھونى سېتىۋالغانلىقىنى ئېلان قىلدى . ئۇ بارسىلوناغا قوشۇلغان بىرىنچى كۈندىن باشلاپ بۇ زەردارغا سۇدەكلا سىڭىپ كەتتى . بۇ ئۇنىڭ غەلبە دەرۋازىسىنىڭ ئېچىلغانلىقىدىن دېرەك بەردى . ئۇ بارسىلونادىكى پۇتبول ھاياتىدا كامپ نونىڭ ھەقىقى شاھزادىسى ئىكەنلىكىنى ئىسپاتلىدى . ئۇنىڭ كامپ نودا قالدۇرغان ھەر بىر ئىزى پۇتكۈل بارسىلونا پۇتبول مەستانىلىرىنىڭ يۈرىكىگە ئورناپ كەتتى .
   2006 -يىللىق دۇنيا لوڭقسى موسابىقىسىدىن كۇلۇبقا قايتىپ كەلگەن رونالدىنھونىڭ ئىپادىسىدە داۋالغۇچ يۈز بەردى . مېسسىنىڭ تېزلىكتە يېتىلىشى ئۇنىڭ كامپ نودىكى ئورنىغا تەھدىت ئېلىپ كەلدى . ئۇنىڭ بارا-بارا مەيدان سىرتىدىكى تۇرمۇشىنىڭ ئاشكارلىنىشى ۋە كۆپىيىشى ئۇنىڭدەك ئاساسى ئەزانى ئاستا-ئاستا ئورۇندۇق بېقىشقا مەجبۇر قىلدى . 2008-يىلى 1-ئايدا ، كۇلۇب تەرەپ رونالدىنھونىڭ سول تىز بوغۇمىنىڭ يارىلانغانلىقىنى ئېلان قىلدى . شۇنىڭدىن باشلاپ بۇ كامپ نونىڭ ئەتىۋارلىق ‹‹ شاھزادىسى  ›› كامپ نودىن بارغانسىرى يىراقلاشتى .
   2008-يىلى 7-ئاينىڭ 16-كۈنى مىلان كۇلۇبى رونالدىنھونىڭ مىلانغا قوشۇلغانلىق خەۋىرىنى ئېلان قىلدى . ئۇ مىلانغا قوشۇلغاندىن باشلاپ مىلان مەستانىلىرىغا ‹‹‹ سامبا ئۇسۇلچىسى ›› نىڭ مىلاندىكى كېچىلىكىنى تەقدىم ئەتتى . شۇنداق ، ئۇنىڭ مەيداندىكى ھەر بىر ھەرىكىتى ئادەمگە ھوزۇر بېرىدۇ ۋە ھاياجانلارغا چۆمدۈرىدۇ . مىلان يادروسى كاكانىڭ مادرېدقا يۆتكىلىشى بىلەن رونالدىنھونىڭ مىلاندىكى ئورنى تېخىمۇ مۇستەھكەملىنىدۇ ۋە ئىپادىسى بارغانسىرى ياخشىلىنىدۇ . 2010-يىلى دۇنيانى لەرزىگە سالغان بۇ ‹‹ سامبا ئۇسۇلچىسى ›› بىرازىلىيەگە قايتىدۇ .

   1 . رونالدو          (  بىرازىلىيە  )

   رونالدو 1976-يىلى 9-ئاينىڭ 22-كۈنى تۇغۇلغان . ‹‹ تاشقى پىلانت ئادىمى ›› نامى بىلەن ئاتالغان بۇ پۇتبول سەنئەتكارى ، يېڭى دەۋىر پۇتبولى ئۈچۈن ئۆچمەس تۆھپىلەرنى ياراتتى ۋە ئىزلارنى قالدۇردى . ئۇنىڭ ياراتقان رېكورتلىرى ، قولغا كەلتۈرگەن نەتىجە ، شان-شۆھرەتلىرى سان-ساناقسىز .
   16 ياشلىق رونالدو دۆلەت ياشلار كوماندىسىغا تاللىنىپ ، 57 مەيدان مۇسابىقىدە 59 توپ ئۇرۇپ ، يېڭى بىر پۇتبول شاھىنىڭ يېتىلىپ چىقىۋاتقانلىقىدىن دېرەك بېرىدۇ . 1994-يىلى رونالدو گوللاندىيە زەردارى ئېيىنخوۋېن كۇلۇبىغا قوشۇلۇپ ياۋروپا سەپىرىنى رەسمىي تۈردە باشلايدۇ . 96 \95 مۇسابىقە پەسلىدە ئېيىنخوۋېنغا ۋەكالىتەن 13 مەيدان مۇسابىقە ئويناپ 12 توپ ئۇرىدۇ . ئارقىدىنلا يارىلىنىش ئۇنى مەيداندىن ۋاقتىنچە ئايرىيدۇ .  ھاياتىدىكى بىرىنچى قېتىملىق تىزىنىڭ يارىلىنىشى دەل مۇشۇ يەردىن باشلىنىدۇ . 1996-يىلى 2-ئايدا ئوپراتسىيە مۇۋاپىقىيەتلىك بولىدۇ . 7-ئايدا ئىسپانىيە زەردارى بارسىلوناغا 19 مىليون 500 مىڭ ياۋرولۇق يۇقىرى باھا بىلەن قوشۇلىدۇ . ئۇ بارسىلونادا پەقەت بىر پەسىللا ئوينىغان بولسىمۇ ، ھاياتىدىكى ئەڭ ئېسىل مۇكاپات ‹‹ دۇنيا پۇتبول ئەپەندىسى ›› گە ئېرىشىدۇ . ئۇنىڭ كامپ نودا قالدۇرغان ئىزناسى كىشىلەر كۆز ئالدىدىن ھازىرغىچە كەتكىنى يوق .
   2007-يىلى مادرېد 7 مىليون 500 مىڭ ياۋرولۇق تۆۋەن باھا بىلەن مىلانغا سېتىۋېتىدۇ . ئۇنىڭ مىلاندىكى ئىپادىسىمۇ ياخشى بولىدۇ . قايتا-قايتا يارىلىنىش بۇ ‹‹ تاشقى پىلانت ئادىمى ›› نى پۇتبول مەيدانىدىن ياراقلاشتۇرىدۇ . ئۇنىڭ پۇتبول ھاياتى مەيلى دۆلەت كوماندىسىدا بولسۇن ، مەيلى كۇلۇبلاردا بولسۇن ئىنتايىن مۇۋاپىقىيەت ئىچىدە ئۆتتى . 2011-يىلى 2-ئاينىڭ 14-كۈنى رونالدو پۇتبول ساھەسىدىن چېكىنگەنلىكىنى ئېلان قىلدى . بۇ خەۋەرنىڭ چىقىشى نۇرغۇن ئادەملەر كۆڭلىنى غەش قىلدى ئەلۋەتتە !! شۇنداق قىلىپ كىشىلەر كۆڭلىدىكى بۇ ‹‹ پۇتبول شاھى ›› مەيداندىن خوشلاشتى .

                                                                                                                                                تۈگىدى .


   

   

CR.7

ماۋۇ بىر نادىر تىما...ئاجايىپنى ئىچكەشكە ئاجايىپ يىزىۋەتتىڭىزمۇ نىمە بەك تەپسىلىي يىزىلىپتۇ...تولۇق ئوقۇپ چىقتىم...

nayil

CR.7 يوللىغان ۋاقتى  2013-8-18 18:41
ماۋۇ بىر نادىر تىما...ئاجايىپنى ئىچكەشكە ئاجايىپ يىزىۋ ...

رەھمەت !! ئاجايىپنىغۇ ئىچمىگەن ، غۇلجىغا قايتىپ ئاتا-ئانا ، دوس بۇرادەرلەر بىلەن ھېيىت ئۆتكۈزۈپ ئىلھاملىنىپ قالغان چېغىم بار !!!~

ronaldo10

بەك تەپسىلى يىزىپسىز

بىرازىلىيەلىكلەرنىڭ جەننىتى مادرىدمۇ ياكى بارسىلونامۇ

ronaldo10

مۇشۇ كۈنلەردە مۇنبەر چۆلدەرەپ قالغان چىراي ،،،،،،،،،،
مۇشۇنداق ئىسىل تىمىغىمۇ ئىنكاس يىزىپ قوياي دىمەپسىلە باللا ،،،،،، ئەزالار قاتارىدا 846 ئادەم زىيارەت قىلىۋاتىدۇ دەيدۇ بولمىسا

تەنتەربىيە

بوجان دىگەن بالا بىر ئاز چاقنىيالىغان بولسا ئۇمۇ بۇ سەپكە قىتىلاتتى!

tanhategin

ئېسىل تىما بوپتۇ!...جاپا چەكتىڭىز!
ما بۆجەن قايارگە كەتتى شۇندا قىپ؟

بۈرگىچاق

بودەك رونالدو تازنىڭ مىلاندا توپ تەپكەنلىكىنى بۈگۈن بىلىدىم جۇما.

alimran

ياخشى  تېما   بۇلۇپتۇ.    ئەتىراپلىق تىزىپسىز .   

ＲＯＮＡＬＤＯ9

ياخشى  تېما   بۇلۇپتۇ   چاۋاك

رىقابەت

گوللاندىيلىكلەر كۆپ سالماقنى ئگەللەيدىكەن

رىقابەت

رىۋالدو ئۆزبىكىستاندىمۇ توپ ئوينىغانما ؟