|
تۇرپان باھار پەسللىك بىرلەشمىسىنىڭ 2- ئايلانمىسى ۋە ئۇقتۇرۇشلار
ئەسسالامۇ ئەلەيكۇم ھۆرمەتلىك مۇنبەرداشلار:
31 – مارت تۇرپان باھار پەسىللىك پۇتبول بىرلەشمىسىنىڭ 2- ئايلانمىسى شەھەرلىك 7- باشلانغۇچ مەكتەپ مەيدانىدا ئۆتكۈزۈلدى.(تۇرپان بىرلەشمىسى يەتتە كىشىلىك مۇسابىقە بولۇپ، 25 مىنۇتتىن ئىككى مەيدان جەمئىي 50 مىنۇت، مۇسابىقە قائىدىسى ئومۇملاشقان ئۆلچەمنى ئاساس قىلىدۇ. بىرلەشمىدە ھازىر جەمئىي سەككىز كوماندا بولۇپ، ھەربىر پەسىللىك بىرلەشمە ئالدىنقى يېرىم پەسىل ۋە كېيىنكى يېرىم پەسىل دەپ ئايرىلىدۇ، شۇنداق بولغاندا ھەربىر كوماندا ئىككى قېتىمدىن ئۇچرىشىدۇ، ھەربىر پەسىللىك بىرلەشمە 14 ئايلانما، ھەر ھەپتىنىڭ يەكشەنبە كۈنى شەھەرلىك 7- باشلانغۇچ مەكتەپتە ئېلىپ بېرىلىدۇ. 14 ھەپتىدە ئاخىرلىشىدۇ. ئەڭ ئاخىرىدا نومۇرى كۆپ بولغان كوماندا چىمپىيۇن بولىدۇ، نومۇرى تەڭلىشىپ قالسا، تەڭلىشىپ قالغان كوماندىلارنىڭ ئۆز – ئارا ئۇچراشقان ۋاقىتتىكى نەتىجىسىگە قاراپ چىمپىيۇن بەلگىلىنىدۇ.)
چۈشتىن بۇرۇنقى 1- مەيداندا سەرناز كوماندىسى بىلەن ئەلقىيا كوماندىسى ئۇچراشتى. 50 مىنۇتلۇق قاتتىق تىركىشىش ئارقىلىق ئەلقىيا كوماندىسى 1 : 0 نەتىجە بىلەن سەرناز كوماندىسىنى يەڭدى.
چۈشتىن بۇرۇنقى 2 – مەيداندا ئىتتىپاق كوماندىسى بىلەن ئاتەش ج خ كوماندىسى ئۇچراشتى، ھەر ئىككى كوماندا قاپقىچىلىرىنىڭ بىر قانچە خەتەرلىك توپ ۋە يەكمۇ – يەك توپلارنى مۇۋەپپەقىيەتلىك توسۇپ قېلىشى بىلەن ئىككى تەرەپ 0 : 0 نەتىجە بىلەن تەڭشلىپ قالدى. بۇ ئاتەش ج خ كوماندىسىنىڭ تۇرپان بىرلەشمىسىگە قاتناشقاندىن بۇيانقى ئۈچىنچى قېتىم ئىتتىپاق كوماندىسى بىلەن تەڭلىشىپ قېلىشى.
چۈشتىن كېيىنكى مۇسابىقىلەر نىڭ نەتىجىسى:
تەجرىبە ئوتتۇرا مەكتەپ كوماندىسى 6 : 1 ياشلار بىرلەشمىسى كوماندىسى
«قاڭقىل تائاملىرى» كوماندىسى 7 : 0 يار ئوتتۇرا مەكتەپ كوماندىسى
ئۇقتۇرۇش
ھەرقايسى كوماندىلار:
چوكانتال بايرىمىلىق دەم ئېلىش سەۋەبى بىلەن يەكشەنبە كۈندىكى مۇسابىقە پەيشەنبە (4 - ئاپرېل)كۈنىگە تەڭشەلدى، ئورنى ۋە مۇسابىقە باشلاش ۋاقتىدا ئۆزگىرىش يوق.
ئالاھىدە ئۇقتۇرۇش قىلىندى.
تۇرپان ۋىلايەتلىك پۇتبولچىلار جەمئىيىتى
2013- يىلى 4- ئاينىڭ 1- كۈنى
يۈسۈپجان ۋە سادىققا جازا قوشۇش ئۇقتۇرۇشى
تۇرپان باھار پەسىللىك بىرلەشمىسىنىڭ 2- ئايلانمىسىنىڭ سەرناز كوماندىسى بىلەن ئەلقىيا كوماندىسى ئوتتۇرىسىدىكى مۇسابىقىدە سەرناز كوماندىسىنىڭ 5- نومۇرلۇق ماھىرى يۈسۈپجان قارشى تەرەپ ماھىرىنى مەقسەتلىك تېپىپ يېقىتىۋەتكەن.
يەنە شۇ كۈنىدىكى ئاتەش ج خ كوماندىسى بىلەن ئىتتىپاق ئوتتۇرىسىدىكى مۇسابىقىدە ئاتەش ج خ كوماندىسىنىڭ 11- نومۇرلۇق ماھىرى سادىق توپقا بولغان كونتروللىقىنى يوقاتقان ئەھۋالدا قارشى تەرەپكە مەقسەتلىك پۇت سالغان.
شۇنىڭ ئۈچۈن تۇرپان ۋىلايەتلىك پۇتبولچىلار جەمئىيىتى يۇقىرىدىكى ھەر ئىككى ماھىرغا بىر مەيدان مۇسابىقىدىن چەكلەش، 50 يۈەن جەرىمانە قويۇش جازاسى بەردى.
ھەرقايسى كوماندىلارنىڭ ساۋاقلارنى قوبۇل قىلىپ، پۇتبول ئىستىلىغا ھۆرمەت قىلىپ، ياخشى ئوبراز تىكلىشىنى، «ساغلام بىرلەشمە، كۆڭۈللۈك ھايات» تىن ئىبارەت بىرلەشمە شوئارى ئۈچۈن كۈچ چىقىرىشىنى ئۈمىد قىلىمىز.
تۇرپان ۋىلايەتلىك پۇتبولچىلار جەمئىيىتى
2013- يىلى 4- ئاينىڭ 1- كۈنى
ئەلقىيا كوماندىسى بىلەن ياشلار بىرلەشمىسى كوماندىسىغا جازا بېرىش ئۇقتۇرۇشى
تۇرپان باھار پەسىللىك بىرلەشمىسىنىڭ 2- ئايلانمىسىنىڭ سەرناز كوماندىسى بىلەن ئەلقىيا كوماندىسى ئوتتۇرىسىدىكى مۇسابىقىدە ئەلقىيا كوماندىسى بەلگىلەنگەن ۋاقىتتا كېلەلمەي، شۇكۈنىدىكى چۈشتىن بۇرۇنقى ئىككى مەيدان مۇسابىقىنىڭ 15 مىنۇت كېچىكىشىگە سەۋەب بولغان.
ياشلار بىرلەشمىسى كوماندىسى پۇتبولچىلار جەمئىيىتىنىڭ ئۇقتۇرۇشىغا سەل قاراپ، تازىلىق نۆۋەتچىلىكى ۋەزىپىسىنى تەلەپ بۇيىچە ئورۇنلىمىغان.
شۇنىڭ ئۈچۈن:
1. ئەلقىيا كوماندىسىغا 100 يۈەن جەرىمانە قويۇلدى.
2. ياشلار بىرلەشمىسى كوماندىسىغا 100 يۈەن جەرىمانە قويۇلدى.
ھەرقايسى كوماندىلارنىڭ ساۋاقلارنى قوبۇل قىلىپ، پۇتبول ئىستىلىغا ھۆرمەت قىلىپ، ياخشى ئوبراز تىكلىشىنى، «ساغلام بىرلەشمە، كۆڭۈللۈك ھايات» تىن ئىبارەت بىرلەشمە شوئارى ئۈچۈن كۈچ چىقىرىشىنى ئۈمىد قىلىمىز.
تۇرپان ۋىلايەتلىك پۇتبولچىلار جەمئىيىتى
2013- يىلى 4- ئاينىڭ 1- كۈنى
| 
يوللىغان ۋاقتى 2013-4-2 10:12:51
