تۇرپان بىرلەشمىسى باھار پەسىللىك ئايلانمىسى باشلاندى

ئاتەش

ئەسسەلامۇئەلەيكۇم ھۆرمەتلىك مۇنبەرداشلار، تۇرپان ۋىلايەتلىك پۇتبولچىلار جەمئىيىتىدىكى بارلىق قېرىنداشلاردىن سىلەرگە سالام.
24 – مارت تۇرپان ۋىلايەتلىك پۇتبولچىلار جەمئىيىتى تۈرلۈك قېيىنچىلىقلارنى يېڭىپ، تۇرپان بىرلەشمىسىنىڭ باھار پەسىللىك ئايلانمىسىنى رەسمىي باشلىدى. مۇسابىقە باشلىنىشتىن  بۇرۇن، قىشلىق ئايلانمىدىن قىسقىچە خۇلاسە چىقىرىلىپ، مۇكاپاتلاش مۇراسىمى ئۆتكۈزۈلدى.
قىشلىق ئايلانما 17- مارت ئاخىرلاشقان بولۇپ بىر ھەپتىلىك جىددىي ئېلىپ بېرىلغان ئەزا تەڭشەش، قايتا تىزىملاش، مۇسابىقە ئورۇنلاشتۇرۇش خىزمىتى ئاخىرلاشقاندىن كېيىن 24- مارت يەكشەنبە باھار پەسىللىك بىرلەشمە مۇۋەپپەقىيەتلىك باشلاندى.



قىسقىچە خۇلاسىدىن كېيىن مۇكاپاتلاش مۇراسىمى باشلاندى.


قىشلىق ئايلانمىدا مۇنەۋۋەر پۇتبولچى مۇكاپاتىغا ئىتتىپاق كوماندىسىدىكى فەرۇق ئېرىشتى.


تالانتلىق نوتا مۇكاپاتىغا ئەلقىيا كوماندىسىدىكى دىليار ئېرىشتى.


مۇنەۋۋەرمەشقاۋۇل مۇكاپاتىغا يار ئوتتۇرا كوماندىسىدىكى ئەلىجان ئېرىشتى.(ئوتتۇرىدىكى)


مۇنەۋۋەر رېپىر مۇكاپاتىغا تۇرپان شەھىرى جاي ئوتتۇرا مەكتەپ ئوقۇتقۇچىسى دۆلەتلىك 1- دەرىجىلىك رېپىر ۋەلى مۇئەللىم ئېرىشتى.


مەدەنىيەتلىك كوماندا مۇكاپاتىغا يار ئوتتۇرا كوماندىسى ئېرىشتى.(ياش كاپىتان مۇھەممەتجان)


مۇنەۋۋەر كوماندا مۇكاپاتىغا ئەلقىيا كوماندىسى ئېرىشتى.


مۇنەۋۋەر ھۇجۇمچى مۇكاپاتىغا ئەلقىيا كوماندىسىدىكى ۋەلى ئېرىشتى.


قىشلىق ئايلانمىنىڭ چىمپيۇنلىقىغا 35 نومۇر ، 62 ساپ توپى بىلەن ئەلقىيا كوماندىسى ئېرىشتى.


ئەلقىيا كوماندىسىنىڭ قىشلىق ئايلانمىدىكى ئەزالىرى


ئىتتىپاق كوماندىسى 31 نومۇر، 16 ساپ توپى بىلەن  2 –؛ «قاڭقىل تائاملىرى» كوماندىسى 27 نومۇر، 18 ساپ توپى بىلەن 3- ؛«چۈنچە»
ئائىلە ساياھەتچىلىكى كوماندىسى 22 نومۇر، 23 ساپ توپى بىلەن 4-؛ ئاتەش ج خ كوماندىسى 20 نومۇر  بىلەن 5- ؛ يار ئوتتۇرا مەكتەپ كوماندىسى 18 نومۇر بىلەن 6- ؛ ئەزىمەتلەر كۇلۇبى كوماندىسى 8 نومۇر بىلەن 7-؛ ياشلار بىرلەشمىسى كوماندىسى 8- بولدى.


مۇكاپاتلاش مۇراسىمىدىن كېيىن تۇرپان بىرلەشمىسىنىڭ باھار پەسىللىك ئايلانمىسى باشلاندى. ئالدى بىلەن ئىتتىپاق كوماندىسى بىلەن ياشلار بىرلەشمىسى ئوتتۇرىسىدا كەسكىن مۇسابىقە ئېلىپ بېرىلدى.



ئىتتىپاق كوماندىسىنىڭ ئەزالىرىدا  13- نومۇرلۇق جاڭ مىڭجۈننىڭ قوشۇلغىنىدىن باشقا كۆپ ئۆزگىرىش بولمىغان بولسىمۇ ئۇلار دەسلەپتە پەقەتلا ھۇجۇم يۆلىنىشىنى تاپالمىدى، ئەكسىچە  مۇداپىئەدە يۇچۇق كۆپ بولۇپ مۇسابىقە باشلىنىپ ئۇزۇن بولمايلا بىر توپ يەۋالدى. كېيىن ئۇلار يېڭى ئەزا جاڭ مىڭجۈننى مەركەز قىلىپ ئۈنۈملۈك ھۇجۇم تەشكىللەپ كەينى – كەينىدىن ئىككى توپ ئۇردى. كيېىنكى يېرىم مەيداندا مۇدائىپەنى كۈچەيتتى. زاپاس ئەزا سالاھىيىتى بىلەن مەيدانغا ئالمىشىپ چىققان ئۈمىدجان كەينى سەپتىن بىر توپنى تارتىپ ئېلىپ ھەمراھلىرى بىلەن ناھايىتى چىرايلىق پاسلىشىپ قاپقىغا ئۇرۇپ كىرگۈزدى، ئاخىرىدا ئىتتىپاق 1:3 نەتىجە بىلەن غەلىبە قىلدى.
چۈشتىن بۇرۇن مۇشۇ بىر مەيدان بىلەن ئاخىرلاشتى.


چۈشتىن كېيىنكى تۇنجى مەيداندا ئاتەش ج خ كوماندىسى بىلەن يار ئوتتۇرا كوماندىسى ئۇچراشتى.


ئاتەش ج خ كوماندىسى ئالدىنقى مەيداندا قاتتىق ھۇجۇم قوزغاپ ياخشى ئۈنۈمگە ئېرىشتى، ئەزا ئالماشتۇرۇشمۇ ناھايىتى ئۈنۈملۈك بولدى، ئاساسلىق ھۇجۇمچى پەرھاتجان نىياز ۋە سول بېك پەرھاتجان ساتتار(يارىدار) يوق ئەھۋالدا ئۇلار 4:1 نەتىجە بىلەن يار كوماندىسىنى ئۇتۇپ تۇنجى غەلىبىنى قولغا كەلتۈردى. ئاتەش ج خ كوماندىسىنىڭ ئەزالىرىنىڭ ھەممىسى ج خ ساھەسىدە خىزمەت قىلىۋاتقان خىزمەتچىلەر بولۇپ، ئەسلىدىكى ئەلقىيانىڭ قاپقىچىسى ئادىل ۋە بىرقىسىم يېڭى ئەزالارنىڭ قوشۇلۇشى بىلەن كوماندىنىڭ ئەمەلىي كۈچى خىلىلا كۈچىيىپ قالغان ئىدى. ئەسلىدىكى ئەزالار ئوتتۇرىسىدىمۇ قىشلىق ئايلانمىدىكى مۇسابىقە ئارقىلىق ماسلىشىش شەكىللىنىپ سەل قارىغىلى بولمايدىغان رەقىپ كوماندىغا ئايلاندى.
يار ئوتتۇرا كوماندىسى بولسا مەشقاۋۇل ئەلىجاندىن باشقىلارنىڭ ھەممىسى كىچىك ئوقۇغۇچىلار بولۇپ، ئۇلار ئاساسلىقى پۈتۈن سەپ بۇيىچە ھۇجۇم ۋە پۈتۈن سەپ بۇيىچە مۇداپىئەگە تايىنىپ ياخشى ئۈنۈملەرگە ئېرىشكەن ئىدى، بولۇپمۇ قىشلىق ئايلانمىنىڭ دەسلىپىدە ئۇلار نەتىجە جەھەتتىن بىرلەشمىدە ئالدىنقى ئورۇندا تۇرغان ئىدى. يار ئوتتۇرىنىڭ كوماندا ئەزالىرىدىمۇ ئاز تۇلا ئۆزگىرىش بولۇپ، قوشنا كوماندىغا بىر قانچە ئەزانى چىقىرىپ، بىرقانچە يېڭى ئەزا قوبۇل قىلغان ئىدى. بۇ قېتىمقى مەغلۇبىيەتتىن كېيىن ئۇلار سەپ تۈزۈلمىسىدە قانداق ئۆزگىرىش قىلاركىن، كېيىنكى ئايلانمىدا كۆرەرمىز.

چۈشتىن كېيىنكى 2- مەيدان سەرناز (ئەسلىدىكى ئەزىمەتلەر كۇلۇبى) كوماندىسى بىلەن ۋىلايەتلىك تەجرىبە ئوتتۇرا مەكتەپ (ئەسلىدىكى «چۈنچە» ساياھەت ئائىلىسى) كوماندىسى ئوتتۇرىسىدا ئېلىپ بېرىلدى.


سەرنازنىڭ كونا ئەزالىرىدىن بىر قانچىسى ئوقۇش، خىزمەت مۇناسىۋىتى بىلەن ئىچكىرى ئۆلكىلەرگە كېتىپ قالغاچقا ئەزا تولۇقلاشقا ئېھتىياجلىق ئىدى. شۇڭا ئۇلار ئەزا تەڭشەش مەزگىلىدە پۇرسەتنى چىڭ تۇتۇپ بىرقانچە يېڭى ئەزا قوبۇل قىلدى. كاپىتان يۈسۈپجان يارىدار ھالەتتە مەيداندا پىداكارلىق بىلەن تۆمۈر بىكلىك ئورنىدا تۇرۇپ قارشى تەرەپنىڭ شىددەتلىك ھۇجۇمىدىن بىرقانچىنى ئۈزۈپ تاشلىدى. ئۇلارنىڭ غوللۇق ھۇجۇمچىسى دىلمۇرات بىر ئىختىيارى توپ ۋە بىر نۇقتا توپ پۇرسىتىنى چىڭ تۇتۇپ، كوماندىنى ئىككى توپ ئۈستۈنلۈككە ئېرىشتۈردى.


تەجرىبە ئوتتۇرا مەكتەپ كوماندىسى بولسا ئەسلىدىكى كاپىتان ۋارىسجان ۋە غوللۇق بېك ئېلشاتجاندىن ئايرىلىپ پۈتۈنلەي تولۇق ئوتتۇرا مەكتەپ ئوقۇغۇچىلىرىدىن تەشكىللەنگەن ئوقۇغۇچىلار كوماندىسىغا ئايلانغان ئىدى. ئۇلار ئىككى توپ ئارقىدا قالغان ئەھۋال ئاستىدا يېڭى ئەزا دىليار (ئەسلىدىكى ئەلقىيا كوماندىسىدىن ئالمىشىپ كەلگەن، تالانتلىق نوتا مۇكاپاتىغا ئېرىشكەن) بىر توپ ئۇرۇپ كوماندا ئەزالىرىنى رىغبەتلەندۈردى. ئەزالار قايتىدىن غەيرەتكە كېلىپ، مەيدان كەڭلىكىدىن ئۈنۈملۈك پايدىلىنىپ، يان ۋە ئوتتۇرا ھۇجۇملارنى مۇۋاپىق تەڭشەپ ئالدىنقى يېرىم مەيداندا نەتىجىنى 2:2 قىلىپ تەڭلەشتۈرىۋالدى. كېيىنكى يېرىم مەيداندا ئىككى تەرەپ بىردىن توپ ئۇرۇپ نەتىجە 3:3 بولدى، شۇنىڭدىن كېيىن نەتىجىدە ئۆزگىرىش بولمىدى. ئاخىرىدا ئىككى كوماندا يازلىق ئايلانمىدىكى تۇنجى جەڭنى تەڭلىشىش بىلەن ئاخىرلاشتۇردى.


ئەڭ ئاخىرقى مەيداندا بۈگۈنكى زەردارلار كۈرىشى دەپ قارالغان ئەلقىيا بىلەن «قاڭقىل تائاملىرى» ئوتتۇرىسىدا كەسكىن جەڭ ئېلىپ بېرىلدى. ئۇلار بىر – بىرى بىلەن كۆپ ئۇچراشقان، ئۆزئارا - چۈشىنىشىدىغان بولغاچقا قارشى تەرەپكە ئاسانلىقچە پۇرسەت بەرمىدى، مۇسابىقە ئىنتايىن كەسكىن ئېلىپ بېرىلدى.
قاڭقىل كوماندىسىدىكى بىرقانچە ياش ئەزىمەتلەردىن باشقىسىنىڭ ھەممىسى دېگۈدەك پىشقەدەم ئەزالاردىن تەشكىللەنگەن بولۇپ، مول تەجرىبىگە ئىگە پارتىزانلارغا ئوخشىتىشقا بولاتتى. ئۇلارنىڭ كاپىتانى خالمۇرات ئاكىمىز يېشىنىڭ چوڭىيىپ قالغىنىغا قەتئىي تەن بەرمىگەندەك قىلاتتى. ئەزەلدىن تاماكا دېگەندەك كەيىپلەردىن يىراق تۇرغاچقا بەدەن سۈپىتىمۇ خىلى ياخشى ساقلانغان ئىدى. ياش ئادەمگە باقمايدۇ دېگەندەك ئۇنىڭ بەش – ئون يىل ئىلگىرىكى چەپدەسلىكى سەل چېكىنىپ قالغان بولسىمۇ لېكىن ئۇ ۋە ئۇنىڭ قۇرداشلىرىنىڭ تىرىشچانلىقى ئۇلارنىڭ ئەينى چاغلاردىكى «ئىتتىپاق لۇڭقىسى» دىكى ياش چاغلىرىنى كۆز ئالدىمىزغا كەلتۈردى. ئۇلار بۇ تىرىشچانلىقى بىلەن يېتىلىۋاتقان ياز بۇژغۇنلارغا مەدەت بەرگۈسى، ئۈلگە بولغۇسى.  ئەلقىيا كوماندىسىغا كەلسەك ئۇلار بىرلەشمىمىزدىكى زەردار كوماندا، بۇ كوماندا ئەنئەنىۋىي 9 – نومۇرغا تايىنىۋېلىش ئىدىيىسىنىڭ ئىسكەنجىسىدىن پۈتۈنلەي ئايرىلغان بولۇپ، ھەقىقىي مەنىگە ئىگە يارام ھۇجۇمچىدىن پەقەت بىرىلا بار ، ئۇلار ئوتتۇرا مەيداننى تولۇق كونترول قىلىپ، كەينى سەپتىمۇ خۇددىي مەشق قىلىۋاتقاندەك ئازادە پاسلىشالايدۇ. پۇت ئاستى تېخنىكىسىمۇ ئىنتايىن ياخشى بولۇپ، تۆۋەن دەرىجىلىك سەۋەنلىك ئاساسىي جەھەتتىن كۆرۈلمەيدۇ. ئەڭ مۇھىمى ئۇلاردىكى ماسلىشىشچانلىق يۇقىرى چەككە يەتكەن بولۇپ، مەيداندىكى مەستانىلەر خۇددىي تېلېۋىزوردىن يۇقىرى سەۋىيەلىك نەق مەيداندىن ئۇلاپ تارقىتىۋاتقان ياۋرۇپا مۇسابىقىلىرىنى كۆرۈۋاتقاندەك تۇيغۇغا كېلىپ قالىدۇ.


مۇسابىقە جەريانىدىكى كۆرۈنۈش

مۇسابىقىگە شۇ تەرىقىدە كەسكىن ئېلىپ بېرىلدى. مۇسابىقە ئەلقىيا كوماندىسىدىكى بېك ۋەلىنىڭ بىر توپ ئۇرۇشى بىلەن ئاخىرلاشتى. گەرچە قاڭقىل كوماندىسى 1:0 نەتىجە بىلەن ئۇتتۇرۇپ قويغان بولسىمۇ، ئۇلارنىڭ تىرىشچانلىقى ھەممىنىڭ ئېتىراپ قىلىشىغا ئېرىشتى، ناۋادا نەتىجە كىرگۈزگەن توپ بىلەن ھېسابلانمايدىغان ئىش بولغان بولسا بۇ مەيداندا مەغلۇپ بولغۇچى يوق دېيىشكە بولىدۇ.





نەق مەيدان نومۇر خاتىرلىگۈچى

شۇنداق قىلىپ تۇرپان بىرلەشمىسىنىڭ باھار پەسىللىك ئايلانمىسى مۇۋەپپەقىيەتلىك باشلاندى. 24 – مارت كۈنى ھاۋا خىلىلا ئىسسىپ قالغان ئىدى. ئەزىمەتلەر ئەمدىلا قەھرىتان قىشنىڭ سوغۇقلىرىدىن قۇتۇلۇپ، يەڭگىل كېيىملەر بىلەن مەيدانغا چىقىدىغان بولدۇق دەپ خۇش بولۇپ تۇرسا ئەتىگەندىلا ھاۋا ئىسسىپ كەتتى، شۇنداقتىمۇ سوغۇق قىشتىكى قېلىن قارنىڭ ئۈستىدە تىيىلىپ تۇرالماي قالغاندىمۇ داۋاملاشقان مۇسابىقە ھاۋارايىنىڭ ئىسسىق – ياكى سوغۇق بولۇشى بىلەن ھەرگىز توختاپ قالمىغۇسى. ئىشىنىمىزكى بىزنىڭ تىرىشچانلىقىمىز ھەرگىز بىھۇدە كەتمەيدۇ. بىرلەشمە ئارقىلىق نۇرغۇن كىشىلەر خۇشاللىق تاپتى. تۇرمۇشتىن كېلىدىغان يەنە بىر خىل بەختنى ھېس قىلىشتى. ئەزىمەتلەرگە ئالاھىدىلىكىنى جارى قىلدۇرۇپ، ئۆزىنى نامايان قىلىدىغان سەھنە ھازىرلاندى.
«بىر قىسىم ئەزىمەتلىرىمىز يەرلىكتىكى بەزى قېرىنداش مىللەتتىن بولغان مەستانىلەرنىڭ چوقۇنغۇچىسىغا ئايلاندى. بىرلەشمە مۇسابىقىگە تەييارلىق قىلىش، چېنىقىش، بەدەن ساپاسىنى ساقلاپ قىلىش قاتارلىق تەييارلىق خىزمەتلەر بەزى قېرىنداشلارنىڭ يولدىن چىقىدىغان، ئۇيۇنچۇقخانىغا، كەيپ – ساپاغا بېرىلىدىغان يامان ئىللەتلىرىگە پۇرسەت بەرمىدى. مۇشۇنداق بولغاندا ئارتۇقچە پائالىيەتلەرمۇ ئاز  بولىدۇ – ئەلۋەتتە. » (بىر خەنزۇ يولداشنىڭ مىكرو بىلۇگىدىن ئۈزۈپ ئېلىندى)


تۇرپان بىرلەشمىسىدە ھازىر ئەلقىيا كوماندىسى، ئىتتىپاق كوماندىسى، «قاڭقىل تائاملىرى» كوماندىسى، ئاتەش ج خ كوماندىسى، تەجرىبە ئوتتۇرا مەكتەپ كوماندىسى، يار ئوتتۇرا مەكتەپ كوماندىسى، سەرناز كوماندىسى قاتارلىق سەككىز كوماندا بار.


تۇرپان بىرلەشمىسىنىڭ بۇ يىللىق پەسىللىك مۇسابىقە ئورۇنلاشتۇرۇشى تۆۋەندىكىچە:
24 – مارت باھار پەسىللىك پەسىللىك ئايلانما باشلىنىپ يەتتە ھەپتە ئېلىپ بېرىلغاندىن كېيىن ئالدىنقى يېرىم ئايلانما تۈگەيدۇ، ۋاقىتلىق ئەزا تەڭشەش ئېلىپ بېرىلىپ، كېيىنكى يېرىم ئايلانما داۋاملىشىدۇ.
كۈز پەسىللىك ئايلانما 18- ئاۋغۇسىت باشلىنىدۇ، (22 – سېنتەبىردىن 27 سېنتەبىرگىچە خەلقئارا قۇملۇق پۇتبولى مۇسابىقىسى سەۋەبى بىلەن بىر ھەپتە توختايدۇ)، 29 – سېنتەبىر كۈز پەسىللىك ئايلانمىنىڭ ئالدىنقى يېرىم ئايلانمىسى ئاخىرلىشىپ، ئەزا تەڭشەش ۋاقتى باشلىنىدۇ. (2- ئۆكتەبىردىن 7- ئۆكتەبىرگىچە تۇرپان تەكلىپ مۇسابىقسى  سەۋەبىدىن بىر ھەپتە توختايدۇ)، 13- ئۆكتەبىر كېيىنكى يېرىم ئايلانما باشلىنىپ، 24- نويابىر كۈز پەسىللىك ئايلانما پۈتۈنلەي ئاخىرلىشىدۇ.

ankar528

تۇرپان بىرلەشمىسىنىڭ مۇۋاپىقىيەتلىك باشلانغانلىقىنى قىزغىن تەبرىكلەيمەن!
بۇ پەسىللىك بارلىق مۇسابىقىلەرگە ئۇتۇق تىلەيمەن!

ئاتەش

رەھمەت، كۆپتىن كۆپ رەھمەت، دېگىنىڭىز كەلسۇن.

ئوسكار

مۇسابىقە  ھەقىقەتەن داغدۇغىلىق باشلىنىپتۇ...ھەم سەۋييسىمۇ خېلى يۇقىرى ئوخشايدۇ.
تۇرپان بىرلەشمىسنىڭ مۇۋاپىقىيەتلىك باشلىنىپ مۇۋاپىقىيەتلىك ئاخىرلىشنى ئۈمۈد قىلىمىز.    مۇسابىقە نەتىجسنى داۋاملىق يوللاپ تۇرغايسىز.

ئاتەش

ئوسكار يوللىغان ۋاقتى  2013-3-25 22:42
مۇسابىقە  ھەقىقەتەن داغدۇغىلىق باشلىنىپتۇ...ھەم سەۋييس ...

چوقۇم.

nuri

تۇرپاندا پۇتبول مۇسابىقىلىرىنىڭ ئۈزۈلۈپ قالماي داۋاملىشىۋاتقانلىقىدىن بەك خوشال بولدۇم...

بوس

يارايدۇ ...

ئۇچقۇنى

قارىغاندا مۇسابىقىنى خېلى سىستىمىلىق ،تەشكىللىك ئېلىپ بېرۋاتقان ئوخشايسىلە ھە،ئىشلىرىڭلا ئۇتۇقلۇق بولسۇن.

ankar528

ھەر قايسى ۋىلايەتلەردىمۇ مۇشۇنداق تۇرپانغا ئوخشاش ، ۋىلايەت رەھبەرلىرى قوللاپ، پۇتبولچىلار بىرلەشمىسى تەشكىللىك ئۇيۇشتۇرۇپ ، باش بولۇپ مۇسابىقە ئۇيۇشتۇتۇپ تۇرسا، شىنجاڭنىڭ پۇتبولچىلىق ئىشلىرىنىڭ تەرەققىياتىنى ، سەۋىيىنى يەنىمۇ بىر بالداق يۇقرى كۆتۈرۈشتە تۈرۈتكىلىك رول ئوينىغان بولاتتى.
لىكىن زە،،،،،،،،،،،،،،
مۇشۇ پۇتبولچىلىقىمىزنىڭ ئاممىۋى ئاساسى كۈچلۈكرەك بولغان  قەشقەر ، ئاتۇش ، غۇلجا تەرەپلەردە مۇقۇملىق بىرىنجى ئورۇندا، ئۇنىڭدىن باشقا ھىچقانداق ئىش يوق.

ئاتەش

ئۇچقۇنى يوللىغان ۋاقتى  2013-3-25 23:33
قارىغاندا مۇسابىقىنى خېلى سىستىمىلىق ،تەشكىللىك ئېلى ...

بىرلەشمىنى مۇنتىزىملاشتۇرۇشقا ئىمكانىيەتنىڭ بارىچە تىرىشچانلىق كۆرسىتىۋاتىمىز.

eliborisi

سىلەرگە قاراپ ھەۋىسىم كىلىپ كىلىۋاتىدۇ .ئىشلىرىڭلار كۆڭىللىك ،ئۇتۇقلۇق ، مۇۋاپىقىيەتلىك بولسۇن ، چۈشەندۈرۈشلەرنى كۆرۈپ ئۈزۈمنى نەق مەيداندا تۇرغاندەك ھېس قىلىپ قالدىم ...

ئەلبارىس

تۇرپان پۇتبولچىلىقىغا يېقىندىن دىققەت قىلىپ كېلىۋاتىمەن. ھەقىقەتەن ئادەمنىڭ ھەۋىسى كېلىدۇ، ھېچبولمىسا ئوتيۈرەك ياشلار ئۈچۈن تەپكۈدەك مۇسابىقە بار بولدى!
تۇرپان بىرلەشمىسىنىڭ تېخىمۇ راۋاجلىنىشىنى ئۈمۈد قىلىمەن!