يېڭى زېلاندىيىدىكى ئاۋكلاند ئۇنىۋېرسىتېتىنىڭ پروفېسسورى رۇسسېل گەرىنىڭ تەتقىقات نەتىجىسىگە قارىغاندا، تەيۋەن ئارىلىدىكى يەرلىك خەلق 'پولىنىسلار' دەپ ئاتىلىدۇ. يەرلىك تەيۋەنلىكلەر ئۆزلىرىنى 'ئارال خەلقى' دەپ ئاتايدۇ.
ئەمەلىيەتتە 'پولىنىس' دېگەن بۇ قەدىمقى گىرىك تىلىدىكى ئاتالغۇمۇ 'ئارال خەلقى' دېگەن مەنىنى ئىپادىلەيتتى. فرانسىيە ئاگېنتلىقىنىڭ ۋېللىڭتوندىن بايان قىلىشىچە، يېڭى زېلاندىيىدىكى ئالىملارنىڭ بۇ تەتقىقاتلىرى ئىنسانىيەت قان سېستىمىسىنى پەرقلەندۈرىدىغان DNA تەجرىبىسى ئارقىلىق ئىسپاتلاندى.
يەرلىك تەيۋەنلىكلەر تىنچ ئوكياندىكى ئاراللاردا بەش مىڭ يىللاردىن بۇيان ياشاۋاتقان ئارال خەلقنىڭ بىر قىسمى
خەۋەردە بايان قىلىنىشىچە، پروفېسسور گەرى تەيۋەن، فىلىپىن ئاراللىرىدىن ئاۋسترالىيىگىچە بولغان تىنچ ئوكياندىكى مىڭلىغان - تۈمەنلىگەن ئاراللاردا بەش مىڭ يىللاردىن بۇيان ياشاپ كېلىۋاتقان يەرلىك خەلقلەرنىڭ 1000 خىلدىن تىل ۋە شىۋىلىرىنى، كومپيۇتېر تېخنىكىسىدىن پايدىلىنىپ سېلىشتۇرۇپ تەتقىق قىلغان.
پروفېسسور گەرى تەتقىقاتىنى ئارال تىللىرىدىكى ﻫايۋانات ناملىرى، سان، رەڭ، ﻫەرىكەت ناملىرى قاتارلىق ئەقەللىي سۆزلەرنى سېلىشتۇرۇشتىن باشلىغان. ئۇنىڭ خولاسە چىقىرىشىچە، تەيۋەن ئارىلىدىكى يەرلىك خەلق تەيۋەن، فىلىپىن ئاراللىرىدىن ئاۋسترالىيىگىچە بولغان كەڭ دائىرىدە تىنچ ئوكيانغا چېچىلغان مىڭلىغان - تۈمەنلىگەن ئاراللاردا بەش مىڭ يىللاردىن بۇيان ياشاپ كېلىۋاتقان يەرلىك ئارال خەلقنىڭ بىر قىسمى.
جوغراپىيە، گېئولوگىيە ئەۋرۇىشكىلىرىدىن قارىغاندا، تەيۋەن جۇڭگونىڭ بىر قىسمى ئەمەس
ﻫازىر تەيۋەندە تۇرۇۋاتقان مۇستەقىل يازغۇچى لىن باۋخۇا ئەپەندىنىڭ ئۆزى ئەمەلىيەتتە كۆزەتكەن ۋە ﻫېس قىلغانلىرىغا ئاساسەن بايان قىلىشىچە، تەيۋەنلىكلەر جۇڭگودىن كەلگەنلەردىن باشقىلارنى 'يەرلىك خەلق' دەپ ئاتاپ كېلىۋاتىدۇ.
ئۇنىڭ ئېيتىشىچە، تەيۋەندە بۇ تېمىنى تەتقىق قىلىۋاتقان لى شاۋفېڭ ئىسىملىك بىر پروفېسسور بار، ئىنسانىيەتنىڭ قان سېستىمىسىنى تەتقىق قىلىۋاتقان لىن مالى ئىسىملىك يەنە بىر دوختور بار. ئۇلارنىڭ قارىشىچە، تەيۋەننىڭ يەرلىك تىلى جەنۇبىي تىنچ ئوكيان تىللىرى گۇرۇپپىسىغا تەۋە. يەرلىك تەيۋەنلىكلەر ئەمەلىيەتتە فىلىپىنلىكلەر ۋە باشقا جەنۇبىي ئوكيانلىقلار بىلەن بىر مىللەت. ئاق تەنلىك، قارا تەنلىك، سېرىق تەنلىك دەيدىغان ئاتاش بۇيىچە ئاتالسا، تەيۋەنلىكلەر قوڭۇر تەنلىكلەر بولىدۇ.
- مەن ﻫىندونېزىيىدە 10 نەچچە تۇرغان ، - دەپ بايانىنى داۋاملاشتۇرىدۇ لىن باۋخۇا ئەپەندى، - مىنىڭ ئاددى ئۇسۇل بىلەن سېلىشتۇرۇشىمچىمۇ، تەيۋەندىكى يەرلىك خەلقنىڭ چىرايى ﻫىندونېزىيە ئاراللىرىدىكى، فىلىپىن ئاراللىدىكى ئادەملەرگە ئوخشايدۇ، خىتايلارغا ئوخشىمايدۇ. مەن تەيۋەننىڭ جەنۇبىدىكى بىر مۇزىيىغا باردىم، ئۇنىڭدىكى جوغراپىيە، گېئولوگىيە ئەۋرىشكىلىرىدىن قارىغاندا، تەيۋەن جۇڭگونىڭ بىر قىسمى ئەمەس. جۇڭگولۇقلار بۇ ئارالغا كېيىن كەلگەن. تەيۋەنلىكلەرنىڭ ئىنسانىيەت بەلگىلىرى ۋە تىل تەۋەلىكى تىنچ ئوكيان گۇرۇپپىسىغا تەۋە. تەيۋەندىكى بەزى پارلامىنت ئەزالىرىنىڭ سۆزىنى ئاڭلاۋاتىمىز، ئۇنىڭدىكى بىر مۇنچە ئاساسىي ئاتالغۇلار ﻫىندونېزىيە، فىلىپىن تىللىرى،خەنزۇ تىلى ئەمەس.
مەنبە : تۈركىيە خەۋەرلىرى
