تۈركىيەدە "مەخمۇد قەشقىرى- تۈركنىڭ تىلى" ناملىق ھۆججەتلىك فىلىم ئىشلەندى بىرلەشكەن دۆلەتلەر تەشكىلاتى ئۇنەسكو 2008 - يىلىنى مەخمۇت قەشقىرى يىلى دەپ ئېلان قىلغاندىن كېيىن، دۇنيانىڭ ﻫەرقايسى جايلىرىدا ﻫەرخىل پائالىيەتلەر بىلەن مەخمۇت قەشقىرى تۇغۇلغانلىقىنىڭ 1000 يىللىقى قۇتلۇقلانماقتا.
بۇنىڭ بىلەن بىرلىكتە مەخمۇت قەشقىرىنى ئاۋام خەلققە تونۇتۇش ئۈچۈن تېلېۋىزىيىلەردە مەخمۇت قەشقىرى ﻫەققىدە سۆﻫبەت پروگراممىلىرى ۋە مەخمۇت قەشقىرىنىڭ ﻫاياتى تونۇشتۇرۇلغان كىچىك تىپتىكى ﻫۆججەتلىك فىلىملەر كۆرسىتىلمەكتە.
يېقىندا قائان گۇنەر ئەپەندى بىلەن بىلگۈتاي ئۈمىت گۈزەلبېي ئىستانبۇل شەﻫەرلىك ﻫۆكۈمەتىگە قاراشلىق مەدەنىيەت شىركىتىنىڭ ئىقتىسادىي ياردىمى بىلەن `مەخمۇت قەشقىرى تۈركنىڭ تىلى` ئىسىملىك بىر ﻫۆججەتلىك فىلىم ئىشلىگەن.
بۇ ﻫۆججەتلىك فىلىم 5 قىسىمدىن تەركىپ تاپقان ، ﻫەر قىسىم 25 مىنۇت بولۇپ، جەمىي 125 مىنۇت ئىكەن. بۇ ﻫۆججەتلىك فىلىم 12 - ئاينىڭ ئوتتۇرىلىرىدىن باشلاپ تۈركىيىدىكى تېلېۋىزىيىلەردە بېرىلىشكە باشلايدىكەن.
بۇ ﻫۆججەتلىك فىلىم ئۇلۇغ ئالىم مەخمۇت قەشقىرى تۈركىي تىللار دىۋانى ناملىق ئەسىرىنى يېزىش ئۈچۈن ئايلانغان تۇپراقلار يەنى ﻫازىرقى قەشقەر، ئۆزبېكىستان، قازاقىستان، قىرغىزىستان، تۈركمەنىستان قاتارلىق يەرلەردە سىنئالغۇغا ئېلىنغان بولۇپ، بۇ فىلىمنى تارتىش ئۈچۈن فىلىم ئىشلىگۈچىلەر جەمىي 12 مىڭ كىلومېتىر يول يۈرگەن.
بىز بۇ فىلىم ﻫەققىدە تېخىمۇ تەپسىلى مەلۇمات ئېلىش ئۈچۈن، فىلىمنىڭ رېژىسسورى بىلگۈتاي ئۈمىت گۈزەلبېي ئەپەندى بىلەن تېلېفون زىيارىتى ئېلىپ باردۇق.
بىلگۈتاي ئۈمىت گۈزەلبېي ئەپەندى بۇ ﻫۆججەتلىك فىلىمنى ئىشلەشنىڭ ئەﻫمىيىتى ئۈستىدە توختىلىپ، 2008 - يىلى مەخمۇت قەشقىرى يىلى مۇناسىۋىتى بىلەن ئىلمىي مۇﻫاكىمە يىغىنلىرى ۋە ﻫەر خىل مۇراسىملارنىڭ ئۆتكۈزۈلۈۋاتقانلىقىنى، بۇ خىل يىغىنلارنىڭ مۇتەخەسسىسلەرنىڭ مەخمۇت قەشقىرىنى ۋە ئۇنىڭ ئەسىرىنى ئۆگىنىشى ئۈچۈن پايدىلىق ئىكەنلىكىنى، ئەمما ئۆزلىرى ئىشلىگەن بۇ ﻫۆججەتلىك فىلىمنىڭ مىليونلارچە ئاۋام خەلققە مەخمۇت قەشقىرى ۋە ئۇنىڭ ئۆلمەس ئەسىرى تۈركىي تىللار دىۋانىنى تونۇشتۇرۇش ئۈچۈن زور ئەﻫمىيەتكە ئىگە ئىكەنلىكىنى ئېيتتى.
تۈركىيە خەۋەرلىرى( شەبنەم. ئۇيغۇرئاي تەرجىمىسى)[ بۇ يازما udun تەرىپىدىن 2008-12-13 05:21 دە قايتا ]
ئورخۇن مۇنبىرى » مەھمۇت كاشىغەرى ۋە «تۈركى تىللار دىۋانى» » تۈركىيەدە "مەخمۇد قەشقىرى- تۈركنىڭ تىلى" ناملىق ھۆججەتلىك فىلىم ئىشلەندى
